Qinuneq – Iluaqutaava?
QINUNEQ iluaqutaava? Biibilimi erserpoq Guutip kiffaasa aalajaatsut qinnutitik ilumut iluaqutigigaat. (Lukasi 22:40; Jaaku 5:13) Aap, qinuneq anersaakkut, misigissutsikkut allaallu timikkut iluaqutigingaarsinnaavarput. Qanoq?
Takorlooriartigu qitornaqartutit tunissutisisumik. Ilinniartissaviuk qujamasunnermik misigineq naammattoq? Imaluunniit qujamasunnermik ersersitsinissaanik ilinniartissaviuk? Misigissutsit pingaarutillit oqaasertalikkavut eqqumaffiginerulertarpavut allaallu sakkortusisarlugit. Guuti oqaluukkaangatsigu aamma taamaappa? Aap! Assersuuteqariarta.
Qinnutit qujaniutit. Ajunngitsut nalaatavut pillugit Ataatarput qutsavigigaangatsigu pilluaqqussutisiavut eqqumaffigisarpavut. Tamatuma kingunerisaanik nuannaarnerulertarpugut, qujamasunnerulertarpugut isumalluarnerulertarlutalu. — Filippimiut 4:6.
Assersuut: Jiisusip qinnutiminik Ataatami tusarnaartarneranut akisisariaasianullu qujamasunnini ersersippaa. — Johannesi 11:41.
Isumakkeerfigineqarnissamik qinnutit. Guutimut isumakkeerfigeqqulluta qinugaangatta ilerasuppallaarunnaartarpugut, ilumoorluta peqqissimisarpugut ajortillu qanoq ilungersunartiginera eqqumaffiginerulertarlutigu. Aamma pisuusutut misiginitsinni oqiliallatsitsissaagut.
Assersuut: Daavip peqqissiminini aliasunninilu qinunikkut ersersippai. — Tussiaat 51.
Siunnersorneqarnissamik ilisimassusermillu qinnutit. Jehovamut silatusaartumik aalajangiinissamut siunnersoqqulluta ilisimassuseqaqqullutaluunniit qinugaangatta maniguuttuunissatsinnut iluaqutigisarparput. Tamanna pisinnaasatta killeqarnerannik eqqaassutigisarparput Ataatatsinnullu qilammiusumut tatiginninnermik ineriartortitsinissatsinnut iluaqutigalutigu. — Ussatit 3:5, 6.
Assersuut: Salomo Israelikkunnut naalakkersuisinnaajumalluni siunnersorneqarnissamik ilisimassusermillu maniguulluni qinuvoq. — 1 Kunngit 3:5-12.
Annikilliornermi qinnutit. Misigissutsikkut tatineqartilluta Guutimut uummammiuvut aniatikkutsigik iluaallatsitsissaagut, imminullu tatiginata Jehova tatigissavarput. — Tussiaat 62:9.
Assersuut: Kunngi Asa akeqqamut mersernangaartumut sorsuttussanngorami qinuvoq. — 2 Nalunaarsuutit 14:10.
Allat ingerlalluarnissaannik qinnussineq. Qinnutit taamaattut misiginneqatiginninnerunissamut namminissarsiornaveersaarnissamullu iluaqutigaavut.
Assersuut: Jiisusip ajoqersukkani qinnuppai. — Johannesi 17:9-17.
Qinnutit unnersiutiginnissutit. Jehova suliai pissusiilu tupinnangaartut pillugit unnersiutigigaangatsigu taassuminnga ataqqinninnerulissaagut pingaartitsinerulissallutalu. Qinnutit taamaattut Guutitsinnut Ataatatsinnullu qaninnerulernissatsinnut iluaqutigisinnaavavut.
Assersuut: Daavip Guuti nuannaarutiginnilluni unnersiutigaa pinngortitai pillugit. — Tussiaat 8.
Pilluaqqussut qinunikkut pineqarsinnaasoq alla tassaavoq ‘eqqissineq Guutimit pisoq siuneqassusernit tamanit annerungaartoq’. (Filippimiut 4:7) Silarsuarmi eqqissiviilliorfiusumi toqqissisinnaaneq pilluaqqussutaavoq qaqutigoortoq. Allaat timikkut iluaqutigaarput. (Ussatit 14:30, 1990) Namminerli iliuuseqarnivut kisimik aalajangiisuuppat? Imaluunniit anginerusoq pingaaruteqarnerusorlu aalajangiisuua?
Qinuneq amerlasuutigut — timikkut, misigissutsikkut pingaarnerpaamillu anersaakkut — iluaqutigaarput