Qinnutitit illit pillutit sunik ersersitsippat?
Qinnutitit illit pillutit sunik ersersitsippat?
“[Illit] qinnutitsinnik tusartartutit. Inuit tamarmik ornissavaatsit.” — TUSSIAAT 65:3.
1, 2. Sooq Jehovamut kiffaasut taanna tatigilluinnarlugu qinunikkut saaffigisinnaavaat?
JEHOVAP kiffami aalajaatsut qinnutaat sumiginnanngisaannarpai. Qularutiginngilluinnarsinnaavarput tusartaraatigut. Jehovap Nalunaajaasuisa millioniliugaluartulluunniit ataatsikkut qinnuigippanni tamaasa immikkut tusarsinnaavai.
2 Tussiaasiortup Daavip Guutip qamannga pisumik qinnutiminik tusarumaarneranik qularutiginninngilluinnarnini taassumunnga ima erinarsuutigaa: “[Illit] qinnutitsinnik tusartartutit. Inuit tamarmik ornissavaatsit.” (Tussiaat 65:3) Daavip qinnutai akineqartarput Jehovamut kiffaagami ilumoorfiginnittoq. Pitsaassaaq tamatta immikkut imminut ima aperigutta: ‘Qinnutinnit erserpa Jehova tatigigiga aamma pallorfiginninneq ilumoortoq inuuninni pingaarnerpaasoq? Qinnutikka uanga pillunga sunik ersersitsippat?’
Maniguullutit Jehovamut qinusarit
3, 4. (a) Qanoq isiginnittaaseqarluta Guuti qinunikkut saaffigisariaqarparput? (b) Ingasattumik ajortuliorsimaneq pissutigalugu isumakulunnartunik ‘eqqarsaateqarutta’ qanoq iliussaagut?
3 Kissaatigigutsigu Jehovap qinnutivut akisassagai maniguulluta taassumunnga qinusariaqarpugut. (Tussiaat 138:6) Qinnuigisariaqarparput misissoqqulluta Daavip pisimaneratut ima oqarami: “Misissuiffiginnga, Guuti, ilisimajullu uummatiga, misilinnga, eqqarsaatikka ilisimaniakkit. Alapernaasinnga guutipiluit aqqutaannik atuaanersunga, ingerlatinngalu aqqutikkut naassaanngitsukkut.” (Tussiaat 139:23, 24) Qinunissaq naammagiinnassanngilarput, aamma Guuti uagutsinnik misissuitittariaqarparput taavalu siunnersuutinik oqaasianiittunik maleruaalluta. Jehovap “aqqutikkut naassaanngitsukkut” siulersorsinnaavaatigut inuunermullu naassaanngitsumut sammisumik inooriaaseqarnissatsinnut ikiorsinnaalluta.
4 Taavami ingasattumik ajortuliorsimaneq pissutigalugu isumakulunnartunik ‘eqqarsaateqarutta’? (Atuakkit Tussiaat 32:1-5). Ilerasunnermik naqisimanninniarsarineq sanngiillissutigisinnaavarput orpiup aasap kiassuanit panertinneqartarneratut. Daavip ajortuliani nuannaarunnaassutigaa, immaqa aamma allaat napparsimalissutigaa. Ajortulianili Guutimut nassuerutigigamiuk qamuuna eqqissivoq! Takorlooriaruk Daavip nuannaarnera unioqqutitsinini pillugu Jehovap isumakkeerfigisimagaani malugigamiuk. Ajortuliamik Guutimut nassuerutiginninneq oqiliallaataasinnaavoq, aamma unioqqutitsisup utoqqaanertat kristumiut ikiuinerat anersaakkut peqqisseqqissutigisinnaavaa. — Ussatit 28:13; Jaaku 5:13-16.
Torlorfiginninneq qujanerlu
5. Jehovamut torlulaneq qanoq paasisariaqarpa?
5 Arlaannik pissuteqarluta ernumallutalu eqqissisimanngikkutta Paulusip siunnersuutaa una malittariaqarparput: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.” (Filippimiut 4:6) ‘Torlulaneq’ “ilungersorluni qinnuteqarnertut” paasisariaqarpoq. Ingammik navianartorsioraangatta malersorneqaraangattaluunniit Jehovamut ikioqqulluta siulersoqqullutalu torlulasariaqarpugut.
6, 7. Suut pissutigalugit qinunitsinni qujasariaqarpugut?
6 Pissutiginiakkavulli pillugit suna qulaarneqassava aatsaat pisariaqartitaqaraangatta Jehovamut qinusarutta? Paulusi allappoq kissaatigisavut Guutimut saqqummiuttassagivut aamma ‘qujasassasugut’. Daavip misigissutsiminik oqaasertaliineranut matumunnga assingusumik oqarnissamut pissutissarpassuaqarpugut: “[Jehova], illit pigaatit angingaassuseq, pissaaneq, naalannassuseq, kusanassuseq alutornassuserlu; tassami qilammiittut nunamiittullu tamaasa pigaatit. [Jehova], illit pigaat naalagaaffik, illimmi tamanut qullersaasutut qutsissisitaavutit. . . . Guuterput, taamaattumik maanna qutsavigiumavatsigit atillu illernartoq unnersiutigalugu.” — 1 Nalunaarsuutit 29:11-13.
7 Jiisusi Guutimut qujavoq nerisassat pillugit aamma timiusaq viinnilu Naalakkap nerliutaanik nereqatigiinnermi atorneqartut pillugit. (Matthæusi 15:36; Markusi 14:22, 23) Jehovap tamakkuninnga tunissuteqartarneranik qutsaviginerata saniatigut ‘inunnut tupinnartuliai’, ‘inassutai naapertuilluartut’ oqaasialu, imaluunniit tusarliussaa, ullumikkut Biibilimi atuarsinnaasarput pillugit qutsavigisariaqarparput. — Tussiaat 107:15; 119:62, 105.
Allanik qinnussisarit
8, 9. Sooq uppeqativut kristumiut qinnuttariaqarpavut?
8 Qularnanngitsumik imminut qinnuttarpugut, aammali allanik — allaat kristumiunik atiisigut ilisarisimanngisatsinnik — qinnussisariaqarpugut. Apustilip Paulusip Kolossemi ilagiinniittut immaqa tamaasaanngitsoq ilisarisimavai, taamaakkaluartoq ima allappoq: “Guuti, Naalakkatta Jiisusi-Kristusip Ataataa tamatigut qutsavigisarparput qinnuttaraangassi; tusaamavarpummi Kristusi-Jiisusimut uppernersi aammalu illernartunut tamanut asanninnersi.” (Kolossemiut 1:3, 4) Paulusip aamma kristumiut Thessalonikamiittut qinnuttarpai. (2 Thessalonikamiut 1:11, 12) Qinnutit taama ittut uagut pilluta qatanngutitsinnullu isiginnittaaserput pillugu paasisaqarnaqaat.
9 Kristumiunik tanitanik taakkualu suleqataannik ‘savanik allanik’ qinnussisarnerput Guutip peqatigiissortaanik soqutiginninnitsinnut uppernarsaataavoq. (Johannesi 10:16) Paulusip uppeqatini qinnuigai qinnuttaqqulluni ‘qanini ammaraangamiuk oqaasissaminik tunineqartaqqulluni nakimaatsumik nalunaajaassutigisinnaanngortillugu iivangkiiliup anngigisartaa’. (Efesosimiut 6:17-20) Uagut kristumiunik uppeqatitsinnik taamatut qinnussisarpugut?
10. Allanik qinnussisarnerput uagutsinnut qanoq sunniuteqarsinnaava?
10 Allanik qinnussisarnerput pissutigalugu qinnussatsinnut isiginnittaaserput allanngorsinnaavoq. Nuannarerpianngisaqarutta taannalu qinnukkutsigu, taava taanna asanninngitsuliorfigisinnaassavarput? (1 Johannesi 4:20, 21) Qinnutit taama ittut ineriartuutaapput ataasiussutsimik siuarsaasarlutik allanullu attaveqarluarnerulersitsisarlutik. Aammattaaq Kristusip asanninneratut asannissuseqarnitsinnut uppernarsaataapput. (Johannesi 13:34, 35) Asanninneq Guutip anersaavata inerititaanut ilaavoq. Tamatta immikkut anersaaq illernartoq qinnutigisarparput aamma Jehova qinnuigisarparput tamatuma inerititaanik, tassa asanninnermik, nuannaarnermik, eqqissinermik, kamaginninnermik, inussiarnissusermik, ajunngissusermik, uppernermik, saamanermik imminullu naalakkersinnaanermik, inerititaqarnissamut ikioqqulluta? (Lukasi 11:13; Galatiamiut 5:22, 23, NV) Taamaaliortarutta oqaatsitsigut iliuutsitsigullu paasinassaaq anersaamut naapertuuttumik inuusugut. — Atuaruk Galatiamiut 5:16.
11. Sooq oqartoqarsinnaava tulluartuusoq allat qinnuigisarutsigit qinnutiminni eqqaaqqulluta?
11 Maluginiarsimagutsigu meeqqavut atuarfimmi misilitsinnerni peqquserlunnissamut ussernartorsiortut qinnuttariaqarpavut Biibililu tunngavigalugu siunnersortariaqarlutigit unneqqarissaarnissaminnut eqqunngitsuliunnginnissaminnullu iluaqutigisinnaasaannik. Paulusip kristumiut Korinthimiittut ima allaffigai: “[Guutimut] qinnutigaarput ajortuliussanngitsusi.” (2 Korinthimiut 13:7) Maniguulluni qinnutigineqartut tamakku Jehovamut nuannaarutaasarput uagullu pilluta ajunngitsunik ersersitsisarlutik. (Atuaruk Ussatit 15:8). Allat qinnuigisinnaavavut qinnutiminni eqqaasaqqulluta, soorluttaaq Paulusi taamaaliortarsimasoq. Ima allappoq: “Qinnuttarniartigut, nalunngilluaratsigu ilerasuutissaqarnata, tamatigummi eqqortumik iliorumasaraluaratta.” — Hebræerit 13:18.
Qinnutivut uagut pilluta aamma sunik ersersitsisartut
12. Qinnutitsinni suut pingaarnersaasariaqarpat?
12 Qinnutitsinni ersertarpa Jehovamut nalunaajaasuusugut nuannaarlutillu aallussilluartut? Qinnutivut Guutip piumasaanut tunngasunut, Guutip naalagaaffia pillugu tusarliussamik oqaluussissutiginninnermut tunngasunut, Jehovap kisimi oqartussaassusianik qutsissisitsinermut aqqanillu illernarsisitsinermut tunngasunut tunngassuteqartarpat? Tamakkua qinnutitsinni pingaarnersaasariaqarput soorlu qinnummi Jiisusip uagutsinnut ilinniartitsissutigisaani ersertoq: “Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.” — Matthæusi 6:9, 10.
13, 14. Qinnutivut uagut pilluta sunik ersersitsisarpat?
13 Guutimut qinnutitsinni pissutiginiakkavut, soqutigisavut kissaativullu qulaarneqartarput. Jehovap nalunngilaa inuttut qanoq ittuunersugut. Ussatit 17:3-mi ima allassimavoq: “Sølvi aatsinniaraanni atortariaqartarpoq aatsitsivik kuultilu aatsinniaraanni kissarsuussuaq, uummatinilli misiliisartoq tassaavoq [Jehova].” Aap, Guutip uummammiuvut nalunngilai. (1 Samueli 16:7) Nalunngilaa ataatsimiinnerit, oqaluussineq anersaakkullu qatanngutivut pillugit qanoq misigisarnersugut. Aamma Kristusip ‘qatanngutaanut’ isiginnittaaserput nalunngilaa. (Matthæusi 25:40) Jehovap nalunngilaa qinnutigisavut ilumut pimoorunnerivut, imaluunniit uteqattaariinnarnersugut. Jiisusi ima oqarpoq: “[Qinusaraangassi] Guutimik nalusutut iliortassanngilasi oqaaserpassualiorlusi; taakkumi isumaqartarput oqaatsitik amerlanaarunikkit tusarneqarumaarlutik.” — Matthæusi 6:7.
14 Aamma oqaatsit qinunitsinni atortakkavut Guutimik qanoq tatiginnitsiginitsinnik paasinarsisitsisarput. Daavi ima oqarpoq: “[Illit] tassaavutit qimarnguffiga, napasuliaq pallittaalisaq akeqqanut pitsaalisaaffik. Tikeraatut ineqartuinnarlanga illit tupinni, qimarnguffissarsiorpunga suluit ataanni.” (Tussiaat 61:4, 5) Guutip ‘tupini oqqiffissatsitut napparaangagulusooq’ illersuutaasumik isumassuinera toqqissisimassutigisarparput. (Saqqummersitat 7:15) Qanorluunniit misilinneqaraluarutta Jehovamik ‘najorneqarnissarput’ qularutiginagu qinunikkut taassumunnga qanillineq tuppallersaataallunilu eqqissiallannartarpoq! — Atuakkit Tussiaat 118:5-9.
15, 16. Qinuneq akisussaaffeqarnerulerniarnissamut pissutiginiakkatta paasinissaannut qanoq iluaqutigisinnaavarput?
15 Pissutiginiakkavut pillugit ilumoorluta Jehovamut qinusarnivut taakkua paasilluarnissaannut iluaqutigisinnaavavut. Assersuutigalugu Guutip innuttaasa akornanni nakkutilliisuulernissamut piumassuseqarneq ilumoorluni maniguullunilu iluaqutaarusussuseqarnermit Guutillu naalagaaffiata soqutigisaanik siuarsaaniarluni sapinngisaq tamaat iliuuseqarusussuseqarnermit aallaaveqarpa? Imaassinnaavaluunniit ‘salliujumasugut’ imaluunniit allaat allanut naalagaaniarusuttugut? Jehovap innuttaasa akornanni pissutsit taamaattussaanngillat. (Atuakkit 3 Johannesi 9, 10; Lukasi 22:24-27). Eqqunngitsunik kissaateqarutta ilumoorluta Jehovamut Guutimut qinunerput kissaatinik eqqunngitsunik eqqumaffiginninnissamut kissaatillu taakku sorlaninnginneranni allannguinissamut iluaqutigisinnaavarput.
16 Nuliaasut kristumiut ilumoorlutik kissaatigisinnaavaat uimik ilagiinni kiffartortunngornissaat immaqalu piffissap ingerlanerani nakkutilliisunngornissaat, imaluunniit utoqqaanertanngornissaat. Qatanngutit arnat taakku misigissutsit nammineerlutik qinnutiminni ersersitatik naapertorlugit iliuuseqarsinnaapput maligassiuilluarnermikkut. Tamanna pingaaruteqarpoq, ilaqutariimmi oqaloriaasiat pissusilersornerallu uiusup ilagiinni qanoq isigineqarneranut sunniuteqarsinnaavoq.
Allat sinnerlugit qinugaanni
17. Sooq nammineq qinussagaangatta kisimiittarnissarput pitsaanerua?
17 Jiisusi inoqanngitsumukarajuppoq kisimiinniarluni Ataataminullu qinuniarluni. (Matthæusi 14:13; Lukasi 5:16; 6:12) Uaguttaaq kisimiittariaqartarpugut. Eqqissisimasumiilluta qinunissamut piffissaqarluartarutta ilimanarpoq Jehovamut nuannaarutaasunik anersaakkullu iluaqutigisatsinnik aalajangigaqartarsinnaassasugut. Jiisusili aamma kikkut tamarmik takkuanni qinusarpoq, qanorlu ililluni eqqortumik taamaaliortarsinnaasugut eqqarsaatigissallugu pitsaassaaq.
18. Qatanngutit angutit ilagiit sinnerlugit qinugaangamik eqqarsaatigisariaqagaannik eqqaasaqarit.
18 Ataatsimiittarnitsinni angutit ilumoorfiginnittut ilagiit sinnerlugit kikkut tamarmik takkuanni qinusarput. (1 Timotheusi 2:8) Ilagiinnut ilaasortaasut qinnutip naanerani “amen”-neersinnaasariaqarput, “taamaalili”-mik isumaqartumik. Taamatulli oqarsinnaajumallutik qinnummi oqaatigineqartunut isumaqataasariaqarput. Ataatarpooq quarsaarnartortaqarnanilu naleqqutinngitsortaqanngilaq. (Lukasi 11:2-4) Aamma Jiisusip tusarnaartumi tamarmik immikkut pisariaqartissinnaasaasa ajornartorsiutigisinnaasaasalu immikkuualuttortai eqqaaneq ajorpai. Pissusissamisoorpoq nammineq qinnutini, kikkut tamarmik takkuanni qinnutiniunngitsoq, imminut tunngasut ilanngutissallugit. Aamma inuppaaluit sinnerlugit qinugaangatta oqaatigeqqunngisanik eqqaasaqartassanngilagut.
19. Ilagiit sinnerlugit qinusoqarnerani qanoq pissusilersortariaqarpugut?
19 Allat sinnerlugit kikkut tamarmik takkuanni qinusoqartillugu Guutimik ‘mianerinnillutalu’ ataqqinnittariaqarpugut. (1 Petrusi 2:17) Sumiiffimmi piffissamilu allami aalajangersimasumik iliuuseqarneq naleqqussinnaavoq, kristumiulli ataatsimiinneranni naleqqunnani. (Oqaluussisartup oqaasii 3:1) Assersuutigalugu oqariarta inuit ilaasa inuit eqimattaniittut tamaasa qinunermi eqisimaartinniarsaralugilluunniit tasiortinniarsarigaat. Tamanna inuit ilaasa, ilaatigut upperisaqaqatiginngisatta takuniaajartortut, ippigisinnaalluguluunniit allamut saassutigisinnaavaat. Aappariit ilaat immaqa malunnaarsaarlutik tasiortarput, ilagiilli sinnerlugit qinusoqartillugu pakkusimappata tamatuminnga takullatsiaasut tamanna naakkiussutigisinnaavaat. Eqqarsarsinnaapput aappariit aapparinnerminnik Jehovamik ataqqinninnissaminninngarnit pingaarnerutitsisut. Taamaattumik taassuminnga ataqqinningaarluta ‘qanorluunniit ilioraangatta taamaaliorta Guutip ataqqinaatissaanik’ allallu allamut saassutigisinnaasaannik, quarsaassutigisinnaasaannik naakkiussutigisinnaasaannilluunniit iliuuseqarnaveersaarluta. — 1 Korinthimiut 10:31, 32; 2 Korinthimiut 6:3.
Suut qinnutigisassavavut?
20. Romamiut 8:26, 27 illit qanoq nassuiassavigit?
20 Ilaannikkut immaqa nalusarparput nammineq qinunitsinni qanoq oqassanerluta. Paulusi ima allappoq: “[Naluarput] qanoq ililluta qinussalluta sunalu qinnutigissallugu. Anersaalli nammineq qinnuttarpaatigut anersaarulunnertigut oqaasertassaqartinneqanngitsutigut, uummatinillu misiliisup [Guutip] Anersaap kajungernera ilisimavaa.” (Romamiut 8:26, 27) Jehovap qinnuterpassuit Biibilimi allanneqartippai. Taamaattumik qinnutit isumassarsiarititaasut taakku uagut qinnutigerusutatsitut akuerisarpai eqquutitittarlugillu. Guutip ilisarisimalluarpaatigut nalunagulu Biibilimik allattut aqqutigalugit anersaaminut oqaaserititani qanoq paasisariaqarnersut. Jehovap qinnutivut akisarpai anersaap ‘qinnukkaangatigut’. Guutilli oqaasia ilisimanerujartortillugu ilimanarpoq suut qinnutigissanerlugit nalunannginnerutilissagipput.
21. Allaaserisami tulliuttumi suna sammissavarput?
21 Soorlu sammereeripput qinnutivut uagut pilluta paasisaqarnaqaat. Assersuutigalugu qinnutitsigut ersersinnaavoq Jehovamut qanoq qanitsigisugut aamma taassuma oqaasianik qanoq ilisimasaqartiginersugut. (Jaaku 4:8) Allaaserisami tulliuttumi qinnutit oqariartaatsillu Biibilimi qinnutineersut sammissavavut. Taakkuninnga samminninnerput Guutimut qinunikkut saaffiginneriaatsitsinnut qanoq sunniuteqarsinnaava?
Qanoq akissavit?
• Qanoq isiginnittaaseqarluta Jehovamut qinunikkut saaffiginnittariaqarpugut?
• Sooq uppeqativut qinnuttariaqarpavut?
• Qinnutivut uagut pilluta pissutiginiakkavullu pillugit sumik ersersitsisinnaappat?
• Ilagiit sinnerlugit qinusoqartillugu qanoq pissusilersortariaqarpugut?
[Atuaqqissaarnermi apeqqutit]
[Qupp. 11-mi assiliartaq]
Jehova unnersiutigisarlugulu qutsavigisarpiuk?
[Qupp. 13-mi assiliartaq]
Ilagiit sinnerlugit qinusoqarnerani pissusilersornerput Jehovamut ataqqinaataajuartariaqarpoq