’Ataatarsi nallittuisuuvoq’

„Nallittuigitsi soorlu Ataatarsi nallittuisoq.“ — LUKASI 6:36.

1, 2. Jiisusip allakkanik ilisimasunut farisæerinullu aamma ajoqersukkaminut oqaasiini nallittuinerup pissusiunera kissaatiginartoq qanoq ersersinneqarpa?

INATSISINI Mosesi aqqutigalugu tunniunneqartuni 600-t missaanniittunik inatsiseqarlunilu peqqussuteqarpoq. Soorunami Israelikkut Mosesip inatsisaani piumasarineqartunik maleruaanissartik pisussaaffigaat, aammali nallittuisarnissaat assut pingaaruteqarpoq. Eqqarsaatigeriakkit Jiisusip farisæerinut, allanut naakkittaatsuusunut, oqaasii. Marloriarluni naveerpai Guutip oqaasii innersuussutigalugit: „Piumasaraara nallittuineq, pilliutit toqutassat pinnagit.“ (Matthæusi 9:10-13; 12:1-7; Hosea 6:6) Kiffartornermi naalernerani Jiisusi ima oqarpoq: „Eqqanaq ilissi allakkanik ilisimasut farisiiarillu, ilumoortuusaartusi! Myntit dildillu kumaasallu pissarsiassi qulingi tunniuttarpasi, sumiginnartarpasili inatsisini pingaarnerutitat: naapertuilluarneq nallittuinerlu ilumoorsuserlu.“ — Matthæusi 23:23.

² Erseqqippoq Jiisusip nallittuineq pingaartittupilussuugaa. Ajoqersukkani ima oqarfigai: „Nallittuigitsi soorlu Ataatarsi nallittuisoq.“ (Lukasi 6:36) Tamatumunngali tunngatillugu ’Guutimik malinnittunngorsinnaajumalluta’ nalunngittariaqarparput nallittuineq qanorpiaq paasisariaqarnersoq. (Efesosimiut 5:1) Aamma nallittuinissarput kajumiginerussavarput pissuseq taanna qanoq pingaaruteqartiginersoq paasigutsigu.

Ikiortarialinnik nallittuineq

3. Nallittuinerup qanorpiaq paasisariaqarnera paasiniarlugu sooq Jehovamut ikiortissarsiortariaqarpugut?

³ Tussiaasiortoq ima erinarsorpoq: „Saammaallunilu naakkinnittuuvoq [nallittuisuuvoq, 1900/1961] [Jehova], kamajaatsuulluni ilumoorsusermillu peqangaarluni. Tamanut ajunngisaartarpoq [Jehova], pinngortitaminut tamanut naakkinnittuuvoq [nallittuivoq, 1900/1961].“ (Tussiaat 145:8, 9) Jehova tassaavoq „Ataataq nallittuisoq Guutilu tuppallersaajuartoq“. (2 Korinthimiut 1:3) Nallittuineq ersersinneqartarpoq allanik misiginneqatiginninnikkut. Pissusiuvoq Guutip kinaassusianut ilaasoq pingaarutilik. Taamaattumik taassuma maligassiaa uagutsinnullu siunnersuutai nallittuinerup qanorpiaq paasisariaqarneranik ilinniarfigisinnaavavut.

4. Esaja 49:15 nallittuineq pillugu sumik ilinniarfigaarput?

⁴ Esaja 49:15-imi Jehova ima oqarpoq: ’Arnap naalungianngui puiortarnerpaa, timimi iluata erniaa nallittussanagu?’ (1900/1961) Misigissutsit Jehovap nallittuinissaminut kajumississutigisai anaanaasup milutsitsisup qitornaminut misigissusiinut assersuunneqarput. Immaqa naalungiarsuk nerisinneqartariaqarpoq  allanilluunniit pisariaqartitsivoq. Tamanna pissutigalugu anaanaasoq misiginneqatiginnilertarpoq, misiginneqatiginninnilu naalungiarsuutimi pisariaqartitaanik isumaginninnissamut kajumississutigisarpaa. Jehova nallittukkaminut taamatut misigissuseqarpoq.

5. Jehovap Israelikkunnut ’nallittuingaartuunini’ qanoq ersersippaa?

⁵ Allanik misiginneqatiginninneq nersortariaavoq, ikiortariallilli iluaqutissaannik iliuuseqarnikkut misiginneqatiginninnermik ersersitsineq pitsaaneruvoq. Maluginiariaruk Jehova ukiut 3500-t missiliorlugit matuma siorna kiffani Egyptenimi inussiaataammata qanoq periarnersoq. Mosesi ima oqarfigaa: „Innuttama Egyptenimi naalliunnerat takusimavara, inussianillu sulisitsisut pillugit nimaarlutik nillianerat tusarpara. Erloqissutaat nalunngilakka. Taamaattumik aqqarpunga Egyptenimiut assaannit aniguisikkumallugit nunamillu taassumannga majuartikkumallugit nunamut ajunngitsumut aallariarfittuumut, nunamut immummik tungusunnitsuummillu kuuttumut.“ (2 Mosesi 3:7, 8) Israelikkut ukiut 500-t missiliorlugit Egyptenimit aniguisinneqarnerata kingorna Jehovap ima eqqaasippai: „Uanga Israeli Egyptenimit majuartippara Egyptenimiunillu naalagaaffinnillu qunutitsisunit allanit tamanit aniguisillusi.“ (1 Samueli 10:18) Israelikkut Guutip najoqqutassiaanik naapertuilluartunik maleruaajunnaartaramik ajornartorsiorajupput. Taamaakkaluartorli Jehovap misiginneqatigai, ikioqattaarpaalu. (Eqqartuussisut 2:11-16; 2 Nalunaarsuutit 36:15) Tamanna Guutitta asannittup annikilliortunut, navianartorsiortunut ajornartorsiortunulluunniit qanoq periartarneranut erseqqissaataavoq. Jehova ’nallittuingaartuuvoq’. — Efesosimiut 2:4, 1900/1961.

6. Jiisusi Kristusip Ataatami nallittuinera qanoq ilaarpaa?

⁶ Jiisusip nunarsuarmiikkallarami Ataatami nallittuinera naammalluinnartumik ilaarpaa. Jiisusi qanoq periarpa angutit tappiitsut marluk ima qinnuigimmanni: „Naalagaq, Daavip ernera, naakkigitigut!“ Tupinnartuliornikkut isigisaqarsinnaalerseqqeqqullutik Jiisusi kimigiiserfigaat. Jiisusi qinnuigineqarnermisut iliorpoq, misigissuseqarlunilu taamaaliorpoq. Biibilimi ima allassimavoq: „Jiisusip nalligingaalerpai isaasigullu attorlugit. Erniinnarlu tappissipput.“ (Matthæusi 20:30-34) Naakkinninnini misiginneqatiginninninilu kajumississutigalugit Jiisusi tappiitsut, anersaapilullit, pupissut angajoqqaallu assigiinngitsunik naalliuutilinnik meerallit iluaqutissaannik amerlasuunik tupinnartuliorpoq. — Matthæusi 9:27; 15:22; 17:15; Markusi 5:18, 19; Lukasi 17:12, 13.

7. Jehova Guutip taassumalu ernerata maligassiaat nallittuineq pillugu sumik ilinniarfigaavut?

⁷ Jehova Guutip Jiisusillu Kristusip maligassiaanni erserput nallittuinerup immikkoortui marluk — tassa atugarliortunik misiginneqatiginnillunilu naakkinninneq, taavalu taakkua iluaqutissaannik iliuuseqarneq. Tassa nallittuissagaanni misigissuseqartariaqarlunilu iliuuseqartariaqarpoq. Nallittuineq Biibilimi amerlanertigut ikiortarialinnik ajunngisaarfiginninnermut tunngatinneqartarpoq. Nallittuinerli eqqartuussinermut tunngasutigut qanoq ersersinneqartarpa? Aamma arlaannik iliuuseqarnaveersaarneq, assersuutigalugu pillaanaveersaarneq, nallittuinermut ilaava?

Unioqqutitsisunik nallittuineq

8, 9. Daavi Batsebamik ajortulioqateqarnermi kingorna qanoq nallittorneqarpa?

⁸ Pruffiitip Natanip kunngi Daavi Batsebamik kinguaassiuutitigut inuunerloqateqarsimanera pillugu eqqaasereermagu qanoq pisoqarnersoq misissoriartigu. Daavi peqqissimisoq ima qinuvoq: „Saammaannga ajunngissutsinni, Guuti, unioqqutitsinikka piiarigit nallittuingaarninni! Salinnga pinerluutaarulluinnarlunga, minguersannga ajortaajarlunga! Massami unioqqutitsinikka ilisimavakka, ajortuliaralu sianigiuarpara. Ilinnut, ilinnuinnaq, ajortulisimavunga illillu isinni ajortunik iliorsimallunga.“ — Tussiaat 51:3-6.

⁹ Daavip ajortuliorsimanini aliasuutigingaarpaa. Jehovap isumakkeerfigaa taassumunnga Batsebamullu pillaatini sakkukillisillugu.  Mosesip inatsisai naapertorlugit tamarmik toqutaasussaagaluarput. (5 Mosesi 22:22) Ajortuliamik kingunipiluisa ilaat atortariaqarpaat, inuuinnartinneqarlutilli. (2 Samueli 12:13) Guutip nallittuineranut ilaavoq ajortulianik isumakkeerfiginninneq. Imaanngilarli naleqquttumik pillaatissiineq ajortoq.

10. Sooq Jehovap nallittuingaarnera atornerlussanngilarput?

¹⁰ ’Inukkut ataasiinnakkut [Adamikkut] ajorti silarsuarmut tikiummat’ ’ajortillu toqu akissarsiaritimmagu’, inuit tamarmik toqusariaqarput. (Romamiut 5:12; 6:23) Jehovap eqqartuussigaangami nallittuisarnera qujamasuutigisinnaaqaarput. Mianersuutigisariaqarparpulli Guutip nallittuineranik atornerluinnginnissarput. Mosesimik allakkat tallimaanni 32:4-mi ima allassimavoq: „Naapertuilluartuupput [Jehovap] aqqutigisai tamarmik.“ (1990) Guutip nallittuigaangami naapertuilluarnermut najoqqutassiani naammalluinnartut sumiginnarneq ajorpai.

11. Daavip Batsebamik ajortulioqateqarneranut tunngatillugu Jehova naapertuilluarneq eqqarsaatigalugu naleqquttumik qanoq aalajangiiva?

¹¹ Daavip Batseballu toqumut eqqartuunneqarnissaraluartik pinngitsuussappassuk ajortuliaannik isumakkeerfigineqaqqaartariaqarput. Israelimi eqqartuussisut taakkuninnga isumakkeerfiginninnissamut piginnaatitaanngillat. Eqqartuussisut pineqartoq suliarisimagaluarunikku toqumut eqqartuussinissartik periarfissatuarisimassagaluarpaat. Inatsisini tamanna piumasarineqarpoq. Jehovalli Daavimut angerutsini pissutigalugu paasiniarusuppaa Daavip ajortuliaanik isumakkeerfiginninnissamut tunngavissaqarnersoq. (2 Samueli 7:12-16) Taamaattumik Jehova Guuti „nunarsuarmik tamarmik eqqartuussisuusoq“ ’uummammillu paasiniaaqqissaartartoq’ aalajangerpoq suliassaq tamanna nammineq suliariniarlugu. (1 Mosesi 18:25; 1 Nalunaarsuutit 29:17) Guutip Daavip uummammiui takusinnaavai, peqqissiminera qanoq ilumoortiginersoq nalilersinnaallugu isumakkeerfigisinnaallugulu.

12. Inuit ajortillit Guutip nallittuinera qanoq iluaqutigisinnaavaat?

¹² Jehovap ajorti kingornussarput pillugu pillarneqarnissarput pinngitsoorsinnaanngortillugu uagutsinnik nallittuinera naapertuilluartuuneranut naapertuulluinnarpoq. Naapertuilluarnermut najoqqutassiani unioqqutinnagit ajortimik isumakkeerfiginninnissaq ajornarunnaarsinniarlugu Jehovap ernini, Jiisusi Kristusi, utertitsissutitut pilliutigaa — tassa nallittuinerit annerpaartaat. (Matthæusi 20:28; Romamiut 6:22, 23) Guutip nallittuinera iluaqutigisinnaajumallugu taamaalillutalu ajorti kingornussarput pillugu pillarneqanngitsoorsinnaajumalluta, ’Ernermut uppertariaqarpugut’. — Johannesi 3:16, 36.

 Guuti nallittuisoq naapertuilluartorlu

13, 14. Guutip nallittuinera naapertuilluarneranit sakkukillisinneqarpa? Nassuiaruk.

¹³ Jehovap nallittuinera naapertuilluarnermut najoqqutassiaanik unioqqutitsinngikkaluartoq, oqartoqarsinnaava naapertuilluarneranut arlaatigut sunniuteqartoq? Guutip nallittuinera naapertuilluarneranik sunniutikinnerulersitsiva tamatuminnga sukanninnginnerulersitsilluni? Naagga.

¹⁴ Pruffiiti Hosea aqqutigalugu Jehovap Israelikkut ima oqarfigai: „Uanga nuliassattut angerfigissavakkit naassaanngitsumik; angerfigissavakkit iluarnermi naapertuilluarnermilu, ajunngissutsimi naakkinnissusermilu [nallittuinermilu, NV].“ (Hosea 2:21) Allassimaffimmi tamatumani erseqqippoq Jehovap nallittueriaasia pissusiinut allanut, ilaatigut naapertuilluarneranut, naapertuuteqissaartuaannartoq. Jehova „[Guutiuvoq] nallittuisoq saammaasorlu, . . . unioqqutitsinernillu, ajortulianillu isumakkiisoq, kisianni pisuusumik pillaanngitsoorneq ajortoq“. (2 Mosesi 34:6, 7) Guutiuvoq nallittuillunilu naapertuilluartoq. Biibilimi ima allaatigineqarpoq: „Qaarsuuvoq [Jehova], naammalluinnartuupput suliai, innarluitsuupput [naapertuilluartuupput, 1990] aqqutigisai tamarmik.“ (5 Mosesi 32:4) Guutip naapertuilluarnera naammalluinnartuuvoq, aamma nallittuineranut tunngatillugu taamaappoq. Pissusiisa taakkua arlaannaalluunniit malunnarnerunngilaq, aamma taakkua arlaannaalluunniit aappaanit sakkukillisinneqartariaqanngilaq. Tamarmik imminnut naapertuulluinnarlutik sunniuteqarput.

15, 16. (a) Guutip naapertuilluassusiata sukannersuunnginnera sumit erserpa? (b) Guutip pissutsit aaqqissuussaanerannut ajortumut matumunnga eqqartuussutini naammassippagu Jehovap kiffaasa suna qularutigissanngilaat?

¹⁵ Jehovap naapertuilluassusia sukannersuunngilaq. Naapertuilluarneq eqqartuussisoqarnermut tunngasunik eqqaasitsiuaannangajappoq, aamma eqqartuussut amerlanertigut unioqqutitsisut pisassaannik pillarneqarnerannik kinguneqartarpoq. Guutilli naapertuilluarnera aamma annaanneqartariaqartut annaanneqarnerannik kinguneqarsinnaavoq. Assersuutigalugu Sodomamiut Gomorramiullu guutiitsut piuneerunneqarmata ataataanerpaaq Loti paniilu marluk annaanneqarput. — 1 Mosesi 19:12-26.

¹⁶ Qularutigissanngilarput Jehovap pissutsit aaqqissuussaanerannut ajortumut maanna atuuttumut eqqartuussutini naammassippagu, pallorfiginnittut ilumoortut ’amerlangaartut’ ’atisaminnik qaqortisitsillutik Savaaqqap aavanut eqqiaasimasut’ asattuunneqarumaartut. Taamaalillutik ’annikilliortitaangaarnermit aniguiumaarput’. — Saqqummersitat 7:9-14.

Sooq nallittuisariaqarpugut?

17. Nallittuisuunissamut suna pissutissaalluarpa?

¹⁷ Jehovap Jiisusillu Kristusip maligassiaanni paasivarput nallittuineq qanorpiaq paasisariaqarnersoq. Ussatit 19:17-imi nallittuinissatsinnut pissutissaalluartoq eqqaaneqarpoq: „Piitsumik ikiuisoq [Jehovamut] taarsigassarsisitsisuuvoq, [Jehovallu] taarsiiffigissavaa ajunngitsuliornerata taamaaqataanik.“ Jehova nuannaartarpoq nallittuisarnitsigut ilaaraangatsinni aamma ernini ilaaraangatsigu. (1 Korinthimiut  11:1) Aamma allat nallittuinissaminnut kajumississutigisarpaat, uagummi allanik nallittuisarutta allat uagutsinnik nallittuinissaat ilimanarnerussaaq. — Lukasi 6:38.

18. Sooq nallittuiniarluta ilungersortariaqarpugut?

¹⁸ Nallittuineq pissuserpassuarnit ajunngitsunit katitigaavoq, soorlu isumakkeerfiginnittuunermit, asannittuunermit, inussiarnersuunermit ajunngitsuunermillu. Nallittuineq misiginneqataanermit allanullu paasinnittuunermit aallaaveqarpoq. Jehovap nallittuisuunera naapertuilluartuuneranik sanngiillisitsineq ajorpoq, taamaakkaluartorli kamajuippoq, aamma naammagittarluni unioqqutitsisut peqqissiminissaannut allamillu isumataarnissaannut naammattumik piffissalerpai. (2 Petrusi 3:9, 10) Taamaattumik nallittuineq naammagittartuunermut kamaginnittuunermullu attuumassuteqarpoq. Nallittuineq pissutsinit ajunngitsunit arlalinnit — ilaatigut anersaap inerititaanit — katitigaagami, pissutsinik taakkuninnga ineriartortitsinissamut periarfissaqalersitsisarpoq. (Galatiamiut 5:22, 23) Nallittuiniarluta ilungersornissarput pingaaruteqarluinnarpoq!

„Pilluarput nallittuisut“

19, 20. Nallittuinerup eqqartuussummik ajugaasimaarutiginninnera qanoq paasisariaqarpa?

¹⁹ Ajoqersukkap Jaakup paasitippaatigut nallittuineq sooq pissusitsinni malunnarnerulersittariaqaripput. Ima allappoq: „Naakkittarnerup [Nallittuinerup, NV] eqqartuussut ajugaasimaarutigaa.“ (Jaaku 2:13) Jaakup matumani eqqartorpaa Jehovamut kiffaasup allanik nallittuisarnera. Nallittuinerup eqqartuussut ajugaasimaarutigaa ima paasillugu inuup ’Guutimut nassuernissaanut’ piffissanngorpat, Jehovap inuup taassuma nallittuiniarluni iliuusii eqqarsaatigissagai ernermilu utertitsissutitut pilliutaa tunngavigalugu isumakkeerfigalugu. (Romamiut 14:12) Qularutissaanngilaq Daavi Batsebalu ajortuliormata, Daavip nallittorneqarneranut pissutaasut ilaat tassaasoq taassuma nammineq nallittuisarnera. (1 Samueli 24:5-8) ’Eqqartuussulli naakkittaatsuussaaq naakkittartuunngitsunut’. (Jaaku 2:13) Tupinnanngilaq Guutip ’naakkittaatsut’ ’toqumik pisassaqanngitsoortussaanngitsutut’ isigimmagit. — Romamiut 1:31, 32.

²⁰ Qaqqami oqaluutsimini Jiisusi ima oqarpoq: „Pilluarput nallittuisut, taakkumi nallittorneqassapput.“ (Matthæusi 5:7) Tassani allassimasut ersersitsilluarput Guutimit nallittorneqarumasut namminneq nallittuisuusariaqarnerannik! Allaaserisami tulliuttumi sammineqassaaq ulluinnarni qanoq ililluta nallittuisinnaanersugut.

Suna ilikkarpiuk?

• Nallittuineq qanoq paasisariaqarpa?

• Qanoq nallittuisoqartarpa?

• Jehovap Guutitut nallittuisuullunilu naapertuilluartuunera qanoq paasisariaqarpa?

• Sooq uagut nallittuisuusariaqarpugut?

[Atuaqqissaarnermi apeqqutit]

[Qupp. 23-mi assiliartaq]

Jehovap annikilliortunut misigissusii itisuut anaanaasup naalungiarsuutiminut misigissusiisut ipput

[Qupp. 25-mi assiliartaq]

Jiisusip tupinnartuliai nallittuineq pillugu sumik ilinniarfigaavut?

[Qupp. 26-mi assiliartaq]

Jehova Daavimik nallittuinermigut naapertuilluanngitsuliorpa?

[Qupp. 27-mi assiliartaq]

Guutip inunnut ajortilinnut nallittuinera naapertuilluarneranut naapertuuppoq