Galatiamiunut allakkanit, Efesosimiunut allakkanit, Filippimiunut allakkanit aamma Kolossemiunut allakkanit pingaarnersat
Jehovap oqaasia uumavoq
Galatiamiunut allakkanit, Efesosimiunut allakkanit, Filippimiunut allakkanit aamma Kolossemiunut allakkanit pingaarnersat
APUSTILIP Paulusip tusaramiuk kristumiut ilaat judaistinit * sunnerneqarlutik pallorfiginninnermit minguitsumit allamut saassimasut, ’ilagiit Galatiamiittut’ allakkanik kimittuunik allaffigai. (Galatiamiut 1:2) Allakkat, ukiup 50-ip ukiullu 52-ip akornanni allataasut, siunnersuutinik toqqaannartunik kajumissaarutinillu kimittuunik imaqarput.
Ukiut qulit missaat qaangiuttut Paulusi ’Kristusi-Jiisusip parnaarussaatitaatut’ Romamiitilluni ilagiit Efesosimiittut, Filippimiittut Kolossemiittullu allaffigai pitsaasunik siunnersorlugit asannittumillu qiimmassarlugit. (Efesosimiut 3:1) Galatiamiunut, Efesosimiunut, Filippimiunut Kolossemiunullu allakkani saqqummiussanik eqqumaffiginninneq iluaqutigingaarsinnaavarput. — Hebræerit 4:12.
’ILUARTUUTITAASUT’ — QANOQ?
Judaistit peqqusersusaarlutik tusagaanerlutsinniarmanni Paulusip apustiliunini illersorpaa inuunerminut kiffartornerminullu tunngasunik paasissutissiilluni. (Galatiamiut 1:11–2:14) Ajoqersuutaat eqqunngitsut akiorniarlugit Paulusi ima erseqqissaavoq: ’Kinaluunniit inatsisit suliareqqusaasigut iluartuutitaasinnaanngilaq kisiannili aatsaat Jiisusi-Kristusimut uppernikkut.’ — Galatiamiut 2:16.
Kristusip ’inatsisit ataanniittut akiliullugit aniguisippai’ kristumiutullu kiffaanngissuseqalernissamik periarfissillugit, Paulusi allappoq. Galatiamiut kimittuumik ima oqaaqqissaarpai: „Aalajaanniaritsi . . . kingumut inussianngortitaaqqunasi.“ — Galatiamiut 4:4, 5; 5:1.
Allassimaffiit pillugit apeqqutinut akissutit:
3:16-18, 28, 29 — Aaperaamik angeruseq, uani testamentimik nutserneqartoq, suli atuuppa? Aap, atuuppoq. Inatsisit tunngavigalugit angeruseq Guutip Aaperaamut angerusianut taartaanani ilanngussaavoq. Taamaattumik Inatsisit ’atortuujunnaarsinneqarnerisa’ kingorna Aaperaamik angeruseq atuutiinnarpoq. (Efesosimiut 2:15) Tassani neriorsuutaasut Aaperaap ’kinguaavanut’ ilumoortumut pingaarnermut — Jiisusi Kristusimut — inunnullu ’Kristusip pigisaanut’ ingerlateqqinneqarput.
6:2 — „Kristusip inatsisaa“ suua? Inatsimmut tamatumunnga ilaapput Jiisusip allanut ilinniartitsissutigisai peqqussutaalu tamarmiusut. ’Asaqatigiinnissamik’ peqqussut inatsimmut tamatumunnga ilaavoq pingaaruteqangaartoq. — Johannesi 13:34.
6:8 — Qanoq ’anersaamut siaruarterisarpugut’? Taamaaliortarpugut Guutip anersaavata inuunitsinni sunniuteqarsinnaaneranut akornutaanngitsumik inooriaaseqarnitsigut. Anersaamut siaruarterisarpugut ilaatigut suliniutinut Guutip anersaavata sulineranik siuarsaasunut uummatikkut iluunngarluta peqataanikkut.
Ilinniarfigisinnaasavut:
1:6-9. Kristumiut utoqqaanertat ilagiinni ajornartorsiutaalersut iliuuseqarfigipallattariaqarpaat. Tunngavilersuuteqarluarnikkut Biibilillu atorneratigut uppernarsarasuarsinnaavaat eqqunngitsumik eqqarsartaaseqarnerup ilumuunngitsuunera.
2:20. Utertitsissut uagutsinnut inunnut ataasiakkaanut Guutimit tunissutaavoq, taamatullu isiginissaa ilikkartariaqarparput. — Johannesi 3:16.
5:7-9. Ilagisartakkat ajortut ’sallusuissummut naalatsaalisinnaavaatigut’. Inuit taamaattut ilaginaveersaartarutsigit silatusaassaagut.
6:1, 2, 5. ’Anersaamik pigisaqartut [Anersaakkut inersimalluartut, NV]’ nanertuutigisatinnik ersunnissamut ikiorsinnaavaatigut. Nanertuutit taakku tassaasinnaapput piaarinani kukkussuteqarnerup kingunerisaanik atugarliuutit. Namminerli anersaakkut akisussaaffivut nammineq ersuttariaqarpavut.
’TAMARMIK KRISTUSIMI ATAATSIMUT KATTUNNEQASSAPPUT’
’Kristumiutut ataasiussutsimut’ tunngatillugu erseqqissaatitut Paulusip Efesosimiunut allakkamini eqqartorpaa ullut aalajangersagaasut naammatsiffissaanni ingerlatsineq ’qilammiittunik nunamiittunillu tamanik Kristusimi ataatsimut kattutsitsisussaq’. Kristusi „tunisivoq inunnik tunissutaasunik“ (NV) „uppernermi ataasiunissamut“ tamatta ikiorniarluta. — Efesosimiut 1:10; 4:8, 13.
Kristumiut Guutimut ataqqinaataasumik ataasiussutsimillu siuarsaataasumik ’atisariaqarpaat inuk nutaaq’ ’imminnullu naalatsigiteqatigiittariaqarlutik Kristusi mianeralugu’. Aamma ’Diaavulup qoqassiniaraangatik’ aalajaattariaqarput sakkutuussutit anersaakkut ittut tamarmiusut atillugit. — Efesosimiut 4:24; 5:21; 6:11.
Allassimaffiit pillugit apeqqutinut akissutit:
1:4-7 — Kristumiut tanitat inunngornertik sioqquterujussuarlugu qanoq siumut aalajangereerneqarpat? Eqimattatut imaluunniit katersatut isigalugit, inuttut ataasiakkaatut pinnagit, siumut aalajangerneqarput. Tamanna pivoq ’silarsuaq tunngavilerneqanngikkallarmat’, tassa inuiaat ajortillit piunngikkallarmata. Mosesimik allakkani siullerni 3:15-imi siulittuummut, inummik ajortilimmik ilumiugineqartoqanngikkallarmat oqaatigineqartumut, ilaavoq Kristusip ajoqersugaasa ilaannik taassumunnga qilammi naalakkersueqateqartitsinissamik Guutip siunertaa. — Galatiamiut 3:16, 29.
2:6 — Kristumiut tanitat suli nunarsuarmiitillutik qanoq ’qilammut pisitaasinnaappat’? Uani oqaatsimi „qilammut“-mi pineqanngilaq qilammi kingornussarsiassaat neriorsuutigisaq, pineqarlunili ’Anersaamik Illernartumik neriorsuutigisamik naqissuserneqarnermik’ kingunerisaanik anersaakkut qutsissisitaasumik inissisimaffiat. — Efesosimiut 1:13, 14.
Ilinniarfigisinnaasavut:
4:8, 11-15. Jiisusip Kristusip „tiguakkat aallaruppai“, tassa imaappoq inuit taakku Saatanimit naalagaaffigineqarunnaarsikkai ilagiillu kristumiut ineriartortinneqarnissaannut tunissutitut atorlugit. Siulersortitsinnut naalannitsigut naalatsigitinnitsigullu ilagiillu aaqqissuussaannik tapersersuinitsigut ’asanninnermi tamatigut alliartorsinnaavugut Kristusimut’. — Hebræerit 13:7, 17.
5:22-24, 33. Nuliaasoq uiminut naalatsigitittussaanermi saniatigut aamma taassumunnga ataqqinnittuusariaqarpoq. Taamaaliortarpoq ’piuaatsumik qanilaartumillu anersaaqarnermigut’ taassumunngalu ataqqinaatissiiniartarnermigut ajunngitsumik eqqartortarlugu aalajangigaalu tapersersortarlugit. — 1 Petrusi 3:3, 4; Titusi 2:3-5.
5:25, 28, 29. Uiusup nammineq timiminik inuussutissiisarnermisut aamma nuliani isumagilluartariaqarpaa — timikkut, misigissutsikkut anersaakkullu. Aamma ’paaqqisariaqarpaa’, imaluunniit isumassortariaqarpaa, naammattumik piffissaqarfigineratigut aamma oqaatsikkut iliuutsikkullu pingaartinneratigut.
6:10-13. Uummatikkut iluunngarluta Guutip sakkutuussutai anersaakkut ittut atisariaqarpavut pissaanillit anersaapiluusut akiorsinnaajumallugit.
’TORAAGAQ ATAASEQ ORNILLUGU INGERLAANNARTA’
Paulusip Filippimiunut allagai asanninnermik ersersitsiviungaarput. Ima allappoq: „Qinnutigaara asanninnissi alliartuinnarnissaa paasisimasaqarnermik silatusaallaqqinnermillu peqangaalerluni.“ Imminut tatigivallaarneq napitiffiginaveersaarsinnaaniassammassuk, ima kajumissaarpai: „Annaanneqarnissarsi noqqaassutigisiuk mianerinnillusi uulillusilu.“ — Filippimiut 1:9; 2:12.
Paulusip inersimalluartut kajumissaarpai ’apuuffissaq anguniaqqullugu ajugaasup nersornaatisiassaa, Guutip pavannga qaaqqusissutaa, piniarlugu’. Ima allappoq: ’Killigisarput naapertorlugu toraagaq ataaseq ornillugu ingerlaannarta.’ (1961) — Filippimiut 3:14-16.
Allassimaffiit pillugit apeqqutinut akissutit:
1:23 — Paulusip „illuttut“ noqinneqartutut innera qanoq paasisariaqarpa, sunalu kissaatigaa? Paulusip atukkani pissutigalugit noqinneqartutut ippoq periarfissat imminut ammasut marluk ukua akornanni: inuunerup toqullu. (Filippimiut 1:21) Suna qinissanerlugu eqqaanngilaa, erseqqissarpaali suna kissaatiginerlugu — tassa „Kristusip ilagilernissaa“. (Filippimiut 3:20, 21; 1 Thessalonikamiut 4:16) Kristusip najuunnerani, Paulusip akissarsiassaq Jehovap imminut piareersimatitaa pimmagu, kissaat tamanna piviusunngorpoq. — Matthæusi 24:3.
2:12, 13 — Qanoq Guutip ’piumassuseqartittarpaatigut naammassisaqartittarlutalu’? Jehovap anersaavata illernartup uummaterput isumarpullu sunnersinnaavai taassumunnga kiffartornermi sapinngisatsinnik iliornissatsinnik kissaateqarnerulersinniarluta. Taamaattumik ’annaanneqarnissatsinnik noqqaassutiginninnitsinni’ ikiorneqarpugut.
Ilinniarfigisinnaasavut:
2:5-11. Soorlu Jiisusip maligassiaanit ersertoq maniguunneq sanngiinnermut ersiutaanani, ileqqorissutsikkut nukittuujunermut ersiutaavoq. Aammami maniguuttut Jehovamit qutsissisinneqartarput. — Ussatit 22:4.
3:13. ’Kingunitsinniittunut’ ilaasinnaapput atorfik iluanaarnartoq, ilaqutariinnit pisuuneersuunerup isumannaallisaataanera allaallu ingasattumik ajortuliornerit peqqissimissutigalugillu ’minguiarneqaatigisavut’. (1 Korinthimiut 6:11) Tamakku isumakkeertariaqarpavut, tassa isumakuluutigiunnaartariaqarpavut, ’siunitsinniittullu isattortariaqarlugit’.
4:14-16. Filippimiut piitsuungaaraluarlutik tukkortuunikkut uagutsinnut maligassiuilluarput. — 2 Korinthimiut 8:1-6.
’UPPERNERMI AALAJAATTARIAQARPUGUT’
Kolossemiunut allakkamini Paulusip eqqunngitsumik ilinniartitsisut isumaat eqqunngitsuusut qulaarpai. Tunngavilersuilluni allappoq Mosesip inatsisaani piumasaqaatit maleruarneqarnerat pinnani, ’uppernerulli aalajangiusimajuarnera’ annaanneqarnissamut aalajangiisuusoq. Paulusip Kolossemiut ima kajumissaarpai: ’[Kristusimi] inuuniaritsi, taanna sorlaqarfigalugu, taassumani ineriartortinneqarlusi uppernermilu aalajaallusi.’ Uppernermi aalajaanneq taamaattoq qanoq killinneqaatigisussaavaat? — Kolossemiut 1:23; 2:6, 7.
Paulusi ima allappoq: „Tamakkua tamarmik qaavatigut atiniarsiuk asanninneq, tassaammat naammalluinnassutsip qilerutaa. Kristusip eqqissisitsinera uummatissinni aalajangiisuuli.“ Ima peqquai: „Qanorluunniit iliorussi taamaaliortaritsi uummammit pisumik — [Jehovamut], inunnut pinnasi.“ Ilagiit avataanniittut pillugit ima allappoq: „Ilaginngisassi peqatigisarnerini silatusaartaritsi.“ — Kolossemiut 3:14, 15, 23; 4:5.
Allassimaffiit pillugit apeqqutinut akissutit:
2:8 — ’Silarsuup pissaaneri’ Paulusip mianersorfigeqqusai suuppat? Tassaapput Saatanip silarsuaanut ilaasut — tunngaviusut imaluunniit najoqqutassiat taassuminnga taannaalersitsisut, aqutsisuusut iliuuseqartitsisullu. (1 Johannesi 2:16) Tamakkununnga ilaatigut ilaapput silarsuarmi matumani isumaliutersuutit, pigisalerituneq upperisarsiornerillu eqqunngitsut.
4:16 — Kristumiunut Laodikeamiittunut allakkat sooq Biibilimut ilaanngillat? Imaassinnaavoq allakkat paasissutissanik ullumikkut atorfissaqartitatsinnik imaqanngitsut, imaluunniit isummat allakkani allani Biibilimut ilaatitaasuni allassimareersut taakkunani allaatigineqaqqittut.
Ilinniarfigisinnaasavut:
1:2, 20. Guutip utertsitsissut aqqutigalugu ajunngissutsimini pisassarinngisaraluami isumagisimavaa nalunngeqatiginnissutsitta pisuusutut misiginitsinnit eqqiarneqarsinnaanera qamuunalu eqqissinermik angusaqarsinnaanerput.
2:18, 23. „Nikanarniartuusaarneq“ — allanut malugeqqusaarluni, immaqa pigisatigut pinngitsuuinikkut timimilluunniit qajassuussinnginnikkut, maniguuttuusaarneq — ’eqqarsaatitigut uinimmut atasutigut imminut angisuutinniarnermut’ ersiutaavoq. (w08 08/15-E)
[Quppernerup ataani ilanngussaq]
^ imm. 1 Judaistit tassaapput ilagiinni kristumiuniittut juutiussutsimik kristumiussutsimut ilanngutitsiniarsarisut.