Kunngimit Guutip anersaavanit siulersorneqartumit pilluaqquneqartigit

“Najussavaa [Jehovap] anersaavata.” — Esaja 11:2.

1. Silarsuarmi ajornartorsiutinut tunngatillugu ilaasa suut isumakuluutigisimavaat?

“INUIT silarsuarmi politikkikkut, innuttaaqatigiinnikkut avatangiisitigullu uivernersuaqarfiusumi ukiuni 100-ni tulliuttuni qanoq aniguisinnaappat?” 2006-imi astrofysikeri Stephen Hawking taama aperivoq. Atuagassiami New Statesman-imi ima allassimasoqarpoq: “Piitsuussusermik atuukkunnaarsitsisinnaasimanatalu silarsuarmi eqqissineqartitsisinnaasimanngilagut. Akerlerluinnaali angusimagunarparput. Imaanngilaq misiliisimanngitsugut. Suna tamaat misilipparput aningaasarsiornerup naalagaaffimmit aqunneqarneraniit inuussutissarsiornermut niuertunit namminersortunit tunngavilimmut, Folkeforbundimiit atomimik sakkussiat atorlugit sioorasaareqatigiinnermut. Sorsuuttoqartarunnaarsinniarlugu sorsuuttaqattaarpallaarsimavugut ima oqarnissatsinnut: Nalunngilarput qanoq sorsuuttoqartarunnaarsissinnaallugu.”

2. Jehovap eqqortumik kisimi oqartussaanini qanittukkut nunami qanoq ililluni atuutilersissavaa?

² Oqaaseqaatit taamaattut Jehovap kiffaanut tupaallannartuunngillat. Biibilimi allassimavoq inuit imminut naalakkersinnaassuseqartillugit pinngortitaanngitsut. (Jeremia 10:23) Jehova uagutsinnut eqqortumik Kisimi Oqartussaasutuaavoq. Tassa Jehova kisimi pisinnaatitaavoq uagutsinnut najoqqutassiuinissamut, inuunitta qanoq siunertaqarnissaanik aalajangiinissamut siunertallu tamatuma naammassinissaanut uagutsinnik siulersuinissamut. Qanittukkullu oqartussaanini atorlugu inuit iluatsinngitsumik namminneq naalakkersuiniarnerigalui atuukkunnaarsissavai. Tamanna ilutigalugu inuit eqqortumik kisimi oqartussaassutsiminik akuersiumannginnermikkut ajortimit naammalluinnanngissusermillu ‘silarsuullu matuma guutiata’, Saatanip Diaavulup, naalagaaffigisaanit inunnik inussiaataatitsisut tamaasa piuneerutissavai. — 2 Korinthimiut 4:4.

3. Esajap Missiarsi qanoq siulittuutigaa?

³ Silarsuassami nutaami Paratiisimi Jehovap inunnut asannittumik kisimi oqartussaanera naalagaaffimmit Missiarsikkoortumit atuutitinneqassaaq. (Danieli 7:13, 14) Naalagaaffimmi tamatumani kunngi pillugu Esaja ima siulittuivoq: “[Puttukkumaarpoq] naarlaannguaq Isajip mannguanit kippakuusumit, naaneq sorlaanit naalerumaarpoq. Najussavaa [Jehovap] anersaavata, anersaap ilisimanartup paasisimasaqarnartullu, anersaap siunnersuisup pissaasullu, anersaap ilisimasaqalersitsisup Guutimillu mianerinnitsitsisup.” (Esaja 11:1, 2) Guutip anersaavata illernartup ‘naarlaannguaq Isajip mannguanit kippakuusoq’ — Jiisusi Kristusi — inunnut naalakkersuinissamut sutigut piukkunnarsisippaa? Naalakkersuinera sunik pilluaqqussutissartaqassava? Tamakkuninngalu pilluaqquneqartikkumalluta qanoq iliortariaqarpugut?

Guutimit naalakkersuisinnaassuseqalersinneqartoq

4-6. Jiisusip ilisimassuseqarluartutut misiginneqataasutullu kunngiunissaminut, palasiunerunissaminut eqqartuussisuunissaminullu kikkunnik sunillu ilisimasaqangaarnini piukkunnassutigaa?

⁴ Jehovap kissaatigaa innuttani nunamiusut kunngiullunilu palasiunerullunilu eqqartuussisumit ilisimassuseqarluarlunilu misiginneqataasumit siulersorneqarlutik naammalluinnartunngussasut. Tamanna pissutigalugu Jehovap Jiisusi Kristusi toqqarsimavaa anersaarlu illernartoq atorlugu pingaarutilinnut taakkununnga akisussaanissamut piukkunnarsisillugu. Jiisusip Guutip  suliassiissutaanik kukkunngilluinnarluni naammassinnissinnaaneranut pissutaasut ilaat misissoriartigik.

⁵ Jehova Guuti pillugu Jiisusi ilisimasaqarnerpaajuvoq. Ernituap allanit tamanit sivisunerusumik, immaqa ukiuni milliardilinni, Ataataq ilisarisimavaa. Ukiorparujussuarni taakkunani Jiisusip Jehova ima ilisarisimalluartigilersimatigaa allaat imatut allaatigineqarsinnaalluni: “Guutip takussaanngitsup assinga.” (Kolossemiut 1:15) Jiisusi nammineq ima oqarpoq: “Uannik takunnittup Ataataq takuaa.” — Johannesi 14:9.

⁶ Jehova eqqaassaanngikkaanni Jiisusi pinngortitanik tamanik, aamma inunnik, ilisimasaqarnerpaajuvoq. Kolossemiunut allakkat 1:16, 17-imi ima allassimavoq: “Taassumuuna [Guutip erneratigut] suut tamarmik pinngortitaapput qilanni nunamilu, takussaasut takussaanngitsullu . . . Taanna suut tamarmik siuleraat, suullu tamarmik taassumuuna atapput.” Eqqarsaatigeriaruk! Jiisusi Guutip ‘suliortuatut’ allanik tamanik pinngortitseqataavoq. (Ussatit 8:30, 1900) Taamaattumik ilisimasaqarfigai avataarsuaniittut nunarsuarmiittullu tamaasa annikitsualuit tamaasa ilanngullugit, atomit sananeqaataanniit inuup qarasaanut tupinnangaartumut. Aap, Jiisusi ilumut tassaavoq ilisimassuseq kinaassusiligaq. — Ussatit 8:12, 22, 31.

7, 8. Jiisusip kiffartornermini Guutip anersaava qanoq iluaqutigaa?

⁷ Jiisusi Guutip anersaavanik illernartumik taninneqarpoq. “[Jehovap] anersaavata tikippaanga [Jehovap] tanitarimmanga.” Jiisusi taama oqarpoq, imalu nangilluni: “Aallartippaanga nalunaarut nuannersoq piitsunut tusarliuteqqullugu, torlulaatigeqqullugu parnaarussat iperagaanissaat tappiitsullu tappissinissaat, nanertugaasullu aniguiseqqullugit torlulaatigeqqullugulu [Jehovap] ukiua saammaassivik.” (Lukasi 4:18, 19) Jiisusi kuisimmat anersaap illernartup ilisimatikkunarpaa inuttut inunngunngikkallarami paasisimasaanik, ilaatigut Missiarsitut nunami kiffartornermini Guutip naammassitikkusutaanik. — Atuakkit Esaja 42:1; Lukasi 3:21, 22; Johannesi 12:50.

⁸ Jiisusi anersaamit illernartumit piginnaatitaagami aamma timikkut isumakkullu naammalluinnartuugami tassaaginnanngilaq inuit inuusimasut pingaarnerpaartaat, aammali tassaavoq ilinniartitsisut pingaarnerpaartaat. Aap, tusarnaartaasa “ajoqersuutaa inuit tupigusuutigingaarpaat”. (Matthæusi 7:28) Assersuutigalugu Jiisusip qulaarsinnaavai inuit ajornartorsiutaannut pissutiviusut — ajorti, naammalluinnanngissuseq anersaakkullu ilisimaatsuussuseq. Aammattaaq inuit uummammiugisaat takusinnaavai, uummammiugisaallu eqqarsaatigalugit taakkuninnga pinnittarpoq. — Matthæusi 9:4; Johannesi 1:47.

9. Sooq Jiisusi naalakkersuisutut tatiginerulertarpiuk taassuma nunami misigisai eqqarsaatigigaangakkit?

⁹ Jiisusi inuttut inuusimavoq. Inuttut nammineq misigisani inunnillu naammalluinnanngitsunik qanimut najuisimanini kunngitut piukkunnarsinissaminut aamma iluaqutigingaarpai. Apustili Paulusi ima allappoq: “[Jiisusip] tamatigorluinnaq qatanngutini assigilertariaqarpai tassaalerumalluni Guutip saani palasiunerusoq naakkinnittoq unneqqarissorlu inuit ajortaannik matuuisinnaasoq. Nammineq usserneqarlunilu naalliutsitaagami usserneqartut ikiorsinnaavai.” (Hebræerit 2:17, 18) Jiisusi ‘usserneqarami’, imaluunniit misilinneqarami, misilinneqartut tamaasa misiginneqatigisinnaavai. Jiisusip misiginneqatiginnittuunera nunami kiffartornerani erseqqippoq. Napparsimasut, innarluutillit, naqisimaneqartut  — allaat meeqqat — saaffigiuminartippaat. (Markusi 5:22-24, 38-42; 10:14-16) Maniguuttut anersaakkullu kaattut aamma kajungerfigisarpaat. Makitasuulli, anneruniartut ‘Guutillu asanninneranik ilumiugisaqanngitsut’ akueriumanagulu uumigalugulu assortorpaat. — Johannesi 5:40-42; 11:47-53.

10. Jiisusip uagutsinnut asanninnini misinnangaartumik qanoq uppernarsarpaa?

¹⁰ Jiisusip inuunini uagut iluaqutissatsinnut tunniuppaa. Jiisusip naalakkersuisutut piukkunnartuuneranut uppernarsaat pingaarnerpaaq immaqa tassaavoq uagut pilluta kajumilluni toqunera. (Atuakkit Tussiaat 40:7-11). Jiisusi ima oqarpoq: “Annerusumik asanninneqanngilaq ikinngutini pillugit inuunerminik akiginnittup asanninneranit.” (Johannesi 15:13) Aap, naalakkersuisut nunamiut, innuttatik akilersuisillugit inuulluataarajuttut, assiginagit Jiisusip inuit pillugit inuunini tunniuppaa. — Matthæusi 20:28.

Utertitsissutip atornissaanut piginnaatitaq

11. Sooq Jiisusi utertitsisitsitut tatigilluinnarsinnaavarput?

¹¹ Jiisusip utertitsissutitut pilliutimi nalingata uagut iluaqutissatsinnut palasiunertut siulliulluni atuinera naleqqulluinnarpoq. Jiisusip ukiuni tusindini naalakkersuinermini uagut utertitsisitsitut qanoq iliorumaarnerminik — aalajaakkutta iluaqutigisinnaasatsinnik — nunami kiffartornermini qilanaartuuserpaatigut. Napparsimasut innarluutillillu ajorunnaarsittarpai, toqusut makitittarpai, inuppassuit nerisittarpai, aap allaat pinngortitat nukingi pissaaneqarfigai. (Matthæusi 8:26; 14:14-21; Lukasi 7:14, 15) Taamaaliunngilarli oqartussaanini pissaaninilu usorsisimaarutiginiarlugit, misiginneqatiginninnili asanninninilu takutinniarlugit taamaaliorpoq. Pupissumut ilungersorluni imminik ajorunnaarseqqusumut ima oqarpoq: “Piumavunga, mingukkunnaarit!” (Markusi 1:40, 41) Jiisusip ukiuni tusindini naalakkersuinermini taamatut misiginneqatiginnissaaq, taamanikkussamulli nunarsuaq tamakkerlugu.

12. Esaja 11:9 qanoq eqquutissava?

¹² Aamma Kristusip naalakkersueqataasalu anersaakkut ilinniartitsineq taassuma ukiut 2000-ingajaat matuma siorna aallartitaa ingerlatiinnassavaat. Taamaalilluni Esaja 11:9-mi allassimasut uku eqquutissapput: ‘Jehovamik ilisimasaqarnerup nuna tamakkerumaarpaa soorlu ermit matoqqagaat immap naqqa.’ Qularnanngitsumik ilinniartitaanermut Guutimeersumut tamatumunnga ilaassaaq nunarsuarmik pinngortitarpassuarnillu tamatumaniittunik, aallaqqaammut Adamip suliassaraluanik, qanoq isumassuinissaq. Ukiut 1000-t taakku naalerneranni Guutip aallaqqaammut siunertaa Mosesimik allakkat siulliit 1:28-mi allassimasoq naammassineqarsimassaaq, utertitsissutitullu pilliut tamakkiisumik iluaqutigineqarsimassalluni.

 Eqqartuussinissamut piginnaatitaq

13. Jiisusip iluarnermik, imaluunniit naapertuilluarnermik, nuannarisaqarluni qanoq ersersippaa?

¹³ Jiisusi “[taannaavoq] Guutip inuusunik toqusimasunillu eqqartuussisussanngortitaa”. (Apustilit Suliaat 10:42) Taamaattumik tuppallernaqaaq nalunagu Jiisusi peqquserlutsitassaanngitsuusoq aamma ‘iluarneq unneqqarissuserlu’ sukallugit qiterutigigai. (Esaja 11:5) Ersersippaa piumatussuseq, ilumoortuusaarneq pissusilunnerillu allat uumigigini, inuillu allat naalliunnerannik misigittaatsuusut assuaralugit. (Matthæusi 23:1-8, 25-28; Markusi 3:5) Aammattaaq inuup isikkuanit nakutitaaneq ajorpoq, “inuummi ilumiugisai nammineq nalunngilai”. — Johannesi 2:25.

14. Jiisusip eqqortumik naapertuilluarnermillu nuannarisaqarluni qanoq ersersittuarpaa, imminullu qanoq aperisinnaavugut?

¹⁴ Jiisusip oqaluttuarisaanermi oqaluussisoqarnerpaajuneranik ilinniartitsisoqarnerpaajuneranillu siulersuinermigut ersersittuarpaa eqqortumik naapertuilluarnermillu nuannarisaqarluni. Inuup kialuunniit, naalakkersuisut inuit pilersitaasa kikkulluunniit anersaalluunniit ajortut suliap tamatuma Guutimit iluarisaasumik naammassineqarnissaa akornusersinnaanngilaat. Taamaattumik qularutiginngilluinnarsinnaavarput Harmagedonip kingorna Guutip naapertuilluassusiata ajugaasimanissaa. (Atuakkit Esaja 11:4; Matthæusi 16:27). Imminut ima aperigit: ‘Kiffartorninni Jiisusip isiginnittaasiatut isiginnittaaseqarlunga ersersippara? Sapinngisara tamaat Jehova pilliuteqarfigaara, naak peqqiilliorneq inuttulluunniit nammineq atukkakka pissutigalugit periarfissakka killeqaraluartut?’

15. Sapinngisarput tamaat Jehovap pilliuteqarfiginissaanut suna kajumississutigisinnaavarput?

¹⁵ Guutimut uummatikkut iluunngarluta kiffartornissamut ikiorneqassaagut oqaluussineq Jehovap suliarisarigaa eqqaamagutsigu. Taanna oqaluusseqqusisuuvoq; ernini aqqutigalugu tamanna siulersorpaa anersaarlu illernartoq iluaqutigalugu oqaluusseqataasut nukissaqartittarlugit. Guutip suleqataasut, taassuma ernera Guutip anersaavanik siulersorneqartoq peqatigalugu, kiffartornerup immikkut pisinnaatitaaffiunera pingaartippiuk? Jehovaanngitsup allap kia inuit 7 millioninit amerlanerusut, taakkua amerlanersaat ‘inuinnaasorineqartut immikkut ilinniagaqarsimanngitsut’, nunani 236-nit amerlanerusuni Guutip naalagaaffianik tusarliussamik siaruartereqataatissinnaavai? — Apustilit Suliaat 4:13.

Kristusi aqqutigalugu pilluaqquneqartigit

16. Guutip Mosesimik allakkat siulliit 22:18-imi neriorsuutaa qanoq isumaqarpa?

¹⁶ Jehova Aaperaamut ima oqarpoq: “[Illit] kinguaassakkut nunarsuarmi inuiaat tamarmik pilluaqqunarsissapput, naalakkamma.” (1 Mosesi 22:18) Tamanna isumaqarpoq neriorsuummik tamatuminnga pingaartitsisut kinguaassap Missiarsip pilluaqqussutigisassaanik tamanik qularutiginagu qilanaarinnissinnaasut. Taakkualu ullumikkut Guutimut kiffartorneq ulapputigaat pilluaqqussutissat tamakku eqqaamagamikkik.

17, 18. Jehovap neriorsuutaa suna Mosesimik allakkat tallimaat 28:2-mi atuarsinnaavarput, uagutsinnullu qanoq isumaqarpa?

¹⁷ Ilaanni Guuti Aaperaap uinikkut kinguaavinut, Israelikkunnut, ima oqarpoq: “Pilluaqqussutit makku [Inatsisit tunngavigalugit angerutsimi eqqaaneqartut] tamarmik ilinnut nalliukkumaarput anngukkumaarlutillu [Jehova] Guutit naalakkukku.” (5 Mosesi 28:2) Ullumikkut Guutip kiffai aamma taama oqarfigineqarsinnaapput. Jehovamit pilluaqquneqarusukkuit taanna naalattuaruk. Taava taassuma ‘pilluaqqussutai ilinnut nalliukkumaarput anngukkumaarlutillu’. ‘Naalannermut’ suut ilaagamik?

¹⁸ Naalannermut ilaavoq Guutip oqaasiani allassimasunik anersaakkullu inuussutissanik taassuma pilersitaanik uummammiuliussineq. (Matthæusi 24:45) Guuti taassumalu ernera naalattariaqarpavut. Jiisusi ima oqarpoq: “Imaanngilaq kinaluunniit uannut oqartoq: Naalagaq, Naalagaq!  Qilaap Naalagaaffianut isissasoq, Ataatamali qilanniittup piumasaanik iliortoq kisimi.” (Matthæusi 7:21) Aamma Guutimut naalanneq isumaqarpoq taassuma aaqqissuussaanut, ilagiinnut kristumiunut taakkunanilu utoqqaanertanut toqqakkanut, “inunnik tunissutaasunik” taaneqartunut, kajumilluni naalatsigitinneq. — Efesosimiut 4:8, NV.

19. Guutimit pilluaqquneqarumalluta qanoq iliortariaqarpugut?

¹⁹ ‘Inunnik tunissutaasunut’ ilaapput Siulersuisoqatigiinnut ilaasortaasut, ilagiinnut kristumiunut tamarmiusunut sinniisuusut. (Apustilit Suliaat 15:2, 6) Ilumut Kristusip anersaakkut qatanngutaanut isiginnittaaserput aalajangiisuuvoq annikilliornartussarsuarmi qanoq eqqartuunneqarnissatsinnut. (Matthæusi 25:34-40) Tassa Guutimit pilluaqquneqaatigisinnaasatta ilagaat taassuma tanitaanik ilumoorfiginnilluta tapersersuinerput.

20. (a) ‘Inunnik tunissutaasut’ sumik pingaarutilimmik akisussaaffeqarpat? (b) Qatanngutit angutit taakku pingaartillugit qanoq ersersissinnaavarput?

²⁰ ‘Inunnik tunissutaasunut’ taakkununnga aamma ilaapput immikkoortortaqarfinni ataatsimiititalianut ilaasortat, nakkutilliisut angalasartut ilagiinnilu utoqqaanertat, taakkua tamarmik anersaamit illernartumit toqqagaapput. (Apustilit Suliaat 20:28) Qatanngutit angutit taakkua akisussaaffiisa pingaarnersaasa ilagaat Guutip innuttaanik ineriartortitsinissaq ‘tamarmik anngutserlugit uppernermi ataasiunissamut Guutillu erneranik ilisarsinissamut tassaallutik inuk inerluarsimasoq, tassa ima alliartorsimasoq Kristusip peqangaassusianut ineqarfiussalluni naammaattunngorluni’. (Efesosimiut 4:13) Ilumoorpoq uagutsitulli naammalluinnanngitsuusut. Imminulli pilluaqqunarsisissinnaavugut, asannittumik paarsisutut suliaat tapersersorlugulu pingaartikkutsigu. — Hebræerit 13:7, 17.

21. Sooq Guutip erneranut naalannissarput pisariaqarluinnarpa?

²¹ Qanittukkut Jiisusip iliuuseqarfigissavaa Saatanip pissutsinik aaqqissuussaa ajortoq. Taamanikkussamut Jiisusi inuuginnarsinnaanitsinnut aalajangiisuussaaq, taannami Guutimit ‘amerlangaartunik’ ‘puilasunut inuussutaasunut’ siulersuisussaatitaavoq. (Saqqummersitat 7:9, 16, 17) Taamaattumik Kunngimut Jehovap anersaavanit siulersorneqartumut sapinngisarput tamaat kajumilluta pingaartitsillutalu naalatsigititta!

Uku sumik ilinniarfigaagit?

• Esaja 11:1-5

• Markusi 1:40, 41

• Apustilit Suliaat 10:42

• Mosesimik allakkat siulliit 22:18

[Atuaqqissaarnermi apeqqutit]

[Qupp. 24-mi assiliartaq]

Jiisusip misiginneqatiginninnera erseqqilluarpoq Jairusip pania toqusunit makitimmagu

[Qupp. 25-mi assiliartat]

Jiisusip Kristusip oqaluttuarisaanermi oqaluussisoqarnerpaajunera siulersorpaa