Aalajangernerit nuannaarutaasut

„TAAMAALIORSIMASSANNGIKKALUARAMA!“ Qasseriarlutit taama oqarpit? Tamatta kissaatigaarput aalajangernivut, ingammik siunissatsinnut sunniuteqassappata, peqqissimissutigissanagit. Nuannaarutaasunimmi qanoq aalajangersinnaavugut?

Pingaarnerpaamik tutsuiginartunik ileqqussatigut najoqqutaqartariaqarpugut. Taamaattunik najoqqutassiaqarpa? Inuppassuit taamaassorinngilaat. USA-mi collegemi ukioq kingulleq atuartut akornanni misissuineq naapertorlugu atuartut 75 procentii isumaqarput oqartoqarsinnaanngitsoq eqqortoqartoq imaluunniit eqqunngitsoqartoq, aamma suup ajunngitsuuneranik imaluunniit suup ajortuuneranik eqqartuisoqarsinnaanngitsoq, „inuit ataasiakkaat pingaartitaat kulturikkullu assigiinngissutsit“ apeqqutaammata.

Ilumoorpa ileqqussatigut najoqqutassat tassaaginnartut isummat namminermut tunngasut imaluunniit inuit amerlanerusut isumaat? Naamik. Inuit piumasaannarminnik iliuleraluarpata uivernersuaqalissaaq. Kina inatsiseqanngitsumi, eqqartuussiveqanngitsumi politeeqanngitsumilu najugaqarusuppa? Aammattaaq isuma nalinginnaasoq tassaajuaannanngilaq najoqqutassaq tutsuiginartoq. Eqqortuusorisatsitut iliorniarluta aalajangersinnaavugut, kingusinnerusukkullu paasillugu kukkusimalluta. Aap, inuiaat oqaluttuarisaanerat tamarmi uppernarsaataavoq oqaatsit Biibilimi allassimasut uku ilumoornerannut: „Ingerlasup alloriartarnini aqussinnaanngilai.“ (Jeremia 10:23, NV) Inuunermi pingaarutilimmik aalajangigassaqalerutta sumut siunnersortissarsiorsinnaavugut?

Angut inuusuttoq naalagaasut ilaat allaaserisap matuma siuliani eqqaaneqartoq Jiisusimut saaffiginnikkami silatusaarpoq. Eqqartoriikkatsitut Jiisusip angutip inuusuttup apeqqutaa akigamiuk Guutip inatsisai innersuussutigai. Jiisusip  akueraa Jehova Guuti ilisimasaqarnermut ilisimassummullu tamarmut pilerfiusoq Taassumalu pinngortitaminut suna iluaqutaanerpaanersoq nalunngikkaa. Tamanna pillugu Jiisusi ima oqarpoq: „Ajoqersuutiga uanga nammineq piginngilara, aallartitsisimali pigaa.“ (Johannesi 7:16) Aap, Guutip oqaasia siunnersuutinut tutsuiginartunut pilerfiuvoq silatusaartumik aalajangiisarnissatsinnut iluaqutigisinnaasarput. Najoqqutassiat Guutip oqaasianeersut ikittunnguit malinneqarunik pillualersitsisussat misissoriartigik.

Maleruagassaq atortuujuaannartoq

Jiisusip qaqqami oqaluutsimini tusaamasaasumi tikkuarpaa najoqqutassiaq tunngaviusoq inunnut allanut attaveqarnermi silatusaartumik aalajangiinermi iluaqutaasinnaasoq. Ima oqarpoq: „Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Najoqqutassiaq taanna maleruagassamik atortuujuaannartumik taaneqarajuppoq.

Ilaat isumaqarput najoqqutaq una malikkunikku naammattoq: „Allanit iliorfigineqarusunnginnittut allat iliorfigeqinagit.“ Taamatut periaaseqarnerup aamma maleruagassaq atortuujuaannartoq malillugu periaaseqarnerup assigiinngissutaat maluginiarlugu Samariamiu naakkinnittoq pillugu Jiisusip assersuusiaa eqqarsaatigiuk. Juuteq persuttarneqarpoq toqungajattorlu aqqusernup sinaanut qimaannarneqarluni. Palasip Levikkuusullu angut taanna takuaat, qaangiinnarluguli. Iliuuseqannginnerat angutip naalliunnerulissutiginngimmagu, oqartoqarsinnaavoq maleruagassap atortuujuaannartup akerlianik iliuuseqartut. Taakkunatut pinnani Samariamiup angut ikiorniarlugu uniffigaa. Ikii mattuserpai akunnittarfimmukaallugulu. Samariamiup nammineq pineqarusunnermisut angut iliuuseqarfigaa. Maleruagassaq atortuujuaannartoq malippaa — eqqortumillu aalajangiilluni. — Lukasi 10:30-37.

Maleruagassaq taanna assigiinngitsorpassuartigut nuannaarutaasumik atorneqarsinnaavoq. Oqariarta ilaqutariinnik eqqaamiortaartugut. Soormi siulliullutit ilaqutariit tamaasa tikilluaqqullugit ilassigukkit? Najugaqarfissinnik ilisimannilernissaanik ikiorsinnaavatit, apeqqutaat akisinnaavatit arlaannillu iliuuseqartikkusunneraatsit aperisinnaallugit. Siulliullutit saniliulluartutut iliuuseqarnikkut sanilitaatillu attaveqatigiilluarnissarsi sulissutigaat. Aammattaaq iliuuserisat Guutimit iluarineqartoq nalunagu ilinnut nalerisimaarnassaaq. Silatusaartumik aalajangiineruvoq.

Aalajangiinerit allanut asanninnermik tunngavillit

Silatusaartumik aalajangiisarnissannut iluaqutigisinnaasannik maleruagassap atortuujuaannartup saniatigut Jiisusi allanik aamma najoqqutassiivoq. Jiisusi aperineqarami Mosesip inatsisaani suna annersaanersoq ima akivoq: „’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu, aappaatali taamaaqatigaa: ’Tullit ilittut asassavat.’ Inatsisit tamarmik pruffiitillu allagaasa inassutit taakkua marluk tunngavigaat.“ — Matthæusi 22:36-40.

Toqunissani aqaguttoq unnuakkut Jiisusip ajoqersukkami asaqatigiinnissaat pillugu „inassummik nutaamik“ tunivai. (Johannesi 13:34) Sooq inassut nutaajunerarpaa? Nassuiariinnginnerpaa inassutit marluk taakku Inatsisit tamarmik tunngavigisaasa aappaat tassaasoq tullermik asanninneq? Mosesip inatsisaasa atuunnerata nalaani Israelikkut ima peqquneqarput: „Tullit ilittut asassavat.“ (3 Mosesi 19:18) Jiisusilli ajoqersukkat tamatumannga iliuuseqarneroqquai. Unnuk taanna Jiisusip ajoqersukkani oqarfigai taakkua pillugit inuunini pilliutigissallugu. Taava ima oqarpoq: „Inassutiga tassa asaqatigiissasusi, soorlu uanga ilissi asagissi. Annerusumik asanninneqanngilaq ikinngutini pillugit inuunerminik akiginnittup asanninneranit.“ (Johannesi 15:12, 13) Aap, inassut taanna nutaajuvoq tassa imaappoq allat soqutigisaat nammineq soqutigisanit salliutinneqartariaqartut.

Assigiinngitsorpassuartigut asanninneq namminissarsiunngitsoq ersersinneqarsinnaavoq namminerlu soqutigisat kisiisa pinnagit iliuuseqarnerusoqarsinnaalluni. Assersuutigalugu oqariarta inissiami najugaqartutit nipilersuullu  nuannarisat nipituumik tusarnaarusukkit, sanililli akornusersorpat. Taava sanilivit eqqissisimaarnissaa pillugu nipilersuutip nipikillinissaanut kajumissuseqarpit? Allatut oqaatigalugu sanilivit ilorrisimaarnissaa illit ilorrisimaarnissannit pingaarnerutippiuk?

Pisimasoq alla eqqarsaatigeriartigu. Canadami issilluni apisoq angut utoqqaq Jehovap Nalunaajaasuinit marlunnit pulaarneqarpoq. Oqaloqatigiinnerminni angutip eqqaavaa uummallunnini pissutigalugu illup isaariaa aputaajarsinnaanagu. Nalunaaquttap-akunnerata ataatsip missaa qaangiuttoq kiliortorpaluttoq angutip tusaalerpaa. Jehovap Nalunaajaasui taakku marluk angutip illuata isaariaa matullu tungaanut majuartarfiit aputaajariartorlugit utersimapput. „Ullumikkut kristumiussuseq ilumoortoq suliamik ilalik takuara,“ Canadami Jehovap Nalunaajaasuisa immikkoortortaqarfiannut angut allappoq. „Killitsissutigeqaara ullutsinnilu silarsuarmut isumalluanngitsumik isiginnittaatsinnik allannguivoq. Aammattaaq silarsuaq tamakkerlugu suliassinnut ataqqinnereernera nakussatsinneqarpoq.“ Aap, ikiuiniarluni aalajangerneq, qanorluunniit annikitsigisorinaraluartoq, allanut ajunngitsumik sunniuteqarsinnaavoq. Aamma imminut pilliutigeriaannaalluni aalajangernerit taamaattut imminermut nuannaarutaapput.

Aalajangiinerit Guutimut asanninnermik tunngavillit

Aalajangigassaqaraangatta eqqarsaatigisariaqagarput suli alla tassaavoq Jiisusip inassutit annersaattut oqaatigisaa — Guutimut asanninnerput. Jiisusip oqaasii juutinut, inuiaqatigiinnut Jehovamut tunniulluinnareersimasunut, tunngapput. Israelikkulli inuttut ataasiakkaatut nammineq aalajangertussaavaat Guutertik uummatikkut tarnikkullu iluunngarlutik kiffartorfigerusunnerlugu. — 5 Mosesi 30:15, 16.

Taamatuttaaq aalajangiinitit Guuti pillugu isummannik ersersitsipput. Assersuutigalugu Biibilip atoriaannaaneranik pingaartitsineruleruit aamma illit aalajangigassaqalissaatit. Kristumiuuniaruit ilumoortoq aaqqissuulluakkamik Biibilimik atuaqqissaarnissat piareersimaffigaajuk? Taamaaliorniarlutit aalajangeruit pillualissaatit, Jiisusimi ima oqarpoq: „Pilluarput anersaakkut piitsut [pisariaqartitaqarnerminnik miserratiginninngitsut, NV], taakkuami Qilaap Naalagaaffia pigaat.“ — Matthæusi 5:3.

Naluarput angutip inuusuttup naalagaasut ilaata aalajangernini peqqissimissutigisimaneraa. Nalunngilarpulli apustili Petrusip Jiisusi Kristusimik ukiorpassuarni malinnereerluni aalajangernini qanoq isumaqarfigigaa. Ukiup 64-ip missaani Petrusi, toqunissi qanillisoq, uppeqatini ima kajumissaarpai: „Ilungersuutiginiarsiuk [Guutimut] minguitsuullusilu assuarnaatsuunissarsi eqqissillusi.“ (2 Petrusi 1:14; 3:14) Erseqqippoq Petrusip ukiut 30-t tamatuma siorna aalajangernini peqqissimissutiginngikkaa, aamma allat kajumissaarpai aalajangernerminnik aalajangiusimanneqqullugit.

Petrusip siunnersuutaanik maleruaassagaanni Jiisusimut ajoqersugaalernermi akisussaaffigilikkanik akuersiniarluni Guutillu peqqussutaanik maleruaaniarluni aalajangertariaqarpoq. (Lukasi 9:23; 1 Johannesi 5:3) Unamminiarnartuusinnaavoq, Jiisusili nakussatsinnartumik ima neriorsuivoq: „Ornissinga tamassi suleruluttusi  nanertugaasusilu, qasuertissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut. Nammaatarami iluaqaaq, nammakkiussaralu oqeqaluni.“ — Matthæusi 11:28-30.

Arthur assersuutigeriartigu. Qulinik ukioqarluni agiarneq ilinnialerpaa, inuussutissarsiutigilernissaa siunertaralugu. 14-inik ukioqarluni tusarnaartitsisalereerpoq. Taamaattoq nuannaarluanngilaq. Angutaa inuunerup siunertaa pillugu apeqqutissaqartuaannarpoq upperisarsiornermilu ilinniartitsisut angerlarsimaffimminnut qaaqqusarlugit, akissutaalli naammagisanngilai. Ilaqutariit oqaloqatigiissutigaat ilumut Guuti piunersoq, taamaappallu sooq ajortut akuerinerai. Ilaanni Arthurip angutaata Jehovap Nalunaajaasui oqaloqatigai. Nassuiaataat iluarinartippaa ilaqutariillu tamarmik Biibilimik misissuilernerannik kinguneqarpoq.

Arthurip Biibilimit paasivaa sooq Guutip anniaatit akuerinerai, inuunerullu siunertaa erseqqissumik paasillugu. Ilaquttani allat pingasut assigalugit Arthurip aalajangernini peqqissimissutiginngisaannarpaa. Inuunini Jehovamut tunniulluinnarpaa. „Nuannaaqaanga Jehovap sallusuissut pillugu ilisimasaqalersimmanga, inuussutissarsiutigalugulu nipilersortartut akornanni unammilleqatigiinnerup nalinginnaasorujussuup ingalassimanissaanut ikiormanga. Inuit iluatsitsiniarlutik qanorluunniit iliorusuttarput.“

Arthurip agiarluni ikinngutimi aliikkusersornissaat suli nuannaraa, agiarnerli inuunerani pingaarnersaanngilaq. Guutimulli kiffartorneq taassumunnga pingaarnerpaavoq. Ilaatigut Jehovap Nalunaajaasuisa immikkoortortaqarfiisa ilaanni ukiualuit kiffartorpoq. Arthurip inuillu millionillit allat pinerattut, angutillu inuusuttup pisuup naalagaasut ilaata pinerata akerlianik, aamma illit aalajangiisinnaavutit nuannaarutaanerpaalersumik — Jiisusip qaaqqussutaanik ilassinnilluni taassumunnga ajoqersuganngornermik. (w07 10/01-E)

[Qupp. 6-mi assiliartaq]

Aalajangiinitit allanut pingaaruteqangaarsinnaapput

[Qupp. 7-mi assiliartaq]

Biibili misissorusuppiuk Jiisusimullu ajoqersuganngorlutit?