„Immissinnik misiligitsi!“

„Immissinnik paasiniaaffiginiaritsi uppernermiinnersusi! Immissinnik misiligitsi!“ — 2 KORINTHIMIUT 13:5.

1, 2. (a) Uppernitsinnut tunngatillugu qularuteqarneq uagutsinnut qanoq sunniuteqarsinnaava? (b) Pisimasoq suna ukiuni hundredelinni siullerni Korinthimiittut ilaasa aqqutip sorliup ingerlaviginissaanut nalornissutigilersimasinnaavaat?

ANGUTIP pisummik angalatilluni aqquserngit naapiffiat tikippaa. Aqqut sorleq ornigassami tungaanukartuunersoq nalugamiuk saneqquttunik apersuivoq, taakkuali akissutaat tamarmik allaapput. Maanna paatsiveerulluinnarpoq ingerlaqqissinnaajunnaarlunilu. Upperisatsinnut tunngasumik arlaannik qularuteqalerutta, aamma uagut taamatut misigisinnaavugut. Taamaakkutta aalajangersinnaarpiarunnaarlutalu aqqut sorleq ingerlavigissanerlutigu, tassa qanoq inuussanerluta nalornissutigilersinnaavarput.

² Ukiuni hundredelinni siullerni Korinthimi Grækenlandimiittumi kristumiut ilagiissaanni pisoqarpoq ilagiinniittut ilaasa taamatut misigilissutigisinnaasaannik. ’Apustilissaarsuit’ apustili Paulusip oqartussaanera apeqquserpaat. Taakku oqarput Paulusip ilagiit ’allaffigigaangamigit pikkunartunik sukannersunillu naalattariaqartutut oqaaseqartaraluarluni najoraangamigit maniguutiinnartartoq oqalunneralu soqutaanngivittartoq’. (2 Korinthimiut 10:7-12; 11:5, 6) Taamatut isumaqartoqarnera Korinthimi ilagiinniittut ilaasa aqqutip sorliup ingerlaviginissaanut, tassa qanoq inuunissaminnut, nalornissutigilersimasinnaavaat.

3, 4. Sooq Paulusip Korinthimiunut siunnersuutaa soqutigisariaqarparput?

³ Ukiumi 50-imi Paulusi Korinthimi tikeraarsimanermini ilagiinnik pilersitsivoq. „Tassani najugaqarpoq ukiup aappaa qiteqqullugu Guutillu oqaasia taakkunani ajoqersuutigalugu.“ Allassimavoq „Korinthimiut amerlasuut tusarnaartut uppertunngoramillu kuisillutik“. (Apustilit Suliaat 18:5-11) Paulusip uppeqatimi Korinthimiittut anersaakkut ingerlalluarnissaat ilumoorluni soqutigaa. Aamma Korinthimiut namminneq Paulusi allaffigisimavaat aalajangersimasunik siunersiorlugu. (1 Korinthimiut 7:1) Taamaattumik iluaqutigisinnaasaannik siunnersorpai.

⁴ Paulusi ima allappoq: „Immissinnik paasiniaaffiginiaritsi uppernermiinnersusi! Immissinnik misiligitsi!“ (2 Korinthimiut 13:5) Qatanngutit Korinthimiittut siunnersuut taanna maleruarsimasuugunikku, aqqutikkut sorlikkuussanerlutik nalornilinnginnissaminnut tamanna illersuutigisimassagaluarpaat. Ullumikkut uaguttaaq Paulusip siunnersuutaa illersuutigisinnaavarput. Qanorli malissinnaavarput? Uppernermiinnerluta qanoq ililluta immitsinnik paasiniaaffigisinnaavugut? Imminullu misilinneq qanoq paasisariaqarpa?

„Immissinnik paasiniaaffiginiaritsi uppernermiinnersusi!“

5, 6. Uppernermiinnerluta immitsinnik paasiniaaffigissagutta suna najoqqutarisinnaavarput, sunalu pillugu najoqqutassaq taanna naammalluinnartuua?

⁵ Paasiniaanermut tunngatillugu arlaannik paasiniagassaqartarpoq, aamma najoqqutassaqartarpoq paasiniaanermi atorneqartussaasumik. Allassimaffimmi eqqaaneqartumut tunngatillugu upperisamik ajoqersuutit pinnagit, uagulli inuttut tamatta immikkut paasiniaaffigineqartussaavugut. Paasiniaanermilu tamatumani naammalluinnartumik najoqqutassaqarpugut. Tussiaasiortoq Daavi ima allappoq: „[Jehovap] inatsisai innarluitsuupput, tarnimik tumannguersaasarput. [Jehovap] nalunaajaatai  aalajaatsuupput, misilittagakitsunik ilisimasunngortitsisarput. [Jehovap] maleruagassiai naapertuilluartuupput, uummammik nuannaartitsisarput. [Jehovap] peqqussutai piviusuupput, isinik qaamaneqalersitsisarput.“ (Tussiaat 19:8, 9) Jehovap inatsisai innarluitsut, maleruagassiai naapertuilluartut, nalunaajaatai aalajaatsut peqqussutaalu piviusut Biibilimiipput. Tassani tusarliunneqartoq uagutsinnut najoqqutassaavoq pitsaalluinnartoq.

⁶ Tusarliussaq Guutimit isumassarsiarititaasoq tamanna pillugu apustili Paulusi ima allappoq: „Ilumut Guutip oqaasia uumavoq sunniisinnaassuseqarlunilu panamillu illuttut kiinalimmit ipinnerulluni. Magguttarpoq avissaartillugu tarneq anersaamit taamatullu aamma pateq saanermit, uummatip eqqarsaatai isumaalu eqqartuuttarlugit.“ (Hebræerit 4:12) Aap, Guutip oqaasiata uummaterput — ilorpiatsinni qanoq ittuunersugut — ’paasiniarsinnaavaa’. Tusarliussaq ’sunniisinnaassuseqarlunilu ipittoq’ tamanna tamatta immikkut qanoq atorluarsinnaavarput? Tussiaasiortup erinarsorluni tamanna erseqqissarpaa: „Pilluarpoq . . . [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu.“ (Tussiaat 1:1, 2) ’Jehovap inatsisai’ taassuma oqaasiani Biibilimi allassimapput. Jehovap oqaasiata atuartarnera nuannaarutigisariaqarparput. Aap, atuartarnissaa eqqarsaatigeqqissaartarnissaalu piffissaqarfigisariaqarpavut. Taamaaliortillutalu immitsinnik paasiniaaffigisariaqarpugut atuakkavut immitsinnut naleqqiuttarlugit.

7. Uppernermiinnerluta immitsinnik paasiniaaffiginiarluta suut iliuuserinissaat pingaaruteqarnerpaappat?

⁷ Uppernermiinnerluta immitsinnik paasiniaaffiginiarluta Guutip oqaasianik atuartarnissaq, atuakkatsinnik eqqarsaatiginneqqissaartarnissaq pissusilersornerpullu ilikkakkatsinnut naapertuunnersoq paasiniarlugu imminut misissortarnissaq pingaaruteqarnerpaapput. Guutip oqaasianik paasinninnissamut iluaqutissarpassuaqarnerput nuannaarutigisinnaavarput.

8. Biibililersaarutit „kiffaq ilumoortoq silatoorlu“ aqqutigalugu pisartakkavut uppernermiinnerluta imminut paasiniaaffiginissamut qanoq iluaqutigisinnaavavut?

⁸ Biibililersaarutit Allakkanut nassuiaataasut „kiffaq ilumoortoq silatoorlu“ aqqutigalugu pisartakkavut iluaqutigalugit ajoqersorneqarsinnaanissarput Jehovap isumagisimavaa. (Matthæusi 24:45) Assersuutigalugu atuakkami Kom nær til Jehova-mi * kapitalit amerlanerit naalerneranni ungalusat „Spørgsmål til eftertanke“-mik („Apeqqutit eqqarsaatigilluagassat“-mik) qulequtallit eqqarsaatigikkit. Apeqqutit tamakku nammineq eqqarsaatiginneqqissaarnissamut iluaqutaaqaat! Atuagassiaatitsinni, Napasuliaq Alapernaarsuiffik-mi Vågn op!-imilu sammineqartartut ilarpassui aamma uppernermiinnerluta immitsinnik paasiniaaffiginissamut iluaqutaapput. Ussatit pillugit allaaserisat Napasuliaq Alapernaarsuiffik-mi saqqummersinneqartut pillugit arnaq kristumiu ima oqarpoq: „Isumaqarpunga allaaserisat taakku iluaqutaaqisut. Taakku iluaqutigalugit paasisinnaavara oqaluttarnera, pissusilersornera isiginnittaaseralu Jehovap najoqqutassiaanut naapertuilluartunut ilumut naapertuunnersut.“

9, 10. Uppernermiinnerluta immitsinnik paasiniaaffiginissamut Jehovap sunik iluaqutissippaatigut?

⁹ Aamma ilagiit ataatsimiinnerini, ataatsimeersuaararnerni ataatsimeersuarnernilu naammangaartumik siunnersorneqartarlutalu kajumissaarneqartarpugut. Esajap inuit ima siulittuutigisai Jehovap ilaatigut taamatut anersaakkut ikiortarpai: „Ullussani kingullerni qaqqaq [Jehovap] naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut akimussallugit. Tassunga inuiaat tamarmik ornigutissapput, inuiappassuillu tassunga ingerlaartut oqassapput: ’Qaa, majuarta [Jehovap] qaqqaanut, . . . aqqutigeqqusaminik ajoqersussavaatigut, aqqusininnguisigullu ingerlajumaarpugut.’“ (Esaja 2:2, 3) Jehovap aqqutigeqqusai pillugit taamatut ilinniartinneqarneq ilumut pilluaqqussutaangaarpoq.

 ¹⁰ Aamma anersaakkut piukkunnaatillit, ilaatigut utoqqaanertat kristumiut, siunnersuutaat puigussanngilavut. Taakku pillugit Biibilimi ima allassimavoq: „Qatanngutit, unioqqutitsisumik paasisaqarussi, taava Anersaamik pigisaqartusi qanilaarlusi iluarsinissaanut ikiorsiuk. Mianersorillu illittaaq usserneqaqqunatit!“ (Galatiamiut 6:1) Anersaakkut iluarseqqinnissamut taamatut ikiorneqarsinnaanerput qujamasuutigingaarsinnaavarput!

11. Uppernermiinnerluta immitsinnik paasiniaaffiginiarluta qanoq iliortariaqarpugut?

¹¹ Biibililersaarutaativut, kristumiut ataatsimiinneri nakkutilliisullu toqqakkat — taakku tassaapput Jehovamit tunissutisiat nuannersut. Uppernermiinnerlutali immitsinnik paasiniaaffiginiarluta imminut misissortariaqarpugut. Taamaattumik Biibililersaarutit atuaraangatsigik imaluunniit Biibili tunngavigalugu kajumissaarutit tusarnaaraangatsigik imminut ima aperisariaqarpugut: ’Uanga taamaappunga? Kajumissaarutigineqartut malillugit iliortarpunga? Kristumiut ajoqersuutaat aalajangiuttarpakka?’ Paasissutissanut tamakkua aqqutigalugit uagutsinnut tunniunneqartunut isiginnittaaserput aamma anersaakkut qanoq issutsitsinnut sunniuteqartarpoq. Biibilimi ima allassimavoq: „Inuup tarnimut atasup Guutip Anersaavanit pisut ilassisanngilai; tamanna taassumunnga sianiitsuliorneruvoq. . . . Anersaamulli atasup suut tamaasa misissortarpai.“ (1 Korinthimiut 2:14, 15) Atuagaatitsinni, atuagassiaatitsinni Biibililersaarutaatitsinnilu allani atuakkatsinnut ataatsimiinnernilu utoqqaanertanillu tusakkatsinnut ajunngitsumik anersaakkullu ittumik isiginnittaaseqarniartariaqarpugut, ilaa?

„Immissinnik misiligitsi!“

12. Imminut misilinniarluni qanoq iliortoqartariaqarpa?

¹² Imminut misilinniarluni nammineq inooriaaserisaq iliuutsillu eqqarsaatigilluarneqartariaqarput. Aap, immaqa ’sallusuissummiippugut’, inuunitsinnili sallusuissummik qanoq malinnilluartigaagut? Immitsinnik misilittariaqarpugut, paasiniarlugu kristumiuunerluta inersimalluartut anersaakkut ittunik uagutsinnut tunniunneqartunik pingaartitsilluinnartut.

13. Hebræerit 5:14 naapertorlugu inersimalluartuuneq qanoq ersertarpa?

¹³ Kristumiutut inersimalluarnerluta paasiniarlugu qanoq imminut misilissinnaavugut? Apustili Paulusi ima allappoq: „Nerisassat tamuasarissat nerineqartussaapput inersimasunngorluarsimasuni piginnaassutsimik atortuinnarnerisigut sungiussisimasunit ajunngitsumik ajortumillu immikkoortitsisinnaalerlutik.“ (Hebræerit 5:14) Inuttut inersimalluartuulluta ersersissinnaavarput paasinnissinnaassutsitsinnik sungiusaanitsigut. Soorlu timersortartoq aatsaat sungiusartuarnermigut nukkassartaruni angusaqarluarsinnaasoq, uagut Biibilimi najoqqutassiat atorlugit inuunitsigut paasinnissinnaassuserput sungiusartariaqarparput.

14, 15. Sooq Guutip oqaasiani itinerusut atuaqqissaarniarlugit immikkut iliuuseqartariaqarpugut?

¹⁴ Paasinnissinnaassuserput sungiusarniarlugu ilisimassuseqalertariaqarpugut. Eqiasuilluta atuaqqissaartariaqarpugut. Atuaqqissaartuaraangatta — pingaartumik Guutip oqaasiani paasiuminaannerusunik misissuiuaraangatta — paasinnissinnaassuseqarnerulertarpugut. Ukiut ingerlaneranni sammisassat itinerusut amerlasuut Napasuliaq Alapernaarsuiffik-mi allaatigineqartarsimapput. Sallusuissummut tunngasut itinerusut pillugit allaaserisaqaraangat qanoq misigisarpugut? ’Paasiuminaatsortaqartarmata’  qaangiinnarusunnerusarpavut? (2 Petrusi 3:16) Atuakkavut paasiniarlugit immikkut iliuuseqartariaqarpugut. — Efesosimiut 3:18.

¹⁵ Atuaqqissaarnermi erloqinartikkutsigu? Taamaappat nuannarilersinnaajumallugu sapinngisamik iliuuseqarnissarput pingaaruteqarpoq. * (1 Petrusi 2:2) Aatsaat ’nerisassat tamuasarissat’, tassa Guutip oqaasiani sallusuissummut tunngasut itinerusut, inuussutiginissaat ilinniarutsigu inersimallualersinnaavugut. Tamakku inuussutigisanngikkutsigik paasinnissinnaassuserput sungiusarneqarnavianngilaq. Inersimallualissagaannili paasinnissinnaassutsip sungiusarnissaa naammanngilaq. Eqiasuilluta nammineq atuaqqissaarnitsigut ilisimalikkavut ulluinnarni atortariaqarpavut.

16, 17. ’Oqaatsimik maleruaanissamut’ tunngatillugu ajoqersugaq Jaaku qanoq kajumissaariva?

¹⁶ Inuttut qanoq ittuiunerput aamma uppernikkut suliatsigut, sallusuissummik pingaartitsinitsinnut ersiutaasutigut, ersersinneqartarpoq. Ajoqersugaq Jaaku taamatut imminut misissorneq nassuiarniarlugu torrallalluinnarlugu assersuusiorpoq. Ima allappoq: „Oqaaseq tusaaginnarnagu maleruarsiuk, taamaaliunngikkussi immissinnut salloqittaqinaasi. Oqaatsimimmi tusaaginnartup maleruarnagulu assigaa inuk kiinnaminik tarrarsuutikkut qimerluuisoq: Imminut qimerlooraluarpoq, qimagukkamili qanoq isikkoqarnini erniinnaq puiorpaa. Kiffaanngissutsilli inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.“ — Jaaku 1:22-25.

¹⁷ Allatut oqaatigalugu Jaaku ima allappoq: ’Guutip oqaasia tarrarsuutitut atorlugu imminut misiligit. Taamaaliortuarit, Guutillu oqaasiata qaamanera atorlugu imminut misissorit. Takusatit puigupallaqinagit. Pisariaqartunik allannguigit.’ Ilaannikkulli kajumissaarutip tamatuma malinnissaa unamminiarnartuusinnaavoq.

18. Sooq Jaakup siunnersuutaata malinnissaa unamminiarnartuua?

¹⁸ Guutip naalagaaffianik oqaluussissutiginneqataaqquneqarnerput assersuutigeriartigu. Paulusi ima allappoq: „Uummatikkut upperneq iluartuutitaassutissaavoq, qanermillu nassuerneq annaanneqaatissaalluni.“ (Romamiut 10:10) ’Annaanneqaatissamik qanermik nassuissagutta’ arlalitsigut naleqqussartariaqarpugut. Amerlanersatsinnut oqaluusseqataanissaq imaannaanngilaq. Oqaluussinermilu aallussilluassagutta suliassarlu tamanna pingaartinneqartariaqarneratut inuunitsinni pingaartissagutsigu, suli naleqqussarnerusariaqarlutalu pilliuteqarnerusariaqarpugut. (Matthæusi 6:33) Suliassamilli Guutimeersumik ’naammassinnittunngoreersimagutta’ pilluassaagut taamaaliornikkut Jehova ataqqinaatissittaratsigu. Guutip naalagaaffianik oqaluussissutiginnittuuvugut aallussilluartut?

19. Uppernikkut suliavut suusariaqaramik?

¹⁹ Uppernikkut suliavut suusariaqarpat? Paulusi ima allappoq: „Uannit ilikkakkasi pissarsiasilu tusakkasilu uannilu takusasi iliuuserissavasi,  eqqissinerullu Guutiata najussavaasi.“ (Filippimiut 4:9) Kinaanerput uppernarsarsinnaavarput ilikkakkavut, pissarsiavut tusakkavut takusavullu — Guutimut tunniulluinnaratta Kristusimullu ajoqersuganngoratta aappimik akisimasavut — iliuuseralugit. Pruffiiti Esaja aqqutigalugu Jehova ima kajumissaarivoq: „Aajuna aqqusineq, taanna ingerlavigissavarsi!“ — Esaja 30:21.

20. Inuit qanoq ittut ilagiinnut pilluaqqussutaangaartarpat?

²⁰ Angutit arnallu, assuarnaattuaatigalutik ilumoorfiginnillutillu Guutip naalagaaffianik tapersersuiuaatigalutillu, eqiasuillutik Guutip oqaasianik atuaqqissaartartut aallusilluarlutillu nutaarsiassamik nuannersumik oqaluussissutiginnittartut ilagiinnut pilluaqqussutaangaartarput. Ilagiinnut aalajaallinartuullutillu iluaqutaangaarput — pingaartumik nutaat isumagineqartussat amerlagaangata. Paulusip ’uppernermiinnerluta immitsinnik paasiniaaffiginissamik immitsinnillu misilinnissamik’ kajumissaarutaanik malinninnitsigut uaguttaaq allanut sunniuteqarluarsinnaavugut.

Guutip piumasaatut iliornerit nuannaarutigiuk

21, 22. Qanoq ililluta Guutip piumasaatut iliorneq nuannaarutigilersinnaavarput?

²¹ Israelimi kunngi Daavi ima allappoq: „Guuti, piumasat malillugu iliornissaq tassa kajungerisara; inatsisitit uanga ilunni ipput.“ (Tussiaat 40:9) Daavip Guutip piumasaatut iliornini nuannaarutigaa. Sooq? Jehovap inatsisai uummammiugigamigit. Daavip aqqut sorleq ingerlavigissanerlugu, tassa qanoq inuussanerluni, nalornissutigisimanngilaa.

²² Guutip inatsisai ilutsinniippata, uaguttaaq aqqut sorleq ingerlavigissanerlutigu nalornissutigissanngilarput. Guutip piumasaatut iliorneq nuannaarutigaarput. Taamaattumik Jehova uummatikkut iluunngarluta kiffartorfigitillugu ’ilungersorniarta’. — Lukasi 13:24.  (wE 7/15 05)

[Quppernerup ataani ilanngussat]

Eqqaamavigit?

• Uppernermiinnerluta qanoq ililluta immitsinnik paasiniaaffigisinnaavugut?

• Imminut misilinniarluni qanoq iliortoqartariaqarpa?

• Kristumiutut inersimalluartuuneq qanoq ersertarpa?

• Uppernikkut suliavut iluaqutigalugit inuttut qanoq ittuunerluta qanoq misilissinnaavarput?

[Atuaqqissaarnermi apeqqutit]

[Qupp. 21-mi assiliartaq]

Uppernermiinnerluni imminut paasiniaaffiginiarluni qanoq iliornissaq pingaaruteqarnerpaava?

[Qupp. 22-mi assiliartaq]

Kristumiutut inersimalluartuunerput paasinnissinnaassutsitsinnik sungiusaanitsigut ersertarpoq

[Qupp. 23-mi assiliartat]

Inuttut qanoq ittuunersugut ’tusakkatsinnik puigutuunnginnikkut suliassamillu naammassinnittartuunikkut’ uppernarsartarparput