Allat kisimik ilumoortuussappat?

„SALLU uumigaara, salloqittarneqaraangamalu nuannarinngilluinnartarpara,“ niviarsiaraq 16-inik ukiulik oqarpoq. Inuit amerlanerit taama misigisarput. Kissaatigaarput paasissutissat pissarsiavut — oqaatsitigut allakkatigulluunniit pigaluarpata — ilumoortuussasut. Uagulli allat paasissutissikkaangatsigik ilumoortoq oqaatigisarparput?

Tysklandimi misissuineq naapertorlugu aperineqartut amerlanersaat isumaqarput „imminut illersorniarluni allalluunniit serniginiarlugit, allanullu attaveqarluarumalluni, pingaaruteqannginnerusunut tunngatillugu sallu akuerisaasoq, allaat pisariaqartoq“. Tusagassiortorlu ima allappoq: „Eqqortumik eqqortuinnarmillu tamatigut oqalunneq kusanartumik eqqarsarneruvoq, inuunermilli soqutiginaateqartitsineq ajorpoq.“

Immaqa allat eqqortumik oqalunnissaat kissaatiginartarpoq, misigisimallunili nammineq ilaannikkut eqqunngitsumik oqalunnissamut pissutissaqarluartoq. Eqqunngitsumik oqalunneq soqutaanngila? Ilumoortumik oqalunnginnerup suna kingunerisarpaa?

Ilumuunngitsuuneq qanoq ajoqusiisartoq

Eqqarsaatigiuk ilumuunngitsuliorneq qanoq ajoqusiisinnaasoq. Sallutuneq aappariit ilaqutariillu akornanni tatiginninnginnermik pilersitsisarpoq. Tunngaveqanngitsumik oqaatissuaaneq inummik tusaamanerlutsitsilersinnaavoq. Suliffimmi peqquserluttuliorneq suliffiup ingerlanneqarneranut attuumassuteqartunik aningaasartuuteqarnerulersitsisarpoq tunisassianillu akisunerulersitsisarluni. Aningaasarsiarisimasanik nammineerluni nalunaaruteqarnermi eqqunngitsumik paasissutissiinerit oqartussaasut inunnut ikiuutissatut isertitassaraluannik pisariaqartunik isertitaqartinngitsoortitsisarput. Ilisimatuut misissuinerminni paasisaminnik peqquserlullutik allanngortitsinermikkut atorfimmi qaffakkiartornissaraluartik maangaannartittarpaat suliffillu ataqqisaasoq tusaamanerlugaatilersarlugu. Peqquserluttumik ’pisuunngupallanniutit’ pissutaallutik aningaasaliisut nakutikkuminartut inuunertik tamaat aningaasat katersukkatik annaasarpaat ajornerusumilluunniit kinguneqartitsillutik. Taamaattumik tupinnanngilaq Biibilimi allassimammat Jehovap maajugisaanut ilaasut „oqaq sallutooq“ aamma „sallulluni nalunaajaasoq“. — Ussatit 6:16-19.

Salluliornikkut, inunnik ataasiakkaanik innuttaaqatigiinnillu tamarmiusunik, ajoqusiisinnaaneq ikittuinnaat miserratigiumassavaat. Sooq inuit piaaralutik sallusarpat? Aamma ilumuunngitsut tamarmik salluuppat? Apeqqutit taakku allallu allaaserisami tulliuttumi sammineqassapput.

[Qupp. 3-mi assiliartaq]

Sallutuneq aappariit akornanni tatiginninnginnermik pilersitsisarpoq