Harmagedoni Guutip sorsunnera sorsunnernik tamanik soraarsitsisussaq

„Inoqqammik toqutsinissaq amiilaarnartutut isigaat; taamaattumik taakkua isaannik isigalugu sorsunneq paasiuminaappoq maajunnarlunilu, allaat oqaaseqartinngilaat.“ — ISSITTUMI ILISIMASASSARSIORTARTUP NORSKIUSUP FRIDTJOF NANSENIP INUIAQATIGIIT KALAALLIT 1888-IMI TAAMATUT ALLAATIGAI.

INUIAQATIGIINNI sorsunnermik ’paasiuminaatsutut maajunnartutullu’ isiginnittuni inuussalluni kia nuannarissannginnerpaa? Sorsuttoqartarnera ilisimaneqanngimmat silarsuarmi oqaatsip ’sorsunnerup’ atorneqanngiffigisaani kikkut tamarmik inoorusupput, ilaa? Silarsuarli taamaattoq anguneqarsinnaarpasinngissinnaavoq, pingaartumik tamatumannga piviusunngortitsisussatut inuit tutsuigissagaanni.

Biibilimili Esajap siulittuutaani Guuti neriorsuivoq silarsuup taamaattup piviusunngornissaa nammineq isumagiumaarlugu: „Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit. Inuiaat panamik imminnut silugutissaassapput, sorsunnissamut sungiusarunnaassallutik.“ — Esaja 2:4.

Maannakkorpiaq nunarsuarmi sorsunnerit 20-t missaanniittut ingerlanneqarput, nunarsuarlu tamakkerlugu sakkutuut 20 millionit missaat sakkutuutut sulipput. Taamaattumik neriorsuut taamaattoq eqquutissappat silarsuarmi allanngornersuaqartariaqarpoq. Guuti Ajugaqanngitsoq Jehova inuiaat atugaannut akuliuttariaqarpoq. Jehovap akuliunnerata tamatuma sakkortunerpaaffia Biibilimi Harmagedonimik taaneqarpoq. — Saqqummersitat 16:14, 16.

Naak oqaaseq „Harmagedoni“ ukiuni kingulliunerusuni silarsuaq tamakkerlugu atombombit atorlugit sorsunnermut taaguutitut atorneqartaraluartoq, oqaatsip isumaa pingaarneq ordbogi malillugu imaappoq: „Pissaanillit ajunngitsut ajortullu sakkortuumik inaarutaasumillu sorsuffissaat.“ Ajunngitsut qaquguluunniit ajortut ajugaaffigisinnaassavaat, imaluunniit sorsuunneq taamaattoq takorluuinerinnaava tunngaveqanngitsoq?

Ajussuseerukkumaarnera Biibilimi ataasiaannarani eqqaaneqarmat qiimmaallannarpoq. Biibilimi tussiaatit ilaanni ima siulittuuteqarpoq: „Ajortuliortut tamarmik piiagaassapput, iluanngitsullu siunissaqartitaanngillat.“ (Tussiaat 37:38) Ussatini ima allassimavoq: „Peqqusersuitsut nunami najugaqassapput, assuarnaatsut kisimik tassaniilissapput. Kisianni iluanngitsut nunamit piiagaassapput tunussisullu tassannga aallarunneqarlutik.“ — Ussatit 2:21, 22.

Biibilimi aamma erseqqissarneqarpoq ajortut pissaanertik namminneq kajumissutsiminnik iperarnavianngikkaat. Taamaattumik pisariaqarpoq Guutip inaarutaasumik akuliunnissaa ajortut tamaasa piiarlugit, ajussuseq sorsunnerup kingunerisaa ilanngullugu. (Tussiaat 2:2) Akerleriinneq asseqanngitsoq taanna pillugu taaguut  maluginiarnartoq Harmagedoni Biibilimi atorneqarpoq.

Siornatigut Megiddomi sorsuunnerit

Oqaaseq „Harmagedoni“ isumaqarpoq „Megiddop Qaqqaa“, itsarlu illoqarfiusup Megiddop — aamma Jizre’elip narsartaata illoqarfiup tamatuma eqqaaniittup — oqaluttuassartaannut takisuunut pissaaneqarniuunnerpassuit pingaaruteqangaartut ilaapput. Oqaluttuarisaanermik ilisimatooq Eric H. Cline atuakkiamini The Battles of Armageddon-imi ima allappoq: „Oqaluttuarisaanerup ingerlanerani Megiddo aamma Jizre’elip narsartaa sorsuffiusarsimapput atugartuussutsip siaruariartorneranut pingaarutilinnik.“

Eric H. Clinep tikkuarpaa Megiddop qanittuani sorsuuttarnerit paasinarsigajuttarsimasut pingaaruteqartuusut. 1200-kkunni Mongoliamiut sakkutuui Asiap ilarujussuanik tiguaariataartut, Jizre’elip qoorortaani siullermeerlutik ajorsartinneqarput. Sorsunnersuarmi siullermi Megiddop eqqaani Tyrkiamiut tuluit sakkutuuinit sakkutuut naalagaannit Edmund Allenbymit siulersorneqartunit ajorsartinneqarput. Allenbyp ajugaanera sakkutuunut tunngasunik oqaluttuarisaanermik ilisimatuup oqaatigaa tassaasoq „oqaluttuarisaanermi sukkanerpaamik pingaaruteqarnerpaamillu sorsukkiartornerit ilaat, sorsuunnerit pingaaruteqarnerpaat ilaat“.

Aamma sorsuunneq pingaarutilik Biibilimi oqaluttuarineqartoq Megiddop eqqaani pivoq. Tassani eqqartuussisup Barakip Kana’anikkut sakkutuui Siseramit siulersorneqartut ajorsartippai. (Eqqartuussisut 4:14-16; 5:19-21) Gideonip 300-innarnik angutitaqarluni Midjanikkut sakkutoorpassui tamaani ajugaaffigai. (Eqqartuussisut 7:19-22) Kunngi Sauli taassumalu ernera Jonatani tamatuma eqqaani Gilboap qaqqaani toqupput Israelikkut sakkutuui filisterinit ajorsartinneqarmata. — 1 Samueli 31:1-7.

Megiddop narsaamanersuullu eqqaaniittup inissisimanerisa sorsunnermi iluaqutaangaarnerat pissutaalluni ukiut 4000-t kingulliit ingerlaneranni sorsuunnerpassuit tassani pisarsimapput. Oqaluttuarisaanermik ilisimatuup sorsunnernik taakkunannga kisitsisimasup ikinnerpaamik 34-unerarpai!

Megiddop oqaluttuarisaanera inissisimaneratalu sorsunnermi iluaqutaangaarnera qularnanngitsumik pissutaaqataapput oqaatsip „Harmagedonip“ assersuutaasumik atorneqarneranut. Oqaaseq ataasiaannarluni Biibilimi atorneqarpoq, tassa Saqqummersitani, versilli ataqatigiinnerini erseqqippoq Harmagedoni inuit tamarluinnaasa inuunerannut sunniuteqassasoq.

 Biibili naapertorlugu Harmagedoni

Naak Megiddop eqqaani sorsuunnerit ilarpassui pingaaruteqaraluartut, taakkua arlaannaalluunniit ajussuseerutsitsisimanngilaq. Taakkua arlaannaalluunniit tassaasimanngilaq sorsunneq ajunngitsut ajortullu ajugaaniutivinnerat. Soorunami sorsunneq taamaattoq Guutimeersuusariaqarpoq. Jiisusi ilaanni ima oqarpoq: „Allamik ajunngitsoqanngilaq, ataaseq kisimi, tassa Guuti.“ (Lukasi 18:19) Aammattaaq Biibilimi Harmagedoni Guutip immikkut ittumik sorsunneratut taaneqarpoq.

Saqqummersitani allassimavoq ’silarsuarmi tamarmi kunngit’ aallarumaartut katersorniarlutik „Guutip Ajugaqanngitsup ullussarsuani sorsunnissamut“. (Saqqummersitat 16:14) Taava siulittuummi ima allassimavoq: „Katersorpaalu najukkamut hebræerisut Harmagedonimik taaneqartumut.“ * (Saqqummersitat 16:16) Saqqummersitani kapitalit tulliisa ilaanni nassuiarneqarpoq „nunarsuarmi kunngit sakkutuuilu“ katersorneqarumaartut „hestersoq malittaalu sorsukkumallugit“. (Saqqummersitat 19:19) Sorsuttartoq hestersoq tassaavoq Jiisusi Kristusi nammineq. — 1 Timotheusi 6:14, 15; Saqqummersitat 19:11, 12, 16.

Versit taakku tunngavigalugit qanoq isummersinnaavugut? Harmagedoni tassaasoq Guutip inuiannut naalasseriitsunut pissaanilinnullu taakkuninnga tapersersuisunut sorsunnera. Sooq Jehova erneralu, Jiisusi Kristusi, taamatut sorsunniarpat? Pissutaasut ilagaat Harmagedonimi ’nunarsuarmik aseruisut aserorneqarumaarnerat’. (Saqqummersitat 11:18) Aammattaaq sorsunnerup tamatuma silarsuaq eqqissineqarfiusoq, ’nuna nutaaq iluassutsip najugarisassaa’, pilersissavaa. — 2 Petrusi 3:13.

Sooq Harmagedoni pisariaqarpa?

Takorlooruminaatsippiuk Jehovap, „Guutip  asannittup“, ernini „Eqqissinermut Naalagaaneq“, sorsoqqullugu peqqussagaa? (2 Korinthimiut 13:11; Esaja 9:6) Sorsunnissamut pissutigisaat nalunngikkaanni paasiuminarnerussaaq. Tussiaatini Jiisusi sorsuttutut allaatigineqarpoq. Suna sorsuutigaa? Tussiaasiortup nassuiarpaa sorsuttoq „illersorlugit sallusuissut naapertuilluarnerlu“. Sorsuppoq naapertuilluarneq nuannarigamiuk ajussuserlu uumigigamiuk. — Tussiaat 45:5, 8.

Taamatuttaaq Biibilimi allaatigineqarpoq ullumikkut silarsuarmi naapertuilluannginneq takusani Guutip qanoq periarfigineraa. „[Jehovap] tamakku tamaasa takuai isaanilu ajorpoq naapertuilluarneqanngimmat,“ pruffiiti Esaja allappoq. „Iluarneq sakiarortinnaveeqqutitut ativaa annassullu niaqorortinnaveeqqutitut niaqquminut atitillugu. Akiniut atisaliuppaa ilungersutsannerlu qallersaasiullugu.“ — Esaja 59:15, 17.

Inuit ajortut pissaaneqartuartillugit inuit naapertuilluartuusut eqqissineq isumannaassuserlu angusinnaanngilaat. (Ussatit 29:2; Oqaluussisartup oqaasii 8:9) Peqquserlunneq ajussuserlu inunnut tamakkununnga pisuusunut atalluinnarput. Taamaattumik ataavartumik eqqissineq naapertuilluarnerlu pilersinneqassappata akeqarpoq. Ajortut piiagaasariaqarput. Kunngi Salomo ima allappoq: „Iluaatsoq tassaalersinnaavoq iluartup saammaanneqarnissaanut akiliut.“ — Ussatit 21:18.

Eqqartuussissussaq tassaammat Guuti, qularissanngilarput ajortunik eqqartuussinerit tamarluinnarmik naapertuilluartuujumaartut. Aaperaat ima aperivoq: „Nunarsuarmik tamarmik eqqartuussisuusoq eqqortuliussannginnerpa?“ Aaperaap akissutisiaminik paasivaa Jehova tamatigut eqqortumik iliortartoq! (1 Mosesi 18:25) Aammattaaq Biibilimi uppernarsaavigineqarpugut Jehovap ajortunik piiaanissani nuannarinngikkaa. Allamik periarfissaaruppat aatsaat taamaaliussaaq. — Ezekieli 18:32; 2 Petrusi 3:9.

Harmagedoni sorsunniviuvoq

Akerleriinnermi inaarutaasumi tamatumani kina illersussavarput? Amerlanersagut isumaqassagunarput pissaanillit ajunngitsut illersorlugit. Tamannali qanoq qulakkeersinnaavarput? Pruffiiti Sefania ima kajumissaarivoq: „Iluarsuseq noqqaassutigisiuk, maniguunneq noqqaassutigisiuk.“ (Sefania 2:3) Aamma apustili Paulusi oqarpoq Guutip piumasarigaa „inuit tamalaat annaanneqassasut sallusuissummillu eqqorluartumik ilisimasaqalissasut“. — 1 Timotheusi 2:4, NV.

Jehova Guuti pillugu sallusuissummik taassumalu nunarsuarmik ajussuseerutsitsilluni minguiaanissaminik siunertaanik paasisimasaqalerneq annaanneqarnissamut alloriarneruvoq siulleq. Alloriarnerup aappaa tassaavoq Guutip naapertuilluartuuneranut naapertuuttumik inuuneq. Tamanna Guutimit iluarisaalissutigissavarput sernissugaalissutigalugulu.

Taamatut pingaaruteqartunik alloriarutta, Harmagedoni sorsunnertut ilumut sorsunnernik tamanik soraarsitsisussatut qilanaarisinnaavarput. Sorsunneq taanna soraarpat, inuit tamarmik sorsunneq paasiuminaatsutut maajunnartutullu isigissavaat. ’Sorsunnissamut sungiusarunnaassapput.’ — Esaja 2:4. (wp08 04/01-E)

[Quppernerup ataani ilanngussaq]

[Qupp. 5-mi issuagaq]

Guutip inuiaat atugaannut akuliunnissaa Harmagedonimik taaneqarpoq

[Qupp. 6-mi assiliartaq]

Megiddo

[Qupp. 6-mi assiliartaq]

Gideoni angutitaalu Megiddop eqqaani sorsunnermi pingaarutilimmi ajugaapput

[Qupp. 6, 7-mi assiliartaq]

Harmagedoni qaangiutereerpat inuit sumi tamaaniittut sorsunneq ’paasiuminaatsutut maajunnartutullu’ isigissavaat

[Qupp. 8-mi assiliartaq]

Jehova siunertaalu pillugit sallusuissummik paasinninneq annaanneqarnissamut alloriarneruvoq siulleq