Illit Guuti qanoq tatigitigaajuk?
Illit Guuti qanoq tatigitigaajuk?
’Taamaattumik naalagaaffik ujaqqaartuarsiuk.’ — MATTHÆUSI 6:33, NV.
1, 2. Angut inuusuttoq qanoq iliuuseqarpa aamma sooq?
ANGUT inuusuttoq ilagiinni najukkaminiittumi ikiuutaanerorusuppoq, suliffinili pissutigalugu ataatsimiinnerit tamaasa peqataaffigisinnaanngilai. Ajornartorsiut tamanna qanoq aaqqippaa? Inuunerminik pisariillisaavoq, suliffimminit soraarpoq kingornalu kristumiutut kiffartornerminut akornutaanngitsumik suliffissarsilluni. Ullumikkut siornatigornit akissarsiakinneruvoq, ilaquttanili suli pilersorpai ilagiinnillu tapersersuinissamut periarfissaqarnerungaarluni.
2 Paasiviuk sooq angut inuusuttoq taamatut iliuuseqarnersoq? Illit taassumatut atugaqarsimasuuguit taamatupajaaq iliorsimassagaluarpit? Kristumiorpassuit taama iliorsimapput, tamannalu nersortariaavoq. Iliuutsimikkut ersersippaat Jiisusip neriorsuutaa una upperalugu: „Taamaattumik naalagaaffik naapertuilluassuserlu taassuma pia ujaqqaartuarsigik, taava tamakku tamaasa ilanngullugit ilissinnut tunniunneqarumaarput.“ (Matthæusi 6:33, NV) Jehova tatigaat taassumanilu toqqissisimaffissarsiorlutik, silarsuarmiunngitsoq. — Ussatit 3:23, 26.
3. Sooq inuit ilaasa immaqa eqqarsaatigisarpaat ullutsinni Guutip naalagaaffiata ujaqqaarnissaa piviusorsiornerunersoq?
3 Ulluni ajornartorsiorfiusuni inuugatta inuit ilaasa immaqa eqqarsaatigaat angutip inuusuttup taamatut aalajangernera silatusaarnerunersoq. Ullumikkummi inuit ilaat piitsuungaarlutik inuupput, allat oqaluttuarisaanermi aatsaat taama pigissaartigalutik inuusut. Nunani piitsoqarfiusuni inuit amerlanerpaat inuunertik oqinnerulersinniarlugu qanorluunniit iliorusussapput. Nunanili pigissaarfiusuni inuppassuit misigipput ilorrisimaarnartumik inuuniarneq erloqinartuusoq aningaasarsiornikkut nalorninartorsiortoqarmat, suliffeqarfiit toqqissisimananngimmata sulisitsisullu piumasaqarnerugaluttuinnarmata. Imminut pilersorniarnerup erloqinartuunera inuit ilaasa immaqa ima eqqarsalissutigaat: ’Naalagaaffiup ujaqqaarnissaa suli piviusorsiornerua?’ Apeqqummut tamatumunnga akissut paasiniarlugu Jiisusip kikkut taama oqarfiginerai misissussavarput.
’Isumakuloqinasi’
4, 5. Guutip kiffaasa ullormut pisariaqartitat ingasattumik isumakuluutiginissaannut pissutissaqannginnerat ersersinniarlugu Jiisusip suut assersuutigai?
4 Jiisusi Galilæamiippoq tassanilu inuppassuit sumiiffinnit assigiinngitsorpassuarneersut oqaluffigalugit. (Matthæusi 4:25) Taassumunnga tusarnaartut ilaat ikittunnguit pisuujupput pisoortaqanngilluinnarlutilluunniit. Amerlanerpaartaat piitsuugunarput. Taamaattoq Jiisusip kajumissaarpai nunap piisigut pisuussutinik katersineq pingaarneruteqqunagu, erlinnarnerungaartunilli — anersaakkut nalilinnik — katerseqqullugit. (Matthæusi 6:19-21, 24) Ima oqarpoq: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi. Inuuneq nerisassaqarnermit pingaarnerunnginnerpa timilu atisassaqarnermit?“ — Matthæusi 6:25.
5 Jiisusip taamatut oqarnera taassumunnga tusarnaartut ilarpassuisa immaqa piviusorsiorpalunngippallaarsoraat. Nalunngilaat suleruluunngikkunik ilaquttatik annikilliulissasut. Jiisusilli timmissat pillugit eqqaasippai. Taakkua qimatulineq ajorput, Jehovalli isumagisarpai. Jiisusip aamma uparuarpaa Jehovap nunami naasut, alutornassutsiminni Salomop alutornangaarsusianik akimuisut, qanoq isumagisarai. Jehovap timmissat naasullu isumagisarunigit, taava uagut isumaginerungaassavaatigut, ilaa? (Matthæusi 6:26-30) Jiisusip oqarneratut, inuuneq timilu nerisassanit inuuniarluta pisiarisartakkatsinnit aamma atisanit atisaqarniassagatta pisaarisartakkatsinnit pingaaruteqarnerungaarput. Jehovamut kiffartornissamut piffissaqarpiarunnaarluta nerisassaqarniarnermut atisassaqarniarnermullu nukivut tamaasa atortarutsigit, inuunerup siunertaa uniorlugu inuusimassaagut. — Oqaluussisartup oqaasii 12:13.
Oqimaaqatigiissumik isiginnittaaseqarneq
6. (a) Kristumiut suna akisussaaffigaat? (b) Kristumiut kina sutigut tamatigut tatigaat?
6 Jiisusi soorunami isumaqanngilaq tusarnaartuni suliunnaassasut aamma Guutip ilaquttaminnik isumaginninnissaa utaqqiinnassagaat. Timmissammi allaat namminneq piaqqamillu nerisassaannik namminneq nerisassarsiortariaqarput. Jiisusip tusarnaartui aamma nerisassaqassagunik sulisariaqarput, aamma ilaquttatik akisussaaffigaat. Kiffat inussiallu kristumiut naalakkatik eqiasuillutik sullittariaqarpaat. (2 Thessalonikamiut 3:10-12; 1 Timotheusi 5:8; 1 Petrusi 2:18) Apustili Paulusi imminut pilersorniarluni tupiliortutut suligajuppoq. (Apustilit Suliaat 18:1-4; 1 Thessalonikamiut 2:9) Kristumiulli taakkua suliffitsik toqqissisimaffissarsiorfissamittut isiginngilaat. Jehova tatigaat. Taamaammat allat misigisimanngisaannik qamuuna eqqissisimapput. Tussiaasiortoq ima allappoq: „[Jehovamik] tatiginnittut assigaat qaqqaq Zioni, patajalersussaanngitsoq, naassaanngitsumilli aalajaatsoq.“ — Tussiaat 125:1.
7. Jehovamik tatiginnilluinnanngitsut immaqa qanoq toqqissisimaffissarsiortarpat?
7 Jehovamik tatiginnilluinnanngitsut immaqa allatut eqqarsartarput. Inuit amerlanersaasa pigissaarneq toqqissisimalluni inuunermut ’matuersaatitut’ isigaat. Taamaammat angajoqqaat meeqqatik siunnersorsimavaat inuusunnermik ilarujussua qaffasinnerusumik ilinniagaqarnermut atussagaat, kingusinnerusukkut akissaatigissumik suliffeqalernissaat neriuutigalugu. Ajoraluartumik aalajangerneq tamanna ilaqutariit kristumiut ilaannut annaasaqataangaarsimavoq, meeqqat upperunnaarsimallutillu pigisatigut anguniagaqalersimammata.
8. Kristumiut qanoq oqimaaqatigiissumik isiginnittaaseqartuarpat?
8 Taamaattumik kristumiut silatuut Jiisusip siunnersuutaata ullumikkut ukiuni hundredelinni siullernisulli atorsinnaatiginera paasivaat, oqimaaqatigiissumillu isiginnittaaseqarniartuarput. Biibili naapertorlugu akisussaaffimminnik isumaginninniarlutik immaqa nalunaaquttap-akunnerpassui sulisariaqartarput, aningaasarsiornissamilli pisariaqartitsinertik anersaamut tunngasunit, pingaaruteqarnerungaartunit, pingaarnerutilinngisaannarpaat. — Oqaluussisartup oqaasii 7:12.
„Isumakuluuteqassanngilasi“
9. Jehovamik tatiginnilluinnartut Jiisusip qanoq neriorsoqqissaarpai?
9 Jiisusip qaqqami oqaluutsimini tusarnaartuni ima kajumissaarpai: „Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.“ (Matthæusi 6:31, 32) Oqaatsit qiimmaallannangaaramik! Jehova tatigilluinnarutsigu isumagiuassavaatigut. Jiisusilli oqaasii aamma eqqarsalersitsipput. Eqqaasippaatigut pigisat noqqaassutigivallaarutsigit ’Guutimik nalusutut’, inuit kristumiuunngitsut ilumoortut eqqarsartarnerattut, eqqarsarsimassasugut.
10. Angut inuusuttoq Jiisusimut siunnersoqqummat, Jiisusip qanoq ililluni qulaarpaa taassuma suut asanerunerai?
10 Ilaanni angutip inuusuttup pisoorsuup Jiisusi aperaa naassaanngitsumik inuusinnaalerumalluni qanoq iliussanerluni. Jiisusip Mosesip inatsisaani piumasaqaatinik, taamanikkut suli atuuttunik, eqqaasippaa. Angutip inuusuttup Jiisusi ilumoorluni ima oqarfigaa: „Tamakku tamaasa maleruareerpakka. Taavami suna amigaatigaara?“ Jiisusip akissutaa inuit ilarpassuisa immaqa piviusorsiorpalunngissoraat. Ima oqarpoq: „Iluarluinnarumaguit pigisatit tamaasa akigiartukkit piitsunullu tunniullugit, taava qilanni pisuussuteqalerumaarputit; qaallutillu malinnga.“ (Matthæusi 19:16-21) Angut inuusuttoq aliasulluni qimaguppoq, pisuussutimimi annaanissaat eqqarsaatigisinnaanngilaaluunniit. Jehova qanorluunniit asatigigaluaruniuk pigisani suli asaneruai.
11, 12. (a) Pisuujunermut tunngatillugu Jiisusip oqaatsit eqqarsalersitsisut suut oqaatigai? (b) Pigisat Jehovamut kiffartornissamut qanoq akornutaalersinnaappat?
11 Angut inuusuttoq taanna oqaloqatigereerlugu Jiisusi tupaallannartumik ima oqarpoq: „Pisuumut Qilaap naalagaaffianut isernissaq ajornakusooqaaq. . . . Qatigattuumut meqqutip isaatigut putoqqunnissaq pisuup Guutip naalagaaffianut isernissaanit ajornannginneruvoq.“ (Matthæusi 19:23, 24) Jiisusip pisuut Guutip naalagaaffianut isersinnaannginnerat pivaa? Naamik, nangillunimi ima oqarpoq: „Guutimut ajornartoqanngilaq.“ (Matthæusi 19:25, 26) Jehovap ikiuineratigut taamanikkut inuit pisuut kristumiunngorsimapput tanitat. (1 Timotheusi 6:17) Jiisusilli oqaatsit tupaallannartut taakku pissutissaqarluarluni oqaatigai. Mianersoqqusivoq.
12 Inuk angutip inuusuttup pisuup pisimaneratut pigisalerituallaaleruni, pigisat uummatikkut iluunngarluni Jehovamut kiffartornissamut akornutaalersinnaapput. Tamanna pisuujoreersunut ’pisuunngorumasunullu’ atuuppoq. (1 Timotheusi 6:9, 10) Inuk pigisanik pingaartitsivallaaruni anersaakkut pisariaqartitaminik eqqumaffiginnippiarunnaarsinnaavoq. (Matthæusi 5:3) Tamatuma kingunerisaanik misigilersinnaavoq Jehovamit ikiorneqarnissamik annertoqqusersorneqarnissamillu siornatigutut pisariaqartitsitiginani. (5 Mosesi 6:10-12) Immaqa ilagiinniittunit immikkut pineqarnissani naatsorsuutigilerpaa. (Jaaku 2:1-4) Aamma immaqa piffissami annersaa Jehovamut kiffartornermut atornagu, pisuussutiminik nuannaarutiginninnermut atorpaa.
Isiginnittaaseq eqqortoq ineriartortiguk
13. Laodikeami kristumiut qanoq kukkusumik isiginnittaaseqarpat?
13 Ukiuni hundredelinni siullerni Laodikeami ilagiit pigisanut kukkusumik isiginnittaaseqarput. Jiisusip taakkua ima oqarfigai: „Ima oqarputit: Pisuujuvunga, pigisarpassuaqarpunga amigaateqarnangalu; illillu nalugakku tassaallutit inukuluk, nallinnartoq, piitsoq, tappiitsoq tamaqanngitsorlu.“ Laodikeamiut pisuussutaat taakkua anersaakkut qanoq issusiannut nallinnartumut pissutaanngillat. Pisuussutinukua Jehovamit tatiginerugaat. Taamaammat anersaakkut nilleratillu kissanngillat Jiisusillu ’qarnanit oriarneqarumaarlutik’. — Saqqummersitat 3:14-17.
14. Sooq tulluarpa hebræerit kristumiut Paulusimit nersualaarneqarnerat?
14 Tamatuma paarlattuanik Paulusip hebræerit kristumiut malersorneqarnerminni isiginnittaasiat pillugu nersualaarpai. Ima oqarpoq: „Parnaarussaasut naallioqatigisarpasi, pigisassinnillu arsaarneqaraangassi nuannaarlusi tamanna naammagiinnartarparsi nalunnginnassiuk ajunnginnerusumik aserortussaanngitsumillu pisuussuteqarlusi.“ (Hebræerit 10:34) Kristumiut taakkua pigisaminnik annaasaqarnertik isumatsassutiginngilaat. Pigisamik naleqarnerpaartaat, Paulusip „ajunnginnerusumik aserortussaanngitsumillu“ taasaa, suli pigigamikku nuannaarput. Jiisusip assersuusiaani niuertoq sapangaq naleqangaartoq ataaseq pillugu pigisaminik tamanik pilliutiginnittoq assigalugu, qanorluunniit pilliuteqartigissagaluarunik Guutip naalagaaffianik neriuuteqartuarnissartik aalajangiusimalluinnarpaat. (Matthæusi 13:45, 46) Isiginnittaaseq ajunngingaarami!
15. Liberiami arnap kristumiup qanoq ersersippaa Guutip naalagaaffiata soqutigisai salliullugit?
15 Ullumikkut inuppassuit taamatut isiginnittaaseqarneq ineriartortissimavaat. Assersuutigalugu Liberiami arnaq inuusuttoq kristumiu universitetimi ilinniarnissaminik neqeroorfigineqarpoq. Nunami tamatumani universitetimi ilinniarnissamik neqeroorfigineqarneq siunissamut toqqissisimanartumut ’matuersaatitut’ isigineqartarpoq. Arnarli inuusuttoq taanna pioneriuvoq, imaluunniit piffissaq tamaat oqaluussisartuuvoq, piffissamilu aalajangersimasumi specialpioneritut kiffartornissamut toqqarneqarsimalluni. Guutip naalagaaffia ujaqqaarniarlugu piffissarlu tamaat kiffartuinnarniarluni aalajangerpoq. Oqaluussiffigisartakkaminut aallarpoq qaammatillu pingasut ingerlanerini inuit 21-t Biibilimik atuaqqissaaqatigisalerlugit. Qatanngutip arnap inuusuttup taassuma allallu tusindillit Guutip naalagaaffia ujaqqaarpaat pigisatigut iluaqutigisinnaasaminnik annaasaqaraluarlutik. Silarsuarmi pigisanik pingaartitsiffiusumi matumani qanoq ilillutik taamatut isiginnittaaseqartuarsinnaagamik? Pissuserineqartussat ajunngitsut arlallit ineriartortissimavaat. Taakkua ilaat misissoriartigik.
16, 17. (a) Jehovamik tatiginnissinnaassagaanni sooq anneruniajuitsuunissaq pingaaruteqarpa? (b) Sooq Guutip neriorsuutaanik upperinninneq ineriartortittariaqarparput?
16 Anneruniajuissuseq. Biibilimi ima allassimasoqarpoq: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai. Ilisimasutut imminut isigeqinak!“ (Ussatit 3:5-7) Ilaannikkut periaaseq aalajangersimasoq silamiut isiginnittaasiannit isigalugu torrappasissinnaavoq. (Jeremia 17:9) Kristumiulli eqqortuliorusuttut Jehovamit siulersorneqarumassapput. (Tussiaat 48:15) ’Sumiikkaluaraangamilluunniit’ — ilagiinnut tunngasunik suliaqarnerminni ilinniagaqarnerminniluunniit, sulinerminni sukisaarsarnerminniluunniit allanilluunniit suliaqarnerminni — anneruniajuillutik Jehovamit siunnersorneqarumassapput. — Tussiaat 73:24.
17 Jehovap neriorsuutaanik upperinninneq. Paulusi ima oqarpoq: „Guutimut pisup upperisariaqarpaa taanna tassaareersoq ujarlersinilu akissarsisissagai.“ (Hebræerit 11:6) Jehovap neriorsuutiminik piviusunngortitsiumaarnera qularigutsigu ’silarsuarmik matuminnga tamakkiisumik atuinissaq’ tunngavissaqarluarsorisinnaavarput. (1 Korinthimiut 7:31, NV) Upperluartuuguttali Guutip naalagaaffiata ujaqqaarnissaa aalajangiusimassavarput. Upperluarneq qanoq ineriartortinneqarsinnaagami? Ineriartortinneqarsinnaavoq qasusuilluni qamanngalu pisumik qinusarnikkut aalajangersimasumillu nammineerluni atuaqqissaartarnikkut Jehovamut qanittumik attaveqarnermik ineriartortitsilluni. (Tussiaat 1:1-3; Filippimiut 4:6, 7; Jaaku 4:8) Kunngi Daavitut ima qinusinnaavugut: „Tatigaakkit illit [Jehova], oqarpunga: Illit Guutigaakkit. Angingaarpoq ajunngissutsit.“ — Tussiaat 31:15, 20.
18, 19. (a) Eqiasuilluni iliuuseqarneq Jehovap neriorsuutaanik upperinninnitsinnut qanoq nakussatsissutaasinnaava? (b) Sooq kristumiu pilliuteqarnissamut piumassuseqartariaqarpa?
18 Jehovamut kiffartornermi aallussilluarneq. Paulusip Jehovap neriorsuutaanik upperinninneq eqiasuillunilu iliuuseqarneq imminnut atassuserpai ima allakkami: „Kissaatigisarput mannaavoq tamarluinnassi naggatissaq tikillugu pisarnissitut ilungersorlusi pissarsiariniassagissi pisuussut neriugisap imarisaa.“ (Hebræerit 6:11) Jehovamut kiffartorneq ulapputigigutsigu taassuma annertoqqusersussavaatigut. Taamatut annertoqqusersorneqarluta malugigaangatsigu taassuminnga tatiginninnerput nakussatsinneqartarpoq, ’aalajaalluinnalertarpugullu’. (1 Korinthimiut 15:58) Uppernerput nutaanngortarporlusooq neriuuterpullu uppernarsarneqartarluni. — Efesosimiut 3:16-19.
19 Pilliuteqarnissamut piumassuseqarneq. Paulusip Jiisusi malinniarlugu atorfimmi qaffakkiartornissaq pilliutigaa. Erseqqippoq taamatut aalajangerami eqqortuliortoq ilaannikkut pigisatigut pissakilliortaraluarluni. (1 Korinthimiut 4:11-13) Jehovap piisaarluni inuunissaq neriorsuutiginngilaa, ilaannikkullu taassuma kiffaasa annikilliuutit naammagalugit atortariaqartarpaat. Pilliuteqarnissamut inuunitsinnillu pisariillisaanissamut piumassuseqarnerput Jehovamut kiffartorniarluta aalajangerluinnarsimanitsinnut uppernarsaataavoq. — 1 Timotheusi 6:6-8.
20. Guutip naalagaaffiata soqutigisaanik salliutitsisut erinitsajuinnissaat sooq pingaaruteqarpa?
20 Erinitsajuissuseq. Ajoqersukkap Jaakup uppeqatini ima kajumissaarpai: „Qatanngutit, erinitsannaveersaarlusi Naalakkap tikiunnissaa utaqqisiuk.“ (Jaaku 5:7) Silarsuarmi ulapiffioqisumi maani erinitsajuinnissaq imaannaanngilaq. Suut tamarmik sukkanerpaamik pinissaat kissaatigaarput. Paulusilli kajumissaarpaatigut „uppernikkut nikallujuinnikkullu [erinitsajuinnikkullu, 1900/1961] Guutip neriorsuutigisaanik kingornussisussat“ ilaaqqullugit. (Hebræerit 6:12) Jehovap utaqqinissaanut piumassuseqarit. Nunarsuarmi paratiisiusumi naassaanngitsumik inuuneq — tamanna utaqqerusunnarpoq, ilaa?
21. (a) Guutip naalagaaffiata soqutigisai salliutikkaangatsigit suna ersersittarparput? (b) Allaaserisami tulliuttumi suna sammissavarput?
21 Aap, Guutip naalagaaffiata ujaqqaarnissaa pillugu Jiisusip kristumiunut siunnersuutaa piviusorsiorlunilu atoriaannaavoq. Siunnersuut tamanna malikkaangatsigu ersersittarparput Jehova tatigilluinnarlutigu, inooriaaserlu taanna kristumiutut piviusumik toqqissisimalersitsisinnaasutuaavoq. Jiisusilli aamma kajumissaarpaatigut ’naapertuilluassuseq Guutip pia ujaqqaartuaqqullugu’. Allaaserisami tulliuttumi kajumissaarut tamanna sooq pingaartumik ullumikkut pisariaqartinneqarnersoq sammissavarput.
Uteqqiinermi apeqqutit
• Jiisusip pigisanut tunngatillugu qanoq oqimaaqatigiissumik isiginnittaaseqaqqulluta kajumissaarpaatigut?
• Jiisusip qatigattuumik meqqutillu isaanik assersuusiaa qanoq ilinniarfigisinnaavarput?
• Kristumiutut pissuserineqartussat suut Guutip naalagaaffiata ujaqqaarnissaanut iluaqutigisinnaavavut?
[Atuaqqissaarnermi apeqqutit]
[Qupp. 13-mi assiliartaq]
Jiisusip tusarnaartuisa ilarpassui piitsuupput
[Qupp. 15-mi assiliartaq]
Angutip inuusuttup pisuup pigisani Guutimit asaneruai
[Qupp. 15-mi assiliartaq]
Jiisusip assersuusiaani niuertup sapangaq naleqangaartoq ataaseq pillugu pigisani tamaasa pilliutigai
[Qupp. 16-mi assiliartaq]
Jehovamut kiffartorneq ulapputigigutsigu taassuma annertoqqusersorlutalu ikiorumaarpaatigut