Guutip naalagaaffia suua?

JIISUSIP oqaluuussinerani suna pingaarnersaava? Jiisusip nammineq oqarnera naapertorlugu Guutip naalagaaffia pingaarnersaavoq. (Lukasi 4:43) Jiisusip Naalagaaffik taanna tusarnaartiminut innersuussutigigajuppaa. Eqqumiigivaat paatsuungassutigaluguluunniit? Suunersoq apeqqutigaat? Naamik. Taama aperisoqarsimaneranik iivangkiiliuni oqaatigineqanngilaq. Guutip naalagaaffia juutinit ilisimaneqarluarami?

Allagatoqqani juutit illernartutut isigisaanni naalagaaffik taanna allaaserineqarpoq naalagaaffillu suunersoq sumillu naammassisaqarumaarnersoq takorlooruminartumik piviusutullu oqaluttuarineqarluni. Aammattaaq ullumikkut Biibilimik atuarnikkut Guutip naalagaaffia pillugu paasisaqarnerusinnaavugut. Guutip naalagaaffia pillugu ilumoortut arfineq-marluk Biibilimi ajoqersuutigineqartut misissoriartigik. Siulliit pingasut juutinit Jiisusip nalaani taannalu sioqqullugu inuusunit ilisimaneqarluarput. Tullii pingasut Kristusimit taassumaluunniit ajoqersugaanit ukiuni hundredelinni siullerni saqqummiunneqarput. Ilumoortoq kingulleq nalitsinni ilisimaneqalerpoq.

1. Guutip naalagaaffia tassaavoq naalakkersuisut piviusut naassaanngitsumillu atasussat. Biibilimi siulittuummit siullermit erserpoq Guuti aallartitsiumaartoq uppernikkut imminut attaviginnittuinnartunik annaassisussamik. Aniguisitsisussaq ’kinguaassamik’ taaneqartoq Adamip, Evap Saatanillu pikitsitsinerisa kingunipiluinik alianangaartunik aaqqiissaaq. (1 Mosesi 3:15) Kingusinnerujussuakkut kunngi Daavi aalajaatsoq ’kinguaassaq’ taanna, Missiarsi, pillugu pissanganartumik paasisaqarpoq, Guutip naalagaaffiani kunnginngorumaartoq. Missiarsip naalakkersuinera allanit tamanit allaanerulluni naassaanngitsumik atassaaq. — 2 Samueli 7:12-14.

2. Guutip naalagaaffiata inuit naalakkersuisui tamaasa suujunnaarsissavai. Pruffiiti Danieli takorruuisinneqarpoq nalerput tikivillugu naalagaaffissuarnik kingoraartaattunik. Malugiuk pissanganarnerpaaffia, ima allaatigineqartoq: „Kunngit [nunamiut kingulliit] taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ Tassa silarsuarmi matumani naalagaaffiit, imaluunniit naalakkersuisut — taakkua sorsuutsitsineri, naqisimanninneri peqquserluttuunerilu ilanngullugit — tamarmik naassaanngitsumik piuneerussaassapput. Danielip siulittuutaani ersersinneqartutut Guutip naalagaaffia qanittukkut nunarsuarmut tamarmut naalakkersuilissaaq. (Danieli 2:44, 45) Guutip naalagaaffia eqqarsaataannaanani piviusuusussaavoq naalakkersuisunilu kisiartaalersussaalluni. *

 3. Guutip naalagaaffiata sorsunnerit, nappaatit kaannersuillu, aap, allaat toqu atorunnaarsissavai. Siulittuutini Biibilimeersuni nuanningaartuni Guutip naalagaaffiata maani nunami suut naammassiumaarnerai ersersinneqarput. Nunami pissaanillit naammassisinnaasimanngisaannagaat imaluunniit naammassinngisaannagassaat Guutip naalagaaffiata naammassissavai. Takorlooruk — sakkut sorsuutit tamarmik naassaanngitsumik suujunnaarsinneqassasut! Guutip „nunarsuarmi tamarmi sorsunnerit soraarsikkumaarpai“. (Tussiaat 46:10) Nappaataarutivissaaq. Nakorsat napparsimmaviillu atorfissaarutissapput. „Innuttaasoq kinaluunniit oqassanngilaq: ’Napparsimavunga!’“ (Esaja 33:24) Kaannersuit, nerisassakilliornerit imaluunniit timip pisariaqagai inorlugit nerisaqarsimaneq tusarsaajunnaassapput. „Karrit naammangaartut nunami naasimassapput.“ (Tussiaat 72:16, 1990) Toqusunik ilisisoqassaassaaq, iliveqarfeerutissaaq toqusut inaat atorfissaarutissapput tamakkualu kingunerisaannik aliasuutit peerutissapput. Toqu, akerarput naakkittaatsoq, kiisami ajugaaffigineqarsimassaaq. Guutimit „toqu nungutinneqassaaq piujunnaarsivillugu. Guutillu [Jehovap] isit tamaasa qullingiarumaarpai“. — Esaja 25:8.

4. Guutip naalagaaffiani naalagaasoq Guutimit toqqagaavoq. Missiarsi imminut naalakkersuisunngortinnanilu inunnit naammalluinnanngitsunit qinerneqanngilaq. Jehova Guutip nammineerluni toqqagaraa. Taaguutit Missiarsi aamma Kristusi tamatuminnga paasinarsisitsipput. Taaguutit taakku marluullutik isumaqarput „Tanitaq“. Kunngi taanna atorfimminut immikkut ittumut Jehovamit tanitaavoq, imaluunniit toqqagaavoq. Taanna pillugu Guuti ima oqarpoq: „Aajuna kiffara, najummisara, qinigara, nuannarisara. Taassumunnga pisippara anersaara, iluarnerlu inuiannut saqqummiutissavaa.“ (Esaja 42:1; Matthæusi 12:17, 18) Naalakkamik qanoq ittumik pisariaqartitsinersugut Pinngortitsisuunngitsup kiap allap nalunnginneruaa?

5. Guutip naalagaaffiani naalakkap takutilluarsimavaa naalakkersuisussaqqissuulluni. Paasinarsivoq Jiisusi Nazaretimioq tassaasoq Missiarsitut toqqagaq. Kinguaariinni Guutip toqqagaani inunngorpoq. (1 Mosesi 22:18; 1 Nalunaarsuutit 17:11; Matthæusi 1:1) Jiisusip nunamiinnermini Missiarsi pillugu siulittuuterpassuit nunaliarnissi ukiunik hundredelikkuutaanik sioqqullugu allataasut eqquutitippai. Aamma qilammiit nalunaarutigineqarpoq tassaasoq Missiarsi. Qanoq? Guutip qilammiit nalunaarneratigut Jiisusi nammineq erneralugu, inngilit oqarnerisigut Jiisusi tassaasoq Missiarsi siulittuutaasoq, aamma Jiisusip — amerlanertigut inuit hundredellit takkuani allaalluunniit inuit tusindillit isiginnittoralugit — tupinnartuliortarneratigut, tupinnartulianik Guutip pissaaneratiguinnaq pisinnaasunik. * Jiisusip takutittuarpaa naalakkatut qanoq ittuujumaarnerluni. Inunnik allanik ikiuinissaminut pissaaneqaannarani — aamma ikiuerusungaarpoq. (Matthæusi 8:1-3) Namminissarsiortuunngilaq, misigittartuuvoq, sapiitsuuvoq maniguuttuullunilu. Inuunerata oqaluttuarineqarnera tamanit atuarneqarsinnaalluni Biibilimi allassimavoq.

6. Kristusi, Guutip naalagaaffiani kunngiusoq, 144.000-inik naalakkersueqateqarpoq. Jiisusi oqarpoq allat, ilaatigut apustilini, qilammi naalakkersueqatigissallugit. Eqimattat taakkua ’savarpannguanik’ taavai. (Lukasi 12:32) Kingusinnerusukkut apustili Johannesi paasitinneqarpoq ’savarpannguit’ taakku katillutik 144.000-ussasut. Qilammi pissanganartumik suliassaqassapput — kunngitut naalakkersuissapput palasitullu Kristusi kiffartoqatigissallugu. — Saqqummersitat 5:9, 10; 14:1, 3.

7. Guutip naalagaaffia maanna qilammi naalakkersuivoq nunarsuarmullu tamarmut naalakkersuilernissaminut piareersimalluni. Ilumoortoq kingulleq taanna ilisimasinnaasatta pissanganarnersaraat. Jiisusip qilammi kunngitut oqartussaassusilerneqarsimaneranut Biibilimi uppernarsaatissarpassuaqarpoq. Maannakkut, uagut nalitsinni, qilammi naalakkersuivoq, qanittuararsuakkullu eqqaariikkatsitut naalakkersuinini nunarsuarmut tamarmut atuutilersissavaa siulittuutillu nuanningaartut eqquutitillugit. Sooq qularisariaqanngilarput Guutip naalagaaffia maannakkut naalakkersuisoq? Aamma qaqugu nunarsuarmut naalakkersuilissava?

[Quppernerup ataani ilanngussaq]