Qinuneq – Sumi qaqugukkullu soqutaava?
QULARNANNGITSUMIK malugisimassavat upperisarsioqatigiinni amerlanerni illuni kusanartorsuarni Guutisiorneq pingaartinneqartoq ullormullu piffissani aalajangersimasuni qinusarnissaq peqqussutigineqartoq. Biibili naapertorlugu sumiiffinni piffissanilu aalajangersimasuinnarni qinusinnaavugut?
Biibilimi erserpoq naleqquttumik piffissaqartartoq Guutimut qinuffigisinnaasatsinnik. Assersuutigalugu Jiisusip ajoqersukkani nereqatigitinnagit Guuti qinunikkut qutsavigisarpaa. (Lukasi 22:17) Ajoqersugaalu Guutimik pallorfiginninniarlutik katerisimaaraangamik qinoqatigiittarput. Taamaalillutik juutit synagogiini Jerusalemimilu naalaffimmi ileqquujuarsimasoq ingerlateqqippaat. Guutip siunertaraa naalaffik tassaassasoq “inuiaqatigiit tamarmik [qinusarfiat]”. — Markusi 11:17.
Guutip kiffai katerisimaaraangamik qinoqatigiikkaangamillu qinnutaat sunniuteqarluarsinnaapput. Isiginnittaatsimikkut ataasiussuseqaraangata qinnutaallu Biibilimi najoqqutassianut naapertuukkaangata Guutip nuannaarutigisarpaa. Allaat qinnummit Guuti killinneqarsinnaavoq iliuuseriniagarinngisaraluaminik iliuuseqarluni. (Hebræerit 13:18, 19) Jehovap Nalunaajaasui ataatsimiikkaangamik tamatigut qinusarput. Aamma illit naalagaaffilersaarfimmukarnissannut tikilluaqqusaangaarputit qinnutit taamaattut nammineq tusarsinnaajumallugit.
Biibilimili qinuneq sumiiffinnut piffissanullu aalajangersimasunut killilersorneqanngilaq. Tassani oqaluttuarineqarpoq Guutip kiffai sumiluunniit qaqugukkulluunniillu qinusartut. Jiisusilu ima oqarpoq: “Qinunialeruit ininnguannut iserit matulu matullugu, Ataatannullu isertortumiittumut qinugit. Ataatavillu isertortumut isigisup akilissavaatit.” — Matthæusi 6:6.
Sumiluunniit qaqugukkulluunniillu qinusinnaavugut
Eqqarsaat nuanningaarami, ilaa? Qaqugukkulluunniit kisimiitillutalu qilammi nunamilu Kisimi Oqartussaasumut saaffiginnissinnaavugut qularinagu tusarnaassagaatigut. Tupaallannanngilaq Jiisusi qinuniaraangami kisimiikkusukkajunnera! Ilaanni unnuaq naallugu Guutimut qinuvoq aalajangigassaq pingaaruteqangaartoq pillugu siunnersorneqarusugunarluni. — Lukasi 6:12, 13.
Aamma allat, angutit arnallu, pingaarutilinnik aalajangigassaqartillutik ernumanartunillu unamminiagassaqartillutik qinusut Biibilimi oqaluttuarineqarput. Ilaannikkut nipituumik qinusarput, ilaannikkullu nipaatsumik; katerisimaartillutik qinusarput aamma kisimiikkaangamik. Qinunerat pingaaruteqarneruvoq. Allaat Guutip kiffani ima kajumissaarpai: “Qinuttuinnaritsi.” (1 Thessalonikamiut 5:17) Piumasaminik iliortut tusarnaarusuttuaannarpai. Kajumissaarutip asannippalussusia!
Ullumikkut silarsuatsinni misigittaatsuuffiusumi inuppassuit eqqarsaatigisarpaat qinuneq ulluinnarni pingaaruteqarnersoq. Immaqa aamma illit ima aperivutit: ‘Qinuguma ilumut iluaqutigissavara?’