Jehovap ikiuinera ilassisarpiuk?
Jehovap ikiuinera ilassisarpiuk?
„[Jehova] ikiortigaara, sioorassanngilanga.“ — HEBRÆERIT 13:6.
1, 2. Jehovap ikiuiumaneranik siunnersuineranillu ilassinninnissarput inuunitsinni sooq pingaaruteqarpa?
TAKORLOORIARUK qaqqami aqqusininnguakkoorlutit. Kisimiinngilatilli ilisimasortap ingiaqatigiumasimammatit, taannalu ilisimasortanit tamanit pitsaanerpaavoq. Ilinnit misilittagaqarnerungaaraluarlunilu qasusuinnerungaaraluarluni naammagittarluni ingiaqatigaatit. Orloqqajartartutit malugaa. Ulorianartukkuuleraangassi isumannaatsumut pisinniarlutit assani isaattarpaa ikiorniarlutit. Ikiuiniarnera itigartissaviuk? Soorunalimi naamik! Tassami ulorianartorsiorputit.
2 Kristumiutut aqqusininnguakkut ulorianartukkoortariaqarpugut. Kisimiilluta aqqusinikkut tassuuna amitsukkuussaagut? (Matthæusi 7:14) Naagga, Biibilimi allassimavoq ilisimasortaq tamanit pitsaanerpaaq, Jehova Guuti, inunnut saqeqatigitittartoq. (1 Mosesi 5:24; 6:9, 1900/1961) Jehovap kiffani saqineranni ikiortarpai? Ima oqarpoq: „Uanga tassaagama [Jehova] Guutit talerpikkut tigussavakkit oqarfigalutillu: Siooraqinak, ikiortigaarma.“ (Esaja 41:13) Assersuusiami ilisimasortap assamminik isaassineratut Jehovap inussiarnerluni imminik saqeqateqarusuttut ikiorumallugillu ikinngutigiumavai. Arlaannattaluunniit ikiuiumanera itigartikkusunngilaa, ilaa?
3. Apeqqutit suut uani sammissavavut?
3 Allaaserisap matuma siuliani Jehovap itsaq innuttaminik ikiueriaasii sisamat sammivavut. Ullumikkut aamma innuttani taamatut ikiortarpai? Ikiuinermillu taamaattumik ilassinninnerluta qanoq qulakkeersinnaavarput? Tamanna paasiniariartigu, taamaalillutalu Jehova ilumut ikiuisigigipput tatiginerulerlugu. — Hebræerit 13:6.
Inngilit aqqutigalugit ikiorneqarneq
4. Ullumikkut Guutip kiffaasa sooq inngilinit tapersersorneqartarnertik upperisinnaavaat?
4 Inngilit ullumikkut Jehovap kiffai ikiortarpaat? Aap. Pallorfiginnittut ilumoortut ulorianartorsiornerannit aniguisinniarlugit ullumikkut inngilit takussaalerneq ajorput. Allaat Biibilip nalaani inngilit takussaallutik akuliuttarnerat qaqutigoortuuvoq. Soorlu ullumikkut taamaattoq iliuuserisaat amerlanerpaat inunnut takussaanngillat. Taamaakkaluartorli Guutimut kiffartortut inngilit tapersersueriaannaanerannik paasinnittut, paasinninnertik tamanna kajumississutigingaarpaat. (2 Kunngit 6:14-17) Aamma uagut taamatut misiginissamut pissutissaqarluarpugut.
5. Ullumikkut oqaluussinermi inngilit suleqataanerat Biibilimi qanoq ersersinneqarpa?
5 Jehovap inngiliisa suliaq immikkut ittoq suleqataaffigisarput immikkut soqutigaat. Suliaq tamanna suua? Tamanna Saqqummersitat 14:6-imi akissutissarsisinnaavarput: „Takuara inngili alla pavani qilaap ataani timmisoq. Nalunaarutigiartorpaa iivangkiiliu atajuartussaq nunarsuarmi najugaqartunut, inuiaqatigiinnut naggueqatigiinnullu, immikkut oqaasilinnut inuiannullu tamanut.“ „Iivangkiiliu atajuartussaq“ tamanna ’naalagaaffimmik iivangkiiliumut’, Jiisusip siulittuutaa naapertorlugu pissutsit aaqqissuussaanerata matuma naggatissaa sioqqullugu ’inuiannut tamanut nalujunnaarsillugu silarsuarmi tamarmi oqaluussissutigineqartussamut’, attuumassuteqarluinnarpoq. (Matthæusi 24:14) Soorunami inngilit toqqaannartumik oqaluussineq ajorput, suliarmi pingaaruteqartoq tamanna Jiisusip inunnut suliassiissutigaa. (Matthæusi 28:19, 20) Suliamik tamatuminnga naammassinninnissamut inngilinit illernartunit, anersaanit pissaaneqartorujussuullutillu silatuujusunit, ikiorneqarluta nalunagu nuanneq, ilaa?
6, 7. (a) Suup takutippaa oqaluussinitsinni inngilit tapersersortaraatigut? (b) Jehovap inngiliinit tapersersorneqarnissarput qanoq qulakkeersinnaavarput?
6 Inngilit suliatsinnik tapersersuinerannik takussutissarpassuaqarpoq. Assersuutigalugu sallusuissut nanerusullugu Guutimut ikioqqullutik aatsaannguummat qinusimasunik Jehovap Nalunaajaasuisa oqaluussinerminni naapitaqartarsimanerannik tusagaqartarpugut. Taamatut misigisaqartoqakulangaarmat nalaatsornerinnakkut pisimanerarneqarsinnaanngillat. Inngilit ikiuigallartillugit inuit amerligaluttuinnartut ’inngilip pavani qilaap ataani timmisup’ oqaasiisa ukua maleruarnissaat ilikkarpaat: „Guuti mianerisiuk naalannartillugulu.“ — Saqqummersitat 14:7.
7 Jehovap inngiliinit pissaaneqangaartunit tapersersorneqarnissat qamannga pisumik kissaatigaajuk? Taamaappat sapinngisat tamaat kiffartornerit aallunniaruk. (1 Korinthimiut 15:58) Jehovap suliassiissutaanik immikkut ittumik suliaqarnitsinni kajumilluta imminut pilliutigigaangatta inngiliinit ikiorneqarnissarput naatsorsuutigisinnaavarput.
Inngiliuneq aqqutigalugu ikiorneqarneq
8. Jiisusi qilammi qutsinnerusumik qanoq inissisimaffeqarpa, aamma sooq tamatuminnga paasinninneq uagutsinnut qiimmaallannarpa?
8 Aammattaaq Jehovap inngilit aqqutigalugit allatut ikiortarpaatigut. Saqqummersitat 10:1-imi ’inngilimik pissarsuarmik’ mianernangaartumik ’seqinertut ittumik kiinalimmik’ takorruugaq allaaserineqarpoq. Inngili taanna Jiisusi Kristusimut qilammi pissaaneqarluni naalannarsisitaasumut assersuutaagunarpoq. (Saqqummersitat 1:13, 16) Jiisusili ilumut inngiliua? Aap, taamatut oqartoqarsinnaavoq inngiliunerummat. (1 Thessalonikamiut 4:16) Jehovap ernerinit anersaajusunit tamanit Jiisusi pissaaneqarnerpaavoq. Jehovap inngiliminut tamanut naalakkersuisunngortippaa. Inngiliuneq taanna ilumut ikiuisuuvoq pissaaneqangaartoq. Sutigut?
9, 10. (a) Ajortulioraangatta qanoq Jiisusi uagutsinnik ’ikiuisuusarpa’? (b) Jiisusip maligassiuinera qanoq iluaqutigisinnaavarput?
9 Apustili Johannesi utoqqalisimasoq ima allappoq: „Ajortuliortoqassappat illersortissaqarpugut Ataatami, tassa Jiisusi-Kristusimik iluartuusumik.“ (1 Johannesi 2:1) Sooq Johannesip ingammik ’ajortulioraangatta’ Jiisusi ’illersuisuunerarpaa’ imaluunniit ’ikiuisuunerarpaa’? Tassa ullut tamaasa ajortuliortaratta, ajortilu toqumik kinguneqartarpoq. (Oqaluussisartup oqaasii 7:20; Romamiut 6:23) Jiisusilli ajortuliavut pillugit inuunini pilliutigaa. Ataatattalu nallittuisup killinganiippoq qinnunniarluta. Tamatta immikkut taamatut ikiorneqarnissarput pisariaqartipparput. Ikiorneqarneq tamanna qanoq ilassisinnaavarput? Ajortuliatsinnik peqqissimissutiginninnitsigut Jiisusillu pilliutaa tunngavigalugu isumakkeerfigeqqunitsigut. Aammattaaq ajortulioqqeqattaarnaveersaartariaqarpugut.
10 Jiisusi uagut pilluta toquinnarnani aamma naammalluinnartumik maligassippaatigut. (1 Petrusi 2:21) Maligassiuinermigut aqqutissiuuppaatigut ingerlavissatsinnillu aalajangiussinissamut ikiorluta sualuttumik ajortuliornaveersaarsinnaaniassagatta Jehova Guutimullu iluarisaasinnaaniassagatta. Taamatut ikiorneqarnerput qujamasuutigaarput, ilaa? Jiisusip ajoqersukkani neriorsorpai aamma allamit ikiorneqarnissaat isumagineqarumaartoq.
Anersaaq illernartoq aqqutigalugu ikiorneqarneq
11, 12. Jehovap anersaava suua, qanoq sunniuteqartigaa, aamma sooq ullumikkut pisariaqartipparput?
11 Jiisusi ima neriorsuivoq: „Ataataq qinnuigiumaarpara, tuniumaarpaasilu illersuisussamik allamik naassaanngitsumik ilissinniittussamik. Taanna tassaassaaq sallusuissutip anersaava silarsuup ilassisinnaanngisaa.“ (Johannesi 14:16, 17) „Sallusuissutip anersaava“, anersaaq illernartoq kinaassusiliunani nukiuvoq — Jehovap nukinga sulisoq. Nukiuvoq killeqanngitsoq. Nukillu taanna Jehovap silarsuarmik pinngortitsinermut, maluginiarnartunik tupinnartuliornermut piumasanilu saqqummersinniarlugu takorruuisitsinermut atorpaa. Ullumikkut Jehovap anersaani taamatut atorneq ajormagu, imaappa uagut pisariaqartinngikkipput?
12 Naamerluinnaq! ’Ulluni makkunani atugarliungaarfiusuni’ Jehovap anersaava aatsaat taama pisariaqartitsigaarput. (2 Timotheusi 3:1) Misilinneqarnerni pinertusaarnissamut nakussatsissutigisarparput. Pissutsinik nuannersunik Jehovamut anersaakkullu qatanngutitsinnut qanillisitsisunik ineriartortitsinissamut iluaqutigaarput. (Galatiamiut 5:22, 23) Jehovalli ikiuinera asseqanngitsoq tamanna qanoq iluaqutigisinnaavarput?
13, 14. (a) Jehovap kajumilluni anersaaq illernartumik innuttaminut tunniussisarnera sooq qularisariaqanngilarput? (b) Anersaaq illernartumik ilassinnikkumannginneq qanoq periaaseqarnikkut ersersinneqartarpa?
13 Siullermik anersaaq illernartoq qinnutigisariaqarparput. Jiisusi ima oqarpoq: „Ilissi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ (Lukasi 11:13) Aap, Jehova ataatatut taaneqarsinnaasunit tamanit Ataataalluarnerpaavoq. Anersaaq illernartoq qinnutigigutsigu tunissut taanna uagutsinnut tunniutinngitsoornavianngilaa. Taava una apeqqutaalerpoq: Qinnutigisarparput? Ullut tamarluinnaasa qinnutiginissaanut pissutissaqarluarpugut.
14 Aappassaanik tunissut taanna ilassisariaqarparput tamatumunnga naapertuuttumik iliuuseqarnikkut. Imatut assersuusiortoqarsinnaavoq: Takorlooriaruk kristumiu tiingasulersaarutinik isiginnaaqqajaanermik akiugaqartoq. Ileqquni minguttooq taanna akiorniarlugu anersaaq illernartumit ikiorneqarnissani qinnutigaa. Utoqqaanertat kristumiut saaffigai siunnersoqqulluni, taakkualu siunnersorpaat aalajangersimalluni iliuuseqaqqullugu aserornartullu tamakku qanillinngilluinnaqqullugit. (Matthæusi 5:29) Taavami siunnersuutaat sumiginnarpagit imminullu ussernartorsiorteqqilluni? Taava anersaaq illernartumit ikiorneqarnissaminik qinnutiminut naapertuuttumik iliorpa? Imaluunniit Guutip anersaava aliasutseriaannaavaa taamaalillunilu tunissut taanna annaallugu? (Efesosimiut 4:30) Jehovap ikiuinerata nuanningaartup tamatuma iluaqutigiuarnissaa qulakkeerniarlugu tamatta sapinngisatsinnik iliortariaqarpugut.
Guutip oqaasia aqqutigalugu ikiorneqarneq
15. Qanoq takutissinnaavarput Biibili taamaattussaannartut isiginagu?
15 Jehovap kiffaasa aalajaatsut ukiuni hundredelippassuarni Biibili iluaqutigisarsimavaat. Allakkalli Illernartut taamaattussaannartut isigissanngilavut, uagutsinnulli iluaqutaangaarsinnaasut eqqaamasariaqarlugu. Iluaqutigissagaanni iliuuseqarnissaq pisariaqarpoq, taamaattumillu Biibilimik atuarneq ullormut pisassatsinnut ilannguttariaqarparput.
16, 17. (a) Guutip inatsisaanik atuarnikkut pilluaqqusaaneq Tussiaat 1:2, 3-mi qanoq allaaserineqarpa? (b) Eqiasuilluni iliuuseqartariaqarneq Tussiaat 1:3-mi qanoq ersersinneqarpa?
16 Angut Guutimik mianerinnittoq pillugu Tussiaat 1:2, 3-mi ima allassimavoq: ’[Jehovap] inatsisaanik nuannarisaqarpoq inatsisaalu eqqarsaatigalugit ullukkullu unnuakkullu. Taassuma assigaa orpik kuunnguup killingani ikkunneqarsimasoq; inerititaqarfissamigut inerititaqartarpoq toqujuitsunillu pilutaqarluni. Qanoq iliornermini tamani iluatsitsisaraaq.’ Versini suna pingaarnerpaanersoq paasiviuk? Oqaatsit taakku atuarlugit isummertoqariaannaavoq isigisat kusanartut eqqissinartullu allaaserineqaannartut — orpik alanngiffigiuminartoq kuup sinaani naasoq. Ualikkut tassani qasuersaassalluni nuannissaqaaq! Tussiaammili qasuersaarnissamut kajumissaarneqanngilagut. Tassanili pineqarpoq eqiasuilluni iliuuseqarnissaq. Qanoq?
17 Maluginiaruk orpik taanna tassaaginnanngitsoq orpik alanngiffigiuminartoq nalaatsornikkut kuup sinaani naasoq. Orpiuvoq inerititaqarluartoq eqqarsaatigilluaqqaarlugu tassunga „ikkunneqarsimasoq“ — „kuunnguup killingani“. Orpinnik paarnalinnik naatitsisarfiutilik immaqa orpiitimi naleqangaartut sorlaasa tungaannukartumik imermut sulluliussaaq. Aarit, paasinarseriataarpoq suna pineqarnersoq! Orpiup taassuma naggorinneratut anersaakkut ingerlalluarutta, uagut iluaqutissatsinnik suliniartoqangaarsimanera pissutaavoq. Peqatigiiffimmut sallusuissutip ernganik minguitsumik uagutsinnik pilersuisumut ilaavugut, uagulli aamma nammineq iliuuseqartariaqarpugut. Sallusuissutit Guutip oqaasianeersut isummatsinniitilerniarlugit uummammiuliunniarlugillu imermik naleqangaartumik tamatuminnga piffigisinnaasatsinniinnissarput qulakkeertariaqarparput. Aamma atuakkatta eqqarsaatigeqqissaarnissaannut itisilernissaannullu piffissalertariaqarpugut. Taamaalilluta orpittut taassumatut inerititaqarluarsinnaassaagut.
18. Apeqqutivut Biibilimi akissutissarsissagutsigit suna pisariaqarpa?
18 Biibili ilisivimmiitiinnarlugu iluaqutiginavianngilarput. Angakkuarniutaananilu aarnuaanngilaq — soorlu sequnngeriarluta Biibili quppersinnaagipput naatsorsuutigalugulu apeqqutitta akissutaa quppernermi tassaniissasoq. Aalajangigassaqaraangatta ’Guuti pillugu ilisimasassat’ paasiniarlugit erlinnartunik nassaarniartup assaaneratut iliortariaqarpugut. (Ussatit 2:1-5) Pisariaqartitatsinnut aalajangersimasunut tunngatillugu Biibilimi siunnersuutit naniumallugit eqiasuilluni misissueqqissaarnissaq pisariaqartarpoq. Atuaqqissaarnitsinni iluaqutigisinnaasatsinnik atuakkanik atuagassianillu Biibilersaarutaaterpassuaqarpugut. Guutip oqaasiani ilisimassutsip erlinnartuutaanik ’assaanitsinni’ taakku atorluaraangatsigit Jehovap ikiuinera iluaqutigilluartarparput.
Uppeqatit aqqutigalugit ikiorneqarneq
19. (a) Napasuliaq Alapernaarsuiffik-mi Iteritsi!-milu allaaserisat sooq uppeqatit aqqutigalugit ikiorneqarnertut isigineqarsinnaappat? (b) Atuagassiaatitsinni allaaserisaq aalajangersimasoq aqqutigalugu qanoq ikiorneqarpit?
19 Jehovap inuit imminut kiffartortut ikioqatigiissittuaannarpai. Tamanna eqqarsaatigalugu Jehova allanngorsimava? Naagga, allanngorsimanngilluinnarpoq. Qularnanngitsumik uppeqatitta pisariaqartitarpiatsinnik piffissakkut eqqortukkut ikiuisimanerannik tamatta immikkut eqqaasaqarsinnaavugut. Assersuutigalugu Napasuliaq Alapernaarsuiffik-mi Iteritsi!-milu allaaserisanik pisariaqartitsiffinni tuppallersaatigisannik, imaluunniit ajornartorsiummik aaqqiiniarninni imaluunniit unamminiarnartup upperninnut misilinneqaataasup anigornissaanut iluaqutigisannik eqqaasaqarsinnaavit? Jehovap „inussiaq aalajaallunilu silatooq“, ’piffissaq eqqorlugu nerisassanik’ isumaginnittuutitaasoq, aqqutigalugu iluaqutissannik tamakkuninnga tunivaatit. — Matthæusi 24:45-47.
20. Utoqqaanertat kristumiut sutigut takutittarpaat ’inunnik tunissutaallutik’?
20 Uppeqatilli aqqutigalugit ikiorneqartarnerput toqqaannarnerusarpoq. Utoqqaanertaq kristumiu immaqa oqalugiarpoq qamuuna attortissutigisatsinnik, paarsisutut pulaarpoq ajornartorsiorfimmi iluaqutigisatsinnik, imaluunniit inussiarnersumik siunnersorpaatigut sanngiissutitsinnik takunninnissamut imaluunniit ajugaaffiginninnissamut iluaqutigisatsinnik. Qatanngut arnaq kristumiu qujamasuttoq utoqqaanertap imminik ikiuisimanera pillugu ima allappoq: „Oqaluussitilluta artorsaatikka oqaluttuarigakkit tusarnaarnissannut piffissaqarpoq. Oqaluusseqatigiinnissarput aqaguttoq Jehova oqaloqatissaqaqqullunga qinnuigaara. Qatanngutip taassuma misiginneqatiginningaarluni oqaloqatigaanga. Ukiorpassuarni Jehovap qanoq ikiorsimaneraanga takusinnaalersippaa. Qujamasuutigaara Jehovap qatanngut utoqqaanertaq taanna uannukartissimammagu.“ Tamakkunatigut utoqqaanertat kristumiut takutittarpaat ’inunnik tunissutaallutik’, Jehovap Jiisusi Kristusi aqqutigalugu tunniussai inuunermut aqqutikkuuginnarnissatsinnut ikiorniarluta. — Efesosimiut 4:8, NV.
21, 22. (a) Ilagiinniittut Filippimiut 2:4-mi siunnersuut maleruaraangassuk qanoq kinguneqartarpa? (b) Sooq allaat inussiarnisaalaarnerit pingaaruteqarpat?
21 Utoqqaanertaannaanngillat, kristumiulli aalajaatsut tamarmik siunnersuut isumassarsiarititaasoq una maleruarusuppaat: „Tamassi immikkut nammineq iluaqutissarsi pinnagu inoqatississaaq iluaqutissaat isumagisiuk.“ (Filippimiut 2:4) Ilagiinni kristumiuniittut siunnersuut taanna maleruaraangassuk inussiarnernermik ersersitsisunik killinnartunik iliuuseqarnermik kinguneqartarpoq. Assersuutigalugu ilaqutariinni sualuttumik ajunaartoqariataarpoq. Ataataasup paneeqqani pisiniaqatigaa, angerlamut aqqutaani biilimik ajutoorput. Pania toquvoq, ataataalu aqqunartiterluni. Napparsimmavimmit angerlarami aallaqqaammut ima ajoqusersimatigaaq nammineq susinnaanani. Nuliata misigissutsikkut artorsaateqangaarami kisimiilluni isumagisinnaanngilaa. Taamaattumik aappariit ilagiinneersut aappariit aliasuttut taakku sapaatip-akunnerini arlalinni imminniitippaat isumassorlugillu.
22 Soorunami inussiarnisaarnerit pisunut alianartunut imminullu pilliutiginermut attuumassuteqartuaannanngillat. Nalinginnaasumik taamarsuaq ikiorneqarneq ajorpugut. Inussiarnisaarfigineqalaaginnarnerpulli pingaartittarparput, ilaa? Qatanngutip asannittumik oqaaseqarneratigut ajunngisaarneratigulluunniit pisariaqartitarpiannik ikiorneqarninnik eqqaasaqarsinnaavit? Jehovap taamatut isumassortuartarpaatigut. — Ussatit 17:17; 18:24.
23. Ikioqatigiinniaraangatta Jehovap qanoq isigisarpaa?
23 Allanik ikiuinermut Jehovamit atorneqarusuppit? Ilinnut immikkut pisinnaatitaaffiuvoq ammasoq. Aamma allat pillugit iliuuseqarnerit Jehovap pingaartingaarpaa. Oqaasiani ima allassimavoq: „Piitsumik ikiuisoq [Jehovamut] taarsigassarsisitsisuuvoq, [Jehovallu] taarsiiffigissavaa ajunngitsuliornerata taamaaqataanik.“ (Ussatit 19:17) Qatanngutinut iluaqutaasumik iliuuseqarneq nuannaarutaangaartarpoq. (Apustilit Suliaat 20:35) Inuit piaaralutik inoqatiminnit immikkoorniartut taamatut ikiuinerup nuannersortaanik imaluunniit ikiorneqarnermi nakussatsinneqarnermik misigisaqarnavianngillat. (Ussatit 18:1) Taamaattumik kristumiut ataatsimiinnerinut aalajaalluta peqataasarniarta taamaalilluta kajumissaaqatigiissinnaassagatta. — Hebræerit 10:24, 25.
24. Jehovap itsaq takulertornartunik tupinnartuliaanik takunnittuunngikkaluarluta sooq ilartariaqanngilagut?
24 Jehovap uagutsinnik ikiueriaasii eqqarsaatigilluarlugit nuanningaarami, ilaa? Naak Jehovap siunertani naammassiniarlugit takulertornartunik tupinnartuliortarnerata nalaani inuunngikkaluarluta ilarnissamut pissutissaqanngilagut. Pingaaruteqartorli unaavoq, Jehovap aalajaattuarnissamut pisariaqartitatsinnik tamanik ikiortarmatigut. Uppernermilu ikioqatigiilluta pinertusaarutta oqaluttuarisaanermi Jehovap suliai tupinnarnerpaat misigiumaarpavut! Jehovap asannittumik ikiuinerata ilassinissaa atorluarnissaalu aalajangiusimaniartigu, ukiumi 2005-imi allassimaffimmi allassimasutut oqarsinnaaniassagatta: „Ikiorsiissutissara pissaaq [Jehovamit].“ — Tussiaat 121:2. (wE 12/15 04)
Qanoq isumaqarpit?
Jehovap ullumikkut ikiorneqarnissarput qanoq isumagisarpaa —
• inngilit aqqutigalugit?
• anersaani illernartoq aqqutigalugu?
• oqaatsini isumassarsiarititaasoq aqqutigalugu?
• uppeqatit aqqutigalugit?
[Atuaqqissaarnermi apeqqutit]
[Qupp. 28-mi assiliartaq]
Oqaluussineq inngilit tapersersoraat nalunagu nuannerpoq
[Qupp. 31-mi assiliartaq]
Imaassinnaavoq Jehovap pisariaqartitatsinnik tuppallersarniarluta uppeqatitta ilaat atoraa