Qaamanermi qaammarissiartortumi saqivugut
Qaamanermi qaammarissiartortumi saqivugut
„Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.“ — USSATIT 4:18.
1, 2. Anersaakkut qaamaneq qaammarissiartortoq Jehovameersoq taassuma innuttaasa qanoq iluaqutigisimavaat?
JEHOVA Guutimit, qaamanermut pilerfiusumit, seqernup nuiartortup unnuap taarneranut sunniuteqarneranik pitsaanerusumik oqaatiginnittoqarsinnaanerpa? (Tussiaat 36:10) Guuti ima oqarpoq: ’Ullaassap aappilliunnerata nunarsuaq sinarsuisigut tigoriaraangagu nunap qalipaataa allanngortarpoq marrartut naqitsimmik naqinneqartutut, qalipaaserneqartarpoq atisassat misuttarlugit qalipanneqartarnerattut.’ (Jobi 38:12-14) Seqernup qaamanera qaammarissiartortillugu nunap ilusaa erseqqinnerujartortarpoq, soorluttaaq marraq aqitsoq naqitsimmik naqinneqaraangami allanngortartoq.
2 Jehova aamma anersaakkut qaamanermut pilerfiuvoq. (Tussiaat 43:3) Silarsuaq taggarissumiitillugu, Guutip ilumoortup innuttani qaammarsartuarpai. Qanoq kinguneqartumik? Biibilimi ima akineqarpoq: „Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.“ (Ussatit 4:18) Qaamanerup qaammarissiartortup Jehovameersup taassuma innuttaasa aqqusininnguat qaammarsartuarpaa. Tamanna iluaqutigalugu innuttai aaqqissuussaanikkut, ajoqersuutitigut ileqqussatigullu pitsanngoriartorsinnaapput.
Qaamaneq qaammarissiartortoq aaqqissuussaanikkut pitsanngoriarnernik kinguneqarpoq
3. Esaja 60:17 naapertorlugu Jehova qanoq neriorsuiva?
3 Pruffiiti Esaja aqqutigalugu Jehova ima siulittuivoq: „Taarteqartissavara kanngussak kuultimik, savimineq sølvimik, qisuk kanngussammik, ujarallu saviminermik.“ (Esaja 60:17) Soorlu atortussap pitsaannginnerusup pitsaanerusumik taarserneqarnera iluaqutaasartoq, piffissami ’pissutsit aaqqissuussaanerata naggatissaanik’ imaluunniit ’ullunik kingullernik’ taaneqartumi tamarmi Jehovap Nalunaajaasuisa akornanni aaqqissuussaanikkut pitsanngoriartoqarsimavoq. — Matthæusi 24:3, NV; 2 Timotheusi 3:1.
4. 1919-imi aaqqissuussineq suna atulerpa, qanorlu sunniuteqarpa?
4 Ullut kingulliit aallartilerneranni Jehovap Nalunaajaasui, taamanikkut Biibilimik Atuaqqissaartartunik taaneqartartut, ilagiiminni utoqqaanertanik kiffartortunillu demokratii tunngavigalugu qinersisarput. Utoqqaanertalli tamarmiunngitsoq ilumoortumik oqaluussisartutut anersaaqarput. Ilaat namminneq oqaluusseqataanaveersaaginnaratik, allanittaarli oqaluusseqataaqqusinngillat. Taava 1919-imi ilagiinni akisussaaffik nutaaq pilersinneqarpoq — sulinermut siulersuisutut akisussaaffik. Sulinermut siulersuisoq ilagiinnit qinerneqartanngilaq, immikkoortortaqarfimmilli Guutip siulersuineratigut toqqarneqartarluni. Taassuma ilaatigut oqaluussinissamik aaqqissuussinissaq, oqaluussiffigisartakkanik agguaassinissaq oqaluusseqataanissamullu kajumissaarinissaq akisussaaffigai. Ukiuni tulliuttuni oqaluussineq siuarsarneqangaarpoq.
5. 1920-kkunni suut pitsanngoriaataappat?
5 Ilagiinniittut tamarmik aamma 1922-mi Biibilimik Atuaqqissaartartut Cedar Pointimi, Ohiomi, USA-miittumi ataatsimeersuarneranni kajumissaarut una qiimmassaatigingaarpaat: „Kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik!“ 1927-mi oqaluussineq aaqqissuussaalluarnerusumik ingerlanneqalerpoq, sapaallu illumiit illumut oqaluussinissamut ullutut pitsaanerpaatut uparuarneqarpoq. Sooq ulloq taannarpiaq? Inuit amerlanersaat sapaammi sulineq ajormata. Ullumikkut Jehovap Nalunaajaasui aamma taama isiginnittaaseqarput inuit angerlarsimanissaasa ilimanarnerpaaffianni, assersuutigalugu weekendini unnukkullu, pulaarniartarlugit.
6. 1931-mi aalajangersagaq suna akuerineqarpa, tamannalu oqaluussinermut qanoq sunniuteqarpa?
6 1931-mi juulip ulluisa 26-anni sapaammi ualikkut oqaluussineq suli siuarsarneqarnerulerpoq, Columbusimi, Ohiomi, USA-miittumi ataatsimeersuarnermi, kingusinnerusukkullu silarsuup sinnerani, aalajangersagaq akuerineqarmat. Aalajangersagaq ilaatigut imaappoq: „Uagut Jehovamut nalunaajaasuuvugut suliassamik taassuma aqqani suliarineqartussamik suliassinneqartut, taassumalu peqqussutaa naalallugu Jiisusi Kristusip nalunaajaataa oqaluussissutigaarput inuiaqatigiillu ilisimatillugit Jehova tassaasoq Guuti ilumoortoq, Ajugaqanngitsoq. Taamaattumik taaguut Naalakkap oqaatigisimasaa nuannaarluta ilassivarput, taamatullu ilisimaneqarusullutalu taagorneqarusuppugut, tassa Jehovap Nalunaajaasui.“ (Esaja 43:10, NV) Taaguutigineqalersumi tamatumani erseqqippoq taamatut taaguutillit tamarmik suliassaat pingaarnerpaaq suunersoq! Aap, Jehovap kiffami tamarmik peqataaffigisariaqagaat suliassiissutigaa. Taakkua amerlanersaasa aalajangersagaq qiimmatsaatigingaarlugu ilassivaat.
7. 1932-mi allannguut suna atulersinneqarpa, aamma sooq?
7 Utoqqaanertat amerlasuut maniguullutik oqaluussineq aallutilerpaat, ilagiilli ilaanni utoqqaanertat qinikkat ilagiinniittut tamarmik tamanut oqaluusseqataasariaqarnerannik eqqarsaammik assortuingaarput. Pitsanngoriaatissalli suli allat takkuttussaapput. 1932-mi Napasuliaq Alapernaarsuiffik aqqutigalugu ilagiit paasitinneqarput utoqqaanertanik kiffartortunillu qinersisarneq taamaatinneqassasoq. Maannali ilagiit angutinik anersaakkut ittunik pingaartitsisunik tamanut oqaluussinermi peqataasartunik kiffartornermut ataatsimiititaliamiittussanik qinersisartussanngorput. Taamaalillutik nakkutilliisut tassaalerput angutit oqaluusseqataasut, oqaluussinerlu siumukarpoq.
Qaamaneq qaammarissiartortoq pissutigalugu suli allanik pitsanngoriaateqarpoq
8. 1938-mi pitsanngoriaat suna atuutilersinneqarpa?
8 Qaamaneq qaammarissiartuinnarpoq. 1938-mi demokratii tunngavigalugu qinersisoqassaavippoq. Maanna ilagiinni kiffartortut tamarmik ’kiffap ilumoortup silatuullu’ siulersuineratigut teokratii tunngavigalugu toqqarneqartartussaapput. (Matthæusi 24:45-47) Allannguut tamanna Jehovap Nalunaajaasuisa ilagiivisa tamangajammik kajumillutik akueraat, oqaluussinerlu inerititaqartuarpoq.
9. Aaqqissuussineq suna 1972-imi atuutilersinneqarpa, aamma sooq tamanna pitsanngoriaataava?
9 1972-imi oktobarip aallaqqaataaniilli ilagiit siulersorneqarnerat pillugu allannguut suli alla atulerpoq. Silarsuaq tamakkerlugu Jehovap Nalunaajaasuisa ilagiivini tamani utoqqaanertaqatigiinnik aaqqissuussineq pilersinneqarpoq, ilagiinni kiffartortumit imaluunniit nakkutilliisumit ataasiinnarmit ilagiinnik nakkutilliineq akisussaaffigineqarunnaarniassammat. Aaqqissuussineq nutaaq tamanna angutit inersimalluartut ilagiinni siulersuinissamut piukkunnarsarnissaminnut kajumississutigingaarpaat. (1 Timotheusi 3:1-7) Tamatuma kingunerisaanik qatanngutit angutit amerlanerungaartut ilagiinni akisussaaffeqarneq misilittagaqarfigilersimavaat. Paasinarsivoq taakku nutaarpassuarnut sallusuissummik ilassinnissimasunut paarsisutut iluaqutaangaartut!
10. 1976-imi aaqqissuussineq suna atulerpa?
10 Siulersuisoqatigiinnut ilaasortat ataatsimiititalianut arfinilinnut aaqqissuuneqarput, 1976-imilu januaarip aallaqqaataaniilli ataatsimiititaliat taakkua nunarsuaq tamakkerlugu peqatigiiffimmi ilagiinnilu suliassat tamaasa nakkutigisarilerpaat. Paasinarsivoq Guutip naalagaaffiata sulineranut tunngasut tamarmik ’siunnersuisunit amerlasuunit’ siulersorneqarnerat iluaqutaangaartoq! — Ussatit 15:22; 24:6.
11. 1992-imi suna pitsanngoriaataava, aamma sooq?
11 1992-imi suli allamik pitsanngoriaateqarpoq, tamannalu Israelikkut allallu Babylonimi aallarussaaqqanerminnit uternerata kingorna pisimasumut assersuunneqarsinnaavoq. Taamanikkut Levikkut naalaffimmi suliassanut ikippallaarput. Taamaattumik naalaffimmi kiffat, Netinimikkut, Israelikkuunngitsut Levikkunnut ikiortitut amerlanerusunik suliassinneqarput. Taamatuttaaq 1992-imi ’savat allat’ ilaat kiffartornermi amerlanerusunik immikkut pisinnaatitaaffeqalerput inussiaqatigiit aalajaallutillu silatuut nunarsuarmi soqutigisaminnik amerliartuinnartunik isumaginninneranni ikiortussaallugit. Taakku Siulersuisoqatigiit ataatsimiititaliaannut ikiortitut toqqarneqarput. — Johannesi 10:16.
12. Jehovap qanoq ililluni ’eqqissineq uagutsinnut naalaganngortissimavaa’?
12 Tamakku tamarmik sumik kinguneqarsimappat? Jehova ima oqarpoq: „Eqqissineq ilinnut naalaganngortissavara, iluarnerlu naalakkersortigissavat.“ (Esaja 60:17) Ullumikkut Jehovap kiffai eqqisseqatigiipput, naapertuilluarnermillu nuannarisaqarneq ’naalakkersortigilerpaat’ — tamanna Guutimut kiffartornerminnut kajumississutigalugu. Guutip naalagaaffianik oqaluussissutiginninnissamut ajoqersuganngortitsinissamullu aaqqissugaalluarput. — Matthæusi 24:14; 28:19, 20.
Jehova ajoqersuutit pillugit qaammarsaavoq
13. 1920-kkunni Jehovap innuttami aqqusininnguat qanoq qaammarissitippaa ajoqersuutit eqqarsaatigalugit?
13 Jehovap aamma ajoqersuutit eqqarsaatigalugit innuttami aqqusininnguat qaammarinnerulersikkiartuaarpaa. Saqqummersitat 12:1-9 assersuutigisinnaavarput. Versini taakkunani assersuutit pingasut eqqaaneqarput — „arnaq“ naartusoq ernisorlu, „uumasorujussuaq“ aamma ’erneq’. Nalunngiliuk taakku tamarmik immikkut kikkunnut assersuutaanersut? Nassuiarneqarpoq Vagttaarnet 1. maaji 1925-moortumi allaaserisami „Den nye Nations Fødsel“-imi („Inuiaqatigiit nutaat pinngornerat“-mi). Allaaserisaq taanna iluaqutigalugu Guutip innuttaasa taassuma naalagaaffiata pilersinneqarnera pillugu siulittuutit eqqornerusumik paasilerpaat, allaaserisami aamma ersersinneqarpoq peqatigiissortaqartoq marlunnik immikkoorluinnartunik — Jehovap peqatigiissortaanik aamma Saatanip peqatigiissortaanik. 1927-28-mi Guutip innuttaasa aamma paasilerpaat juullisiorneq inuuissiornerlu Biibilimut naapertuutinngitsut, aalajangerpullu juullisiussaarniarlutik inuuissiussaarniarlutillu.
14. 1930-kkunni ajoqersuutit suut qaammarsaatigineqarpat?
14 1930-kkunni ajoqersuutit pingasut qaammarsaatigineqarnerupput. Biibilimik Atuaqqissaartartut ukiorpassuarni nalunngereersimavaat ’amerlangaartut’ Saqqummersitat 7:9-17-imi eqqaaneqartut 144.000-init, Kristusi ilagalugu kunngitut palasitullu naalakkersuisuusussanit, allaanerusut. (Saqqummersitat 5:9, 10; 14:1-5) Paasilluanngilaalli amerlangaartut taakku kikkuussanersut. Soorlu ullaap qaammalernerani qaammarissiartortumi ilutsit qalipaatillu ersernerluttut erseqqarissiartortartut, taamatuttaaq 1935-mi qulaarneqarpoq amerlangaartut tassaassasut inuit „annikilliortitaangaarnermit“ aniguisussat nunarsuarmi naassaanngitsumik inuunissamik neriugisaqartut. Ukiumi tamatumani kingusinnerusukkut nunani arlalinni Jehovap Nalunaajaasuisa qitornaannut atuartunut attuumassuteqartumik eqqornerusumik paasinnittoqalerpoq. Nunarsuaq tamakkerlugu nunagisamik asanninneq sakkortoqisoq, Jehovap Nalunaajaasuisa paasilerpaat erfalasumik ilassinninnerup ileqqulersuutaannaannginnera. Aappaaguani ajoqersuut alla nassuiarneqarpoq, tassa Kristusi sanninngasulimmi pinnani qisummi nappakkami toqusoq. — Apustilit Suliaat 10:39.
15. Qanga qanorlu aap illernassusia erseqqissarneqarpa?
15 Sorsunnersuup aappaani sakkutuut ikiligaasimasut aalersortittarnerat nalinginnaalersimavoq, tamatumalu kingunitsianngua aap illernassusia qaammarsaatigineqarnerulerpoq. Vagttaarnet 15. februaari 1946-moortumi ’Jehovamik pallorfiginnittut taassumalu silarsuassaani naapertuilluarfiusumi naassaanngitsumik inoorusuttut tamarmik’ kajumissaarneqarput ’aap illernassusia ataqqeqqullugu tamatumunngalu, inuunermut pingaarutilimmut, tunngatillugu Guutip inatsisai naapertuilluartut maleruaqqullugit’.
16. Qanga Ny Verden-Oversættelsen tuluttut saqqummerpa, iluaqutissartaasalu ilaat marluk suut eqqaaneqarsinnaappat?
16 1946-mi paasinarsivoq Biibilimik nutsigaq nutaaq ilisimatuut misissuineri nutaanerpaat iluaqutigalugit suliarineqartoq ajoqersuutinillu kristumiuuneraqatigiit ileqqutoqaanneersunit sunnerneqanngitsoq pisariaqartinneqartoq. Nutsigaq taamaattoq 1947-mi decembarimi suliarineqalerpoq. 1950-imi Ny Verden-Oversættelsen af De Kristne Græske Skrifter tuluttut saqqummersinneqarpoq. Allakkat Hebræerisuut tuluttut atuakkani tallimani saqqummersinneqarput. Siulleq 1953-imi saqqummerpoq kingullerlu 1960-imi, nutserinerup aallartinneranit ukiut 12-it sinnilaarlugit kingorna. 1961-imi New World Translation of the Holy Scriptures tamakkeerluni atuakkatut ataasiinnartut saqqummerpoq. Nutsigaq taanna maanna oqaatsini amerlasuuni pineqarsinnaavoq, aamma iluaqutissartaqaqaaq. Assersuutigalugu Guutip aqqa, Jehova, atorneqaqqilerpoq, aamma allassimaqqaarfiit nutserneqarnerat eqqorluartoq taanna tunngavigalugu sallusuissut Guutimeersoq paasineqarnerujartuinnarpoq.
17. 1962-imi suna qaammarsaatigineqarpa?
17 1962-imi qaammarsaatigineqarpoq ’oqartussaasut qulliunerusut’ Romamiunut allakkat 13:1-imi (NV) eqqaaneqartut kikkuunersut kristumiullu taakkununnga qanoq naalatsigitittariaqartiginersut. Romamiunut allakkani kapitali 13 allassimaffiillu allat soorlu Titusimut allakkat 3:1, 2 aamma Petrusip allagai siulliit 2:13, 17 misissoqqissaarneqarnerata kingorna paasinarsivoq oqariartaatsimi ’oqartussaasut qulliunerusut’-mi Jehova Guuti aamma Jiisusi Kristusi pineqanngitsut, silarsuarmili oqartussaasut nunamiusut pineqartut.
18. 1980-ikkunni ilumoortut suut paasineqarnerulerpat?
18 Ukiuni tulliuttuni iluartut aqqusininnguat qaammarinneruleriartuinnarpoq. ’Inuusussatut’ naapertuilluartuutitaanerup aamma Guutip ikinngutaatut naapertuilluartuutitaanerup qanoq isumaqarnerat 1985-imi qaammarsaatigineqarpoq. (Romamiut 5:18, NV; Jaaku 2:23) Ukiup kristumiut tipaatsungaarfiata qanoq isumaqarnera 1987-imi peqqissaartumik nassuiarneqarpoq.
19. Ukiuni kingulliunerusuni Jehovap qanoq innuttani anersaakkut annerusumik qaammarsarsimavai?
19 Savat savaasanit avissaartinneqarnissaat 1995-imi eqqornerusumik paasineqalerpoq. Ezekielip naalaffissamik takorruuinera, ullutsinni eqquutilereersoq, 1998-imi sukumiisumik nassuiarneqarpoq. 1999-imi erseqqissarneqarpoq qaqugu qanorlu ’maajunnartoq aseruisoq inimi illernartumiissasoq’. (Matthæusi 24:15, 16; 25:32) Kiisalu 2002-mi Guutimik ’anersaakkut ilumoornikkullu’ pallorfiginninneq qanoq paasisariaqarnersoq paasineqarnerulerpoq. — Johannesi 4:24.
20. Aamma sumut tunngatillugu Guutip innuttaasa pitsanngoriartoqarnera misigaat?
20 Aaqqissuussaanikkut ajoqersuutitigullu pitsanngoriaatit saniatigut aamma kristumiutut ileqqulersornitsinnut atatillugu pitsanngoriaateqarsimavoq. Assersuutigalugu 1973-imi paasineqalerpoq tupatorneq ’timimut mingunnartuusoq’ unioqqutitsinertullu sualuttutut isigineqartussaasoq. (2 Korinthimiut 7:1) Ukiut qulit tamatuma kingorna, Vagttårnet 15. oktobari 1983-imoortumi, aallaammik atuinermut isiginnittaaserput erseqqissarneqarpoq. Tamakku tassaapput ullutsinni qaamarngup qaammarissiartorsimaneranut assersuutit ilaannaat.
Qaamanermi qaammarissiartortumi saqiuarit
21. Isiginnittaaseq suna iluaqutigalugu qaamanermi qaammarissiartortumi saqiuarsinnaavugut?
21 „Paasinninnermut iluarsiissummik akuerinninnissaq tamatumunngalu naleqqussarnissaq sapernarsinnaavoq,“ qatanngut angut ukiorpassuarni utoqqaanertatut kiffartortoq nassuerpoq. Ukiuni 48-ni Guutip naalagaaffianik oqaluussissutiginnittuunermini pitsanngoriaatit amerlasuut takusimasani suna iluaqutigalugu akuerisarsinnaasimavai? Ima akivoq: „Eqqortumik isiginnittaaseqarneq isertugaataavoq. Paasinninneq nutaaq akueriumanngikkaanni, katataasoqassaaq peqatigiiffik siumukartoq. Allannguummik akueriuminaatsitsigaangama, Petrusip Jiisusimut oqaasii eqqarsaatigisarpakka: ’Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.’ Taava imminut ima aperisarpunga: ’Sumukassagama? Silarsuup taarneranut?’ Tamanna iluaqutigalugu Jehovap peqatigiissortai aalajangiulluinnartarpakka.“ — Johannesi 6:68.
22. Qaamanermi saqineq qanoq iluaqutigaarput?
22 Silarsuaq avatangiiserisarput taggarissumiippoq. Jehova innuttaminik qaammarsaajuartillugu, innuttai silarsuullu matuma inui imminnut ungasilliartuinnarput. Qaamaneq tamanna uagutsinnut qanoq iluaqutaava? Soorlu aqqusinermi taartumi itersaq seqersittaammik seqersitsinikkut peerneqarsinnaanngitsoq, taamatuttaaq qaamarngup Guutip oqaasianeersup aqqutigisatsinni nakkarfissat peersinnaanngilai. Qaamanerli iluaqutigalugu nakkarfissat avaqqussinnaavavut, aqqusininnguami qaammarinnerujartuinnartumi saqiuarsinnaaniassagatta. Taamaattumik Jehovap oqaasia siulittuutaasoq eqqumaffigiuartigu „qullertut taartumi qaamasutut“. — 2 Petrusi 1:19. (wE 2/15 06)
Eqqaamavigit?
• Jehova aaqqissuussaanikkut sunik pitsanngoriaateqartitsiva?
• Qaamaneq qaammarissiartortoq ajoqersuutinut iluarsiissutinik sunik kinguneqarpa?
• Allannguutit suut illit nammineq misigisimavigit, sunalu iluaqutigalugu akuerisinnaasimavigit?
• Illit sooq qaamanermi qaammarissiartortumi saqiuarumavit?
[Atuaqqissaarnermi apeqqutit]
[Qupp. 29-mi assiliartaq]
1922-mi Cedar Pointimi, Ohiomiittumi, ataatsimeersuarnermi Biibilimik Atuaqqissaartartut kajumissaarneqarput Guutip suliareqqusaanik suliaqaqqullugit
[Qupp. 31-mi assiliartaq]
„New World Translation of the Christian Greek Scriptures“ 1950-imi N.H. Knorrimit saqqummersinneqarpoq
[Qupp. 25-mi suminngaanneernera]
© 2003 BiblePlaces.com