Allat Jehovap taakkuninnga isiginninneratut isigaagit?

„. . . timimi akerleriinneqaqqunagu avatilli isumaqatigeeqqullugit isumassoqatigeeqqullugillu.“ — 1 KORINTHIMIUT 12:25.

1. Anersaakkut paratiisimut pigatta suna malugaarput?

SILARSUATOQQAMUT ilaajunnaarluta Jehovap innuttaanut ilaaleratta, asanninnerup inuttullu soqutiginninnerup Jehovap Nalunaajaasuisa akornanni atuuttup misiginera nuannaarutigaarput. Ilagiit inuillu inussiarniillutillu uumissuillutillu assortuiumatuujusut Saatanip silarsuaaniittut assigiinngissutaat malugaarput. Anersaakkut paratiisimut eqqissineqarfiullunilu ataasiussuseqarfiusumut pivugut. — Esaja 48:17, 18; 60:18; 65:25.

2. (a) Allanut isiginnittaaserput sumit sunnerneqarsinnaava? (b) Sunnerneqarsimappat qanoq iliortariaqarpugut?

² Piffissarli ingerlatillugu naammalluinnanngissuserput pissutigalugu immaqa qatanngutivut kukkusumik isigilersimavavut. Naammalluinnanngissuserput  pissutigalugu immaqa qatanngutitta kukkuneri pissusiinit ajunngitsunit maluginiarnerusarpavut. Tassa Jehovap taakkuninnga isiginninneratut isiginissaat puiorsimavarput. Taamaappat imminut misissornissamut allanullu isiginnittaatsitta misissornissaanut, isiginnittaatsitsinnillu Jehovap taakkununnga erseqqissumik isiginneriaasianut naapertuuttunngortitsinissamut piffissanngorsimassaaq. — 2 Mosesi 33:13.

Jehovap qatanngutivut qanoq isiginerai

3. Ilagiit kristumiut Biibilimi sumut assersuunneqarpat?

³ Soorlu Korinthimiunut allakkani siullerni 12:2-26-mi allassimasoq, apustilip Paulusip kristumiut tanitat ilagiissaat timimut ’amerlasuunik avateqartumut’ assersuuppaa. Soorlu timi assigiinngitsunik avateqartoq, taamatuttaaq ilagiinnut ilaasortaasut assigiinngitsunik piginnaaneqarlutillu inuttut pissuseqarput. Taamatulli assigiinngisitaartoqarnera Jehovap akueraa. Ilaasortaasut tamarluinnaasa asallugillu pingaartippai. Taamaattumik, Paulusi oqarpoq ilagiinnut ilaasortaasut ’isumassoqatigiissasut’. Tamanna sapernarsinnaavoq allat inuttut pissusii uagut nammineq inuttut pissusitsinnit allaanerusinnaammata.

4. Sooq qatanngutitsinnut isiginnittaatsitsinnik allannguisariaqarsinnaavugut?

⁴ Allaat qatanngutitta sanngiissutaat isiginiarneroqqajaasinnaavavut. Oqartoqarsinnaavoq assiliissummik atugaqartugullusooq, mikisuarannguamik zoomerlugu allisitsisumik. Jehovalli uagut isigisarpaatigut vidvinkeli atorlugu, inummik aammattaaq taassuma avatangiisiinik takussaalersitsisartumik. Uagut pissuserineqartut nuannarinngisavut isiginiarneroqqajaasarivut, Jehovap inuk kinaassusilik tamaat, taassuma pissusii ajunngitsut ilanngullugit, isigisarpaa. Jehovamik ilaarsiniarnerujartortilluta ilagiinni asanninnerup eqqissinerullu anersaavanik siuarsaasinnaanerujartuinnassaagut. — Efesosimiut 4:1-3; 5:1, 2.

5. Sooq allanik eqqartuussinissaq eqqortuliornerussanngila?

⁵ Jiisusip nalunngilaa inuit naammalluinnanngitsut isornartorsiueqqajaallutillu eqqartuusseqqajaasartut. Taamaattumik ima oqarpoq: „Eqqartuusseqinasi eqqartuunneqaqqunasi.“ (Matthæusi 7:1) Allassimaqqaarfiit naapertorlugit Jiisusi ima oqaannarnani: „Eqqartuusseqinasi“, ima oqarpoq: „Eqqartuussissaarit.“ Nalunngilaa tusarnaartumi ilarpassuisa allanik isornartorsiuillunilu eqqartuussisarneq pissuseriinnaraat. Uagut aamma taamaappugut? Taamaaqqajaasarutta isiginnittaatsitta allanngortinnissaa ilungersuutigisariaqarparput, uagut nammineq iluarisaanngitsutut eqqartuunneqannginniassagatta. Tassami Jehovap akisussaaffilersimasaanik eqqartuussisinnaatitaavugut imaluunniit oqarsinnaatitaavugut taanna ilagiinnut ilaasariaqanngitsoq? Imaassinnaavoq qatanngut sanngiissuteqartoq, Jehovalli taanna akuerippagu, taava akuerinngikkutsigu eqqortuliornerussava? (Johannesi 6:44) Jehovap innuttaminik siulersuinera aaqqiisoqartariaqalerpallu piffissarititani nalliuppat akuliukkumaarnera ilumut upperaarput? — Atuaruk Romamiut 14:1-4.

6. Jehovap qanoq isigaatigut?

⁶ Jehovap nuannerluinnaqutigisaa tassaavoq tamatta immikkut piginnaanitsinnik takunnissinnaanera. Takusinnaavaa silarsuassami nutaami naammalluinnartunngorutta inuttut qanoq angusaqarsinnaassanersugut. Aamma nalunngilaa sutigut siumukareersimanersugut. Taamaattumik sanngiissutitta kukkussutittalu tamarluinnaasa isiginiarnerunissaannut pissutissaqanngilaq. Tussiaat 103:12-imi  ima allassimavoq: „Soorlu kangia kitaanit ungasissoq, taamatut unioqqutitsinivut ungasillisippai uatsinnit.“ Tamanna qujamasuutigingaarsinnaavarput! — Tussiaat 130:3.

7. Jehovap Daavimik isiginninnera sumik ilinniarfigaarput?

⁷ Jehovap inuup ajunngitsortaannaanik isiginnissinnaaneranut maluginiarnartumut Biibilimi uppernarsaateqarpoq. Taassuma Daavi ’kiffamisut peqqussutiminut naalattutut tamatigullu isimini eqqortuusumik iliuuseqarluni uummatimigut iluunngarluni imminik malinnittutut’ eqqartorpaa. (1 Kunngit 14:8) Nalunngilarput Daavi arlaleriarluni eqqunngitsuliortoq. Taamaakkaluartorli Jehova aalajangerpoq Daavip pissusii ajunngitsut kisiisa maluginiarniarlugit, nalunnginnamiuk uummatimigut ilumoortuusoq. — 1 Nalunaarsuutit 29:17.

Qatanngutitit Jehovap taakkuninnga isiginninneratut isigikkit

8, 9. (a) Qanoq ililluta Jehova assigilersinnaavarput? (b) Tamatumunnga tunngatillugu qanoq assersuusiortoqarsinnaava, qanorlu assersuusiaq ilinniarfigisinnaavarput?

⁸ Jehovap inuup uummammiui takusinnaavai. Uagulli takusinnaanngilavut. Tamanna immini pissutissaalluanngilaq eqqartuusseqqajaasuunissamut. Uagut inuup iliuutsiminut pissutiginiagai tamaasa ilisimanngilavut. Jehova ilaarniartariaqarparput inuup kukkussutai sanngiissutaalu, naggataatigut peeruttussat, maluginiarnagit. Tamanna anguniagarissallugu pitsaassaaq, ilaa? Anguniagarigutsigu, tamanna qatanngutitsinnut eqqissinartumik attaveqarnissatsinnut iluaqutaassaaq. — Efesosimiut 4:23, 24.

⁹ Assersuutigisinnaavarput illu aserfallassimaqisoq — qaliata pappialarsui katagalersut, igalaavi aserorsimasut qilaavilu imermit ajoquserneqarsimasut. Illumik takunnittut amerlanersaasa qularnanngitsumik illu isaterneqartariaqarsorissavaat — taama kusanaatsigaaq! Taavali sanioqquttoqarpoq illumik allatorluinnaq isiginnittumik. Ajoqutaannai isiginagit paasivaa illu atasinnaasoq, aamma iluarsaanneqarsinnaasoq. Illu pisiaraa, suliaringaatsiarlugulu iluarsaappaa isigiuminarsisillugulu. Maanna sanioqquttut illu kusanarnerartarpaat. Angutitut illumik iluarsaassisutut issinnaavugut? Qatanngutitta kukkussutaannik erseqqissunik maluginiaanata pissusii ajunngitsut anersaakkullu ineriartornissamut periarfissaat isiginiarnerusinnaavavut? Taamaaliorutta qatanngutivut pissusii pillugit asalissavavut, soorlu Jehova taamaattoq. — Atuaruk Hebræerit 6:10.

10. Siunnersuut Filippimiut 2:3, 4-mi allassimasoq qanoq iluaqutigisinnaavarput?

¹⁰ Apustili Paulusi ilagiinniittunut tamanut attaveqarluarnissamut iluaqutigisinnaasatsinnik siunnersuuteqarpoq. Ima allappoq: „Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit. Tamassi immikkut nammineq iluaqutissarsi pinnagu inoqatississaaq iluaqutissaat isumagisiuk.“ (Filippimiut 2:3, 4) Makitajuitsuuneq, imaluunniit maniguunneq, allanut eqqortumik isiginnittaaseqarnissamut iluaqutigissavarput. Allat inuttut soqutigigutsigit pissusiilu ajunngitsut isiginiarnerugutsigit, tamanna Jehovap taakkuninnga isiginninneratut isiginninnissamut iluaqutigissavarput.

11. Ilagiit ilaanni sunik allannguuteqarpa?

¹¹ Silarsuarmi pisartut kingunerisaannik inupparpassuit najukkaminnit allamut nuuttariaqartarput. Illoqarfiit ilaanni inuit nunanit assigiinngitsorpassuarneersut maanna najugaqarput. Najukkatsinnut nuuttut ilaat sallusuissummik Biibilimeersumik soqutiginnilersimapput Jehovamillu pallorfiginneqatigilerluta. Taakku ’inuiaqatigiinnit naggueqatigiinnillu inuiannillu immikkullu oqaasilinnit tamanit pisuupput’. (Saqqummersitat 7:9) Taamaalillutik ilagiippassuit nunanit assigiinngitsorpassuarneersunik ilaasortaqalerput.

12. Immitsinnut qanoq isigiuartariaqarpugut, aamma sooq ilaannikkut tamanna unamminiarnarsinnaava?

¹² Ilagiitsinni immitsinnut qanoq isiginitta eqqumaffiginerunissaa immaqa pisariaqarsinnaavoq. Apustilip Petrusip ’qatanngutigiittut ilumoortumik asaqatigiinnissaq’ aamma ’uummammik minguitsumik asaqatigiinnissaq’ pillugu oqaaqqissaarutaanik eqqarsaatiginninnissaq pitsaassaaq. (1 Petrusi 1:22) Ilagiinni assigiinngitsorpassuarnik inuiaassusilinnik ilaasortaqartumi asanninnermik tunniusimanermillu ilumoortumik siuarsaallunilu ersersitsinissaq unamminiarnarsinnaavoq. Uppeqatitta kulturiat uagut nammineq kulturitsinnit allaanerulluinnarsinnaavoq, soorlu ilinniartitaanikkut, aningaasaqarnikkut naggueqatigiissutsikkullu tunuliaqutaat eqqarsaatigalugit aamma taamaassinnaasoq.  Taakkua eqqarsartaasiat qisuariariaasiallu ilaannikkut paasiuminaatsittarpigit? Immaqa aamma taakku ilinnut taamaapput. Taamaakkaluartorli tamatta ima peqquneqarpugut: „Qatanngutigiissutut peqatigiit tamaasa asasigik.“ — 1 Petrusi 2:17, NV.

13. Eqqarsartaatsitsinnik qanoq aaqqiinissaq pisariaqalersinnaava?

¹³ Immaqa eqqarsartaaserput aaqqittariaqarsinnaavoq qatanngutitsinnik tamanik asanninnerput neruttorsinnaaniassagatsigu. (Atuaruk 2 Korinthimiut 6:12, 13, 1936.) Uagut imminut malugisarpugut imatupajaaq oqarluta: „Paqumisunngilanga, kisianni . . .“, tamatumalu kingorna naggueqatigiinnut aalajangersimasunut ilisarnaataasorisatsinnik arlaannik ajortumik eqqaasaqarluta? Taamatut oqaaseqarnitsigut ersertarpoq peerniartariaqakkatsinnik suli qamuuna paqumisuttugut. Imminut ima aperisinnaavugut: ’Allamik kulturillit ilisarisimallualernissaat ilumoorlunga ilungersuutigaara?’ Taamatut imminut misissorluni aperineq silarsuaq tamakkerlugu qatanngutigiissuarnut ilaanitsinnik akuerinninnerput pingaartitsinnerpullu eqqarsaatigalugit siumukarnissatsinnut iluaqutigisinnaavarput.

14, 15. (a) Allanut isiginnittaatsiminnik allannguisimasunik assersuuteqarit. (b) Taakkua qanoq ilaarsinnaavavut?

¹⁴ Eqqarsartaatsiminnik taamatut aaqqiisut maligassaalluartut Biibilimi oqaluttuarineqarput. Taakkua ilagaat apustili Petrusi. Petrusi juutiugami juutiunngitsup angerlarsimaffianut iserneq ajorpoq. Takorlooriarulli Corneliusip Guutimik nalusup kipineqanngitsup angerlarsimaffianukaqquneqarami qanoq eqqarsarlunilu misigisimasimassanersoq! Petrusip eqqarsartaatsini aaqqippaa, paasigamiuk inuit inuiannit tamaneersut ilagiinnut kristumiunut ilaalernissaat Guutip piumasarigaa. (Apustilit Suliaat 10:9-35) Saulusi, kingusinnerusukkut apustilinngortoq Paulusi, aamma allannguisariaqarlunilu paqumisukkunnaartariaqarpoq. Nassuerpoq kristumiunik ima uumissuisimatigaluni ’allaat Guutip ilagiissai qinugingaartarlugit nungutinniarlugillu’. Naalakkalli Jiisusip taassuma eqqarsartaasia aaqqimmagu, taanna allannguerujussuarpoq allaallu siornatigut malersorsimasaminit ilitsersorneqarnini akueralugu. — Galatiamiut 1:13-20.

¹⁵ Qularnanngilaq Jehovap anersaavata ikiuineratigut isiginnittaatsitsinnik allannguisinnaasugut. Paasigutsigu qamuuna suli paqumisulluta, taava paqumisukkunnaarnissarput ’anersaakkullu ataasiussutsip aalajangiusimaniarnissaa’ sulissutigisigu. (Efesosimiut 4:3-6) Biibilimi kajumissaarneqarpugut ’asanninneq ateqqullugu, tassaammat naammalluinnassutsip qilerutaa [tassaammat ataasiussutsip qilerutaa naammalluinnartoq, NV]’. — Kolossemiut 3:14.

Oqaluussinermi Jehova qanoq ililluta ilaarsinnaagipput

16. Guutip inunnut tamanut tunngatillugu suna piumasaraa?

¹⁶ Apustili Paulusi ima allappoq: „Guuti kinaassusersiortuunngilaq.“  (Romamiut 2:11) Jehovap siunertaraa inuit inuiannit tamaneersut imminik pallorfiginneqataassasut. (Atuaruk 1 Timotheusi 2:3, 4.) Taamaattumik „inuiaqatigiinnut naggueqatigiinnullu, immikkut oqaasilinnut inuiannullu tamanut“ „nutaarsiassamik nuannersumik atajuartussamik“ (NV) oqaluussissutiginnittoqarnissaa isumagaa. (Saqqummersitat 14:6) Jiisusi ima oqarpoq: „Narsaat tassa silarsuaq.“ (Matthæusi 13:38) Tamanna ilinnut qanigisannullu qanoq pingaaruteqartigaa?

17. Qanoq ililluta inuit tamalaat ikiorsinnaavavut?

¹⁷ Jehovamut kiffaasut ilaannaat oqaluussiartorniarlutik nunanut ungasissunut aallarsinnaapput. Imaassinnaavorli tusarliussaq inunnut najukkatsinniittunut nunanit assigiinngitsuneersunut oqaluussissutigisinnaagipput. Inunnut tamalaanut, ukiorpassuarni oqaluussiffigisimasatsinnuinnaanngitsoq, oqaluussinissamut periarfissat eqqumaffigaavut? Soormi aalajangeruit allat suli peqqissaartumik nalunaajaaffigineqarsimanngitsut oqaluussiffiginiarlugit? — Romamiut 15:20, 21.

18. Jiisusip inunnik isumassuinini qanoq ersersippaa?

¹⁸ Jiisusi inuit tamarmik ikiorneqartariaqarnerannik ilisimannilluarpoq. Sumiiffimmi ataasiinnarmiunngitsoq oqaluussivoq. Biibilimi oqaluttuarineqarpoq ’illoqarfiit illoqarfeeqqallu tamaasa angalaarfigigai’. „Inuillu takugamigit nalligingaalerpai“ ersersillugulu ikiorneqartariaqartut. — Matthæusi 9:35-37.

19, 20. Qanoq ililluta Jehovap Jiisusillu inunnik tamalaanik isumassuinerattut isumassuisinnaavugut?

¹⁹ Qanoq ililluta tamatumunnga assingusumik isumassuilluta ersersissinnaavarput? Ilaasa nunaqarfinni illoqarfinnilu angalaarfigisartakkaminniluunniit allani oqaluussiffigineqakulanngitsuni oqaluussinissaq immikkut sulissutigisimavaat. Oqaluussiffigineqakulanngitsut aamma tassaasinnaapput niuertarfeqarfiit, naatsiivissuit bussit qimuttuitsullu unittarfii najugarfiilluunniit iserfigeriaannaanngitsut saavi. Allat oqaatsit allat ilinniarniarlugit iliuuseqarsimapput naggueqatigiit aalajangersimasut maanna najukkaminniittut, imaluunniit eqimattat oqaluussiffigineqarpiarsimanngitsut, oqaluussiffigisinnaaniassagamikkik. Taakkua oqaasii atorlugit ilassinnittarnermik ilinniarneq taakkuninnga soqutiginninnermut taakkuninngalu ajunngitsunik tamanik kissaassinermut ersiutaalluarsinnaavoq. Uagut nammineq oqaatsinik allanik ilinniarsinnaanngikkutta, oqaatsinik allanik ilinniartunik qiimmassaasinnaavugut? Soorunami allat nikallorsaassanngilavut apeqqusiissanataluunniit allat allatut inuiaassusilinnut oqaluussinissamut pissutiginiagaannik. Jehovap isaani kikkut tamarmik erlinnartuupput, uaguttaaq taakku taamatut isigerusuppavut. — Kolossemiut 3:10, 11.

²⁰ Allat Jehovap taakkuninnga isiginninneratut isigigutsigit kikkut tamaasa oqaluussiffigissavavut, pissutsit atugaat apeqqutaatinnagit. Ilaat angerlarsimaffeqanngitsuusinnaapput, peqqissaanngitsuusinnaallutik imaluunniit erseqqilluinnartumik inuunerluttuusinnaallutik. Ilaannit inussiarninngitsumik pineqarutta taakkua inuiaqataat naggueqataalluunniit ajortumik isigilissanngilavut. Paulusi inuit ilaannit ajortumik pineqarpoq, tamannali taakkua naggueqataannut oqaluussiunnaassutiginngilaa. (Apustilit Suliaat 14:5-7, 19-22) Qularutiginngilaa inuit ilaasa oqaluussinini ajunngitsumik periarfigiumaaraat.

21. Allanik Jehovap isiginninneratut isiginninneq qanoq iluaqutigissavarput?

²¹ Tassa erseqqippoq qatanngutinut najukkatsinniittunut, silarsuaq tamakkerlugu qatanngutigiissuarnut oqaluussiffigisartakkatsinnullu — Jehovap isiginnittaasiatut — eqqortumik isiginnittaaseqartariaqartugut. Jehovap allanut isiginneriaasianik ersersitsinerujartortilluta eqqissinermik ataasiussusermillu siuarsaanerujartuinnassaagut, aamma allat Jehovamik, Guutimik kinaassusersiortuunngitsumik, ’assamminilli pinngortitaminik’ tamanik asannilluni soqutiginnittumik, pingaartitsinissaannut ikiorluarsinnaanerulissavavut. — Jobi 34:19. (w08 03/15-E)

Qanoq akissavit?

• Qatanngutivut qanoq isigisussaanngilavut?

• Qatanngutitsinnut isiginnittaatsitsinni Jehova qanoq ilaarsinnaavarput?

• Silarsuaq tamakkerlugu qatanngutigiissuarnut isiginnittaaserput pillugu suut paasivavut?

• Oqaluussigaangatta Jehovap allanut isiginnittaasia qanoq ilaarsinnaavarput?

[Atuaqqissaarnermi apeqqutit]

[Qupp. 26-mi assiliartaq]

Inuit allatut kulturillit qanoq ililluni ilinniarneqarsinnaappat?

[Qupp. 28-mi assiliartat]

Nutaarsiassaq nuannersoq qanoq ililluni amerlanerusunut oqaluussissutigineqarsinnaava?