Guutimit ilinniartinneqarneq — ilinniartitaaneq pitsaanerpaaq

“[Ilumut] suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq.” — FILIPPIMIUT 3:8.

1, 2. Kristumiut ilaat qanoq aalajangersimappat, aamma sooq?

SIUSISSUKKUT paasinarsivoq Robert atuartuusoq piginnaaneqaqisoq. Arfineq-pingasuinnarnik ukioqartoq ilinniartitsisuisa ilaata pulaarpaa oqarfigalugulu angusinnaasai killeqanngitsut. Oqarpoq neriulluni nakorsanngorumaartoq. Ilinniarnertuunngorniarfimmi naammassisani pissutigalugit universitetit qaffasinnerusut arlaanni sorlermiluunniit ilinnialernissamut piukkunnassuseqarpoq. Robertilli inuppassuit periarfissatut asseqanngitsutut isigisartagaat tunulliunniarlugit aalajangerpoq. Anguniarniarlugu aalajangiussimasani anguniarusunneruaa. Pioneriorusuppoq, tassa piffissaq tamaat oqaluussisartoorusuppoq.

² Kristumiorpassuit — inuusuttut utoqqaallu — silarsuarmi matumani qaffannissamut Robertitut periarfissaqarluarput. Ilaat aalajangersimapput anguniakkatik anersaakkut ittut angusinnaajumallugit periarfissatik taama ittut tamakkiisumik atorniarnagit. (1 Korinthimiut 7:29-31) Sunaana pissutigalugu kristumiut Robertitut ittut oqaluussinermi tamaviaarlutik suliniuteqarnissamut piumassuseqartartut? Jehovamik asanninnermik, suliniuteqarnerminnut pissutaasup pingaarnerusup, saniatigut Guutimit ilinniartinneqarnerup qanoq nalissaqanngitsiginera paasisimagamikku. Sallusuissut paasisimanngitsuugukku inuunerit qanoq issagaluarnersoq qanittukkut eqqarsaatiginikuuiuk? Pilluaqqussutit asseqanngitsut Jehovamit ilinniartinneqarnitta kingunerisaanik nuannaarutigisinnaasatta ilaannik eqqarsaatiginninnerput nutaarsiassamik nuannersumik pingaartitsiuarnissamut aallussilluarlutalu tusarliussamik ingerlatitseqqinnissamut iluaqutigissavarput.

Guutimit ilinniartinneqarneq immikkut pisinnaatitaaffiuvoq

3. Sooq qularutiginngilluinnarsinnaavarput Jehova inunnik naammalluinnanngitsunik ilinniartitserusussuseqartoq?

³ Jehova ajunngisaarluni inunnik naammalluinnanngitsunik ilinniartitserusussuseqarpoq. Esaja 54:13-imi kristumiunut tanitanut tunngatillugu ima allassimasoqarpoq: “Ernitit tamarmik [Jehovamit] ajoqersorneqarsimassapput, ernitit iluanaangaarumaarput.” Oqaatsit taakku aamma Kristusip ‘savaataanut allanut’ tunngatillugu atorneqarsinnaapput. (Johannesi 10:16) Tamanna siulittuummit ullumikkut eqquuttumit erserpoq. Esajap takorruukkami takuaa inuit inuiannit tamaneersut pallorfiginninnermut ilumoortumut ornigussortut. Takorruukkami tamatumani inuit taakku imminnut ima oqarfigipput: “Majuarta [Jehovap] qaqqaanut, Jaakup Guutiata illuanukarluta; aqqutigeqqusaminik ajoqersussavaatigut, aqqusininnguisigullu ingerlajumaarpugut.” (Esaja 2:1-3) Guutimit ilinniartinneqarneq immikkut pisinnaatitaaffiuvoq angingaartoq!

4. Jehovap ilinniartitani sumik piumasaqarfigai?

⁴ Guutimit ilinniartinneqarneq iluaqutigisinnaajumallugu susariaqarpugut? Ilinniartinneqarsinnaajumalluni maniguunnissaq ilikkagaqarusussuseqarnissarlu pisariaqarput. Tussiaasiortoq Daavi ima allappoq: “Ajunngitsuuvoq peqqusersuitsuullunilu [Jehova]. . . . Maniguuttut . . . [ajoqersortarpai] aqqutigeqqusaminik.” (Tussiaat 25:8, 9) Aamma Jiisusi ima oqarpoq: “Unnersiutigaakkit Ataataq qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut; tassami Ataataq, illit piumasat taamaappoq.” (Lukasi 10:21) Guuti ‘qanilaartunik  saammaassisartoq’ kajungernaq, ilaa? — 1 Petrusi 5:5.

5. Suna Guutimik ilisarisimannilersinnaannguutigaarput?

⁵ Jehovamut kiffaasutut uagut oqarsinnaavugut nammineq ilisimassuserput namminerlu piginnaanivut pissutigalugit sallusuissut paasisimallugu? Naamik. Ikiorneqanngivilluta Guutimik ilisarisimannilersinnaanngilagut. Jiisusi ima oqarpoq: “Kinaluunniit uannut ornigussinnaanngilaq Ataatap uannik aallartitsisup kajungilersinngippani.” (Johannesi 6:44) Oqaluussineq anersaarlu illernartoq atorlugit Jehova inunnik maniguuttunik naalattunillu, ‘inuiaat tamarmik erlinnangaartortaannik’ (NV), kajungilersitsisarpoq. (Haggaji 2:7) Jehovap ernerminut kajungilersissimasaanut illit ilaanerit qujamasuutigaat, ilaa? — Atuakkit Jeremia 9:22, 23.

Pitsaanerusumik inooriaaseqarnissamut nukissaqalersitsisoq

6. ‘Jehovamik ilisimasaqarnermik’ pigiliussineq inunnut qanoq maluginiarnartumik sunniuteqarsinnaava?

⁶ Esajap siulittuutaani assersuutikkut kusanavissumik oqaluttuarineqarpoq nalitsinni inuppassuit inuttut pissusiisa allanngornerat. Peqqarniitsuusimagaluartut eqqissinermik nuannarinnittunngorsimapput. (Atuakkit Esaja 11:6-9). Inuit siornatigut ammip qalipaataatigut, inuiaassutsikkut, naggueqatigiissutsikkut allanullu tunngatillugu assigiinngissutit pissutigalugit imminnut akeqqersimaartuusimasut ataasioqatigiillutik peqatigiinnissaq ilikkarsimavaat. Assersuutaasumik ‘saffiorsimavaat panatik assallatserummut savissaliaralugit’. (Esaja 2:4) Allanngornerit maluginiarnartut tamakku sumik pissuteqarpat? Inuit ‘Jehovamik ilisimasaqarneq’ pigiliussimavaat inuunerminnilu atortarlugu. Guutip kiffai naammalluinnanngitsuugaluarlutik qatanngutigiissuupput ilumoortut nunanit tamalaaneersut. Nutaarsiassap nuannersup silarsuarmi tamarmi kajungerineqarnera taamalu inerititaqarluartiginera Guutimit ilinniartinneqarnerup nalissaqannginneranut uppernarsaataavoq. — Matthæusi 11:19.

7, 8. (a) “Pallittaalisaliat” inuit Guutimit ilinniartinneqarneq iluaqutigalugu ‘aserortersinnaasaasa’ ilaannik eqqaasaqarit. (b) Taamatut ilinniartinneqarnerup Jehovamut nersornaataanera sumit erserpa?

⁷ Apustilip Paulusip Guutip kiffaasa ilinniartitsinerat anersaakkut sorsunnermut assersuuppaa. Ima allappoq: “Sakkut sorsunnitsinni atortakkavut tassaanngillat silarsuup pii, tassaappulli Guutimit pissatsitaasut pallittaalisaliat aserortersinnaallugit. Tassa suujunnaarsittarpavut isumaliutersuutaannaasut anneruniarnerillu Guutimik ilisimasaqarnermut assortuisut suulluunniit.” (2 Korinthimiut 10:4, 5) “Pallittaalisaliat” Guutimit ilinniartinneqarnerup aserortersinnaasai suuppat? Ilaat ikittunnguit tassaapput ajoqersuutit eqqunngitsut, upperisapalaat inuillu isumaliutersuutaat nanertuutaasut. (Kolossemiut 2:8) Guutimit ilinniartinneqarneq inuit ileqqupalaaminnik taamaatitsinissamut Guutillu iluarisaanik pissuseqalernissamut iluaqutigisarpaat. (1 Korinthimiut 6:9-11) Ilaqutariittut inuunermik pitsaanerulersitsisarpoq neriuuteqanngitsullu inuunerannik siunertaqalersitsisarluni. Taamatut ilinniartitaanissaq ullumikkut pisariaqartinneqarpoq.

⁸ Jehovap inuit pissuserineqartussat ilaannik, unneqqarissusermik, ineriartortitsinissaannut ikiortarpai.  (Hebræerit 13:18) Tamanna oqaluttuami tulliuttumi erserpoq. Arnaq Indiami Biibilimik atuaqqissaaqatigineqarnissaminut akuersivoq, kingusinnerusukkullu oqaluussisartunngorpoq kuisimanngitsoq. Naalagaaffilersaarfimmik sanaartornermi ikiuutaavoq, ullullu ilaanni angerlamut aqqutaani bussit unittarfiata eqqaani nunami nassaaraa pinnersaat kuulti 4000 kronit sinnerlugit nalilik. Arnaq taanna pissakilliorpoq, taamaakkaluartorli utoqqaanertaq politeeqarfiliaqatigaa pinnersaallu tunniukkiartorlugu. Politeeq tupigusoqaaq! Kingusinnerusukkut politiip allap arnaq taanna ima aperaa: “Sooq pinnersaat tunniukkiartorniarlugu aalajangerpit?” Ima akivoq: “Biibili tunngavigalugu ilinniartinneqarama allanngorpunga. Maanna unneqqarissuuvunga.” Politiip uissuummisimaarluni utoqqaanertaq taassuma ilagisaa ima oqarfigaa: “Naalagaaffimmi matumani innuttaasut 38 millioniupput. Taakkua ilaat quliinnaalluunniit arnatut uumatut ittunngortissinnaagukkit ajasoornassagaluarpoq.” Inuit millionillit Guutimit ilinniartinneqarnertik pissutigalugu pitsaanerusumik inooriaaseqalersimasut eqqarsaatigigaanni, taassuminnga unnersiutiginninnissamut ilumut pissutissaqarluarnarpoq.

9. Inuit qanoq ilillutik inuunerminni allannguerujussuarsinnaappat?

⁹ Pissaaneq Guutip oqaasianiittoq allannguisinnaatitsisoq Jehovallu anersaaminik illernartumik ikiuinera pissutigalugit inuit inuunerminnik allannguisinnaanngortarput. (Romamiut 12:2; Galatiamiut 5:22, 23) Kolossemiut 3:10-mi ima allassimavoq: “[Atiniarsiuk] inuttut pissuseq nutaaq, eqqorluartumik ilisimasaqarnikkut pinngortitsisini assilillugu nutartertoq.” (NV) Tusarliussaq Guutip oqaasiani Biibilimiittoq inuup qanorpiaq ittuuneranik qulaarisinnaassuseqarpoq, aamma eqqarsartaasianik allaallu assigiinngitsunut tunngatillugu misigissusiinik allannguisitsisinnaavoq. (Atuaruk Hebræerit 4:12). Allakkat pillugit eqqorluartumik ilisimasaqalernikkut inooriaatsimillu Jehovap najoqqutassiaanut naapertuilluartunut naleqqussaanikkut inuk Guutimut ikinngutinngorsinnaavoq naassaanngitsumillu inuunissamut periarfissaqalersinnaalluni.

Siunissaq eqqarsaatigalugu ilinniartinneqarneq

10. (a) Jehova siunissamut piareersarneq eqqarsaatigalugu uagutsinnik ikiuinissamut sooq asseqanngitsumik periarfissaqarpa? (b) Allanngornerit misinnangaartut suut nunarsuarmut tamarmut sunniuteqassappat?

¹⁰ Jehova siunissamut piareersarnermut tunngatillugu uagutsinnik ikiuinissamut asseqanngitsumik periarfissaqarpoq nalunnginnamiuk siunissami susoqassanersoq. Inuiaat qanoq siunissaqarnerat nalunngilaa. (Esaja 46:9, 10) Siulittuutinit Biibilimiittunit erserpoq ‘Jehovap ullussarsua qanillisoq’. (Sefania 1:14) Ullormi tamatumani Ussatit 11:4-mi allassimasut ukua ilumoornerat paasinarsissaaq: “Pisuussutit iluaqutaasanngillat kamannerup ullussaani, iluarnerli toqumit annatsitsisarpoq.” Jehovap Saatanip silarsuaanut eqqartuussutiminik naammassinniffissaa nalliuppat Jehovamut attaveqarnerput pingaaruteqarnerpaassaaq. Aningaasat naleqarnavianngillat. Ezekieli 7:19-imi ima allassimavoq: “Sølviutitik aqqusinermut eqqassavaat, kuultiutaallu minguttunngussapput.” Tamatuminnga ilisimannereerneq maanna silatusaarnissamut periarfissaqalissutigaarput.

11. Guutimit ilinniartinneqarneq siunissamut piareersarnissamut ilaatigut qanoq iluaqutigisarparput?

¹¹ Guutimit ilinniartinneqarneq taassuma ullussaata  nalliunnissaanut immikkut ittumik piareersaatigisarparput eqqortumik pingaarnersiuinissamut iluaqutigisaratsigu. Apustilip Paulusip Timotheusi ima allaffigaa: “Silarsuarmi matumani pisuut peqqusiffigissavatit makitaniaqqunagit pisuussutitilluunniit allanngujasut isumalluutigeqqunagit, isumalluutigeqqulluguli Guuti.” Siunnersuut Guutimit isumassarsiarititaasoq tamanna kristumiut aamma pigissaartuunngitsut iluaqutigisinnaavaat. Qanoq? Pigisatigut pisuussutinik katersuinata ‘ajunngitsuliorniartariaqarpugut ajunngitsulianillu pisuussuteqarniartariaqarluta’. Soqutigisanik anersaakkut ittunik inuunitsinni pingaarnerpaatitsinitsigut ‘pisuussutinik siunissami toqqaviusinnaasunik katersisarpugut’. (1 Timotheusi 6:17-19) Imminut pilliutigeriaannaalluni taamatut iliuuseqarneq naliliisinnaassuseqarluarnermut ersiutaavoq. Soorlu Jiisusi ima oqartoq: “Inummummi sumut iluaqutaassava silarsuaq tamaat pigileraluaruniuk inuuninili akigalugu?” (Matthæusi 16:26, 27) Jehovap ullussaata qanillinera eqqarsaatigalugu tamatta immikkut imminut ima aperigutta silatusaassaagut: ‘Erlinnartuutinik sumi katersivunga? Guutimut pisuussutinulluunniit kiffartorpunga?’ — Matthæusi 6:19, 20, 24.

12. Sooq allat kiffartornitsinnik nikaginninnerat nikalluutigisariaqanngilarput?

¹² ‘Ajunngitsuliat’ Guutip kristumiunut oqaasiini eqqaaneqartut pingaarnerpaartaraat Guutip naalagaaffianik oqaluussissutiginnilluni ajoqersuganngortitsiortorlunilu inuunermik annaassiniarneq. (Matthæusi 24:14; 28:19, 20) Inuit ilaat immaqa kiffartornitsinnik asissuiinnartarput, soorluttaaq ukiuni hundredelinni siullerni taamaattoqartarsimasoq. (Atuakkit 1 Korinthimiut 1:18-21). Tamannali tusarliussatta pingaaruteqassusianik allannguinngilaq, aamma tusarliussamik tamatuminnga piffissaqarallartillugu upperinnilernissamik kikkunnik tamanik periarfissiinissamik pingaannginnerulersitsinngilaq. (Romamiut 10:13, 14) Allat Guutimit ilinniartinneqarnermik iluaqutiginninnissaannut ikioraangatsigit nammineq pilluaqqussutisiarpassuaqartassaagut.

Pilliuteqarneq pilluaqqussutissartaqarpoq

13. Apustili Paulusi nutaarsiassaq nuannersoq pillugu sunik pilliuteqarpa?

¹³ Apustili Paulusi kristumiunngunngikkallarami juutit pissutsinik aaqqissuussaaneranni iluatsitsilluarnissaq siunertaralugu ilinniartinneqarsimavoq. Inatsisinik ajoqersuisumit ataqqisaangaartumit Gamalielimit ilinniartinneqarniarluni illoqarfimmit inunngorfimminit Tarsusimit Jerusalemimut nuukkami 13-inik ukioqarunarpoq. (Apustilit Suliaat 22:3) Ilutiminit pikkorinneruleriartuaarpoq, taamatullu ingerlaannarsimasuuguni juutiussutsimi nuimasumik inissisimaffeqalersimassagaluarpoq. (Galatiamiut 1:13, 14) Nutaarsiassaq nuannersoq ilassigamiuk oqaluussisaleramilu tamakku tamaasa taamaatippai. Aalajangiussani peqqissimissutigaa? Naamik. Ima allappoq: “[Ilumut] suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq. Taanna pillugu tamakku tamaasa annaasimavakka, tamaasalu perlukutut igitassaannaatippakka.” — Filippimiut 3:8.

14, 15. ‘Guutimut suleqataagatta’ sunik pilluaqqussutisisarpugut?

¹⁴ Nalitsinni kristumiut Paulusip pisimaneratut nutaarsiassaq nuannersoq pillugu pilliuteqartarput. (Markusi 10:29, 30) Tamanna pissutigalugu arlaannik pinngitsuugaqartarpugut? Robert, allaaserisap matuma aallaqqaataani eqqaaneqartoq, amerlasuut sinnerlugit ima oqarpoq: “Peqqissimissuteqanngilluinnarpunga. Piffissaq tamaat kiffartorneq nuannaarutigalugulu nalerisimaarutigaara. ‘Jehovap ajunngitsuunerata usserlugulu takunissaanut’ periarfissaqalissutigaara. Anguniakkakka anersaakkut ittut angusinnaajumallugit pigisatigut pilliuteqaraangama Jehovap ilimagisannit annerusumik pilluaqqujuaannarpaanga. Soorlulusooq pilliuteqarsimanngitsunga. Iluanaarutigisimaqaara!” — Tussiaat 34:9; Ussatit 10:22.

 ¹⁵ Qangalili oqaluusseqataasarlutillu ilinniartitseqataasarsimaguit qularnanngitsumik aamma illit ‘Jehovap ajunngitsuunera usserlugulu takusinnaasimassavat’. Nutaarsiassaq nuannersoq allanut oqaluussissutigigaangakku ilaannikkut misigisarsimavit taassuma anersaavanit ikiorneqarlutit? Allat nuannaarnerat takusimaviuk Jehovap taakkua uummataat ammarmagit tusarliussamik ‘pigiliussisillugit’? (Apustilit Suliaat 16:14) Jehovap akornutaasunik ajugaaffiginninnissannut ikiorsimavaatit, assersuutigalugu kiffartornermi iliuuseqarnerusinnaalersillutit? Ajornartorsiorninni annertoqqusersorsimavaatit taamaalillunilu illit kiffartortuarsinnaatillutit, nukissaarutilersutut misigigaluartutit? (Filippimiut 4:13) Jehovap kiffartorsinnaaqqulluta uagutsinnik ikiuinera nammineq malugigaangatsigu taanna piviusutut isiginerulertarparput, taassumunngalu qaninnerusutut misigilertarpugut. (Esaja 41:10) Ilinniartitsinersuarmi Guutip aallartitaani ‘Guutimut suleqataaneq’ pilluaqqussutaangaarami, ilaa? — 1 Korinthimiut 3:9.

16. Guutimit ilinniartinneqarnermut tunngatillugu illit iliuuseqarlutillu pilliuteqarnerit qanoq isumaqarfigaajuk?

¹⁶ Inuppassuit pingaaruteqartuartussanik inuunerminni suliaqarnissartik neriuutigisarpaat. Silarsuarmi inuuffigisatsinni suliat nersornartuugaluartulluunniit puiupallanneqarajupput. Jehovalli aterminik illernarsisitsinermut tunngatillugu ullumikkut suliaa qularnanngitsumik Guutip innuttaasa oqaluttuarisaanerannut ilaajuassaaq. Naassaanngitsumik eqqaamaneqassaaq. (Ussatit 10:7; Hebræerit 6:10) Ilinniartitsinersuarmut puiorneqanngisaannartussamut Guutip aallartitaanut peqataanermik immikkut pisinnaatitaaffik angingaartoq pingaartittuartigu.

Qanoq akissavit?

• Jehovap ilinniartitani sunik piumasaqarfigai?

• Guutimit ilinniartinneqarneq qanoq pitsaanerusumik inooriaaseqalissutaasinnaava?

• Allat Guutimit ilinniartinneqarnermik iluaqutiginninnissaannut ikioraangatsigit qanoq pilluaqqusaasarpugut?

[Atuaqqissaarnermi apeqqutit]

[Qupp. 25-mi assiliartaq]

Jehovamit ilinniartinneqartut qatanngutigiissuupput ilumoortut nunanit tamalaneersut

[Qupp. 26-mi assiliartaq]

‘Guutimut suleqataaneq’ pilluaqqussutaangaarami, ilaa?