Silarsuup naggatissaa pillugu apeqqutit sisamat akissutaat

ILAANNI Jiisusip Kristusip ‘silarsuup naggatissaa’ siulittuutigaa. Piffissaq tamanna pillugu ima oqarpoq: “[Taamaannerani] naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.” — Matthæusi 24:14, 21.

Jiisusip naggatissaq pillugu oqaasii, Biibilimilu allassimaffinni allani pineqartumut tamatumunnga tunngasut, pingaarutilinnik arlalinnik apeqqutissaqalersitsipput. Kajumissaarusuppatsigit illit Biibilinni apeqqutit taakkua akissutaat atuaqqullugit.

1 Suup naggatissaa?

Biibilimi ajoqersuutigineqanngilaq nunarsuaq aserussasoq. Tussiaasiortup Guuti ima erinarsorfigaa: “Nuna aalajaatsumik tunngavilerakku naassaanngitsumik patajaallisillugu.” (Tussiaat 104:5) Aamma Biibilimi ajoqersuutigineqanngilaq silarsuup ikuallanneratigut uumassuseerutivissasoq. (Esaja 45:18) Jiisusip paasinarsisippaa inoqarumaartoq naggatissami aniguisussanik. (Matthæusi 24:21, 22) Taavami Biibili naapertorlugu suunuku naggatissaqartut?

Inuit iluatsinngitsumik naalakkersuinerisa naggatissaat. Guutimit isumassarsisinneqarluni pruffiiti Danieli ima allappoq: “Qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.” — Danieli 2:44.

Sorsunnerit mingutsitsinerullu naggatissaat. Guuti qanoq iliorumaarnersoq pillugu Tussiaat 46:10-mi ima allassimavoq: “Nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.” Aamma Biibilimi ajoqersuutigineqarpoq Guutip ‘aserussagai nunarsuarmik aseruisut’. — Saqqummersitat 11:18.

Pinerluttuliornerit naapertuilluanngitsuliornerillu naggatissaat. Guuti ima neriorsuivoq: “[Peqqusersuitsut] nunami najugaqassapput, assuarnaatsut kisimik tassaniilissapput. Kisianni iluanngitsut nunamit piiagaassapput tunussisullu tassannga aallarunneqarlutik.” — Ussatit 2:21, 22.

 2 Naggatissaq qaqugu nalliutissava?

Jehova Guuti ajussutsimik atuukkunnaarsitsinissaminut naalagaaffimminillu atuutititsilerfissaminut piffissamik aalajangiisimavoq. (Markusi 13:33) Biibilimili ersersinneqarluarpoq naggatissaq qaqugorpiaq nalliutissanersoq naatsorsorsinnaanngikkipput. Jiisusi ima oqarpoq: “[Ulloq] taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi.” (Matthæusi 24:36) Jiisusilli taassumalu ajoqersugaasa siulittuutigaat Guutip naggatissamik nalliutititsinngitsiarnerani nunarsuarmi pissutsit qanoq ikkumaartut. Tulliullugit eqqartorneqartut tamarmik nunarsuaq tamakkerlugu ataatsikkut pippata naggatissaq qanillisimassaaq.

Politikkikkut, avatangiisitigut innuttaaqatigiinnikkullu aatsaat taama allanngornersuaqartigissaaq. Naggatissaq pillugu ajoqersukkami apeqqutaat Jiisusip ima akivaa: “[Inuiaat] pikitsitsiumaarput inuiannut naalagaaffillu naalagaaffimmut, tamanilu tamaani nuna sajuttarumaarpoq kaannersuaqartarumaarlunilu. Tamakku nallisitsinernut aallaqqaataapput.” (Markusi 13:8) Aamma apustili Paulusi ima allappoq: “[Ilisimassavat] ullussani kingullerni nalliukkumaarmata ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut, usorsitsaartut, anneruniartut, asissuingaartut, angajoqqaaminnut naalanngitsut, qujasuitsut, mitalliisut, asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, killuussisut, puffajasut, makitaniartut, inuulluarniutit Guutimit pingaarnerutillugit.” — 2 Timotheusi 3:1-5.

Silarsuaq tamakkerlugu inuiaat assingiinngitsorpassuit oqaasii atorlugit oqaluussineq immikkut suliniutigineqassaaq. Jiisusi ima oqarpoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” — Matthæusi 24:14.

3 Naggatissap kingorna susoqassava?

Biibilimi allassimasoqanngilaq inuit ajunngitsut tamarmik nunamiikkunnarsitaallutik qilammi naassaanngitsumik inuussasut. Jiisusilli ilinniartitsissutigaa Guutip aallaqqaammut inunnut siunertani naammassissagaa. Ima oqarpoq: “Pilluarput qanilaartut, taakkuami nunarsuaq kingornutissavaat.” (Matthæusi 5:5; 6:9, 10) Biibilimi neriorsuutigineqarpoq naggatissap nalliutinnginnerani toqusut siunissami makititaassasut. (Johannesi 5:28, 29) Naggatissap kingorna susoqassava?

Jiisusi Guutip naalagaaffiani kunngitut qilammiit naalakkersuiumaarpoq. Pruffiiti Danieli ima allappoq: “Kingumut takusaqarpunga unnuami takorluuinikkut: Takuara qilaap nuiaasigut tikiuttoq inuup erneratut isikkoqartoq [Jiisusi makititaasimasoq]. Taassuma ittuinnartoq [Jehova Guuti] ornippaa taassumunngalu sassartitaalluni. Naalagaassusermik naalannaammillu kunngiussusermillu [Jiisusi] tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat. Naalagaassusia naalagaassusiuvoq soraajuitsuusussaq, kunngeqarfialu suujunnaassanngilaq.” — Danieli 7:13, 14; Lukasi 1:31, 32; Johannesi 3:13-16.

Guutip naalagaaffiani innuttaasut peqqilluinnartuullutik ataavartumillu toqqissisimallutik naassaanngitsumik inuussapput. Pruffiiti Esaja ima allappoq: “Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. Illuliaat allanit inigineqassanngillat ikkussugaalluunniit allanit nerineqassanatik.” (Esaja 65:21-23) Taamanikkussaq pillugu apustili Johannesi ima allappoq: “Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” — Saqqummersitat 21:3, 4.

 4 Naggatissamit aniguiumallutit qanoq iliortariaqarpit?

Apustili Petrusi allappoq naggatissap nalaani inuusut ilaasa Guutip inunnut tunngasunut qaqugumulluunniit akuliukkumaarnera nunarsuarmilu ajussuseerutsitsiumaarnera mitaatigissagaat. (2 Petrusi 3:3, 4) Taamaattoq Petrusi ilungersorluni kajumissaarivoq nalitsinni inuusut tamaasa iliuuseqaqqullugit.

Oqaluttuarisaaneq ilinniarfigiuk. Petrusi allappoq Guutip “silarsuatoqaq [asattuutinngikkaa], taamani ulersuaq iluaatsut silarsuaannut nalliutitikkamiuk Noa iluarnermik nalunaariartortitaq allallu arfineq-marluk kisiisa asattuullugit”. (2 Petrusi 2:5) Mitallersut pillugit Petrusi ima allappoq: “Inuit taama oqaluttut arajutsisimavaat itsarsuarmiilli qilaqartoq nunaqarlunilu Guutip oqaasiagut imermit imikkullu pinngortumik, taamaattumillu silarsuaq taamanernisaq imermit qarsunneqarluni piujunnaarpoq. Qilaalli nunalu * maannakkut ittut oqaaseq taannarpiaq  tunngavigalugu atatinneqarput utaqqisitaallutillu ullormi eqqartuussivissami iluaatsut nungutitaanissaanni ikuallagaanissaminnut.” — 2 Petrusi 3:5-7.

Guutip ileqqussatigut najoqqutassiai maleruakkit. Petrusi allappoq naggatissami aniguiumasut “iluartumik ileqqoqarnermut Guutimullu tunniusimanermut naapertuuttunik” iliuuseqartariaqartut. (2 Petrusi 3:11, NV) Maluginiaruk Petrusip ‘iliuuseqarneq’ aamma ‘iluartumik ileqqoqarneq’ eqqaagai. Tassa uppertuunerarneq piffissarluunniit kingullerpaaq atorlugu Guutimut ajunngitsumik attaveqalerniarneq naammanngilaq.

Guutip iliuutsit ileqqullu suut iluarai? Soormi Biibilimi ajoqersuutigineqartut nalunngeriikkannut naleqqiukkukkit? Jehovap Nalunaajaasuisa ikiorusuppaatsit. Qinnuigikkit akissutitik illit nammineq Biibilit atorlugu tunngavilersussagaat. Taamaalioruit siunissaq isumalluarfigilersinnaavat, naak avatangiisitsinni pissutsit isumalluarnanngikkaluartut.

[Quppernerup ataani ilanngussaq]

[Qupp. 7-mi issuagaq]

Nunarsuaq aserussanngilaq, tamatuminngali aseruisut piuneerussaassapput