Aappariinnut siunnersuutit pitsaasut

’Nuliaasusi uissinnut naalatsigitigitsi soorlu Naalakkamut. Angutit, nuliasi asassavasi.’ — EFESOSIMIUT 5:22, 25.

1. Aappariinneq eqqortumik qanoq isigineqartariaqarpa?

JIISUSI oqarpoq aappariinneq Guutimit pilersinneqartoq, tassaasoq angutip arnallu ’uininngornerat ataaseq’. (Matthæusi 19:5, 6) Inuupput marluk tamarmik immikkut kinaassusillit inooqatigiilersussat, soqutigisaqaqatigiilerniartussaallutillu anguniagaqaqatigiinnialersussat. Aappariinneq inuuneq naallugu atasussatut aaqqissuussaavoq imaaliallaannaq kipitinneqartussaanngitsoq. Nunarpassuarni avinneq ajornanngitsuararsuuvoq, kristumiumulli aappariinneq illernartuuvoq. Aappariinneq aatsaat pissutissaqavikkaanni kipitinneqartarpoq. — Matthæusi 19:9.

2. (a) Aappariinnut iluaqutaasinnaasut suuppat? (b) Aappariinnerup iluatsitinniarnissaa sooq pingaaruteqarpa?

² Aappariinnik siunnersuisartoq ima oqarpoq: „Aappariilluarneq allanngorartuartuuvoq aappariit nutaanik unamminiagassaqalertarlutillu ajornartorsiuteqalertarmata, taakkualu piffissami tamatumani iluaqutigisinnaasatik atorlugit qaangerniartariaqarmatigik.“ Aappariinnut kristumiunut iluaqutaasinnaasut ilaat tassaapput siunnersuutit pitsaasut Biibilimeersut, uppeqatinit  tapersersorneqarneq Jehovamullu qinunikkut qanittumik attaveqarneq. Aappariilluarneq ataavartuuvoq ukiullu ingerlaneranni aappariinnut pilluarnermik nalerisimaarnermillu kinguneqassalluni. Sulilu pingaarnerusumik, tamanna aappariinnermik Pilersitsisumut, Jehova Guutimut, ataqqinaataassaaq. — 1 Mosesi 2:18, 21-24; 1 Korinthimiut 10:31; Efesosimiut 3:15; 1 Thessalonikamiut 5:17.

Jiisusi taassumalu ilagiissai ilaakkit

3. (a) Paulusip aappariinnut siunnersuutaa naatsumik oqaatigiuk. (b) Jiisusi qanoq maligassiuiva?

³ Ukiut 2000-t matuma siorna apustili Paulusi aappariinnut kristumiunut ima pitsaasumik siunnersuuteqarpoq: „Soorlu ilagiit Kristusimut naalatsigititaasut taamatut aamma ilissi nuliaasut tamatigut uissinnut naalatsigitissaasi. Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.“ (Efesosimiut 5:24, 25) Assersuutit nuanningaaramik! Nuliaasut kristumiut maniguullutik uiminnut naalatsigitittut siulersuinermut najoqqutassiamik akuerinninnermikkut ataqqinninnermikkullu ilagiit ilaartarpaat. Uiusut uppertut pissutsit qanorluunniit ikkaluaraangata nuliaminnik asannittuartut Kristusip maligassiaanik malinneqqissaarlutik takutittarpaat, taassumami ilagiit asallugillu isumassormagit.

4. Uiusut Jiisusip maligassiaa qanoq malissinnaavaat?

⁴ Uiusut kristumiut ilaquttaminnut niaquupput, namminnerli Jiisusi Kristusi niaqoraat. (1 Korinthimiut 11:3) Soorlu Jiisusi ilagiissiminik isumassuisimasoq, taamatuttaaq uiusut ilaquttaminnik anersaakkut timikkullu isumassuisarput, inuttut pilliuteqartariaqaraluaraangamilluunniit. Namminneq kissaatigisaminnit ilaqutariit atugarissaarnissaat pingaartinneruaat. Jiisusi ima oqarpoq: „Taamaattumik: Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Najoqqutassiaq taanna ingammik aappariinnermi atuuppoq. Paulusip tamanna erseqqissarpaa ima allakkami: „Uiusut nuliatik asassavaat namminneq timimittut. . . . Inuummi timini uumissunngisaannarpaa, kisianni inuussutissittarpaa paaqqisarlugulu.“ (Efesosimiut 5:28, 29) Angutip nuliani imminut isumassornermisut inuussutissanik allanillu isumassortariaqarpaa.

5. Nuliaasut ilagiit kristumiut qanoq ilaarsinnaavaat?

⁵ Nuliaasut Guutimik mianerinnittut ilagiit kristumiut maligassamittut isigaat. Jiisusi nunamiikkallarmat ajoqersugaasa suliarisartakkatik kajumillutik qimappaat taannalu malillugu. Qilaliarnerata kingorna taassumunnga suli naalatsigitipput, taamanimiillu ukiut 2000-ingajaat qaangiutereersut ilagiit kristumiut ilumoortut taassumunnga naalatsigitittuarlutillu siulersuinera sutigut tamatigut malittuarpaat. Nuliaasut kristumiut aappariinnermut aamma taamatut isiginnittaaseqarput. Uitik ataqqivaat aappariinnermilu siulersuinermut najoqqutassiamut naalatsigitillutik. Uitik ikiorlugillu tapersersorpaat, taakkununnga naalatsigitipput suleqatigalugillu taamaalillutillu taakkununnga qiimmassaataallutik. Uiusoq nuliaasorlu asannittumik taamatut periaaseqarpata aappariinnerat iluatsissaaq, aappariinnertillu nuannaarutigissavaat.

 Inooqatigiuarsigik

6. Petrusip uiusut qanoq siunnersorpai, aamma sooq tamanna pingaaruteqarpa?

⁶ Apustili Petrusip aamma aappariit siunnersorpai, ingammillu uiusunut oqaasii assut toqqaannarput. Ima allappoq: ’Taamatuttaaq ilissi angutit, [nuliasi] ilissinnit qajannarnerusut qajassuullugit inooqatigissavasi; ataqqissavasilu, taakkuttaarmi saammaannermit tunissutaasumik inuussutaasumik ilumut kingornusseqataasussaammata — qinusarnisi akornuserneqaqqunagit.’ (1 Petrusi 3:7) Petrusip siunnersuutaata pingaaruteqarnera versip naggataani paasinarsivoq. Uiusup nuliani ataqqinngikkuniuk Jehovamut attaveqarnini ajoqusissavaa. Qinnutai akornuserneqassapput.

7. Uiusup nuliani ataqqillugu qanoq takutittarpaa?

⁷ Uiusup nuliani qanoq ataqqisinnaagamiuk? Taamaaliorsinnaavoq asannittumik ataqqinnittumillu iliorfigalugu. Nuliamik taamatut pinnittarneq taamanikkut inuppassuarnit eqqumiigineqarsimasinnaavoq. Biibilimut tunngasumik oqaaseqaammi ima nassuiarneqarpoq: „Romamiut inatsisaat naapertorlugit arnaq pisinnaatitaaffeqanngilaq. Inatsisit naapertorlugit meeraajuaannarpoq. . . . Uiata naalagaaffigilluinnarpaa.“ Kristumiut ajoqersuutaannit allaanerulluinnassusia! Uiusup kristumiup nuliani ataqqivaa. Nuliaminut attaveqarnermini kristumiunut najoqqutassiat maleruartarpai, isummani allanngorartoq malinnagu. Aammattaaq ’qajannarnerummat qajassuuttarpaa’.

8, 9. Sumut tunngatillugu arnat angutillu naligiippat?

⁸ Petrusi oqarami „qajannarnerusoq“ isumaqanngilaq arnat angutinit silassorissutsikkut anersaakkullu sanngiinnerusut. Ilumoorpoq anguterpassuit kristumiut ilagiinni kristumiuni arnanit immikkut pisinnaatitaaffigineqanngitsunik immikkut pisinnaatitaaffeqarmata arnallu uillit uiminnut naalatsigitittarmata. (1 Korinthimiut 14:35; 1 Timotheusi 2:12) Tamarmilli, angutit arnallu, upperneq, pinertusaarneq ileqqussatigullu qutsissunik najoqqutaqarneq eqqarsaatigalugit assigiimmik piumaffigineqarput. Petrusillu oqarneratut uiusoq  nuliaasorlu ’saammaannermit tunissutaasumik inuussutaasumik kingornusseqataasussaapput’. Annaanneqarnissaq eqqarsaatigalugu Jehova Guutimut naligiipput. (Galatiamiut 3:28) Ukiuni hundredelinni siullerni kristumiut tanitat Petrusip allaffigai. Taamaattumik oqaasii uiusunut kristumiunut taakku nuliatillu ’Kristusip kingornusseqatissaasut’ tamarmik qilaliarnissamik neriuuteqarnerannik eqqaasitsipput. (Romamiut 8:17) Taamaallutik marluullutik Guutip naalagaaffiani qilammiittumi palasiulerumaarlutillu kunngiulerumaarput! — Saqqummersitat 5:10.

⁹ Nuliaasut kristumiut tanitat uiminnit kristumiunit tanitanit nikanarnerunngilluinnarput. Aammattaaq nunarsuarmi inuunissamik neriugisalinnut tamanna atuuppoq. Angutit arnallu ’amerlangaartunut’ ilaasut atisatik errorpaat Savaaqqallu aavanik qaqorsarlugit. Silarsuarmi tamarmi angutit arnallu „ullukkut unnuakkullu“ Jehovamik unnersiutiginneqataasarput. (Saqqummersitat 7:9, 10, 14, 15) Angutit arnallu ’kiffaanngissutsimik Guutip qitornaasa pisassaannik piginnilernissartik’ qilanaaraat, taamanikkussamullu „inuunivik“ nuannaarutigisinnaassavaat. (Romamiut 8:21; 1 Timotheusi 6:19) Kristumiut tamarmik, tanitanut savanulluunniit allanut ilaagaluarunik, ’savaatitut katersatut ataatsitut paarsisumit ataatsimit’ siulersorneqartutut Jehova ataatsimoorlutik kiffartorfigissavaat. (Johannesi 10:16) Aappariit kristumiut imminnut naleqquttumik ataqqeqatigiinnissaannut tamanna ilumut pissutissaalluarpoq!

10. Arnat ’qajannarnerunerat’ qanoq paasisariaqarpa?

¹⁰ Arnat sutigut ’qajannarnerugamik’? Petrusip immaqa arnat tuannerunerat timikkullu angutitut nukittutiginnginnerat eqqarsaatigaa. Aammattaaq naammalluinnanngitsuugatta naartuneq erninerlu tunissutaagaluartut nuanningaartut arnamut timikkut artorsaatissiingaarsinnaapput. Aamma arnat aaqartarnerminnut atatillugu ippigusuuteqartarput. Aaqarnermik erninermillu nalaanni immikkut isumassorneqarnissartik qajassuunneqarnissartillu ilumut pisariaqartippaat. Uiusoq nuliaminik ataqqinnittoq tapersersorneqartariaqarneranillu paasinnittoq aappariinnerup iluatsinneranut pissutaaqataalluinnassaaq.

Aappariit upperisaqaqatigiinngippata

11. Aappariit upperisaqaqatigiinngikkaluarlutik aappariinnerat iluatsissinnaava?

¹¹ Taavami aappariit aappaannaata katereernermik kingorna sallusuissummik Biibilimeersumik ilassinnissimanera pissutigalugu upperisaqaqatigiinngippata? Aappariinnerat iluatsissinnaava? Aap, tamanna misilittakkat takutippaat. Aappariit upperisat tungaatigut assigiinngitsunik isiginnittaaseqartut nuannaarutigisaminnik nalerisimaarutigisaminnillu iluatsittumik ataavartumillu aappariissinnaapput. Aammattaaq aappariinnerat Jehovap isaani suli atuuppoq; suli ’uiniupput ataaseq’. Taamaattumik kristumiut siunnersorneqarput  aapparmik uppinngitsuusup najuinnarumappatik najuinnaqqullugu. Meeraqarpata meeraasa angajoqqaap kristumiuusup aalajaannera iluaqutigissavaat. — 1 Korinthimiut 7:12-14.

12, 13. Petrusip siunnersuutaa naapertorlugu nuliaasup kristumiup uini uppinngitsoq qanoq ikiorsinnaavaa?

¹² Petrusip arnat kristumiut upperisaqaqatiginngisaminnik inoqutillit kajumissaarlugillu siunnersorpai. Oqaasiisa najoqqutassartaat aamma uiusunut kristumiunut taamatulli atugalinnut atuuppoq. Petrusi ima allappoq: „Ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.“ — 1 Petrusi 3:1, 2.

¹³ Nuliaasoq periaaserilluni uiminut upperisaminik nassuiaasinnaappat ajunngeqaaq. Uiami tusaarusunngippat? Taava nuliaasup akueriinnartariaqarpaa. Uiata nammineq aalajangigassaraa. Neriuutissaarulluinnanngilarli. Aamma nuliaasup kristumiutut inooriaaseqarnera nalunaajaataalluarsinnaavoq. Uiusorpassuit aallaqqaammut nuliamik upperisaannik soqutiginninngitsut allaalluunniit akerlilersuisut, nuliamik pissuserissaarnerat pissutigalugu ’inuunermik naassaanngitsumik eqqortumik isumaqarfiginnilersimapput’. (Apustilit Suliaat 13:48, NV) Aamma uiusoq nuliami upperisaanik akuerinninngikkaluartoq nuliata inooriaasia ajunngitsumik sunniuteqarsinnaavoq, aappariillualissutigisinnaavaallu. Angutip Jehovap Nalunaajaasuisa ilaannik nuliallip nassuerutigaa ileqqussatigut najoqqutassiat qutsissut Jehovap Nalunaajaasuisa najoqqutarisaat maleruarsinnaanagit. Taamaattorli aviisimut allakkamini allappoq ’nuliannguaminut uiulluni pilluartoq’ nulianilu taassumalu uppeqatai nersualaarlugit.

14. Uiusup nuliani uppinngitsoq qanoq ikiorsinnaavaa?

¹⁴ Uiusut kristumiut Petrusip siunnersuutaanik maleruaasimasut taamatulli inooriaasertik pissutigalugu nuliatik ilataarisarpaat. Nuliaasut uppinngitsut maluginiarsimavaat uimik akisussaassutsimik misigisimanerulersimanerat, tupamut, imigassamut aningaasanoornermullu aningaasaajarunnaarsimanerat oqaasipiluttarunnaarsimanerallu. Nuliaasut uppinngitsut taakkua ilaasa ilagiinni kristumiuniittut allat ilisarisimalersimavaat kristumiutullu asaqatigiinnerat killinneqaatigisimallugu. Tamanna Jehovamut kajungilissutigaat. — Johannesi 13:34, 35.

Inuk uummammi isertugaasoq

15, 16. Nuliaasup kristumiup qanoq inooriaaseqarluni uini uppinngitsoq ilataarisinnaavaa?

¹⁵ Qanoq inooriaaseqarluni uiusoq ilataarineqarsinnaava? Inooriaatsimik arnat kristumiut pissusissamisoorluinnartumik ilisarnaatigilertagaannik inooriaaseqarnikkut. Petrusi ima allappoq: „Pinnissusersi qallikkut ersiuteqartissanngilarsi, soorlu perlaajassinnik, pinnersaatinik kuultiusunik atisanilluunniit pinnersunik, ersiuteqartissavarsili uummammi, inummi isertugaasumi, anersaap piuaatsup qanilaartullu kusanassusiani aserortussaanngitsumi, Guutip isaani erlinnaqisumi. Taamanimi arnat illernartut Guutimut neriuttut taama pinnersartarput, uiminnut naalatsigitillutik; taamatut Sarap uini Aaperaat naalappaa naalakkaminillu taavaa; ilissilu ajunngitsumik iliorussi sumillu siooranartumik ersigisaqarasi taava taassumunnga qitornanngorsimassaasi.“ — 1 Petrusi 3:3-6.

¹⁶ Petrusip arnaq kristumiu siunnersorpaa qallikkut ittut pingaarnerutissanngikkai. Ajoqersuutilli Biibilimeersut imminut sunniuteqarnerat uiminut malugitissavaa. Inuttut nutaamik pissuseqalersimanera uiata takusinnaasariaqarpaa. Immaqa uiata nuliami pissuseriligaata pissusitoqaatalu assigiinngissutaat takusinnaavaa. (Efesosimiut 4:22-24) Qularnanngitsumik nuliami ’piuaannera qanilaarneralu’ iluaralugulu nuannarissavaa. ’Piuaannera qanilaarneralu’ uiataannaanngitsoq nuannaraa, aammattaarli ’Guutip isaani erlinnangaarpoq’. — Kolossemiut 3:12.

17. Nuliaasunut kristumiunut Sara qanoq maligassaalluarpa?

¹⁷ Sara maligassatut eqqaaneqarpoq, ilumullu nuliaasunut kristumiunut uppertunik uppinngitsunilluunniit uilinnut maligassaalluarpoq. Sarap ilumut Aaperaat niaqqumisut isigaa. Allaat uummatimigut ’naalakkaminik’ taasarpaa.  (1 Mosesi 18:12) Tamannali Saramut nikanarsaataanngilaq. Erseqqippoq arnaasoq anersaakkut nukittooq Jehovamik upperinnilluinnartoq. Aap, ’nalunaajaasunut amerlaqisunut’ ilaavoq, taakkualu uppernerat ’nikallujuilluta angusassamut siunitsinniittumut arpannissamut’ kajumississutigissavarput. (Hebræerit 11:11; 12:1) Saramut assersuunneqarneq nuliaasumut kristumiumut ataqqinaataalluinnassaaq!

18. Inoqutigiinni upperisaqaqatigiinngitsuni najoqqutassiat suut eqqaamaneqartuartariaqarpat?

¹⁸ Aamma inoqutigiinni upperisaqaqatigiinngitsuni uiusoq niaquuvoq. Uppertuuguni upperisaminut akerliusumik iliunngikkaluarluni nuliami isumaa ataqqiumassavaa. Nuliaasoq uppertuuguni aamma taanna upperisaminut akerliusumik iliorumanavianngilaq. (Apustilit Suliaat 5:29) Uimili siulersuineranut akerliuniassanngilaq. Uimi inissisimaffia ataqqiumassavaa ’ueqarnermillu inatsisaasuniittuarumassalluni’. — Romamiut 7:2, 1900/1961.

Siunnersuutit pitsaasut Biibilimeersut

19. Pissutsit suut aappariinnermut artorsaatissiisinnaappat, taamatulli pisoqartillugu suut iluaqutaasinnaappat?

¹⁹ Ullumikkut sorpassuit aappariinnermut artorsaatissiisinnaapput. Angutit ilaasa akisussaaffitsik ilaginnartarpaat. Arnat ilaasa uimik siulersuinerat akuerineq ajorpaat. Aappaasut ilaasa aappartik timikkut oqaatsikkulluunniit naalliutsittarpaat. Aammattaaq aningaasaqarnikkut ajornartorsiutit, inuttut naammalluinnanngissuseq silarsuarmilu matumani kinguaassiuutitigut inuunerlunneq kukkusunillu pingaartitaqarneq kristumiup ilumoorfiginninneranut misilinneqaataasinnaapput. Angutilli arnallu kristumiut najoqqutassianik Biibilimeersunik maleruaasut qanorluunniit atugaqaraluarunik Jehovap pilluaqqusinera misigiumaarpaat. Aappaasulluunniit aappaannaata najoqqutassiat Biibilimeersut maleruaraluarpagit tamanna maleruaasoqanngivinneranit pitsaanerussaaq. Aammattaaq allaat ilungersunartorsiorfiusuni katinnermi neriorsuumminnik eqqortitsisut Jehovap ikiortarlugillu annertoqqusersortarpai. Ilumoorfiginninnerat puiortanngilaa. — Tussiaat 18:26; Hebræerit 6:10; 1 Petrusi 3:12.

20. Petrusip kristumiut tamaasa qanoq siunnersorlugillu kajumissaarpai?

²⁰ Apustili Petrusi uiusunut nuliaasunullu siunnersuunni naggaserlugu ilungersorluni ima kajumissaarivoq: „Kiisalu tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu, ajortoq ajortoqataanik akilissanngilarsi, oqaasipilulluunniit oqaasipiloqataanik; pilluaqqusisaritsili, pilluaqqussut kingornussarissallugu qaaqquneqarassi.“ (1 Petrusi 3:8, 9) Inunnut tamanut, ingammik aappariinnut, siunnersuutitsialaat! (wE 3/1 05)

Eqqaamavigit?

• Uiusut kristumiut Jiisusi qanoq ilaartarpaat?

• Nuliaasut kristumiut ilagiit qanoq ilaartarpaat?

• Uiusup nuliani qanoq ililluni ataqqisinnaavaa?

• Nuliaasoq kristumiu uppinngitsumik uilik qanoq pitsaasumik siunnersorneqarpa?

[Atuaqqissaarnermi apeqqutit]

[Qupp. 14-mi assiliartaq]

Uiusup kristumiup nuliani asallugulu isumassorpaa

Nuliaasup kristumiup uini ataqqivaa

[Qupp. 15-mi assiliartaq]

Romamiut inatsisaannit allaanerusumik kristumiut ajoqersuutaat naapertorlugu uiusup nuliani ataqqisariaqarpaa

[Qupp. 16-mi assiliartaq]

Angutit arnallu ’amerlangaartunut’ ilaasut Paratiisimi naassaanngitsumik inuuneq qilanaaraat

[Qupp. 18-mi assiliartaq]

Sarap Aaperaat naalakkamisut isigaa