Nunarsuarmi inuuneq naassaanngitsoq — kristumiutut neriuutaava?
Nunarsuarmi inuuneq naassaanngitsoq — kristumiutut neriuutaava?
“[Guutip qulliit] tamaasa isaannit allarterumaarpai, toqulu peerukkumaarpoq.” — SAQQUMMERSITAT 21:4.
1, 2. Qanoq ililluta nalunngilarput ukiuni hundredelinni siullerni juuterpassuit nunarsuarmi naassaanngitsumik inuunissamik neriugisaqartut?
ANGUTIP inuusuttup pisuujullunilu nuimasup Jiisusi arpalluni ornippaa seeqqummerlunilu ima aperalugu: “Ajoqersuisoq ajunngitsuusutit, qanoq iliussaanga inuuneq naassaanngitsoq kingornussariumallugu?” (Markusi 10:17) Angutip inuusuttup taassuma inuuneq naassaanngitsoq kingornussarsiarerusuppaa — kisiannili sumi? Soorlu allaaserisap matuma siuliani sammereeripput, Guuti juutinut ukiut hundredellit tamatuma siorna makititaanissamik nunarsuarmilu naassaanngitsumik inuunissamik neriuutissiivoq. Neriuut tamanna ukiuni hundredelinni siullerni juuterpassuit neriuutigaat.
2 Lazarusip qatanngutaa Martha Jiisusi naapillugu qatanngutini toqusimasoq pillugu ima oqarami: ‘Nalunngilara ullut naggatissaanni toqusut makiffissaanni makikkumaartoq,’ qularnanngitsumik nunarsuarmi inuunermut makititaanissaq eqqarsaatigaa. (Johannesi 11:24) Ilumoorpoq saddukiiarit makititaanissamik upperisaqanngitsut. (Markusi 12:18) Atuakkamili Judaism in the First Centuries of the Christian Era-mi 1927-meersumi atuakkiortoq, George Foot Moore, ima allappoq: “Aamma allakkani ukiut 200-t Kristusip inunngornerata siorna allanneqarsimasuni allani uppernarsarneqarpoq inuppassuit upperigaat silarsuup oqaluttuarisaanerani allanngorfissap neriugisap nalaani siuaasatik toqusimasut nunarsuarmi uummarteqqinneqarumaartut.” Taamaammat angutip inuusuttup pisuup Jiisusimut saaffiginnittup angorusutaa tassaavoq nunarsuarmi maani naassaanngitsumik inuuneq.
3. Allaaserisami matumani apeqqutit suut sammissavavut?
3 Ullumikkut kristumiuunerartut ilarpassuisa Jiisusi ajoqersugaalu nunarsuarmi naassaanngitsumik inuunissamik neriuummik oqaluussissutiginnissorinngilaat. Amerlanersaasa toqup kingorna anersaat silarsuaanni inuuneq upperaat. Taamaattumik inuppassuit oqariartaaseq ‘inuuneq naassaanngitsoq’ Kristumiut Allagaataanni Grækerisuuniittoq qilammi inuunermut tunngasuujuaannarsoraat. Tamannali eqqorpa? Jiisusip inuuneq naassaanngitsoq eqqartoraangamiuk suna pisarpaa? Ajoqersugaasa suna upperaat? Nunarsuarmi naassaanngitsumik inuunissamik neriuut Kristumiut Allagaataanni Grækerisuuni ajoqersuutigineqarpa?
“Pinngoqqiffimmi” inuuneq naassaanngitsoq
4. “Pinngoqqiffimmi” qanoq pisoqassava?
4 Biibilimi ajoqersuutigineqarpoq kristumiut tanitat qilammi inuunermut makititaajumaartut qilammillu nunarsuarmut naalakkersuiumaartut. (Lukasi 12:32; Saqqummersitat 5:9, 10, 1936; 14:1-3) Jiisusilli inuuneq naassaanngitsoq eqqartoraangamiuk eqimattat taakku kisiisa eqqarsaatigineq ajorpai. Maluginiariaruk angut inuusuttoq pisooq Kristusimut ajoqersuganngorluni pigisaminik tamanik qimatsinissamut kajumissaarneqarami aliasulluni qimagutereermat Jiisusip ajoqersukkani qanoq oqarfiginerai. (Matthæusi 19:28, 29, 1936). Jiisusip apustilini oqarfigai kunngisut naalakkersuisussanut ilaajumaartut ‘Israelillu naggueqatigiissortaanik aqqaneq-marluusunik’, tassa inuit silarsuaannik, eqimattat qilammiittut naalakkersugassaannik, eqqartuussiumaartut. (1 Korinthimiut 6:2) Aamma ‘kialuunniit’ imminik malinnittup akissarsiassaqarumaarnera eqqartorpaa. Taakkuattaaq ‘inuuneq naassaanngitsoq kingornutissavaat’. Tamakkua tamarmik “pinngoqqiffimmi” pissapput.
5. ‘Pinngoqqiffik’ illit qanoq nassuiassaviuk?
5 Jiisusip oqariartaaseq “pinngoqqiffimmi” atoramiuk suna pivaa? The Bible — An American Translation-imi oqariartaaseq “silarsuassami nutaami”-mik nutserneqarsimavoq. The Jerusalem Bible-imi “suut tamarmik nutaanngortinneqarpata”-mik nutserneqarsimavoq, The Holy Bible — New International Version-imilu oqariartaaseq “sunik tamanik nutarterinissaq”-mik nutserneqarsimavoq. Jiisusip oqariartaaseq taanna nassuiaasernagu atoramiuk qularnanngitsumik isumaa nalinginnaasoq, tassa juutit ukiuni hundredelinni neriuutigisimasaat, eqqarsaatigaa. Nunarsuarmi pissutsit iluarsaqqinneqassapput Naatsiivimmi Edenimi Adamip Evallu ajortuliunnginnerannisut ilerseqqillugit. Pinngoqqiffik, imaluunniit iluarsaaqqinneq, Guutip ‘qilammik nutaamik nunamillu nutaamik pinngortitsiumaarnerminik’ neriorsuutaanik piviusunngortitsiffiussaaq. — Esaja 65:17.
6. Savanik savaasanillu assersuusiaq naassaanngitsumik inuunissamik neriuut pillugu sumik ilinniarfigaarput?
6 Jiisusip inuuneq naassaanngitsoq eqqartoqqippaa ajoqersukkat pissutsit aaqqissuussaanerata naggatissaa pillugu apeqqutaannut akissutimini. (Matthæusi 24:1-3) Ima oqarpoq: “Inuup Ernera naalannassutsimini tikiukkuni inngilit tamaasa ilagalugit, taava naalannassutsimi issiavissaarsuanut ingissaaq. Inuiaqatigiillu tamarmik saavanut katersuutissapput, avissaartissavaalu, soorlu savanik paarsisup savat savaasanit avissaartittarai.” Iluarisaanngitsutut eqqartuussaasut “aallarumaarput naassaanngitsumik pillarneqassallutik iluartulli naassaanngitsumik inuuneqassallutik”. ‘Iluartut’ naassaanngitsumik inuulersussat taakkuupput Kristusip ‘qatanngutaanik’ tanitanik ilumoorfiginnillutik tapersersuisut. (Matthæusi 25:31-34, 40, 41, 45, 46) Tanitat naalagaaffimmi qilammiusumi naalakkersuisussatut toqqagaammata ‘iluartut’ tassaasimassapput Guutip naalagaaffiani innuttaasut nunamiusut. Biibilimi siulittuutigineqarpoq Jehovap kunngia immamit immamut kuussuarmillu nunarsuup isuinut innuttaqassasoq. (Tussiaat 72:8) Innuttaasut taakku nunarsuarmi naassaanngitsumik inuussapput.
Johannesip iivangkiiliuani suut ersersinneqarpat?
7, 8. Neriuutit assigiinngitsut marluk suut Jiisusip Nikodemusi oqaloqatigigamiuk eqqarsaatigisimassavai?
7 Soorlu Matthæusip, Markusip Lukasillu iivangkiiliuini paasigipput Jiisusip oqariartaaseq ‘inuuneq naassaanngitsoq’ ikittunnguariarluni atorpaa. Johannesip iivangkiiliuani Jiisusip ‘inuuneq naassaanngitsoq’ ‘naassaanngitsumillu inuuneq’ pillugu oqaasii 17-eriarluni issuarneqarput. Taakkua ilaat misissoriartigit paasiniarlugu Jiisusi nunarsuarmi naassaanngitsumik inuunissamik neriuut pillugu qanoq oqarnersoq.
8 Johannesi naapertorlugu Jiisusip inuuneq naassaanngitsoq eqqartoqqaarpaa farisiiari Nikodemusimik atilik oqaloqatigigamiuk. Jiisusip taanna ima oqarfigaa: “Inuk imermit anersaamillu erniusimanngikkuni Guutip naalagaaffianut pisinnaassanngilaq.” Qilaat naalagaaffianut isertut ‘ernioqqittariaqarput’. (Johannesi 3:3-5) Jiisusilli tamannaannaq oqaatiginngilaa. Taamatut oqareerami neriuut silarsuarmiittut kikkut tamarmik neriuutigisinnaasaat eqqartorpaa. (Atuaruk Johannesi 3:16). Taamaalilluni Jiisusip ersersippaa naassaanngitsumik inuunissamik neriuut ajoqersukkaminut tanitanut qilammi inuunermut ernioqqittussanut allarpassuarnullu nunarsuarmi inuuleqqikkumaartunut atuuttoq.
9. Jiisusip neriuut suna arnamut Samariamiumut eqqaavaa?
9 Jiisusip Nikodemusi Jerusalemimi oqaloqatigereeramiuk Galilæamut avannamukarpoq. Aqqutaani arnaq Jaakup puilasuliaata killingani Samariami Sykarip ungasinngitsuaniittumi naapippaa. Jiisusip taanna ima oqarfigaa: “[Imermik] uanga tunniukkumasannik imertoq imerusoqqilinngisaannassaaq. Imeq tunniukkumasara inummi taassumani puilasunngussaaq naassaanngitsumik inuussutaasumik puilajuartoqartoq.” (Johannesi 4:5, 6, 14) Imeq taanna Guutip inuit — aamma nunarsuarmiittut — naassaanngitsumik inuulersinnissaannut aaqqissuussaanut tamanut assersuutaavoq. Saqqummersitani Guutip nammineq ima oqarnera oqaluttuarineqarpoq: “Imerusuttoq uanga akeqanngitsumik imertikkumaarpara ermup inuussutaasup puilaffianit.” (Saqqummersitat 21:5, 6; 22:17) Tassa Jiisusip qilaat naalagaaffianik kingornussisussat naassaanngitsumik inuunissaat eqqartuinnarnagu aammali inuit nunarsuarmi inuunissamik neriugisallit naassaanngitsumik inuunissaat eqqartorpaa.
10. Jiisusip angummik tasiliap Betesdap killingani ajorunnaarsitsereerluni upperisarsiornikkut akerlilersortini inuuneq naassaanngitsoq pillugu sumik oqaluttuuppai?
10 Aappaguani Jiisusi Jerusalemimeeqqippoq. Tamaani angut tasiliap Betesdap killingani ajorunnaarsippaa. Jiisusip iliuusianik isornartorsiuisoqarpoq, taassumalu taakku ima nassuiaappai: “Erneq nammineerluni qanoq iliorsinnaanngivippoq, Ataatap iliuuserisai takusani kisiisa iliuuserisinnaavai.” Ataatap ‘eqqartuussinissamik tamarmik Ernermut suliarisassanngortitsisimanera’ pillugu oqaluttuutereerlugit Jiisusi ima nangippoq: “Oqaatsinnik tusartoq uannillu aallartitsisumut uppertoq naassaanngitsumik inuuneqarpoq.” Aamma ima oqarpoq: “[Piffissaq] nalliukkumaarpoq ilivermiittut tamarmik taassuma [inuup ernerata] nipaanik tusarumaarfissaat ilivernillu aniumaarfissaat — ajunngitsumik iliorsimasut makillutik inuunissamut ajortumilli iliorsimasut makillutik eqqartuunneqarnissamut.” (Johannesi 5:1-9, 19, 22, 24-29) Jiisusip akerlilersortini juutit matumani oqaluttuuppai juutit nunarsuarmi naassaanngitsumik inuunissamik neriuutaannik piviusunngortitsisussatut Guutimit qinigaalluni aamma toqusunik makititsinermigut neriuummik piviusunngortitsiumaarluni.
11. Qanoq ililluta nalunngilarput nunarsuarmi naassaanngitsumik inuunissamik neriuut Jiisusip Johannesi 6:48-51-imi eqqartugaanut ilaasoq?
11 Galilæami tusindillit Jiisusimik malinnilerput timiusanik taassuma tupinnartuliornikkut pilersitaanik perusukkamik. Jiisusip taakku timiusamik allaanerusumik, ‘timiusamik inuussutaasumik’, eqqartuiffigai. (Atuakkit Johannesi 6:40, 48-51). Ima oqarpoq: “[Timiusaq] tunniussassara tassa uiniga silarsuarmut inuussutaassalluni tunniunneqartoq.” Jiisusip inuunini naalagaaffimmi qilammiusumi naalakkersueqatissaminuinnaanngitsoq aammali “silarsuarmut”, inuit silarsuaannut utertinneqarsinnaasumut, tunniuppaa. “Timiusamik taassuminnga nerisoq”, tassa imaappoq Jiisusip pilliutaata utertitsisinnaassusianik upperinnittoq, naassaanngitsumik inuunissamik neriuuteqarpoq. Aap, Jiisusip ‘naassaanngitsumik inuuneqarnissaa’ eqqartoraangagu tamatumunnga ilaasarpoq Missiarsip naalakkersuinerani nunarsuarmi naassaanngitsumik inuunissamik neriuut, juutit qangaaniilli neriuutigisimasaat.
12. Jiisusip neriuutit suut eqqarsaatigai akerlilersortini oqarfigigamigit ‘savaatini inuunermik naassaanngitsumik tunissallugit’?
12 Kingusinnerusukkut, Jerusalemimi ullormik naalaffiup atoqqaartinneqarfianik nalliuttorsiutiginninnerup nalaani, Jiisusip akerlilersortini ima oqarfigai: “[Uppinngilasi] savaatima ilaginngimmasi. Savaatima nipiga tusartarpaat, uangalu ilisimavakka, malittarpaanngalu; inuunermillu naassaanngitsumik tunisarpakka.” (Johannesi 10:26-28) Jiisusip qilammi inuuneq kisiat eqqartorpaa, imaluunniit aamma nunarsuarmi paratiisiusumi inuuneq naassaanngitsoq eqqarsaatigaa? Jiisusip tamatuma siunitsiannguagut ajoqersukkani ima tuppallersarpai: “Erseqinasi savarpannguususi ukorsii; Ataatarsimi aalajangiisimavoq Naalagaaffik ilissinnut tunniukkumallugu.” (Lukasi 12:32) Ullormilli naalaffiup atoqqaartinneqarfianik nalliuttorsiutiginninnerup nalaani Jiisusi aamma ima oqarpoq: “Allanik savaateqarpunga ungalusami matumani inngitsunik; taakkuttaaq siulersussavakka.” (Johannesi 10:16) Taamaattumik Jiisusip pisimasumi tamatumani akerlilersortini oqaluukkamigit ‘savarpannguanut’ qilammi inuunissamik neriuut ‘savanullu allanut’ millionilinnut nunarsuarmi naassaanngitsumik inuunissamik neriuut eqqarsaatigai.
Neriuut nassuiarneqartariaqanngitsoq
13. Jiisusip suna pivaa oqarami: “Paratiisimeeqatigiumaarparma”?
13 Jiisusip nappakkami anniartitaaffimmi naalliungaarnermini inuiaat neriuutaat assortugassaanngitsumik uppernarsarpaa. Pinerluttup Jiisusip saniani kikiattorneqarsimasup Jiisusi aperaa naalagaaffimminut piguni eqqaamarusunnginneraani. Jiisusillu taanna ima neriorsorpaa: “Ilumut, ullumi oqarfigaakkit: Paratiisimeeqatigiumaarparma.” (Lukasi 23:43, NV) Angut qularnanngitsumik juutiusoq ‘Paratiisip’ qanoq isumaqarneranik nassuiaanneqartariaqanngilaq. Silarsuassami nunarsuarmi naassaanngitsumik inuunissamik neriuut nalunngilaa.
14. (a) Sumit erserpa qilaliarnissamik neriuut apustilit paasiuminaatsikkaat? (b) Jiisusip ajoqersugai qilaliarnissamik neriuummik qanga paasinnilluarpat?
14 Nassuiarneqartariaqartorli tassaavoq qilaliarnissamik neriuut Jiisusip eqqartugaa. Ajoqersukkat Jiisusip oqarfigimmatik inissaannik piareersaakkiartorlugit Ataatamukarniarluni, taakkua paasinngilaat suna pineraa. (Atuakkit Johannesi 14:2-5). Kingusinnerusukkut ima oqarfigai: “Suli oqaasissaqarfigigaluaqaassi, maannali artorallarpasi. Tikiukkunili, tassa sallusuissutip anersaavata, sallusuissut tamaat ilissinnut ilitsersuutigissavaa.” (Johannesi 16:12, 13) Aatsaat ukiumi 33-mi piinsip ulluata kingorna, siunissami kunngiusussatut Guutip anersaavanik taninneqaramik, ajoqersukkat paasivaat qilammi kunngiusussaallutik. (1 Korinthimiut 15:49; Kolossemiut 1:5; 1 Petrusi 1:3, 4) Qilammi kingornussaqarnissamik neriuut taakkununnga nutaajuvoq, aamma tamanna allakkani isumassarsiarititaasuni Kristumiut Allagaataanni Grækerisuuniittuni pingaarnersaavoq. Allakkanili taakkunanissaaq inuiaat nunarsuarmi naassaanngitsumik inuunissamik neriuutaat uppernarsarneqarpa?
Allakkani isumassarsiarititaasuni qanoq allassimasoqarpa?
15, 16. Hebræerinut allakkat apustilillu Petrusip oqaasii nunarsuarmi naassaanngitsumik inuunissamik neriuummut qanoq tikkuussippat?
15 Hebræerinut allakkani apustilip Paulusip uppeqatini saaffigai ‘qatanngutinillu illernartunik, qilammit qaaqqussummik pisimasunik’ taallugit. Aammali eqqartorpaa Guutip ‘inuit najugaat piumaartussaq’ (1936) Jiisusimut naalatsigitikkaa. (Hebræerit 2:3, 5; 3:1) Kristumiut Allagaataasa Grækerisuut allassimaqqaarfiini ‘inuit najugaat piumaartussaq’ atorneqaraangat nunarsuaq inulik pineqartuaannarpoq. Taamaattumik ‘inuit najugaat piumaartussaq’ tassaasimassaaq siunissami Jiisusip Kristusip naalakkersuinerani nunarsuarmi pissutsit aaqqissuussaanissaat. Taamanikkussamut Jiisusip Guutip neriorsuutaa manna eqquutitissavaa: “Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29.
16 Aamma apustili Petrusi inuiaat siunissaat pillugu allannissamut isumassarsisinneqarpoq. Ima allappoq: “[Qilaat] nunalu maannakkut ittut oqaaseq taannarpiaq tunngavigalugu atatinneqarput utaqqisitaallutillu ullormi eqqartuussivissami iluaatsut nungutitaanissaanni ikuallagaanissaminnut.” (2 Petrusi 3:7) Naalakkersuisut qilattut ittut innuttaaqatigiillu maanna piusut ajortut sunit taarserneqassappat? (Atuaruk 2 Petrusi 3:13). ‘Qilannit nutaanit’ — Guutip naalagaaffianit Missiarsikkoortumit — ‘nunamillu nutaamit’ — innuttaaqatigiinnit Guutimik pallorfiginnittunit ilumoortunit naapertuilluartunit taarserneqassapput.
17. Inuiaat neriuutaat Saqqummersitat 21:1-4-mi qanoq allaatigineqarpa?
17 Allakkani Biibilimiittuni kingullerniippoq inunnik naammalluinnartunngortinneqarsimasunik takorruugaq qiimmaallannartoq. (Atuakkit Saqqummersitat 21:1-4). Naammalluinnartunngortinneqarnissaq Adami Evalu Naatsiivimmi Edenimi naammalluinnartuujunnaarmatali inuit uppertut neriuutigilersimavaat. Inuit eqqortuliorusuttut nunarsuarmi paratiisiusumi utoqqaliartornatik naassaanngitsumik inuujumaarput. Neriuut tamanna Allakkani Hebræerisuuni Kristumiullu Allagaataanni Grækerisuuni tunngavissaqarluarpoq, tamannalu Guutip kiffaanut aalajaatsunut ulloq manna tikillugu qiimmassaataasarlunilu nakussatsissutaasarpoq. — Saqqummersitat 22:1, 2.
Uku nassuiarsinnaavigit?
• Jiisusip oqariartaaseq “pinngoqqiffimmi” atoramiuk suna pivaa?
• Jiisusip Nikodemusi suna pillugu oqaloqatigaa?
• Jiisusip pinerluttoq eqqamini kikiattorneqartoq qanoq neriorsorpaa?
• Hebræerinut allakkat apustilillu Petrusip oqaasii nunarsuarmi naassaanngitsumik inuunissamik neriuummut qanoq uppernarsaataappat?
[Atuaqqissaarnermi apeqqutit]
[Qupp. 16-mi assiliartaq]
Inuit eqqortuliorusuttut nunarsuarmi naassaanngitsumik inuulerumaarput
[Qupp. 18-mi assiliartat]
Jiisusip inuuneq naassaanngitsoq eqqartoramiuk suna pivaa?