Malersugaagaluarlutik pilluartut
Malersugaagaluarlutik pilluartut
„Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik.“ — MATTHÆUSI 5:11.
1. Jiisusip ajoqersukkani malersugaagaluarlutik pilluassaneraramigit sumik qularunnaarsippai?
JIISUSIP apustilini Guutip naalagaaffia pillugu oqaluussiartoqqoqqaaramigit paasitippai akerlilersorneqarumaartut. Ima oqarfigai: „Atera pillugu tamanit uumissorneqassaasi.“ (Matthæusi 10:5-18, 22) Qaqqamili oqaluutsimini apustilit allallu akerlilersorneqaraluarlutik pilluarunnaartariaqannginnerannik qularunnaarsippai. Aap, allaat pilluarneq kristumiutut malersugaanermut attuumassuteqartippaa! Malersugaaneq pilluaatigineqarsinnaagami?
Naapertuilluarneq pissutigalugu naalliunneq
2. Jiisusip apustilillu Petrusip oqaasii naapertorlugit sunik naalliuuteqarneq pilluarnermik kinguneqarsinnaava?
2 Jiisusip pilluarneraanerisa arfineq-pingajuat imaappoq: „Pilluarput iluarneq pissutigalugu qinugineqartut, taakkuami Qilaap naalagaaffia pigaat.“ (Matthæusi 5:10) Naalliuutit immini nersornartortaqanngillat. Apustili Petrusi ima allappoq: „Nammineq kukkunersi pillugu naalliutsitaanissinni naammagittarussi tamanna nersorneqaatigissanngilarsi. Ajunngitsuliornissinnili erloqisitaatillusi naammagittarussi tamanna Guutimut qujassutissaavoq [Guutimit iluarisaassaaq, NV].“ Nangipporlu: „Arlarsili kinaluunniit toqutsisutut, tillittutut, pinerluttutulluunniit susassarinngisaminulluunniit akuliuttutut naalliunngikkili, arlarsili kristumiuunini pissutigalugu naalliussaguni tamanna kanngusuutigissanngilaa, kristumiumilli taaguuteqarnermigut Guuti naalannartissavaa.“ (1 Petrusi 2:20; 4:15, 16) Jiisusip oqaasii naapertorlugit naalliuuteqarneq pilluarnermik kinguneqarsinnaavoq naapertuilluarneq pissutigalugu qasusuilluni atoraanni.
3. (a) Naapertuilluarneq pissutigalugu malersorneqarneq qanoq paasisariaqarpa? (b) Malersugaaneq kristumiunut siullernut qanoq sunniuteqarpa?
3 Naapertuilluarneq piviusoq Guutip piumasaanut peqqussutaanullu naapertuuttuaannarpoq. Taamaattumik naapertuilluarneq pissutigalugu naalliunneq tassaavoq Guutip najoqqutassiaanik piumasaqaataanillu unioqqutitsiumannginneq pissutigalugu naalliunneq. Apustilit Jiisusip aqqani oqaluussiunnaarusunnginnamik juutit upperisarsiornermi siuttuinit malersugaapput. (Apustilit Suliaat 4:18-20; 5:27-29, 40) Nuannaarunnaassutigaat? Aamma oqaluussiunnaarpat? Naamerluinnaq! „Killisiuisarfik qimappaat nuannaarlutik Jiisusip aqqa pillugu narrunarsagaanissamut qinngaqqunnartitaannginnamik. Naalaffimmi illuminnilu ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq.“ (Apustilit Suliaat 5:41, 42) Malersorneqarnertik nuannaarutigalugulu oqaluusserusussuseqarnerulissutigaat. Kingusinnerusukkut kristumiut siulliit kaasarimik pallorfiginnikkumannginnertik pissutigalugu Romamiut naalagaaffissuanni malersugaapput.
4. Kristumiut malersugaanerannut pissutaasunik eqqaasaqarit.
4 Ullutsinni Jehovap Nalunaajaasui Guutip naalagaaffia pillugu nutaarsiassaq nuannersoq oqaluussissutigiunnaarusunnginnamikku malersugaapput. (Matthæusi 24:14) Ataatsimiittarnitik inerteqqutaaleraangata katersuuteqatigiinnissamik Biibilimi peqqussummik tunulliussinissaminnit naalliukkumanerupput. (Hebræerit 10:24, 25) Kristumiutut silarsuarmut tunngassutilinnut kalluunnaveersaartuarnissartik kissaatigigamikku aammullu tunngatillugu Guutip inatsisaanik unioqqutitserusunnginnamik malersugaapput. (Johannesi 17:14; Apustilit Suliaat 15:28, 29) Taamaattorli Guutip innuttai ullumikkut naapertuilluarnermik piviusumik aalajangiusimannikkamik qamannga pisumik eqqissingaarlutillu pilluarput. — 1 Petrusi 3:14.
Kristusi pillugu mitaatigineqartut
5. Ullumikkut Jehovap kiffaasa malersugaanerannut sunarpiaq pissutaava?
5 Jiisusip qaqqami oqaluusaani pilluarneraanerit qulingiluaat aamma malersugaanermut tunngavoq. Ima oqarpoq: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik.“ (Matthæusi 5:11) Jehovap kiffaasa malersugaanerat pissutsit aaqqissuussaanerannut ajortumut maanna atuuttumut ilaannginnerannik pissuteqavippoq. Jiisusi ajoqersukkaminut ima oqarpoq: „Silarsuarmit pisuugussi [Silarsuarmut ilaasuugussi, NV] silarsuup nammineq ilamisut asassagaluarpaasi; silarsuarmilli pisuunngilasi [silarsuarmulli ilaanngilasi, NV]. Uangali silarsuarmit qinerpassi, taamaattumik silarsuup uumissorpaasi.“ (Johannesi 15:19) Tamatumunnga naapertuuttumik apustili Petrusi ima allappoq: „Maanna taakkua inuunerlunnerannut attataritiinnarunnaarassi tupigusupput mitaatigalusilu.“ — 1 Petrusi 4:4.
6. (a) Sooq ’sinneruttut’ suleqataallu mitaatigineqarlutillu malersorneqarpat? (b) Pilluarunnaassutigivarput?
6 Takoreerparput kristumiut siulliit Jiisusip aqqani oqaluussiunnaarusunnginnamik malersugaasut. Jiisusip ajoqersukkani ima peqquai: ’Nalunaajaasigissavassi nunarsuup isua tikillugu allaat.’ (Apustilit Suliaat 1:8) Jiisusip qatanngutaasa, tanitat sinneruttut aalajaatsut, peqqussut taanna ilungersorlutik naalappaat suleqatiminnit ilumoorfiginnittunit ’amerlangaartunit’ ikiorneqarlutik. (Saqqummersitat 7:9) Taamaammat „[’arnap’, Guutip qilammi peqatigiissortaata] qitornai allat Guutip inassutaanik Jiisusillu nalunaajaataanik aalajangiussisut“ Saatanip sorsuffigai. (Saqqummersitat 12:9, 17) Jehovamut nalunaajaasutut Jiisusi massakkut qilammi Guutip naalagaaffiani naalakkersuisoq nalunaajaatigaarput, naalagaaffillu taanna aqqutigalugu nunami naalagaaffiit Guutip silarsuaanut nutaamut naapertuilluartumut akornutaasut tamarmik suujunnaarsinneqassapput. (Danieli 2:44; 2 Petrusi 3:13) Taamaammat mitaatigineqarlutalu malersorneqarpugut, kisianni pilluarpugut Kristusip aqqa pissutigalugu naalliukkatta. — 1 Petrusi 4:14.
7, 8. Akerlilersuisut kristumiut siulliit pillugit suut salluliuutigaat?
7 Jiisusi oqarpoq ajoqersukkani pilluarsinnaasut, allaat inuit „sallullutik“ taanna pillugu ’tamanik ajortunik oqaatigippatsik’. (Matthæusi 5:11) Kristumiut siulliit taamani ilumut taama pineqarput. Apustili Paulusi ukioq 59-61 missaani Romami parnaarussaaqqatillugu juutit upperisarsiornikkut siuttuisa ornikkamikku ima oqarfigaat: „Nalunngilarput immikkoorniaqatigiit taakku tamani akerlerineqartut.“ (Apustilit Suliaat 28:22) Paulusi Silasilu ’silarsuarmi tamarmi pikitsitsisutut’ aamma ’kaasarip maleruaqqusaanut akerliusunik iliuuseqarsimasutut’ pasillerneqarput. — Apustilit Suliaat 17:6, 7.
8 Oqaluttuarisaanermik ilisimatuup, professori K.S. Latourette-ip kristumiut Romap naalagaaffissuaniittut ima allaaserai: „Unnerluutiginnissutit assigiinngitsorpassuusimapput. Kristumiut siulliit guutimik nalusut nalliuttorsiorneri peqataaffigiumannginnamikkik guutiitsuunerarneqarput. Inuiaqatigiinni pisartut amerlanersaannut — guutimik nalusut nalliuttorsiornerinut, aliikkutassanut tamanut ammasunut . . . akuunngimmata, inuiannik uumissuisutut pasillerneqarput. . . . Oqaatigineqartarsimavoq ilaasortat arnat angutillu unnuaannaq naapittarsimasut . . . tamalikattumillu atoqateqartarlutik. . . . [Kristusip toquneranik eqqaaniaaneq] uppeqataasunit taamaallaat najuuffigineqarluni nalliuttorsiutigineqartarmat, kristumiut aalajangersimasumik naalungiarsummik pilliutiginnittartutut aavanillu neqaanillu nerisartutut oqallisaalerput.“ (A History of Christianity, qupp. 81-82) Aamma kristumiut siulliit kaasarimik pallorfiginnikkumannginnamik naalagaaffimmut akeraasutut unnerluutigineqarput.
9. Ukiuni hundredelinni siullerni kristumiut eqqunngitsumik unnerluutigineqarnitik qanoq periaaseqarfigaat, ullumikkullu pissutsit qanoq ippat?
9 Eqqunngitsunik unnerluutigineqaraluarlutik kristumiut siulliit suliassartik, tassa Guutip naalagaaffia pillugu nutaarsiassamik nuannersumik oqaluussissutiginninnertik, unitsinngilaat. Ukioq 60-61-imi Paulusi allassinnaasimavoq nutaarsiassaq nuannersoq ’silarsuarmi tamarmi inerititaqarlunilu alliartuinnartoq’ aamma ’qilaap ataani pinngortitanut tamanut oqaluussissutigineqarsimasoq’. (Kolossemiut 1:5, 6, 23) Ullumikkut aamma taamaappoq. Kristumiut siulliit eqqunngitsumik unnerluutigineqartarsimanerattut Jehovap Nalunaajaasui unnerluutigineqartarput. Taamaakkaluartorli Guutip naalagaaffia pillugu oqaluussineq siuariartorpoq, oqaluusseqataasullu oqaluussineq pilluaatigeqaat.
Pruffiitit malersugaasimanerattut malersugaagamik pilluartut
10, 11. (a) Pilluarneraanerit qulingiluaat Jiisusip qanoq naggaserpaa? (b) Sooq pruffiitit malersorneqarpat? Pruffiitit taakkua ilaannik eqqaasaqarit.
10 Pilluarneraanerit qulingiluaat Jiisusip ima naggaserpaa: „Tipaatsugitsi . . . ; taamatuttaarmi pruffiitit qinugisarpaat ilissi siunissigut.“ (Matthæusi 5:12) Pruffiitit Jehovap Israelikkunnut ilumuunngitsunut mianersoqqusiartoqqusai ilassilluarneqarneq ajorput malersorneqarajuttarlutillu. (Jeremia 7:25, 26) Apustili Paulusi tamanna pillugu ima allappoq: „Soormi eqqartueqqissaanga? Piffissaq amigassagaluarpoq oqaluttuarissagaluarukkit . . . pruffiitit . . . taakku tamarmik uppernikkut . . . mitaatigisaaneq iperartorneqarnerlu, allaammi kalunnernik qilersugaaneq parnaarussaanerlu [atortariaqaraat].“ — Hebræerit 11:32-38.
11 Kunngi ajortoq Akabi nulialu Jezabeli naalakkersuisuutillugit Jehovap pruffiiterpassui panamik toqutaasimapput. (1 Kunngit 18:4, 13; 19:10) Pruffiiti Jeremia kiggitsivimmut kiggisinneqarpoq kingornalu imiisiviliamut ninginneqarluni, tassanilu marullummut maggulluni. (Jeremia 20:1, 2; 38:6) Pruffiiti Danieli itersaliamut løvit inaannut iginneqarpoq. (Danieli 6:17, 18) Kristumiussutsip aallartinnera sioqqullugu pruffiitiusimasut taakku tamarmik Jehovamik pallorfiginninneq minguitsoq illersoramikku malersorneqarput. Pruffiiterpassuit juutit upperisarsiornikkut siuttuinit malersorneqarput. Jiisusip allakkanik ilisimasut farisiiarillu allaat ’pruffiitinik toqutsisunut qitornaanerarpai’. — Matthæusi 23:31.
12. Itsaq pruffiitit malersugaanerattut malersorneqarnerput sooq ataqqinaatitut isigaarput?
12 Ullumikkut Jehovamut nalunaajaasutut Guutip naalagaaffia pillugu nutaarsiassamik nuannersumik eqiasuilluta oqaluussisaratta malersorneqartarpugut. Akeqqatta ’ingasattumik peqatissarsiortutut’ unnerluutigaatigut, nalunngilarpulli Jehovamut aalajaallutik kiffaasimasut assingusumik unnerluutigineqartarsimasut. (Jeremia 11:21; 20:8, 11) Itsaq pruffiitit aalajaatsut naalliuutigisimasaasa assinginik uaguttaaq naalliuuteqartariaqarnerput ataqqinaatitut isigaarput. Ajoqersugaq Jaaku ima allappoq: „Qatanngutit, pruffiitit [Jehovap] aqqani oqalussimasut maligassariniarsigit atugarliuutit naammagittarluni atornissaasigut. Pinertusaartummi pilluarnerartarpavut.“ — Jaaku 5:10, 11.
Pilluarnermut pissutaalluartut
13. (a) Sooq malersorneqarnitsinni nikallunngilagut? (b) Suna aalajaattuassutigaarput, sumullu ersiutaava?
13 Malersorneqarneq nikalluutiginngilarput, Jiisusip, pruffiitit kristumiullu siulliit tumaannik malinninnerput eqqarsaatigigaangatsigu tuppallersarneqarlutalu qiimmassarneqartaratta. (1 Petrusi 2:21) Biibilip ilaanik, soorlu apustili Petrusip oqaasiinik tulliuttunik, atuarneq naammagisimaarnaqaaq: „Asasakka, innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu. Pilluarpusi Kristusip aqqa pissutigalugu mitaatigineqarussi naalannassutsip anersaavata, tassa Guutip Anersaavata, najormasi.“ (1 Petrusi 4:12, 14) Misilittakkatsigut nalunngilarput Jehovap anersaavata najorlutalu nakussatsippatigut, taava aatsaat malersorneqartilluta aalajaassinnaasugut. Anersaap illernartup uagutsinnik ikiuinera Jehovap pilluaqqusineranut ersiutaavoq, tamannalu pillualissutigaarput. — Tussiaat 5:13; Filippimiut 1:27-29.
14. Suut pissutigalugit naapertuilluarneq pissutigalugu malersorneqarnerput nuannaarutigaarput?
14 Akerlilersorneqarnerup aamma naapertuilluarneq pillugu malersorneqarnerup pillualersitsinerannut pissutaasoq alla tassaavoq tamakku kristumiutut ilumoortutut Guutimut tunniusimalluta inuunitsinnik ersiutaagamik. Apustili Paulusi ima allappoq: „Guuti mianeralugu Kristusi-Jiisusimi inuujumasut tamarmik qinugineqartarput.“ (2 Timotheusi 3:12) Aammattaaq misilinneqarnermi assuarnaattuarnerput nuannaarutigingaarparput, tamannami Saatanip Jehovap pinngortitaanik namminissarsiorlutik Jehovamut kiffartorneraanerata eqqunngitsuuneranik uppernarsaaqataavoq. (Jobi 1:9-11; 2:3, 4) Guutip eqqortumik kisimi oqartussaaneranik annikikkaluartumik qutsissisitseqataagatta nuannaarutigaarput. — Ussatit 27:11.
Akissarsiassarsi pissutigalugu nuannaaritsi!
15, 16. (a) ’Tipaatsunnissatsinnut nuannaarnissatsinnullu’ Jiisusip sumik pissutissippaatigut? (b) Kristumiut tanitat suna qilammi akissarsiassaraat, ’savallu allat’ qanoq akissarsisinneqassappat?
15 Itsaq pruffiitit mamarlerneqarnerattut malersorneqarnerattullu pineqarnerup nuannaarutiginissaanut Jiisusip pissutisseqqippaatigut. Pilluarneraanerit qulingiluaata naalernerani ima oqarpoq: „Tipaatsugitsi nuannaarlusilu akissarsiassarsi qilanniittoq angeqimmat.“ (Matthæusi 5:12) Apustili Paulusi ima allappoq: „Ajortip akissarsiarititaa tassa toqu, Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.“ (Romamiut 6:23) Aap, ’akissarsiassaq angisooq’ tassaavoq inuuneq, akissarsiassarlu tamanna pisassarinngikkaluarparput. Tunissutaavoq. Aammattaaq Jiisusi oqarpoq akissarsiassaq „qilanniittoq“, tamannami Jehovamit pimmat.
16 Tanitat ’niaqorusiussassamik inuussutaasumik’ pipput. Tamanna taakkununnga ima isumaqarpoq Kristusi qilammi ilagalugu toqujuissuseqassasut. (Jaaku 1:12, 17) Nunami inuunissamik neriuutillit, ’savat allat’, nunami paratiisiusumi naassaanngitsumik inuunissartik qilanaaraat. (Johannesi 10:16; Saqqummersitat 21:3-5) Katersat taakkua tamarmik ’akissarsiassaq’ pisassarinngikkaluarpaat. Tanitat ’savallu allat’ Jehovap „saammaassingaarnera“ pissutigalugu akissarsissapput, tamannalu killitsissutigalugu apustili Paulusi ima allappoq: „Guuti qujanarsili tunissutini asseqanngitsoq pillugu.“ — 2 Korinthimiut 9:14, 15.
17. Sooq malersorneqaraangatta pilluarsinnaallutalu ’nuannaarsinnaavugut’?
17 Kristumiut Romamiittut, taakkua ilaat kaasari Neromit sakkortuumik malersorneqangajalersut, apustili Paulusip ima allaffigai: „Usorsisimaarutigaavut annikilliortarnivut, nalunnginnatsigu annikilliornerup nikallujuinneq pilersittaraa, nikallujuissutsip aalajaatsunngorneq, aalajaassutsillu neriugisaqarneq. Neriunnerlu taanna pakatsisitsissanngilaq.“ Aamma ima allappoq: „Neriunnissinni tipaatsugitsi, naalliunnissinni nikallujuigitsi.“ (Romamiut 5:3-5; 12:12) Qilaliarnissamik nunamiluunniit inuunissamik neriuuteqaraluarutta, misilinneqarnermi aalajaassutsimut akissarsiassarput nammineq iliuuseqarnitsigut pissarsiarisinnaasatsinnit anginerungaarpoq. Naassaanngitsumik inuunissamik neriuuteqarnerput kunngitsinnillu Jiisusi Kristusimit siulersorneqarluta Ataatatsinnik asannittumik, Jehovamik, kiffartorfiginnillutalu unnersiutiginnissinnaanitsinnik nuannaarutiginninnerput asseqanngilaq.
18. Naggatissaq qanilliartortillugu inuiaat qanoq pinissaat ilimagineqarsinnaava, Jehovalu qanoq iliorniarpa?
18 Nunat ilaanni Jehovap Nalunaajaasui malersugaasarsimapput sulilu malersugaasarlutik. Pissutsit aaqqissuussaanerata naggatissaa pillugu siulittuutimini Jiisusip kristumiut ilumoortut ima mianersoqquai: „Atera pillugu inuiannit tamanit uumissorneqassaasi.“ (Matthæusi 24:9) Naggatissaq qanilliartortillutigu inuiaat Jehovap innuttaanik uumissuinerat Saatanip malunnarnerulersissavaa. (Ezekieli 38:10-12, 14-16) Taava Jehovap iliuuseqarnissaminut piffissarititaa nalliutissaaq. Ima oqarpoq: „Takutissavakka angingaassusera naalannassuseralu ilisaritillungalu inuiaqatigiippassuit takkuanni. Taava paasissavaat uanga tassaasunga [Jehova].“ (Ezekieli 38:23) Taava Jehovap atini angingaartoq illernarsisikkumaarpaa innuttanilu malersugaanermit aniguisillugit. Taamaammat ima oqartoqarsinnaavoq: „Pilluarpoq inuk misilinneqarnermini pinertusaartoq“! — Jaaku 1:12.
19. Jehovap ullussarsuata utaqqinerani sussaagut?
19 Jehovap ullussarsua qanilliartortillugu Jiisusip aqqa pillugu ’narrunarsagaanissamut qinngaqqunnartitaannginnatta’ nuannaarutigisigu. (2 Petrusi 3:10-13; Apustilit Suliaat 5:41) Jehovap silarsuassaani nutaami naapertuilluartumi akissarsiassaq utaqqitillugu qanortoq ’soraarnata ajoqersuiuaannarta Messiasimillu, Jesusimik,’ taassumalu naalagaaffianik ’nutaarsiassaq nuannersoq oqaluussissutigalugu’, soorlu kristumiut siulliit taamaaliortarsimasut. — Apustilit Suliaat 5:42, NV; Jaaku 5:11. (wE 11/1 04)
Uteqqiineq
• Naapertuilluarneq pissutigalugu naalliunneq qanoq paasisariaqarpa?
• Malersugaaneq kristumiunut siullernut qanoq sunniuteqarpa?
• Sooq oqartoqarsinnaava Jehovap Nalunaajaasui itsaq pruffiitit malersugaasimanerattut malersugaasut?
• Sooq malersorneqaraangatta ’tipaatsussinnaallutalu nuannaarsinnaavugut’?
[Atuaqqissaarnermi apeqqutit]
[Qupp. 11, 12-imi assiliartaq]
„Pilluarpusi ilissi uanga pillunga mitaatigippasi qinugalusilu“
[Suminngaanneernera]
Parnaarussat: Chicago Herald-American