1, 2. Sooq Jehova savanik paarsisutut imminut assersuuppa?

JEHOVA savanik paarsisutut imminut assersuuppoq. (Ez 34:11-14) Tamanna Jehovap qanoq ittuuneranik paasinninnissatsinnut iluaqutigaarput. Savanik paarsisoq isumassuisoq savanut paarisaminut akisussaasutut misigivoq. Savaatini ivigartorfinnut imertarfinnullu siulersortarpai piaqqallu kissumiartarlugit. (Tuss 23:1, 2; Es 40:11) Ullukkut unnuakkullu savat nakkutigisarpai uumasunillu qaasuttunit illersortarlugit. (1 Sam 17:34, 35; Luk 2:8) Savaatinit tammarsimasut ujartarpai ajoqusersimasullu isumagisarlugit. — Ez 34:16.

² Itsaq Guutip innuttai amerlanerit savanik paarsisuupput naasorissaasuullutilluunniit. Taamaattumik taakkua Jehovap savanik paarsisutut imminut assersuunnera paasivaat. Nalunngilaat savat ajoquserneqassanngikkunik paarineqarluartariaqartut. Tamatumunnga assingusumik inuit Jehovamit paarineqartariaqarlutillu siulersorneqartariaqarput. (Mark 6:34) Jehovamit anersaakkut siulersorneqanngikkaangamik naalliuttarput. Suna eqqortuunersoq sunalu eqqunngitsuunersoq ilisimanngilaat, aamma sernissortissaqanngillat. Taakkuami “savatut paarsisoqanngitsutut” ipput. (1 Kng 22:17) Jehovamilli paarineqarumallutik aalajangersimasut pisariaqartitaminnik isumagineqartarput.

3. Allaaserisami matumani suut sammissavavut?

³ Uaguttaaq Jehovap savanik paarsisutut qanoq ittuunera paasivarput. Ullumikkut innuttaminik isumassuilluarnera misigaarput. Jehovap qanoq pisariaqartitatsinnik isumaginnittarlunilu siulersortaraatigut tamannalu iluaqutigiumallugu susariaqarnerluta maanna sammissavarput.

4. Jiisusip Jehovap savaatai qanoq paarai?

⁴ Jehovap Jiisusi ilagiinnut kristumiunut niaquusutut toqqarsimavaa. (Ef 1:22, 23) Jiisusip ‘paarsisup  ajunngitsup’ Ataatani assigilluinnarlugu “savat” asallugillu isumassorluartarpai. Allaat “savat” pillugit inuunini tunniuppaa. (Joh 10:11, 15) Jiisusip utertitsissutitut pilliutaa inunnut tamanut tunissutisiaavoq immikkorluinnaq ittoq, ilaa? (Matt 20:28) Jehovap siunertaraa Jiisusimik upperinnittup kialuunniit annaanneqassallunilu ‘naassaanngitsumik inuunissaa’. — Joh 3:16.

5, 6. (a) Kikkut Jiisusip savaatiminut paarsisunngortippai, savaatillu Jiisusip isumassuinera iluaqutigiumallugu susariaqarpat? (b) Utoqqaanertat siulersuinerannik malinninnissatsinnut pissutaasoq pingarnerpaaq suua?

⁵ Savaatit qanoq ersersittarpaat Jiisusi Kristusi paarsisoralugu? Jiisusi ima oqarpoq: “Savaatima nipiga tusartarpaat, uangalu ilisimavakka, malittarpaanngalu.” (Joh 10:27) Savaatit Paarsisup Ajunngitsup nipaa taassuma siulersuineranik malinnittuarnermikkut tusarnaartarpaat. Tamatumunnga ilaavoq Jiisusip savanik paarsisunngortitaanut naalanneq. Jiisusip nunarsuarmiikkallarami apustilit ajoqersukkanilu malinnitsiminik paarsisunngortippai oqarfigalugillu ‘savaaqqat nerleqqullugit’ (NW) ilinniarteqqullugillu. (Johannesi 21:15-17 atuakkit; Matt 28:20). Nutaarsiassaq nuannersoq oqaluussissutigineqarnerujartortillugu inuit amerlanerusut Kristusimut ajoqersuganngorput. Taamaattumik Jiisusip ilagiinni anersaakkut inersimalluartunik paarsisoqarnissaa isumagaa. — Ef 4:11, 12.

⁶ Kingusinnerusukkut Paulusip utoqqaanertat Efesosimeersut ima oqarfigai: “Anersaammi Illernartup taakkununnga nakkutilliisunngortippaasi Guutip ilagiissai ... paareqqullugit.” (ApS 20:28) Ullumikkuttaaq utoqqaanertat anersaamit illernartumit nakkutilliisunngortinneqartarput. Tamanna qanoq paasisariaqarpa? Piumasaqaatit Guutip oqaasiani isumassarsiarititaasumiittut tunngavigalugit toqqarneqartarmata. Taamaattumik utoqqaanertat naalakkaangatsigit Jehova Jiisusilu, Paarsisuunersaasut, ataqqisarpavut. (Luk 10:16) Tamanna utoqqaanertanut kajumilluta naalannissatsinnut pissutaavoq pingaarnerpaaq. Allamillu pissuteqarpoq taakkua siulersuinerannik malinninnissatsinnut.

7. Utoqqaanertat illit Jehovamut attaveqarluartuarnissannut qanoq ikiortarpaatsit?

⁷ Utoqqaanertat qatanngutiminnik kajumissaarigaangamik siulersuigaangamillu Biibili tunngavigiuaannartarpaat. Utoqqaanertat qatanngutimik qanoq inuunissaannik naalagaaniartuunngillat. (2 Kor 1:24) Ikiorusuppaalli najoqqutassiat Biibilimeersut tunngavigalugit namminneq aalajangiinissaannut. Taamaaliornermikkut utoqqaanertat ilagiit ataasiussuseqatigiinnissamut eqqisseqatigiinnissamullu ikiortarpaat. (1 Kor 14:33, 40) Biibilimi allassimammat utoqqaanertat ‘tarnivut pigaakkaat’ paasisariaqarpoq utoqqaanertat qatanngutit ilagiinniittut immikkut tamaasa Jehovamut attaveqarluartuarnissaannut ikiorusukkaat. Taamaattumik qatanngut unioqqutitsilersoq, imaluunniit unioqqutitsisimasoq, ikiorniapallattarpaat. (Gal 6:1, 2; Jud 22) ‘Siulersortitsinnut naalannissatsinnut’ amerlasuunik pissutissaqarluarpugut. — Hebræerit 13:17 atuaruk.

8. Utoqqaanertat qanoq ilagiit sernissortarpaat?

⁸ Apustilip Paulusip paarsisup asannittup qatanngutini Kolossemiut ima mianersoqquai: “Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.” (Kol 2:8) Mianersoqqussummit tamatumannga utoqqaanertat siulersuinerannik malinninnissatsinnut pissutaasoq pingaarutilik alla erserpoq. Qatanngutitik inunnit Jehovamit ungasillisitsiniartunit sernissortarpaat. Apustili Petrusi mianersoqqusivoq ‘pruffiitioqqusersut’ ‘ajoqersuinerluttullu’ kristumiunik sanngiitsunik Jehovamut naalakkunnaarsitsiniaassasut. (2 Petr 2:1, 14)  Ullumikkuttaaq utoqqaanertat pisariaqaraangaat mianersoqqusisarput. Utoqqaanertat kristumiuupput anersaakkut inersimalluartut misilittagallit. Biibili paasilluarsimallugulu sallusuissutinik Biibilimeersunik ilinniartitsillaqqikkamik utoqqaanertatut toqqagaapput. (1 Tim 3:2; Tit 1:9) Anersaakkut inersimalluarnertik, oqimaaqatigiissaarinertik ilisimassusertillu Biibilimeersoq iluaqutigalugit qatanngutiminnik siunnersuilluarsinnaapput.

9. Ullumikkut Jiisusip ilagiit qanoq anersaakkut nerlersorlugillu siulersortarpai?

⁹ Jehovap peqatigiissortani iluaqutigalugu nunarsuaq tamakkerlugu qatanngutigiissuit ilinniartillugillu siulersortarpai. Atuagassiaatitsinni atuagaatitsinnilu Biibili tunngavigalugu siunnersorneqartarpugut. Ilaannikkut utoqqaanertat toqqaannartumik Jehovap peqatigiissortaanit, assersuutigalugu allakkat imaluunniit nakkutilliisoq angalasartoq aqqutigalugit, siunnersorneqartarput. Siunnersueriaatsit taakku iluaqutigalugit Jehovap savaatai ersarissumik siulersorneqarput.

10. Qatanngut ilagiinnit qimagussimappat paarsisut isumassuisut sumik akisussaaffeqarpat?

¹⁰ Paarsisut isumassuisut savaatinik paarsineq sernissuinerlu akisussaaffigaat. Utoqqaanertat ingammik uppernikkut sanngiillisimasunik ingasattumilluunniit ajortuliorsimasunik isumassuisarput. (Jaaku 5:14, 15 atuakkit). Taakkua ilaat immaqa allaat ilagiinnit qimagussimapput Guutimullu kiffartorunnaarlutik. Paarsisoq isumassuisoq  qanoq ikiuisinnaava? Sapinngisani tamaat taakkuninnga ujaasissaaq ilagiinnullu uteqqinnissaannut kajumissaarilluni. Jiisusi ima oqarpoq: “Ataatassi qilanniittup piumasarinngilaa minninnguit ukua ilaannik ataatsimilluunniit tammartoqassasoq.” — Matt 18:12-14.

11. Sooq ilaasa utoqqaanertat siulersuinerannik maleruaanissartik unamminiarnartittarpaat?

¹¹ Jehova Jiisusilu Paarsisuupput naammalluinnartut. Taakkuali ilagiinnik paarsisunngortitaat inuinnaapput naammalluinnanngitsut. Tamanna pissutigalugu ilaasa utoqqaanertat siulersuinerannik maleruaanissartik unamminiarnartittarpaat. Immaqa ima eqqarsarput: ‘Utoqqaanertat uagutsitut naammalluinnanngitsuupput. Soormi taakkua siunnersuutaat maleruassavavut?’ Ilumoorpoq utoqqaanertat naammalluinnanngitsuusut. Taakkuali naammalluinnanngitsuunerannut kukkusarnerannullu eqqortumik isiginnittaaseqartariaqarpugut.

12, 13. (a) Itsaq Guutimut kiffaasut akisussaaffillit qanoq kukkusimappat? (b) Sooq Jehovap angutit akisussaaffillit kukkussutaat Biibilimi allatsissimavai?

¹² Jehovap itsaq innuttaminik siulersuisunngortitaasa kukkusarnerat Biibilimi allaatigineqarpoq. Assersuutigalugu Daavi Israelikkunnut kunnginngortitaavoq. Kingusinnerusukkulli Guutimut ajortuliorpoq arnaq katisimasoq innaakkamiuk uialu toqutaatillugu. (2 Sam 12:7-9) Aamma apustili Petrusi eqqarsaatigeriaruk. Kristumiut ilagiivini annertuumik akisussaaffilerneqaraluarluni ingasattumik kukkusarsimavoq. (Matt 16:18, 19; Joh 13:38; 18:27; Gal 2:11-14) Inuit oqaluttuarisaaneranni Adami, Eva, Jiisusilu kisimik naammalluinnartuusimapput.

¹³ Sooq Jehovap kiffami ilaasa akisussaaffillit kukkussutaat Biibilimi allatsissimavai? Ilaatigut taamaaliorpoq ersersinniarlugu innuttami siulersornissaannut angutinik naammalluinnanngitsunik atuisinnaanini. Aap, inuit naammalluinnanngitsut atortuaannarsimavai. Taamaattumik ullumikkut utoqqaanertat naammalluinnanngitsuunerat naammagittaalliornissatsinnut oqartussaassusiannillu sumiginnaanissatsinnut utoqqatsissutigissanngilarput. Jehovap taakkuninnga ataqqinnilluta naalannissarput piumasaraa. — 2 Mosesi 16:2, 8 atuakkit.

14, 15. Jehovap itsaq innuttaminik ilitsersueriaasia qanoq ilinniarfigisinnaavarput?

¹⁴ Utoqqaanertanut naalannissarput pingaaruteqarluinnarpoq. Sooq? Eqqarsaatigeriaruk ulluni artornartorsiorfiusuni Jehovap itsaq innuttani aniguisikkumallugit qanoq siulersortarai. Assersuutigalugu Israelikkut Egyptenimit aallarmata Guutip Mosesi Aronilu aqqutigalugit innuttani pingaarutilinnik ilitsersorpai. Aamma perluit qulingannit aniguisinneqarumallutik peqqussutit maleruartariaqarpaat. Peqquneqarput aalajangersimasumik nerissasut, savaaqqamik toqutsissasut aavanillu matup matserfianut tarngussissasut. Guutip innuttani toqqaannartumik taamatut peqquai? Naamik, Israelikkut utoqqaanertat Mosesimit ilitsersorneqarsimasut tusarnaartariaqarpaat. (2 Mos 12:1-7, 21-23, 29) Taamaaliornikkut Jehovap Mosesi utoqqaanertallu aqqutigalugit innuttani siulersorpai. Ullumikkut Jehovap kristumiut utoqqaanertat taamatut atortarpai.

¹⁵ Biibilimi Jehovap innuttami ilitsersornissaannut inunnik inngilinilluunniit atuisarsimanera pillugu oqaluttuarpassuit allat eqqaasinnaagunarpatit. Oqaluttuanit taakkunannga erserpoq Guuti allanik oqartussaassuseqalersitsisartoq. Taakku Guuti sinnerlugu oqariartortitaapput innuttaalu navianartorsiorfimminni annaanneqaqqullugit pisariaqartunik ilitsersuisarlutik. Ilimagilluinnarsinnaavarput  Jehova Harmagedonimi innuttaminut tamatumunnga assingusumik iliuuseqassasoq. Soorunami utoqqaanertat Jehovamut taassumalu peqatigiissortaanut sinniisutut akisussaaffillit oqartussaassutsiminnik qimmuinnginnissartik eqqumaffigisariaqarpaat.

16.  “Oqaaseq” Esajap allagaani 30:21-mi allassimasoq suua?

¹⁶ Jehovap innuttai tassaapput “savaatit katersat ataatsit” ‘paarsisumillu ataatsimit’, Jiisusimit Kristusimit, paarineqartut. (Joh 10:16) Jiisusip ajoqersukkani oqarfigai “silarsuup naggatissaanut allaat” najorumaarlugit. (Matt 28:20) Qilammi kunngitut pisussanut tamanut Saatanip silarsuaata suujunnaarsinneqarnissaanik kinguneqartunut oqartussaassuseqarpoq. Guutip peqatigiissortaani qanoq ataasiussuseqartuarlutalu isumannaattuartumiissinnaavugut? Tamanna Biibilimi ima akineqarpoq: “Nammineq siutinnik tusassavat tununnit oqaaseq: ‘Aajuna aqqusineq, taanna ingerlavigissavarsi!’” “Oqaaseq” allassimaffimmi eqqaaneqarmat Jehovap ilinniartitsissutai Biibilimiittut aamma Jehovap Jiisusillu paarsisunngortitatik aqqutigalugit oqaaserisartagaat pineqarput. — Esaja 30:21; Saqqummersitat 3:22 atuakkit.

17, 18. (a) Guutip innuttai qanoq navianartorsiorpat, sunali qularutiginngilluinnarsinnaavarput? (b) Allaaserisami tulliuttumi suna sammissavarput?

¹⁷ Biibilimi allassimavoq Saatani ‘løvitut uiannisaartutut angalasartoq iisassarsiorluni’. (1 Petr 5:8) Saatani uumasutut qaasuttutut sava sanngiitsoq savaluunniit savanit allanit qimaguttoq saassunniarlugu qamalluni utaqqisarpoq. Taamaattumik ilagiinnut Jehovamullu, uagutsinnik “paarsisuusumut nakkutilliisuusumullu”, qanittumik attaveqartuarnissatsinnut pissutissaqarluarpugut. (1 Petr 2:25) Saqqummersitani 7:17-imi annikilliornartussarsuarmit aniguisinneqarumaartut allaatigineqarput. Allassimavoq Jiisusip ‘paarissagai puilasunullu inuussutaasunut ingerlatissallugit. Guutillu qulliit tamaasa isaannit allarterumaarpai.’ Neriorsuut tamanna nuanningaarami, ilaa?

¹⁸ Kristumiut utoqqaanertat ilagiinnik paarsisuunerat akisussaaffiuvoq pingaaruteqarluinnartoq. Angutit toqqagaasimasut taakku Jiisusip savaataanik isumassuilluarnissartik qanoq qulakkeersinnaavaat? Apeqqut tamanna allaaserisami tulliuttumi akineqassaaq.