1, 2. Nalinginnaasumik angajoqqaat meeqqallu imminnut qanoq misigissuseqarfigisarpat, ilaannikkulli suna ajornakusoortissinnaasarpaat?

USA-MI meerarpassuit ima aperineqarsimapput: “Paasigukku angajoqqaatit aqagu toqusussaasut ullumi qanoq oqarfigerusussagaluarpigit?” Amerlanerit akipput ajornartorsiutit isumaqatigiinngissutilluunniit oqaloqatigiissutigerusunnagit. Angajoqqaatilli ima oqarfigerusuppaat: “Utoqqatserpunga” aamma “asanerpaavakkit”. — For Parents Only, Shaunti Feldhahnimit aamma Lisa Ricemit atuakkiaq.

² Nalinginnaasumik meeqqat angajoqqaaminnik asannittarput, aamma angajoqqaat meeqqatik asavaat. Ingammik Guutimut kiffaasut taamaapput. Taamaakkaluartorli angajoqqaat meeqqallu attaveqaqatigiittarnerat ajornakusoorsinnaasarpoq. Sooq taamaappa? Sooq angajoqqaat meeqqallu pissutsit aalajangersimasut oqaloqatigiissutigissallugit ajornakusoortittarpaat? Angajoqqaat meeqqallu attaveqaqatigiittarnertik pitsanngorsarniarlugu susinnaappat?

3. (a) Sooq ilaqutariippassuit attaveqaqatigiilluartarnissartik ajornakusoortittarpaat? (b) Sooq ilaqutariit Israelikkuusut attaveqaqatigiilluartarnissartik ajornannginnerutissimavaat?

³ Ilaqutariippassuit attaveqaqatigiilluartarnissaminnut piffissaasuasarput. Israelikkulli nalaanni pissutsit allaanerulluinnarput. Mosesip Israelikkut ataataasut meeqqaminnik Guutip inatsisai pillugit ilinniartitsisarnissaannik peqqugamigit ima oqarfigai: “Erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.” (5 Mos 6:6, 7) Taamanikkut meeqqat anaanartik angerlarsimaqatigisarluguluunniit  ataatartik sulinerani ilagisarpaat. Meeqqat angajoqqaallu peqatigiittarnissaminnut oqaloqatigiittarnissaminnullu piffissaqarluartarput. Taamaattumillu angajoqqaat meeqqami pisariaqartitaat suunersut aamma kissaataat kinaassusiallu ilisimalluartarpaat. Aamma meeqqat angajoqqaatik ilisimalluartarpaat.

4. Suna pissutigalugu ullumikkut ilaqutariit attaveqaqatigiittarnissartik ajornakusoortittarpaat?

⁴ Ullumikkut pissutsit allaanerulluinnarput. Nunat ilaanni allaat meeraaqqat, marluinnarnik ukiullit, atualertinneqartarput. Angajoqqaarpassuit angerlarsimaffitsik qimallugu suliartortarput. Aamma angajoqqaat meeqqallu peqatigiikkaangamik piffissartik fjernsynernermut imaluunniit qarasaasianik mobilinilluunniit atuinissamut atortarpaat. Ilaqutariippassuarni angajoqqaat meeqqallu imminnut iluamik ilisarisimaneq ajorput. Allaat attaveqaqatigiippiarneq ajorput.

5, 6. Angajoqqaat ilaat meeqqaminnut piffissaqarnerusinnaajumallutik inuunerminni qanoq allannguisimappat?

⁵ Ilaquttannik peqateqarnerunissannut iliuuserisinnaasannik eqqaasaqarsinnaavit? (Efesosimiut 5:15, 16 atuakkit). Ilaqutariit ilaat isumaqatigiittarput fjernsynernermut imaluunniit qarasaasiamik atuinermut piffissaq atortagartik annikillisinniarlugu. Allat aalajangertarput minnerpaamik ullormut ataasiarlutik nereqatigiittarniarlutik. Ilaqutariittut atuaqqissaaqatigiittarneq angajoqqaat meeqqallu Biibilimik atuaqqissaaqatigiinnerminni imminnut ilisarisimallualernissaannut periarfissatsialaavoq. Tamannali kisiat ilaqutariit peqatigiittarnissaminnut atortartussaanngilaat. Ullut tamaasa oqaloqatigiittarnissaminnut piffissaqartariaqarput. Meeqqavit aninnginnerini qiimmaallannartumik oqarfigisakkit, ullormut allassimaffimmik eqqartueqatigisakkit imaluunniit qinoqatigisakkit. Tamanna ullup ingerlanerani iluaqutigingaarsinnaavaat.

⁶ Angajoqqaat ilaat meeqqaminnut piffissaqarnerusinnaajumallutik inuunerminnik allannguisinnaasimapput. Assersuutigalugu arnaq meeqqani marluk piffissaqarfiginerusinnaajumallugit ulloq naallugu suliffimminit soraarpoq. Ima oqarpoq: “Tamatta ullaakkut  atuariartorniarluta suliartorniarlutaluunniit anipallanniartarpugut. Unnukkut angerlaraangama meeqqakka paarsisuminnit innartinneqareersimasarlutillu sinilereersimasarput.” Suliffimminit soraarmat ilaqutariit aningaasaatikinnerulerput, meeqqamilli eqqarsaataat ajornartorsiutaallu ilisimallualersimanerarpai. Ima nangippoq: “Qinnutaannut tusarnaartarama siunnersorsinnaallugillu qiimmassarsinnaallugillu ilinniartissinnaavakka.”

7. Angajoqqaat meeqqallu suna naammagittaalliuutiginerusarpaat?

⁷ For Parents Only-mik atuakkiortut inuusuttorpassuit apersoreerlugit ima oqarput: “Meeqqat angajoqqaatik pillugit naammagittaalliuutigisartagaat nalinginnaanerpaaq mannaavoq: ‘Tusarnaarneq ajorput.’” Angajoqqaat meeqqatik pillugit aamma taamatut oqarajupput. Taamaattumik ilaqutariit attaveqaqatigiilluarusukkunik imminnut tusarnaarluaqqissaartariaqarput. — Jaaku 1:19 atuaruk.

8. Angajoqqaat meeqqaminnut qanoq tusarnaaqqissaarsinnaappat?

⁸ Angajoqqaajususi meeqqassinnut tusarnaaqqissaartarpisi? Qasugaangavit ilinnulluunniit soqutaarpasinngitsoq pillugu meeqqavit oqaluunniaraangatsit tusarnaarnissaat ajornakusoortissinnaavat. Eqqaamassavalli ilinnut soqutaarpasinngitsoq meeqqannut pingaaruteqarsinnaammat. ‘Tusarasuartarneq’ meeqqap oqaasiinut tusarnaaqqissaaginnarnani qanoq oqarneranik maluginiaaneruvoq. Meeqqavit oqaloriaasianik, ussersorneranik pissusilersorneranillu maluginiaanikkut misigissusii paasisinnaavatit. Aperisarnissaq aamma pingaaruteqarpoq. Biibilimi ima allassimasoqarpoq: “Inuup eqqarsaatai imertut itisuutut ipput; silassorissoq taakkuninnga qalooraasinnaasarpoq.” (Uss 20:5, 1990) Meeqqatit oqaloqatigigaangakkit paasisimasaqassuseqartariaqarputit, tassa meeqqavit misigissusii paasiniartariaqarpatit. Tamanna ingammik pingaaruteqarpoq meeqqavit kanngugisaat pillugit oqaloqatigigaangakkit.

9. Sooq meeqqat angajoqqaaminnut naalattariaqarpat?

⁹ Meeraasusi angajoqqaasi naalattarpisigit? Guutip oqaasiani ima allassimasoqarpoq: “Ernera, ataatavit oqaaqqissaarutai naalattarniakkit anaanannillu ilinniakkatit puigornagit!” (Uss 1:8) Eqqaamassavat angajoqqaavit asammatsit ajunnginnerpaamillu kissaammatsit angajoqqaanut tusarnaartarnissat naalattarnissallu silatusaarnerussammat. (Ef 6:1) Angajoqqaatillu attaveqaqatigiilluartarussi eqqaamagukkulu angajoqqaavit asagaatsit taakkununnga naalannissat ajornannginnerulissaaq. Taamaattumik misigissutsitit pillugit angajoqqaatit oqaloqatigisakkit. Taamaaliortaruit paasilluarnerulersinnaassavaatsit. Soorunami aamma illit angajoqqaatit paasiniartartussaavatit.

10. Rehabeami pillugu oqaluttuaq qanoq ilinniutigaarput?

¹⁰ Inuusuttoqativit siunnersuutaat maleruartarpigit? Mianersorit! Imaassinnaavoq siunnersuutaat ilinnut nuannerunarpaluttoq, iluaqutiginavianngilalli. Allaat ilinnut ajoqutaasinnaavoq. Inuusuttut inersimasutut ilisimassuseqarnatillu misilittagaqanngillat. Inuusuttut amerlanerit aalajangiisarnitik siunissami qanoq ajoqutigisinnaanerlugit eqqarsaatigineq ajorpaat. Kunngip Salomop ernera, Rehabeami, pillugu oqaluttuaq eqqaamassavat. Taanna Israelikkunnut kunnginngorami utoqqaat siunnersuutaat maleruartussaagaluarpaa. Akerlianilli angutit inuusuttut peroriartoqatigisami siunnersuutaat sianiitsorpallannerusoq maleruarpaa. Tamatuma kingunerisaanik innuttaminit amerlanernit akerlilersorneqalerpoq. (1 Kng 12:1-17) Rehabeami assigeqinagu. Eqqarsaatitit misigissutsitillu pillugit angajoqqaatit oqaloqatigisakkit. Siunnersuutaat maleruarlugulu ilisimassusiat ilinniarfigiuk. — Uss 13:20.

11. Angajoqqaat oqaloqatikkuminaakkaangata qanoq pisoqarsinnaasarpa?

 ¹¹ Angajoqqaajususi kissaatigaasiuk meeqqassi inuusuttoqatitik siunersiorfiginagit ilissinnut siunersiortassasut? Taamaappat meeqqannut oqaloqatikkuminartuugit. Qatanngut niviarsiaq allappoq nukappiaq pillugu oqaluleraangami angajoqqaani tamatigut annilaangalertartut. Tamanna toqqissisimajunnaarutigisaramiuk oqaloqatigiunnaartarpai. Qatanngut niviarsiaq alla ima allappoq: “Inuusuttuararpassuit angajoqqaaminnit siunnersorneqarusuttarput, angajoqqaaminnilli soqutigineqanngikkaangamik allanik tusarnaarusuttunik, allaat misilittagakinnerusunik, oqaloqateqaannartarput.” Meeqqannut tusarnaarnissannut piumassuseqarit meeqqavillu sunaluunniit pillugu oqaluukkaangatsit misigissusii paasiniartakkit. Taamaaliortaruit meeqqavit oqaloqatigigaangamitsit toqqissisimasutut misigilissapput siunnersuutitillu maleruarusulissallugit.

12. Angajoqqaat qisuariartarnerat meeqqaminnut attaveqaqateqartarnerannut qanoq akornutaasinnaava?

¹² Attaveqaqatigiinnermut akornutaasinnaasut ilaat tassaavoq angajoqqaat meeqqami oqaaserisaannut misillertutut akueriuminaatsitserpaluttutullu qisuariartarnerat. Soorunami angajoqqaat kristumiut meeqqaminnik illersuerusuttarput. ‘Ulluni kingullerni’ inuuffigisatsinni anersaakkut allatigullu navianartorsiorfigisinnaasavut imaaginnavipput. (2 Tim 3:1-5) Taamaakkaluartorli angajoqqaat illersuiniarlutik iliuuserisaat meeqqamut ingasattajaarsorinarsinnaavoq.

13. Sooq angajoqqaat isummipallannaveersaartariaqarpat?

¹³ Angajoqqaat isummipallannaveersaartariaqarput. Ilumoorpoq meeqqavit kamaammernerminni ajuallannartumik oqarfigigaangatsit nipangersimanissat sapernartissinnaagit. Oqaaseqannginnermili tusarnaaqqissaaqqaarnissaq pingaaruteqarpoq. Kunngi Salomo silatooq ima allappoq: “Oqaaserineqartut naalaarluaqqaarnagit akissuteqarneq sianiitsorpallanneruvoq kanngunarsaataallunilu.” (Uss 18:13) Imminut noqissinnaaguit tusarnaarlutillu meeqqavit ‘isumaatsutut oqalunneranut’ pissutaasoq paasisinnaassavat. (Job 6:1-3) Pisumut tunuliaqutaasoq aatsaat paasilluarukku meeqqat pitsaanerpaamik ikiorsinnaavat. Angajoqqaatut asannittutut meeqqavit iluaqutigilluarsinnaasaannik oqaaseqarsinnaaniassagavit taakkununnga tusarnaartarit meeqqavillu misigissusii paasiniartakkit.

14. Sooq meeqqat oqalunniaasaartariaqarpat?

¹⁴ Meeraasusi aamma ilissi ‘oqalukkumaataartuusariaqarpusi’. Eqqaamajuk Guutip angajoqqaatit ilinnik perorsaasussatut akisussaaffilersimammagit, taamaattumik ingerlaannaq akerlilernaveersaartariaqarpatit. (Uss 22:6) Imaassinnaavoq ilittut misigisaqarnikuusut. Inuusukkallaramik kukkussutigisimasatik peqqissimissutigisarpaat illillu namminermissut kukkunissat kissaatiginagu. Angajoqqaatit akerarinagit iligaatit. Angajoqqaavit ajoquserusunnak ikiorusuppaatsit. (Ussatit 1:5 atuaruk). “Ataatat anaanallu ataqqikkit” taakkunanngalu asaneqarnittut taakku asallugit ersersittaruk. Tamanna angajoqqaavit ilinnik Jehovap piumasaatut perorsaaniaanertik ajornannginnerutilissavaat. — Ef 6:2, 4.

15. Asasatsinnut tunngatillugu nununissatsinnut utaqqisinnaassuseqarnissatsinnullu suna iluaqutigisinnaavarput?

¹⁵ Ilaannikkut asasavut utaqqisinnaassuseqarfigineq ajorpavut. Apustili Paulusi kristumiunut Kolossemiittunut ima allappoq: “Uiususi, nuliasi asassavasi, peqqarniisaarfigeqinasigillu. Ataataasusi, qitornasi narrassaassanngilasi qunulleqqunagit.” (Kol 1:1, 2; 3:19, 21) Paulusi Efesosimiunut ima allappoq: “Narrutsatsitsinerit, puffajanerit, kamannerit, nipiliornerit mitalliinerillu . . . eqqaasassanngilasiluunniit.” (Ef 4:31) Guutip  anersaavata inerititaa — soorlu kamaginninneq, saamaneq imminullu naalakkersinnaaneq — ersersinniartuartarutsigu, allaat pissutsini uisakajaarnartuni, nununissaq ajornannginnerulissaaq. — Gal 5:22, 23.

16. Jiisusip ajoqersukkani qanoq naqqippai, aamma taamatut periarnera sooq maluginiarnarpa?

¹⁶ Tamatumunnga tunngatillugu Jiisusi eqqarsaatigisiuk. Takorlooruk ajoqersukkani naggammik unnukkorsioqatigigamigit Jiisusi qanoq tatineqartigisimassasoq. Jiisusip nalunngilaa ungasinngitsukkut naalliunnartumik toqujartuaartussaalluni. Nalunngilaa Ataatami aqqa illernarsisitaassappat inuiaallu tamarmik annaanneqarsinnaassappata aalajaattariaqarluni. Unnukkorsiornermili tamatumani ajoqersukkat kina arlartik annerpaartarinerlugu assortuussutigilerpaat. Jiisusip nilliaffiginngilai sukannersumilluunniit oqaluunnagit. Akerlianik kamajaalluni eqqarsalersinniarpai. Pissutsini artornartuni imminik tapersersuisimanerannik eqqaasippai. Ajoqersukkamilu, allaat Saatanimit misilinneqarnerminni, aalajaattuarumaarnerat qularutiginngilluinnarlugu ersersippaa. Allaat qilammi kunngioqatigiumaarlugit neriorsorpai. — Luk 22:24-32.

17. Meeqqat nunusinnaanissaminnut suna iluaqutigisinnaavaat?

¹⁷ Meeqqat aamma nunusinnaasariaqarput. Inuusuttuaraaguit imaassinnaavoq angajoqqaannit naqqinneqartarnerit nuannarineq ajorit. Imaassinnaavoq angajoqqaannit tatigineqanngitsutut misigisutit. Eqqaamassavalli angajoqqaavit asagamitsit isumaalugisaraatsit. Imminut noqissinnaallutit tusarnaartarukkit naqqiinerallu akuerisarlugu ilinnik ataqqinnilerlutillu tatiginnilissapput. Assigiinngitsunut tunngatillugu imaassinnaavoq annerusumik kiffaanngissusileraatsit. Biibilimi inuup nunusinnaasup ilisimassuseqartuunera ima ersersinneqarpoq: “Sianiitsup kamannini tamatigut anittarpaa, ilisimasulli nunusinnaasarpaa.” — Uss 29:11.

18. Ilaqutariit attaveqaqatigiillualernissaminnut asanninneq qanoq iluaqutigisinnaavaat?

¹⁸ Taamaattumik asasavut angajoqqaajususi meeraasusilu, nikalluutigissanngilarsi ilaqutariiullusi attaveqaqatigiittarnersi kissaatigisassitut pitsaatiginngippat. Sulissutigiuarsiuk siunnersuutillu Guutip oqaasianiittut maleruartuarsigit. (3 Joh 4) Silarsuassami nutaami naammalluinnartunngussallutalu attaveqaqatigiittarnitsinni ajornartorsiuteqassanngilagut. Tamannali nalliutsinnagu kukkusartussaavugut. Taamaattumik utoqqatsernissannut tunuarsimaaqinak. Isumakkeerfiginneriaannaagit. ‘Asaqatigiinnikkut ataqatigiigitsi.’ (Kol 2:2) Asanninneq nukiuvoq. ‘Asanninneq kamagittartuuvoq aamma saamasuuvoq. Puffassartarinngilaq. Puttarsisaqartanngilaq. Tamatigut naammagittartuuvoq, tamatigut uppertarpoq, tamatigut neriuttarpoq, tamatigut ilalaartarpoq.’ (1 Kor 13:4-7) Asannittuliortuarussi ilaqutariittut attaveqaqatigiittarnersi pitsanngoraluttuinnassaaq. Tamanna pillualissutigissallugulu Jehovamut ataqqinaataassaaq.