Guutimut palligunniarit

“Erloqissutaat nalunngilakka”

2 Mosesi 3:1-10

“ILLERNARPOQ, illernarpoq, illernarpoq Katersaarsuit [Jehovaat].” (Esaja 6:3) Oqaatsit isumassarsiarititaasut taakku ersersippaat Jehova Guuti minguinnerpaajusoq. Immaqa ilaat aperiumassapput: ‘Guutip illernassutsini pissutigalugu misigittaatsuunngila qanilliuminaatsuullunilu? Inuugama ajortilik naammalluinnanngitsorlu, Guutip taama illernartigisup ilumut soqutigisinnaavaanga?’ Jehovap Mosesimut oqaasii qiimmaallannartut misissoriartigit. Mosesimik allakkat aappaani 3:1-10-mi issuarneqarput.

Ullut ilaanni Mosesi savanik paarsitilluni eqqumiitsumik takusaqalerpoq — takulerpaa ‘orpigaq ikummarissaaqisoq innermit nungukkiartorneqarani’. (Versi 2) Mosesip alapernaalluni suunersoq misissorniarlugu qanilliartorpaa. Inngili aqqutigalugu Jehova innermit Mosesimut ima oqaluppoq: “Qanillineroqinak! Aloqutitit piikkit qeqarfigisat tassaammat nuna illernartoq.” (Versi 5) Eqqarsaatigeriaruk — orpikkakkut ikualasukkut Jehovap najuunnera pissutigalugu allaat nuna illernartunngorsimavoq!

Guuti illernartoq Mosesimut oqaluukkumaneranut pissutissaqarluarpoq. Guuti ima oqarpoq: “Innuttama Egyptenimi naalliunnerat takusimavara, inussianillu sulisitsisut pillugit nimaarlutik nillianerat tusarpara. Erloqissutaat nalunngilakka.” (Versi 7) Guutip innuttami erloqissutai arajutsinngilai, ikioqqunerallu tusaanngitsuusaanngilaa. Aap, annikilliorneranni annikillioqatigai. Guutip ima oqarnera malugiuk: “Erloqissutaat nalunngilakka.” Oqaaseq “nalunngilakka”-mik nutserneqartoq qinerlerfissiami ima allaatigineqarpoq: “Taamatut oqarnermut ilaavoq nammineq misigissuseq, qajassuartumik asanninneq misigeqatiginninnerlu.” Jehovap Mosesimut oqaasiani ersersinneqarpoq taanna Guutiusoq isumassuisoq taassumalu soqutigingaaraatigut.

Guuti qanoq periarpa? Naakkigiinnanngilai — iliuuseqarpoq! Aalajangerpoq innuttani Egyptenimit aniguisinniarlugit nunamullu “immummik tungusunnitsuummillu kuuttumut” ingerlatinniarlugit. (Versi 8) Taamaatttumik Jehovap Mosesi ima suliassippaa: ‘Innuttakka Egyptenimit anisikkiartukkit.’ (Versi 10) Mosesip imminut suliassiissutigineqartoq aalajaalluni suliaraa 1513-imi Kr.in.si. Israelikkut Egyptenimit aniguisillugit.

Jehova allanngorsimanngilaq. Ullumikkut taassuminnga pallorfiginnittut qularissanngilaat atugarliuutitik isigigai ikioqqullutillu nillianitik tusaagai. Annikilliuutit misigisaat Jehovap nalunngilluarpai. Kisianni kiffani ilumoortut misigeqatigiinnanngilai. Ikiorusuppai ‘isumassoramigit’. — 1 Petrusi 5:7.

Jehovap misigeqatiginninnerata neriuuteqalersippaatigut. Uagut inuit naammalluinnanngitsuusugut Guutip ikiuineratigut najoqqutassiai naapertuilluartut minguitsullu malillugit inuuniarsinnaavugut taassumalu isaani akuerisaalluta. (1 Petrusi 1:15, 16) Arnap kristumiup isumatsassimangaarnermik nikallunganermillu akiugaqarsimasup Mosesimik orpikkamillu ikumasumik oqaluttuaq tuppallersaatigisimavaa. Taanna ima oqarpoq: “Jehovap allaat nuna illernartunngortissinnaaguniuk immaqa taava aamma uannut neriuutissaqarpoq. Eqqarsaat taanna uannut ilumut iluaqutaasimavoq.”

Guutip illernartup, Jehovap, ilisarisimanerulernissaa kissaatigaajuk? Taanna qanittumik attavigineqalersinnaavoq, “nalunngilaami pinngortitaasugut, eqqaamavaa pujualaasugut”. — Tussiaat 103:14. (wp09 03/01-E)