Ullumikkut silarsuatsinni pilluarluni aappariinneq

„Atiniarsiuk asanninneq, tassaammat naammalluinnassutsip qilerutaa [ataasiussutsip qilerutaa naammalluinnartoq, NV].“ — KOLOSSEMIUT 3:14.

1, 2. (a) Ilagiinni kristumiuni suna maluginiassallugu qiimmaallannarpa? (b) Pilluarluni aappariinneq suua?

ILAGIINNI kristumiuni aappariit taama amerlatigisut ukiuni 10-ni, 20-ni, 30-ni sivisunerusumilluunniit aalajaallutik aappariissimasut takullugit nuanneq, ilaa? Qanorluunniit pisoqaraluartoq imminnut ilumoorfigeqatigiissimapput. — 1 Mosesi 2:24.

² Amerlanersaasa unamminiarnartoqarsimanera miserratiginavianngilaat. Atuakkiortoq ima allappoq: „Imaanngilaq pilluarluni aappariinneq isumakuluutissartaqanngitsoq. Ullut ilaat nuannersuusarput, ullullu ilaat artornartuusarlutik . . . Inuunermili allanngorartoqaraluartoq aappariit arlaatigut iliuuseqarlutik aappariittuarsinnaasimapput.“ Inuunermi tatineqarnerup kingunerisaanik ajornartorsiutit, ingammik meeraqarunik, atunngitsuugassaanngitsut qaangersinnaalersimavaat. Misilittakkaminnit paasivaat asanninneq soraanngisaannartoq. — 1 Korinthimiut 13:8.

3. Aappariinneq avinnerlu pillugit naatsorsueqqissaarnerit sunik ersersitsippat, tamannalu pillugu apeqqutit suut saqqummerpat?

³ Tamatuma akerlianik aappariit millionillit avittarput. USA-mi aappariit pillugit nalunaarusiami ima allassimavoq: „Ullumikkut USA-mi aappariit affaasa avinnissaat ilimagineqarpoq. Taakkualu affaat katinnerminnit ukiut 7,8-t qaangiutsinnagit avissimassallutik . . . Kateqqittut 75 procentiisa 60 procentii aveqqikkumaarput.“ Allaat nunani nunanut allanut naleqqiullugu siornatigut ikinnerusunik avittoqartartuni pissutsit allanngorsimapput. Assersuutigalugu Japanimi ukiuni kingullerni avittut marloriaatingajammik amerlisimapput. * Taamatut pisoqartarneranut, aamma allaat ilagiinni kristumiuni ilaannikkut taamatut pisoqartarneranut, suut pissutaasarpat? Saatani aappariinnermik aaqqissuussinermik akornusiiniaraluartoq  aappariinnerup pilluarnartuunissaanut ataavarnissaanullu suut pisariaqarpat?

Mianersorfissat

4. Aappariinnermut akornutaasinnaasut ilaannik eqqaasaqarit.

⁴ Guutip oqaasia iluaqutigalugu paasisinnaavarput aappariinnermik suut navianartorsiortitsisinnaanersut. Apustili Paulusip ulluni kingullerni makkunani pissutsit atuukkumaartut pillugit oqaasii uku eqqarsaatigeriakkit: „Ullussani kingullerni [nalliukkumaarput] ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut, usorsitsaartut, anneruniartut, asissuingaartut, angajoqqaaminnut naalanngitsut, qujasuitsut, mitalliisut, asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, killuussisut, puffajasut, makitaniartut, inuulluarniutit Guutimit pingaarnerutillugit. Taakkua Guutimik mianerinninneq ileqqorisuusaaginnarpaat pissaanerali asiginnarlugu. Taamaattut nigorsimaniakkit!“ — 2 Timotheusi 3:1-5.

5. Sooq ’namminissarsiortoq’ aappariinnerminnik navianartorsiortitsiva, tamatumunngalu tunngatillugu Biibilimi qanoq siunnersuuteqarpa?

⁵ Paulusip oqaasiisa misissoqqissaarneranni paasissavarput eqqaasaasa ilarpassui aappariinnermik aseruisinnaasut. Assersuutigalugu inuit ’namminissarsiortuunissaat’ uparuarneqarpoq. Tassa allat eqqarsaatiginagit imminuinnaq eqqarsaatigissasut. Inuit imminuinnaq eqqarsaatigisut piumasartik qanorluunniit perusuttarpaat. Uteriitsuullutillu killissaanngitsuupput. Tamakku aappariinnermik pillualersitseqataasinnaappat? Naamik. Apustili Paulusi kristumiunut aammattaaq aappariinnut silatuumik ima siunnersuuteqarpoq: „Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit. Tamassi immikkut nammineq iluaqutissarsi pinnagu inoqatississaaq iluaqutissaat isumagisiuk.“ — Filippimiut 2:3, 4.

6. Aningaaserituujuneq aappariit attaveqaqatigiinnerannut qanoq akornutaasinnaava?

⁶ Aningaaserituujuneq uiusup nuliaasullu attaveqaqatigiinnerannut ajoqutaasinnaavoq. Paulusi ima mianersoqqusivoq: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu. Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.“ (1 Timotheusi 6:9, 10) Ajoraluartumik aappariippassuit Paulusip oqaasiisa ilumoornerat misigereerpaat. Taakkua pisuunngorniarnerminni aapparmik pisariaqartitaat, assersuutigalugu misigissutsikkut annertoqqusersorneqarnissamik aamma ataavartumik asannittumillu attaveqaqatigiinnissamik pisariaqartitaat, arajutsisarpaat.

7. Aapparminnut ilaat qanoq ilumuunngitsuliorsimappat?

⁷ Paulusi aamma allappoq ulluni kingullerni inuit ’mitalliisuullutillu [ilumoorfigeqatigiinngitsuullutillu, NV] asanniuitsuullutillu saammartitassaassanngitsut’. Katinnermi neriorsoqatigiinneq pingaartorsiornartumik neriorsoqatigiinneruvoq unioqqutinneqartussaanngitsoq. Taamaattumik uiusoq nuliaasorluunniit ilumuunngitsuliornanilu neriorsuutiminik unioqqutitsissanngilaq. (Malaki 2:14-16) Ilaalli aappartik kisiat soqutigisussaallugu allanik soqutiginnittarput. Arnaq 30-t sinnerlugit ukiulik uiminit qimanneqarsimasoq nassuiaavoq allaat taamatut pisoqanngikkallarmalli uini arnanut allanut qaninniarpallaartarsimallunilu inussiarnerpallaartarsimasoq. Uiata angutip nuliallip taamaattussaannginnera paasisinnaanngilaa. Uini taamaaliortoq takugaangamiuk aliasuutigisaqaa, eqqunngitsumillu pissusilersornera pillugu periaaserissumik mianersoqquniartaraluarpaa. Taamaakkaluartorli allasiorpoq. Asannittumik mianersoqquneqarnerigaluani tusaajumanngilai. Napitiffissaminukaannarpoq. — Ussatit 6:27-29.

8. Suna allasiornermik kinguneqarsinnaava?

⁸ Allasiorneq Biibilimi erseqqissumik mianersoqqussutigineqarpoq. „Isumaatsutut iliorpoq allasiortoq, taamaaliortoq imminut aseruutissiuinnarpoq.“ (Ussatit 6:32) Amerlanertigut allasiorneq periataarnikkut isummeriataarnikkullu pineq ajorpoq. Soorlu apustili Jaaku  allakkamini allattoq amerlanertigut ajortuliornissamik isumassarseqqaarluni piffissallu ingerlanerani eqqarsaatigeqqaarlugu ajortuliortoqartartoq. (Jaaku 1:14, 15) Aappaasup pisuusup aappani ilumoorfigiuarumallugu neriorsukkani ilumoorfigiunnaariartuaartarpaa. Jiisusi ima oqarpoq: „Tusarparsi oqartoqarsimasoq: ’Allasiussanngilatit.’ Uangali oqarfigaassi: Kialuunniit allap nulia pilerigalugu isigiguniuk taanna uummatimigut allasiorfigereerpaa.“ — Matthæusi 5:27, 28.

9. Ussatit 5:18-20-mi suna siunnersuutigineqarpa?

⁹ Taamaattumik kajumissaarutip Ussatit-ni allasimasup maleruarnissaa silatusaarnerussallunilu ilumoortuliornerussaaq: „Puilasuutit pilluaqquneqassaaq. Tipaatsuutigiuk inuusunninni nuliarilikkat, kulavak asanartoq, savaasarnaq kusanaffaarik; asanninnera naammatsissutigisaruk, asanninnera angisuumik nuannaarutigiuaruk. Ernera, soormi kajungissuseqarfigissaviuk arnaq alla? Sooq arnaq takornartaq pakkutissaviuk?“ — Ussatit 5:18-20.

Katinniapallaqinak

10. Aapparerusulersinnaasap ilisarisimallualernissaanut imminut piffissaqartinnissaq sooq silatusaarnerussava?

¹⁰ Pissiariit katiaarpallaarunik ajornartorsiuleqqajaanerusinnaapput. Immaqa inuusuppallaarlutillu misilittagakippallaarput. Immaqaluunniit imminnut ilisarisimallualernissaminnut — tamarmik immikkut nuannarisamik, nuannarinngisamik inuunermilu anguniakkamik suunerannik ilaquttamillu qanoq ittuunerinik paasiniaanissamut — piffissakitsippallaarput. Utaqqisinnaassuseqarnissaq aapparerusulersinnaasap ilisarisimallualernissaanut imminut piffissaqartinnissaq silatusaarnerussaaq. Iisaap ernera, Jaaku, katipallanngilaq. Rakelip nuliartaarinissaanut akuerineqartinnani sakissani ukiut arfineq-marluk sullittariaqarpaa. Utaqqerusussuseqarpoq, Rakelimummi misigissusii timikkut kajungerisanit aallaaveqaannaratik asanninnivimmik aallaaveqarput. — 1 Mosesi 29:20-30.

11. (a) Aappariinneq suua? (b) Silatusaarluni oqalunneq aappariinnermi sooq pingaaruteqarpa?

¹¹ Aappariinneq ajuutiginninnerinnaanngilaq. Tassaavoq inuit marluk ilaqutariinnit assigiinngitsunit marlunneersut, assigiinngitsunik pissusillit, misigissutsinut tunngatillugu assigiinngitsut amerlanertigullu assigiinngitsunik ilinniagallit inooqatigiilernerat. Ilaannikkut aappariit tamarmik immikkut assigiinngitsunik kultureqartarput immaqalu allaat assigiinngitsunik oqaaseqartarlutik. Qanorluunniilli ikkaluarpat inuit marluk taakku sunaluunniit pillugu assigiinngitsunik isumaqarsinnaapput. Isumaat aappariinnermi pingaaruteqartupilussuupput. Isummatik naammagittaappalullutik isornartorsiuerpalullutillu imaluunniit qiimmaallannartumik ineriartornartumillu oqaatigisinnaavaat. Aap, oqaatsivut aliasuutaasinnaallutilluunniit katsorsaataasinnaapput. Oqaatsit sakkortuut aappariinnermut artorsaatissiingaarsinnaapput. — Ussatit 12:18; 15:1, 2; 16:24; 21:9; 31:26.

12, 13. Aappariinneq eqqarsaatigalugu piviusorsiortuunissaq sooq pisariaqarpa?

¹² Taamaattumik aapparerusulersinnaasap ilisarisimallualernissaa silatusaarneruvoq. Qatanngut arnaq utoqqaq nuliaasoq ilaanni ima oqarsimavoq: „Katikkusukkuit aalajangersimasumillu eqqarsaateqaruit, piumasaqaatit tunngaviusut assersuutigalugu  qulit inummit taassumannga piviusunngortinneqartikkusutatit eqqarsaatigikkit. Piumasaqaatit arfineq-marluinnaat piviusunngortissinnaappagit, taava imminut ima aperigit: ’Akuerisinnaavara pingasut piviusunngortissinnaanngippagit? Piviusunngortissinnaanngikkai sapissanngilara?’ Qularuit eqqarsarluaqqaalaarit.“ Soorunalimi piviusorsiortuunissaq pisariaqarpoq. Katikkusukkaanni aappassamik naammalluinnartumik nassaanngisaannarnissaq paasineqartariaqarpoq. Aammattaarli paasineqartariaqarpoq katitaq naammalluinnartumik aappartaanngimmat! — Lukasi 6:41.

¹³ Aappariit tamarmik pilliuteqartariaqartarput. Paulusip tamanna erseqqissarpaa ima allakkami: „Isumakuluuteqannginnissarsi kissaatiginerugaluarpara. Angutip aappaqanngitsup Naalagaq ilungersuutigisarpaa, tassa qanoq ililluni Naalakkamit iluarisaasinnaanerluni; angutilli aappaqartup silarsuaq sammisarisarpaa, tassa qanoq ililluni nuliaminit iluarisaasinnaanerluni, paatsiveeruttarlunilu. Arnallu aappaqanngitsup niviarsialluunniit Naalagaq ilungersuutigisarpaat, tassa timikkut anersaakkullu illernartuunissartik. Arnalli ueqartup silarsuaq ilungersuutigisarpaa, tassa qanoq ililluni uiminit iluarisaasinnaanerluni.“ — 1 Korinthimiut 7:32-34.

Sooq aappariit ilaat iluatsinneq ajortut

14, 15. Suna aappariinnermik sanngiillisitsisinnaava?

¹⁴ Arnaq kristumiu qanittukkut annernartorujussuarmik misigisaqarpoq uinilu avittariaqaleramik uimi ukiuni aqqaneq-marlunni aappareereerlutik arnaq alla attaveqarfigilerlugu qimammani. Qimanngitsiarneranni arlaannik pasinartoqarsimava? Ima oqaluttuarpoq: „Uiga qinussaarpoq. Ataatsimiigiannginnissaminut oqaluussinnginnissaminullu utoqqatsissutissarsiortarpoq. Ilaginissannut ulappippallaarnerartarpoq qasuallaarnerartarluniluunniit. Oqaloqatigineq ajorpaanga. Anersaakkut sammisaqaqatigiinneq ajorpugut. Tamanna alianaqaaq. Angutitut katitattut ikkunnaarpoq.“

¹⁵ Allat oqaluttuarput aamma taamatut maluginiagaqarsimallutik: Aappaasup nammineq atuaqqissaarneq qinunerlu sumiginnartarpai kristumiullu ataatsimiinnerinut aggerpiassaartarluni. Allatut oqaatigalugu: Aapparminnik naggataatigut qimatsisorpassuit Jehovamut attaveqarnertik sanngiilliartortissimasarpaat. Tamatuma kingunerisaanik anersaakkut ittunik takorluuerpiarsinnaajunnaartarput. Taakkua Jehova piviusutut isigiunnaartarpaat. Silarsuaq naapertuilluassuseqarfiusoq nutaaq neriorsuutigineqartoq taakkua aamma piviusutut isigiunnaartarpaat. Ilaatigut sanngiilliartorneq tamanna allaat pisarpoq aappaasoq ilumuunngitsoq aapparmi saniatigut allamut suli attaveqalertinnagu. — Hebræerit 10:38, 39; 11:6; 2 Petrusi 3:13, 14.

16. Aappariinnermut suut nakussatsissutaasarpat?

¹⁶ Tamatuma paarlattuanik aappariit pilluarlutik aappariittut oqaluttuarput anersaakkut sammisaqaqatigiilluartarnertik qularnanngitsumik tamatumunnga pissutaasoq. Qinoqatigiittarlutillu atuaqqissaaqatigiittarput. Uiusoq ima oqarpoq: „Biibili marluulluta atuartarparput. Oqaluusseqatigiittarpugut. Sammisaqaqatigiinneq nuannaraarput.“ Ilinniagassaq unaavoq: Jehovamut attaveqarluarneq aappariilluarnermut pissutaaqataalluinnarpoq.

Piviusorsiortuugitsi oqaloqatigiittarlusilu

17. (a) Suut marluk aappariinnermik pilluarnartunngortitseqataasinnaappat? (b) Kristumiutut asanninneq Paulusip qanoq allaaseraa?

¹⁷ Pilluarluni aappariinnermut pissutaaqataasut allat marluk tassaapput kristumiutut asaqatigiinneq aappariittullu oqaloqatigiittarneq. Asannilersoortut aapparmik kukkussutaat takkuitsooqqajaasarpaat. Immaqa asanninnilersaarutini atuakkatik filminiluunniit isiginnaakkatik pissutigalugit isumalluarpallaarlutik katittarput. Naggataatigulli piviusorsiortariaqalertarput. Taava imaassinnaavoq kukkulaarninnguit ileqquaqqallu paaminnartut ajornartorsiuterujussuanngortut. Taama pisoqarpat kristumiutut anersaap inerititaanik, ilaatigut asanninnermik, ersersitsisariaqarput. (Galatiamiut 5:22, 23) Asanninneq — kristumiutut asanninneq asannilersoornerunngitsoq — kimittoorujussuuvoq. Paulusip kristumiutut asanninneq ima allaaseraa:  „Asanninneq kamagittartuuvoq, asanninneq saamasuuvoq. . . . Namminissarsiortarinngilaq; puffassartarinngilaq puttarsisaqartarnanilu. . . . Tamatigut naammagittartuuvoq, tamatigut uppertarpoq, tamatigut neriuttarpoq, tamatigut ilalaartarpoq.“ (1 Korinthimiut 13:4-7) Tassa asanninneq ilumoortoq inuttut sanngiissutinut inissaqartitsivoq. Piviusorsiortuuvoq naammalluinnartuunissarlu naatsorsuutiginagu. — Ussatit 10:12.

18. Oqaloqatigiilluartarneq aappariinnermut qanoq iluaqutaasinnaava?

¹⁸ Oqaloqatigiittarneq aamma pingaaruteqarpoq. Aappariit qanorluunniit sivisutigisumik aappariissimagaluarunik imminnut tusarnaartariaqarlutillu oqaloqatigiittariaqarput. Uiusoq ima oqarpoq: „Qanoq isumaqarnerluta ammasumik oqaatigisarparput, inussiarnersumilli.“ Piffissap ingerlanerani uiusup nuliaasullu oqaatigineqartut tusaanisaat ilikkaannarnagu aamma oqaatigineqanngitsut maluginissaat ilikkartarpaat. Allatut oqaatigalugu aappartik oqaaseqanngikkaluartoq qanoq eqqarsarnersoq qanorlu misiginersoq malugisinnaalertarpaat. Nuliaasut ilaat oqartarput uimik tusarnaarneq ajoraatik. Paarlattuanilli uiusut ilaasa nuliamik piffissaanngilluinnartukkut oqalukkumasarnerat naammagittaalliutigisarpaat. Oqaloqatigiinnermi soqutigittartuunissaq paasinnittuunissarlu pisariaqarput. Oqaloqatigiilluartarneq uiusumut nuliaasumullu iluaqutaasarpoq. — Jaaku 1:19.

19. (a) Utoqqatsernissaq sooq imaannaanngila? (b) Utoqqatsernissamut suna kajumississutigissavarput?

¹⁹ Utoqqatsersinnaaneq oqaloqatigiilluartarnermut atavoq. Ajornaatsuujuaannanngilaq. Kukkussutinik nassuerutiginnissagaanni maniguuttuusariaqarpoq. Utoqqatsersinnaanerli aappariinnermi iluaqutaangaartarpoq. Ilumoorluni utoqqatserneq oqqannissaagaluamik pinngitsoortitsisinnaavoq isumakkeerfigineqarluinnarnissamullu ajornartorsiummillu aaqqiinissamut aqqutissiuisuusinnaalluni. Paulusi ima allappoq: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa [ataasiussutsip qilerutaa naammalluinnartoq, NV].“ — Kolossemiut 3:13, 14.

20. Kristumiu aapparminut kisimiitsillutik allanillu ilaqartillutik qanoq pissuseqartussaava?

 ²⁰ Aamma aappariit tapersersoqatigiittarnerat pingaaruteqarpoq. Kristumiuugamik tatigeqatigiittussaapput. Arlaataluunniit aappani imminut tatigiunnaarsittussaanngilaa. Asannittumik imminnut nersualaartariaqarput sukannersumillu isornartorsioqatigiittussaanatik. (Ussatit 31:28b) Aapparput nikassarumanngilarput sianiitsumik isumaatsumillu oqaluuseralugu. (Kolossemiut 4:6) Aappariit imminnut attaveqarnerat nakussatsinneqassaaq tamarmik misigissutsiminnik takutitsisarpata. Ilaatigooriarluni asanninnermik oqaaseqalaarnikkut attuilaarnikkullu ersersitsisarneq isumaqarsinnaavoq: „Asavakkit. Najoramma nuannaarutigaara.“ Aappariinnermut nakussatsissutaasinnaasut ullumikkullu silarsuatsinni ataavartitsissutaasinnaasut tamakku ilagaat. Allanik aamma iliuuseqartoqarsinnaavoq, allaaserisamilu tulliuttumi qanoq ililluni pilluarluni aappariittoqarsinnaanera pillugu Biibilimeersunik allanik siunnersuuteqarpoq. *

[Quppernerup ataani ilanngussat]

Uku nassuiarsinnaavigit?

• Suut aappariinnermut akornutaasinnaappat?

• Sooq katinniapallanneq silatusaarnerunngila?

• Anersaakkut ittunik salliutitsineq aappariinnermut qanoq sunniuteqartarpa?

• Aappariinnermut suut nakussatsissutaasinnaappat?

[Atuaqqissaarnermi apeqqutit]

[Qupp. 10-mi assiliartaq]

Aappariinneq ajuutiginninnerinnaanngilaq

[Qupp. 12-mi assiliartat]

Jehovamut qanittumik attaveqarneq iluaqutigalugu aappariit iluatsissapput