1. Sooq Jehovamut ikin­ngutaanis­sar­put aalajangiusimajuar­tariaqar­par­put?

JEHOVAMIK NALUNAAJAASUTUT kuisik­kavit erlin­nangaar­tumik Jehovamik ikin­nguteqaler­putit. Taman­nali Saatanip silarsuaanit naam­mal­luin­nan­ngis­sutitsin­nil­lu tatineqar­tar­poq. Taamaat­tumik tamat­ta Jehovamut ikin­ngutaanis­sar­put aalajangiusimajuar­tariaqar­par­put.

2. (a) Ikin­ngutigiin­neq suua? (Qup­per­nerup ataatungaani ilan­ngus­saq takuuk). (b) Jehova qanoq ikin­ngutigil­luar­nerulersin­naaviuk?

² Jehova ilin­nut piviusuua? Ikin­ngutitut isigaajuk? Ikin­ngutigil­luar­nerulerusup­piuk? Jaakup al­lagaani 4:8-mi ima kajumis­saar­neqar­pugut: “Guuti qanin­niarsiuk, taava taan­na ilis­sin­nut qanil­lis­saaq.” Matumani qanil­liar­tor­tus­sat marluup­put. * Jehova qanil­liniarlugu iliuuseqaruit aam­ma taan­na qanil­liniarlutit iliuuseqas­saaq. Taan­na qanil­liar­tor­tuaruk­ku piviusutut isiginerujar­tus­savat qanimul­lu  ikin­ngutigil­lualeruk­ku Jiisusitut misigis­saatit, taan­nami ima oqarami: “[Uan­nik] aal­lar­titsisoq ilumoortuuvoq,” aam­ma “uanga ilisimavara”. (Joh 7:28, 29) Jehovamul­li qanin­neruler­niarlutit susin­naavit?

3. Jehova qanoq at­taveqaqatigisin­naavar­put?

³ Jehova qanil­liumal­lugu taas­sumin­nga at­taveqaqateqar­neq pingaaruteqarluin­nar­poq. Qanorli taamaalior­toqarsin­naava? Ikin­ngutil­lu nunami al­lami najugalik qanoq at­taveqaqatigiit­tar­nersusi eq­qarsaatigiuk. Im­mis­sin­nut al­laf­figisarlusilu sianerfigisarsin­naavusi. Jehova qinnuigigaangakku oqaluut­tar­pat. (Tussiaat 142:3 atuaruk). Qanorli Jehova ilin­nut at­taveqar­tis­sin­naaviuk? Taamaaliorsin­naavutit taassuma oqaasia, Biibili, atuartarneratigut eqqarsaatigeqqissaartarneratigullu. (Esaja 30:20, 21 atuakkit). Jehovalu at­taveqatigiit­tar­nersi ikin­ngutigiin­nis­sin­nut taas­sumalu piviusutut isiginis­saanut qanoq iluaqutaanersoq sam­meriar­tigu.

4, 5. Biibilimik atuaq­qis­saaraangavit Jehovap qanoq at­taveqarfigisar­paatit? As­sersuuteqarit.

⁴ Nalun­ngilar­put Biibili Guutip kik­kun­nut tamanut tusarlius­saanik imaqar­toq. Biibilili Jehovamut qanillinissannut iluaqutigisin­naaviuk? Aap. Ul­lut tamaasa Biibilimik atuaraangavit atuaq­qis­saaraangavil­lu atuak­katit qanoq misigilis­sutigisar­nerlugit eq­qarsaatigisaruk. Aam­ma ilik­kak­katit qanoq maleruarsin­naanerlugit eq­qarsaatigisaruk. Taamaalior­nik­kut Jehova ilin­nut at­taveqar­tit­tar­pat. Taman­na taas­sumun­nga qanimut at­taveqalis­sutigisar­pat. — Hebr 4:12; Jaak 1:23-25.

⁵ As­sersuutigalugu Jiisusip oqaasii uku atuaraangak­kit qanoq eq­qarsar­tar­pit: “Erlin­nar­tuutinik nunami katerseqinasi”? Jehovamut kif­far­tor­neq sapin­ngisan­nik inuunin­ni pingaar­ner­paatin­niar­tuaruk­ku taas­suman­nga iluarineqar­tutut misigis­saatit. Jiisusil­li oqaasii atuarlugit im­maqa paasiler­pat inuunin­nik pisariil­lisaasariaqarlutit Guutimul­lu kif­far­tor­nermik pingaar­nerutitsisariaqarlutit. Taamaap­pat Jehova qanil­liniarlugu susinnaanerlutit paasiniarlugu Jehovamut ikioq­qugit. — Matt 6:19, 20.

6, 7. (a) Biibilimik atuaq­qis­saar­tar­ner­put Jehovamut asan­nin­nitsin­nut taas­sumalu uagutsin­nik asan­nin­neranut qanoq sun­niuteqar­tar­pa? (b) Biibilimik atuaq­qis­saaraangat­ta suna pingaar­ner­tut anguniagarisariaqar­par­put?

 ⁶ Biibilimik atuaq­qis­saaraangat­ta Jehovamut pitsaanerusumik kif­far­tulerumal­luta al­lan­nguisariaqar­nitsin­nik paasin­nit­tar­ner­put ilumoor­poq. Asan­nil­lunili iliuuserisar­tagai pis­susiilu ajun­ngitsut aam­ma paasisar­pavut, taman­nalu taas­sumin­nga asan­nin­nerulis­sutigisar­par­put. Asanerujar­tor­til­lugulu asanerujar­tor­tar­paatigut, taas­sumun­ngalu ikin­ngutaal­luar­neruler­tar­pugut. — 1 Korinthimiut 8:3 atuaruk.

⁷ Jehova qanil­liumal­lugu eq­qor­tumik isigin­nit­taaseqarluta Biibilimik atuaq­qis­saar­tariaqar­pugut. Jiisusi ima oqar­poq: “Inuuneq naas­saan­ngitsoq tas­saavoq: ilin­nik, Guutimik ilumoor­tutuamik, aal­lar­titan­nil­lu, Jiisusimik Kristusimik, ilisarisiman­niler­niar­tuar­nerat.” (Joh 17:3, NW) Biibilimik atuaraangat­ta soqutiginar­tor­pas­suar­nik paasisaqar­tar­pugut, Jehoval­li kinaas­susianik ilisarisiman­nilerluar­niar­neq pingaar­ner­tut anguniagarisariaqar­par­put. — 2 Mosesi 33:13 atuaruk; Tuss 25:4.

8. (a) Jehovap kun­ngimik Azarjamik pil­laanera inuit ilaasa qanoq isumaqarfigis­sagunar­paat? (b) Jehova ilisarisimal­luaruk­ku iliuuserisar­tagai qanoq isumaqarfigis­savigit?

⁸ Jehova ikin­ngutigil­luarutsigu iliuuserisaanut pis­sutaasut ilaasa Biibilimi nas­suiar­neqan­ngin­nerat er­numas­sutigiler­navian­ngilar­put. As­sersuutigalugu Azarja Judami kun­ngiutil­lugu inuit guutipilun­nik pal­lorfigin­nip­put. Guutipilus­sior­tut peqatigiler­nagit Azarja Jehovap “isaani eq­qor­tumik ilior­poq”. (2 Kng 15:1-5) Jehoval­li Azarja pupis­sun­ngor­til­lugu pil­lar­paa. Sooq? Taman­na oqalut­tuap aal­laq­qaataani akineqan­ngilaq. Jehoval­li iliuuserisaa qanoq isumaqarfigaajuk? Er­numas­sutigiler­piuk eq­qarsalerlutil­lu Jehovap iliuusaa naaper­tuil­luan­ngitsulior­nerusoq, tas­sa tun­ngavis­saqan­ngitsumik Azarja pil­laraa? Naamik. Jehova ilisarisimal­luaruk­ku nalus­sagunan­ngilat tamatigut naleq­qut­tumik perorsaatis­siisar­toq. (Jer 30:11) Taamaat­tumik Jehovap Azarjamik pil­laaneranut pis­sutaasoq nalugaluarlugu qularin­ngis­sin­naavat Jehovap iliuusaa eq­qor­tuusoq.

9. Oqalut­tuaq suna iluaqutigalugu paasisin­naavar­put sooq Jehovap Azarja pupin­nermik pil­laraa?

⁹ Kun­ngip Azarjap, aam­ma kun­ngitut Uzzijatut ilisimaneqar­tup, inuunera Biibilip atuagar­taani al­lami al­laatigineqar­neruvoq. (2 Kng 15:7, 32) Nalunaarsuutit aap­paat 26:3-5 aam­ma 16-21 oqalut­tuap nangin­nerata al­laatigineqar­nerani Azarja Jehovap “isaani eq­qor­tumik ilior­poq”. Kisian­ni aam­ma al­las­simavoq ‘pis­sarsuan­ngor­nini makitasuun­nguutigigaa aseruutigisaminik’. Kun­ngi palasit kisimik iliuuserisin­naasaan­nik iliuuseqariaraluar­poq. Palasit 81-it eq­qun­ngitsulior­nerarlugulu unitsin­niaraluar­paat. Taak­ku naalap­pai? Makitangaarami kamaatiler­pai! Oqalut­tuap tamatuma ilan­ngun­neqarsimanera pis­sutigalugu paasisin­naavar­put sooq Jehovap kun­ngi pupin­nermik pil­laraa.

10. Sooq Jehovap iliuuserisaanut pis­sutaasut tamarluin­naasa ilisimasariaqan­ngilavut, Jehoval­lu tamatigut eq­qor­tumik iliuuseqar­tar­nera qanoq up­peril­luin­narsin­naavar­put?

¹⁰ Tamatuma ilin­niutis­sar­taa pingaarutilik suua? Kun­ngi Azarja pil­lugu oqalut­tuami paasis­sutis­sat tun­ngavigalugit  paasisin­naavar­put sooq Jehovap taan­na pil­laraa. Taavami an­nikitsualuit Biibilimi ilan­ngun­neqarsiman­ngip­pata qanoq isum­mis­savit? Jehovap eq­qor­tumik iliuuseqar­tar­nera qularutigilis­saviuk? Imaluun­niit eq­qarsas­savit Guutip tamatigut eq­qor­tumik ilior­tar­neranik up­perin­nin­nis­san­nut naam­mat­tumik Biibilimi paasis­sutis­saqar­toq? (5 Mos 32:4) Jehova kinaas­susilit­tut ilisarisimanerujar­tor­til­lugu asanerulis­sal­lugulu tatiginerulis­savat. Taava iliuuserisaanut pis­sutaasut tamarluin­naasa ilisimasariaqas­san­ngilatit. Biibilimik atuaq­qis­saar­tar­nin­ni Jehova ilin­nut piviusuunerulis­sal­lunilu qanin­nerulis­savat. — Tuss 77:13, 14.

11-13. Jehovap qin­nutinut tusar­naar­tar­nera qanoq nalun­ngilar­put? (Al­laaserisap aal­laq­qaataani as­siliaq takuuk).

¹¹ Qinugaangat­ta Jehova qanin­neruler­tar­par­put. Un­nersiutigisarlugulu qutsavigisarlugulu ikioq­qul­luta qin­nuigisar­par­put. (Tuss 32:8) Jehovali ikin­ngutigil­lualerumal­lugu qularutigin­ngil­luin­nar­tariaqar­pat taas­suma qin­nutinik tusar­tar­nera.

¹² Inuit ilaat oqar­tar­put Guuti qin­nutinut tusar­naar­neq ajor­toq inuil­lu iluaal­lan­niaan­narlutik qinusar­tut. Isumaqar­put qinuneq taamaal­laat ajor­nar­torsiutinik eq­qarsaatigin­neq­qis­saar­nis­samut nam­minerlu akis­sutis­sarsior­nis­samut iluaqutaasoq. Qinunerup taamatut iluaqutaasin­naanera ilumoor­poq. Jehoval­li qinunik­kut oqaluuk­kaangan­ni  tusar­naaq­qis­saar­tar­paatit. Taman­na qanoq qularin­ngis­sin­naaviuk?

¹³ Una eq­qarsaatigiuk: Jiisusip nunarsuarmukan­ngin­nermini takuaa Jehovap kif­fami nunarsuarmiit­tut qin­nutaat akisarai. Jiisusi nunarsuarmiin­nermini eq­qarsaatini misigis­sutsinilu pil­lugit Ataataminut qilam­miusumut qinusar­poq. Ataasiarluni al­laat un­nuaq naal­lugu qinuvoq. (Luk 6:12; 22:40-46) Jehova tusar­naar­tan­ngitsuup­pat Jiisusi taamaaliorsimas­sagaluar­pa? Jiisusip aam­ma ajoqersuk­kani Jehovamut qanoq qinusar­nis­samik ilin­niar­tip­pai. Jehova qin­nutinut tusar­naar­tan­ngitsuup­pat taamaaliorsimas­sagaluar­pa? Ersarip­poq Jiisusip ilisimagaa Jehova qin­nutinik tusar­tar­toq. Al­laat ima oqar­poq: “Ataataq, qutsavigaak­kit tusaram­ma. Uanga nam­mineq nalun­ngilara tamatigut tusar­tarim­ma.” Uagut­taaq Jehovap qin­nutitsin­nut tusar­naar­tar­nera qularin­ngis­sin­naavar­put. — Joh 11:41, 42; Tuss 65:3.

14, 15. (a) Aalajangersimasut pil­lugit qinusar­ner­put qanoq iluaqutigisar­par­put? (b) Kathyp qinusar­nini Jehovamut qanil­linis­saminut qanoq iluaqutigaa?

¹⁴ Qin­nutin­nut akis­sutit im­maqa ilaan­nik­kut malun­nar­piar­neq ajor­put. Aalajangersimasul­li pil­lugit qinusaruit Jehovap akis­sutai ilin­nut ersarin­nerulis­sap­put, Jehovalu ilin­nut piviusuunerulis­saaq. Jehova er­numas­sutin­nik tamanik iser­tuar­nak oqalut­tuut­taruk­ku taas­suma qanin­nerulis­savaatit.

¹⁵ As­sersuutigalugu Kathyp oqaluus­sikulasaraluarluni oqaluus­sinis­sani nuan­narineq ajor­paa. * Ima oqalut­tuar­poq: “Oqaluus­sineq nuan­narin­ngilara,  ilumoorlunga oqas­saguma nuan­narin­ngil­luin­nar­para.” Suliun­naar­nersiuteqalerami utoq­qaaner­tamit pionerin­ngor­nis­samut kajumis­saar­neqar­poq. Kathy ima oqar­poq: “Al­laat im­mersugas­samik tunivaanga. Pionerin­ngor­niarlunga aalajanger­punga, ul­lul­li tamaasa Jehova qin­nuigisar­para oqaluus­sinermik nuan­narin­niler­nis­samut ikioq­qul­lunga.” Jehovap qin­nutai akivai? Ukiut pingajus­saan­ni pioneriul­luni ima oqalut­tuar­poq: “Oqaluus­sinerusaler­nera qatan­ngutinil­lu ar­nanit al­lanit ilik­kagaqar­tar­nera pis­sutigalugit nalunaajaanis­san­nut pik­korin­neruler­punga. Ul­lumik­kut oqaluus­sineq nuan­nariin­nar­nagu nuan­naril­luin­nar­para. Pingaar­ner­tut, aatsaat taama Jehovamut qanitsigisutut misigivunga.” Kathyp qinusar­nini Jehovamut qanil­linis­saminut iluaqutigil­luin­nar­paa.

16, 17. (a) Jehova ikin­ngutigiuarumal­lugu susariaqar­pugut? (b) Al­laaserisap tul­liani suna sam­mis­savar­put?

¹⁶ Naas­saan­ngitsumik Jehovamut qanil­liar­tor­tuarsin­naavugut. Taamaat­tumik Biibilimik atuaq­qis­saar­tuar­nik­kut Jehova tusar­naar­tuar­tigu qinusar­nik­kul­lu oqaluut­tarlugu. Taamaalior­tarut­ta Jehova ikin­ngutigil­luar­nerujar­tus­sal­lugulu misilin­neqar­nitsin­ni taas­suman­nga ikior­neqar­nik­kut piner­tusaarsin­naas­saagut.

¹⁷ Jehovamul­li qinujuaraluarluta ilaan­nik­kut akiugas­satsin­nik misilin­neqar­tar­pugut. Taamatut atugaqar­til­luta Jehova tatigiun­naarsin­naavar­put. Al­laat misigisin­naasar­pugut Jehovap qin­nutivut tusaaneq ajorai qulariler­tarlutigulu taas­suma suli ikin­ngutigineraatigut. Taamatut misigileruit susin­naavit? Al­laaserisap tul­liani taman­na sam­mineqas­saaq.