Pallorfiginninnermik ilumoortumik aallussilluarit

“Katersugassat amerlaqaat sulisussalli ikittuinnaallutik.” — MATTHÆUSI 9:37.

1. Nukinginnartoqarnera qanoq oqaatigineqarsinnaava?

ULLOQ naatinnagu allap aalajangigassaanik pingaarutilimmik allagaqarputit. Qanoq iliussavit? Qaavatigut ima allassavat: “TUAVIUSASSAQ!” Imaluunniit isumaqatigiissut pingaarutilik pillugu naapitassaqarputit, inortuivutilli. Qanoq iliussavit? Tuaviornerulissaatit! Aap, naammassineqartariaqartumik suliassaqaraanni piffissaarutilerlunili ernumasoqarsinnaallunilu pissangasoqarsinnaavoq. Uummatit tilleruluppoq, ulapipallapputillu. Nukinginnartoqartillugu taamaattoqarsinnaasarpoq!

2. Ullumikkut kristumiut ilumoortut suliassaat nukinginnarnerpaaq suua?

² Ullumikkut kristumiut ilumoortut suliassaat nukinginnarnerpaaq tassaavoq Guutip naalagaaffia pillugu nutaarsiassamik nuannersumik oqaluussissutiginnillunilu inunnik inuiaannit tamaneersunik ajoqersuganngortitsiortorneq. (Matthæusi 24:14; 28:19, 20) Ajoqersukkap Markusip Jiisusip oqaasii issuarlugit allaatigaa suliassaq tamanna “siullermik”, tassa naggatissap nalliutinnginnerani, suliarineqartariaqartoq. (Markusi 13:10) Soorunami oqaluussissutigineqaqqaartariaqarpoq. Jiisusi ima oqarpoq: “Katersugassat amerlaqaat sulisussalli ikittuinnaallutik.” Katersuinissaq kinguartinneqarsinnaanngilaq, katersuiffissarmi qaangiutsinnagu katersorneqartariaqarput. — Matthæusi 9:37.

3. Oqaluussissutiginninnissaq nukinginnarmat qatannguterpassuit qanoq iliortarpat?

³ Oqaluussissutiginninneq taama pingaaruteqartigimmat tamanna soqutigingaartariaqarparput piffissarpullu nukivullu sapinngisarput tamaat tamatumunnga atortariaqarlugit. Qatannguterpassuavut taamaaliorput, tamannalu nersortariaavoq. Ilaasa inooriaasertik pisariillisarsimavaat pioneritut, ajoqersuiartortitatut imaluunniit nunarsuaq tamakkerlugu Betelit ilaanni sulisartutut piffissaq tamaat kiffartulerniarlutik. Ulapaartuupput. Pilliuteqangaarsimasinnaapput ajornartorsiuterpassuarnillu nalaataqartarsimasinnaallutik. Jehovalli pilluaqqungaarpai. Qutsappavut. (Atuakkit Lukasi 18:28-30). Allat piffissaq tamaat oqaluussisartuunngikkaluarlutik sapinngisartik tamaat piffissartik atortarpaat inuunermik annaassiniaqataaniarlutik, tamatumunngalu ilaavoq meeqqatta annaanneqarnissaannut ikiuinerput. — 5 Mosesi 6:6, 7.

4. Sooq ilaasa suliassap nukinginnassusia sianigiunnaarsinnaavaat?

⁴ Soorlu sammereeripput, piffissap nukinginnassusianik sianiginninneq piffissap qaangiutilerneranut attuumassuteqartarpoq. Naggatissap nalaani inuuvugut, tamatumunngalu Biibilimi inuiaallu oqaluttuarisaaneranni uppernarsaaterpassuaqarpoq. (Matthæusi 24:3, 33; 2 Timotheusi 3:1-5) Taamaakkaluartorli naggatissaq qaqugorpiaq nalliutissanersoq inummit kimilluunniit ilisimaneqanngilaq. Jiisusip ‘silarsuup naggatissaanut’ imaluunniit ‘pissutsit aaqqissuussaanerata naggataatungaanut’ (NV) nalunaaqutip annikitsualuttortai eqqartoramigit erseqqilluinnartumik ima oqarpoq: “[Ulloq] taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi.” (Matthæusi 24:36) Taamaattumik kristumiut ilaasa suliassap nukinginnassusia sianigiunnaarsinnaavaat, ingammik ukiorpassuarni suliassaq tamanna suliarisimagunikku. (Ussatit 13:12) Ilaatigut illit piffissap nukinginnassusianik sianiginninneq ajornakusoortittarpiuk? Jehovap Guutip aamma Jiisusip Kristusip uagutsinnut suliassiissutaata nukinginnassusianik qanoq ililluta sianiginnittuarsinnaavugut?

Maligassarput Jiisusi ilinniarfigiuk

5. Jiisusip kiffartornermi nukinginnassusianik sianiginninnini qanoq ersersippaa?

⁵ Qularnanngivissumik Guutimut kiffartornerup  nukinginnassusianik sianiginnittunit Jiisusi Kristusi maligassaalluarnerpaavoq. Ulapputeqarneranut pissutaasut ilagaat ukiuni pingasuinnarni affarmilu angusaqartussaanera. Taamaakkaluartorli Jiisusi pallorfiginninnermut ilumoortumut tunngatillugu allanit tamanit naammassisaqarnerusimavoq. Ataatami aqqa siunertaalu ilisimaneqalersippai, Guutip naalagaaffianik nutaarsiassaq nuannersoq oqaluussissutigaa, upperisarsiornikkut siuttut ilumoortuusaarnerat ajoqersuutaallu eqqunngitsut qulaarpai, aamma Jehovap kisimi oqartussaaneranik qutsissisitsivoq — allaat toqussi tikillugu. Imminik pilliutigaluni nuna tamaat angalaffigaa inuit ilinniartillugit, ikiorlugit ajorunnaarsillugillu. (Matthæusi 9:35) Piffissami taama sivikitsigisumi Jiisusip angusaqarneratut angusaqartoqarsimanngilaq. Jiisusi sapinngisaminik tamaviaarluni sulivoq. — Johannesi 18:37.

6. Jiisusip nunamiikkallarami suna pingaarnerutippaa?

⁶ Sunaana Jiisusip kiffartornermini tamani qasusuissutigigaa? Jehovap piffissalersuinera naapertorlugu Jiisusip qanoq sivisutigisumik kiffartussanerluni, immaqa Danielip siulittuutaa iluaqutigalugu, ilisimavaa. (Danieli 9:27) Soorlu allassimasoq, ‘sabbatip-akunnerata qeqqani’, tassa ukiut pingasut affarlu qaangiuppata, nunarsuarmi kiffartornera naasussaassaaq. Ukiumi 33-mi upernaakkut ajugaasutut Jerusalemimut iseriartornermi kingunitsianngua Jiisusi ima oqarpoq: “Inuup Ernerata naalannarsisitaaffissaa nalliussimavoq.” (Johannesi 12:23) Jiisusip qanittukkut toqusussaalluni nalunngikkaluarlugu nunamiinnermini tamanna eqqarsaatiginerunngilaa; tamanna taama aallussitigineranut pissutaanngilaq. Pingaarnerutippaali Ataatami piumasaatut iliorniarluni inoqatiminullu asannittuliorniarluni periarfissanik tamanik atuinissani. Asanninnini pissutigalugu ajoqersuganngortitsivoq ajoqersukkaminillu ilinniartitsilluni oqaluussiartortitsillunilu. Taamaaliorneranut pissutaasut tassaapput suliamik aallartitaminik ingerlatitseqqinnissaat naammassisaminillu annerusumik naammassisaqarnissaat. — Atuaruk Johannesi 14:12.

7, 8. Jiisusi naalaffimmik minguiaammat ajoqersukkat qanoq isummerpat, aamma sooq Jiisusi taamaaliorpa?

⁷ Pisimasumi aalajangersimasumi Jiisusip aallussilluarnera erseqqilluinnarpoq. Kiffartornerata aallaqqaataani ukiumi 30-mi poorskip nalaani tamanna pivoq. Jiisusip ajoqersugaasalu Jerusalemimut pigamik naalaffimmi takuaat “ussinnik savanillu tuinillu tuniniaasut aamma allat tamaani issaallutik aningaasanik taarsiiniuttut”. Jiisusi qanoq piva, ajoqersukkallu tamanna qanoq isummerfigaat? — Atuakkit  Johannesi 2:13-17.

⁸ Pisimasumi tamatumani Jiisusip iliuuseqarnera oqarneralu pissutigalugu ajoqersukkat Daavip tussiaasiaasa siulittuutaasut ilaat una eqqaavaat: “Illit illunnik ilungersuutiginninnerma nungutilerpaanga.” (Tussiaat 69:10) Sooq oqaatsit taakku eqqaavaat? Jiisusi taamatut iliuuseqarlunilu oqarnermigut navianartorsiuleriaannaammat. Naalaffimmimi siuttut — palasit, allakkanik ilisimasut allallu — niuerneq kanngunarluinnartoq tamanna iluanaarutigisarmassuk. Jiisusip taamani upperisarsiornikkut siuttut pilersaarutipiluinik qulaarillunilu maangaannartitsinermigut akerlilersorpai. Soorlu ajoqersukkat eqqortumik  isummertut, pisimasumi tamatumani Jiisusip Guutip ‘illuanik ilungersuutiginninnera’, imaluunniit pallorfiginninnermik ilumoortumik aallussilluarnera, erseqqilluinnarpoq. Aallussilluarnerli qanoq paasisariaqarpa? Aallussilluarneq piffissap nukinginnassusianik sianiginninnermit allaanerua?

Piffissap nukinginnassusianik sianiginninnerup aallussilluarnerullu assigiinngissutaat

9. Aallussilluarneq qanoq nassuiarneqarsinnaava?

⁹ Qinerlerfissiaq naapertorlugu oqaatsit ‘ilungersuutiginninneq’ aamma ‘aallussilluarneq’ isumaqarput “piumassuseqarnermik arlaannillu soqutiginningaarnermik”, oqaatsillu taakkua tamaviaarneq, pingaartitsineq, angorniorneq pileringaarnerlu isumaqatigaat. Jiisusip kiffartornermini aallussilluarnera pillugu taamatut oqartoqarsinnaavoq. Today’s English Version naapertorlugu versi taanna Tussiaat 69-imi ima nutserneqarsimavoq: “Uanga illit illunnut tunniusimanera, Guuti-aa, ilunni ikumavoq innertut.” Soqutiginarpoq Asiamiut oqaasiisa ilaanni oqaaseq “aallussilluarneq” oqaatsinit marlunnit “inneq”-mik aamma “uummat”-mik isumaqartumit katitigaasoq, uummat ikuallattutut ittoq. Tupinnanngilaq ajoqersukkat Jiisusip naalaffimmi iliuusii takugamikkit Daavip oqaasii eqqaagaat. Sunamiuna Jiisusip uummataanik ‘ikuallattutut’ ilersitsisoq, tassa iliuuseqarnissaminut suna kajumississutigaa?

10. Biibilimi oqaaseq ‘ilungersuutiginninneq’ atorneqaraangat qanoq paasisariaqartarpa?

¹⁰ Oqaaseq hebræerisooq Biibilimi dronningimit Margrethe II-mit atortussanngortitami “ilungersortoq”-mik nutserneqartartoq Ny Verden-Oversættelsen af De Hellige Skrifter-imi ilaannikkut “sinngasoq”-mik aamma “tunniusimalluinnarfigeqqusoq”-mik nutserneqartarpoq. (2 Mosesi 20:5; 34:14; Josva 24:19) Oqaaseq hebræerisooq taanna Biibilimi oqaatsinik qinerlerfissiami ima allaatigineqarpoq: “Aappariittut attaveqatigiinnermut tunngatillugu amerlanertigut atorneqartarpoq . . . Uiusup sangiannera nuliaasullu ningarnera tunniusimalluinnarfigineqarnissamik piumasaqarnermut ersiutaapput, taamatuttaaq Guuti pigisaminut tunniusimalluinnarfigineqarnissamik piumasaqarpoq.” Taamaattumik Biibilimi oqaaseq ‘ilungersuutiginninneq’ atorneqartartoq tassaaginnanngilaq aalajangersimasumik qiimasuutiginninneq, soorlu timersuummik nuannarinerpaasamik. Ilungersuutiginninneq, Daavip ilungersuutiginninneratut ittoq, tassaavoq Jehovamut ingiaaniartumik taassumalu aqqata kanngunarsagaaneranik iluarinninngilluinnarneq. Ilungersuutiginninneq taamaattoq allap tusaamasaalluarneranik illersuinissamut taassumaluunniit ajoquserneqarneranik aaqqiinissamut kajumississutaavoq.

11. Sooq Jiisusi ilungersorluni iliuuseqarpa?

¹¹ Jiisusip ajoqersugaasa taassuma naalaffimmi iliuuseqarnerata Daavip oqaasiinut naapertuunerat eqqortumik paasivaat. Jiisusi ilungersorluni iliuuseqarpoq piffissakinnini pissutigiinnarnagu aammali Ataatami aqqanik pallorfiginninnermillu ilumoortumik aallussilluarami, imaluunniit sinngagami. Guutip aqqanik narrunarsaaneq nikanarsaanerlu paasigamiuk eqqortumik aallussilluarpoq, imaluunniit sinngavoq, tamannalu aaqqinniarlugu iliuuseqarluni. Jiisusip upperisarsiornikkut siuttut inuinnarnik naqisimanninnerat maluginiarsimagamiuk aallussilluarnini kajumississutigalugu inuit nanertuutaannik oqilisaattarpai upperisarsiornikkullu siuttut naapertuilluanngitsuusut assuarisarlugit. — Matthæusi 9:36; 23:2, 4, 27, 28.

Pallorfiginninnermik ilumoortumik aallussilluarit

12, 13. Kristumiuunerartut upperisarsiornikkut siuttui qanoq iliorsimappat (a) Guutip aqqanut tunngatillugu? (b) Guutip naalagaaffianut tunngatillugu?

¹² Ullumikkut upperisarsiornikkut pissutsit Jiisusip nalaanisut ipput, ajornerunngikkunik. Assersuutigalugu Jiisusip qinunermut tunngatillugu ajoqersukkaminut ilinniartitsissutigeqqaagaa Guutip aqqanut tunngassuteqarpoq. Ima ilinniartippai: “Aqqit illernartitaali.” (Matthæusi 6:9) Upperisarsiornikkut siuttut, ingammik kristumiuunerartut palasii, inuit Guutip aqqanik ilisimannilernissaannik, illernartitsinissaannik ataqqinninnissaannillu ilinniartitsisarpat? Naamerluinnaq. Guuti pillugu paasinerluititsisarput ajoqersuutinik eqqunngitsunik — assersuutigalugu ataasiullunilu pingasuussusermik, tarnillu toqujuitsuuneranik anniarfimmillu — ilinniartitsissutiginninnermikkut.  Taamaalillutillu inuit isumaqalersippaat Guuti paasissaanngitsuullunilu naakkittaatsuusoq, aap, allaat naalliutsitsinermik nuannarisaqartuusoq. Aamma mamianartuliortarnermikkut ilumoortuusaarnermikkullu Guuti narrunarsarpaat. (Atuakkit Romamiut 2:21-24). Aammattaaq Guutip aqqa ilisimaneqalernaveersaartittarpaat, allaallu Biibilimik nutsikkaminnit aqqa peersimallugu. Taamaalillutik inuit immikkut namminneq Guutimut qanittumik attaveqarniarnerat akornusertarpaat. — Jaaku 4:7, 8.

¹³ Jiisusip ajoqersukkani aamma Guutip naalagaaffiata tikiunnissaata qinnutiginissaanut ima ilinniartippai: “Naalagaaffiit tikiulli, piumasat qilammisut nunamissaaq pili.” (Matthæusi 6:10) Kristumiuunerartut upperisarsiornikkut siuttuisa qinnut taanna uteqattaartaraluarlugu inuit kajumissaartarpaat politikkikkut partiit peqatigiiffiillu allat tapersersoqqullugit. Aamma Guutip naalagaaffianik sapinngisamik oqaluussissutiginnittut suusupagaat. Tamannalu kristumiuunerartorpassuit Guutip naalagaaffianik eqqartuisarunnaarsimanerannik upperinnikkunnaarsimanerannilluunniit kinguneqarpoq.

14. Kristumiuunerartut palasiisa Guutip oqaasia qanoq pingaartinngilaat?

¹⁴ Guutimut qinunermini Jiisusi paasiuminartumik ima oqarpoq: “Oqaatsitit sallusuissutaapput.” (Johannesi 17:17) Nunarsuarmiitilluni Jiisusip ‘inussiamik aalajaallunilu silatuumik’ (NV) innuttaminut anersaakkut nerisassanik tunisisartussamik toqqaanissani oqaatigaa. (Matthæusi 24:45) Kristumiuunerartut palasii Guutip oqaasianut illersuisuullutik oqajaarpallaarsimapput, taakkuali Naalakkamik suliassiissutigisaa aalajaallutik suliarisimavaat? Naamik. Biibilimi allassimasut oqaluttualiaannaanerartarpaat. Taakkua savaatitik tuppallersarnagit anersaakkullu qaammarsarnagit uppertut ‘siutaasa tusarnarisaat tunngavigalugu’ inuit isumaliutersuutaannaannik ilinniartippaat. Guutip ileqqussatigut najoqqutassiai aalajangiusimajunnaarsimavaat inuit kinguaassiuutitigut ileqqussanut tunngatillugu isiginnittaasiat pingaartinnerugamikku. — 2 Timotheusi 4:3, 4.

15. Palasit Guutip aqqani iliuusii qanoq isumaqarfigaagit?

¹⁵ Guutip aqqani ajortuliarpassuit pissutigalugit inuppassuit eqqortuliorusuttut pakatsisinneqarsimallutilluunniit Guuti Biibililu upperiunnaavissimavaat. Saatanimit taassumalu aaqqissuussineranit ajortumit pisaritissimapput. Illit taamaattoqartoq paasigaangakku qanoq misigisarpit? Guutip aqqa narrunarsarneqaraangat nikanarsarneqaraangallu, Jehovamut kiffaagavit, ajoqusiisimaneq tamanna aaqqinniarlugu iliuuseqarusuttarputit, ilaa? Inuit eqqortuliorusuttut salloqittarneqarsimagaangata taakku tuppallersarlugillu qiimassarusuttarpatit, ilaa? Jiisusip inuit ‘paarinerlugaallutik naakkinarsisimangaartut savatut paarsisoqanngitsutut’ ittut takugamigit nalligiinnanngilai, aammali ‘amerlasuunik ajoqersulerpai’. (Matthæusi 9:36; Markusi  6:34) Jiisusip aallussilluarneratut pallorfiginninnermik ilumoortumik aallussilluarnissatsinnut pissutissaqarluarpugut.

16, 17. (a) Oqaluussinermi imminut pilliutiginissatsinnut suna kajumississutigissavarput (b) Allaaserisami tulliuttumi suna sammineqassava?

¹⁶ Oqaluussinermi aallussilluarutta apustilip Paulusip oqaasii Timotheusimut allakkani siullerni 2:3, 4-miittut uagutsinnut isumaqarnerussapput. (Atuakkit). Ilungersorluta oqaluussisarpugut ulluni kingullerni inuunerput pissutigiinnarnagu aammali taamaaliornitsigut Guutip piumasaatut iliortarluta nalunnginnatsigu. Guutip kissaatigaa inuit sallusuissummik ilisimasaqalernissaat ilinniarsinnaaniassammassuk qanoq pallorfigissanerluni kiffartuutissanerlunilu taamaalillutik pilluaqquneqarsinnaaniassagamik. Oqaluussinermi imminut pilliutiginissatsinnut kajumissisinneqangaarpugut piffissap nukinginnassusia pissutigiinnarnagu sulili pingaarnerusumik Guutip aqqa ataqqinartikkusukkatsigu inuillu taassuma piumasaanik ilinniartikkusukkatsigit. Pallorfiginninnermik ilumoortumik aallussilluarpugut. — 1 Timotheusi 4:16.

¹⁷ Jehovamut innuttaagatta Guutip inuit nunarsuarlu pillugit siunertaanik ilisimasaqalersimavugut. Inuit pillualernissaannik siunissamullu qularnaatsumik neriuuteqalernissaannik ikiuinissamut periarfissaqarluarpugut. Nassuiaassinnaavavut Saatanip pissutsinik aaqqissuussinerata ajortup suujunnaarsitaaneranit qanoq aniguisinneqarsinnaasut. (2 Thessalonikamiut 1:7-9) Jehovap ullussaata kingusinaarsorineqarnera pakatsissutiginagu pallorfiginninnermik ilumoortumik aallussilluarnissatsinnut suli piffissaqarnera nuannaarutigisariaqarparput. (Mika 7:7; Habakkuki 2:3) Qanoq ililluni taamatut aallussilluartoqalersinnaava? Tamanna allaaserisami tulliuttumi sammissavarput.

Uku nassuiarsinnaavigit?

• Suna Jiisusip kiffartornermini tamani qasusuissutigaa?

• Biibilimi oqaaseq ‘ilungersuutiginninneq’ atorneqaraangat qanoq paasisariaqartarpa?

• Ullumikkut pallorfiginninnermik ilumoortumik aallussilluarnissatsinnut suut kajumississutigissavavut?

[Atuaqqissaarnermi apeqqutit]

[Qupp. 15-mi assiliartaq]

Jiisusip Ataatami piumasaatut iliornissani inoqatiminullu asannittuliornissani pingaarnerutippai

[Qupp. 17-mi assiliartaq]

Pallorfiginninnermik ilumoortumik aallussilluarnissatsinnut pissutissaqarluarpugut