Suut tamarmik piffissaligaapput

“Suut tamarmik aalajangersimasumik piffissaligaapput, qilaammi ataani pisartunut tamanut piffissaq aalajangersimasuusarpoq,” Biibilimi taama allassimavoq. Oqaatsinik taakkuninnga allattoq, itsaq kunngiusoq silatooq Salomo, nangilluni allappoq inunngorfissaqartoq toquffissaqarlunilu, qarmaaqqiffissaqartoq ingitseriffissaqarlunilu, asanniffissaqartoq uumiginniffissaqarlunilu. Naggataatigut ima allappoq: “Inuup naammassiniagaqartup suleruloornini suallaatigissanerpai?” — Oqaluussisartup oqaasii 3:1-9.

OQAATSIT taakku tunngavigalugit inuit ilaat isummersimapput Biibilimi allassimasoq suut tamarmik siumut aalajangeriigaasumik piffissaligaasut; tassa isumaqarput siunissap siumut aalangeriigaaneranik upperisaq Biibilimi ajoqersuutigineqartoq. Ilumut taamaappa? Inuunermi suut tamarmik siumut aalajangeriigaanerannik eqqarsaat Biibilimi taperserneqarpa? ‘Allakkat Illernartut tamarmik Guutimit isumassarsiarititaammata’, Biibilip ilaani atuagarput Biibilip ilaani allani allassimasunut naapertuuttariaqarpoq. Sammisarput pillugu Guutip oqaasiani, Biibilimi, allassimasut allat misissoriartigik. — 2 Timotheusi 3:16, NV.

Nalaatsornertigut pisartut

Salomo Oqaluussisartup oqaasiini aamma ima allappoq: “Mannattaarlu nunarsuarmi matumani malugaara: . . . Oqilanerpaaq arpaliunnermi ajugaanngitsoorsinnaavoq sapiinnerpaarluunniit sorsunnermi ajugaanngitsoorsinnaalluni. Imaanngilaq ilisimassuseq nerisassamik pissarsissutissatut tamatigut naammattartoq. Silatussuseq pisuunnguutaanngitsoorsinnaavoq pikkorissullu ilaannikkut nersualaarneqanngitsoorsinnaallutik.” Sooq taamaappa? Salomo ima nassuiaavoq: “Suut tamarmik periarfissatigut nalaatsornertigullu pisarmata.” — Oqaluussisartup oqaasii 9:11, 1990.

Inuuneq siumut aalajangeriigaanerarnagu Salomop uparuarpaa inuit iliuuseriniakkamik kingunissaat siumut oqaatigereersinnaanngikkaat, ‘nalaatsornertigut pisartunit’ sunnerneqartarmata. Inuk ajortumik nalaataqaraangat ajortumik pisoqarnerata nalaani inuup taassuma ajortumik pisoqarfiusumiinnera pissutaagajuttarpoq.

Oqaatsit uku assersuutigeriartigik: ‘Oqilanerpaaq arpaliunnermi ajugaanngitsoorsinnaavoq.’ Immaqa eqqaamavat, atuarsimavalluunniit, 1984-imi Los Angelesimi, USA-mi Californiamiittumi olympiadeqarnerani arnat arpallutik 3000-meterinik oqilaniunnerat ilisimaneqarluartoq, tupaallannartorli. Arpattartut marluk, aappaa Tuluit Nunaanneersoq aappaalu USA-meersoq, marluullutik kuultinnannissartik neriuutigaat. Arpaffitsilli qiteqqullugulu imminnut sakattoorput. Aappaa orluvoq arpaqataajunnaarlunilu; aappaa kajumissuseerutivikkami normu 7-innguinnarpoq.

Siunissap siumut aalajangeriigaanera tamatumani pissutaava? Immaqa taama isumaqartoqarpoq. Erseqqipporli imminnut sakattoornerat — kialuunniit siumut oqaatigereersinnaanngisaa — taakkua marluk ajugaannginnerannut pissutaasoq. Taavami imminnut sakannerat siumut aalajangeriigaava? Immaqa aamma taama isumaqartoqarpoq. Oqaaseqartartulli ajutoornermut pissutaatippaat arpallammassuit  naligiit marluk ajugaaniutipiloornerat. Biibilimi allassimavoq ‘suut tamarmik nalaatsornertigut pisartunit’ sunnerneqartartut. Qanorluunniit piareersarsimalluartigigaluaraanni ilungersuutigisatta kingunissaannut ilimaginngisamik sunniuteqarsinnaasoqartuaannarpoq, tamannalu pisussat aalajangeriigaanerannik pissuteqanngilaq.

Taavami Biibilimi allassimasoq una qanoq paasisariaqarami: “Suut tamarmik aalajangersimasumik piffissaligaapput”? Inuunitsinnut, imaluunniit atugassarisatsinnut, sunniuteqartumik iliuuseqarsinnaavugut?

Suliassanut tamanut piffissaq pitsaanerpaaq

Isumassarsisinneqarluni Biibilimik allattup allaatigisaa tassaanngilluinnarpoq inuit inuunerisa siumut aalajangeriigaanerat inuunerisaluunniit naggatissaat. Guutip siunertaa tamatumalu inunnut qanoq sunniuteqartarnera eqqartorpaa. Tamanna qanoq ililluta nalunngilarput? Tamanna versit ataqatigiinnerannit erserpoq. Sorpassuit ‘aalajangersimasumik piffissaligaarpasissut’ eqqaareerlugit, Salomo ima allappoq: “Takuara erloqineq Guutip inunnut erloqissutinngortitaa: Suut tamaasa suliarisimavai ajunngitsumik eqqortumillu piffissarlu eqqorlugu.” — Oqaluussisartup oqaasii 3:10, 11.

Guutip inuit ‘erloqissutissaqartippai’, imaluunniit suliassarpassuaqartippai, Salomollu taakkua ilaannik taaguivoq. Guutip aamma piumasatsitut iliornissamut kiffaanngissuseqartippaatigut. Suliassanulli tamanut piffissaalluartoqarpoq, piffissaq pitsaanerpaamik angusaqarfiusussaq. Oqaluussisartup oqaasii 3:2-mi oqaaseqaatit assersuutigeriartigit; ima allassimavoq: “Naatitassanik ikkussuiffissaqarpoq ikkussukkanillu nutsuiffissaqarluni.” Naasorissaasut nalunngilaat inerititassanut tamarluinnarnut siaruarterinissamut ikkussuinissamullu eqqortumik piffissaqartoq. Ilumoortoq tamanna sianiginngitsuusaarlugu naasorissaasoq piffissaanngitsukkut siaruarterippat ikkussuippalluunniit qanoq pisoqassava? Sulerulooraluarluni katersugassaqarluannginnini siumut  aalajangeriigaasorissavaa? Soorunami naamik! Piffissakkummi eqqortukkut siaruarterinanilu ikkussuinngilaq. Naasorissaasoq katersugassaqarnerusimassagaluarpoq pinngortitarsuup, Guutimit pisup, ingerlarnga malissimagaluaruniuk.

Guutip aalajangersagai tassaanngillat inuit atugarisaat pisulluunniit tamarmik kingunerisaat, tassaappulli najoqqutassiat aalajangersimasut inuit iliuuserisaannut aalajangiisuusut, siunertaanut naapertuuttumik sunniuteqartut. Inuunitsinni ilungersuutivut iluatsissappata Guutip siunertaa piffissaritaalu paasillugillu taakkununnga naapertuuttumik iliuuseqartariaqarpugut. Siumut aalangeriigaasut allanngortinneqarsinnaanngitsullu tassaanngillat inuit ataasiakkaat inuunerminni atugassaat, tassaallutilli Guutip iliuuseriniagai. Jehova pruffiiti Esaja aqqutigalugu ima oqarpoq: “Oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.” — Esaja 55:11.

Taavami Guutip ‘oqaasia’, nunarsuup inuillu siunissaat pillugu siunertaasutut oqaatigisaa, suua? Oqaatsillu tamatuma qanoq ililluni Guutip ‘naammasseqqusaa naammassissavaa’?

Piffissat Guutip aalajangigai

Salomop tamanna pillugu uparuuppaatigut. Ima oqariarluni: “Suut tamaasa [Guutip] suliarisimavai ajunngitsumik eqqortumillu piffissarlu eqqorlugu,” ima nangippoq: “Aammattaaq inunnut eqqarsaatigisassanngortippai silarsuarmi pisartut [Aammattaaq naassaanngissuseq inuit uummataanniitissimavaa, Biibili-mi quppernerup ataani ilanngussaq], inuilli Guutip qanoq iliorneri paatsiveqartinngilluinnarpaat.” — Oqaluussisartup oqaasii 3:11.

Versi taanna allaaserineqarsimaqaaq. Ilumoortorli unaavoq: Tamatta inuunitta ilaani inuunerup siunertaa inuunittalu naggatissaa itisuumik eqqarsaatigisimavavut. Itsarniilli inuit akueriuminaatsissimavaat inuunerup tassaaginnarnera suleruloorneq toqumik naggatilik. Uagut inuusugut pinngortitanit uumassusilinnit allanit allaaneruvugut inuuneq maannakkut ittoq kisiat eqqarsaatiginagu aammattaarli toqu tamatumalu kingorna qanoq pisoqassanersoq eqqarsaatigisaratsigik. Aamma naassaanngitsumik inoorusussuseqarpugut. Sooq? Allassimaffimmi allassimaneratut Guutip ‘naassaanngissuseq inuit uummataanniitimmagu’.

Taamatut kissaateqaramik inuppassuit eqqarsaatigisarpaat toqup kingorna inuuneqarnersoq. Isumaqartoqarpoq toqunitta kingorna inuuinnartartumik ilutsinniittoqartoq. Allat isumaqarput toqup kingorna ernioqqittuartartugut. Allallu isumaqarput inuunermi suut tamarmik Guutimit siumut aalajangerneqareersimasut, uagullu allanngortissinnaanngikkivut. Nassuiaatilli taakku arlaannaalluunniit naammaginavinngilaq. Biibilimi allassimasutut tamanna ‘inuit Guutip qanoq iliornerinik paatsiveqartitsinngilluinnarnerannik’ pissuteqarpoq.

 Apeqqutinut taamaattunut qangaaniilli akissutissarserusunnerput akissutissarsisinnaannginnerpullu ukiut ingerlaneranni isumaliutersortartunut erloqissutaasarsimavoq. Guutilli naassaanngitsumik inuunissamik kissaateqarneq uummatitsinniitimmagu, kissaammik tamatuminnga taassuma eqquutitsinissaanik qularutiginninnginnissamut tamanna tunngavissaalluarpoq, ilaa? Jehovami pillugu Biibilimi ima allassimavoq: “Assatit ammartarpatit pinngortitallu tamaasa kissaatigisaannik qaarsillartittarlugit.” (Tussiaat 145:16) Guutip oqaasianik, Biibilimik, atuaqqissaarnikkut inuuneq toqulu aamma Guutip nunarsuarmut inunnullu siunertarisaa naassaanngitsoq pillugit naammaginartunik akissutissarsisinnaavugut.

[Qupp. 5-mi issuagaq]

‘Oqilanerpaaq arpaliunnermi ajugaanngitsoorsinnaavoq.’ — Oqaluussisartup oqaasii 9:11

[Qupp. 6-mi issuagaq]

Naasorissaasup piffissaq eqqorlugu siaruarterinanilu ikkussuinngikkuni katersugassakinnini siumut aalajangeriikkatut isigissavaa?

[Qupp. 7-mi issuagaq]

Inuuneq toqulu eqqarsaatigisarpavut Guutip ‘naassaanngissuseq inuit uummataanniitimmagu’