Qinnut silarsuarmi tamarmi qinnutaasartoq
Qinnut silarsuarmi tamarmi qinnutaasartoq
TAKORLOORUK inuit hundrede millionilikkuutaat allaammi milliardilikkuutaat assigiimmik qinnuteqartut. Qilammi nunarsuarmilu oqartussaanerpaaq aalajangersimasumik kissaateqarlutik qinnuigaat. Taakkuali ilaasa ikittuinnaat suna qinnutiginerlugu nalunngilaat. Ilumut taamatoqarsinnaava? Aap, ullut tamarluinnaasa taamatut pisoqartarpoq. Inuppassuit taakku sunaana qinnutigisaraat? Guutip naalagaaffiata tikiunnissaa!
Missiliuussineq naapertorlugu upperisarsioqatigiit 37.000-it missaat, Jiisusi Kristusimik malinnittuunerarnermikkut, kristumiuunerarput. Taakku 2 milliardinit amerlanerusunit ilaasortaqarput, taakkualu ilarpassuisa qinnut ataatarpuutut ilisimaneqartoq qinnutigisarpaat. Qinnut taanna nalunngiliuk? Jiisusip qinnut taanna ajoqersukkaminut ilinniartitsissutigaa, imalu aallartippoq: „Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.“ — Matthæusi 6:9, 10.
Ukiuni hundredelikkuutaani naalagiartartut ilumoorsaarlutik qinnut taanna utertarpaat. Ilaqutariittut inuttullu kisimiitillutik piffissani nuannersuni nuanninngitsunilu qinnutigisarpaat. Ilaasa qamannga pisumik qinnutigisarpaat. Allarpassuilli isumaa eqqarsaatigivallaarnagu alanngaartarpaat. Kristumiuunerartuinnaanngillalli Guutip naalagaaffiata tikiunnissaanik neriuutiginnittut qinnutiginnittartullu.
Upperisarsioqatigiippassuit assigiissutaat
Juutit qinnutaat ilisimaneqarluartoq aliasuttut kaddish-iannik taaneqartarpoq. Qinnummi toqu aliasunnerlu pineqanngillat, toqusoqarneranulli atatillugu atuarneqartarnera ileqquuvoq. Ilaatigut ima oqaasertaqarpoq: „Qanortoq Taanna [Guuti] ilissi inuunissi nalaani naalagaaffimmini naalakkersuigili . . . maanna siunissamilu qanittumi.“ * Qinnutitoqqami allami naalagaaffik Daavip kinguaavatigut Missiarsikkut pilersinneqartussaq synagogemi qinnutigineqartarpoq.
Upperisarsioqatigiinni kristumiuunngitsuni allani aamma inuppassuarnit Guutip naalagaaffia pillugu eqqarsaat nuannarineqarpoq. Aviisi The Times of India naapertorlugu Indiamiu 1800-kkunni upperisarsiornikkut siuttuusoq nuimasooq, hindut, musliimit kristumiullu upperisaannik ataqatigiilersitsinissamik soqutigisalik, ima oqarpoq: „Guutip naalagaaffia ilumoortoq piviusunngornavianngilaq Kangia Kitaalu ataasiussuseqalinngippata.“ Strathfieldimi Australiamiittumi islamisiortut collegeanni rektori qanittukkut aviisimut ima allappoq: „Musliimit allat tamarmik uppernerattut Jiisusip tikiuteqqinnissaa Guutillu naalagaaffia ilumoortoq pilersissagaa upperaara.“
Guutip naalagaaffianik neriugisaqartut tamatumalu tikiunnissaanik qinnutiginnittartut qularnanngitsumik maanna milliardilikkuutaajupput. Soqutiginartorli eqqarsaatigiuk.
Nalugunanngilat uagut Jehovap Nalunaajaasui, atuagassiamik matumannga saqqummersitsisartut, illit illoqarfinni illumiit illumut angalaartartugut Biibili pillugu inuit oqaloqatiginiarlugit. Allaaserisap tamatuma allanneqarnerata nalaani silarsuaq tamakkerlugu, nunani 236-ni oqaatsit 400-nit amerlanerusut atorlugit, suliaq tamanna suliarivarput. Oqaluussinitsinni Guutip naalagaaffia pingaarnerutipparput. Maluginiartariaqarpoq atuagassiap taaguutaa tamarmi imaammat: Napasuliaq Alapernaarsuiffik, Jehovap naalagaaffianik tusarliussisoq. Inuit aperigajuttarpavut naalagaaffiup tamatuma tikiunnissaa qinnutigisarneraat. Amerlasuut angertarput. Aperigaangattali naalagaaffik taanna suunersoq, amerlanerit nalunerartarpaat, ersernerluttumilluunniit nassuiarlugu.
Sooq taama amerlatigisut nassuiarsinnaanngisartik qinnutigisarpaat? Guutip naalagaaffia pillugu isumap paasiuminaatsuunera imaluunniit erseqqinngitsuunera pissutaava? Naamik. Guutip naalagaaffia suunersoq Biibilimi paasiuminarluinnartumik nassuiarneqarpoq. Aammattaaq Guutip naalagaaffia pillugu tusarliussap Biibilimeersup ulluni eqqissisimananngitsuni makkunani piviusumik neriuuteqalersissavaatit. Allaaserisami tulliuttumi takussavarput neriuut taanna pillugu Biibilimi qanoq allassimasoqarnersoq. Taava takussavarput Guutip naalagaaffia taanna tikiuteqqullugu Jiisusip qinnutaa qaqugu akineqarumaartoq.
[Quppernerup ataani ilanngussaq]
^ imm. 6 Ataatarpooq, Jiisusip suna qinnutigissagipput takutinniarlugu qinnutaa, assigalugu aliasuttut kaddish-iani Guutip aqqata illernarsisinneqarnissaanik kissaateqarneq qinnutigineqartarpoq. Oqallisaavoq qinnut kaddish Jiisusip nalaaneersuunersoq siusinnerukkulluunniit pilersimanersoq, assigiissuteqarneralli tupaallaataasariaqanngilaq. Jiisusip qinnutaani nutaaliornissaq mumisitsinissarluunniit siunertaanngilaq. Qinnutigineqartut tamarmik Allakkanik Illernartunik, taamanikkut juutit tamarmik atorsinnaasaannik, tunngavilersugaalluarput. Jiisusip nunaqqatini juutit qinnutigisareersimagunagaannik qinusaqqullugit kajumissaarpai.