Inuusuttuususi — Guutimut ataqqinaataasumik anguniagaqaritsi!

„Imminut sungiusarniarit Guutimut tunniusimaneq anguniarlugu.“ — 1 TIMOTHEUSI 4:7, NV.

1, 2. (a) Sooq Paulusip Timotheusi nersualaarpaa? (b) Oqaluttuariuk inuusuttut ullumikkut qanoq ’Guutimut tunniusimaneq anguniarlugu imminut sungiusartarnerat’.

„ALLAMIK taassumatut isumalimmik taama ilumoortigisumik ilissinnik isumaginnikkumasumik aallartitassaqanngilanga. . . . Qitornatut ataataminik ikiuisutut iivangkiiliumut kiffartoqatigisimavaanga.“ (Filippimiut 2:20, 22) Apustili Paulusi ukiuni hundredelinni siullerni kristumiunut Filippimiittunut taama allappoq. Kinaana nersualaarneqartoq? Paulusip angalaqataa inuusunnerusoq Timotheusi. Timotheusip Paulusimit nuannarineqarnerminut tatigineqarnerminullu uppernarsaat tamanna nuannaajallaatigisimassaqaa!

² Inuusuttut anersaakkut ittunik pingaartitsisut, soorlu Timotheusi, Jehovap innuttaasa akornanni pingaaruteqartuaannarput. (Tussiaat 110:3) Ullumikkut Guutip peqatigiissortaani inuusuttorpassuit pioneriupput, ajoqersuiartortitaapput, namminneq kajumissutsiminnit sanaartoqataapput aamma Betelimi suleqataapput, tamannalu nuannaarutigeqaarput. Allattaaq nersortariallit tassaapput allanik akisussaaffeqaatigalutik ilagiinni eqiasuillutik suliniuteqartartut. Inuusuttut taakkunatut ittut Ataatatsinnut qilammiusumut, Jehovamut, ataqqinaataasunik anguniagaqarnerup kingunerisaanik piviusumik nalerisimaartarput. Ilumut oqartoqartariaqarpoq taakku ’imminut sungiusartut Guutimut tunniusimaneq anguniarlugu’. — 1 Timotheusi 4:7, 8, NV.

3. Apeqqutit suut allaaserisami matumani sammissavavut?

³ Illit anersaakkut ittunik aalajangersimasunik anguniagaqarpit? Qanoq ilillutit pisariaqartitannik ikiorneqarlutillu kaammattorneqarsinnaavit? Silarsuup matuma pigisalerituup tatisinera qanoq ilillutit akiorsinnaaviuk? Guutimut ataqqinaataasunik anguniagaqaruit pilluaqqussutinik sunik katersinissat ilimagisinnaaviuk? Timotheusip inuunerata aalajangigaasalu samminerisigut apeqqutit taakku akissutissarsiniariartigit.

Timotheusip tunuliaqutaa

4. Timotheusip kristumiutut inuunera naatsumik oqaluttuarilaaruk.

⁴ Timotheusi illoqarfeeqqami Lystrami Romamiut pigisaanni Galatiamiittumi peroriartorpoq. Qularnanngitsumik inuusuttuaraalluni kristumiussuseq pillugu ilinniarpoq Paulusi ukiup 47-p missaani Lystrami oqaluussimmat. Timotheusi kristumiut tamaani najugallit akornanni tusaamasaallualipallappoq. Paulusip, ukiut marluk tamatuma kingorna Lystramut uterami paasillugulu Timotheusi siumukarluarsimasoq, taanna ajoqersuiartortitatut angalaqatissamisut toqqarpaa. (Apustilit Suliaat 14:5-20; 16:1-3) Timotheusi inersimanerujartortilluni suli pingaaruteqarnerusunik akisussaaffilerneqarpoq, ilaatigut qatanngutinik nakussatsitsinissamut tunngatillugu pingaarutilinnik suliassinneqarluni. Paulusip ukiup 65-ip missaani Timotheusi Romami parnaarussivimmiit allaffigimmagu, Timotheusi Efesosimi utoqqaanertaavoq.

5. Pingaarutillit marluk suut Timotheusimut allakkat aappaat 3:14, 15 naapertorlugu Timotheusip anersaakkut ittunik anguniagaqarniarluni aalajangerneranut pissutaaqataappat?

⁵ Erseqqippoq Timotheusip anersaakkut ittunik anguniagaqarniarluni aalajangersimanera. Sunaliuna taamaaliornissaminut kajumississutigigaa? Paulusi Timotheusimut allakkami aappaanni pingaarutilinnik marlunnik eqqaasaqarpoq. Ima allappoq: „Illit ilinniarsimasatit nakimaatsumillu upperilersimasatit aalajangiunniakkit! Nalunngilammi kikkunnit tamakku ilinniarsimallugit, meeraaninniillu ilisimavatit Allakkat Illernartut.“ (2 Timotheusi 3:14, 15) Siullermik misissoriartigu kristumiut allat  Timotheusip aalajangigaanut qanoq sunniuteqarsimanersut.

Allat ajunngitsumik sunniuteqarnerat iluaqutigiuk

6. Timotheusi suut pillugit ilinniartinneqarpa, qanorlu piva?

⁶ Timotheusi angerlarsimaffimmi assigiimmik upperisaqarfiunngitsumi perorsarneqarpoq. Ataataa grækeriuvoq, anaanaali, Eunike, aanaavalu, Loisi, juutiupput. (Apustilit Suliaat 16:1) Eunikep Loisillu Timotheusi mikisunnguusorli sallusuissutit Allakkanit Hebræerisuuneersut pillugit ilinniartissimavaat. Kristumiunngoreerlutik qularnanngitsumik kristumiut ajoqersuutaat pillugit qularunnaarsinniarlugu sapinngisaminnik iliorput. Erseqqippoq Timotheusip taamatut ilinniartinneqarluarnini iluaqutigilluaraa. Paulusi ima allappoq: „Puiorsimanngilara piviusumik uppernerit, upperneq aanavit Loisip anaanavillu Eunikep pigeriigaat qularnanngivissumillu illittaaq pigisat.“ — 2 Timotheusi 1:5.

7. Inuusuttut ilarpassuisa suna pilluaqquneqaatigaat, tamannalu qanoq iluaqutigisinnaavaat?

⁷ Ullumikkut inuusuttut ilarpassuisa Guutimik mianerinnittunik, Loisitut Euniketullu anersaakkut ittunik anguniagaqarnissap qanoq pingaaruteqartigineranik paasinnilluarsimasunik, angajoqqaaqarlutillu aatakkoqarnertik iluaqutigaat. Samira assersuutigeriartigu. Inuusuttuaraalluni angajoqqaanilu oqaloqatigiissuataartarnitik suli eqqaamavai. Taanna ima oqaluttuarpoq: „Anaanama ataatamalu Jehovap pissutsinut isiginnittaasiatut isiginnittaaseqarnissannik oqaluussinermillu tamanit pingaarnerpaatitsinissannik ilinniartippaannga. Piffissaq tamaat kiffartortunngornissamik anguniagaqarnissara kajumissaarutigiuaannarpaat.“ Samirap angajoqqaami kajumissaarisarnerat ajunngitsumik periarfigaa, maannalu nunami najukkamini Betelimi kiffartornini immikkut pisinnaatitaaffigaa. Angajoqqaavit anersaakkut ittunik anguniagaqarnissannik kajumissaartarpatsit, siunnersuutaat eqqarsaatigilluaruk. Pitsaanerpaamik perusuppaatsit. — Ussatit 1:5.

8. Timotheusip anersaakkut nukittuunik ikinnguteqarnini qanoq iluaqutigaa?

⁸ Aamma ilinnut pingaaruteqarpoq ilagiit kristumiut iluanni ineriartornartunik ikinngutissarsiornissat. Timotheusi utoqqaanertanit kristumiunit najukkamini ilagiinniittunit aammattaaq Ikonionimi ilagiinniittunit, kilometerit 30-t missiliorlugit ungasitsigisumiittunit, tusaamaneqarluarpoq. (Apustilit Suliaat 16:1, 2) Paulusi, inuk piumassuseqarluartoq, ikinngutigillualerpaa. (Filippimiut 3:14) Paulusip allagaani erserpoq Timotheusip siunnersorneqarnini akuerisaraa allallu uppernikkut maligassiaannik malinnikkasuartartoq. (1 Korinthimiut 4:17; 1 Timotheusi 4:6, 12-16) Paulusi ima allappoq: „Illit malitsigaakkit ajoqersuutikkut, inuutsikkut, ilungersornikkut, ilumoorsutsikkut, naammagittarnikkut, asanninnikkut, nikallujuissutsikkut.“ (2 Timotheusi 3:10) Aap, Timotheusi Paulusip maligassiaanik malinneqqissaarpoq. Taamatuttaaq illit inunnik anersaakkut nukittuunik ilagiinniittunik qanitaqaleruit anersaakkut ittunik ajunngitsunik anguniagaqalernissannut ikiorneqassaatit. — 2 Timotheusi 2:20-22.

 „Allakkat Illernartut“ atuaqqissaartakkit

9. Guutimut tunniusimaneq anguniarlugu imminut sungiusarumallutit ikinngutinik eqqortunik toqqaanissap saniatigut susariaqarpit?

⁹ Taava imaappa anguniakkat anersaakkut ittut angussagaanni ikinngutinik eqqortunik toqqaanissaq apeqqutaaginnartoq? Naagga. Timotheusip pisimaneratut illittaaq „Allakkat Illernartut” peqqissaartumik atuaqqissaartariaqarpatit. Imaassinnaavoq atuaqqissaarneq nuannarinerpaajunngikkit, eqqaamajulli Timotheusi ’imminut sungiusartariaqarsimasoq Guutimut tunniusimaneq anguniarlugu’. Timersortartut anguniagartik anguniarlugu amerlanertigut qaammaterpassuarni sakkortuumik sungiusartariaqartarput. Aamma anguniakkat anersaakkut ittut angussagaanni pilliuteqartariaqarpoq pimoorussillunilu suliniuteqarluni. (1 Timotheusi 4:7, 8, 10) Immaqali ima aperiumassaatit: ’Kisianni Biibilimik atuaqqissaarneq anguniakkannik angusinissamut qanoq ilillunga iluaqutigisinnaagakku?’ Tamatuma pingasutigut qanoq iluaqutaasinnaanera misissoriartigu.

10, 11. Sooq Biibili anersaakkut ittunik anguniagaqarnissannut kajumississutigisinnaassaviuk? Assersuuteqarit.

¹⁰ Siullermik, Biibili eqqortumik kajumississuteqarnissannut iluaqutigissavat. Biibilimi Ataatatta qilammiusup pissusii nuanningaartut uagutsinnut saqqummersinneqarput, aamma inunnut asannittuliornera annerpaaq kiffaminullu aalajaatsunut naassaanngitsumik pilluaqqussutigiumaagai oqaluttuarineqarput. (Amosi 3:7; Johannesi 3:16; Romamiut 15:4) Jehova pillugu ilisimasaqarnerujartortillutit Jehovamut asanninnerit taassumunngalu tunniulluinnarususseqarnerit alliartuinnassapput.

¹¹ Inuusuttut kristumiut ilarpassui oqartarput nammineerluni aalajangersimasumik Biibilimik atuaqqissaartarneq sallusuissummik pigiliussinissaminnut iluaqutiginerpaajusimallugu. Assersuutigeriartigu Adele ilaqutariinni kristumiuusuni peroriartortoq anersaakkulli ittunik anguniagaqarsimanngisaannartoq. Taanna ima oqaluttuarpoq: „Angajoqqaama naalagaaffilersaarfimmukaqatigisarpaannga, namminerli atuaqqissaarneq ajorpunga ataatsimiinnerniluunniit tusarnaarneq ajorlunga.“ Adelep qatanngutimi kuisinnerata kingorna sallusuissut ilumoorunnerulerpaa. „Biibili atuartalerpara naallugu atuarniarlugu. Naatsunnguakkuutaarlugu atuartalerpara atuaqqammikkakkalu pillugit allattuilaartarlunga. Allattukkakka tamaasa suli pigaakka. Ukiup ataatsip ingerlanerani Biibili tamaat atuarpara.“ Tamatuma kingunerisaanik Adele Jehovamut tunniulluinnarusulerpoq. Innarluuteqangaatsiaraluarluni maanna pioneriuvoq.

12, 13. (a) Inuusuttut Biibilimik atuaqqissaarneq sunik allannguinissaminnut iluaqutigissavaat, aamma qanoq? (b) Ilisimassusermik atoriaannaasumik Guutip oqaasianiittumik eqqaasaqarit.

¹² Aappassaanik, Biibili iluaqutigissavat inuttut pissutsinnut tunngatillugu pisariaqartunik allannguinissannut. Paulusip Timotheusi allaffigaa „Allakkat Illernartut“ ’iluaqutaasut ajoqersuinermut, uppernarsaanermut, ilitsersuinermut iluarnermullu perorsaanermut, inuk Guutip pigisaa inerilluinnaqqullugu ajunngitsuliornernut tamanut piginnaanngorsagaalluni’. (2 Timotheusi 3:16, 17) Inuttut pissutsit Guutip anersaavanit pitsanngorsartissinnaavat apeqqutinik Guutip oqaasianut tunngassuteqartunik eqqarsaatiginneqqissaartuartarnikkut najoqqutassianillu Biibilimeersunik illit nammineq inuuninni atuisarnikkut. Guutip anersaava iluaqutigalugu pissuserineqartussanik pingaarutilinnik  ineriartortitsissaatit, soorlu maniguunnermik, pinertusaarnermik, eqiasuinnermik kristumiunullu allanut asanninnermik ilumoortumik. (1 Timotheusi 4:15) Timotheusip tamakku pissuserai, taamaalillunilu ilagiinnut suleqatigisaminut Paulusimullu pingaaruteqangaartunngorpoq. — Filippimiut 2:20-22.

¹³ Pingajussaanik, Guutip oqaasia ilisimassusermik atoriaannaasumik ulikkaarpoq. (Tussiaat 1:1-3; 19:8; 2 Timotheusi 2:7; 3:15) Biibili iluaqutigissavat ikinngutissannik isumatusaartumik toqqaanissannut, aliikkutassanik ineriartornartunik toqqaanissannut aalajangeruminaatsorpassuarnillu allanik aalajangiinissannut. (1 Mosesi 34:1, 2; Tussiaat 119:37; 1 Korinthimiut 7:36) Anguniakkatit anersaakkut ittut angusinnaassagukkit, maanna silatusaartumik aalajangiisarnissat pingaaruteqartupilussuuvoq.

’Ajunngitsoq sorsuutigiuk’

14. Sooq anersaakkut ittunik anguniagaqarneq ajornannginnerpaajunngila?

¹⁴ Silatusaarnerpaassaaq Jehovamut ataqqinaataasunik anguniagaqarutta inuunermilu tamatuminnga pingaarnerpaatitsigutta, ajornannginnerpaajunngilluinnarporli. Assersuutigalugu imaassinnaavoq suna ilinniarniarnerlugu sutullu suliniarnerlutit aalajangernialeruit ilaquttat, kammalaatit ilinniartitsisullu ajunngitsumik isumaqarlutik kimigiiserfigigaatsit isumaqaramik qaffasinnerusumik ilinniagaqarneq suliffillu aningaasarsiorfiulluartoq inuunermi iluatsitsivinnermut pilluarnermullu piviusumut ’matuersaataasoq’. (Romamiut 12:2) Timotheusip pisimaneratut ’ajunngitsoq sorsuutigalugu uppertutut sorsuttariaqarputit’ „inuuneq naassaanngitsoq“ Jehovap ilinnut neriuutissiissutaa ’tigulluartitaarumallugu’ (NV). — 1 Timotheusi 6:12; 2 Timotheusi 3:12.

15. Timotheusi qanoq akerlilersorneqarsimagunarpa?

¹⁵ Ilaquttat uppinngitsut aalajangikkannut tunngatillugu isumaqatiginngittupilussuuppatsit, tamanna sakkortuumik misilinneqaatigisinnaavat. Timotheusi taamatut akerlilersorneqarnermik akiugaqartariaqarsimagunarpoq. Biibili pillugu qinerlerfissiaq naapertorlugu Timotheusip ilaqutai „inunnut ilinniarluarsimasunut akissarsiakkaanullu ilaasimagunarput“. Imaalluarsinnaavoq ataataata naatsorsuutigigaa Timotheusip qaffasinnerusumik ilinniagaqarnissaa immaqalu suliffimmik ilaqutariit pigisaannik ingerlatitseqqinnissaa. * Takorlooriaruk Timotheusip ataataa qanoq pisimassasoq paasigamiuk Timotheusip Paulusi ajoqersuiartortitatut kiffartoqatigerusunnerugaa — tamanna navianartortaqaraluartoq aningaasatigullu nalorninartortaqaraluartoq!

16. Angutip inuusuttup ataatami akerlilersuinera qanoq ililluni naammagalugu atorpaa?

¹⁶ Ullumikkut inuusuttut kristumiut tamatumunnga assingusunik unamminiagaqartarput. Matthew, Jehovap Nalunaajaasuisa immikkoortortaqarfiisa ilaanni kiffartortoq, ima oqaluttuarpoq: „Pionerinngorama ataataga pakatsisupilussuuvoq. Misigaaq pioneritut imminut pilersorsinnaaniassagama asaasutut sulinera ilinniakkannik ’maangaannartitsinerusoq’. Mitaatigisarpaanga eqqaasittarlungalu piffissaq tamaat suliffeqartuuguma qanoq aningaasarsiortigisinnaaninnik.“ Matthewip akerlilersorneqarnini tamanna qanoq ililluni naammagalugu atorpaa? „Aalajangersimasumik Biibilimik atuartarnissamik pilersaarusiara maleqqissaarniartarpara Jehovamullu qinujuartarlunga, pingaartumik imminut aqussinnaajunnaariaannaagaangama.“ Matthewip aalajangersimalluinnarnera kinguneqarluarpoq. Ataataminut attaveqarlualeriartuaarpoq. Aamma Matthew Jehovamut qaninnerulerpoq. Ima oqaluttuarpoq: „Jehovap uannik isumassuinera, nakussatsitsinera ajortumillu aalajanginnginnissannut ikiuinera misigaakka. Tamakkua tamaasa misigisimanavianngikkaluarpakka anersaakkut ittunik anguniagaqarsimanngitsuuguma.“

Anguniakkat anersaakkut ittut pingaarnerutittuakkit

17. Ilaasa qanoq ilillutik piffissaq tamaat kiffartulernissamik pilersaaruteqartut nikallortittoorsinnaavaat? (Matthæusi 16:22)

¹⁷ Ilagiinniittut ilaat taama pinianngikkaluarlutik arlaannik oqaaseqartoorsinnaapput anersaakkut ittunik anguniagaqarnissat ilinnut ajornakusuulersillugu. Ilaat immaqa ima aperipput: ’Sooq aamma  pionerinngussavit? Nalinginnaasumik inuugaluarlutit oqaluusseqataasarsinnaavutit. Akissarsiarissaarnartumik suliffittaarniarit aningaasatigullu isumannaarlutit.’ Siunnersuut taanna siunnersuutitsialaarpasissinnaavoq, siunnersuulli malillugu ilioruit ilumut Guutimut tunniusimaneq anguniarlugu imminut sungiusassavit?

18, 19. (a) Anguniakkanik anersaakkut ittunik qanoq ilillutit pingaarnerutitsiuarsinnaavit? (b) Illit inuusuttutut Guutip naalagaaffia pillugu suut pilliutigisarnerlugit oqaluttuariuk.

¹⁸ Kristumiut Timotheusip nalaani inuusut ilaat taamatut eqqarsarsimannguatsiarput. (1 Timotheusi 6:17) Paulusip Timotheusi anguniakkanik anersaakkut ittunik pingaarnerutitsinissaanut ikiorniarlugu ima oqarfigaa: „Kinaluunniit sorsukkiartortoq sakkutuussarsiarinnitsiminit iluarineqarumasoq ulluinnarni suliarisartakkaminit akornusersortinneq ajorpoq.“ (2 Timotheusi 2:4) Sakkutuup sakkutuutut sulinermini sakkutuujunngitsut suliarisartagaat allamut saasaatigisussaanngilai. Naalakkami peqqusineratut iliornissaminut piareersimajuaannarnera nammineq inuuneranut allallu inuunerannut aalajangiisuuvoq. Sakkutuujugavit Kristusimit siulersorneqartoq illittaaq anguniakkat aalajangiusimasariaqarpat pigisanik pisariaqanngitsumik noqqaassutiginnittunut ilanngunnak. Tamanna inuunermik annaassissutaasinnaasumik kiffartuutinnik naammassinninnissannut akornutaasinnaavoq. — Matthæusi 6:24; 1 Timotheusi 4:16; 2 Timotheusi 4:2, 5.

¹⁹ Inuulluataarnissaq ilorrisimaarnissarlu anguniarnagit imminut pilliutigeriaannaaneq ineriartortittariaqarpat. „Jiisusip Kristusip sakkutuuisa ilaattut inuunermi ilorrisimaarnartut piginagit inuunissannut piumassuseqarit.“ (2 Timotheusi 2:3, The English Bible in Basic English) Timotheusip Paulusimik peqateqartarnermigut pissutsini artornartorsiornarnerpaani allaat naammagisimaarnerup isertugaataa ilikkarpaa. (Filippimiut 4:11, 12; 1 Timotheusi 6:6-8) Aamma illit tamanna ilikkarsinnaavat. Guutip naalagaaffia pillugu pilliuteqarnissannut piumassuseqarpit?

Maanna siunissamilu pilluaqqussutit

20, 21. (a) Anersaakkut ittunik anguniagaqarnikkut pilluaqqussutisiarineqarsinnaasut ilaat oqaluttuarikkit. (b) Sunissat aalajangiusimaviuk?

²⁰ Timotheusip Paulusi ukiut 15-it missiliorlugit qanimut suleqatigaa. Nutaarsiassaq nuannersoq Immap Akullersuup avannaatungaanut tamangajammut siaruariartortillugu ilagiinnik nutaanik pilersitsiortortoqarnera takunnittuuffigaa. „Nalinginnaasumik“ inuuniarluni aalajangersimasuuguni taama pissanganartigisumik nalerisimaarnartigisumillu inuusimassanngikkaluarpoq. Anersaakkut ittunik anguniagaqaruit illittaaq anersaakkut ittunik nalissaqanngilluinnartunik pilluaqqussutisissaatit. Jehovamut qanillissaatit, aamma kristumiunit allanit asaneqarlutillu ataqqineqassaatit. Pigissaarnissamik noqqaassuteqarnerup kingunerisaanik naalliunnak pakatsinallu, namminissarsiornani allanut iluaqutaasumik iliuuseqarnerup kingunerisaanik piviusumik nuannaassaatit. Tamanit pingaaruteqarnerpaamik, „inuunivik“ — nunami paratiisiusumi inuuneq naassaanngitsoq — ’tigulluartitaassavat’ (NV). — 1 Timotheusi 6:9, 10, 17-19; Apustilit Suliaat 20:35.

²¹ Taamaammat taamaalioreersimanngikkuit kajumissaarusuppatsigit massakkumiit Guutimut tunniusimaneq anguniarlugu imminut sungiusaleqqullutit. Ilagiinniittut anersaakkut ittunik anguniagaqarnissannut ilinnik ikiuisinnaasut qanilliniakkit, aamma aperisakkit siunnersorusunneraatsit. Guutip oqaasianik nammineq atuaqqissaartarnerit pingaarnerpaatiguk. Silarsuup matuma anersaavanik pigisalerituumik akiuinissat aalajangiusimajuk. Eqqaamajuarullu Guutip ’pisariaqakkatsinnik naammattunik tunniussisup’ neriorsoraatit illit maanna siunissamilu pilluaqqussuterpassuarnik tuniumaarlutit, aalajangeruit taassumunnga ataqqinaataasunik anguniagaqarniarlutit. — 1 Timotheusi 6:17. (wE 5/1 07)

[Quppernerup ataani ilanngussaq]

Eqqaamavigit?

• Inuusuttut anersaakkut ittunik anguniagaqarnissaminnut qanoq ikiorneqarsinnaappat?

• Peqqissaartumik Biibilimik atuaqqissaartarnissaq sooq taama pingaaruteqartigaa?

• Inuusuttut silarsuup matuma pigisalerituup sunniiniarnera qanoq ilillutik akiorsinnaavaat?

• Anersaakkut ittunik anguniagaqarneq pilluaqqussutinik sunik kinguneqartarpa?

[Atuaqqissaarnermi apeqqutit]

[Qupp. 18-mi assiliartaq]

Timotheusi kimit ajunngitsumik sunnerneqarpa?

[Qupp. 19-mi assiliartaq]

Anersaakkut ittunik anguniagaqarpit?