Ataatarpooq ilinnut qanoq isumaqarpa?

QINNUT ataatarpooq, Jiisusip qaqqami oqaluusianiittoq, Matthæusimi kapitali 6-imi, versini 9-mit 13-imut, allassimavoq. Qinnutip tamatuma qinnutiginngitsiarnerani Jiisusi ima oqarpoq: „Qinusaraangassi Guutimik nalusutut iliortassanngilasi oqaaserpassualiorlusi [oqaatsisi uteqattaarlugit, NV]; taakkumi isumaqartarput oqaatsitik amerlanaarunikkit tusarneqarumaarlutik.“ — Matthæusi 6:7.

Taamaattumik erseqqippoq Jiisusip qinnutip ataatarpuup oqaasertai eqqoqqissaartumik alanngaarnissaat siunertarisimanngisaannaraa. Ilumoorpoq kingusinnerusukkut qinnut taanna uteraa tusarnaartut allat iluaqutiginiassammassuk. (Lukasi 11:2-4) Matthæusilli Lukasillu iivangkiiliulersaarutaanni qinnutip oqaasertai assigeeqqissaanngillat. Aammalu qinnutit Jiisusip ajoqersugaasalu piffinni allani qinnutigisaasa ersersippaat ataatarpuup immikkut oqaasertaliorneri issuaqqissaanngikkaat.

Sooq ataatarpooq Biibilimi allanneqarsimava? Qinnut najoqqutassaasoq taanna aqqutigalugu Jiisusip ilinniartippaatigut Guutip qinnutivut akuerisinnaassappagit suut qinnutigisinnaanerivut. Aamma tassani inuunermi apeqqutit tunngaviusut ilaat akineqarput. Taamaattumik ataatarpuumi immikkoortut tamaasa sammeriartigit.

Guuti qanoq ateqarpa?

„Ataatarput qilanniittutit! Aqqit illernartitaali.“ (Matthæusi 6:9) Oqaatsit taakku qinnummi najoqqutassaasumi aallaqqaasiutigineqartut atornerisigut, Guuti ’Ataatatsinnik’ taaneratigut, taanna qanillissinnaavarput. Soorlu meeqqap ataataminut asannillunilu paasinnittumut saaffiginninniarnera pissusissamisoortoq, Ataatatsinnut qilammiusumut saaffiginnissinnaavugut tatigalugu tusarnaassagaatigut. „Ilinnut qinnutitsinnik tusartartutit. Inuit tamarmik ornissavaatsit,“ kunngi Daavi erinarsorpoq. — Tussiaat 65:3.

Guutip aqqata illernartitaanissaata qinnutiginissaanik Jiisusip ilinniartippaatigut. Guutili qanoq  ateqarpa? Biibilimi ima akineqarpoq: „Illit kisivit — aqqit tassaasoq Jahve — Qutsinnerussaartuusutit nunarsuarmi tamarmi.“ (Tussiaat 83:19) Guutip aqqa Biibilimi takunikuuiuk?

Itsarli Biibili assilillugu assammik allakkani Guutip aqqa 7000-eriangajallugu atorneqarsimavoq. Biibilimilli nutserisut ilaasa ateq taanna nutsikkaminni ilanngussimanngilaat. Taamaattumik Pinngortitsisoq aterminik illernarsisitseqqullugu qinnuiginissaa naleqquppoq. (Ezekieli 36:23) Qinnut taamaattoq naapertorlugu iliuuseqarsinnaavugut, ilaatigut Guutip aqqa Jehova (imaluunniit Jahve) Guutimut qinugaangatta atortarlugu.

Arnaq Patriciamik atilik katuulitut perorsarneqarsimavoq ataatarpoorlu ilisimalluarlugu. Jehovap Nalunaajaasuisa ilaata Biibilimi Guutip aqqa takutimmagu qanoq qisuariarpa? Taanna ima oqaluttuarpoq: „Upperisinnaanngilara! Taava nammineq Biibilera aavara, tassanilu aamma taama allassimavoq. Tamatuma kingorna oqaluussisartup Matthæusi 6:9, 10 uannut takutippaa nassuiarlugulu Guutip aqqa ataatarpuumut atassuteqarluinnartoq. Tamanna killitsissutigeqaara, qinnuigaaralu Biibilimik atuaqqissaaqatigeqqullunga.“

Guutip piumasaa nunami pissaaq

„Naalagaaffiit tikiulli, piumasat qilammisut nunamissaaq pili.“ (Matthæusi 6:10) Jiisusip qinnutaata najoqqutassaasup ilaa taanna qanoq eqquutissava? Inuit amerlanersaasa qilak eqqissisimaffiusutut toqqissisimaffiusutullu takorloortarpaat. Biibilimi qilak Jehovap ’ineqarfiatut illernartutut naalannartutullu’ eqqaaneqarpoq. (Esaja 63:15) Taamaattuminguna qinusartugut Guutip piumasaa nunami „qilammisut“ peqqullugu. Tamannali piviusunngorsinnaassava?

Jehovap pruffiitia Danieli ima siulittuivoq: „Qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat [nunamiittut] tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Qilammi naalagaaffik taanna, imaluunniit naalakkersuisut taakku, qanittukkut akuliutissapput naapertuilluartumillu aqutsinissaq iluaqutigalugu nunarsuarmi tamarmi eqqissineqalernissaa isumagissallugu. — 2 Petrusi 3:13.

Guutip naalagaaffiata tikiunnissaanik, piumasaatalu nunami pinissaanik, qinnutiginninneq uppernermut ersiutaavoq — upperneq pakatsiffiussanngitsoq. Apustili kristumiu Johannesi ima allappoq: „Tusarpara nipi nipitoqisumik issiavissaarsuarmit tutsiuttoq: Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit  allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Johannesilu nangippoq: „Issiavissaarsuarmilu issiasoq oqarpoq: . . . ’Allagit, oqaatsit tamakku uppernarlutillu ilumoormata.’“ — Saqqummersitat 21:3-5.

Timikkut pisariaqartitavut pillugit qinuneq

Jiisusip qinnummi najoqqutassaasumi oqaasiisa ersersippaat qinnutivut pingaarnerpaamik Guutip aqqanut piumasaanullu attuumassuteqartariaqartut. Nangillunili qinnummi najoqqutassaasumi qinnutit immitsinnut tunngasut Jehovamut naleqquttumik qinnutigisinnaasavut oqaatigineqarput.

Taakkua siullersaat imaappoq: „Inuussutissatsinnik ullumi tunisigut.“ (Matthæusi 6:11) Pigissaartuunissamik qinnutaanngilaq. Jiisusip kajumissaarpaatigut ’inuussutissatsinnik ullut tamaasa tunineqarnissarput’ qinnutigisaqqullugu. (Lukasi 11:3) Ataatarpooq naapertorlugu Guuti asallugulu naalakkutsigu tatiginnilluta ullormut pisariaqartitatsinnik matussusiinissaanik qinnuigisinnaavarput.

Aningaasaqarnikkut ajornartorsiutit pillugit pisariaqanngitsumik ernumassuteqarneq pissutigalugu anersaakkut pisariaqartitavut isumaginngitsoorsinnaavavut taamaattumillu Guutip uagutsinnut piumaffiginninneratut iliunngitsoorluta. Inuunitsinnili Guutimik pallorfiginninneq salliutikkutsigu qularissanngilarput atorfissaqartitavut, assersuutigalugu nerisassat atisassallu, pillugit qinnutivut tusarneqassasut. Jiisusi oqarpoq: „Guutip naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ (Matthæusi 6:26-33) Guutip iluarneranik ujarlerneq unamminiarnartuuvoq tamatta ajortiliugatta taassumanngalu isumakkeerfigineqarnissarput pisariaqartikkatsigu. (Romamiut 5:12) Qinnummi ataatarpuumi tamanna aamma sammineqarpoq.

Isumakkeerfigineqarnissamik qinnut

„Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“ (Matthæusi 6:12) Lukasip iivangkiiliuani ataatarpuup issuarneqarnerani oqaaseq „akiitsukkatsinnik“ atorneqanngilaq, kisianni „ajortitsinnik“. (Lukasi 11:4) Jehova Guutilli ajortitsinnik ilumut isumakkeerfigissavaatigut?

Itsaq Israelimi kunngi Daavi sualuttunik ajortuliorsimavoq, peqqissimivorli tatiginnillunilu ima qinulluni: „[Jehova], illimmi ajunngitsuuvutit isumakkeerfiginnikkumasarlutillu, ilumoorsutsit angeqaaq ilinnik torlorfiginnittunut tamanut.“ (Tussiaat 86:5) Eqqarsaat tuppallernangaarami. Ataatarput qilammiusoq ajortuliaminnik peqqissimissutiginnillutik torlorfiginnittunut „isumakkeerfiginnikkumasarpoq“. Akiitsunik taarseeqqusinngilluinnarnertut Jehovap ajortitsinnik isumakkeerfigilluinnarsinnaavaatigut.

Jiisusili piumasaqaammik ilanngussivoq: Guutimit isumakkeerfigineqarumalluta allat isumakkeerfigisariaqarpavut. (Matthæusi 6:14, 15) Angut naapertuilluartoq Jobi ikinngutiminit pingasunit ajortumik pineqaraluarluni isumakkeerfigai, allaallu qinnullugit. (Jobi 42:10) Uagutsinnik ajortuliorfiginnittut isumakkeerfigisarutsigit Guutip tamanna iluaraa, naakkinninneralu iluaqutigisinnaalissavarput.

Qinnutitsinnik Guutip tusarnaartarnerata taassumunnga akuerineqarusulersissavaatigut. Aamma tamanna ajornanngilaq naammalluinnanngitsuugaluarluta. (Matthæusi 26:41) Tamatumuunattaaq Jehovap ikiorsinnaavaatigut. Jiisusip tamanna ersersippaa qinnut najoqqutassaasoq pingaarutilimmik naggaseramiuk.

Naapertuilluarnerup aqqutaatigoornissamut iluaqutaasussaq

„Ussernartumut pisinnata, ajortumilli annaatsigut.“ (Matthæusi 6:13) Jehovap ussernartumut pisinneq ajorpaatigut ajortuliortittarnataluunniit. Oqaasiani allassimavoq: „Guutimi ajortumit usserneqarsinnaanngilaq, namminerlu kimilluunniit ussiisanngilaq.“ (Jaaku 1:13) Guutip usserneqarnissarput akueraa, ussiisorsuarmilli — ’ajortumit’, Saatani Diaavulutut ilisimaneqartumit — aniguisissinnaavaatigut.

Apustili Petrusip kristumioqatini imatut kajumissaarpai: „Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.“ (1 Petrusi 5:8) Allaat Jiisusi Kristusi naammalluinnartuusoq Saatanimit usserneqarpoq. Diaavulup suna anguniagaraa?  Tassa Jiisusi Kristusimik Guutimut ilumoortumut Jehovamut pallorfiginnikkunnaarsitsinissaq anguniagaraa. (Matthæusi 4:1-11) Guuti kiffartuukkusukkukku Saatanip aamma illit iiniarsarissavaatit.

Saatani Diaavulup silarsuaq pissaaneqarfigisani aqqutigalugu immaqa usserniassavaatigut Guutip iluarinngisaanik iliuuseqartinniarluta. (1 Johannesi 5:19) Taamaattumik Guutimut ikioqqulluta saaffiginnittuartarnissarput pingaaruteqarpoq, ingammik ussernartorsiortinneqartuaraangatta. Aamma Jehova pallorfigisarutsigu oqaasia isumassarsiarititaasoq Biibili naapertorlugu, Diaavulup akiornissaanut ikiorluta aniguisissavaatigut. „Guuti unneqqarippoq,“ Biibilimi allassimavoq, „akuersaarumanngilaa artukkassinnik usserniarnissarsi.“ — 1 Korinthimiut 10:13.

Guutip upperinissaa pisariaqarpoq

Qiimmaallannarpoq nalunagu Ataatatta qilammiusup tamatta immikkut soqutigigaatigut. Allaallu ernerminit Jiisusi Kristusimit qanoq qinusarnissatsinnik ilinniartinneqarnissarput isumagisimavaa. Tamanna Jehova Guutip iluarisaanik iliorusulissutigaarput. Qanoq taamaaliorsinnaavugut?

Biibilimi ima allassimavoq: „Uppersuseqarnani Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.“ (Hebræerit 11:6) Qanoq taamatut uppertoqalersinnaagami? „Upperneq tusakkanit pilersinneqartarpoq,“ Biibilimi allassimavoq. (Romamiut 10:17) Guutimik eqqortumik pallorfiginnikkumasunut tamanut Biibilimi sammineqartut oqaloqatigiissutiginissaat Jehovap Nalunaajaasuisa nuannaraat.

Ataatarpuumik eqqartuineq tamanna immaqa qinnummik tamatuminnga paasisaqarnerussutigaat. Jehova ilisarisimanerulerukku paasilerlugulu „ujarlersini“ akilerumaarai, tamanna Guutimik upperinninnernut nakussatsissutaasinnaavoq. Guuti siunertaalu pillugit ilinniarnerunissat kissaatigaarput, Ataatat qilammiusoq naassaanngitsumik qanittumik attavigilersinnaaniassagakku. — Johannesi 17:3.  (wE 9/15 04)

[Qupp. 5-mi issuagaq]

„Taamaattumik ilissi ima qinussaasi: Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili; inuussutissatsinnik ullumi tunisigut, akiitsukkatsinnillu isumakkeerfigitigut, soorlu uaguttaaq akiitsortivut isumakkeerfigigivut; ussernartumullu pisinnata, ajortumilli annaatsigut.“ — Matthæusi 6:9-13

[Qupp. 7-mi assiliartaq]

Jehovap asasini isumagisarpai

[Qupp. 7-mi assiliartaq]

Diaavulup akiornissaanut Guutip aamma ikiortarpaatigut

[Qupp. 7-mi assiliartaq]

Jobitut ajortuliorfiginnitsivut isumakkeerfigisarutsigit Jehovap nallittuinera iluaqutigisinnaavarput