FRANÇOIS, nunami ineriartortinniakkami utoqqaanertaq, ima oqaluttuarpoq: “Qinersineq assortuussutaasoq pissutigalugu Jehovamut Nalunaajaasut tusindilippassuit qimarngusariaqarsimapput. Nerisassaaleqisoqarlunilu nakorsaatissaaleqisoqarpoq, pissarsiarineqarsinnaasullu akisoorujussuullutik. Aningaaseriviit matupput aningaasanillu tigusisarfiit imaarussimanngikkunik atorsinnaajunnaarlutik.”

Qatanngutit angutit immikkoortortaqarfinneersut ingerlaannaq aningaasanik ajornartoortoqartillugulu pisariaqartitanik nalunaajaasunut, illoqarfinni assigiinngitsuni naalagaaffilersaarfinni qimarngusunut, agguaassilerput. Eqimattat akersuuttut aqqusinermi assersuipput, illuatungeriilli nalunaajaasut kalluunnaveersaarluinnarnerat nalunnginnamikku immikkoortortaqarfiup biilii amerlanertigut ingerlaannarsinnaasarput.

François ima oqarpoq: “Naalagaaffilersaarfimmukartilluta lastbilitta tungaanut eqqaassisoqalerpoq. Aqerlulli eqqornata sarsuaannarput. Sakkutooq aallaasilisarluni tungitsinnut arpattoq takugatsigu kingumorsoriarluta illuanut saakkatta sukkanerpaamik immikkoortortaqarfimmut uterpugut. Inuuginnaratta Jehovamut qujamasungaarpugut. Aqaguani qatanngutit 130-t naalagaaffilersaarfimmiittut isumannaatsumut inissinneqarput. Taakkua ilaat immikkoortortaqarfimmukaanneqarput, tassanilu navianartorsiorunnaarnissaata tungaanut anersaakkut timikkullu pisariaqartitaannik isumassorpavut.”

François ima oqarpoq: “Kingusinnerusukkut immikkoortortaqarfik qujassutinik allagarsiarpassuarnik qatanngutinit illoqarfinni assigiinngitsuneersunit nassinneqarpoq. Qatanngutinit sumiiffinnit allaneersunit ikioriartorneqarnertik Jehovamik tatiginninnerulissutigaat.”

Ajunaarnersuaqartillugu qatanngutivut atugarliortut ima oqarfigiinnarneq ajorpavut: “Oqortunik atisiniarisi naammatsillusilu nerillusi.” (Jaak 2:15, 16) Timikkulli pisariaqartitaannik isumassortarpavut. Ukiuni hundredeni siullerni qatanngutit kaannersuaqarnissaanik mianersoqquneqareerlutik “ajoqersukkat [aalajangerput] tamarmik pisinnaasartik naapertorlugu nassitsissasut qatanngutinut Judæamiittunut ikiuutissanik”. — ApS 11:28-30.

Nittartakkatsinni, www.dan124.com-imi, immikkoortumi “Nyheder”-imi ajunaarnersuaqartillugu Jehovap Nalunaajaasui qanoq ikiueqqaartarnersut atuarneqarsinnaavoq. Assersuutigalugu 2012-imi decembarimi Manerassuarmi qeqertat ulussaarsuarmit Evanimit eqqorneqarneranut tunngatillugu ima allassimasoqarpoq: “Ilagiinnut sisamanut ikiueqqaarnermi atugassat, tassa nerisassat timikkullu eqqiluisaarnermut atugassat, tunniunneqarput, aamma Jehovap Nalunaajaasuisa nutserisoqarfiisa ilaat imermik minguitsumik aallerfigineqartarpoq. Tamatuma saniatigut eqimattat Jehovap Nalunaajaasui illut aserorsimasut iluarsartuullugillu illut imermit marullummillu  qarsunneqarsimasut tunillannartuiarlugillu serpalittaassuarmik salippaat.”

Jehovap kiffaasut pisariaqartitsisunik pigisatigut ikiuinissatsinnut kajumippugut. Inuilli aamma anersaakkut pisariaqartitsipput. (Matt 5:3, NW) Inuit tamatuminnga pisariaqartitsinerminnik aamma matussusiisariaqarnerminnik paasinninnissaannut ikiorneqarniassammata Jiisusip malinnitsini ajoqersuganngortitsiortoqquai. (Matt 28:19, 20) Tamatta suliassamik tamatuminnga naammassinninniarluta piffissarujussuaq, nukippassuit aningaasarpassuillu atortarpavut. Peqatigiiffitta tunissutit ilaat pigisatigut ikiuinermut atortarpai, pingaarnertulli aningaasat Guutip naalagaaffianut attuumassuteqartunik siuarsaanissamut nutaarsiassamillu nuannersumik siaruarterinissamut atortarpai. Taamaalilluta Guutimut tullitsinnullu asanninnerput ersersittarparput. — Matt 22:37-39.

Jehovap Nalunaajaasuisa nunarsuaq tamakkerlugu sulinerannik tapersersuisut tunissutigisartakkamik pitsaanerpaamik atorneqartarnerat qularinngilluinnarsinnaavaat. Qatanngutinnut pisariaqartitsisunut ikiueqataasinnaavit? Ajoqersuganngortitsiortornissamik suliaq tapersersorusuppiuk? Taamaappat “ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit”. — Uss 3:27.