Guutip naalagaaffia — qagugu tikiutissava?

„NAALAGAQ, maannakkununa Israelikkunnut naalagaaffik kingumut pilersinniarit?“ (Apustilit Suliaat 1:6) Apustilit Jiisusi taama aperaat paaserusuttorujussuugamikku qaqugu naalagaaffini pilersinniarneraa. Ullumikkut, ukiut 2000-ingajaat tamatuma kingorna, Guutip naalagaaffiata qaqugu tikiunnissaanik paasinnikkusuttut suli amerlapput.

Jiisusip oqaluussinermini Guutip naalagaaffia pingaarnerpaatimmagu, ilimagineqarsinnaavoq oqaluuserisassagaa. Taamaaliortarporlumi! Piffissaq malunnaatilik ’najuunnissaminik’ taasani oqaluuserigajuppaa. (Matthæusi 24:37, NV) Najuunnissaq taanna Naalagaaffiup Missiarsikkoortup pilersinneqarneranut attuumassuteqarluinnarpoq. Jiisusip najuunneranut suut ilisarnaataappat? Tamanna pillugu Biibilimi paasissutissiissutigineqartut sisamat sammeriartigik.

1. Kristusip ’najuunnera’ taassuma toqunerata kingunerujussuatigut aallartittussaavoq. Jiisusi assersuusiorpoq imminut assersuulluni ’angummut akimasunik naggueqartumut nunamut ungasissumut aallartumut nunamini kunngiusutut akuerineqarumalluni’. (Lukasi 19:12) Assersuusiaq siulittuutaasoq taanna qanoq eqquuppa? Jiisusi toquvoq makititaallunilu, taava „nunamut ungasissumut allarpoq“, tassa qilaliarpoq. Soorlu Jiisusip assersuusiami taassumunnga assingusumi siulittuutigigaa „kingunerujussuatigut“ aatsaat kunngitut pissaaneqarluni tikiuttussaavoq. — Matthæusi 25:19.

Jiisusip qilaliarnerata kingorna ukiorpaalunnguit qaangiuttut apustili Paulusi taanna pillugu ima allappoq: „Palasiusoq una sassaassaqarpoq ajortit pillugit pilliummik ataasiinnavimmik soraajuitsumik atuuttussamik taavalu Guutip talerpiata tungaani issialerluni, tassanilu utaqqiinnarlugu akeqqami isikkaminut tummarfiliunneqarnissaat.“ (Hebræerit 10:12, 13) Tassa Jiisusip qilaliarnerata kingorna utaqqineq sivisooq aallartippoq. Utaqqineq kiisami naavoq Jehova Guutip ernini naalagaaffimmi Missiarsikkoortumi qanganiilli neriorsuutigisaasumi kunnginngortimmagu. Taamaalinerani Kristusip ’najuunnera’ aallartippoq. Pisumut pingaarutilimmut tamatumunnga inuit nunarsuarmi maaniittut isiginnittuusussaappat?

2. Jiisusip najuunnera inuit isaannit takussaanngilaq. Eqqaamajuk Jiisusip najuunnissaminut nalunaaqutaasussaq eqqartormagu. (Matthæusi 24:3) Najuunnissaa inuit isaannit takussaassappat, nalunaaqut pisariaqassagaluarpa? Takorlooriaruk imaq takuniarlugu biilinik ingerlasutit. Immaqa allagartat aqqutissannik tikkuussisut takuatit, sissalli sinaani qeqaleruit killingusaallu tungaanut imaq isigilerukku, ilimagaajuk allagartarujussuaq „Imaq“-mik allassimasoq killingusaap tungaanut tikkuussisoq takussallugu? Soorunami naamik. Allagartaq nalunaaqulluunniit arlaannut nammineq isinnik takusinnaasannut tikkuussisoq sumut atussagami?

Jiisusip najuunnissaminut nalunaaqutaasussaq eqqartorpaa, inuit namminneq isiminnik takusinnaasaannut tikkuussinissaq pinnagu, qilammili pisussamik paasinninnissaannut ikiorniarlugit.  Tamatumunnga atatillugu ima oqarpoq: „Guutip naalagaaffia takussaalluni tikiutissanngilaq.“ (Lukasi 17:20) Inuit nunarsuarmiittut qanoq ilillutik nalunaaqummit takusinnaassavaat Kristusip ’najuunnera’ aallartereersimasoq?

3. Jiisusip najuunnerata ilisarnaatigissavaa piffissaq nunami ajornartorsiungaarfiusoq. Jiisusi oqarpoq qilammi kunngitut najuunnermi ilisarnaatigissagai nunarsuarmi sorsunnerit, kaannersuit, nunap sajuttarneri, nappaassuit toqoraataasut inatsisaatsuliornerillu. (Matthæusi 24:7-12; Lukasi 21:10, 11) Alianartunut taakkununnga suna pissutaava? Biibilimi nassuiarneqarpoq maanna Kristusip kunngitut ’najuunnera’ aallartereermat Saatani, „silarsuup matuma naalagaanera“, kamattorsuusoq piffissakissutsi nalunnginnamiuk. (Johannesi 12:31; Saqqummersitat 12:9, 12) Saatanip kamannera Kristusillu najuunnera pillugit nalitsinni takussaasunik uppernarsaatissarpassuaqarpoq. Pingaartumik 1914-imiilli uppernarsaatit nunarsuaq tamakkerlugu aatsaat taama amerlatigipput, ukioq oqaluttuarisaanermik ilisimatuut ukiutut allanngorfiusutut miserratiginngisaat.

Tamakku tamarmik nutaarsiassaarpasipput nuanniitsut, taamaanngilarli. Isumaqarput Missiarsi maannakkut qilammi naalagaaffimmini naalakkersuisoq. Qanittuararsuakkut nunarsuarmut tamarmut naalakkersuilissaaq. Inuilli qanoq ilillutik Guutip naalagaaffianik ilisimasaqalersinnaappat tamatuma aqutsineranik ilassinnissinnaalerlutik tamatumunngalu innuttaasinnaalerlutik?

4. Nunarsuaq tamakkerlugu oqaluussineq Jiisusip najuunneranut ilisarnaataavoq. Jiisusi oqarpoq najuunnissani ’Noap ulluisut’ ikkumaartoq. * (Matthæusi 24:37-39) Noa umiarsualiuinnarani aamma ’iluarnermik nalunaariartortitaavoq’. (2 Petrusi 2:5) Guutip eqqartuussinissaata qanillinera pillugu inuit mianersoqquai. Jiisusi oqarpoq ajoqersukkami nunamiittut najuunnermi nalaani assingusumik ulapputeqassasut. Ima siulittuivoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ — Matthæusi 24:14.

Soorlu allaaserisap tamatuma siuliani takugipput, Guutip naalagaaffiata silarsuup matuma naalagaaffii tamaasa suujunnaarsissavai. Oqaluussinikkut inunnut malugeqquneqarpoq qilammi naalagaaffik taanna qanittukkut iliuuseqassasoq, aseruinissamillu aniguinissamut Naalagaaffimmilu tamatumani innuttaalernissamut kikkut tamarmik periarfissinneqarlutik. Taamaattumik una apeqqutaavoq pingaarutilik: Illit qanoq periaaseqassavit?

Guutip naalagaaffia tassaava ilinnut nutaarsiaq nuannersoq?

Tusarliussaq Jiisusip oqaluussissutigisaa neriuummik nalissaqanngitsumik ilaqarpoq. Ukiut tusindillit matuma siorna Edenimi pikitsitsinerup kingorna Jehova Guuti aalajangerpoq naalakkersuisunik pilersitsiniarluni sunik tamanik aaqqiisussanik inuillu aalajaatsut Guutip aallaqqaammulli siunertaatut atugaqalersinniarlugit — nunami maani paratiisiusumi inuunermik naassaanngitsumik. Guutip naalagaaffiata qangali neriorsuutigisaasup tamatuma maannakkorpiaq qilammi aqutsineranik ilisimanninnermit suna alla pissanganarnerusinnaava? Naalagaaffik taanna eqqarsaataannaanani piviusuuvoq!

Maanna Jiisusi Guutimit kunngitut toqqakkatut akeqqami akornanni naalakkersuivoq. (Tussiaat 110:2) Silarsuarmi ajortunngorsimasumi, Guutimik tunussisimasumi, maani Missiarsi Ataatami piumasaatut iliorpoq, tassa Guutip kinaassusianik ilumoortumik ilisarserusuttunik taassuminngalu „anersaakkut ilumoornikkullu“ pallorfiginnikkusuttunik tamanik ujaasivoq. (Johannesi 4:24) Guutip naalagaaffiata aqutsinerata ataani naassaanngitsumik inuunissamik neriuut inunnut naggueqatigiinnit tamaneersunut, qanorluunniit utoqqaassusilinnut innuttaaqatigiinnilu qanorluunniit inissisimasunut tamanut ammavoq. (Apustilit Suliaat 10:34, 35) Qamannga pisumik kajumissaarpatsigit periarfissaq asseqanngitsoq siuninnguanniittoq ilasseqqullugu. Guutip naalagaaffia pillugu maannakkut ilinniarit tamatuma naapertuilluartumik aqutsinerata ataani naassaanngitsumik inuuneq nuannaarutigisinnaajumallugu! — 1 Johannesi 2:17. (w08 01/01-E)

[Quppernerup ataani ilanngussaq]