Ataatap ernerullu anersaallu illernartup aqqini kuisinneq

“Aallaritsi . . . ajoqersuganngortitsigitsi, Ataatap Ernerullu anersaallu illernartup aqqini kuillugit.” — MATTHÆUSI 28:19, NV.

1, 2. (a) Ukiumi 33-mi piinsip ulluani qanoq pisoqarpa? (b) Sooq inuppassuit kuisikkusulerpat?

UKIUMI 33-mi piinsip ulluani Jerusalemimi nunanit assigiinngitsorpassuarneersunik inupparujussuaqarpoq. Nalliuttoq pingaarutilik aallartissimavoq, tikeraarpassuillu nalliuttumik tamatuminnga nalliusseqataapput. Taavali immikkorluinnaq ittumik pisoqarpoq, pisullu tamatuma kingorna apustili Petrusi tiguartinnartumik oqalugiarpoq, tamannalu tupinnartumik kinguneqarpoq. Juutit juutillu upperisaannut ilanngussimasut 3000-it missiliorlugit taassuma oqaasii ima killinneqaatigitigaat allamik isumataarlutik imermilu kuisillutik. Taamaalillutik ilagiinnut kristumiunut pilersinneqarlaanut ilanngutitaapput. (Apustilit Suliaat 2:41) Taakku tamarmik tasinnguani imiisivissuarnilu Jerusalemimiittuni kuiserarmata qanormita maluginiarneqartigisimassava.

² Suna inuit taama amerlatigisut kuisinnerannik kinguneqarpa? Ullormi tamatumani siusinnerusukkut “perpaluk anoraasuarsuartut qilammit” tutsiussimavoq. Illup qaliani Jiisusip ajoqersugai 120-t missaanniittut anersaamik illernartumik ilumioqangaalerput. Tamatuma kingorna angutit arnallu Guutimik mianerinnittut katersuupput ajoqersukkallu taakkua ‘allamiut oqaasii atorlugit oqalunnerat’ tupigusuutigalugu. Petrusip oqaasii, aamma Jiisusip toqunera pillugu oqaasii paatsuugassaanngitsut, tusarnaareerlugit ilarpassuisa “uummatimikkut anniutigaat”. Qanoq iliortariaqarpat? Petrusip ima oqarfigai: “Allamik isumataaritsi, Jiisusi-Kristusillu aqqani tamassi kuisigitsi . . ., taava Anersaaq Illernartoq tunissutisiarissavarsi.” — Apustilit Suliaat 2:1-4, 36-38.

3. Juutit juutillu upperisaannut ilanngussimasut peqqissimisut piinsip ulluani susariaqarpat?

³ Juutit juutillu upperisaannut ilanngussimasut Petrusimik tusarnaartut upperisarsiornikkut pissutsit atugaat eqqarsaatigeriakkit. Jehova Guutimissut akuerereerpaat. Allakkanit Hebræerisuunit anersaaq illernartoq, Guutip nukinga sulisoq pinngortitsinermi  tamatumalu kingorna atorneqartoq, pillugu ilisimasaqarput. (1 Mosesi 1:2; Eqqartuussisut 14:5, 6; 1 Samueli 10:6; Tussiaat 33:6) Sulili allanik pisariaqartitsipput. Guutip annaassissutaata Jiisusiuneranik — Missiarsiuneranik — paasinnillutillu akuerinninnissaat pingaaruteqarluinnarpoq. Taamaattumik Petrusip taakkua ‘Jiisusi-Kristusip aqqani’ kuisinnissaata pisariaqassusia erseqqissarpaa. Ullualuit tamatuma siorna Jiisusip makititaasimasup Petrusi allallu peqqusimavai inuit kuissagaat “Ataatap Ernerullu anersaallu illernartup aqqini”. (Matthæusi 28:19, 20, NV) Tamanna ukiuni hundredelinni siullerni pingaaruteqangaalerpoq, aamma ullumikkut pingaaruteqangaarpoq. Qanoq?

Ataatap aqqani

4. Guuti inunnut attaveqarnerminut tunngatillugu sumik allannguisimava?

⁴ Soorlu eqqaaneqareersoq, Petrusip oqalugiaataanut ajunngitsumik periartut Jehovamik pallorfiginnittooreerput siornatigullu taassumunnga qanittumik attaveqarsimallutik. Jehovap inatsisaanik malinninniarsarisimapput, tamannalu inuppassuit nunanit allaneersut Jerusalemimukarnerminnut pissutigaat. (Apustilit Suliaat 2:5-11) Guutili inunnut attaveqarnerminut tunngatillugu allanngortitseqqammerpoq. Juutit inuiaqatigiittut immikkut ittutut pigisamisut ajattorpai; taakku Mosesip inatsisaanik maleruaanermikkut taassumannga akuerineqarsinnaajunnaarput. (Matthæusi 21:43; Kolossemiut 2:14) Tusarnaartut taakku Jehovamut attaveqartuarumagunik allamik pisariaqartitsipput.

5, 6. Ukiuni hundredelinni siullerni juutit juutillu upperisaannut ilanngussimasut ilarpassui Guutimut qanittumik attaveqalerumallutik suppat?

⁵ Taakku Jehovamut, Inuunermik Tunisisiminnut, saattariaqarput. (Apustilit Suliaat 4:24) Aap, Petrusip oqalugiaataanut ajunngitsumik periartut maanna aatsaat taama paasilluarsinnaatigilerpaat Jehova Ataataasoq asannittoq. Taassuma Missiarsi aallartippaa aniguisinniarlugit allaallu Petrusip ima oqarfigisaanik isumakkeerfiginnikkumalluni: “Israelikkunnut tamanut qularnarunnaassaaq Jiisusi taanna sanningasulimmut [nappakkamut, NV] kikiattugarsi Guutip Naalaganngortillugulu Kristusinngortissimagaa.” Petrusip oqaasiinik uummammiuliussisut Ataatap imminut qanittumik attaveqalerusuttunut iliuuserisimasaanik qujamasuutiginninnissamut maanna suli pissutissaqarnerulerput. — Atuakkit Apustilit Suliaat 2:30-36.

⁶ Aap, juutit juutillu upperisaannut ilanngussimasut taakkua maanna paasivaat Jehovamut qanittumik attaveqarumagunik taanna Jiisusi aqqutigalugu annassummik pilersitsisimasutut akuerisariaqarlugu. Taamaattumik ajortuliatik, ilaatigut toqqaannartumik toqqaannanngitsumilluunniit Jiisusip toquneranut akisussaaqataagamik ajortuliartik, sooq peqqissimissutigineraat paasinarpoq. Aamma paasinarpoq taakkua ulluni tulliuttuni apustilit ilinniarfigiuarmatigit. (Apustilit Suliaat 2:42) ‘Saammaannerup issiavissaarsuanut nakimanatik’ sassarsinnaallutillu sassarusupput. — Hebræerit 4:16.

7. Ullumikkut inuppassuit qanoq ilillutik Guutimut allatut isiginnittaaseqalersimappat Ataatallu aqqani kuisissimallutik?

⁷ Ullumikkut inuit millionillit assigiinngitsunik tunuliaqutallit Jehova pillugu sallusuissut Biibili aqqutigalugu paasisimavaat. (Esaja 2:2, 3) Taakkua ilaat guuteqannginneraasuusimallutilluunniit deistiusimapput *, taavali isumaqarluartumik attaveqarfigisinnaasaminnik Pinngortitsisoqarnera qularutigiunnaarsimavaat. Allat guutimik ataasiullunilu pingasuusumik guutilianilluunniit assigiinngitsunik pallorfiginnissimapput. Paasilersimavaat Jehova kisimi Guutiusoq ajugaqanngitsoq, maannalu taassuma namminerisaminik atia atortarpaat. Tamanna Jiisusip ajoqersukkat Ataatap aqqani kuisinnissaat pillugu oqaasiinut naapertuulluinnarpoq.

8. Ajorti Adamimeersoq pillugu ilisimasaqarsimanngikkaluartut Ataataq pillugu suna nassuerutigisariaqarsimavaat?

⁸ Aamma paasisimavaat ajorti Adamimit kingornussimallugu. (Romamiut 5:12) Tamanna taakkununnga nutaajuvoq akuerisariaqagaat. Inuit taakku napparsimasumut napparsimanerminik ilisimanninngitsumut assersuunneqarsinnaapput. Nappaataa immaqa malunniuttarpoq ilaannikkut anniartarneratigut allatigulluunniit. Nappaalli suussusersineqarsimanngimmat immaqa  isumaqarpoq peqqikannerluni. Taamaanngilarli. (Naleqqiuguk 1 Korinthimiut 4:4). Nappaataami sorpiaanersoq paasineqarpat? Taanna ilisimaneqarluartumik, misilittaqqissaarneqarsimasumik sunniuteqarluartumillu katsorsaariaaseqarnersoq paasiniaaguni tamatuminngalu akuerinnikkuni silatusaassaaq, ilaa? Taamatuttaaq inuppassuit ajorti kingornussaq pillugu sallusuissummik paasinninnermikkut “nappaatip” Biibili tunngavigalugu “suussusersineqarnera” akuerisimavaat paasisimallugulu Guutip katsorsaatissaq eqqortoq neqeroorutigigaa. Aap, Ataatamut takornartaasut tamarmik imminnik “katsorsaasinnaasumut” saattariaqarput. — Efesosimiut 4:17-19.

9. Jehova imminut attaveqarlualersinnaaqqulluta susimava?

⁹ Inuunerit Jehovamut Guutimut tunniulluinnareersimagukku kristumiunngorsimallutillu kuisimasoq, nalunngilat taassumunnga qanittumik attaveqarneq qanoq nuannertigisoq. Ataatat, Jehova, qanoq asannitsigisoq takusinnaavat. (Atuaruk Romamiut 5:8). Taanna Adamip Evallu ajortuliorfigisimagaluaraanni taakkua kinguaavi — aamma uagut — imminut attaveqarluarsinnaaqqulluta siulliulluni iliuuseqarpoq. Ilaatigut Guutip ernermi asasami naalliullunilu toqunera naalliuutigisariaqarsimavaa. Tamatuminnga ilisimanninnerput Guutip oqartussaassusianik akuerinninnissamut asanninnerlu kajumississutigalugu taassuma inatsisaanik maleruaanissamut iluaqutigaarput, ilaa? Illit suli Guutimut tunniulluinnarsimanallu kuisissimanngikkuit, taamaaliornissannut pissutissaqarluarputit.

Ernerup aqqani

10, 11. (a) Sooq Jiisusi akiitsugaqarfigaajuk? (b) Jiisusip utertitsissutitut toqunera ilinnut qanoq sunniuteqarpa?

¹⁰ Petrusip inuppassuarnut taakkununnga oqaasii eqqarsaatigeqqeriakkit. Taanna Jiisusimik akuerinninnerup, ‘Ernerup aqqani’ kuisinnermut atalluinnartup, pingaaruteqassusianik erseqqissaavoq. Sooq tamanna taamani pingaaruteqarpa, aamma sooq ullumikkut pingaaruteqarpa? Jiisusimik akuerinninneq taassumalu aqqani kuisinneq taassuma uagut Pinngortitsisumut attaveqarnitsinni pingaaruteqarneranik akuerinninneruvoq. Jiisusi nappakkamut anniartitaaffimmut kikiattorneqartariaqarsimavoq juutit inatsisit perloqqussutaannit aniguisinneqarniassammata; toqunerali tamatumunngaannaanngitsoq iluaqutaavoq. (Galatiamiut 3:13) Inuiaat tamarmik pisariaqartitaannik utertitsissutitut pilliutitut imminut tunniuppoq. (Efesosimiut 2:15, 16; Kolossemiut 1:20; 1 Johannesi 2:1, 2) Taamaaliorumalluni Jiisusip naapertuilluanngitsuliorfigineqarneq, mitaatigineqarneq anniartinneqarnerlu naammagalugit atorpai naggataatigullu toqutaalluni. Taassuma pilliutaa qanoq qujamasuutigitigaajuk? Takorlooriaruk nukappiaraallutit aqqaneq-marlunnik ukiulik, Titanic-imut, umiarsuarmut 1912-imi iluliarsuarmut aporluni kivisumut, ilaasoq. Umiatsiamut annanniummut ikiniarsarivutit, inissaqanngilarli. Angutit ilaata annanniummiittup nuliani kunippaa, umiarsuarmut ikeqqilluni illillu annanniummut ikitillutit. Angut taanna qujamasuffigingaassagaluarpat, ilaa? Nukappiaqqap tamatuminnga misigisaqavissup qanoq misigisimanera takorlooruminarpoq. * Jiisusili tamatumannga annerungaartumik illit pillutit iliuuseqarpoq. Toquvoq illit naassaanngitsumik inuusinnaaqqullutit.

¹¹ Illit qanoq misigivit Guutip ernera illit pillutit susimasoq paasigakku? (Atuakkit 2 Korinthimiut 5:14, 15). Qularnanngitsumik qamannga pisumik qujamasupputit. Tamanna inuunivit Guutimut tunniulluinnarnissaanut ‘imminillu pillutit inuujunnaarnissannut ilinnillu toqqutiginnittoq pillugu inuunissannut’ kajumississutigaat. Ernerup aqqani kuisinnermut ilaavoq Jiisusip iliuuserisimasaanik qujamasuutiginninneq taassumalu ‘Inuunerup naalagaaneratut’ oqartussaaneranik akuerinninneq. (Apustilit Suliaat 3:15; 5:31) Tamanna sioqqullugu Pinngortitsisumut attaveqaratillu qularnaatsumik neriuuteqanngilatit. Jiisusilli Kristusip aava kuisaq upperigakku aamma kuisissimagavit maanna Ataatamut qanittumik attaveqarneq nuannaarutigisinnaavat. (Efesosimiut 2:12, 13) Apustili Paulusi ima allappoq: “Ilississaaq siornatigut takornartaagaluartusi iluaatsumillu suliaqarnissigut isumassigut akeqqersimasuullusi, maanna Kristusip timikkut toquneratigut Guutip imminut saammaannartippaasi illernartuutillusi assuarnaatsuutillusilu . . . sassartikkumallusi.” — Kolossemiut 1:21, 22.

12, 13. (a) Allanit ajuallatsinneqaraangavit Ernerup aqqani kuisissimanerit pissutigalugu qanoq periartariaqarpit? (b) Illit kristumiuugavit Jiisusip aqqani kuisissimasoq, suna pisussaaffigaajuk?

 ¹² Ernerup aqqani kuisissimagaluarlutit ajortulioqqajaasarnerit qularnanngitsumik eqqummaariffigaat. Tamatuminngali eqqumaffiginninnerit ulluinnarni inuuninni iluaqutigisinnaavat. Assersuutigalugu arlaannit ajuallatsinneqaraangavit, taava eqqaamasarpiuk ilissi marluullusi ajortiliususi? Tamassi Guutimit isumakkeerfigineqarnissarsi pisariaqartipparsi, aamma tamassi isumakkeerfiginnittuusariaqarpusi. (Markusi 11:25) Isumakkeerfiginninnerup pingaaruteqassusia erseqqissarniarlugu Jiisusi inussiaq naalakkaminit talentinik 10.000-inik (denarinik 60 millioninik) akiitsoqarfigisaminit isumakkeerfigineqartoq pillugu assersuusiorpoq. Kingusinnerusukkut inussiap taassuma inussiaqatini denarinik 100-nik imminut akiitsulik isumakkeerfigiumanngilaa. Jiisusi ima isummerpoq: Qatanngumminik isumakkeerfiginnikkumanngitsoq Jehovap isumakkeerfiginavianngilaa. (Matthæusi 18:23-35) Aap, Ernerup aqqani kuisissimanermut ilaavoq Jiisusip oqartussaaneranik akuerinninneq taassumalu maligassiaanik ajoqersuutaanillu, ilaatigut allat isumakkeerfiginissaannut piumassuseqarneq pillugu ajoqersuutaanik, malinninniarsarineq. — 1 Petrusi 2:21; 1 Johannesi 2:6.

¹³ Illit naammalluinnanngitsuugavit Jiisusi tamakkiisumik ilaarsinnaanngilat. Uummatikkulli iluunngarlutit Guutimut tunniulluinnarsimanerit pissutigalugu sapinngisat tamaat Jiisusi ilaarusuppat. Taamaaliussaguit inuttut pissusitoqqavit peernissaa inuttullu pissutsip nutaap atinissaa sulissutigiuartariaqarpat. (Atuakkit Efesosimiut 4:20-24). Inuup ikinngutini ataqqisani nuannersunik pissusilik amerlanertigut ilinniarfigiumasarpaa ilaarusuttarlugulu. Taamatuttaaq illit qularnanngitsumik Kristusip ilinniarfiginissaa taassumalu ilaarnissaa kissaatigaat.

14. Qanoq ilillutit ersersissinnaaviuk Jiisusip qilammi kunngisut oqartussaanera akueralugu?

¹⁴ Ernerup aqqani kuisinnerup isumaanik paasinnissimanerit aamma allatut ersersissinnaavat. Guutip Jiisusip “isigaasa ataannut pisippai suusut tamaasa, taamalu sunut tamanut niaquusoq ilagiinnuttaaq niaquulersippaa”. (Efesosimiut 1:22) Taamaattumik Jiisusip Jehovamut tunniulluinnarsimasunik siulersueriaasia ataqqisariaqarpat. Kristusip inuit naammalluinnanngitsut ilagiinniittut, pingaartumik angutit anersaakkut utoqqaanerusut, utoqqaanertat toqqakkat, atortarpai. Angutit taakku toqqagaapput “illernartut piukkunnarsarumallugit . . . Kristusip timaa ineriartortinneqassammat”. (Efesosimiut 4:11, 12) Inuillu naammalluinnanngitsut kukkugaangata Jiisusi naalagaaffimmi qilammiittumi kunngiugami piffissarititamini namminerlu periaatsini atorlugu tamatuminnga isumaginnissinnaavoq. Illit tamanna upperaajuk?

15. Kuisikkuit suut qilanaarisinnaavigit?

¹⁵ Immaqali illit suli Jehovamut tunniulluinnarsimanallu kuisissimanngilatit. Taamaappat sammeriikkavut eqqarsaatigalugit Ernermik akuerinninnerup silatusaarnerussusia qujamasunnermullu ersiutaanera takusinnaaviuk? Ernerup aqqani kuisikkuit pilluaqquneqangaassaatit. — Atuakkit Johannesi 10:9-11.

Anersaap illernartup aqqani

16, 17. Anersaap illernartup aqqani kuisissimanermut suna ilaava?

¹⁶ Anersaap illernartup aqqani kuisinneq qanoq paasisariaqarpa? Soorlu eqqaaneqareersoq, piinsip ulluani Petrusimut tusarnaartut anersaaq illernartoq pillugu ilisimasaqarput. Allaat Guutip anersaaminik illernartumik suli atuineranut uppernarsaatit namminneq isiminnik takusimavaat. Petrusi ‘anersaamik illernartumik ilumioqangaalersut allamiullu oqaasii atorlugit oqalulersut’ ilagaat. (Apustilit Suliaat 2:4, 8) Oqaatsimi  “aqqani”-mi tamatiguunngitsoq pineqartarpoq inuup aqqa. Oqartoqaraangat “inatsisit aqqanni” inuk eqqarsaatigineqarneq ajorpoq. Inatsisit tunngavigalugit oqartussaaneq eqqarsaatigineqartarpoq. Anersaap illernartup aqqani kuisittut akuerisarpaat anersaaq illernartoq inuunngitsoq, tassaasorli Jehovap nukinga sulisoq. Aamma anersaap illernartup Guutip siunertaata naammassineqariartuaarnerani sulinera akuerisarpaat.

¹⁷ Biibilimik atuaqqissaarnikkut anersaaq illernartoq pillugu ilisimasaqalersimavutit. Assersuutigalugu paasisimavat Biibili anersaap illernartup isumassarsisitsineratigut allanneqarsimasoq. (2 Timotheusi 3:16) Anersaakkut siumukartillutit qularutiginnginnerujartuinnarunarpat “Ataatap qilammiittup imminut qinusut”, aamma illit, ‘anersaamik illernartumik tunisaraasi’. (Lukasi 11:13) Anersaap illernartup inuuninni sunniuteqarnera qularnanngitsumik misigisimassavat. Anersaap illernartup aqqani suli kuisissimanngikkuit, qilanaarisinnaavat Jiisusip Ataatap anersaaminik illernartumik tunisiumaarneranik neriorsuutaa naapertorlugu pilluaqqussutisiarpassuaqarnissat.

18. Anersaap illernartup aqqani kuisittut pilluaqqussutit suut nuannaarutigisinnaavaat?

¹⁸ Erseqqippoq Jehovap ilagiit kristumiut anersaani iluaqutigalugu siulersorai. Anersaaq taanna aamma tamatta immikkut ulluinnarni sammisassatsinnut tunngatillugu iluaqutigisarparput. Anersaap illernartup aqqani kuisissimanitsinnut ilaapput tamatuma inuunitsinni sulineranik akuerinninnerput anersaamillu tamatuminnga qujamasulluta suleqatiginninnerput. Ilaasali immaqa isumaliutigisarpaat Jehovamut tunniulluinnarneq qanoq ililluni eqqortinneqarsinnaanersoq, tamatumunngalu tunngatillugu anersaaq illernartoq qanoq pingaaruteqarnersoq. Allaaserisami tulliuttumi tamanna sammissavarput.

[Quppernerup ataani ilanngussat]

Eqqaamavigit?

• Ataatap aqqani kuisissimanermut suna ilaava?

• Ernerup aqqani kuisinneq qanoq paasisariaqarpa?

• Qanoq ilillutit ersersissinnaaviuk Ataatap Ernerullu aqqini kuisinnerup isumaa paasisimallugu?

• Anersaap illernartup aqqani kuisinneq qanoq paasisariaqarpa?

[Atuaqqissaarnermi apeqqutit]

[Qupp. 14-mi assiliartaq]

Ukiumi 33-mi piinsip ulluata kingorna ajoqersuganngorlaat Ataatamut qanoq attaveqalerpat?

[Suminngaanneernera]

Israeli pillugu katersugaasiviup Jerusalemimiittup akuersineratigut