1, 2. Jehovap Mosesi sumik suliassippaa, aamma qanoq neriorsorpaa?

TAKORLOORUK Guutip innuttai sinnerlugit naalakkersuisumut nunarsuarmi pissaaneqarnerpaamut oqaluttussaallutit. Qanoq misigissagaluarpit? Ilimanarpoq annilaangassasutit, ersissasutit oqalussinnaanngitsutullu misigissasutit. Saqqummiinissat qanoq piareersassaviuk? Guutip sinniisaatut oqartussaassuseqarlutit oqalussavit?

² Mosesi taamatorpiaq misigisaqarpoq. Jehovap Mosesi, “inunnit nunarsuarmiittunit tamanit anneruniajuinnerpaasoq”, oqarfigaa Guutip innuttai Egyptenimi inussiaataanermit naqisimaneqarnermillu aniguisikkumallugit Faraomukassasoq. (4 Mos 12:3) Pisunit ersersinneqartutut Farao angutaavoq ataqqinninngitsuullunilu makitasooq. (2 Mos 5:1, 2) Jehovalli Mosesi Faraomut peqquseqquaa inussiani millionilippassuit nunaminit aninissaat akuerissagaa. Mosesip Jehovamut ima aperinera paasinarpoq: “Kinaagama Faraomukartinniarpinga Israelikkunnik Egyptenimit anisitsiartortillunga?” Mosesi ajukkuttutut piukkunnanngitsutullu misigisimassaaq. Guutilli ima neriorsorpaa: “Uanga najussavakkit.” — 2 Mos 3:9-12.

3, 4. (a) Sooq Mosesi annilaangava? (b) Qanoq Mosesitut unamminiarnartitaqarsinnaavit?

³ Sooq Mosesi annilaangava? Annilaangavoq Farao Jehovamit oqariartortitamut tusarnaarnavianngitsoralugu. Aamma  Israelikkut Egyptenimit aniguisinneqarneranni siulersuisussatut Guutimit toqqarneqarsimanini Israelikkunnit apeqquserneqarnissaa Mosesip annilaangatigaa. Jehovamut ima aperivoq: “Upperinngippanngami naalakkumanangalu, oqarlutillu Naalakkap saqqummerfigisimanngikkaanga, taava qanoq iliussaanga?” — 2 Mos 3:15-18; 4:1.

⁴ Illimmi? Naalakkersuisumut pissaanilimmut oqalunnissat ilimananngilaq. Illoqarfigisannili Jehova taassumalu naalagaaffia pillugu inunnik oqaloqateqarnissat unamminiarnartittarukku? Jehovap Mosesimut peqqussutaa tamatumalu kingorna pisut pingaarutilimmik ilinniarfigisinnaavavut.

5. Mosesip tigummiaa Jehovap susinnaanngortippaa, Mosesillu tamanna imminut tatiginissaminut qanoq iluaqutigaa? (Allaaserisap aallaqqaataani assiliaq takuuk).

⁵ Mosesip inunnit upperineqannginnissaminik annilaangatiginninnini pillugu oqaluttuummani Jehovap pisussanut piareersalerpaa. Biibilimi ima allassimavoq: “Naalakkap aperaa: ‘Sunaana tigumiarigit?’ Mosesip akivaa: ‘Ajaappiaq.’ Taava Naalagaq oqarpoq: ‘Nunamut naluguk!’ Nunamullu nalummani ajaappiaq pulateriaarsunngorpoq. Mosesi qimaanialeraluartoq Naalakkap oqarfigaa: ‘Pamiuatigut tiguuk!’ Mosesip tigummani pulateriaarsuk kingumut ajaappianngorpoq taassuma assaani. ‘Taama pivoq upperissammassuk Naalagaq ... ilinnut saqqummersimasoq.’” (2 Mos 4:2-5) Guutip pissaaneratigut Mosesip ajaappiaq miloriutereermagu pulateriaarsunngorpoq! Tupinnartuliaq tamanna Mosesip Guutimit aallartitaaneranut oqartussaassusilerneqarsimaneranullu uppernarsaataassaaq. Jehovap ima oqarfigaa: “Ajaappiaq una nalunaaqutiliuutissat tiguniaruk.” (2 Mos 4:17) Mosesip taamatut uppernarsaasinnaanini Faraomik Guutillu innuttaanik oqaloqateqarnissaminut imminut pisariaqartumik tatiginnilissutigaa. — 2 Mos 4:29-31; 7:8-13.

6. (a) Oqaluussigaangatta suna tigummisassavarput, aamma sooq? (b) ‘Guutip oqaasiata uumanera’ aamma ‘sunniisarnera’ qanoq paasisariaqarnerat nassuiaruk.

⁶ Guutip tusarliussaa allanut oqaluttuarigaangatsigu suna tigummisarparput? Biibili tigummisarparput atorusungaartarlugulu. Inuit ilaat isumaqarput Biibili atuakkiaannaasoq nuannersoq. Biibilili atuagaannaanani Guutip uagutsinnut tusarliussaanik imaqarpoq. (2 Petr 1:21) Tamatumani Guutip neriorsuutai taassumalu naalagaaffiata naammassisassai allassimapput. Paulusi ima allappoq: ‘Guutip oqaasia uumavoq sunniisarlunilu.’ (Hebræerit 4:12 atuaruk). Guutip oqaasiata uumanera qanoq paasisariaqarpa? Jehovap neriorsuutai tamarmik eqquukkiartorlutillu iluatsilluartumik naammassineqarumaarput. (Es 46:10; 55:11) Inuk Guutip oqaasia pillugu tamatuminnga paasinnittoq Biibilimi atuakkaminit sunnertingaartarpoq.

7. Qanoq “oqaatsimik sallusuissutaasumik eqqortumik” atuisinnaavugut?

⁷ Jehovap oqaatsini uumasoq, Biibili, uagutsinnut tunniuppaa. Biibili iluaqutigalugu oqaatsitta tutsuiginartuunerat Guutimeersuunerallu uppernarsarsinnaavarput. Taamaattuminguna Paulusi Timotheusimik ilinniartitsinermini “oqaatsimik sallusuissutaasumik eqqortumik” atuisarnissamik kajumissaarisoq. (2 Tim 2:15, NW) Guutip oqaasia qanoq sunniuteqarluartumik atorsinnaavarput? Allassimaffiit naleqquttutut toqqarsimasavut allanut atuffassissutigisarnerisigut. Tusarnaartitta uummataannik killiinissaq anguniagaraarput. 2013-imi naqitaaqqat taamaaliornissatsinnut iluaqutissatut saqqummersinneqarsimapput.

8. Kiffartornermik nakkutilliisoq naqitaaqqat pillugit qanoq oqarsimava?

⁸ Naqitaaqqat nutaat tamarmik assigiimmik iluseqarput. Taamaattumik ataaseq qanoq atussallugu ilikkarutsigu sinneri qanoq atussallugit nalussanngilarput. Hawaiimi,  USA-miittumi, kiffartornermik nakkutilliisoq ima oqarpoq: “Naqitaaqqat nutaat taakku illumiit illumut tamanullu oqaluussinermi qanoq sunniuteqartigisassanerat takorloorsinnaasimanngilarput.” Taassuma apeqqutit akissutaasinnaasullu naqitaaqqat saqqaanniittut pissutigalugit atoruminartuunerarpai. Pulaakkap kukkusumik akinissani annilaangatigisariaqanngilaa. Qatanngut oqarpoq naqitaaqqat allalluarneqarsimanerat pissutigalugu inuppassuit oqaloqatiginissatsinnut piumassuseqartartut.

9, 10. (a) Qanoq naqitaaqqat Biibilimik atuinissatsinnut iluaqutigisarpavut? (b) Naqitaaraq sorleq iluatsilluartumik atortarpiuk, aamma sooq?

⁹ Naqitaaqqat tamarmik naleqquttutut toqqarneqarsimasunik allassimaffittaqarput pulaakkamut atuarsinnaasatsinnik. Naqitaaraq Aliasuttoqartuassasoraajuk? assersuutigeriartigu. Saqqaani apeqqut atuaruk. Pulaakkap “Naamik”, “Aap” imaluunniit “Asuki” akissutitut toqqarsinnaavai. Qanoq akinera apeqqutaatinnagu quppernerup tullia takutissinnaavat oqarlutillu “akissut Biibilimeersoq aana”. Taava Saqqummersitat 21:3, 4-lu atuassavatit.

¹⁰ Naqitaaraq Biibili qanoq isumaqarfigaajuk? atorukku pulaakkap akissutigineqarsinnaasuni pingasuni sorlermik toqqaanera apeqqutaassanngilaq. Quppernerup tullia takutiinnassavat oqarlutillu “Biibilimi allassimavoq ‘Allakkat Illernartut tamarmik Guutimit isumassarsiarititaasut’”. Ima ilassusiisinnaavutit: “Allassimaffimmi paasissutissat amerlanerujussuupput.” Taava Biibilit qupperuk Timotheusimullu allakkat aappaat 3:16, 17-ilu atuarlugit.

11, 12. (a) Oqaluussinerit nuannernerulersikkumallugu naqitaaqqat qanoq atorsinnaavigit? (b) Pulaaqqiinissannut piareersarninni naqitaaqqat qanoq iluaqutigisinnaavigit?

¹¹ Pulaakkap qisuariarnera apeqqutaatillugu sivisunerusumik oqaloqatiginissaa naqitaaqqamillu atuarnerunissarsi aalajangersinnaavat. Qanorluunniit pisoqaraluarpat naqitaaqqamik tunniussinerpit saniatigut siullermeerlutit pulaarninni Guutip oqaasianit atuareersimassaatit. Allaat pulaaqqaarninni allassimaffimmik ataasiinnarmik marluinnarnilluunniit atuaasimagaluaruit oqaloqatigiinnersi nangeqqinniarlugu pulaaqqiisinnaavutit.

¹² Naqitaaqqat quppernerini kingullerni ima qulequtaqarpoq: “Eqqarsaatissiissut.” Qulequttap ataani allassimaffeqartarlunilu apeqquteqartarpoq pulaaqqiinermi eqqartorneqarsinnaasunik. Naqitaaqqami Siunissaq qanoq issasoraajuk?-mi ima apeqquteqarpoq:  “Guutip pissutsit nunarsuarmi atuuttut qanoq ililluni pitsaanerulersissavai?” Matthæusip allagaa 6:9, 10 aamma Danielimik allakkat 2:44 innersuussutigineqarput. Naqitaaqqami Toqusimasut uummaqqissinnaasoraagit?-mi ima apeqquteqarpoq: “Sooq utoqqalisarlutalu toqusarpugut?” Mosesimik allakkat siulliit 3:17-19 aamma Romamiunut allakkat 5:12 innersuussutigineqarput.

13. Biibilimik atuaqqissaaqateqalerumalluni naqitaaqqat qanoq atorneqarsinnaanerat nassuiaruk.

¹³ Naqitaaqqat taakku Biibilimik atuaqqissaaqateqalernissatsinnut iluaqutissatut suliarineqarsimapput. Naqitaaqqat quppernerini kingullerni QR-kodep * assilineratigut nittartakkatsinnut innersuussisoqartarpoq. Tamatumani Biibilimik atuaqqissaaqatigineqarnissamik neqerooruteqarpoq. Naqitaaqqat taakku aamma quppersakkami Tusagassat nuannersut Guutimeersut!-mi immikkoortunut aalajangersimasunut innersuussutitaqarput. Assersuutigalugu naqitaaraq Kiap nunarsuaq pissaaneqarfigaa? quppersakkami immikkoortoq 5-imut innersuussuteqarpoq. Naqitaaraq Ilaqutariit qanoq pillualersinnaappat? immikkoortoq 9-mut innersuussuteqarpoq. Naqitaaqqat taakku pulaaqqaarnitsinni pulaaqqiinitsinnilu Biibilimik atuisarnissatsinnut iluaqutissatut suliaapput. Taamaalilluta amerlanerusunik Biibilimik atuaqqissaaqateqalersinnaavugut. Guutip oqaasia sunniuteqarluartumik atorumallugu aamma qanoq iliorsinnaavit?

14, 15. Qanoq Paulusip maligassiuinera oqaluussininni ilaarsinnaaviuk?

¹⁴ Paulusi inuit “sapinngisamik amerlasuut” eqqarsartaasiannik paasinnikkusungaarpoq. (1 Korinthimiut 9:19-23 atuakkit). Maluginiaruk Paulusip ‘juutit, inatsisit ataanniittut, inatsiseqanngitsut aamma sanngiitsut ilataariumagai’. Aap, ‘kikkut tamaasa peqatiginiartarpai ilaannaannilluunniit annaassaqarumagaluarami’. (ApS 20:21) Oqaluussiffigisartakkatsinni sallusuissummik inunnut tamalaanut oqaluussinissatsinnut piareersarnitsinni Paulusitut qanoq isiginnittaaseqarsinnaavugut? — 1 Tim 2:3, 4.

¹⁵ Qaammatit tamaasa Guutip naalagaaffianut kiffartorneq-mi oqaluussinitsinni qanoq aallarniisinnaanitsinnut siunnersuuteqartarpoq. Taakku atortakkit. Inuimmi oqaluussiffigisartakkanniittut sammisamik aalajangersimasumik allamik soqutiginnippata? Soqutigisaat pillugu oqaaseqarnissat piareersartaruk. Suna pingaartippaat? Allassimaffimmik pingaartitaannut naleqquttumik toqqaasarit. Ilagiinnik nakkutilliisup nuliatalu oqaluussinerminni Biibilimik atuinerusalersimanertik ima allaatigaat: “Oqaaserpassualiornata pineqartumut ingerlaqqikkaangatta pulaakkatta amerlanerit allassimaffimmik ataatsimik atuaanissarput akuerisarpaat. Biibili quppeqqaatigalugu ilassisarpavut, tamatumalu kingorna allassimaffimmik atuaasarpugut.” Immikkoortuni tulliuttuni sammisat, apeqqutit allassimaffiillu oqaluussinermi iluatsilluartumik atorneqartarsimasut eqqarsaatigikkit. Taakkua ilaat oqaluussiffigisartakkanni immaqa atorsinnaavatit.

16. Esajap allagai 14:7 oqaluussinitsinni qanoq atorneqarsinnaasoq nassuiaruk.

¹⁶ Illoqarfinni najukkanni pinerlunneq nakuusernerlu nalinginnaappata oqaluussiffigisat ima aperisinnaavat: “Aviisip saqqaani ima qulequtaqartoq takorloorsinnaaviuk: ‘Inuit nunarsuarmi tamarmi eqqissipput unerillutillu, tipaatsunnermillu nipitik anippaat’? Taama Biibilimi Esajap allagai 14:7-imi allassimavoq. Guutip eqqissineqarnissaanik neriorsuuterpassui eqquutingajalersut Biibilimiipput.” Tamatuma kingorna Biibilimi neriorsuutit ilaat atuarumasinnaavat.

17. Qanoq Matthæusip allagaa 4:4 oqaloqatigiinnermi atorsinnaavarput?

¹⁷ Illoqarfinni najukkanni ilaquttanik pilersuineq anguterpassuarnut ajornakusoorpa?  Taamaappat oqaloqatigiinneq ima aperalutit aallarnersinnaavat: “Angut qanoq aningaasarsiortigisariaqarpa ilaquttani pilluartikkumallugit?” Oqaluussiffigisat akereerpat ima oqarsinnaavutit: “Anguterpassuit tamatumannga amerlanerusunik aningaasarsiortarput, ilaqutariippassuilli nalerisimaarnatik inuupput. Taamaattumik sunarpiaq pisariaqartinneqarpa?” Tamatuma kingorna Matthæusip allagaa 4:4 atuaruk Biibilimillu atuaqqissaaqatigisalerumallugu.

18. Allat tuppallersarumallugit Jeremiap allagai 29:11 qanoq atorsinnaavarput?

¹⁸ Illoqarfinni najukkanni inuit alianartumik nalaataqarsimanertik naalliuutigaat? Oqaloqatigiinneq ima aallarnersinnaavat: “Alakkarpakkit tuppallersaammik tusartikkusullutit. (Jeremia 29:11 atuaruk). Allassimaffimmi atuakkatsitut massakkut siunissamilu pilluarluta inuunissarput Guutip kissaatigaa. Qanorli pillualersinnaavugut?” Tamatuma kingorna quppersakkami Tusagassat nuannersut-mi immikkoortoq naleqquttoq takutissinnaavat.

19. Saqqummersitat 14:6, 7 inunnut uppertunut qanoq atorneqarsinnaasoq nassuiaruk.

¹⁹ Illoqarfinni najukkanni inuit uppertuuppat? Taamaappat oqaloqatigiinneq ima aperalutit aallarnersinnaavat: “Inngilimit oqaluunneqartuuguit tusarnaaqqissaassagaluarpit? (Saqqummersitat 14:6, 7 atuakkit). Inngili taanna oqarpoq ‘Guuti mianerissagipput’, matumani Guuti kina pineqarpa? ‘Qilammik nunamillu pinngortitsisoq.’ Taanna kinaagami?” Tamatuma kingorna Tussiaat 124:8 atuaruk, tassani ima allassimavoq: “Naalakkap, qilaap nunallu pinngortitsisaata, aqqa annassutigaarput.” Tamatuma kingorna Naalakkap kinaanera nassuiarumasinnaavat. *

20. (a) Guutip aqqanik ilinniartitsinermi Ussatit 30:4 qanoq atorneqarsinnaava? (b) Oqaluussininni allassimaffik suna iluatsilluartumik atortarpiuk?

²⁰ Inuusuttumik oqaloqateqarnerit ima aallarnersinnaavat: “Allassimaffimmik pingaarutilimmik apeqqutitalimmik atuarusuppunga. (Ussatit 30:4 atuaruk). Inuk kinaluunniit taamaaliorsinnaanngilaq, taamaattumik allassimaffik Pinngortitsisitsinnut tunngasimassaaq. * Taanna qanoq ateqarnersoq sumi paasisinnaavarput? Tamanna Biibilimi ilinnut takutikkusuppara.”

21, 22. (a) Allassimaffik naleqquttutut toqqarneqarsimasoq qanoq inuit inuunerannik allannguisitsisinnaava? (b) Oqaluussininni sunissat aalajangiusimaviuk?

²¹ Inuit allassimaffimmik naleqquttutut toqqakkamik atuaanerput qanoq periarfigissaneraat ilisimasinnaanngilarput. Assersuutigalugu Australiami nalunaajaasut marluk arnap inuusuttup matuanut kasuttorput. Qatanngutip aappaata aperaa “Guuti qanoq ateqartoq nalunngiliuk” taamaaseriarlunilu Tussiaat 83:19 atuarlugu. Arnaq ima oqaluttuarpoq: “Assut tupaallappunga! Ingerlareermata biilerlunga atuagaarniarfimmut 56 kilometerisut ungasitsigisumiittumukarpunga Biibilimik nutsikkat allat misissorniarlugit aterlu oqaasersiuutini qupperniarlugu. Guutip Jehovamik ateqarnera paasereerlugu aamma allanik paasisaqartariaqarnerlunga eqqarsaatigilerpara.” Sivitsunngitsoq arnaq uissanilu Biibilimik atuaqqissaartalerput tamatumalu kingorna kuisillutik.

²² Inuit Guutip oqaasianik atuarnertik inuunerminnik allannguissutigisarlugulu Jehovap neriorsuutaanik upperinninnerulissutigisarpaat. (1 Thessalonikamiut 2:13 atuaruk). Biibilimi tusarliunneqartut uagut nammineq oqaatsitsinnit sunniuteqarnerungaartarput. Taamaattumik oqaluussinitsinni sapinngisamik Guutip oqaasianik atuiuarnissarput aalajangiusimasariaqarparput. Guutimmi oqaasia uumavoq!