Guuti-una sulerisoq?

“Sooq taama ungasitsigaat, [Jehova]? * Sooq isertorpit ulluni annikilliorfiusuni?” — TUSSIAAT 10:1.

NUTAARSIASSAT qulequtaat qiviatsiaannarlugit “ulluni annikilliorfiusuni” inuunerput qularunnaarnartarpoq. Namminerlu alianartumik nalaataqaraangatta — pinerluttuliorfigineqaraangatta, ajoquserujussuaraangatta asasatsinnilluunniit toqukkut annaasaqaraangatta — immaqa ima aperisarpugut: Guutip takuaa? Soqutigaa? Guuti ilumut piua?

Eqqarsaatiginikuuiulli Guutimut tunngatillugu neriuutivut kukkusumik tunngaveqarsinnaasut? Ima assersuusiortoqarsinnaavoq: Takorlooriaruk nukappiarannguup ataatami suliartornera kamaatigalugulu nikallungassutigigaa. Nukappiaqqap angunni maqaasivaa angerlaqqugaluarlugulu. Qimaannarneqartutut misigivoq. Ulloq naallugu ima aperisaqattaarpoq: “Ataata naak-una?”

Meeqqap eqqarsartaasiata kukkunera erseqqippoq. Angutaami sulivoq ilaqutariinniittut tamarmik pisariaqartitaat isumaginiarlugit. Aamma imaassinnaava uagut kukkusumik eqqarsartaaseqartugut ima suaaraangatta: “Guuti naak-una?”

Assersuutigalugu immaqa inuit ilaasa kissaatigaat Guuti eqqartuussutinik naammassinnittartuussasoq, ajortuliortumik ingerlaannaq pillaanissamik pingaarnertut suliassalik. Inuit allat Guuti qilammi juulimaapajaaginnartut isigaat, uagutsinnut soorlu suliffissamik, aappassamik allaalluunniit lottomi eqquinermik tunissuteqartartussatut isigalugu.

Isiginnittaatsit marluk taakku ima isumaqartoqarneranik tunngaveqarput: Guuti ingerlaannaq naapertuilluartumik iliunngippat taassumaluunniit qinnutigisatsinnik tuninngippatigut, taava taanna naalliuutitsinnik pisariaqartitatsinnillu soqutiginnissimanavianngilaq. Taamatulli isumaqarneq kukkulluinnarpoq! Maannakkorpiarmi Jehova Guuti inuppassuit neriuutigisaattorpiaq iliortanngikkaluarluni inuit tamarmik pisariaqartitaannik ulapputiginnippoq.

Guutimi-una sulerisoq? Apeqqut tamanna akissutissarsiumallugu misissortariaqarparput inuiaat oqaluttuarisaanerata aallartinnerani inuit Guutimut attaveqarnerat qanoq ajoquserneqarnersoq; ajoquserneqarnerali iluarsineqarsinnaavoq.

Ajortip sunniutipilui

Takorlooriaruk illu ukiorpassuarni aserfallatsaaliorneqarsimanngitsoq. Qalia nakkaassimavoq, matut qiversartunit katassimapput illulu aserorteriffigineqarsimalluni. Illutsialaasimagaluarpoq, taamaakkunnaarsimavorli. Illup ajoqutai eqqarsaatigalugit iluarsaannissaa imaannaanavianngilaq; piffissarujussuaq atortariaqarpoq.

Taava eqqarsaatigeriaruk ukiut 6000-t missiliorlugit matuma siorna anersaap takussaanngitsup, Saatanip, Adami Evalu Guutimut pikitsitsisimmagit inuiaat qanoq ajoquserneqartut. Tamatuma pinnginnerani inuit aappariit siulliit peqqilluinnartuupput, aamma kinguaamik tamarmik naassaanngitsumik inooqatiginissaannut periarfissaqarput. (1 Mosesi 1:28) Adamili Evalu ajortuliormata inuiaat suli inunngorsimanngitsut aserorteriffigineqarpullusooq.

 Pikitsitsinerup tamatuma kingunipilui suusupageqinagit. Biibilimi ima allassimavoq: ‘Inukkut ataasiinnakkut [Adamikkut] ajorti silarsuarmut tikiuppoq ajortikkullu toqu tikiulluni.’ (Romamiut 5:12) Ajortip toqumik kinguneqarnerata saniatigut aamma Pinngortitsisumut attaveqarnerput ajoquserneqarpoq, aamma timikkut, eqqarsartaatsikkut misigissutsikkullu sunnerneqaatigaarput. Taamaattumik pissutsit atukkavut illumut aserfallassimaqisumut assersuunneqarsinnaapput. Angutip naapertuilluartup Jobip pissutsit atukkavut naatsukullammik oqaatigai oqarami inuk ‘inuunikittartoq eqqissinaatsorsiortaqalunilu’. — Jobi 14:1.

Guutilli inuit Adamip Evallu ajortuliornerata kingorna imminiiginnarpai? Naamerluinnaq! Ataatarput qilammiusoq taamanimiilli maannakkumut inuit iluaqutissaannut suliuarpoq. Maannakkorpiaq uagut pilluta sunersoq paasisinnaanerujumallugu illu aserfallassimasoq iluarsaanniarlugu iliuuserisariaqakkat pingasut iliuuserisariaqakkallu taakku tamarmik Guutip inuiaat annaanniarlugit iliuuserisaanut qanoq assersuunneqarsinnaanersut sammissavavut.

1 Illumik piginnittup illu aserfallassimasoq misissoreeruniuk aalajangertussaavoq illu iluarsaatissanerlugu ingutsissanerluguluunniit.

Edenimi pikitsitsisoqarniariartoq Jehova Guuti nalunaarpoq siunertarigini pissutsit inuiaat atugaasa aaqqinnissaat. Anersaaq takussaanngitsoq pikitsitsisitsisoq ima oqarfigaa: “Akerariissikkumaarpassi illit arnarlu, illit kinguaassatit taassumalu kinguaassai [illit kinguaassat taassumalu kinguaassaa, NV]: Taassuma kinguaassaasa niaqqut aserortissavaat, illilli taassuma kinguaassaa kimmiatigut kiiumaarpat.” — 1 Mosesi 3:15.

Jehova taama oqarluni neriorsuivoq Edenimi pikitsitsisitsisoq piuneerunniarlugu. (Romamiut 16:20; Saqqummersitat 12:9) Aamma Jehovap siulittuutigaa ‘kinguaassaqarumaartoq’ inuiannik ajortimit aniguisitsisussamik. * (1 Johannesi 3:8) Neriorsuutini taakkunani ilumoortoq pingaarutilik una paasinarsisinneqarpoq: Guuti pinngortitaminik piuneerutitsinani iluarsaassiniarpoq. Pissutsilli inuiaat atugaat aaqqinniarlugit piffissarujussuaq atortariaqarpoq.

2 Illuliassanik titartaasartoq titartaassaaq illup iluarsaanneqareeruni qanoq isikkoqarnissaanik ersersitsilluartumik.

Jehovap Guutip Israelikkut inatsisinik naalaffiullu taakkua imminik pallorfiginniffissaata sananeqarnissaanut ilitsersuutinik tunivai. Biibilimi ima allassimavoq: “Tamakku piumaartussap tarraannarai.” (Kolossemiut 2:17) Taakku piumaartussamut takussutissaapput, soorlu illuliassanik titartaasartup titartagai takussutissaannaasartut.

Assersuutigalugu Israelikkut ajortiminnik isumakkeerfigineqaqqullutik uumasunik pilliuteqartarput. (3 Mosesi 17:11) Taamaaliortarneq siumut assersuutaavoq pilliummut anginerusumut ukiut hundredit arlallit qaangiuppata pilliutigineqartussamut — pilliummut inuiannik aniguisitsilluinnartussamut. * Tupermik naapeqatigiittarfimmik naalaffimmillu Israelikkut pallorfiginnittarfiannik  aaqqissuussineq siumut assersuutaapput Missiarsinngortussap iliuuserisassaanut, inuunerminik pilliuteqarneraniit qilaliarnissaanut. — Assit qupperneq 7-imiittut takukkit.

3 Titartakkat malillugit sanaartortartoq iluarsaassisussatut toqqarneqassaaq.

Jiisusi tassaavoq Missiarsi neriorsuutigisaq Israelikkut pilliutaasa siumut assersuunneqarfiannik iliuuseqartussaq, tassa inuunerminik inuiaat utertinneqaatissaattut pilliuteqartussaq. Johannesip Kuisisup taanna ima taavaa: “Guutip savaaraa silarsuup ajortaanik nammattoq.” (Johannesi 1:29) Jiisusip imminut suliassiissutigineqartoq kajumilluni suliaraa. Ima oqarpoq: “[Qilammit] aqqarpunga uanga nammineq piumasara pinnagu aallartitsisimali piumasaa naammassiniarlugu.” — Johannesi 6:38.

Guutip Jiisusimut tunngatillugu piumasaa tassaaginnanngilaq taassuma ‘inuunini akissatut tunniutissagaa amerlasuut utertinneqaatissaattut’, aammali piumasaraa Jiisusi kajumissaarissasoq imminut ajoqersuganngoqqusilluni Guutillu naalagaaffiani naalakkersueqatigeqqulluni. (Matthæusi 20:28; Lukasi 22:29, 30) Naalagaaffik taanna atorlugu Guutip inuiannut siunertani naammassissavaa. Guutip naalagaaffia pillugu tusarliussaq ‘iivangkiiliumik’, imaluunniit ‘nutaarsiassamik nuannersumik’ (NV), taaneqartarpoq, tamatumani tusarliunneqarami Guutip qilammi naalagaaffimmik nunarsuarmut naalakkersuilerumaartumik pilersitsisimanera! — Matthæusi 24:14; Danieli 2:44. *

Iluarsaassineq ingerlaannarpoq

Jiisusip qilaliartinnani ajoqersukkani ima peqquai: “Taamaattumik aallarlusi inuiaqatigiit tamaasa uannut ajoqersuganngortissigit kuillugit Ataatap Ernerullu Anersaallu Illernartup aqqani. . . . Takuallu, ullut tamaasa najorpassi silarsuup naggatissaanut [pissutsit aaqqissuussaanerata naggataatungaanut, NV] allaat.” — Matthæusi 28:19, 20.

Tassa pissutsinik inuiaat atugaannik aaqqissuineq Jiisusi toquppat unissanngilaq. ‘Pissutsit aaqqissuussaanerata naggataatungaata’ — Guutip naalagaaffiata nunarsuarmut aqutsilerfissaata — tungaanut ingerlassaaq. Maanna tamatumunnga piffissanngorsimavoq. Tamanna nalunngilarput Jiisusip ‘pissutsit aaqqissuussaanerata naggataatungaanut (NV)’ nalunaaqutissatut siulittuutigisaasa maanna eqquunnerat erseqqimmat. * — Matthæusi 24:3-14; Lukasi 21:7-11; 2 Timotheusi 3:1-5.

Guutip naalagaaffia pillugu nutaarsiassamik nuannersumik oqaluussinissamik Jiisusip peqqussutaa ullumikkut Jehovap Nalunaajaasuisa nunani 236-niittut maleruarpaat. Aap, atuagassiaq massakkut atuakkat naalagaaffik tamanna tamatumalu sunik naammassisaqarumaarnera pillugit illit ilinniarnerunissannut iluaqutissattut suliaavoq. Napasuliaq Alapernaarsuiffik-ni saqqummersinneqartuni tamani quppernermi 2-mi ima allassimasoqarpoq: “Atuartartut Guutip naalagaaffiata, naalagaaffiup piviusup qilammit naalakkersuisup, qanittukkut ajussutsimik suujunnaarsitsinissaa nunarsuarmillu paratiisinngortitsinissaa pillugu nutaarsiassaq nuannersoq tuppallersaatigisarpaat. Jiisusip Kristusip, uagut naassaanngitsumik inuulersinnaaniassagatta inuunerminik pilliutiginnittup Guutillu naalagaaffiani maanna kunngitut naalakkersuisup, upperfigineqarnissaa atuagassiami matumani kajumissaarutigineqarpoq.”

Ilumoorpoq peqqarniisaarniat saassussineri pinngortitamilu ajunaarnersuit pillugit suli tusagaqartartutit, immaqalu aamma nammineq alianartunik nalaataqartarputit. Biibilili misissornerugukku qularutigiunnaassavat Guutip imminiiginnarsimanngikkaatigut. Allaammi allassimavoq taanna “ilatsinnit kimilluunniit ungasinngikkaluartoq”. (Apustilit Suliaat 17:27) Aamma siuaasatta siulliit Edenimi annaasaata pilerseqqinneqarnissaa pillugu taassuma neriorsuutaa eqquukkumaarpoq. — Esaja 55:11.

[Quppernerup ataani ilanngussat]

 [Qupp. 7-mi nalunaarsukkat/​assiliartat]

(Allassimasut qanoq inissisimanersut naqitami takuneqarsinnaavoq)

“Piviusup assilinerinnaa” — tupeq naapeqatigiittarfik sumut assersuutaasoq

PILLIIVIK

Jiisusip pilliutaanik Guutip kajumilluni akuerinninnera. — HEBRÆERIT 13:10-12.

PALASIUNEQ

Jiisusi. — HEBRÆERIT 9:11.

1 Palasiuneq ullormi saammaannartitsivimmi inuit ajortaat pillugit pilliisarpoq. — 3 MOSESI 16:15, 29-31.

1 Ukiumi 33-mi nisanip 14-ianni Jiisusip uagut iluaqutissatsinnut inuunini pilliutigaa. — HEBRÆERIT 10:5-10; 1 JOHANNESI 2:1, 2.

ILLERNARTOQ

Jiisusip qilammi inuunissamik neriuuteqarluni Guutimit anersaakkut kinguaassiarititaanera. — MATTHÆUSI 3:16, 17; ROMAMIUT 8:14-17; HEBRÆERIT 5:4-6.

SAAGORSUAQ

Jiisusip timaa, nunarsuarmi inuunerup qilammilu inuunerup akornanni ‘assiaqut’. — 1 KORINTHIMIUT 15:44, 50; HEBRÆERIT 6:19, 20; 10:19, 20.

2 Palasiuneq saagorsuup, Illernartuutip Illernarnerpaamut assiaqutaata, iluatungaanut isertarpoq.

2 Jiisusi toqusunit makititaagami qilaliarluni ‘saagorsuup iluatungaanut iserpoq’ “Guutip kiinaata saanut sassarumalluni iluaqutissatsinnik”. — HEBRÆERIT 9:24-28.

ILLERNARNERPAAQ

Qilak. — HEBRÆERIT 9:24.

3 Palasiuneq Illernarnerpaamut iseraangami pilliutit aavata ilaa angerutsip illerfiata saavani serpartaatigisarpaa. — 3 MOSESI 16:12-14.

3 Jiisusip aammi kuisap nalingata sassaanneratigut ajortitsinnut saammaannartitsilluinnartumik pilersitsivoq. — HEBRÆERIT 9:12, 24; 1 PETRUSI 3:21, 22.