Atuartartut apeqqutaat

Aalisarneq piniarnerlu kristumiuusup qanoq isigisussaavai?

Aalisarneq piniarnerlu Biibilimi assuarineqanngillat. (5 Mosesi 14:4, 5, 9, 20; Matthæusi 17:27; Johannesi 21:6) Kristumiulli piniartartut aalisartartullu najoqqutassiat Biibilimiittut arlallit eqqarsaatigisariaqarpaat.

Noa taassumalu kinguaavi uumasunik toqutsinissaminnut nerinissaminnullu Guutimit akuerineqarput, aatsaalli neritinnagit aaveqqaarunikkit. (1 Mosesi 9:3, 4) Peqqussummi tamatumani erseqqissarneqarpoq uumasup uumanera ataqqineqartussaasoq Guutimeersuummat. Taamaattumik kristumiu unammissutiginiaannarlugu nuannaarniutiginiaannarluguluunniit uumasumik toqutsinavianngilaq, taamaaliornermi uumassup uumaneranik naakkittaatsumik asissuineruvoq. — Ussatit 12:10.

Aamma inuup nammineq isiginnittaatsini eqqarsaatigisariaqarpaa. Apustilit aalisartuusut naammattorsuarnik pisaqaraangamik qularnanngitsumik nuannaarutigisarpaat. Taamaakkaluartorli piniarnermut aalisarnermulluunniit qanoq pikkoritsigitiginerminnik usorsitsaarutiginninnerannik, imaluunniit angutaassusertik uppernarsarniarlugu allanut unamminerannik, imaluunniit pissanganartorsiutiginiaannarlugu, ajugaaniutiginiaannarlugu unammissutiginiaannarluguluunniit taamaaliornerannik takussutissaqanngilaq. — Tussiaat 11:5; Galatiamiut 5:26.

Taamaammat imminut ima aperisinnaavugut: ’Jehovap inuunermut isiginnittaasianik ataqqinninnermut tunngatillugu maligassiuilluarpunga? Piniartarneq aalisartarnerluunniit eqqarsaatiginerusarpara oqaluuserinerusarlugulu? Uanga inuunera ersersitsiva piniarnermik aalisarnermillu soqutiginningaartuusunga imaluunniit Guutimut nalunaajaasuusunga? Piniarneq aalisarnerluunniit pissutigalugu uppinngitsut qanittumik attaveqarfigaakka imaluunniit ilaquttakka sumiginnartarpakka?’ — Lukasi 6:45.

Nerisassarsiorniarlutik aalisartartut piniartartulluunniit ilaat immaqa isumaqarput piniarfinngoraangat kristumiutut sammisartakkanik tunulliussisinnaatitaallutik. Guutimulli uppernerput taassuminngalu tatiginninnerput ersersittarpavut soqutigisat anersaakkut ittut sunit tamanit salliutittuarutsigik. (Matthæusi 6:33) Kristumiuusup aamma „kaasarip“ piniarnermut aalisarnermullu tunngatillugu inatsisai tamaasa maleruartarpai, oqartussaasut nakkutilliititaqarpata nakkutilliititaqanngikkaluarpataluunniit. — Matthæusi 22:21; Romamiut 13:1.

Jehovap piniarnermut aalisarnermullu isiginnittaasiatut isiginnittaaseqalerusukkaanni immaqa eqqarsartaatsimik taassuma najoqqutassiaanut naapertuuttunngortitsinissaq pisariaqarpoq. (Efesosimiut 4:22-24) Aamma allat nalunngeqatiginnissutaat eqqarsaatigisariaqarparput aalajangigaallu ataqqillugit. Tamatumunnga tunngatillugu apustili Paulusi naleqqulluartumik ima siunnersuivoq: „Eqqartuuteqatigiittarunnaarniarta,“ aamma „eqqortuliussaatit . . . qatanngutinnut naakkiussutaasinnaasumik iliuuseqanngikkuit.“ (Romamiut 14:13, 21) Taamatut namminissarsiunngitsumik asanninneq ataqqinninnerlu ilagiinni eqqissinermut siuarsaataassaaq pinngortitsisitsinnillu, inuunerup pilerfianit, iluarisaassalluni. — 1 Korinthimiut 8:13. * (w07 12/01-E)

[Quppernerup ataani ilanngussaq]