Jehova savaatiminik paarsisussanik ilinniartitsisarpoq

„[Jehova] ilisimassuseqalersitsisarpoq, ilisimasaqarneq sianissuseqarnerlu qarnanit pilersarput.“ — USSATIT 2:6.

1, 2. Sooq angutit kuisimasut ilagiinni akisussaaffeqarnerujumappat?

„UTOQQAANERTATUT toqqarneqarnera assut nuannaarutigaara,“ Nick, maanna ukiuni arfineq-marlunni nakkutilliisutut kiffartorsimasoq, taama oqaluttuarpoq. „Immikkut pisinnaatitaaffik tamanna Jehovamut kiffartornermi suliniuteqarnerunissamut periarfissatut isigaara. Uanga pillunga iliuuserisimasai qujamasuutigeqaakka, misigaangalu akillugu iliuuseqarusullunga. Aamma utoqqaanertat allat uannik ikiuisimanerattut qatanngutima angutit arnallu sapinngisamik annerpaamik ikiornissaat kissaatigaara.“ Nickili nuannaaraluarluni aamma isumakuluuteqarpoq. Ima oqarpoq: „Toqqarneqarama 30-ngajaannarnik ukioqarama ilagiinnik paarsisuulluarsinnaajumallunga pissuserineqartariaqartut —siuneqassuseq ilisimassuserlu — pissuserinerlugit isumakuluutigaara.“

² Angutit Jehovap savaatiminik isumaginnittussatut toqqagai nuannaarnissamut pissutissarpassuaqarput. Apustili Paulusip Efesosimi utoqqaanertat nuannaarnissamut pissutissat taakkua ilaannik eqqaasippai Jiisusip oqaasii uku issuaramigit: „Tunisineq pilluarnarneruvoq tigusinermit.“ (Apustilit Suliaat 20:35) Angutit kuisimasut ilagiinni kiffartortuullutilluunniit utoqqaanertaagaangamik Jehovamut ilagiinnullu tunisinissamut periarfissaqarnerusarput. Assersuutigalugu ilagiinni kiffartortut utoqqaanertat suleqatigisarpaat. Aamma suliassarpassuit allat piffissartornartut, suliarisariaqartulli, isumagisarpaat. Guutimik tullermillu asanninneq kajumississutigalugu naleqangaartumik kiffartorput. — Markusi 12:30, 31.

3. Sooq ilaasa ilagiinni akisussaaffeqalernissartik nangaassutigisarpaat?

³ Taavami angutip kristumiup imminut ajukkunnini pissutigalugu ilagiinni kiffartortunngornissap kingusinnerusukkullu utoqqaanertanngornissap immikkut pisinnaatitaaffigilernissaa nangaassutigiguniuk? Immaqa Nickitut isumakuluutigaa paarsisuulluarsinnaanissamut pissuserineqartariaqartut pissuserinerlugit. Illit taamatut misigisut ilagaatsit? Pissutissaqarluarluni taamatut isumakuluttoqarsinnaavoq, Jehovammi paarsisut toqqakkat savaatinik iliorfiginneriaasiannut akisussaatippai. Jiisusi ima oqarpoq: „Kinaluunniit angisuumik tunineqarsimasoq angisuumik piumaffigineqassaaq. Kinalu angisuumik paarisassaqartitaasoq suli annerusumik piumaffigineqassaaq.“ — Lukasi 12:48.

4. Jehovap toqqakkani savaatiminik isumaginninnissaannut qanoq ikiortarpai?

⁴ Jehovap naatsorsuutigaa ilagiinni kiffartortutut utoqqaanertatullu toqqakkami akisussaaffitik ikiorneqaratik namminneq isumagissagaat? Naamik, ikiorneqarnissaat isumagaa suliassaminnik suliarinnissinnaanissaat piinnarnagu, aammali paarsisutut kiffartornerminni siumukarsinnaaniassammata. Allaaserisap matuma siuliani sammineqartutut Jehovap anersaaminik illernartumik tunisarpai, anersaallu tamatuma inerititai savanik qajassuartumik isumaginninnissaminnut iluaqutigisarpaat. (Apustilit Suliaat 20:28; Galatiamiut 5:22, 23) Jehovap aamma ilisimassusermik, ilisimasaqarnermik siuneqassusermillu tunisarpai. (Ussatit 2:6) Qanoq ililluni tunisarpai? Jehovap toqqakkaminik savaatiminik isumaginninnissamut ilinniartitseriaasii pingasut misissoriartigik.

Paarsisunit misilittagaqarluartunit ilinniartinneqarneq

5. Sooq Petrusi Johannesilu paarsisuulluartuuppat?

⁵ Apustilit Petrusi Johannesilu killisiuisoqatigiinnut sassartitaagamik, eqqartuussisunit silamiorpaluttumik ilisimassusilinnit ’inuinnaasutut immikkullu ilinniagaqarsimanngitsutut’ isigineqarput. Soorunalimi atuarsinnaallutillu allassinnaapput,  Allakkalli pillugit rabbinerinit ilinniartinneqarsimanngillat. Taamaakkaluartoq Petrusip Johannesillu ajoqersukkallu allat takutissimavaat ilinniartitsillaqqissuullutik tusarnaartumik ilarpassuinik uppertunngornissamut kajumissisitsisut. Inuinnaat taakkua qanoq ilillutik ilinniartitsillaqqissorsuanngorsimappat? Eqqartuussisut Petrusi Johannesilu tusarnaareeramikkik ’ilisaraat Jiisusip ilagisimagai’. (Apustilit Suliaat 4:1-4, 13, 1900/1961) Soorunalimi anersaaq illernartumik tunineqarsimapput. (Apustilit Suliaat 1:8) Kisianni aamma nalunanngilaq — allaat eqqartuussisunut anersaakkut tappiitsunut taakkununnga — Petrusi Johannesilu Jiisusimit ilinniartinneqarsimasut. Jiisusip apustilit nunami najortillugit maniguuttunik qanoq katersuissanerannik ilinniartiinnanngilai, aammali ilinniartippai maniguuttut ilagiinniileriaraangata taakkuninnga qanoq paarsissanersut. — Matthæusi 11:29; 20:24-28; 1 Petrusi 5:4.

6. Jiisusi Paulusilu allanik ilinniartitsinermut tunngatillugu qanoq maligassaalluarpat?

⁶ Jiisusip makititaareerami paarsisutut toqqakkaminik ilinniartitsinini ingerlatiinnarpaa. (Saqqummersitat 1:1; 2:1–3:22) Assersuutigalugu Paulusi nammineerluni toqqarpaa ilinniartinneqarnissaalu isumagalugu. (Apustilit Suliaat 22:6-10) Paulusip ilinniartinneqarnini pingaartingaarpaa, ilikkakkanilu utoqqaanertanut allanut ingerlateqqippai. (Apustilit Suliaat 20:17-35) Assersuutigalugu Timotheusi Guutimut kiffaasussatut „kanngusuutissaqanngitsutut“ ilinniartinniarlugu piffissarujussuaq nukippassuillu atorpai. (2 Timotheusi 2:15) Angutit marluk taakkua qanimut ikinngutigiilerput. Siusinnerusukkut Paulusi Timotheusi pillugu ima allappoq: „Qitornatut ataataminik ikiuisutut iivangkiiliumut kiffartoqatigisimavaanga.“ (Filippimiut 2:22) Paulusip Timotheusi inuilluunniit allat imminut ajoqersuganngortinniarsarinngilai. Uppeqatinili kajumissaarpai nammineq Kristusimik ilaarsinermisut ’imminik ilaarsisunngoqqullugit’. — 1 Korinthimiut 11:1, NV.

7, 8. (a) Utoqqaanertat Jiisusimik Paulusimillu ilaarsinerata sunniuteqarluarnerat misigisalikkersaarummi sumi erserpa? (b) Utoqqaanertat ilagiinni kiffartortunngorsinnaasunik utoqqaanertanngorsinnaasunillu qaqugukkut ilinniartitsilissappat?

⁷ Ullumikkut paarsisut misilittagaqarluartut Jiisusi Paulusilu ilaartarpaat qatanngutinik angutinik kuisimasunik ilinniartitsiniarlutik siulliullutik iliuuseqartarnermikkut, tamannalu taamatulli kinguneqarluartigisarpoq. Chadip misigisimasai sammeriartigik. Angerlarsimaffimmi assigiimmik upperisaqarfiunngitsumi peroriartorpoq, qanittukkulli utoqqaanertatut toqqarneqarpoq. Ima oqaluttuarpoq: „Ukiut ingerlanerini utoqqaanertat misilittagaqarluartut arlallit anersaakkut siumukarnissannut ikiorpaannga. Ataataga Jehovamut nalunaajaasuunngimmat utoqqaanertat taakkua immikkut soqutigalunga takutittarpaat uannullu anersaakkut ataatanngorlutik. Oqaluussinermik ilinniartinnissannut piffissaqartarput, kingusinnerusukkullu pingaartumik utoqqaanertap ataatsip ilagiinni suliassanik isumaginninnissamik ilinniartippaanga.“

⁸ Soorlu Chadip misigisimasaani ersertoq, paarsisut siuneqarluartut ilagiinni kiffartortunngorsinnaasunik utoqqaanertanngorsinnaasunillu ilinniartitsilertarput qatanngutit angutit akisussaaffinnut taamaattunut piukkunnarsinissamut naammattumik siumukarsimanerat sioqquterujussuarlugu. Sooq taamaaliortarpat? Ilagiinni kiffartortut utoqqaanertallu taamatut kiffartortussatut toqqarneqannginnerminni Biibili naapertorlugu ileqqorissuusariaqarlutillu qutsissunik anersaakkut najoqqutaqartariaqarmata. ’Misilinneqaqqaartariaqarput’. — 1 Timotheusi 3:1-10.

9. Paarsisut inersimalluartut suna akisussaaffigaat, aamma sooq?

⁹ Qatanngutit angutit kuisimasut misilinneqassappata, ilinniartinneqaqqaarnissaat pissusissamisuuinnarpoq. Tamanna erseqqissarneqarsinnaavoq ima assersuusiorluni: Atuartoq fagimi aalajangersimasumi ilinniartitsisup ilinniartitsissutigisimanngisaani soraarummeerummik ajornakusoortumik naammassinneqquneqaruni, misilitsinnermini angusissanerpa? Ilimananngilaq. Taamaattumik ilinniartinneqarnissaq pisariaqarpoq. Ilinniartitsisulli peqqissaarluartut atuartut misilitsinnermi angusinissaat piinnarlugu ilinniartitsineq ajorput, aammali ilinniartitsisarput ilinniakkatik atorsinnaaniassammatigik. Taamatulli utoqqaanertat isumassuisut qatanngutit angutit kuisimasut ikiortariaqarpaat angutit kiffartortutut toqqarneqartut pissuserisariaqagaannik ineriartortitsiniarneranni ilinniartillugit. Taamaaliortarput qatanngutit angutit kiffartortutut toqqarneqarnissaat kisiat pinnagu, aammali savaatinik  paarsilluarsinnaaniassammata. (2 Timotheusi 2:2) Soorunalimi qatanngutit angutit kuisimasut namminneq iliuuseqartariaqarput ilagiinnilu kiffartortunut utoqqaanertanulluunniit piumasaqaatigineqartunik naammassinninniarlutik tamaviaartariaqarlutik. (Titusi 1:5-9) Paarsisulli misilittagaqarluartut ilagiinni akisussaaffeqarusuttunik kajumillutik ilinniartitsinermikkut taakku siumukapallannerunissaannut ikiorsinnaavaat.

10, 11. Paarsisut allat kiffartornermi immikkut pisinnaatitaaffeqarnerunissaannut qanoq ilinniartissinnaavaat?

¹⁰ Paarsisut misilittagaqarluartut qanorpiaq allanik ilagiinni suliassaqarnissamut ilinniartitsisinnaappat? Pingaarnerpaamik qatanngutit angutit soqutiginerisigut — aalajangersimasumik oqaluusseqatigisarnerisigut ’oqaatsimillu sallusuissutaasumik eqqortumik atuinissamut’ pikkorinnerulernissaannut ikiornerisigut. (2 Timotheusi 2:15, NV) Paarsisut inersimalluartut qatanngutit angutit tamakku allanut kiffartornerup nuannersui pillugit aamma anersaakkut anguniagaqarnerminnik anguniakkaminnillu angusinerminnik nalerisimaarutiginnittarnertik pillugu oqaloqatigisarpaat. Aamma qatanngut angut ’savaatinut maligassaaneq’ eqqarsaatigalugu qanoq ililluni siumukarsinnaanersoq asannittumik siunnersortarpaat. — 1 Petrusi 5:3, 5.

¹¹ Qatanngut angut ilagiinni kiffartortutut toqqarneqariaraangat paarsisut silatuut taassuminnga ilinniartitsinertik ingerlatiinnassavaat. Bruce, ukiuni 50-ingajanni utoqqaanertatut kiffartorsimasoq, ima oqarpoq: „Ilagiinni kiffartortutut toqqarneqaqqammersumik inussiap aalajaallunilu silatuup siunnersuutaanik misissueqateqartarnera nuannaraara. Aamma najoqqutassat suliassarpiaanut tunngasut tamaasa atuartarpavut, tamatumalu kingorna suliassaminik sungiussilluarnissaata tungaanut suleqatigisarpara.“ Aamma ilagiinni kiffartortoq misilittagaqarnerujartortillugu paarsisutut sulinermik ilinniartinneqarsinnaavoq. Bruce ima nangippoq: „Ilagiinni kiffartortoq paarsisutut pulaaqatigigaangakku allassimaffinnik aalajangersimasunik, pulaagassatsinnut kaammattuutaasunik kajumissisitsisinnaasunillu, toqqaanissaanut ikiortarpara. Ilagiinni kiffartortoq paarsisuulluartunngussappat uummatinik killiilluni Allakkanik atuisarnissamik ilinniarnissaa pingaaruteqarpoq.“ — Hebræerit 4:12; 5:14.

12. Paarsisut misilittagaqarluartut utoqqaanertatut toqqagaaqqammersunik qanoq ilinniartitsisinnaappat?

¹² Utoqqaanertatuttaaq toqqagaaqqammersut aamma allanik ilinniartinneqarnertik iluaqutigingaartarpaat. Nick, allaaserisap matuma aallaqqaataani eqqaaneqartoq, ima oqarpoq: „Pingaartumik nakkutilliisunit utoqqaanerusunit marlunnit ilinniartinneqarnera iluaqutigisupilussuuara. Qatanngutit angutit taakkua amerlanertigut naluneq ajorpaat suliassat aalajangersimasut qanoq suliarineqassanersut. Naammagittarlutik tusarnaartuaannarpaannga isumakkalu eqqarsaatigeqqissaartarlugit — isumaqatiginngikkaluaraangaminngaluunniit. Qatanngutinut angutinut arnanullu ilagiinniittunut maniguullutik ataqqinnillutillu iliorfiginneriaasiannik qimerluuisarnera ilinniarfigisupilussuuara. Utoqqaanertat taakkua ajornartorsiutinik aaqqiiniaraanni kaammattuissagaanniluunniit Biibilimik atuillaqqissuunissap qanoq pingaaruteqartiginera uannut erseqqissarpaat.“

Guutip oqaasianit ilinniartinneqarneq

13. (a) Qatanngutip angutip paarsisuulluartunngornissamut suna pisariaqartippaa? (b) Sooq Jiisusi ima oqarpa: „Ajoqersuutiga uanga nammineq piginngilara“?

¹³ Guutip oqaasia, Biibili, inatsisinik, najoqqutassianik maligassanillu paarsisup ’piginnaaneqarlualerniarluni, ajunngitsuliornernut tamanut piareersarluagaaniarluni’ pisariaqartitaanik imaqarpoq. (2 Timotheusi 3:16, 17) Imaassinnaavoq qatanngut angut ilinniagaqarluarsimasoq, Allakkanilliuna ilisimasani ilisimasaminillu atueriaatsini paarsisuulluartunngornissamut iluaqutigisaraa. Jiisusip maligassiaa eqqarsaatigeriaruk. Taanna nunarsuarmi anersaakkut ittumik paarsisunit tamanit  naliliilluarsinnaanerpaallunilu ilisimasaqarnerpaallunilu silatunerpaajuvoq; Jehovalli savaataanik ilinniartitsigaangami namminerluunniit ilisimassutsini tatigineq ajorpaa. Ima oqarpoq: „Ajoqersuutiga uanga nammineq piginngilara, aallartitsisimali pigaa.“ Sooq Jiisusip Ataatani qilammiusoq ataqqinaatissippaa? Tamanna ima oqarluni nassuiarpaa: „Imminit pisumik oqaluttoq imminuinnaq ataqqinaatissinniarpoq.“ — Johannesi 7:16, 18.

14. Paarsisut qanoq imminnuinnaq ataqqinaatissinniarnaveersaarsinnaappat?

¹⁴ Paarsisut ilumoorfiginnittut imminuinnaq ataqqinaatissinniarneq ajorput. Namminneq ilisimassusertik tunngaviginagu, Guutilli oqaasia tunngavigalugu siunnersuillutillu kaammattuisarput. Paasivaat savat ’Kristusip eqqarsaataanik’, utoqqaanertat eqqarsaataanniunngitsoq, eqqarsaateqalernissaannut ikiornissaat paarsisup suliassarigaa. (1 Korinthimiut 2:14-16) Assersuutigalugu qanoq pisoqassagaluarpa utoqqaanertap aappariinnik katissimasunik aappariittut ajornartorsiutilinnik ikiuisup siunnersuutini nammineq misilittakkaminik tunngaveqartippagit, Biibilimi najoqqutassianik atuakkanillu ’kiffamit ilumoortumit silatuumillu’ saqqummersinneqartunik tunngaveqartinnagit? (Matthæusi 24:45) Siunnersuutai najukkami ileqqorineqartunit killeqartumillu inuunermi misilittagaqarnerminit sunnerneqarpallaarsimasinnaapput. Soorunalimi najukkami ileqqorineqartut tamavimmik kukkusuunngillat, aamma imaassinnaavoq utoqqaanertaq inuunermi misilittagaqangaatsiartoq. Paarsisulli inuit isumaannik tusarnaaqqusillutik najukkamiluunniit ileqqorineqartunik malinneqqusillutik kajumissaarinatik, Jiisusip nipaanik Jehovallu oqaaseqaataanik tusarnaaqqusillutik savanik kajumissaarisarnerat taakkununnga iluaqutaanerpaavoq. — Tussiaat 12:7; Ussatit 3:5, 6.

’Kiffamit ilumoortumit silatuumillu’ ilinniartinneqarneq

15. Jiisusip „kiffaq ilumoortoq silatoorlu“ sumik suliassippaa, aamma kiffaqatigiit suliaata maluginiarnarneranut suna pissutaaqataava?

¹⁵ Apustilit Petrusi, Johannesi Paulusilu paarsisuupput eqimattanut Jiisusip ’kiffatut ilumoortutut silatuutullu’ eqqartugaanut ilaasut. Kiffaqatigiit taakkua tassaapput Jiisusip qatanngutai tanitat nunarsuarmiittut, qilammi Kristusimik naalakkersueqateqalernissamik neriugisaqartut. (Saqqummersitat 5:9, 10) Ulluni kingullerni makkunani Kristusip qatanngutai nunarsuarmiittut kinguleruttut ilimagineqartutut ikilisimapput. Taamaakkaluartorli suliaq Jiisusip taakkununnga suliareqqusaa — naggatissap nalliutinnginnerani Guutip naalagaaffia pillugu nutaarsiassamik nuannersumik oqaluussissutiginninneq — aatsaat taama suliarineqartigaaq. Tamatumunnga tunngatillugu kiffaqatigiit suliarisimasaat maluginiarnarput! Sooq? Ilaatigut oqaluusseqataanissamut ilinniartitseqataanissamullu ’savanik allanik’ ilinniartitsimmata. (Johannesi 10:16; Matthæusi 24:14; 25:40) Ullumikkut suliap annerpaartaa eqimattanit taakkunannga ilumoorfiginnittunit suliarineqarpoq.

16. Kiffaqatigiit angutit toqqakkat qanoq ilinniartittarpaat?

 ¹⁶ Kiffaqatigiit taamatut ilinniartitsisoqarnissaa qanoq isumagaat? Ukiuni hundredelinni siullerni kiffaqatigiinnut sinniisuusut nakkutilliisussanik ilinniartitsisussanngortinneqarlutillu toqqaasussanngortinneqarput, nakkutilliisullu taakku ilagiinniittunik ilinniartitsipput. (1 Korinthimiut 4:17) Ullumikkut aamma taamaappoq. Siulersuisoqatigiit — utoqqaanertat tanitat ikittunnguit kiffaqatigiinnut sinniisuusut — kiffaqatigiit sinnerlugit iliuuseqartussanngortitsisarput aamma silarsuaq tamakkerlugu ilagiinni titusindilikkuutaani ilagiinni kiffartortunik utoqqaanertanillu ilinniartitsisussanngortitsisarlutillu toqqaasussanngortitsisarput. Aammattaaq Siulersuisoqatigiit ilinniarfinnik aaqqissuussisarput, taakkunanilu immikkoortortaqarfiit ataatsimiititaliaannut ilaasut, nakkutilliisut angalasartut, utoqqaanertat ilagiinnilu kiffartortut qanoq pitsaanerpaamik savanik isumassuisinnaanersut ilinniartinneqartarput. Najoqqutassallu suli allat allakkatigut, Napasuliaq Alapernaarsuiffik-mi allaaserisatigut atuakkatigullu allatigut, soorlu atuagaq Organiseret til at gøre Jehovas vilje * aqqutigalugu, tunniunneqartarput.

17. (a) Jiisusip qanoq takutippaa kiffaqatigiit tatigalugit? (b) Anersaakkut ittumik paarsisut qanoq ersersissinnaavaat kiffaqatigiit tatigalugit?

¹⁷ Jiisusi kiffaqatigiinnik ima tatiginnitsigaaq ’pigisaminut tamanut’ — tassa nunarsuarmi soqutigisaminut anersaakkut ittunut tamanut — ’paarsisunngortillugit’. (Matthæusi 24:47) Aamma paarsisut toqqakkat ersersippaat kiffaqatigiit tatigalugit Siulersuisoqatigiinnit ilitsersuussutigineqartunik malinninnermikkut. Aap, paarsisut allanik ilinniartitsigaangamik, namminneq Guutip oqaasianit ilinniartinneqartikkaangamik aamma kiffaqatigiit ilinniartitsissutigisaat atoraangamikkik savaatit ataasiussusiannik siuarsaasarput. Jehovap ilagiinni kristumiuni qatanngutinik tamanik qamannga pisumik isumassuinissamut angutinik ilinniartitsisimanera qujamasuutigingaarparput!

[Quppernerup ataani ilanngussaq]

Qanoq akissavit?

• Anersaakkut ittumik paarsisut inersimalluartut allanik qanoq ilinniartitsisarpat?

• Sooq paarsisut namminneq isummatik aallaavigalugit ilinniartitsineq ajorpat?

• Qanoq aamma sooq paarsisut ersersittarpaat kiffaqatigiit tatigalugit?

[Atuaqqissaarnermi apeqqutit]

[Qupp. 10, 11-mi assiliartat]

Utoqqaanertat kristumiut ilagiinni angutinik inuusunnerusunik ilinniartitsisarput

[Qupp. 12-mi assiliartat]

’Kiffap ilumoortup silatuullu’ utoqqaanertat ilinniartinneqarluarnissaat isumagisarpaa