1, 2. Sooq Jehova inuit ajornartorsiutaannut pisuutissanngilarput? Assersuuteqarit.

TAKORLOORIARUK uiusup pilluartup angerlarami angerlarsimaffimmini sequtserisoqarsimasoq takugaa. Pequtit puuguttallu sequminneqarsimapput natersuarlu aserorterneqarsimalluni. Angerlarsimaffia ajunaarnersuaqarfiuvorlusooq. Kina pisuutissavaa? Ima oqassasoraajuk: “Sooruna nuliara taamaaliorsimasoq?” Naamik, ilimanarneruvoq ima oqassasoq: “Kinaana taamaaliorsimasoq?” Nalunngilluinnarpaami nuliani asannittoq taamaaliunngisaannassasoq.

² Ullumikkut nunarsuarmi issoq, imeq, silaannarlu mingutsinneqarsimapput. Inuillu nakuusertuullutillu kinguaassiuutitigut inuunerluttarput. Biibilimit paasivarput Jehova tamakkununnga pisuunngitsoq, nunarsuarmi paratiisiusussatut nuanningaartutut uagutsinnut pinngortippaa. (1 Mos 2:8, 15) Jehova Guutiuvoq asannittoq. (1 Joh 4:8) Biibilimi allassimavoq Saatani Diaavulu tassaasoq “silarsuup naalagaanera” ajornartorsiutillu ilarpassuinut pisuusoq. — Joh 14:30; 2 Kor 4:4.

3. Ajornartorsiutitsinnut kukkusumik qanoq isiginnittaaseqalersinnaavugut?

³ Saatanili ajornartorsiutitsinnut tamanut pisuutinneqarsinnaanngilaq. Sooq? Nammineq kukkussutivut pissutigalugit ilaannikkut ajornartorsiuteqartaratta. (5 Mosesi 32:4-6 atuakkit). Tamanna paasilluaraluarlugu naammalluinnanngitsuugatta kukkusumik isiginnittaaseqalersinnaallutalu anersaakkut navianartorsiorsinnaavugut. (Uss 14:12) Saatani pisuutinnagu imminulluunniit pisuutinnata Jehova ajornartorsiutitsinnut pisuutilersinnaavarput, immaqalu allaat Jehovamut ‘kamalersinnaavugut’. — Uss 19:3.

4, 5. Kristumiu Jehovamut qanoq ‘kamalersinnaava’?

⁴ Jehovamut ‘kamalersinnaagatta’? Taamaalioraluaruttali  tamanna uagutsinnut ajoqutaaginnassaaq. (Es 41:11) Taalliortoq Amerikamiu ima allappoq: “Guutimik tilluaanissannut talitit naappallaarput.” Jehovamut kamakkutta ilimananngilaq kamannerput oqaatsitsigut ersersissagipput. Ussatinili 19:3-mi allassimavoq ‘inuk sianiissusiata orlutittaraa, uummataali Jehovamut kamattartoq’. Aap, inuk uummatimigut Jehovamut kamalerluni narrutsassinnaavoq. Tamannalu iliuusiinut sunniuteqalersinnaavoq. Assersuutigalugu Jehovamut kiffartornermini iliuuseqarpiarunnaarsinnaavoq imaluunniit ilagiinniit ungasilliartorsinnaalluni.

⁵ Suut Jehovamut kamassutigilersinnaavavut? Qanoq Jehovamut kamalernaveersaarsinnaavugut? Jehovamut attaveqarluartuarumalluta apeqqutit taakku akissutissarsisariaqarpavut.

6, 7. Sooq Mosesip nalaani Israelikkut Jehova naammagittaalliorfigilerpaat?

⁶ Jehovamut aalajaalluni kiffartortoq suut pissutigalugit uummatimigut Guutimut naammagittaalliulersinnaava? Narrutsannissatsinnut pissutaasinnaasut tallimat itsarlu Jehovamut kamalersut Biibilimi allaatigineqartut maanna sammissavavut. — 1 Kor 10:11, 12.

⁷ Allat ineriartornanngitsumik oqalunnerannit sunnertissinnaavugut. (5 Mosesi 1:26-28 atuakkit). Jehovap Israelikkunnut iliuuserisimasai eqqarsaatigeriakkit. Jehovap Egyptenimiut qulinik perlussiortillugillu Farao sakkutuuilu Immami Aappalaartumi suujunnaarsippai. Israelikkut aniguisinneqarput! (2 Mos 12:29-32, 51; 14:29-31; Tuss 136:15) Guutip innuttai nunamut neriorsuutigisamut isingajalerput. Kisianni Jehova naammagittaalliorfigilerpaat. Sooq uppernikillippat? Alapernaarsuisut ilaat qulit isumalluarnanngitsumik nalunaarutaat pissutigalugu Israelikkut nikallungalerlutillu qunulerput. (4 Mos 14:1-4) Tamatuma kingunerisaanik Jehovap Israelikkut ‘nunamut ajunngitsumut’ isernissaat akuerinngilaa. (5 Mos 1:34, 35) Oqaluttuaq tamanna qanoq ilinniarfigisinnaavarput? Allat isumalluarnanngitsumik oqalunnerat pissutigalugu uppernikillisinnaavugut Jehovallu innuttaminik siulersueriaasia naammagittaalliuutigilerlugu.

8. Sooq Esajap nalaani Judakkut Jehova ajornartorsiutiminnut pisuutippaat?

⁸ Ajornartorsiutit pisullu alianartut nikallungassutigisinnaavavut. (Esaja 8:21, 22 atuakkit). Esajap nalaani Judakkut akeqqaminnit saassunneqaramik naalliungaarput. Inuppassuillu kaapput naammattumik nerisassaateqannginnamik. Ajornerusumilli ajornartorsiuteqarput — Jehova tusarnaarunnaaramikku anersaakkut kaapput. (Am 8:11) Jehovamit ikioqqunatik ajornartorsiutiminnut Jehova kunngertillu pisuutilerpaat. Tamatumunnga assingusumik alianartunik nalaataqarnerput pissutigalugu ajornartorsiutivulluunniit allat pissutigalugit nikallungalerutta Jehovamit ikiorneqanngitsutut misigaluta Jehova pisuutilersinnaavarput.

9. Sooq Ezekielip nalaani Israelikkut Jehovap periaasianut kukkusumik isiginnittaaseqarpat?

⁹ Sunik tamanik ilisimasaqanngilagut. Ezekielip nalaani Israelikkut sunik tamanik ilisimasaqannginnamik Guutip periaasii kukkusoraat. (Ez 18:29) Israelikkut Guutip iliuusiinut pissutaasut tamaasa paasinngikkaluarlugit Guutimik eqqartuussisinnaatitaasutut aamma Guuti pitsaanerpaamik iliuuseqarnersoq aalajangiisinnaatitaasutut pissuseqalerput. Uagut qanoq assingusumik kukkusumik pissuseqalersinnaavugut? Immaqa Biibilimi oqaluttuarineqartut ilaat paasiuminaatsippavut. Immaqaluunniit inuunitsinni sooq aalajangersimasumik pisoqarnersoq paasisinnaanngilarput.  Eqqarsalersinnaavugut ‘Jehovap periaasia iluanngitsuusoq’. — Job 34:5.

10. Qanoq inuit ilaasa Adami assigilersinnaavaat?

¹⁰ Immaqa ajortuliavut kukkunivullu akisussaaffigerusunngilavut. Inuup siulliup, Adamip, Guuti ajortuliaminut pisuutippaa. (1 Mos 3:12) Adamip nalunngilaa Guutip inatsisaanik unioqqutitsilluni tamannalu pissutigalugu Guutimit pillarneqarumaarluni. Jehovali pisuutippaa, oqarporlusooq taassumannga nuliaalluanngitsumik tunineqarsimalluni. Taamanimiilli inuit Adami assigalugu namminneq ajortuliaminnut Guuti pisuutittarpaat. Imminut ima aperisariaqarpugut: ‘Kukkussutigisimasakka ima pakatsissutigitigisinnaavakka allaat Jehovap najoqqutassiai ingasappallaartutut isigilerlugit?’

11. Jona qanoq ilinniutigisinnaavarput?

¹¹ Imminuinnaq eqqarsaatigilersinnaavugut. Jehovap Ninevemiut asattuummagit pruffiiti Jona kamalerpoq. (Jon 4:1-3) Sooq? Jonap oqarnermisut illoqarfik suujunnaarsinneqanngimmat pruffiitioqqusersuusorineqarnissani annilaangagaa. Jonap allat nammineq pilluni isumaat Ninevemiut inuunerannit isumakuluutigineruaa. Jonatut eqqarsalersinnaavugut? Imminuinnaq eqqarsaatigisarutta inuit allat pisariaqartitaat sumiginnalersinnaavavut. Assersuutigalugu immaqa ukiorpassuarni Jehovap ullussarsuata qanillinera oqaluussissutigisimavarput. Ullulli tamatuma suli nalliutinnginnera pissutigalugu allanit isorineqarutta Jehova utaqqikatalersinnaavarput? — 2 Petr 3:3, 4, 9.

12, 13. Uummatitsinni Jehovap iliuuserisimasai pisulluunniit akuerisartagai apeqquserutsigit susariaqarpugut?

¹² Jehovap iliuuserisimasai imaluunniit pisut akuerisartagai apeqquserutsigit sussaagut? Eqqaamasariaqarparput Jehovamut isumaqataannginneq silatusaarnerunngitsoq. Ussatit 19:3-mi eqqaasinneqarpugut ilisimaatsuussuserput pissutigalugu ajornartorsiutitsinnut nammineq pisuussutigisatsinnut Jehova pisuutissinnaagipput. Taamaattumik Jehovamut kamalernaveersaarnissatsinnut  iluaqutaasut tallimat sammissavavut.

¹³ Jehovamut attaveqarluartuarit. Jehova attaveqarluarfigiuarutsigu kamaatilernavianngilarput. (Ussatit 3:5, 6 atuakkit). Jehova tatigisariaqarparput. Isumaqanngisaannassaagut Guutimit silatunerulluta pisariaqartitavulluunniit pingaaruteqarnerusut. (Uss 3:7; Oqal 7:16) Tamanna malikkutsigu ajortumik pisoqaraangat Jehovap pisuutinnginnissaanut iluaqutigissavarput.

14, 15. Allat ineriartornanngitsumik oqalunnerannit sunnertinnginnissatsinnut suna iluaqutigisinnaavarput?

¹⁴ Ineriartornanngitsumik oqalunnermit sunnerteqinak. Mosesip nalaani Israelikkut nunamik neriorsuutigisamik tiguaanissamut Jehovamit ikiorneqarumaarnerminnik upperinninnissaminnut pissutissarpassuaqarput. (Tuss 78:43-53) Alapernaarsuisulli qulit nuna pillugu isumalluarnanngitsumik nalunaaruteqarmata Israelikkut Jehovap ‘pissaanera eqqaanngilaat’. (Tuss 78:42) Jehovap uagutsinnut iliuuserisimasai nuannersut tamaasa eqqarsaatigeqqissaarutsigit taanna attaveqarluarfiginerulissavarput. Tamatuma kingunerisaanik allat oqaasii Jehovamit avissaarutiginavianngilavut. — Tuss 77:12, 13.

¹⁵ Jehovamit avissaarutigisinnaasarput alla tassaavoq qatanngutitsinnut ajortumik isiginnittaaseqarneq. (1 Joh 4:20) Assersuutigalugu Aroni palasiunertut toqqarneqarmat Israelikkut naammagittaalliuutigaat. Tamannali Jehovap imminut naammagittaalliornertut isigaa. (4 Mos 17:10) Tamatumunnga assingusumik Jehovap suliassaminik nunarsuarmi siulersuisut toqqarsimasai naammagittaalliorfigigutsigit tamanna Jehovamut naammagittaalliornerussaaq. — Hebr 13:7, 17.

16, 17. Sooq Jehova ajornartorsiutitsinnut pisuutissanngilarput?

¹⁶ Eqqaamajuk Jehova ajornartorsiutitsinnut pisuunngitsoq. Esajap nalaani Israelikkut Jehova kiffartorfigiunnaarsimavaat, Jehovalli suli taakku ikiorusuppai. (Es 1:16-19) Ullumikkut ajornartorsiuteqaraangatta Jehovap isumassorlutalu ikiorusukkaatigut nalunagu tuppallernaqaaq. (1 Petr 5:7) Allaat Jehovap neriorsorpaatigut nakussatsikkumalluta aalajaattuarsinnaaniassagatta. — 1 Kor 10:13.

¹⁷ Jobi Jehovamut aalajaatsuugaluarluni allanit naapertuilluanngitsuliorfigineqarpoq. Taamatut pineqarutta eqqaamasariaqarparput Jehova naapertuilluanngitsuliorfigineqarnitsinnut pisuunngitsoq. Jehovap naapertuilluanngissuseq uumigaa, naapertuilluarnerlu nuannaralugu. (Tuss 33:5) Jobip ikinngutaatut Elihutut isiginnittaaseqarisa, taannami ima oqarpoq: “Guuti ajortumik iliunngisaannarpoq, Ajugaqanngitsoq peqquserluttumik iliorneq ajorpoq.” (Job 34:10) Jehova ‘tunissutit ajunngitsut naammalluinnartuusullu tamaasa’ uagutsinnut tunniuttaramigit ajornartorsiutitsinnut pisuunngisaannarpoq. — Jaak 1:13, 17.

18, 19. Sooq Jehova tatigiuartariaqarparput? Assersuuteqarit.

¹⁸ Jehova tatigiuaruk. Guuti naammalluinnartuuvoq, pilersaarutaalu, imaluunniit eqqarsaatai, uagut eqqarsaatitsinnit qutsinnerupput. (Es 55:8, 9) Maniguuttuugutta anneruniajuitsuullutalu paasinnittaasitta killeqarnera nassuerutigisinnaasariaqarparput. (Rom 9:20) Amerlanertigut pisoq aalajangersimasoq pillugu sunik tamanik ilisimasaqartanngilagut. Ilimanarpoq ussat una ilumoortuusoq nammineq misigisimagit: “Eqqartuussivimmi siulliulluni oqaluttoq ilumoortuutinneqarallartarpoq, akerlerisaatali tikiulluni qanoq ittuunera ersersissinnaasarpaa.” — Uss 18:17.

¹⁹ Assersuutigalugu immaqa ikinngutigilluagarput paasisinnaanngisatsinnik nalinginnaasorinngisatsinnilluunniit iliuuseqarpoq. Eqqunngitsuliorsoripallassavarput?  Naamik, eqqarsassagunarpugut pisimasoq pillugu sunik tamanik ilisimasaqarnata. Ikinngutitsinnut naammalluinnanngitsumut taamatut asannittumik isiginnittaaseqarsinnaagutta soorunami Ataatarput qilammiusoq uagutsinnit qutsinnerusumik eqqarsartartoq tatiginerussavarput!

20, 21. Sooq Jehova ajornartorsiutitsinnut pisuutinngisaannassavarput?

²⁰ Eqqaamajuk ajornartorsiutitsinnut suut pissutiviunersut. Eqqaamasariaqarparput ajornartorsiutitta ilaannut nammineq pisuulluta. (Gal 6:7) Jehova ajornartorsiutitsinnut pisuutissanngilarput. Sooq? Assersuutigalugu takorlooriaruk inuk sukkasuumik biilertoq. Biilertup sukkavallaarluni sangulluni ajutooruni biililiorfik pisuutissavaa? Soorunami naamik! Tamatumunnga assingusumik Jehovap nammineq aalajangersinnaasunngortissimavaatigut. Aammali silatusaartumik aalajangernissatsinnik ilinniartissimavaatigut. Taamaattumik Jehova kukkusimanitsinnut pisuutissanngilarput.

²¹ Ajornartorsiutittali ilaannut aamma allanik pissuteqarpoq. Pisut ilaat ‘piffissami nalaatsornikkullu’ pisarput. (Oqal 9:11, NW) Eqqaamajuarullu Saatani Diaavulu silarsuarmi ajussusermut ingammik pisuusoq. (1 Joh 5:19; Saqq 12:9) Jehova akeraanani Saatani akeraavoq! — 1 Petr 5:8.

²² Artornartorsiorninni Josvap Kalebillu maligassiaat eqqaamajuk. Alapernaarsuisut qulit assiginagit angutit aalajaatsut marluk taakku isumalluartumik nalunaaruteqarput. (4 Mos 14:6-9) Jehova upperaat. Taamaakkaluartorli Josvap Kalebillu Israelikkut inoqajuitsumi ukiuni 40-ni angalaqatigisariaqarpaat. Josva Kalebilu Israelikkut ajortuliaannut pisooqataanngikkaluarlutik naammagittaalliulerpat narrutsallutilluunniit? Naamik. Jehova tatigaat, tamannalu pissutigalugu pilluaqquneqarput. Israelikkut amerlanersaat inoqajuitsumi toqugaluartut Josvap Kalebillu nunamut neriorsuutigisamut isernissaat Jehovap akueraa. (4 Mos 14:30) Jehovap uaguttaaq pilluaqqussavaatigut taassuma piumasaatut ‘qasunata’ iliortuarutta. — Gal 6:9; Hebr 6:10.

22, 23. Ajornartorsiutivut nikallungassutigigutsigit suut eqqaamasariaqarpavut?

²³ Ajornartorsiutitit, allat kukkunerat namminerluunniit kukkunerit pissutigalugit nikallungaleruit susariaqarpit? Eqqaamajuk Jehova Guutiusoq asseqanngilluinnartoq. Jehovap ilinnut neriorsuutigisimasai nuanningaartut takorluukkit. Aamma Jehova attaveqarluarfiginngikkukku inuunerit qanoq issagaluarnersoq eqqarsaatigisinnaavat. Jehovamut attaveqarluartuarit, uummatikkullu Jehovamut kamalinngisaannarit!