’Jehovap aqqutigeqqusai innarluipput’

„[Jehovap] aqqutigeqqusai innarluipput, iluartut taakkunuuna ingerlasarput.“ — HOSEA 14:10.

1, 2. Jehovap Israelikkut qanoq ittumik aallarnerfeqartippai, qanorli pissuseqalerpat?

PRUFFIITI Mosesip nalaani Jehovap Israelikkut naapertuilluartumik aallarnerfeqartippai. Ukiulli 700-kkut ukiunik naatsorsuisalerfitta siorna aallartilaarneranni Guutimit ungasillisimaqaat, taassumalu taakku sualuttumik unioqqutitsisutut pisuutippai. Tamanna Hoseap allagaani kapitali 10-14-imi erseqqippoq.

² Israelikkut uummataat peqqusersiortunngorput. Naggueqatigiissortat quliusut naalagaaffianni innuttaasut ’iluaatsuullutik assallatserisimapput pinerluttulianillu katersuillutik’. (Hosea 10:1, 13) Jehova ima oqarpoq: „Israeli inuusukkallarmat asalerpara, ernera Egyptenimit qaaqquara.“ (Hosea 11:1) Guutip Israelikkut Egyptenimi inussiaataanerannit aniguisissimavai, taakkuli taassumunnga salluliorlutillu peqqusersiorput. (Hosea 12:1) Taamaammat Jehovap ima kajumissaarpai: ’Guutinnut saanniarit; isumassuineq innarluissullu aalajangiukkit.’ — Hosea 12:7, 1900/1961.

3. Samariamiut pikitsitsisut qanoq pineqartussaappat, qanorli ilillutik nallittorneqarsinnaappat?

³ Samariamiut pikitsitsisut taakkualu kunngiat peersinneqarumaarput. (Hosea 13:11; 14:1) Hosealli allagaani kapitalip kingulliup aallaqqaataani ima kajumissaaruteqarpoq: „Saanniarit, Israeli, [Jehovamut] Guutinnut.“ Israelikkut allamik isumataarpata isumakkeerfigeqquppatalu Guutip nallittorumaarpai. Soorunami akuerisariaqarpaat ’Jehovap aqqutigeqqusai innarluitsuusut’ taakkunuunalu ingerlasariaqarlutik. — Hosea 14:2-7, 10.

4. Hoseap siulittuutaani najoqqutassiat suut sammissavavut?

⁴ Hoseap siulittuutaata immikkoortuani tamatumani Guutimik saqeqateqarnissamut iluaqutigisinnaasatsinnik najoqqutassiarpassuaqarpoq. Tulliuttut uku sammissavavut: (1) Jehovap piumaffigaatigut peqqusersiornata kiffartorfigissagitsinni, (2) Jehovap innuttani ilumoorfiginnilluni tunniusimaffigai, (3) Jehova tamatigut neriuffigisariaqarparput, (4) Jehovap aqqutigeqqusai tamatigut innarluipput, aamma (5) ajortuliortut Jehovamut utersinnaapput.

Jehovap piumaffigaatigut peqqusersiornata kiffartorfigissagitsinni

5. Guutip kiffartornissamik qanoq ittumik piumaffigaatigut?

⁵ Jehovap minguitsuulluta peqqusersiornatalu illernartumik kiffartornissarput piumasaraa. Israelili ’viinnequtinngorpoq naalluarsimasoq [naanerluttoq, NV]’ ajortunillu inerititaqartoq. Israelimi innuttaasut guutipilunnut pilliiviliatik amerlisikkaluttuinnarpaat. Tunussisut taakku allaat ujaqqanik napasuliorsimapput eqqunngitsumik pallorfiginninnermi atorneqartussaasunik. Jehovap pilliiviit taakku aserorumaarpai ujaqqallu nappartitat piuneerullugit. — Hosea 10:1, 2.

6. Guutimik saqeqateqassagutta suna pinaveersaartariaqarparput?

⁶ Jehovamut kiffartortut peqqusersiortuussanngillat. Israelikkulli qanoq ittunngorpat? ’Uummataat peqqusersiortunngorput’! Siusinnerusukkut Jehova angerfigeqatigaat innuttanngorlutillu taassumunnga tunniulluinnarsimasut, taassumali peqqusersiortutut pisuutippai. Uagut tamanna qanoq ilinniutigisinnaavarput? Guutimut tunniulluinnarsimagutta peqqusersiortuussanngilagut. Ussatit 3:32-mi ima mianersoqqussuteqarpoq: „Peqquserluttuliortoq Jehovap maajugaa, peqqusersuitsorli anngigisaqarfiginngilaa.“ (NV) Guutimik saqeqateqassagutta ersersittariaqarparput ’asanninneq uummatitsigut minguilluta tarnitsigullu ilerasuutigisaqarnata  uppernitsigullu pisuusaarnata’. — 1 Timotheusi 1:5, 1900/1961.

Jehovap innuttani ilumoorfiginnilluni tunniusimaffigai

7, 8. (a) Suna pisariaqarpa Guutip ilumoorfiginnilluni tunniusimanera iluaqutigisinnaassagutsigu? (b) Sualuttumik ajortuliorsimagutta qanoq iliortariaqarpugut?

⁷ Minguitsuulluta peqqusersiornatalu pallorfigigutsinni Guutip ilumoorfiginnilluni tunniusimaffigissavaatigut. Israelikkut uteriitsut ima oqarfigineqarput: „Iluartuullusi siaruarterissaasi, ilumoorsuseqarlusi katersuissaasi, nunamik nutaamik assallatserissaasi. Piffissanngorpoq [Jehovap] ujarnissaanut, aggeqqullugu naapertuilluarnermillu ilissinnut siallersitseqqullugu.“ — Hosea 10:12.

⁸ Israelikkut allamik isumataarumasuugaluarpata Jehovamillu ujaasiumasuugaluarpata, taanna nuannaarluni ’naapertuilluarnermik taakkununnga siallersitsissagaluarpoq’ naapertuilluarnermik ilinniartillugit. Sualuttumik ajortuliorsimagutta, taava Jehova ujartigu, isumakkeerfigeqqulluta qinnuigisigu utoqqaanertanullu anersaakkut ikiortissarsiorluta. (Jaaku 5:13-16) Aamma Guutip anersaavata illernartup uagutsinnik siulersuinissaa noqqaassutigisigu, „uinimmummi siaruarterisup aserorneq uinimmit katersugariumaarpaa, anersaamulli siaruarterisup anersaamit inuuneq naassaanngitsoq katersugariumaarpaa“. (Galatiamiut 6:8) ’Anersaamut siaruarterigutta’ Guutip ilumoorfiginnilluni tunniusimanera iluaqutigiuassavarput.

9, 10. Israelimut tunngatillugu Hosea 11:1-4 qanoq eqquuppa?

⁹ Qularutigissanngilarput Jehovap innuttani tamatigut asannittumik iliorfigisarai. Tamanna Hosea 11:1-4-mi erserpoq. Tassani ima allassimavoq: „Israel meeraagallarmat asalerpara, ernera Egyptenimit qaaqquara. . . . Ba’alinut pilliipput, pilliutinik ikikkagassanik pilliipput guutilianut. Uangamiuna Efraim [Israelikkut] pisunnermut sungiusariga kissumiartarlugulu, paasinngilaali uanga katsorsarinni. Asanninneq pituutaralugulusooq qajassuartumik uannut qanillisippara. Uniuserfik qungasianit peeriarlugu aqassullugu nerisassaanik isaassivigaara.“ (1990)

¹⁰ Uani Israeli meerannguamut assersuunneqarpoq. Jehovap asannilluni Israelikkut pisunnermik sungiusarpai kissumiartarlugillu. Taassumalu „asanninneq pituutaralugulusooq“ qajassuartumik imminut qanillisinniartuarpai. Assersuutaavoq killinnartoq! Takorlooriaruk illit ernerit paniilluunniit alloriaqqaarneranik ikiorit. Assatit tungaanut isaappatit. Immaqa aamma ernerit paniilluunniit orlunnginniassammat najummatserfissaanik isaassivigisarpat. Jehovap ilinnut asanninnera taama sakkortutigaaq. „Asanninneq pituutaralugulusooq“ ilinnik siulersuinini nuannaarutigaa.

11. Guutip ’uniuserfimmik peersisutut’ innera qanoq paasisariaqarpa?

¹¹ Israelikkunnut Jehova ’uniuserfimmik taakkua qungasiannit peerseriarluni aqassuilluni nerisassaannik isaassiviginnittutut’ ippoq. Uumasoq nerisinnaaniassammat Guuti uniuserfimmik pukusuanit peersisutut imaluunniit illuaasutut ippoq. Israelikkut aatsaat Guutimut naalannginnermikkut uniuserfitsik assersuutaasoq peeraangamikku akeqqaminnit oqimaatsumik uniuserfeqartinneqartarput. (5 Mosesi 28:45, 48; Jeremia 28:14) Qanortoq uagutsinnut akeraanerpaamit, Saatanimit, ajugaaffigineqanngisaannarta taassumanngalu naalliunnartumik oqimaatsumillu uniuserfeqartinneqanngisaannarta. Guuterpulli asannittoq saqeqatigiuartigu.

 Jehova tamatigut neriuffigiuk

12. Guuti saqeqatigiuassagutsigu Hosea 12:7 naapertorlugu suna pisariaqarpa?

¹² Jehova saqeqatigiuassagutsigu taanna tamatigut neriuffigisariaqarparput. Israelikkut ima kajumissaarneqarput: ’Guutinnut saanniarit; isumassuineq innarluissullu [ilumoorfiginnilluni tunniusimaneq eqqortuliornerlu, NV] aalajangiukkit, Guutillu neriuffigiuarlugu.’ (Hosea 12:7, 1900/1961) Israelimi innuttaasut ilumoorfiginnillutik tunniusimanermikkut, eqqortuliornermikkut aamma ’Guutimik neriuffiginnittuarnermikkut’ allamik isumataarsimanertik Guutimullu saassimanertik ersersissinnaavaat. Qanorluunniit sivisutigisumik Guuti saqeqatigisimagaluarutsigu ilumoorfiginnilluta tunniusimanissarput, eqqortuliornissarput Guutimillu tamatigut neriuffiginninnissarput aalajangiusimasariaqarparput. — Tussiaat 27:14.

13, 14. Hosea 13:14-imi allassimasoq Paulusip sumut tunngatippaa, taamaammallu Jehovap neriuffiginissaanut sumik pissutissaqarpugut?

¹³ Hoseap Israelikkut pillugit siulittuutaani Guutimik neriuffiginninnissamut immikkut ittumik pissutissaqarpugut. Jehova ima oqarpoq: ’Uneriffimmit kingumut pissavakka; toqumit utertissavakka. Nungussutigissavarma, toqu-aa; perluutigissavarma, uneriffik-aa.’ (Hosea 13:14, 1900/1961) Jehovap taamanikkut Israelikkut toqumit annaakkumanngilai, kingusinnerusukkulli toqu piujunnaarsivillugu nungutikkumaarpaa ajugaaffigalugulu.

¹⁴ Uppeqatimi kristumiut tanitat ilaannut allakkamini Paulusip Hoseap siulittuutaa issuaaffigaa ima allalluni: „Aserujasorlu taanna aserujuitsumik atisereerpat toqujasorlu toqujuitsumik atisereerluni, taava oqaaseq una allassimasoq eqquukkumaarpoq: Toqu nungutitaavoq ajugaaffigineqarlunilu. Toqu, ajugaanerit naak? Toqu, iguutit naak? Toqup iguutaa tassa ajorti, ajortillu pissaaneqaataa tassa inatsisit. Guutili qujanarsili ajugaatikkamisigut Naalakkatsigut Jiisusi-Kristusikkut!“ (1 Korinthimiut 15:54-57) Jehovap Jiisusi toqusunit makitippaa, taamaalillunilu tuppallernartumik uppernarsarpaa Guutimit eqqaamaneqartut tamarmik toqusunit makitinneqassasut. (Johannesi 5:28, 29) Jehovamik neriuffiginninnissamut pissutissaq nuanningaarami! Makititaanissamik neriuutip saniatigut Guutimik saqeqateqarnissamut aamma allamik kajumississuteqarpugut.

Jehovap aqqutigeqqusai tamatigut innarluipput

15, 16. Samaria pillugu suna siulittuutigineqarpa, siulittuullu tamanna qanoq eqquuppa?

¹⁵ ’Jehovap aqqutigeqqusaasa innarluinnerannik’ qularutiginninnginnerput Guutimik saqeqateqartuarnissamut iluaqutigaarput. Samariami innuttaasut Guutip aqqutigeqqusaasigut ingerlanngillat. Taamaattumik taakkua unioqqutitsinermik Jehovamullu uppernikinnermik kingunipilui atortariaqarpaat. Siulittuut imaappoq: „Samaria pisuutitassanngorpoq Guutertik assortoramikku. Panamik toqorarneqassapput, meeraarartaat sequmisinneqassapput, naartusortaasalu naavi siinneqassapput.“ (Hosea 14:1) Oqaluttuarisaanikkut uppernarsaatini paasinarsivoq Assyriamiut, Samariamik tiguaasut, taamatut amiilaarnartunik naakkittaatsuliorsinnaasarsimasut.

¹⁶ Samaria tassaavoq naggueqatigiissortat quliusut naalagaaffiata Israelip illoqarfiisa pingaarnersaat. Allassimaffimmili tamatumani ateq Samaria kunngip naalagaaffianut tamanut atorneqarunarpoq. (1 Kunngit 21:1) Ukiumi 742-mi u.n.s. Assyriap kunngiata Salmaneserip V-ta illoqarfik Samaria unguaa. Samaria naggataatigut ukiumi 740-mi u.n.s. ajugaaffigineqarmat illoqarfimmi  nuimasortaasorpassuit Mesopotamiamut Mediamullu aallarunneqarput. Ilisimaneqanngilaq Samaria Salmaneserimit V-nit imaluunniit taassuma kingoraartaanit, Sargonimit II-nit, tigusarineqarnersoq. (2 Kunngit 17:1-6, 22, 23; 18:9-12) Sargonilli nalunaarsugaani eqqartorneqarpoq Israelikkut 27.290-it sumiiffinnut kuussuup Eufratip qutsinnersaata eqqaaniittunut Mediamiittunullu aallarunneqartut.

17. Guutip najoqqutassiaanik narruginninnata qanoq iliortariaqarpugut?

¹⁷ Samariami innuttaasut Guutip aqqutigeqqusaasigut ingerlannginnermik kingunipilui alianartut atortariaqarpaat. Uaguttaaq kristumiutut tunniulluinnarsimasutut kingunipiluit alianartut atussagaluarpavut ajortuliortaleraluarutta Guutillu najoqqutassiai naapertuilluartut narrugileraluarutsigik. Qanortoq aqqut ajortoq taamaattoq uagut atuallanngisaannartigu! Apustililli Petrusip siunnersuutaa una malitsigu: „Arlarsi kinaluunniit toqutsisutut, tillittutut, pinerluttutulluunniit susassarinngisaminulluunniit akuliuttutut naalliunngikkili, arlarsili kristumiuunini pissutigalugu naalliussaguni tamanna kanngusuutigissanngilaa, kristumiumilli taaguuteqarnermigut Guuti naalannartissavaa.“ — 1 Petrusi 4:15, 16.

18. Qanoq ililluta ’Guuti naalannartittuarsinnaavarput’?

¹⁸ ’Guuti naalannartittuarparput’ nammineq piumasarput malillugu ingerlanata taassumali aqqutigeqqusaasigut ingerlanitsigut. Kaini toqutsivoq nammineq piumasani malillugu iliorami aamma Jehovap ajortimit ajugaaffigineqaqqajaanerminik mianersoqqussutaa sumiginnaramiuk. (1 Mosesi 4:1-8) Bileami Moabip kunngianit akilerneqarpoq, Israelikkunnilli perloqqusiniarnerigalua iluatsinngilaq. (4 Mosesi 24:10) Aamma Guutip Kora Levikkuusoq allallu toquppai Mosesip Aronillu oqartussaassuseqartitaanerannut pikitsitsimmata. (4 Mosesi 16:1-3, 31-33) Uagut „Kainip aqqutaa“ atuallakkusunnavianngilarput, „Bileamip tammarneranut“ nassataritikkusunnavianngilagut, aamma ’Koratut naalasseriissutsikkut’ nungutitaarusunnavianngilagut. (Judasi 11) Aqqummilli eqqortumit nigussagaluarutta Hoseap siulittuutaani tuppallersaatissaqarpoq.

Ajortuliortut Jehovamut utersinnaapput

19, 20. Israelikkut allamik isumataartut qanoq ittunik pilliuteqarsinnaappat?

¹⁹ Allaat sualuttumik ajortuliorsimanertik pissutigalugu naakkiussimasut Jehovamut utersinnaapput. Hosea 14:2, 3-mi ima ilungersortumik kajumissaaruteqarpoq: „Saanniarit, Israeli, [Jehovamut] Guutinnut, ajortuliatimmi naakkiussutigisimavatit. Oqaatsinik nassataqarlusi [Jehovamut] uterniaritsi oqarfigalugulu: ’Ajortulianik tamanik isumakkiisartutit tunissutiginiakkavut ilassikkit; qarlutta inerititaannik tunissagatsigit.’“

²⁰ Israelikkut peqqissimisut Guuti ’qarlumik inerititaannik’ pilliivigisinnaavaat. Tassa ilumoorluni pilliutit qujaniutaasut. Paulusip siulittuut taanna pivaa kristumiut kajumissaaramigit ’Guuti pilliivigiuaqqullugu qujaniutinik, tassa qarlut aqqanik nassuerutiginnittut inerititaannik’. (Hebræerit 13:15) Ullumikkut Guutimik saqeqateqarneq taamaattunillu pilliuteqarneq immikkut pisinnaatitaaffiuvoq angisooq!

21, 22. Israelikkut allamik isumataartut suna misigiumaarpaat?

²¹ Israelikkut oqaatseriitsuunerup aqqutaatigut ingerlajunnaartut Guutimullu utertut taanna ’qarlumik inerititaannik’ pilliivigisarpaat. Tamatuma kingunerisaanik anersaakkut ingerlalluaqqilerput Guutip neriorsuisimaneratorluinnaq. Hosea 14:5-8-mi ima allassimavoq: „[Uanga Jehova] innuttakka tunussisimasut katsorsassavakka nuannaarlungalu asassallugit uummatinnit pisumik. Kamaakkunnaassavakka. Kanernertut issaanga Israelimut, liljatut sikkilerumaartutut, sorlanittussatullu Libanonip orpiisut. Avalequtai siaassapput, olivenequtitut takorannersissaaq;  tipigissaaq Libanonip orpiisut. Alanngortaani najugaqartut kingumut karrinik naatitsissapput. Sikkissapput viinnequtitut, tusaamasaassallutik viinnisut Libanonimit pisutut.“

²² Israelikkut allamik isumataartut anersaakkut ajorunnaarsinneqarumaarput Guutillu asanninnera nuannaarutigeqqissinnaalerlugu. Jehova taakkuninnga pilluaqqusingaarnermigut taakkununnga kanernertut inuummarissinartutut ikkumaarpoq. Taassumunnga innuttanngoqqittut ’olivenequtitut takorannersiumaarput’, Guutillu aqqutigeqqusaasigut ingerlajumaarput. Uaguttaaq Jehova Guutimik saqeqateqarnissarput aalajangiusimavarput, taamaammat sumik piumaffigineqarpugut?

Jehovap aqqutigeqqusaasigut ingerlajuarit

23, 24. Hoseap allagai siulittuummik qiimmassaataasumik qanoq naggaserneqarpat, taannalu qanoq killinneqaatigaarput?

²³ Guuti saqeqatigiuassagutsigu ’ilisimassutsimit pavannga pisumit’ siulersortittariaqarpugut tamatigullu Guutip aqqutigeqqusaasigut ingerlasariaqarluta. (Jaaku 3:17, 18) Hoseap siulittuutaani versi kingulleq imaappoq: „Kina ima ilisimasaqartigaa tamanna paasisinnaassallugu, imalu silassoritsigaluni tamanna ilisarissallugu? [Jehovap] aqqutigeqqusai innarluipput, iluartut taakkunuuna ingerlasarput; ajortuliortulli naakkiutissapput.“ — Hosea 14:10.

²⁴ Silarsuup matuma ilisimassusianit najoqqutassiaanillu siulersortinnata Guutip ’aqqutigeqqusaasigut innarluitsutigut’ ingerlanissarput aalajangiusimatigu. (5 Mosesi 32:4) Hosea ukiuni 59-ini amerlanerusuniluunniit taamaaliorpoq. Aalajaalluni tusarliussanik Guutimeersunik tusarliisarpoq qularutiginagu ilisimasut silassorissullu tusarliussat paasiumaaraat. Uagummi? Jehovamit nalunaajaatinneqartuartilluta silatusaarlutik taassuma ajunngissusianik pisassarinngisaraluamik ilassinnikkumasut ujartuassavavut. Nuannaarutigaarpullu taamaaliorsinnaagatta „kiffaq ilumoortoq silatoorlu“ qanimut suleqatigalugu. — Matthæusi 24:45-47.

25. Hoseap siulittuutaanik misissuinerput tamanna qanoq iluaqutigissavarput?

²⁵ Hoseap siulittuutaanik misissuinerput iluaqutigissavarput Guutip silarsuassaani nutaami naassaanngitsumik inuunissamik neriuuteqarluta Guutip tamatigut saqeqatiginissaanut. (2 Petrusi 3:13; Judasi 20, 21) Neriuut nuanningaarami! Neriuullu tamanna uagutsinnut inuttut ataasiakkaatut piviusunngussaaq oqaatsitsigut iliuutsitsigullu ersersittuartarutsigu ilumooruttarlutigu ima oqaraangatta: „[Jehovap] aqqutigeqqusai innarluipput.“ (wE 11/15 05)

Qanoq akissavit?

• Minguitsumik pallorfigigutsinni Guutip qanoq pissavaatigut?

• Sooq Jehova tamatigut neriuffigissavarput?

• Sooq qularutiginngiliuk Jehovap aqqutigeqqusai innarluitsuusut?

• Qanoq ililluta Jehovap aqqutigeqqusaasigut ingerlajuarsinnaavugut?

[Atuaqqissaarnermi apeqqutit]

[Qupp. 29-mi assiliartaq]

Ilagiinni utoqqaanertat anersaakkut ikiuinerat ilassisaruk

[Qupp. 30-mi assiliartaq]

Hoseap siulittuutaa Jehovap toqusunik makititsinissamik neriorsuutaanik tatiginnilissutigaarput

[Qupp. 32-mi assiliartaq]

Naassaanngitsumik inuunissaq neriuutigalugu Guuti tamatigut saqeqatigisigu