Jehova ikiuisigaarput

„Ikiorsiissutissara pissaaq [Jehovamit], qilaap nunallu pinngortitsisaannit.“ — TUSSIAAT 121:2.

1, 2. (a) Sooq oqartoqarsinnaava tamatta ilaanneeriarluta ikiorneqarnissarput pisariaqartittaripput? (b) Jehova Ikiuisutut qanoq ippa?

KINA arlarput ikiorneqarnissamik pisariaqartitsinngisaannarpa? Ilumoortoq tassaavoq tamatta ilaanneeriarluta ikiorneqarnissarput pisariaqartittaripput — ajornartorsiummik artornartumik aniguinissamut, annaasaqarnerup annernartuanik naammagalugu atuinissamut imaluunniit ilungersunartumik misilinneqarnermi pinertusaarnissamut. Ikiorneqarnissaq pisariaqartikkaanni ikinngut isumassuilluartoq saaffigineqartarpoq. Ikinngummut taamaattumut ajornartorsiutinik oqaluuserinninneq oqiliallaataasinnaavoq. Inuulli qanoq ikiuitigisinnaanera killeqarpoq. Aammattaaq ikiorneqarnissaq pisariaqartinneqaraangat allat immaqa tamatigut ikiuisinnaaneq ajorput.

² Kisiannili ikiuisoqarpoq killeqanngitsumik pissaanilimmik. Allaallu imminiinngisaannassalluta neriorsoqqissaarpaatigut. Tussiaasiortup taanna eqqaavaa tatiginningaarluni ima erinarsorami: „Ikiorsiissutissara pissaaq [Jehovamit].“ (Tussiaat 121:2) Tussiaasiortup taassuma Jehovap ikiorumaaraani sooq qularutiginngilaa? Tamanna paasiniarlugu Tussiaat 121 misissoriartigu. Taamaaliorutta paasisinnaavarput sooq uaguttaaq tatiginnilluta Jehova Ikiuisitsitut tunaarisinnaaneripput.

Ikiuisoq sumiginnaanngisaannartoq

3. Tussiaasiortup qaqqanut sorlernut isini aarlortissimasinnaavai, aamma sooq?

³ Aallarniutigalugu tussiaasiortup Jehova Pinngortitsisuummat tatiginissaanut pissutissaqarnerput ima uparuarpaa: „Isikka qaqqat tungaannut aarlortippakka, sumit pissava annassutissara? Ikiorsiissutissara pissaaq [Jehovamit], qilaap nunallu pinngortitsisaannit.“ (Tussiaat 121:1, 2) Tussiaasiortup qaqqanut aalajangersimasunut isini aarlortippai. Oqaatsit taakku allanneqarmata Jehovap naalaffia Jerusalemimiippoq. Illoqarfimmi tassani, Judap qaqqaasa qutsissortaanniittumi, Jehovap assersuutaasumik ineqarfia ippoq. (Tussiaat 135:21) Tussiaasiortup Jehovap ikiuinissaa tatigalugu Jerusalemip qaqqaanut, Jehovap naalaffiata inissisimaffianut, isini aarlortissimasinnaavai. Tussiaasiortup Jehovamit ikiorneqarnissani sooq taama qularinngitsigaa? ’Qilammik nunamillu pinngortitsisuummat.’ Tussiaasiortoq ima oqarporlusooq: ’Pinngortitsisup ajugaqanngitsup uannik ikiuinissaa suulluunniit akornusersinnaanngilaa!’ — Esaja 40:26.

4. Jehovap innuttami pisariaqartitaat arajutsinngisaannarai tussiaasiortup qanoq erseqqissarpaa, aamma sooq tamanna tuppallernarpa?

⁴ Taavalu Jehovap kiffami pisariaqartitaanik arajutsisaqanngisaannarnera tussiaasiortup ima  erseqqissarpaa: „Isikkatit patajatissanngilai, sinilissanngilaq paarinnittoq ilinnik. Taanna Israelikkunnik paarinnittoq sinilissanngilaq sinissananilu.“ (Tussiaat 121:3, 4) Guutip imminik tatiginnittut ’patajalernissaat’ imaluunniit nikueqqissinnaajunnaarlutik orlunissaat akuerinngisaannassavaa. (Ussatit 24:16) Sooq? Jehova savanik paarsisutut savaatiminik paarsisutut eqqummaarilluinnartuugami. Eqqarsaat tuppallernangaarami, ilaa? Innuttami pisariaqartitai arajutsinavianngilai. Ulloq unnuarlu nakkutigiuaannarpai.

5. Sooq Jehova ’talerpiup killinganiinnerarneqarpa’?

⁵ Jehovap innuttaminik ilumoorfiginnilluni sernissuisarnera tatigalugu tussiaasiortoq ima allappoq: „[Jehovap] paarissavaatit, [Jehova] alanngiffigissavat talerpippit killingani. Seqernup kissaata naalliutsissanngilaatit ullukkut, qaammatillu ajoqusissanngilaatit unnuakkut.“ (Tussiaat 121:5, 6) Kangiani Qiterlermi pisuinnaq angalasumut seqinermut uunaannarmut alanngiffissaqarneq illersuutaalluassaaq. Jehova innuttaminut alanngortatut ippoq, ajunaarnersuarnut illersuutaalluni. Maluginiariaruk Jehova ’talerpiup killinganiinnerarneqartoq’. Itsaq sorsunnermi sakkutuup saamimminik eqqornaveeqqut tigummisaramiuk assaa talerperleq illersuuteqarpiartanngilaq. Ikinngut ilumoorfiginnittoq sakkutuup talerpiata killingani akiuunnermigut illersuisinnaavoq. Ikinngutitut taassumatut Jehova pallorfiginnitsiminik ikiuinissamut piareersimajuaannarpoq.

6, 7. (a) Jehovap innuttaminik ikiuiuaannarneranik tussiaasiortumit qanoq qularunnaarsinneqarpugut? (b) Sooq tussiaasiortutut tatiginnissinnaavugut?

⁶ Jehova innuttaminik ikiuiunnaassava? Naagga, ikiortuaannassavai. Tussiaasiortoq ima naggasiivoq: „[Jehovap] sernigissavaatit ajortunut tamanut, inuunerit sernigissavaa. [Jehovap] anisarninni isertarninnilu sernigilisit maannamiit naassaanngitsumik.“ (Tussiaat 121:7, 8) Malugiuk tussiaasiortoq versimi matumani ima allattoq: „Maannamiit naassaanngitsumik.“ Taamaalillutik pallorfiginnittut ilumoortut Jehovap qaqugumut ikiuiumaarneranik qularunnaarsinneqarput. Sumiikkaluarunilluunniit qanorluunniillu annikilliortitaagaluarunik taassumannga ikiorneqarsinnaajuassapput. — Ussatit 12:21.

⁷ Tussiaat 121-mik allattup qularutiginngivippaa Pinngortitsisup ajugaqanngitsup savanik paarsisutut isumassuisutut qajassuussilluni pigaartutullu eqiingasutut arajutsisaqarnani kiffani nakkutigigai. Jehova allanngorneq ajormat tussiaasiortutut tatiginninnissamut pissutissaqarluarpugut. (Malaki 3:6) Tamanna isumaqarpa timikkut illersugaajuassasugut? Naagga, Ikiuisitsitulli tunaariuartillugu anersaakkut ajoqusiisinnaasunut tamanut illersussavaatigut. Pissusissamisoorpoq ima aperinissaq: ’Jehovap qanoq ikiortarpaatigut?’ Ikiueriaasii sisamat misissoriartigit. Allaaserisami matumani Biibilip nalaani kiffaminik qanoq ikiuisarsimanera sammissavarput, allaaserisamilu tulliuttumi ullumikkut innuttaminik qanoq ikiuisarnera sammissallutigu.

Inngilit aqqutigalugit ikiorneqarneq

8. Guutip kiffaasa nunamiittut atugarissaarnissaat inngilit soqutigilluinnarmassuk sooq tupinnanngila?

⁸ Jehovap inngilit millionillit naalakkersugarai. (Danieli 7:9, 10) Ernerit anersaajusut taakku aalajaallutik piumasaanik naammassinnittarput. (Tussiaat 103:20) Nalunngilluinnarpaat Jehova inunnik pallorfiginnitsiminik ikiuerusullunilu asanningaartuusoq. Tupinnanngilaq inngilit Guutip kiffaasa nunamiittut atugarissaarnissaat soqutigilluinnarmassuk. (Lukasi 15:10) Qularnanngilluinnarpoq Jehovamit inunnik ikiuinissamut atorneqarsinnaanertik nuannaarutigigaat. Jehovap itsaq kiffani nunamiittut inngilit atorlugit qanoq annertoqqusersorlugillu nakussatsittarpai?

9. Inngilit inunnik aalajaatsunik illersuinissamut qanoq Guutimit pissaaneqartinneqarlutillu oqartussaassusilerneqarnerannik assersuuteqarit.

⁹ Inngilit inunnik upperlutillu aalajaatsunik illersuinissamut aniguisitsinissamullu Guutimit pissaaneqartinneqarlutillu oqartussaassusilerneqarput. Sodoma Gomorralu piuneerunneqarmata Loti paniilu aniguinissaminnut inngilinit marlunnit ikiorneqarput. (1 Mosesi 19:1, 15-17) Inngilip ataasiinnaap Assyriamiut sakkutuui 185.000-it Jerusalemimik sioorasaarisut toquppai. (2 Kunngit 19:35) Danieli løvit inaannut  iginneqarmat Jehovap „inngilini aallartillugu løvit qarni matuai“. (Danieli 6:22, 23) Aamma apustili Petrusi parnaarunneqarami inngilimit aniguisinneqarpoq. (Apustilit Suliaat 12:6-11) Inngilit illersuisarnerannik Biibilimi allanik assersuutissarpassuaqarpoq, tamakkulu uppernarsaataapput Tussiaat 34:8-p ilumoorneranut, tassani ima allassimagami: „[Jehovap] inngilia taassuminnga mianerinnittut eqqaanni inississaaq, aniguisissavaalu.“

10. Pruffiiti Danielip qiimmassarnissaanut Jehovap inngili qanoq atorpaa?

¹⁰ Ilaatigut Jehovap inunnik aalajaatsunik qiimmassaanissamut nakussatsitsinissamullu inngilit atortarpai. Danielip allagai kapitali 10-mi killitsinnartumik assersuutissaqarpoq. Tamatuma nalaani Danieli 100-ngajannik ukioqarunarpoq. Pruffiiti nikallorluinnarsimavoq, Jerusalemip aserugaanera naalaffiullu qarmaqqinneqarnissaata kinguaattoornera pissutigigunarlugit. Aammattaaq takorruukkani annilaarnangaartoq eqqissiunnaarutigaa. (Danieli 10:2, 3, 8) Guutip inngili erniinnaq aallartippaa qiimmassariartortillugu. Ataasiaannarnani inngilip Danieli Guutip isaani ’nuannarineqangaarneranik’ eqqaasittarpaa. Tamanna qanoq kinguneqarpa? Pruffiiti utoqqalisimasoq inngilimut ima oqarpoq: ’Pissatseqqipparma.’ — Danieli 10:11, 19.

11. Inngilit nutaarsiassamik nuannersumik oqaluussissutiginninnermi siulersuisuutinneqarnerannik assersuuteqarit.

¹¹ Aammattaaq Jehovap inngilit nutaarsiassamik nuannersumik oqaluussissutiginninnermi siulersuisuutippai. Inngilip Filipi kunngip atorfilittaanut Etiopiamiumut siulersorpaa Kristusi pillugu tusagassaq taassumunnga oqaluussissutiginiassammagu, taavalu kunngip atorfilittaa kuisippoq. (Apustilit Suliaat 8:26, 27, 36, 38) Tamatuma kinguninngua nutaarsiassap nuannersup Guutimik nalusunut kipineqanngitsunut oqaluussissutigineqarnissaa Guutip piumasaraa. Takorruuinikkut inngili Corneliusimut, juutiunngitsumut Guutimik mianerinnittumut takutippoq, peqqullugulu apustili Petrusi aateqqullugu. Corneliusip aallersitaasa Petrusi nanigamikku ima oqarput: „Corneliusi . . . inngilimit illernartumit nalunaarfigitissimavoq illuminut aaseqqullutit oqaasissatit tusarumallugit.“ Petrusip Corneliusimukaqatigai, taamaalillutillu kipineqanngitsut siulliit ilagiinnut kristumiunut ilaalerput. (Apustilit Suliaat 10:22, 44-48) Inuup eqqortumik isumaqarfiginnittup attaveqarfiginissaanut inngilimit ikiorneqarsimallutit nalunngittuugukku qanoq misigissanerlutit takorlooriaruk!

Anersaaq illernartoq aqqutigalugu ikiorneqarneq

12, 13. (a) Jiisusip apustiliisa anersaaq illernartup ikiorsinnaagaatik upperissallugu sooq pissutissaqarluarpat? (b) Ukiuni hundredelinni siullerni kristumiut anersaaq illernartumit sumut nukissaqalersinneqarpat?

¹² Jiisusip toqunngitsiarluni apustilini neriorsoqqissaarpai isumakkeerneqarnavianngitsut. Ataatamit ’illersuisumik, anersaaq illernartumik’ tunineqarumaarput. (Johannesi 14:26) Apustilit anersaaq illernartup ikiorsinnaagaatik upperissallugu pissutissaqarluarput. Jehovap innuttani ikiorniarlugit anersaaminik illernartumik, nukimmik sunniisinnaanerpaamik, qanoq atuisarnera pillugu Allakkani Illernartuni assersuutissarpassuaqarpoq.

¹³ Pissutsini assigiinngitsorpassuarni inuit Jehovap piumasaanik naammassinninnissamut nukissaqalersinniarlugit anersaaq illernartoq atorneqartarpoq. Eqqartuussisut anersaaq illernartup Israelimik aniguisitsinissamut nukissaqalersippai. (Eqqartuussisut 3:9, 10; 6:34) Aamma anersaap tamatuma ukiuni hundredelinni siullerni kristumiut assigiinngitsorpassuartigut akerlilersorneqaraluartut nakimaallutik oqaluussiuarnissaannut nukissaqalersippai. (Apustilit Suliaat 1:8; 4:31) Kiffartornerminni angusarissaarnerat anersaaq illernartup sulineranut ersiutaalluarpoq. Silarsuarmut taamanikkut ilisimaneqartumut tamarmut „inuinnaasut immikkut ilinniagaqarsimanngitsut“ Guutip naalagaaffia pillugu tusarliussamik siaruarterisinnaanerat qanoq allatut nassuiarneqarsinnaagami? — Apustilit Suliaat 4:13; Kolossemiut 1:23.

14. Jehovap anersaani illernartoq innuttaminik paasissutissiinermut qanoq atortarpaa?

¹⁴ Aamma Jehovap anersaani illernartoq innuttaminik  paasissutissiinermut atortarpaa. Josefi Guutip anersaavanit ikiorneqarnermigut Faraop sinnattuinik siulittuutaasunik nassuiaasinnaanngorpoq. (1 Mosesi 41:16, 38, 39) Jehovap anersaani atorlugu siunertani inunnut maniguuttunut saqqummersittarpai makitasuunulli isertortarlugit. (Matthæusi 11:25) Jehovap „asasiminut“ tunniuttagai pillugit apustili Paulusi ima allappoq: „Tamakku Guutip Anersaakkut uatsinnut saqqummersippai.“ (1 Korinthimiut 2:7-10) Aatsaat anersaaq illernartumit ikiorneqarluni inuk Guutip piumasaanik paasinnilluarsinnaavoq.

Guutip oqaasia aqqutigalugu ikiorneqarneq

15, 16. Iliuutsini iluatsilluassappata Josva qanoq ilioqquneqarpa?

¹⁵ Jehovap oqaasia isumassarsiarititaasoq ’ajoqersuinermut iluaqutaavoq’ Guutillu kiffai ’inerilluinnaqqullugit ajunngitsuliornernut tamanut piginnaanngorsarlugit’. (2 Timotheusi 3:16, 17) Itsaq Guutip innuttaasa Allakkat Illernartut ilaannik taamani allanneqareersimasunik iluaqutiginnittarsimanerannik Biibilimi assersuutissarpassuaqarpoq.

¹⁶ Guutimik pallorfiginnittut Allakkat aqqutigalugit iluaqutaasumik siunnersorneqartarput. Josva Israelikkunnut siulersuisunngortinneqarami ima peqquneqarpoq: „Inatsisit allassimaffiat taanna [Mosesimit allanneqarsimasoq] qarlunniitittuassavat; ullukkut unnuakkullu eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit pilluarumaarlutillu.“ Maluginiaruk Guutip Josva neriorsunngikkaa tupinnartuliornikkut ilisimassuseqalerumaartoq. Josvalli iliuutsini iluatsilluassappata „inatsisit allassimaffiat“ atuarlugulu eqqarsaatigeqqissaartariaqarpaa. — Josva 1:8; Tussiaat 1:1-3.

17. Danielip kunngi Josijallu Allakkat ilaat taamanikkut pigisatik qanoq iluaqutigisarsimavaat?

¹⁷ Aamma Guutip oqaatsimigut allanneqarsimasukkut piumasani siunertanilu saqqummersittarpai. Assersuutigalugu Danielip Jeremiap allagaani maluginiarsimavaa Jerusalemi qanoq sivisutigisumik inoqassannginnersoq. (Jeremia 25:11; Danieli 9:2) Eqqarsaatigiuttaaq kunngi Josijap Judamut naalakkersuinerata nalaani qanoq pisoqarsimanera. Taamanikkut inuiaat Jehovamit ungasillisimapput, malunnartumillu kunngit Inatsisit namminneq pissamittut allaqqinngitsoorlugillu maleruanngilaat. (5 Mosesi 17:18-20) Naalaffiulli iluarsaanneqarnerani „inatsisit allassimaffiat“, inatsisit allassimaqqaarfigigunagaat ukiut 800-t missiliorlugit tamatuma siorna Mosesip allassimasaa, nassaarineqarpoq. Inatsisit atuarneqarnerat tusarnaareerlugu Josijap paasivaa inuiaat Jehovap piumasaanit qanoq nigorsimatigisut, kunngilu allakkani allassimasut maleruarniarlugit sukannersumik iliuuseqarpoq. (2 Kunngit 22:8; 23:1-7) Itsaq Guutip innuttaasa Allakkat Illernartut ilaannik taamanikkut pigisaminnik iluaqutiginnittarsimanerat erseqqingaarami, ilaa?

Uppeqatit aqqutigalugit ikiorneqarneq

18. Sooq oqarsinnaavugut pallorfiginnittut ilumoortut ikioqatigiikkaangata Jehova ikiuisuusartoq?

¹⁸ Uppeqatit aqqutigalugit Jehova ikiorsiisarpoq. Aap, Guutimik pallorfiginnittup ilumoortup uppeqatini ikioraangagu Guuti ikiuisuusarpoq. Sooq taama oqarsinnaavugut? Marlunnik pissuteqarpoq. Siullermik Guutip anersaava illernartoq akuusarpoq. Anersaaq taanna sunnerneqarusuttuni asanninnermik ajunngitsuunermillu inerititaqartarpoq. (Galatiamiut 5:22, 23) Taamaattumik Guutimut kiffartortut ilaat allamik ikiuinissamut killinneqaraangat Jehovap anersaavata sulineranut takussutissaavoq. Aappassaanik Guuti assilillugu pinngortitaavugut.  (1 Mosesi 1:26) Tamanna isumaqarpoq pissusii ilaarsinnaagivut, ilaatigut inussiarnernera misiginneqataaneralu. Taamaattumik Jehovap kiffaasa allanik ikiuinerannut Taanna allaaviuvoq, taassuma pissusii ilaartaramikkik.

19. Uppeqatit aqqutigalugit Jehovap ikiorsiisarneranik Biibilimeersunik assersuuteqarit.

¹⁹ Biibilip nalaani uppeqatit aqqutigalugit Jehovap ikiorneqarnissaq qanoq isumagisarpaa? Jehovap kiffami ilai allanik siunnersuitittarpai, assersuutigalugu Baruki aniguissutigisaminik Jeremiamit siunnersorneqarpoq. (Jeremia 45:1-5) Ilaanneeriarlutik pallorfiginnittut ilumoortut uppeqatiminnik pigisatigut ikiuinissaminnut killinneqartarput, soorlu Makedoniami Akajamilu kristumiut Jerusalemimi qatanngutitik atugarliortut ikiorniarsuataarsimagaat. Apustili Paulusi allappoq tukkorneq taamaattoq eqqortumik ’Guutimut unnersiutiginnissutaasoq’. — 2 Korinthimiut 9:11.

20, 21. Pissutsini qanoq ittuni apustili Paulusi qatanngutinit Romameersunit nakussatsinneqarpa?

²⁰ Jehovap kiffaasa nakussatseqatigiinniarlutik qiimmassaqatigiinniarlutillu immikkut iliuuserisartagaat pillugit oqaluttuat killitsinnarluinnarput. Apustili Paulusi pillugu oqaluttuaq misissoriartigu. Paulusi parnaarussatut Romamukartilluni Romamiut nunaannarmi aqquserngatigut Via Appiakkoorpoq. Angalanerup naggataatungaa nuanninngilluinnarpoq angalasut masarsussuakkuulermata. * Qatanngutit Romami ilagiinniittut nalunngilaat Paulusi aggersoq. Qanoq iliussappat? Illoqarfimminni nuannerlunilu toqqissisimanartumiillutik Paulusip takkunnissaa utaqqiinnassavaat, aatsaallu takkuppat ilassiartorlugu annivigissavaat?

²¹ Biibilimik allattoq Lukasi, angalanermi tamatumani Paulusip angalaqataa, qanoq pisoqarsimanera allakkamini ima oqaluttuaraa: „Qatanngutit tassaniittut [Romameersut] tusarsimavaatigut allaallu Forum Appiimut Tres Tabernæmullu tikiussimallutik parsiarluta.“ Takorloorsinnaaviuk? Qatanngutit nalunngilaat Paulusi aggersoq, qatanngutillu aallartitat naapigiarpaat. Aallartitat  ilaat Forum Appiimi, nunaannaap aqquserngata unittarfiani ilisimaneqarluartumi, Romamit 74 kilometerisut ungasitsigisumi, utaqqipput. Qatanngutit allat Tres Tabernæmi, unittarfimmi illoqarfimmit 58 kilometerisut ungasitsigisumi, utaqqipput. Paulusi qanoq qisuariarpa? Lukasi ima allappoq: „Paulusip takugamigit Guuti qutsavigaa nakussatsitaallunilu.“ (Apustilit Suliaat 28:15) Takorlooriaruk! Paulusimut qatanngutinik angalarsuaarsimasunik takunninnerinnaq tuppalliutaallunilu nakussatsissutaavoq! Paulusillu ikiuinermut tapersersuinermullu tamatumunnga kina qutsavigaa? Ikiuisitsisoq Jehova Guuti qutsavigaa.

22. Ukiumut 2005-imut allassimaffik suna atussavarput, allaaserisamilu tulliuttumi suna sammissavarput?

²² Guutip periaasia pillugu oqaluttuami isumassarsiarititaasumi erseqqippoq Guuti ikiuisuusoq asseqanngitsoq. Jehovap Nalunaajaasuisa naleqqulluartumik ukiumut 2005-imut allassimaffittut Tussiaat 121:2-mi oqaatsit uku atussavaat: „Ikiorsiissutissara pissaaq [Jehovamit].“ Ullumikkulli Jehovap qanoq ikiortarpaatigut? Allaaserisami tulliuttumi tamanna sammissavarput.

[Quppernerup ataani ilanngussaq]

Eqqaamavigit?

Jehovap ikiorneqarnissaq qanoq isumagisarpaa —

• inngilit aqqutigalugit?

• anersaani illernartoq aqqutigalugu?

• oqaatsini isumassarsiarititaasoq aqqutigalugu?

• uppeqatit aqqutigalugit?

[Atuaqqissaarnermi apeqqutit]

[Qupp. 25-mi issuagaq]

Ukiumut 2005-imut allassimaffik tassaassaaq: „Ikiorsiissutissara pissaaq [Jehovamit].“ — Tussiaat 121:2.

[Qupp. 26-mi assiliartaq]

Paulusip qatanngutinit Romameersunit ikiorneqarnini Guutimut qujassutigaa