Toqusunik ikuallaaneq Biibilimi akerlerineqanngilaq.

Inuit toqusimasut timaannik saarnginilluunniit ikuallaanerit Biibilimi oqaluttuarineqarput. (Jos 7:25; 2 Nal 34:4, 5) Inuit taakkua ataqqinartumik ilineqarnissaminnut qinngaqqunnarnerat tamatumunnga pissutaasimasinnaavoq. Ikuallanneqarnerannulli ataqqinartumik ilineqarnissamut qinngaqqunnarnerat pissutaajuaannanngilaq.

Tamanna kunngip Saulip taassumalu ernerisa pingasut toqunerannik oqaluttuamit erserpoq. Taakku sisamat filisterinut sorsutsillutik toqupput. Ernerusut ilaata, Jonatanip, Daavi ikinngutigilluarlugulu aalajaalluni tapersersorpaa. Israelikkut sapiitsut Jabeshimi Gileadimiittumi najugallit taakkua qanoq pineqarsimanerat tusaramikku timaat aariarlugit ikuallappaat saarngilu ilillugit. Kingusinnerusukkut Daavip Israelikkut taakkua iliuuserisimasaat pillugit nersorpai. — 1 Sam 31:2, 8-13; 2 Sam 2:4-6.

Biibilimi allassimavoq toqusimasut makitinneqarumaartut — tassa Guutip inuk uummassuseqalerseqqissagaa. Inuup toqusimasup ikuallanneqarsimanera ikuallanneqarsimannginneraluunniit apeqqutaatinnagu Jehovap taanna nutaamik timilerlugu makitissinnaavaa. Hebræerit pingasut aalajaatsut kunngimit Nebukadnesarimit aatsitsivimmi aamaannaasumi toqutassanngortinneqartut ikuallanneqarunik Guutimit makitinneqanngitsoornissartik annilaanngatigisariaqanngilaat. (Dan 3:16-18) Aammattaaq Jehovap kiffai aalajaatsut nazistit inissiarsuini toqutaallutillu ikuallanneqartut makitinneqanngitsoornissartik annilaanngatigisariaqarsimanngilaat. Guutip kiffai amerlasuut qaartartumeerisoqarnerani ajunaarsimallutillu arlaatigut nungutinneqarsimapput. Taakkuali makititaanissaat qularutissaanngilaq. — Saqq 20:13.

Jehovap makititsinissaminut inuup toqusimasup timerisimasaa pisariaqartinngilaa. Tamanna Guutip kristumiunik tanitanik qilammi inuuneqalernissaannut makititsineranit erserpoq. Kristumiut tanitat Jiisusi, ‘anersaakkut uummartitaasoq’, assigalugu kinaassusertik attatiinnarlugu anersaatut timeqarlutik makititaapput. Timimik pisataasa ilaannaalluunniit qilammut nassarsinnaanngilaat. — 1 Petr 3:18; 1 Kor 15:42-53; 1 Joh 3:2.

Makititsisoqarumaarneranik neriuuterput timip qanoq pineqarsimaneranik tunngaveqarnani Guutilli neriorsuutiminik eqqortitsiumaarneranik upperinninnitsinnik tunngaveqarpoq. (ApS 24:15) Soorunami itsaq Guutip tupinnartuliorluni makititsisimanera siunissamilu makititsiumaarnera tamakkiisumik paasisinnaanngilarput. Taamaakkaluartorli Jehova tatigaarput. Taassuma neriorsuutini “tamanut upperisassanngortippaa [Jiisusi] toqusunit makitikkamiuk”. — ApS 17:31; Luk 24:2, 3.

Kristumiut ilisisarnermut tunngatillugu nunagisaminni ileqqut, paasinnittaatsit inatsisillu atuuttut innimigigunikkit silatusaassapput. (2 Kor 6:3, 4) Ikuallanneqarnissaq ikuallanneqannginnissarluunniit inuup nammineq ilaqutaasulluunniit aalajangigassaraat.