Illit sutigut tamatigut ilumoortarpit?

„Annikitsutigut ilumoortoq annertuutiguttaaq ilumoorpoq.“ — LUKASI 16:10.

1. Jehova ilaatigut qanoq ilumoorpa imaluunniit aalajaappa?

AQQUSERNUP sinaani qullilerfiup nunami tarraata ullup ingerlanerani allanngortarnera maluginikuuiuk? Tarraata angissusia sammivialu allanngortuarput! Inuit ilungersuutigisaat neriorsuutaallu amerlanertigut tarratut allanngortarput. Jehova Guutili allanngorneq ajorpoq. Ajoqersukkap Jaakup ’qaamasut ataataat’-nik taavaa taannalu pillugu ima oqarluni: ’Allanngorneq ajorpoq alanngerarfigineqaranilu.’ (Jaaku 1:17) Jehova allanngujuillunilu tatiginartuuvoq, allaat annikitsualutsigut. Aap, „Guutiuvoq aalajaatsoq“. — 5 Mosesi 32:4.

2. (a) Ilumoortuunerluta paasiniarlugu sooq imminut misissortariaqarpugut? (b) Ilumoortuuneq pillugu apeqqutit suut misissussavavut?

² Jehovap kiffani tatiginartut qanoq isigai? Daavitut taakkuninnga ima oqaatiginnittutut isigai: „Nunami ilumoortut isima toqqarsimassavaat, uanga illunni ineqartissavakka. Aqqutikkut isornaalluinnartukkut ingerlasup kiffaaffigissavaanga.“ (Tussiaat 101:6) Aap, Jehovap kiffami ilumoornerat nuannaarutigaa. Pissutissaqarluarluni Paulusi ima allappoq: „Pilittaasunit piumasarineqartarpoq ilumoortuussasut.“ (1 Korinthimiut 4:2) Ilumoortuuneq qanoq paasisariaqarpa? Suut eqqarsaatigalugit ilumoortuusariaqarpugut? ’Aqqutikkut isornaalluinnartukkut ingerlaneq’ sunik pilluaqqussutissartaqarpa?

Ilumoortuuneq qanoq paasisariaqartoq

3. Ilumoornitsinnut suna aalajangiisuua?

³ Hebræerinut allakkat 3:5-imi ima allassimavoq: ’Mosesi kiffaasutut ilumoortuuvoq.’ Ilumoortuunera qanoq ersersinneqarpa? Toqqup naapeqatigiittarfiup  suliarinerani napparneranilu „Mosesi [Jehovap] peqqussutigisaa maleruaqqissaarlugu iliorpoq“. (2 Mosesi 40:16) Jehovamik pallorfiginnittutut ilumoortuunerput ersersittarparput taassumunnga naalalluta kiffartornitsigut. Tamatumunnga soorunami ilaavoq misilinneqaraangatta annikilliortinneqangaaraangattaluunniit Jehovamik ilumoorfiginnittuarnerput. Misilinneqarnernili ilungersunartuni ilumoorsimaneq immini ilumoortuunermut uppernarsaataanngilaq. Jiisusi ima oqarpoq: „Annikitsutigut ilumoortoq annertuutiguttaaq ilumoorpoq. Annikitsutigut peqquserluttoq annertuutiguttaaq peqquserluppoq.“ (Lukasi 16:10) Tassa allaat soqutaanngitsuusorinartunut tunngatillugu ilumoortuartariaqarpugut.

4, 5. „Annikitsutigut“ ilumoortuunerput sumut ersiutaava?

⁴ Ullut tamaviisa „annikitsutigut“ naalattuunissap pingaaruteqarneranut pissutaasut marluupput. Aappaa tassaavoq Jehovap kisimi oqartussaaneranik qanoq isiginninnitsinnut tamatuma ersiutaanera. Eqqarsaatigiuk inuit siulliit, Adamip Evallu, ilumoorfiginninnermikkut misilinneqarsimanerat. Taakkununnga piumasarineqartoq maleruaruminaanngilaq. Naatsiivik Edenimi nerisassat assigiinngitsorpassuit nerisinnaavaat, taamaallaat orpiup ataasiinnap — ’orpiup ajunngitsumillu ajortumillu ilisimalersitsisup’ — parnaanik nerinaveersaartussaapput. (1 Mosesi 2:16, 17) Inuit aappariit siulliit peqqussut paasiuminartoq tamanna naalassimasuugunikku, Jehovap naalakkersuineranik tapersersuinertik ersersissimassagaluarpaat. Jehovap siunnersuutaanik ulluinnarni malinninnikkut taassuma kisimi oqartussaanera pillugu akerleriissummi taanna tapersersortarparput.

⁵ „Annikitsutigut“ ilumoortuusariaqarnitsinnut pissutaasut aappaat tassaavoq tamanna „annertuutiguttaaq“ ilumoortuunissamut iluaqutigissagatsigu, tassa annertuutigut misilinneqalerutta. Tamatumunnga atatillugu eqqarsaatigeriaruk Danieli taassumalu ikinngutai hebræerit pingasut ilumoortut — Hananja, Mishaeli Azarjalu — qanoq misigisaqarsimanersut. Taakku ukiumi 617-imi u.n.s. Babylonimut aallarunneqarput. Taakku sisamat suli inuusuttuaraagunartut kunngip Nebukadnesarip illussaarsuanut pisinneqarput. Tassani ’ullut tamaasa kunngip nerisarisartagaanik nerisaqartinneqartussanngorput viinnimillu kunngip imigarisartagaanik imigaqartinneqartussanngorlutik. Ukiuni pingasuni ilinniartinneqareerunik kunngimut kiffartortunngussapput’. — Danieli 1:3-5.

6. Danieli taassumalu ikinngutai pingasut Babylonimi kunngikkormiuniitillutik suna misilinneqaatigaat?

⁶ Hebræerit sisamat taakku Babylonip kunngiata nerisartagaanik nereqquneqaramik unamminiagassaqalerput. Kunngip nerisartagai qularnanngitsumik Mosesip inatsisai naapertorlugit nereqqusaanngitsortaqarput. (5 Mosesi 14:3-20) Uumasut taakku immaqa aaverneqarnissamissut aaverneqarsimanngillat, taamaappallu taakkua neqaannik nerineq Guutip inatsisaanik unioqqutitsinerussaaq. (5 Mosesi 12:23-25) Nerisassat aamma guutipilunnut pilliutigineqarsimasinnaapput, guutipilummik peqateqarnermut takussutissatut neritinnatik Babylonimiut taamaaliortarmata.

7. Naalannermikkut Danielip taassumalu ikinngutaasa suna ersersippaat?

⁷ Babylonimiut kunngikkormiuisa nerisassat tungaasigut malittarisassat pingaartippallaarsimagunanngilaat. Taamaattorli Danielip taassumalu ikinngutaasa uummatimikkut aalajangiusimavaat nerisassanik Guutip Israelikkunnut inatsisai naapertorlugit nereqqusaanngitsunik minguttuunnguutigisinnaasaminnik nerinnginnissartik. Tamatumani Guutimut ilumoornerat aalajaannerallu pineqarput. Taamaammat naatitaannarnik nerisaqarumapput imiinnarmillu imigaqarumallutik, tamannalu akuerineqarpoq. (Danieli 1:9-14) Ullumikkut inuit ilaat immaqa isumaqassapput angutit inuusuttut sisamat taakku iliuuserisaat soqutaanngitsoq. Guutimulli naalannermikkut ersersippaat Jehovap kisimi oqartussaanera pillugu akerleriissummi qanoq inissisimanerlutik.

8. (a) Hebræerit pingasut taakku ilumoorfiginninnermikkut qanoq ilungersunartumik misilinneqarpat? (b) Misilinneqarnerat qanoq kinguneqarpa, tamatumuunalu suna erserpa?

⁸ Pisumi soqutaavallaarsorinanngitsumi ilumoornermikkut Danielip ikinngutai pingasut misilinneqarnissap annerusup naammagalugu atornissaanut piareersimalerput. Danielimik allakkat, kapitali 3, qupperiaruk atuarlugulu Danielip ikinngutai pingasut inuusaliaq kuultiusoq kunngip  Nebukadnesarip nappagaa pallorfigiumannginnamikku toqumut pillagassanngortinneqarnerat. Kunngimut sassartinneqaramik ilumoortuarnissaminnik aalajangiusimanninnertik qularatik ima oqaatigaat: „Taama pisoqassagaluarpat uagut Guutitta upperfigisatta annaassinnaavaatigut. Annaassinnaavaatigut aatsitsivimmit aamaannaasumit illit assannit, kunngi. Kisianni ilisimassavat, kunngi, taama pisoqanngikkaluarpalluunniit taamaattoq illit guutigisat guutisiorfigiumanngikkipput inuusaliarlu kuultiusoq nappakkat pallorfigiumanagu!“ (Danieli 3:17, 18) Jehovap annaappai? Paarsisut angutinik inuusuttunik aatsitsivimmut ikualasumut igitsisut ajunaarput, hebræerilli pingasut ilumoortut uumallutik tassannga anipput — innermit qilunneqaratilluunniit! Ilumoortumik inooriaaseqarnermikkut taamatut ilungersunartumik misilinneqarnissamut piareersimapput. Tamanna annikitsutigut ilumoortuunissap pingaaruteqarneranut erseqqissaataavoq, ilaa?

’Pisuussutinut naapertuilluanngitsunut’ tunngatillugu ilumoorneq

9. Sumut atatillugu Jiisusi Lukasi 16:10-mi allassimasutut oqarpa?

⁹ Soqutaanngitsuusorinartunut tunngatillugu ilumoortup aamma pingaaruteqartunut tunngatillugu ilumoortarneranik najoqqutassiaq eqqartortinnagu, Jiisusip tusarnaartuni ima siunnersorpai: „Mammoni peqquserluut ikinngutissarsiutigisiuk nunguppat [Pisuussutit naapertuilluanngitsut ikinngutissarsiutigisigik nunguppata, NV] taakkua ilassisinnaaniassammasi inigisani ittuinnartuni.“ Annikitsutigut ilumoorneq pillugu oqaaseqareerluni ima nangippoq: „Tassa mammoni peqquserluut ilumoorfiginngikkussiuk [pisuussutinut naapertuilluanngitsunut tunngatillugu ilumoorsimanngikkussi, NV] taava kia pisuussutinik naleqarluartunik paarisaqartissavaasi? . . . Inussiamik naalakkanut marlunnut kiffartorsinnaasoqanngilaq. Aappaami uumigiguniuk aappaa asassavaa, aappaa tulaavigiguniuk aappaa asiginnassavaa. Guuti Mammonilu [Pisuussutillu, NV] tamaasa kiffartorfigisinnaanngilasi.“ — Lukasi 16:9-13.

10. ’Pisuussutitsinnik naapertuilluanngitsunik’ atuinitsigut qanoq ilumoortuunerput ersersissinnaavarput?

¹⁰ Allassimaffiit ataqatigiinnerat naapertorlugu Jiisusi Lukasi 16:10-mi allassimasutut oqarami ’pisuussutinik naapertuilluanngitsunik’, tassa pigisatsinnik, atuineq pivaa. Nunap piisigut pisuussutit — ingammik aningaasat — naapertuilluanngitsutut taaneqarput inunnit ajortiliusunit aqunneqartarmata. Aamma pisuunngorusunneq naapertuilluanngitsuliortitsisinnaavoq. Ilumoortuunerput ersersittarparput pigisatsinnik isumatusaarluta atuinitsigut. Pigisavut namminissarsiorluta atornagit Guutip naalagaaffiata soqutigisaasa siuarsarnissaannut ikiortariallillu ikiornissaannut atorusuppavut. Tamatumunnga tunngatillugu ilumoortuunitsigut Jehova Guuti Jiisusi Kristusilu, ’inigisanik ittuinnartunik’ piginnittut, ikinngutigilerpavut. Taakkua inigisani taakkunani ilassissavaatigut qilammi imaluunniit paratiisissami nunarsuarmiittumi naassaanngitsumik inuuneqalersilluta.

11. Jehovap Nalunaajaasuisa silarsuaq tamakkerlugu sulinerat nammineq kajumissutsimit tunissutinit tapersersorneqartarnerata allanut oqaluttuarisarnissaa sooq nangaassutigissanngilarput?

¹¹ Eqqarsaatigiuttaaq inuit Biibilinik Biibililersaarutinilluunniit tunisavut sumik periarfissittarnerivut Guutip naalagaaffia pillugu oqaluussiffigigaangatsigik Jehovallu Nalunaajaasuisa nunarsuaq tamakkerlugu sulinerat taamaallaat nammineq kajumissutsimit tunissutinit tapersersorneqartarnera pillugu nassuiaakkaangatsigik. Pigisaminnik silatuumik atuinissaannut periarfissittarpavut. Lukasi 16:10-mi allassimaffik pigisanik atuinermut tunnganerugaluartoq najoqqutassiaq taanna aamma inuunermut tunngasuni allani atorneqarsinnaavoq.

Peqqusersuinneq pingaaruteqarpoq

12, 13. Peqqusersuitsuunerput sutigut ersersissinnaavarput?

¹² Apustili Paulusi ima allappoq: ’Nalunngilluarparput ilerasuutissaqarnata, tamatigummi eqqortumik iliorumasaraluaratta.’ (Hebræerit 13:18) Allassimammat „tamatigut“, taava soorunami aamma aningaasaqarniarnitsinnut tunngasut tamarmik pineqarput. Peqqusersuilluta piffissaq eqqorlugu akileraartarlutalu akiitsuvut akilertarpavut. Sooq? Taamaaliortarpugut nalunngeqatiginnissuserput pissutigalugu, pingaarnerpaamilli Guutimut asanninneq pissutigalugu taassumalu siunnersuutaanik malinninniarluta taamaaliortarpugut.  (Romamiut 13:5, 6) Inuummi allap pigisaa nassaarigutsigu? Taava piginnittuanukaanniarlugu sapinngisamik iliortarpugut. Piginnittoq nassuiaakkutsigu taassuma katataa sooq utertinnerlutigu tamanna nalunaajaataalluarsinnaavoq!

¹³ Tamatigut ilumoortuullutalu peqqusersuitsuussagutta aamma suliffimmi peqqusersuitsuusariaqarpugut. Sulinermut tunngatillugu ileqqorissaarnerput Guutip sinniisuuffigisatta qanoq ittuuneranik uparuussivoq. Eqiasunnikkut sulisitsisutsinnit piffissamik „tillinneq“ ajorpugut. Eqiasuillutali sulisarpugut, Jehova sullillugulusooq. (Efesosimiut 4:28; Kolossemiut 3:23) Europami nunami aalajangersimasumi missiliuunneqarpoq sulisut nakorsaminnut napparsimasutut nalunaarutigeqqusut pingasuugaangata ataaseq peqqusersusaarluni taamaaliortartoq. Guutimut kiffaasut ilumoortut suliartunnginnissamut utoqqatsissutissarsiorneq ajorput. Ilaannikkut Jehovap Nalunaajaasui allaat atorfimminni qaffatsinneqarnissamik neqeroorfigineqartarput sulisitsisuminnit peqqusersuinnertik eqiasuinnertillu malugineqartarmat. — Ussatit 10:4.

Kristumiutut oqaluussinermi ilumoortuuneq

14, 15. Kristumiutut oqaluussinermi ilumoortuuniarluta iliuuserisinnaasatsinnik eqqaasaqarit.

¹⁴ Kiffartornermi uagutsinnut suliassiissutigineqartumi qanoq ilumoortuusinnaavugut? Biibilimi ima allassimavoq: „Guuti . . . pilliivigiuartigu qujaniutinik, tassa qarlut aqqanik nassuerutiginnittut inerititaannik.“ (Hebræerit 13:15) Oqaluussinermi ilumoortuuniarluni aalajaalluni oqaluusseqataasarneq pingaaruteqarnerpaavoq. Inuit allat Jehova taassumalu siunertai pillugit qaammat naallugu oqaluttuutinngitsuussanerpavut? Aamma aalajaalluta oqaluusseqataasarutta oqaluussisartutut pikkorinnerulissaagut sunniuteqarnerusumillu oqaluussisinnaalissalluta.

¹⁵ Aamma Napasuliaq Alapernaarsuiffik-mi Rigets Tjeneste-milu siunnersuutigineqartartunik atuisarneq oqaluussinermi ilumoortuunermik ersersitsilluarneruvoq. Piareersarluarsimagaangavit saqqummiusseriaatsillu siunnersuutigineqartut piviusorsiorpaluttulluunniit allat atoraangakkit oqaluussinermi angusaqarluarnerusarputit, ilaa? Guutip naalagaaffia pillugu tusarliussamik soqutiginnittoqaraangat pulaaqqiipallattarpit? Soqutiginnittunimmi Biibilimik atuaqqissaaqateqaleraangavit? Akisussaassutsinnik pingaartitsillutit ilumoorlutillu taakku isumagisarpigit? Oqaluussinermi ilumoortuunerput uagutsinnut tusartitsinnullu inuunermik naassaanngitsumik kinguneqarsinnaavoq. — 1 Timotheusi 4:15, 16.

Silarsuarmit avissaaqqajuarniarpugut

16, 17. Silarsuarmut ilaannginnerput sutigut ersersissinnaavarput?

¹⁶ Jiisusi Guutimut qinunermini ajoqersukkani  pillugit ima oqarpoq: „Illit oqaatsinnik tunivakka, silarsuulli uumissorpai silarsuarmut ilaanngimmata, soorlu uanga silarsuarmut ilaanngitsunga. Qinnutinngilakka silarsuarmit peerseqqullugit, ajortorli pissutigalugu paareqqullugit. Silarsuarmut ilaanngillat, soorlu uanga silarsuarmut ilaanngitsunga.“ (Johannesi 17:14-16, NV) Immaqa pingaarutillit soorlu kalluunnaveersaarneq, kinguaassiuutitigut inuunerlunneq upperisarsiornikkullu nalliuttorsiornerit ileqqullu pineqaraangata silarsuarmit avissaaqqajuarnissarput aalajangiusimalluinnartarparput. Annikitsutigummi? Imaattoqarsinnaanerpa sianiginngisatsinnik silarsuarmit sunnerneqartugut? Mianersunngikkutta atisalersoriaaserput assuarnartunngoriaannaallunilu taqassinartunngoriaannaavoq. Ilumoortuussagaanni atisat isikkorissarnerlu ’isornaatsuusariaqarlutillu perroorniutaassanngillat’. (1 Timotheusi 2:9, 10) Aap, „sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu. Tamatigulli Guutimit kiffarineqartutut takutinniartarpugut“. — 2 Korinthimiut 6:3, 4.

¹⁷ Jehova ataqqerusukkatsigu ilagiit ataatsimiinnerinut najuukkaangatta ataqqinnippaluttunik atisaqartarpugut. Taamatuttaaq ippoq ataatsimeersuaararaangatta ataatsimeersuaraangattalu. Atisavut naleqquttuusariaqarlutillu ajukkunnanngitsuusariaqarput. Taamaattunik atisaqarnerput uagutsinnik isiginnittunut nalunaajaataalluassaaq. Allaat inngilit maluginiartarpaatigut, Paulusimik uppeqataanillu kristumiunik maluginiaasarsimanermissut. (1 Korinthimiut 4:9) Aap, tamatigut isornaatsunik atisaqartariaqarpugut. Inuit ilaat immaqa isumaqarput atisanut tunngatillugu ilumoortuuneq soqutaanngitsuusoq, Guutilli isaani pingaaruteqarpoq.

Ilumoortuunerup pilluaqqussutissartai

18, 19. Ilumoortuuneq sunik pilluaqqussutissartaqarpa?

¹⁸ Kristumiut ilumoortut „Guutip saammaanneranut [ajunngissusianut pisassarinngisaraluamut, NV] assigiinngeqisunik ersiuteqartartumut pilittaalluartutut“ allaatigineqarput. Tamatumunnga pilittaalluartuugatta ’pissaaneq Guutip tunniussaa’ pisariaqartipparput. (1 Petrusi 4:10, 11) Pilittatut paarisassatsinnik nammineq piginngisatsinnik — Guutip ajunngissusianik pisassarinngisaraluamik, ilaatigut oqaluussinikkut ersersinneqartartumik — tunineqarpugut. Pilittaalluartuusinnaajumalluta „pissaaneq asseqanngitsoq“ pisariaqartipparput. (2 Korinthimiut 4:7) Aap, annikitsutigut ilumoortuunerput siunissami qanorluunniit ittumik misilinneqarnitsinni pinertusaarnissamut iluaqutigisinnaavarput!

¹⁹ Tussiaasiortoq ima erinarsorpoq: „[Jehova] asasiuk taassumunnga upperluartusi! [Jehovap] sernigai unneqqarissut.“ (Tussiaat 31:24) Ilumoortuunissarput aalajangiusimatigu, qularutiginngilluinnarlugu Jehova ’inuit tamalaat annaassisigigaat, pingaartumik uppertut ilumoortullu’. — 1 Timotheusi 4:10, NV. (wE 7/15 05)

Eqqaamavigit?

• Sooq ’annikitsutigut ilumoortuusariaqarpugut’?

• Ilumoortuunerput qanoq ersersissinnaavarput

peqqusersuinnermut tunngatillugu?

oqaluussinermut tunngatillugu?

silarsuarmit avissaaqqajuarniarnitsinnut tunngatillugu?

[Atuaqqissaarnermi apeqqutit]

[Qupp. 28-mi assiliartat]

Annikitsutigut ilumoortoq, annertuutiguttaaq ilumoortoq

[Qupp. 31-mi assiliartaq]

’Tamatigut eqqortumik ilioritsi’

[Qupp. 31-mi assiliartaq]

Oqaluussinissamut piareersarluartarneq ilumoortuunermik ersersitsilluarneruvoq

[Qupp. 32-mi assiliartaq]

Torersunik nuimaniarpalunngitsunillu atisalersortarit