Jehovap pilluaqqusinera ilungersorlutit ujartoruk

‘Guutip ujarlersini akissarsisittarpai.’ — HEBRÆERIT 11:6.

1, 2. (a) Inuppassuit Guutimit pilluaqquneqarumallutik qanoq iliortarpat? (b) Sooq Jehovamit pilluaqquneqarnissaq soqutigingaartariaqarparput?

NUNANI tuluttut oqaluffiusuni nalinginnaavoq tangajortoqaraangat ima oqartarneq: “God bless you” (Guutip pilluaqqulisit). Upperisarsioqatigiinni assigiinngitsuni palasit inunnik, uumasunik, pigisanillu pilluaqqusisarput. Inuit iluartuutitaliartarput neriullutik illernartuummi pilluaqquneqassallutik. Aamma politikkerit nunartik Guutimit pilluaqqoqqullugu qinusarput. Isumaqarpit pilluaqquneqarnissamik qinnutit taakku naleqquttuusut? Akineqartarpat? Kikkut Guutimit pilluaqquneqartarpat, aamma sooq?

² Jehovap siulittuutigaa ullussani kingullerni inuiaqatigiinnit tamaneersunit minguitsunik eqqisseqatigiittunillu innuttaqarumaarluni uumissorneqaraluarlutik akerlilersorneqaraluarlutillu nunarsuaq tamakkerlugu Guutip naalagaaffia pillugu nutaarsiassamik nuannersumik oqaluussissutiginnittunik. (Esaja 2:2-4; Matthæusi 24:14; Saqqummersitat 7:9, 14) Allaatiginninnermik isumassarsiarititaasumik tamatuminnga malinnikkusulluta aalajangersimasugut kissaatigaarput — aamma pisariaqartipparput — Guutip pilluaqqusinera, pilluaqquneqanngikkuttami suliassiissutigineqartoq suliarisinnaanavianngilarput. (Tussiaat 127:1) Qanorli Guutimit pilluaqquneqarsinnaavugut?

Pilluaqqussutit Guutimut naalattunut ‘anngukkumaartut’

3. Israelikkut naalappata qanoq kinguneqassava?

³ Atuakkit Ussatit 10:6, 7. Israelikkut nunamut neriorsuutigisamut apuutinngitsiarneranni Jehovap oqarfigai naalappanni pigissaalerumaartut sernissorneqarumaartullu. (5 Mosesi 28:1, 2) Jehovap pilluaqqusineri innuttaanut “nalliukkumaarput anngukkumaarlutillu”. Aap, Jehovamut naalattut qularutiginngilluinnarsinnaavaat taassumannga pilluaqquneqarumaarlutik.

4. Guutimut ilumoorluni naalanneq qanoq paasisariaqarpa?

⁴ Israelikkut qanoq naalattariaqarpat? Mosesip inatsisaani allassimavoq Guutip innuttami ‘nuannaarlutik uummatikkullu iluunngarlutik’ kiffartorfiginngippanni iluarinavianngikkai. (Atuakkit 5 Mosesi 28:45-47). Jehova naalanneqartariaqarpoq, uumasulli anersaapiluillu naalakkiummut naalattarnerattut naalanneq naammanngilaq. (Markusi 1:27; Jaaku 3:3) Guutimut ilumoorluni naalanneq asanninnermik aallaaveqarpoq. Jehovap inassutaasa artornartuunnginnerat Jehovallu ‘ujarlersiminik akissarsisitsisarnera’ upperigatsigit nuannaarluta kiffartorsinnaavugut. Nuannaarnermullu tamatumunnga ilumoorluni naalanneq ilisarnaataavoq. — Hebræerit 11:6; 1 Johannesi 5:3.

5. Israelikkut Jehovap neriorsuutaanik upperinninneq qanoq iluaqutigisinnaavaat inassummut Mosesimik allakkat tallimaanni 15:7, 8-miittumut naalannissaminnut?

⁵ Eqqarsaatigeriaruk Mosesimik allakkat tallimaanni 15:7, 8-mi inassut maleruarneqaraangat qanoq taamatut tatiginnilluni naalanneq ersersinneqartarsinnaasoq. (Atuagassat). Inassut tamanna piumanani naalanneqarpat piitsut atugarisaarnissaannik kinguneqarsinnaagaluarpoq, Guutilli innuttaasa akornanni ikinngutigiinneq asaqatigiinnerlu siuarsarneqassappat? Pingaarnerusorli, piumanani naalanneq Jehovap kiffaminik isumaginnissinnaassusianik upperinninnermut aamma tukkornerata ilaarsinnaanissaanut qujamasunnermut ersiutaassava? Taamaassinnaanngilaq. Guutip kajumilluni tunisisup uummataata pissusia maluginiarpaa, neriorsorpaalu suliaani tamani pissarsineranilu tamani pilluaqquniarlugu. (5 Mosesi 15:10) Neriorsuummut tamatumunnga uppernerminik suliamigut ersersitsisoq pilluaqquneqangaarumaarpoq. — Ussatit 28:20, NV.

6. Hebræerit 11:6-imi qanoq neriorsoqqissaarneqarpugut?

 ⁶ Jehovamik akissarsisitsisartutut upperinninnerup saniatigut iliuuseq alla Guutimit pilluaqquneqarumalluni pisariaqartoq Hebræerit 11:6-imi eqqartorneqarpoq. Allassimavoq Jehovap ‘ujarlersini akissarsisissagai’. Grækerit oqaasianni matumani ‘ujarlersini’-mik nutserneqartumi ilungersorneq aallussinerlu pineqarput. Qularutiginngilluinnarsinnaavarput taamatut ujaasineq Jehovap pilluaqqujumaaraa. Pilluaqqusisormi tassaammat Guuti ilumoortutuaq ‘sallusuitsoq’. (Titusi 1:2) Guutip ukiuni tusindilinni neriorsuutimi tutsuiginarluinnartuunerat uppernarsarpaa. Aap, oqaasia eqquuttuaannarpoq. (Esaja 55:11) Ilumoorluta uppernerput ersersikkutsigu tatigilluinnarsinnaavarput akisarsisikkumaaraatigut.

7. Qanoq Aaperaap ‘kinguaassaagut’ pilluaqquneqarsinnaavugut?

⁷ Paasinarsivoq Aaperaap ‘kinguaassaata’ Jiisusi Kristusi pingaarnerusortarigaa. Kristumiut tanitat tassaapput ‘kinguaassap’ siulittuutigineqartup pingaannginnerusortai. Taakku ‘taartumit Guutip qaamasuanut tupinnaqisumut nuunneqartut qaaqqusisup pissaaneranik nalunaajaaqquneqarput’. (Galatiamiut 3:7-9, 14, 16, 26-29; 1 Petrusi 2:9) Jiisusip pigisaminut tamanut paarsisunngortitai sumiginnarutsigit Jehovamut attaveqarluarsinnaanngilagut. ‘Inussiamit aalajaallunilu silatuumit’ (NV) ikiorneqanngikkutta Guutip oqaasiani atuakkatsinnik tamakkiisumik paasinnissinnaanngilagut, nalussavarpullu qanoq ililluta inuunitsinni maleruarsinnaanerivut. (Matthæusi 24:45-47) Biibilimik ilikkakkavut malillugit inuugutta Guutimit pilluaqquneqarumaarpugut.

Guutip piumasaa pingaartittuaruk

8, 9. Ataataanerpaaq Jaaku Guutip neriorsuutaanut tunngatillugu qanoq ilungersorluni iliuuseqarpa?

⁸ Guutimit pilluaqquneqarumalluni ilungersortariaqarneq eqqarsaatigigaanni immaqa ataataanerpaaq Jaaku eqqaassavarput. Jaakup naluaa Jehovap Aaperaamut neriorsuutaa qanoq eqquukkumaarnersoq, upperaali aatami kinguaavi Jehovap amerlisingaarumaarai inuiassuanngorumaartullu. Ukiumi 1781-imi Kr.in.si. Jaaku Karanimut nuliassarsiorniarluni aallarpoq. Kissaatigiinnanngilaa inooqatissaalluartumik nassaarnissani; kissaatigaali arnamik anersaakkut ittunik pingaartitsisumik Jehovamullu pallorfiginnittumik meerassaminullu anaanaalluartussamik nassaarnissani.

⁹ Nalunngilarput Jaakup illortaani Rakeli naapikkaa asannilersoorfigalugulu. Rakeli nuliataariumallugu taassuma ataataa, Labani, ukiuni arfineq-marlunni sullikkumallugu akuersivoq. Tamannali tassaaginnanngilaq asanninnilersaarummik oqaluttuaq killitsinartoq. Jaakup Guutip ajugaqanngitsup Aperaamut Iisaamullu, Jaakup aataavanut ataataanullu, neriorsuutaa nalunngilluinnarpaa. (1 Mosesi 18:18; 22:17, 18; 26:3-5, 24, 25) Iisaap ernini Jaaku ima oqarfigisimavaa: “Guutip Ajugaqanngitsup pilluaqqulisit amerlaqisunik kinguaaqartillutit inuiaqatigiissorpassuanngortillutit. Aaperaamut pilluaqqussutigisaminik illit kinguaassatillu tunigilisi nuna takornartaaffiit Guutip Aaperaamut tunniussaa kingornussareqqullugu.” (1 Mosesi 28:3, 4) Jaaku nuliartaarluarnissani meeraqalernissanilu ilungersuutigigamigit Jehovap oqaasiinut tatiginninnerminik ersersitsivoq.

10. Sooq Jehovap Jaaku pilluaqqorusuppaa?

¹⁰ Jaakup ilaquttaminik pilersuiniarluni pisuunngorniarnissani noqqaassutiginngilaa. Namminerli kinguaassani pillugit Jehovap neriorsuutaa pingaartingaarpaa. Aap, Jehovap piumasaata naammasineqarnissaa soqutigingaarpaa. Ajornartorsiuteqaraluarluni Jaakup Guutimit pilluaqquneqarumalluni sapinngisani tamaat iliuuseqarnissani aalajangiusimavaa. Inuuninilu tamaat taamatut isiginnittaaseqarlunilu iliuuseqarmat Jehovap pilluaqquaa. — Atuakkit 1 Mosesi 32:25-30.

11. Guutip piumasaa saqqummersitaq naapertorlugu qanoq ilungersorluta iliuuseqartariaqarpugut?

¹¹ Uaguttaaq Jaakutut Jehovap siunertaata qanoq naammasineqarnissaa sukumiisumik ilisimanngilarput. Guutilli oqaasiata atuaqqissaarneratigut ‘Jehovap ullussaani’ qanoq pisoqarumaarnerata ilaanik paasisaqarsinnaavugut. (2 Petrusi 3:10, 17) Assersuutigalugu ulloq taanna qaqugorpiaq takkutissanersoq naluarput, nalunngilarpulli qanillisoq. Upperaarput piffissaqarallartilluta peqqissaartumik nalunaajaanitsigut immitsinnut annatsissinnaasugut tusartivullu annatsillugit, soorlu Guutip oqaasiani allassimasoq. — 1 Timotheusi 4:16.

12. Suna qularutiginngilluinnarsinnaavarput?

¹² Nalunngilarput naggatissaq nalliuteriaannaasoq; Jehovap inunnut ataasiakkaanut tamanut  oqaluussinissarput utaqqisariaqanngilaa. (Matthæusi 10:23) Sunniuteqarluartumilli oqaluussisinnaanissamik ilitsersuunneqarluarpugut. Upperluta suliamut tamatumunnga sapinngisarput tamaat peqataavugut iluaqutigisinnaasavut tamaasa atortarlugit. Oqaluussiffigisartakkatsinni tusarliussatsinnut inuppassuit ajunngitsumik periassappat? Tamanna naluarput. (Atuakkit Oqaluussisartup oqaasii 11:5, 6). Suliassarput tassaavoq oqaluussineq, qularinngilarpullu Jehovap pilluaqqujumaaraatigut. (1 Korinthimiut 3:6, 7) Qularutiginngilluinnarsinnaavarput eqiasuilluta iliuuserisavut maluginiarumaarai anersaanilu illernartoq aqqutigalugu pisariaqartitarpiatsinnik siunnersorumaaraatigut. — Tussiaat 32:8.

Anersaamit illernartumit ikiorneqarnissat ujartoruk

13, 14. Sumit erserpa Guutip anersaavata taassuma kiffai aalajaangersimasunik suliaqarnissamut piginnaanngortissimagai?

¹³ Taavami suliassamut aalajaangersimasumut oqaluussinissamulluunniit piukkunnaateqanngitsutut misigigutta? Jehova qinnuigisariaqarparput anersaaminik illernartumik tuneqqulluta pisinnaasarput sunaluunniit taassumunnga kiffartuussinitsinni atorluarnerusinnaaqqullugu. (Atuaruk Lukasi 11:13). Guutip anersaavata inuit — qanoq atugaqaraluarpata qanorluunniillu misilittagaqaraluarpata — piginnaanngortissinnaavai suliassaq suliarisinnaaqqullugu kiffartornermilluunniit immikkut pisinaatitaaffimmik isumaginnissinnaalersillugit. Assersuutigalugu Egyptenimit aniguisitaanerup kinguninngua Guutip anersaavata nersutaatinik paarsisut inussiaasimasullu, sorsunnissamut misilittagaqarsimanngitsut, akeqqaminnik ajugaaffiginnissinnaanngortippai. (2 Mosesi 17:8-13) Tamatuma kingorna anersaap tamatuma Besal’eli Oholiabilu Jehovap ilitsersuutai naapertoqqissaarlugit tupermik naapeqatigiittarfimmik assissaqanngitsumik sananissamut piginnaanngortippai. — 2 Mosesi 31:2-6; 35:30-35.

¹⁴ Nalitsinni Guutip kiffaasa peqatigiiffiup pisariaqartitaanik isumaginninniarlutik naqiterivimmik aallartitsiniarneranni anersaaq sunniisinnaassusilik tamanna iluaqutigaat. Qatanngut R. J. Martin, taamani naqiterivimmi nakutilliisuusoq, piffissami tamatumani 1927-p tungaanut naammassineqarsimasut pillugit ima allappoq: “Piffissaq eqqorlugu Naalakkap ‘matu ammarpaa’, maskiinalu naqiterussuaq — nalugaluarlutigu qanoq sananeqarsimanersoq qanorlu atorneqassanersoq — pigilerparput. Naalakkalli nalunngilaa imminut sapinngisartik tamaat iliuuseqarusuttunut isumaannik qarasaannillu piginnaanngortitsinissaq. . . . Sapaatit akunnialuinnannguillu ingerlanneranni maskiina taanna nipiliortilerparput, sulilu nipiliorpoq maskiinaliorsimasullu takorloorsimanngisaannagaanik suliamik naammassisaqartarluni.” Jehovallu suli ilungersornerit taamatut pilluaqqusarpai.

15. Romamiut 8:11 ussernartorsiortinneqartunut qanoq qiimmassaataasinnaava?

¹⁵ Jehovap anersaava assigiinngitsorpassuartigut sunniuteqartarpoq. Jehovap kiffaasa tamarmik anersaaq illernartoq pisinnaavaat akornutissallu annerpaat anigornissaannut iluaqutigisinnaallugu. Taavami ussernartorsiortinneqartilluta sapilersutut misigigutta? Paulusip oqaasii Romamiut 7:21, 25-mi aamma 8:11-miittut nakussatsissutigisinnaavavut. Aap, ‘Jiisusimit toqusunit makititsisup Anersaava’ iluaqutigisinnaavarput uinngullu pilerigisaanik ajugaaffiginnisinnaanngorluta. Oqaatsit taakku kristumiunut tanitanut allanneqarput, Guutilli kiffaanut tamanut atuupput. Tamatta Kristusimut uppernikkut, kissaatipiluit ilungersorluta akiornerisigut aamma anersaap siulersuinerata malinneratigut inuulersinnaavugut naassaanngitsumik.

16. Guutip anersaava piumallugu qanoq iliortariaqarpugut?

¹⁶ Naatsorsuutigisinnaavarput iliuuseqanngikkaluarluta Guutip nukiminik sulisumik tunissagaatigut? Naamik. Guutip anersaava qinnutigiitigalugu  Guutip oqaasianik isumassarsiarititaasumik eqiasuilluta atuartariaqarpugut. (Ussatit 2:1-6) Aammattaaq Guutip anersaavata ilagiit kristumiut najorpai. Ataatsimiigiartuartarnitsigut ersersittarparput “Anersaap ilagiinnut oqaaserisai” tusarusullutigit. (Saqqummersitat 3:6) Ilinniakkavullu maniguulluta maleruartariaqarpavut. Ussatit 1:23-mi ima siunnersorneqarpugut: “Ilitsersuigaangama maleruuffigiinnartarniarsinga, taava anersaara ilissinnut kuutsikkumaarpara.” Aap, Guutip anersaani illernartoq “naalatsiminut” tunniuttarpaa. — Apustilit Suliaat 5:32.

17. Guutip ilungersornitsinnut pilluaqqusinera sumut assersuussinnaavarput?

¹⁷ Guutimit pilluaqquneqarumalluta ilungersorluta iliuuseqartariaqaraluarluta eqqaamasariaqarparput eqiasuilluta iliuuseqarnerput Jehovap innuttaminut ajunngitsorpassuarnik tunisisarneranut pissutaaginnanngitsoq. Tamanna nerisassanik nerinermut assersuunneqarsinnaavoq. Nerigaangatta timitta iluani susoqarpiartarnersoq naluarput. Nalunngiinnarparpulli nerisariaqarluta, aamma nalunngilarput peqqinnartutorniarluta aalajangerutta pitsaanerusumik kinguneqassasoq. Kisiannili Guuti nerisassaqartitsisuuvoq, aamma Guutip ima pinngortissimavaatigut nerisassanik mamarsaatiginnissinnaaqqulluta. Timerpullu ima pinngortissimavaa nerisassat timitta iluani arroraangamik nukissaqalersitsisartut. Tamatumunnga assingusumik Jehova inuunissap naassaanngitsup angusinnaanissaanut piumasaqaatinik aalajangiisuuvoq, piumasaqaatimilu eqqortinniarnerini pisariaqartitatsinnik tunisarpaatigut. Erseqqippoq Jehova uagutsinnut nalissaqanngitsumik ikiuisuusoq, nersorneqartariaqarporlu. Pilluaqquneqarumallutali taanna suleqatigissavarput piumasaalu naapertorlugu iliuuseqarluta. — Haggaji 2:18, 19.

18. Sunissat aalajaangiusimaviuk, aamma sooq?

¹⁸ Taammaattumik ilinnut suliassiissutigineqartut tamaasa uummatikkut iluunngarlutit suliarikkit. Jehovalu tatigiuaruk. (Markusi 11:23, 24) Qularutiginngilluinnarsinnaavat ‘ujarlersoq nanisisartoq’. (Matthæusi 7:8) Tanitat qilammi ‘niaqorusiussassamik inuussutaasumik’ pilluaqquneqarumaarput. (Jaaku 1:12) Kristusip ‘savaatai allat’ Aaperaap kinguaavatigut pilluaqquneqarumallutik iliuuseqartut nuannaarumaarput Kristusi ima oqarpat: “Qaagitsi, ataatama pilluaqqusai, naalagaaffik silarsuup tunngavilerneqarneraniit ilissinnut pisassarititaasoq kingornussarisiuk.” (Johannesi 10:16; Matthæusi 25:34) Aap, “[Jehovap] pilluaqqusaasa nuna kingornutissavaat . . . najugaqassallutillu tassani naassaanngitsumik.” — Tussiaat 37:22, 29.

Uku nassuiarsinnaavigit?

• Guutimut ilumoorluni naalanneq qanoq paasisariaqarpa?

• Guutimit pilluaqquneqarumalluta susariaqarpugut?

• Guutip anersaava illernartoq qanoq pisinnaavarput, qanorlu iluaqutigisinnaavarput?

[Atuaqqissaarnermi apeqqutit]

[Qupp. 15-mi assiliartat]

Jaaku Jehovamit pilluaqquneqarumalluni inngilimut akiuuppoq.

Illimmi pilluaqquneqarumallutit ilungersorpit?