Kristusi — siulittuutini pingaarnersaasoq

„Jiisusimik nalunaajaat tassaavoq pruffiitisut siulittuutip anersaava.“ — SAQQUMMERSITAT 19:10.

1, 2. (a) Ukioq 29 u.n.k. aallarnerfigalugu Israelikkut sumik aalajangigassaqalerpat? (b) Allaaserisami matumani suna misissussavarput?

UKIOQ 29-uvoq u.n.k. Missiarsi neriorsuutigineqartoq Israelimi oqaluuserineqangaarpoq. Johannesip Kuisisup kiffartornera Missiarsip tikiunnissaanik ilimasunnerulersitsivoq. (Lukasi 3:15) Johannesi Missiarsiunnginnerarpoq, Jiisusili Nazaretimiu Missiarsiunerarpaa ima oqarluni: „Nalunaajaatigaara taanna tassaasoq Guutip ernera.“ (Johannesi 1:20, 34) Sivitsunngitsoq inuppassuit Jiisusip ajoqersuutaa tusarnaarniarlugu taassumanngalu ajorunnaarsinneqarniarlutik malittalerpaat.

² Tamatuma kingorna Jehovap ernini pillugu uppernarsaaterpassuit pilersippai. Allakkanik atuaqqissaartut maannalu Jiisusip suliaanik takunnittut, taassuminnga upperinninnissamut tunngavissaqarluarput. Guutilli innuttamisut angerfigeqatigisai ataatsimut isigalugit uppernikipput. Ikittuinnaat Jiisusi Missiarsitut, Guutip erneratut, akueraat. (Johannesi 6:60-69) Taamani inuusimasuuguit qanoq iliorsimassagaluarpit? Jiisusimik Missiarsitut ilassinninnissamut taassumunngalu aalajaallutit ajoqersuganngornissamut killinneqarsimassagaluarpit? Jiisusip sabbatimik unioqqutitsinerarneqarami kinaanerminik nalunaajaatai eqqarsaatigikkit. Maluginiakkittaaq ajoqersukkami ilumoorfiginnittut uppernerat nakussatsinniarlugu uppernarsaatigisai.

Jiisusip nammineq nalunaajaataa

3. Qanoq pisoqarmat Jiisusi kinaanerminik uppernarsaasariaqalerpa?

³ Maanna ukiumi 31-mi poorskiuvoq. Jiisusi Jerusalemimiippoq, angullu ukiuni 38-ni napparsimasimasoq  ajorunnaarseqqammerpaa. Juutilli Jiisusip sabbatimi ajorunnaarsitsisimanera pillugu malersorpaat. Aammattaaq Guutimut mitallersuunerarpaat toqunniaraluarlugulu Guuti Ataataginerarmagu. (Johannesi 5:1-9, 16-18) Jiisusi kinaanerminik juutip ilumoorusuttup kialuunniit qularunnaarutissaanik pingasunik kimittuunik tunngavilersuuteqarluni imminut illersorpoq.

4, 5. Johannesip kiffartornera sumik siunertaqarpa, qanorlu naammassilluartigaa?

⁴ Siullermik Jiisusi aqqutissiuussisumi, Johannesi Kuisisup, nalunaajaataanut innersuussivoq. Jiisusi ima oqarpoq: „Johannesi oqariartortitsivigaarsi, taassumalu sallusuissut nalunaajaassutigaa. Johannesi tassaavoq qulleq ikumasoq, qaamasoq; qaamaneralu sivikitsumik qiimmattaatigissavarsi.“ — Johannesi 5:33, 35.

⁵ Johannesi Kuisisup ’qulliunera ikumasoq, qaamasoq’ isumaqarpoq Herodesimit naapertuilluanngitsumik parnaarunneqartinnani suliassani Guutimeersoq naammassisimagaa, tassa Missiarsimik aqqutissiuussineq. Johannesi ima oqarsimavoq: „Israelikkunnut [Missiarsi] saqqummeqqullugu uanga tikiuppunga imermik kuisisarlunga. . . . Takuara Anersaaq tuisut illuni qilammit aqqartoq qulangersimajualerlugulu. Kinaasoq nalusimagaluarpara, imermilli kuisiartoqqullunga uannik aallartitsisup oqarfigaanga: Takusat taanna Anersaap aqqarfigisaa qulangersimajualigaalu tassaavoq Anersaamik Illernartumik kuisisoq. Tamanna takuara, nalunaajaatigaaralu taanna tassaasoq Guutip ernera.“ * (Johannesi 1:26-37) Johannesip Jiisuserpiaq Guutimut ernerunerarpaa, Missiarsi neriorsuutigisaasoq. Johannesip nalunaajaatai erseqqaringaarmata toqunerata kingorna qaammatit arfineq-pingasut missaat qaangiuttut juutit ilumoorusuttorpassuit ima nassuerput: „Angut una pillugu [Johannesip] oqaasii tamarmik ilumoorput.“ — Johannesi 10:41, 42.

6. Jiisusip suliaanik takunnittut Guutimit najorneqarnera sooq qularutigisariaqanngilaat?

⁶ Aappassaanik Jiisusip Missiarsiunini uppernarsarniarlugu suliani ajunngitsut, Guutimit najorneqarnerminut takussutissaasut, tunngavilersuutigai. Jiisusi ima oqarpoq: „Nalunaajaat uanga pigisara Johannesip nalunaajaataanit anneruvoq, suliammi Ataatap uannut naammasseqqusaasa, suliat tamakkua suliarisama, nalunaajaatigaannga Ataatap aallartikkaanga.“ (Johannesi 5:36) Jiisusimulluunniit akeraasut nalunaajaat tamanna tupinnartuliarpassuarnik ilalik ilumuunnginnerarsinnaanngilaat. Kingusinnerusukkut akeraasut ilaat ima aperipput: „Qanoq iliussaagut? Angut taanna amerlasuunik nalunaaqutiliortarpoq.“ (Johannesi 11:47) Allalli upperaat imalu oqarlutik: „Kristusi tikiukkuni uuma nalunaaqutiliaanit amerlanerusunik nalunaaqutiliorumaarnerpa?“ (Johannesi 7:31) Jiisusimik tusarnaartut Ernermi Ataatap pissusiinik takunninnissamut periarfissaqarluarput. — Johannesi 14:9.

7. Allakkat Hebræerisuut Jiisusi pillugu nalunaajaatinik sunik imaqarpat?

⁷ Naggataatigut Jiisusip Allakkani nalunaajaatigineqartut akerlilerneqarsinnaanngitsut innersuussutigai ima oqarluni: „Taakkorpiaat uanga nalunaajaatigaannga.“ Nangillunilu: „Mosesi upperisimagaluarussiuk uangattaaq upperisimassagaluarpassinga; Mosesimmi uanga allaaseraanga.“ (Johannesi 5:39, 46) Kristumiut sioqqullugit nalunaajaasorpassuit Missiarsi pillugu allattut Mosesi ilaannaraat. Taakkua allagaat siulittuutinik hundredelinnik kinguaariillu allattorsimaffiinik arlalinnik immikkuualuttortalinnik Missiarsimut tikkuussisunik imaqarput. (Lukasi 3:23-38; 24:44-46; Apustilit Suliaat 10:43) Mosesimmi inatsisai? Paulusi ima allappoq: „Inatsisit tassaapput uagutsinnik Kristusimut siulersuillutik perorsaasut.“ (Galatiamiut 3:24, NV) Aap, „Jiisusimik nalunaajaat tassaavoq pruffiitisut siulittuutip anersaava“, tassa siunertavia. — Saqqummersitat 19:10.

8. Juuterpassuit Jiisusip Missiarsiunera sooq upperinngilaat?

⁸ Nalunaajaatit tamakku tamarmik — Johannesip oqaasii erseqqissut, Jiisusip suliai kimittuut, pissusii Guutip pissusiinut assingusut Allakkanilu uppernarsaatissarpassuit — Jiisusip Missiarsiuneranik  ilinnik qularunnaarsitsipput, ilaa? Guutimik oqaasianillu ilumoorlutik asannittut tamarmik ingerlaannaq tamanna paasissavaat Jiisusilu Missiarsitut neriorsuutigisatut upperilissallugu. Israelimili taamatut asannittut ikittuinnaapput. Jiisusi akerlilersortiminut ima oqarpoq: ’Nalunngilara Guutip asanninneranik ilumiugisaqanngitsusi.’ (Johannesi 5:42) ’Guutituaasumit nersorneqaatissaq pissarsiariniarnagu namminnerli akunnerminni nersorneqarnissaq pissarsiariniarpaat.’ Tupinnanngilaq Jiisusimut, Ataataamisut taamatut isiginnittaasilinnik maajuginnittumut, akeraammata! — Johannesi 5:43, 44; Apustilit Suliaat 12:21-23.

Takorruugaq siulittuutaasoq nakussatsissutigaat

9, 10. (a) Sooq Jiisusip ajoqersukkaminut nalunaaqummik takutitsinera piffissaalluarpa? (b) Jiisusip ajoqersukkani maluginiarnartumik sumik neriorsorpai?

⁹ Maanna Jiisusip Missiarsiunerminik uppernarsaaneranit siusinnerusukkut eqqaaneqareersumit ukioq ataaseq qaangiutereerpoq. Ukiumi 32-mi poorskereerpoq. Uppertuusimagaluartut amerlasuut malikkunnaarsimavaat, immaqa malersorneqarneq, pigisalerituneq inuunermiluunniit isumakuluutit pissutigalugit. Allat immaqa Jiisusip inuiaat imminik kunnginngortitsiniarnerannik itigartitsinera paatsiveerussutigaat pakatsissutigaluguluunniit. Upperisarsiornikkut siuttut juutiusut qilammit nalunaaqummik takutitseqqummanni imminut taamatut naalannarsisikkumanngilaq. (Matthæusi 12:38, 39) Ilaasa immaqa tamanna tupigusuutigaat. Aammattaaq Jiisusi ajoqersukkami paasiuminaatsitaannik saqqummiussisalerpoq — ’Jerusalemiliartariaqarluni utoqqaanertanit palasiunernillu allakkanillu ilisimasunit anniartitaangaassalluni toqunneqassallunilu’. — Matthæusi 16:21-23.

¹⁰ Qaammatit qulingiluat qulilluunniit missaat qaangiuppata Jiisusip ’Ataatamukarluni silarsuarmit matumannga aallarnissaanut’ piffissanngussaaq. (Johannesi 13:1) Jiisusip ajoqersukkaminut ilumoorfiginnittunut isumassuingaarluni ilaat neriorsorpai juutinut ilumuunngitsunut takutikkumanngisani takussagaat — qilammit nalunaaqut. Ima oqarpoq: „Ilumut oqarfigaassi: Maaniittut ukua ilaasa toqu misigissanngilaat Inuup Ernerata naalagaalluni tikiunnera takoreertinnagu.“ (Matthæusi 16:28) Soorunalimi Jiisusi isumaqanngilaq ajoqersukkami ilaat 1914-imi naalagaaffiup Missiarsikkoortup pilersinneqarnissaata tungaanut inuuinnassasut. Jiisusip ajoqersukkani qaniginerpaasani pingasut kunngitut naalannarsisitaanissaminik pissanganartumik takorruuisissallugit eqqarsaatigaa. Pisoq tamanna Jiisusip qaqqami naalannarsisitaaneranik taaneqartarpoq.

11. Takorruuisitsinikkut qaqqami naalannarsisitaaneq oqaluttuariuk.

¹¹ Ullut arfinillit qaangiuttut Jiisusip apustilit Petrusi, Jaaku Johannesilu qaqqamut portusuumukaqatigai, Hermonip qaqqaata avaleqquanuugunartoq. Tassani Jiisusi ’isigitillugit allanngorpoq. Kiinaa seqinertut qaamaninippoq atisaalu qaamanertut inngianarsillutik.’ Pruffiitit Mosesi Elialu Jiisusimik oqaloqateqartut saqqummerput. Takorruugaq mianernangaartoq tamanna unnuakkut pigunarpoq, taamaattumillu piviusorpalulluinnarpoq. Aap, apustilinut tamanna  ima piviusorpalutsigaaq Petrusi tupernik pingasunik nappaajumagaluarluni Jiisusi, Mosesi Elialu tamarmik immikkut tupeqarniassammata. Petrusi oqalutsillugu nuissap qaamasup ulippai, nuissamillu nipi ima tutsiuppoq: „Tassa ernera asasara nuannarisara. Taanna tusarsiuk!“ — Matthæusi 17:1-6.

12, 13. Naalannarsisitaanermik takorruuisitsineq Jiisusip ajoqersugaasa qanoq killitsissutigaat, aamma sooq?

¹² Tamanna pinngitsiartoq Petrusip Jiisusi ’Kristusiunerarpaa Guutip uumasup ernera’. (Matthæusi 16:16) Allaalluinnarporli Guuti nammineq ernermi tanitap kinaassusianik pingaaruteqassusianillu nalunaajaatiginnillunilu uppernarsaasoq tusaallugu. Qaqqami naalannarsisitaanermik takorruugaq Petrusip, Jaakup Johannesillu uppernerannik nakussatsitsingaarpoq. Maanna uppernikkut nakussatsinneqarsimallutik pisussanut siunissamilu ilagiinni suliassaminnut pingaarutilimmut piareersimanerulerput.

¹³ Naalannarsisitaaneq ajoqersukkanut najuuttunut misigisaavoq puiunaatsoq. Ukiut 30-t qaangiuttut Petrusi ima allappoq: „Ataqqinassuseq naalannassuserlu Guutimit Ataatamit pivai nipi imaattoq pavannga naalannangaartorsuarmit taassumunnga tutsiummat: ’Tassa ernera asasara, nuannarisara.’ Uagut nammineq tusarparput nipi tamanna qilammit tutsiuttoq Qaqqami Illernartumeeqatigitillugu.“ (2 Petrusi 1:17, 18) Pisimasoq tamanna Johannesimuttaaq misigisaavoq puiunaalluinnartoq. Ukiut 60-t qaangiutereersut tamanna pigunarlugu ima allappoq: „Takuarput naalannassusia, naalannassuseq Ernituap Ataatamit pisaa.“ (Johannesi 1:14) Naalannarsisitaanermilli takorruuisitsineq Jiisusip ajoqersugaanik takorruuisitsinerunngilaq kingulleq.

Guutip kiffaanut ilumoorfiginnittunut paasissutisseeqqinneq

14, 15. Apustili Johannesip ’Jiisusip tikiunnissaata tungaanut inuuinnarnera’ qanoq paasisariaqarpa?

¹⁴ Jiisusi toqusunit makititaanermi kingorna Galilæap Tasersuata eqqaani ajoqersukkaminut saqqummerpoq. Tassani Petrusi ima oqarfigaa: „Tikiunnissama tungaanut [Johannesip] inuuinnarnissaa uanga piumasarigukku, taava illit tamanna sussagakku?“ (Johannesi 21:1, 20-22, 24) Oqaatsit taakku ima paasisariaqarpat Johannesi apustilinit allanit sivisunerusumik inuusussaasoq? Taamaagunarpoq, tassami tamatuma kingorna ukiuni 70-ingajanni aalajaalluni Jehovamut kiffartorpoq. Jiisusilli oqaasii isumaqarnerupput.

¹⁵ Oqariartaaseq „tikiunnissama tungaanut“ Jiisusip ’Inuup Ernerata naalagaalluni tikiunnissaa’ pillugu oqaasiinik eqqaasitsivoq. (Matthæusi 16:28) Johannesip ’Jiisusip tikiunnissaata tungaanut inuuinnarnera’ ima paasisariaqarpoq Johannesi kingusinnerusukkut Jiisusip naalagaaffimmi kunngitut tikiunneranik siulittuutaasumik takorruuisitaasoq. Johannesi toqungajalerluni qeqertamut Patmosimut aallarunneqarmat Saqqummersitat, „Naalakkap ulluani“ pisussanik takorruugarpassuarnik siulittuutaasunik alutornangaartunik imallit, taassumunnga tunniunneqarput. Jiisusi oqarmat: „Tassami, erniinnaq aggissaanga,“ Johannesip takorruukkat alutornangaartut taakku killitsissutigingaaramigit ima oqarpoq: „Amen, aggerniarit Naalagaq Jiisusi!“ — Saqqummersitat 1:1, 10; 22:20.

16. Uppernitta nakussatsittuarnissaa sooq pingaaruteqarpa?

¹⁶ Ukiuni hundredelinni siullerni ilumoorusuttut Missiarsi ilassivaat taassumunngalu uppertunngorlutik. Uppinnginneq nalinginnaangaarmat, suliassaqaramik misilinneqartussaagamillu nakussatsinneqarnissartik pisariaqartippaat. Jiisusip Missiarsiunini uppernarsarluareerpaa,  ajoqersukkanilu ilumoorfiginnittut takorruukkat siulittuutaasut qaammarsaataasut atorlugit qiimmassarsimavai. Ullumikkut ’Naalakkap ullua’ ingerlareersimaqaaq. Qanittukkut Kristusip Saatanip pissutsinik aaqqissuussinera ajortoq tamaat suujunnaarsissavaa Guutillu innuttai aniguisillugit. Uaguttaaq uppernerput nakussatsittariaqarparput. Taamaattumik anersaakkut peqqissooqqulluta Jehovap tunniuttagai tamaasa sapinngisatsinnik atorluartariaqarpavut.

Annikilliorfiusumit taartumit aniguisitaasut

17, 18. Ukiuni hundredelinni siullerni Jiisusip ajoqersugai Guutip siunertaanik akerlilersuisunit qanoq allaaneruppat, eqimattallu marluk taakku immikkut qanoq pippat?

¹⁷ Jiisusip toqunerata kingorna ajoqersugaasa sapiillutik „Jerusalemimi Judæamilu tamarmi Samariamilu nunarsuullu isua tikillugu allaat“ nalunaajaatigeqqulluni peqqussutaa naalappaat. (Apustilit Suliaat 1:8) Ilagiit kristumiut pilersinneqarlaat malersorneqaqattaarput, Jehovalli anersaakkut qaammarsarlugit ajoqersuganngorlaallu amerlasuut ilanngutitittarlugit pilluaqquai. — Apustilit Suliaat 2:47; 4:1-31; 8:1-8.

¹⁸ Paarlattuanilli nutaarsiassamik nuannersumik akerlilersuisut siunissaat taarsigaluttuinnarpoq. Ussatit 4:19-imi ima allassimavoq: „Iluanngitsut ingerlaviat taartuinnarsuuvoq, naakkiuffiusinnaasut naluaat.“ Romamiut sakkutuuisa ukiumi 66-imi Jerusalemi ungummassuk ’taartuinnarsuaq’ taggarissivoq. Pissutissaqarsorinanngitsumik tunuarallarput, ukiumili 70-imi takkuteqqipput tamatumuunalu illoqarfik piuneerullugu. Oqaluttuarisaanermik ilisimatooq juutiusoq Josefus naapertorlugu juutit millionit sinnerlugit ajunaarput. Kristumiulli aalajaatsut aniguipput. Sooq? Ungusinerup siulliup kingorna Jiisusip qimaaqqusinnera naalakkamikku. — Lukasi 21:20-22.

19, 20. (a) Pissutsit aaqqissuussaanerata maanna atuuttup naggaserneqangajalernerani Guutip innuttai sooq annilaangasariaqanngillat? (b) 1914 sioqqullugu Jehovap innuttani maluginiarnartumik sumik paasitippai?

¹⁹ Pissutsit atukkavut taakkununnga assingupput. Annikilliornartussarsuaq Saatanip pissutsinik aaqqissuussinerata ajortup naggatigissavaa. Guutilli innuttai annilaangasariaqanngillat, Jiisusimi ima neriorsuivoq: „Takuat, ullut tamaasa najorpassi silarsuup naggatissaanut allaat.“ (Matthæusi 28:20) Ajoqersukkami siulliit uppernerat ineriartortinniarlugu siunissamullu piareersarniarlugit Jiisusip kunngitut Missiarsitut qilammi naalannassutsiminik takorruuisippai. 1914-imi takorruugaq piviusunngorpoq, tamannalu Jehovap kiffaasa uppernermikkut nakussatsissutigingaarpaat, taamaalillunilu siunissamik nuanningaartumik taakkununnga neriorsuutaa uppernarsarneqarpoq. Guutip naalagaaffia pillugu paasinninnerujartortinneqarput. Silarsuup taggarissigaluttuinnarnerani „iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni“. — Ussatit 4:18.

²⁰ 1914 sioqqulluguli kristumiut tanitat ikittunnguit Naalakkap tikiuteqqinnissaa pillugu sallusuissutit pingaarutillit ilaat paasiartulerpaat. Assersuutigalugu paasilerpaat Jiisusip qilaliarnerani inngilit marluk ajoqersukkanut saqqummeramik oqarnerattut takussaanani tikiukkumaartoq. Nuissap ulimmagu ajoqersukkanut takussaajunnaarsillugu inngilit ima oqarput: „Jiisusi taanna ilissinnit qimagutitinneqarluni qilaliartitaasoq taamatut tikiuteqqikkumaarpoq, soorlu qilammukartoq takugissi.“ — Apustilit Suliaat 1:9-11.

21. Allaaserisami tulliuttumi suna misissussavarput?

 ²¹ Jiisusip ajoqersugaasa ilumoorfiginnittut kisimik Jiisusi qilaliartoq takuaat. Tamanna pivoq qaqqami Jiisusip naalannarsisitaaneratut malugineqarani, silarsuarmiullu amerlanersaasa qanoq pisoqarnera naluaat. Aamma taamatut pisoqarumaarpoq Kristusi kunngitut pissaaneqarluni tikiuteqqippat. (Johannesi 14:19) Ajoqersugaasa tanitat aalajaatsut kisimik kunngitut najuunnera paasissavaat. Allaaserisami tulliuttumi paasinninneq tamanna taakkununnga qanoq sunniuteqartigissanersoq tamatumalu kingunerisaanik Jiisusimut nunami maani innuttaalersussanik millionilinnik katersuinersuaqalernissaa misissussavarput. — Saqqummersitat 7:9, 14.

[Quppernerup ataani ilanngussaq]

Eqqaamavigit?

• Jiisusip sabbatimik unioqqutitsinerarneqarami Guutimillu mitaalliinerarneqarami Missiarsiunini qanoq uppernarsarpaa?

• Jiisusip ajoqersugaasa siulliit Jiisusip qaqqami naalannarsisitaanera qanoq iluaqutigaat?

• Johannesip Jiisusip tikiunnissaata tungaanut ’inuuinnarnissaa’ qanoq paasisariaqarpa?

• Takorruugaq suna 1914-imi piviusunngorpa?

[Atuaqqissaarnermi apeqqutit]

[Qupp. 22-mi assiliartat]

Jiisusip Missiarsiunerminut uppernarsaataasut innersuussutigai

[Qupp. 24-mi assiliartaq]

Qaqqami naalannarsisitaanermik takorruugaq ajoqersukkat uppernerannut nakussatsissutaavoq

[Qupp. 25-mi assiliartaq]

Johannesi ’Jiisusip tikiunnissaata tungaanut inuuinnassaaq’