Biibilimik atuaqqissaartarnikkut qinnutitit pitsaanerulersikkit

“[Jehova], kiffavit qinnutaanut naalaarit.” — NEHEMIA 1:11.

1, 2. Sooq qinnutinik Biibilimi allanneqarsimasut ilaannik misissuineq iluaqutaassava?

QINUNEQ Biibilimillu atuaqqissaarneq pallorfiginninnermut ilumoortumut ilaapput pingaarutillit. (1 Thessalonikamiut 5:17; 2 Timotheusi 3:16, 17) Aamma Biibili qinnutinik arlalinnik imaqarpoq, ilarpassuilu Tussiaatiniipput. Qinnutit taakku qanoq iluaqutigisinnaavavut?

² Biibili atuarlugulu atuaqqissaarutsigu ilimanarpoq qinnutinik pissutsinut atukkatsinnut naleqquttunik nassaassasugut. Qinnutini Biibilimi allanneqarsimasuni oqaaserineqartunik ilanngussisarutta, tamanna nammineq qinnutitsinnik pitsaanerulersitsissaaq. Biibilimi oqaluttuarineqarput inuit ilungersorlutik ikioqqullutik qinnutaat akineqartut. Inuit taakku qinnutaallu sumik ilinniarfigisinnaavavut?

Guutip siulersuinissaa noqqaassutigiuk siulersuineralu naapertorlugu iliorlutit

3, 4. Aaperaap kiffaa sumik suliassinneqarpa, pisorlu sumik ilinniarfigisinnaavarput?

³ Biibilimik atuaqqissaarnermi paasinarsisarpoq Guutimit siulersorneqarnissaq qinnutigiuarneqartariaqartoq. Assersuutigalugu eqqarsaatigeriaruk qanoq pisoqarnersoq ataataanerpaap Aaperaap kiffani angajulleq — Eliezeriugunartoq — Mesopotamiamukartimmagu Iisaaq Guutimik  mianerinnittumik nuliassarsiuuteqqullugu. Arnat imertartarfimmi imermik qalluitillugit kiffaq ima qinuvoq: “[Jehova] . . . [Imertartut] ilaannut oqaruma: Imertaatinnit immisilaannga, oqarpallu: Imerniarit! Aamma qatigattuutitit immisissavakka — taannaagili kiffannut Iisaamut qinikkat. Tamatumuuna ilisimassavara naalagara ajunngitsuliorfigigit.” — 1 Mosesi 24:12-14.

⁴ Aaperaap kiffaata qinnutaa akineqarpoq Rebekkap taassuma qatigattuutai immimmagit. Tamatuma kinguninngua Rebekkap taanna Kana’aniliaqatigaa, tassanilu Iisaaq katippaa. Soorunami naatsorsuutigisinnaanngilarput Guutip nalunaaqummik immikkut ittumik takutissagaatigut. Inuunermi siulersussavaatigut qinnuigigutsinni aamma ‘anersaavanit ingerlatitaanissarput’, imaluunniit siulersortinnissarput, aalajangiusimagutsigu. — Galatiamiut 5:18.

Qinuneq isumakulunnginnerulernissamut iluaqutaasinnaavoq

5, 6. Jaakup Esauimik naapitsinnginnermini qinnutaani suna maluginiarnarpa?

⁵ Qinuneq isumakulunnginnerulissutaasinnaavoq. Jaaku marluliaqatiminit, Esauimit, ajortumik pineqarnissani annilaangagigamiuk ima qinuvoq: “[Jehova] . . . Kiffaasunga ilinnit taama atsigisumik ajunngisaarfigineqassallunga unneqqariffigineqassallungalu suunngippallaaraluaqaanga . . . Angajunnit Esauimit annaanniannga [annaanniannga-aat, 1990], ersigigakkumi; tikiulluni anaanat qitornaallu ilanngullugit toqorarnialeratarsinnaavaatigut. Nammineq oqarputit ajunngitsuliorfigiumaarlunga, kinguaassakkalu sioqqatut sissamiittutut amerlatigilersikkumaarlugit kisissaanngitsunngorlugit.” — 1 Mosesi 32:10-13.

⁶ Jaaku qanoq ilioriusissaminik piareersaavoq, qinnutaali akineqarpoq Esauilu saammaateqatigiimmata. (1 Mosesi 33:1-4) Jaakup qinnutaa atuaqqissaaraanni paasinarsisarpoq kimigiiserluni ikioqquinnanngitsoq. Jaakulli aamma ersersippaa kinguaassaq neriorsuutigisaq upperalugu aamma Guutip ‘ajunngisaarnera’, imaluunniit ilumoorfiginnilluni tunniusimanera, qujamasuutigalugu. Illit ilaannikkut annilaangallutillu isumakuluttarpit? Taamaappat immaqa Jaakup qinnutaa qinnutit isumakulunnginnerulissutaasinnaanerannik ilinnut eqqaasitsissutaasinnaavoq. Qinnutilli qinnuteqarfiuinnaratik aamma uppernermik ersersitsiffiusariaqarput.

Ilisimassuseq qinnutigiuk

7. Sooq Mosesip Jehovap aqqutaanik ilisimasaqalernissaq qinnutigaa?

⁷ Jehovamik nuannaartitserusunnerput ilisimassusermik qinnutiginninnissamut kajumississutigisariaqarparput. Mosesip qinnutigaa Jehovap aqqutaanik ilisimasaqalernissaq. Jehovamut ima qinuvoq: “Peqqusiffigigaluarparma inuit uku [Egyptenimit] siulersorlugit ingerlateqqullugit . . . Ilumut isinnut saammaannarsiguma taava aqqutinnik nalunaarfiginnga ilisimaleqqullutit ilinnillu iluarisaajuaqqullunga.” (2 Mosesi 33:12, 13) Mosesip qinnutaa akillugu Guutip taanna aqqutiminik ilisimasaqarnerulersippaa, tamannalu Mosesi Israelikkunnik siulersuisinnaassappat pisariaqarpoq.

8. 1 Kunngit 3:7-14-imik eqqarsaatiginneqqissaarneq qanoq iluaqutigisinnaavarput?

⁸ Daavi aamma ima qinuvoq: “Ingerlavigeqqusannik ilinniartinnga, [Jehova].” (Tussiaat 25:4) Aamma Daavip ernerata Salomop Guuti qinnuigaa ilisimassusermik Israelimi kunngitut pisussaaffimminik isumaginnissinnaaqqulluni pisariaqartitaminik. Salomop qinnutaa Jehovap iluaraa,  qinnutigisaanimmi tuniinnarnagu aamma pisuussusermik ataqqinaammillu tunivaa. (Atuakkit 1 Kunngit 3:7-14). Ilagiinni mersernarsinnaasumik suliassinneqarutta ilisimassuseq qinnutigisariaqarparput maniguuttariaqarlutalu. Taava Guutip akisussaaffimmik asannittumik isumaginninnissamut pisariaqartumik ilisimasaqalerlutalu ilisimassuseqalernissatsinnut ikiussavaatigut.

Qamannga pisumik qinugit

9, 10. Salomop atoqqaartitsinermi qinnutimini uummammik eqqartuinerani illit suut pingaaruteqartutut isumaqarfigaagit?

⁹ Jehovap qinnutivut tusartassappagit qamannga pisumik qinusariaqartassaagut. Salomo inuppassuit ukiumi 1026-mi Kr.in.si. Jerusalemimi Jehovap naalaffiata atoqqaartinneqarnerani katersuussimasut saavanni qamannga pisumik qinuvoq, qinnullu taanna Kunnginik allakkani siullerni kapitali 8-mi allanneqarsimavoq. Angerutsip illerfia illernarnerpaamut pisinneqarmat Jehovallu nuiaata naalaffik ulikkaarmagu Salomop Jehova unnersiutigaa.

¹⁰ Salomop qinnutaa atuariaruk, maluginiarullu uummat qanoq innersuussutigikulatigineraa. Salomop miserratiginngilaa inuup uummammiui Jehovap kisimi nalunngikkai. (1 Kunngit 8:38, 39) Qinnummi tamatumanissaaq ersersinneqarpoq ajortuliortoq ‘uummatikkut iluunngarluni Guutimut saattoq’ neriuutissaqartoq. Guutip innuttai akeraasunit tigusarineqarpata inuiaqatigiit qinnutaat tusarneqarumaarput uummatimikkut iluunngarlutik Jehova ilumoorfigigunikku. (1 Kunngit 8:48, 58, 61) Taamaammat pingaaruteqarpoq qamannga pisumik qinusarnissarput.

Tussiaatit qinnutinnik qanoq pitsaanerulersitsisinnaasut

11, 12. Levikkuusup Guutip illernartuutaanukarsinnaannginnermini qinnutaa sumik ilinniarfigisinnaavarput?

¹¹ Tussiaatinik atuaqqissaarneq qinnutinnik pitsaanerulersitsisinnaassaaq aamma Guutip qinnutinnik akisinissaanut utaqqinissamut iluaqutigisinnaassavat. Aallarussaaqqasup Levikkuusup utaqqisinnaassusia eqqarsaatigeriaruk. Piffissap ilaani Jehovap illernartuutaanukarsinnaanngikkaluarluni ima erinarsorpoq: “Sullutit isumatsappit tarniga? Sooq ilunni aalavit? Guuti utaqqigiuk! Aammaarlunga qutsavigiumaarakku annatsitsisiga Guutigalu.” — Tussiaat 42:6, 12; 43:5.

¹² Levikkuusoq taanna sumik ilinniarfigisinnaavarput? Naapertuilluarneq pissutigalugu parnaarunneqassagaluarutta taamaattumillu piffissap ilaani uppeqativut ataatsimiigiaqatigisinnaanagit, Guutip iluaqutissatsinnut akuliunnissaa naammagittarluta utaqqisariaqarparput. (Tussiaat 37:5) Guutimut kiffartornitsinni nuannaarutigisimasavut eqqarsaatigisariaqarpavut taassumalu innuttaanik peqateqartaleqqinnissatsinnut ikiuinissaa utaqqitillugu pinertusaarnissaq qinnutigalugu.

Upperlutit qinusarit

13. Sooq Jaaku 1:5-8 naapertorlugu upperlutit qinusariaqarpit?

¹³ Pissutsit atukkatit qanorluunniit ikkaluaraangata upperlutit qinujuaannarit. Uppernikkut misilinneqaruit ajoqersukkap Jaakup siunnersuutaa malittariaqarpat. Jehova qinunikkut saaffigiuk, aamma misilinneqarnerpit naammagalugu atornissaanut pisariaqartumik ilisimassuseqartitsinissaa qularutigissanngilat. (Atuakkit Jaaku 1:5-8). Guutip misilinneqarnitit eqqumaffigisarpai, anersaanilu iluaqutigalugu siulersorlutillu tuppallersarsinnaavaatit. Tatiginnilluinnarlutit, ‘qularnak’, uummammiunnik aniatitsivigiuk, anersaavatalu siulersuinera oqaasianilu siunnersuutit malillugit iliorit.

14, 15. Sooq oqartoqarsinnaava Hanna uppernini pissutigalugu qinullunilu iliuuseqartoq?

¹⁴ Hanna, Levikkuusup Elkanap nuliata aappaa, uppernini pissutigalugu Guutimut qinullunilu iliuuseqarpoq. Hanna qitornaatsuusoq Elkanap nuliata aappaanit, Peninnamit, arlalinnik meerartaarsimasumit asissorneqarpoq. Tupermi naapeqatigiittarfimmi Hanna pingaartorsiorluni neriorsuivoq ernertaaruni Jehovamut tunniukkumallugu. Qinutilluni siggui sajummata palasiunerup Elip aalakoorsoraa. Paasigamiuk aalakuunngitsoq ima oqarpoq: “Israelip Guutiata qinnutigisannik tunissavaatit.” Hannap tamanna qanorpiaq kinguneqassanersoq nalugaluarlugu qularutiginngilaa qinnutini akineqarumaartoq. Taamaattumik ‘isikkua aliasuppalukkunnaarpoq’; siornatigutut nikallungallunilu aliasunngilaq. — 1 Samueli 1:9-18.

¹⁵ Hannap Samueli ernertaarereeramiuk miluermallu Jehovamut tupermi naapeqatigiittarfimmi illernartumik kiffartortussatut tunniuppaa. (1 Samueli 1:19-28) Pisimasumi tamatumani taassuma  qinnutaanik eqqarsaatiginneqqissaarneq piffissaqarfigigukku illit nammineq qinnutitit pitsaanerulersinnaapput, aamma eqqarsaatiginneqqissaarnerit iluaqutigissavat akineqarnissat qularutiginagu Jehovamut qinuguit allaat ajornartorsiummik annikilliornartumik aliasuutiginninnerup ajugaaffigineqarsinnaaneranik paasinninnissamut. — 1 Samueli 2:1-10.

16, 17. Nehemiap uppernini pissutigalugu qinullunilu iliuuseqarnerata kingunerisaanik qanoq pisoqarpa?

¹⁶ Aamma angut assuarnaatsoq, Nehemia, 400-kkunni Kr.in.si. inuusoq uppernini pissutigalugu qinullunilu iliuuseqarpoq. Ilungersorluni ima qinuvoq: “[Jehova], kiffavit qinnutaanut naalaarit kiffavillu atinnik mianerinnikkumasut qinnutaannut. Qanortoq kiffat ullumi iluatsitsigili, qanortorlu kunngip kiffartorfimma naakkigilinga.” ‘Kunngi kiffartorfigisaa’ kinaava? Tassaavoq Perserit kunngiat Artaxerxesi, Nehemiap immitsisuuffigisaa. — Nehemia 1:11.

¹⁷ Nehemia ullorpassuarni uppernini pissutigalugu Guutimut qinuvoq paasereerlugu juutit Babylonimi aallarussaaqqanerminnit aniguisitaasimasut ‘atugarlioqalutillu asissugaasut’ ‘Jerusalemillu qarmarsui aserorterneqarsimasut’. (Nehemia 1:3, 4) Nehemiap qinnutai taassuma nammineq neriuutigisimasai akimorlugit akineqarput, kunngimmi Artaxerxesip Nehemiap Jerusalemimukarnissaa illoqarfiullu qarmarsuinik sanaqqiinissaa akueraa. (Nehemia 2:1-8) Sivitsunngitsoq qarmarsuit iluarsaanneqareerput. Nehemiap qinnutai akineqarput pallorfiginninnermut ilumoortumut tunngammata aamma uppernini pissutigalugu qinummat. Aamma illit qinnutitit taamaappat?

Eqqaamajuk unnersiutiginnittarnissat qujaniartarnissallu

18, 19. Suut pissutigalugit Jehovamik unnersiutiginnillutalu taassumunnga qujaniartariaqarpugut?

¹⁸ Qinnutitsinni eqqaamasariaqarparput Jehovamik unnersiutiginnitarnissarput taassumunngalu qujasarnissarput. Taamaaliornissamummi pissutissavut kisissaanngillat! Assersuutigalugu Daavi Jehovap kunngeqarfianik unnersiutiginnerusungaarpoq. (Atuakkit Tussiaat 145:10-13). Illit qinnutinni ersertarpa Jehovap naalagaaffianik oqaluussissutiginninnermik immikkut pisinnaatitaaffik pingaartikkit? Aamma tussiaasiortup oqaasii qamannga pisumik qinnutinni kristumiut ataatsimiinnerinik ataatsimeersuarnerinillu qujamasuutiginninninnik ersersitsinissamut immaqa iluaqutigisinnaavatit. — Tussiaat 27:4; 122:1.

¹⁹ Guutimut attaveqarnitsinnik erlinnartumik qujamasuutiginninnerput imatupajaaq oqarluta taassumunnga iluunngarluta qinunissamut kajumississutigisinnaavarput: “Qutsavigissavakkit [Jehova] inuiaat akornanni, erinalimmik unnersiutigissavakkit inuiaqatigiit akornanni. Ajunngissutsimmi qilammut atavoq, ilumoorsutsillu nuissanut. Qilaap qulaanut qullarit, Guuti, naalannassutsit qaamatiguk nuna tamakkerlugu.” (Tussiaat 57:10-12) Misigissutsit matumani oqaasertalerneqartut nuanningaaramik! Oqaatsit killitsinnartut Tussiaatineersut qinnutinnut sunniuteqarsinnaapput taakkuninngalu imaqarluarnerulersitsisinnaallutik, ilaa?

Ataqqinningaarlutit Guutimut qinusarit

20. Mariap Guutimik ataqqinningaarnini qanoq ersersippaa?

²⁰ Guutimik ataqqinninnerput qinnutitsinni erseqqittariaqarpoq. Mariap Missiarsimut anaanaasussaalluni paasigamiuk oqaasii ataqqinnippaluttut Hannap Samueli tupermi naapeqatigiittarfimmi kiffartortussatut tunniukkamiuk oqaasiinut assingupput. Mariap Guutimik ataqqinningaarnera oqaasiini ukunani erseqqippoq: “Tarnima [Jehova] naalannartippaa anersaamalu qiimmattaatigaa Guuti,  annaassisiga!” (Lukasi 1:46, 47) Illit qinnutitit imaqarluarnerulersissinnaavigit misigissutsinik taakkununnga assingusunik ersersitsisarnikkut? Tupinnanngilaq Maria Guutimik mianerinnittuusoq Jiisusimut, Missiarsimut, anaananngortussatut toqqarneqarmat!

21. Jiisusip qinnutai taassuma uppernera ataqqinninneralu pillugit sumik ersersitsippat?

²¹ Jiisusi ataqqinningaarluni Guutimut qinusarpoq tusarneqarnissani qularutiginngilluinnarlugu. Assersuutigalugu taanna pillugu oqaluttuarineqarpoq Lazarusimik makititsinnginnermini, “[aarlortoq] oqarlunilu: ‘Ataataq, qutsavigaakkit tusaramma. Uanga nammineq nalunngilara tamatigut tusartarimma.’” (Johannesi 11:41, 42) Illit qinnutinni upperneq ataqqinninnerlu tamatumunnga assingusut ersertarpat? Qinnut Jiisusip uagutsinnut ilinniartitsissutigisaa misissorutsigu maluginiassavarput ingammik Jehovap aqqanik illernarsisitsinermut, naalagaaffiata tikiunnissaanut piumasaatalu naammassineqarnissaanut tunngasoq. (Matthæusi 6:9, 10) Illit qinnutitit qanoq innersut eqqarsaatigeqqissaaruk. Illit Jehovap naalagaaffianik, taassuma piumasaatut iliornissamik aqqatalu illernarsisinneqarnissaanik ilumoorlutit soqutiginninninnik ersersitsippat? Taamaattariaqarput.

22. Sooq qularutiginngilluinnarsinnaaviuk Jehovap nutaarsiassamik nuannersumik oqaluussissutiginninnissamut sapiissusilerumaaraatit?

²² Malersugaaneq allatulluunniit misilinneqarneq pissutigalugu Jehovamut kiffartortut taassumunnga kiffartornerminni sapiillutik pinertusaarnissamut ikioqqullutik qinusariaqartarput. Petrusi Johannesilu peqquneqarnermissut iliorumanngillat Killisiuisoqatigiit ‘Jiisusip aqqani ajoqersueqqunngimmatik’. (Apustilit Suliaat 4:18-20) Iperagaareeramik uppeqatitik oqaluttuuppaat qanoq pisoqarsimanersoq. Taava najuuttut tamarmik Guuti qinnuigaat siooranatik, imaluunniit nakimaallutik, oqaasianik oqaatiginninnissamut ikioqqullutik. Qinnut tamanna akineqarmat qanoq pissanganarsimatigaa, ajoqersukkammi “Anersaamik Illernartumik ilumioqangaalerput, Guutillu oqaasia nalunaajaatigaat siooranatik”! (Atuakkit Apustilit Suliaat 4:24-31). Tamanna inuppassuit uppertunngornerannik Jehovamullu kiffartulernerannik kinguneqarpoq. Aamma qinuneq nakimaallutit nutaarsiassamik nuannersumik oqaluussissutiginninnissamut nakussatsissutigisinnaavat.

Qinnutitit pitsanngorsartuakkit

23, 24. (a) Biibilimik atuaqqissaartarnerup qinnutinnik qanoq pitsaanerulersitsisinnaanerannik ersersitsisunik allanik eqqaasaqarit. (b) Qinnutitit pitsaanerulersinniarlugit qanoq iliorniarpit?

²³ Biibilimik atuartarnerup atuaqqissaartarnerullu qinnutinnik pitsaanerulersitsisinnaanerannik ersersitsisut allarpassuit eqqaaneqarsinnaapput. Assersuutigalugu Jonap pisimaneratut qinnutinni ersersissinnaavat ‘annassutip Jehovamit pinera’ akueralugu. (Jona 2:2-11) Ingasattumik ajortuliorsimanerit isumakuluutigigukku utoqqaanertanullu ikiortissarsiorsimaguit misigissutsit Daavip qinnutimini oqaatigisai immaqa qinnutinni peqqissiminivit oqaasertalernissaanut iluaqutigisinnaavatit. (Tussiaat 51:3-14) Qinnutivit ilaanni Jeremiap pisimaneratut Jehova unnersiutigisinnaavat. (Jeremia 32:16-19) Aappassarsioruit qinnut Ezra kapitali 9-mi allanneqarsimasoq namminerlu qinunerit Guutimut naalannissamik taamaallaallu ‘Naalakkami’ katinnissamik aalajangiusimanninnerulissutigisinnaavat. — 1 Korinthimiut 7:39; Ezra 9:6, 10-15.

²⁴ Biibili atuartuarlugulu misissoqqissaartuaruk. Qinnutinni suut ilanngussinnaanerlugit eqqumaffigiuk. Immaqa Biibilimi misissukkannik Jehovamut qinnutinnut, qujaniutinnut unnersiutiginnissutinnullu ilanngussisinnaassaatit. Qularutiginngilluinnarsinnaavat Jehovamut Guutimut qanilliumaarlutit Biibilimik atuaqqissaartarnikkut qinnutitit pitsaanerulersittarukkit.

Qanoq akissavit?

• Sooq Guutip siulersuinissaa noqqaassutigisariaqarlugulu siulersuinera naapertorlugu iliortariaqarpugut?

• Ilisimassusermik qinnutiginninnissamut suna kajumississutigisariaqarparput?

• Tussiaatit qinnutitsinnik qanoq pitsaanerulersitsisinnaappat?

• Sooq uppernerput pissutigalugu ataqqinnillutalu qinusariaqarpugut?

[Atuaqqissaarnermi apeqqutit]

[Qupp. 15-mi assiliartaq]

Aaperaap kiffaata Guutimit siulersorneqarnissani qinnutigaa. Aamma illit tamanna qinnutigisarpiuk?

[Qupp. 17-mi assiliartaq]

Ilaqutariittut Biibilimik atuaqqissaaqatigiinneq qinnutissinnik pitsaanerulersitsisinnaavoq