Guutimit iluarineqarneq inuunermik naassaanngitsumik kinguneqassaaq

“[Pilluaqqussavat] naapertuilluartoq, Jehova; sernissussavat illit iluarinninninnik, eqqortinnaveeqqussuarmillusooq.” — TUSSIAAT 5:12, NV (5:13).

1, 2. Eliap uillarneq Sareptamiu sumik qinnuigaa, qanorlu neriorsoqqissaarpaa?

ARNAQ erneralu kaapput, Guutillu pruffiitia aamma nerisassaqanngilaq. Arnaq taanna, uillarneq Sareptamiu, nerisassiorniarluni qisussanik katersuisoq pruffiitip Eliap taanna imermik iffiamillu qinnuigaa. Arnap immikkumavaa, ‘taamaallaalli itummap imaanik qajuusaateqarpoq qummuattamiittunik uuliaminiuteqarlunilu kannimiittumik’. Arnap pruffiiti oqarfigaa nerisassaanik tunisinnaannginnerarlugu nerisassaatini amigarmata. — 1 Kunngit 17:8-12.

² Eliap aalajangersimalluni ima oqarfigaa: “[Uanga] timiusaliuuteqqaaringa maanngaallugulu. Taamaalioreeruit illit ernerpillu nerisassassinnik timiusaliorumaarputit. [Jehovami] Israelip Guutia ima oqarpoq: Qummuattamiittut qajuusat nungussanngillat kannilu uuliaasivik imaarutissanani [Jehovap] nunami siallersitsinissaata tungaanut.” — 1 Kunngit 17:13, 14.

3. Pingaarutilimmik sumik aalajangigassaqarpugut?

³ Uillarnerup isummerfigisassaa tassaaginnanngilaq nerisassaatimininnguani sussanerlugit. Jehova imminik ernerminillu annaassisussatut tatigissavaa, imaluunniit timikkut pisariaqartitani Guutimit iluarineqarnermininngarnit taassumunngalu ikinngutaanermininngarnit pingaarnerutissavai? Uaguttaaq tamatta tamatumunnga assingusumik aalajangigassaqarpugut. Jehovamit iluarineqarnissarput pigisatigut toqqissisimalernissaminngarnit pingaarnerutipparput? Guutimik tatiginninnissatsinnut taassumunngalu kiffartornissatsinnut pissutissaqarluarpugut. Guutimillu iluarineqarumalluta iliuuserisinnaasavut arlaqarput.

Jehova pallorfigineqarnissaminut ‘qinngaqqunnanngilaq’

4. Sooq Jehova pallorfigisariaqarparput?

⁴ Jehova inuit iluarisamisut imminut kiffartornissaannik piumasaqarsinnaatitaavoq. Jehovap  qilammi kiffaasa ilaasa tamanna uppernarsarpaat ima oqaramik: “Illit, Naalagarput Guuterpullu [Jehova Guuterput, NV], qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.” (Saqqummersitat 4:11) Jehova tamanik pinngortitsisuugami uagutsinnit pallorfigineqartariaqarpoq.

5. Sooq Guutip asanninnera taassumunnga kiffartornissatsinnut kajumississutigisariaqarparput?

⁵ Jehovamut kiffartornissamut pissutissaq alla tassaavoq taassuma uagutsinnik asanninnera asseqanngilluinnartoq. Biibilimi ima oqaluttuarineqarpoq: “Guutip inuk pinngortippaa imminik assililluni; Guuti assilillugu pinngortippaa. Pinngortippai tassaatillugit angut arnarlu.” (1 Mosesi 1:27) Inuit eqqarsarsinnaassuseqarlutik aalajangiisinnaassuseqarlutillu piumasamittullu iliorsinnaatitaallutik pinngortitaapput. Jehovap inuunermik tunigamisigut tamatsinnut Ataatanngorpoq. (Lukasi 3:38) Ataataasutut ajunngitsutut ernini paninilu inuunermik nuannaarutiginnissinnaaqqullugit pisariaqartitaanik tunisimavai. Guutip aamma “seqerni . . . nueqqusarpaa siallersitsisarlunilu”, nunarsuarmi avatangiisini kusanartuni naammattorsuarnik nerisassaqarsinnaaqqulluta. — Matthæusi 5:45.

6, 7. (a) Adami kinguaassaminik qanoq ajoqusiiva? (b) Guutimit iluarisaajumallutik iliuuseqartut Kristusip pilliutaa qanoq iluaqutigissavaat?

⁶ Aamma Jehovap ajortip kingunipiluinit aniguisippaatigut. Adami ajortuliornermigut tassaalerporlusooq aningaasanoortartoq ilaquttaminit tillittartoq. Tassa Adamip ajortuliornermigut Jehovamullu pikitsitsinermigut qitornani pilluarlutik naassaanngitsumik inuunissaraluannik arsaarpaalusooq. Adamip namminissarsiornera pissutigalugu inuit naammalluinnanngissutsimut inussiaataapput. Taamaattumik inuit tamarmik napparsimasarlutillu aliasuuteqartarput naggataatigullu toqusussaallutik. Inussiaajunnaarsitsiniaraanni akiliisoqartariaqarpoq. Jehovallu kingunipilunnit taakkunannga aniguisinneqarnissatsinnut akiliutissaq akilerpaa. (Atuaruk Romamiut 5:21). Jiisusip Kristusip Ataatami piumasaanut naapertuuttumik ‘inuunini akissatut tunniuppaa amerlasuut utertinneqaatissaattut’. (Matthæusi 20:28) Guutimit iluarineqartut utertitsissutitut akiliut tamanna ungasinngitsukkut tamakkiisumik iluaqutigissavaat.

⁷ Pinngortitsisutta, Jehovap, uagut pilluarluta isumaqarluartumillu inuunissamut pisariaqartitavut tamaasa isumagisimavai. Guutimit iluarineqarutta taassuma inuiannut ajoqusiinernik aaqqiiumaarnera misigissavarput. Jehovap tamatta immikkut takutittuarumaarpaatigut ‘ujarlersiminik’ qanoq ‘akissarsisitsisarluni’. — Hebræerit 11:6.

“Innuttatit kajumillutik sassarumaarput”

8. Guutimut kiffartornermut tunngatillugu Esajamik oqaluttuaq sumik ilinniarfigisinnaavarput?

⁸ Guutimit iluarisaajumalluni iliuuserineqartariaqartut ilagaat piumasamik iliorsinnaatitaanermik eqqortumik atuineq. Jehovammi inuk kinaluunniit imminut kiffartoqqullugu pinngitsaalinngilaa. Esajap nalaani Jehova ima aperivoq: “Kina aallartissavara, kia oqariartuukkumavaatigut?” Jehovap pruffiitini ataqqivaa nammineq aalajangiisinnaatitaanera akueralugu. Takorlooriaruk Esaja qanoq nuannaartigisimassasoq ima akigami: “Piareersimavunga, aallartinnga!” — Esaja 6:8.

9, 10. (a) Qanoq isiginnittaaseqarluta Jehovamut kiffartortariaqarpugut? (b) Sooq uummatikkut iluunngarluta Jehova kiffartorfigisariaqarput?

⁹ Inuit Guutimut kiffartorniarlutik kiffartorniannginnerlutilluunniit namminneq aalajangersinnaavaat. Jehovap kissaatigaa kajumilluta kiffartorfigissagitsinni. (Atuaruk Josva 24:15). Kajuminnatik Guutimut kiffartortut taassumannga iluarisaasinnaanngillat; aamma inunnit iluarineqarniaannarlutik pallorfiginnittut akuerinngilai. (Kolossemiut 3:22) Anersaakkut ittunut tunngassuteqanngitsut pallorfiginninnitsinnut akornutaatillugit ‘erliguussilluta’ illernartumik kiffartoraluarutta Guutimit iluarineqarsinnaanavianngilagut. (2 Mosesi 22:28) Jehovap nalunngilaa uummatikkut iluunngarluta kiffartorfigigutsinni iluaqutigissagipput. Mosesip Israelikkut kajumissaarpai inuuneq qineqqullugu Jehovap ‘asaneratigut naalanneratigullu attavigittuinnarneratigullu’. — 5 Mosesi 30:19, 20.

 ¹⁰ Itsaq Israelimi kunngip Daavip Jehova ima erinarsorfigaa: “Ullormi sorsuffigisanni innuttatit kajumillutik sassarumaarput.” (Tussiaat 110:3) Inuppassuit aningaasaqarnikkut toqqissisimanissaq aliikkutassallu inuunerminni salliutittarpaat. Jehovamilli asannittut illernartumik kiffartornertik sunit allanit tamanit pingaarnerutippaat. Nutaarsiassamik nuannersumik aallussilluarlutik oqaluussissutiginninnerat sunik pingaarnerpaatitsinerannut ersiutaavoq. Qularutiginngilluinnarpaat Jehovap ullormut pisariaqartitaminnik matussusiiumaarnera. — Matthæusi 6:33, 34.

Pilliutit Guutimit iluarisaasut

11. Israelikkut Jehovamut pilliuteqartarnermikkut suna neriuutigisarpaat?

¹¹ Mosesip inatsisai atuukkallarmata Guutip innuttai taassumannga iluarineqarumallutik akuerisaasunik pilliuteqartarput. Mosesimik allakkat pingajuanni 19:5-imi ima allassimavoq: “Pilliutit nereqatigiissutissat [Jehovamut] sassaanniaraangassigit maleruagassat maleruassavasi [Jehovamit] iluarineqaqqullusi.” Biibilip atuagartaani tamatumani aamma ima allassimavoq: “Qujaniutitut [Jehovamut] pilliutissamik sassaassaqarussi iliuuseqassaasi [Jehovamit] iluarineqaatissassinnik.” (3 Mosesi 22:29) Israelikkut Jehovamut pilliivimmi uumasunik akuerisaasunik pilliuteqaraangata innerup pujuata ‘tikka Jehovamut naamajuminartuusarpoq’. (3 Mosesi 1:9, 13) Jehovap innuttami asanninnerannut ersiutaasut taakku nuannaarutigisarlugillu akuerisarpai. (1 Mosesi 8:21) Inatsisini taakkunani najoqqutassiaq suli atuuttoq imaappoq: Jehovamut akuerineqarsinnaasunik pilliuteqartut taassumannga iluarineqartarput. Pilliutit suut taassuma akuerisarpai? Inuunitsinnut tunngassuteqartut marluk sammissavavut: Pissusilersornerput oqaloriaaserpullu.

12. Pilliutigisavut pissutsitsigut qanoq ililluta Jehovap isaani maajunnartunngortissinnaavavut?

¹² Paulusip Romamiunut allakkamini Romamiut kajumissaarpai timitik “[sassaatissagaat] pilliutitut uumasutut illernartutullu Guutip iluarinartitaatut, tamanna tassaassammat anersaakkut [guutisiornerat]”. (Romamiut 12:1) Inuup Guutimit iluarineqarumalluni timini illernartuutittuartariaqarpaa. Tupamik, betelimik (qaqqortarissamik areca-mik — Asiami mamarineqartorujussuarmik) ikiaroorniutinillu atuisarnikkut imigassamilluunniit atornerluinikkut mingutsikkaanni pilliutigisat naleqassanngillat. (2 Korinthimiut 7:1) Aamma qanorluunniit kinguaassiuutitigut inuunerlukkaanni pilliutigisat Jehovap isaani maajunnartunngortarput, ‘kinguaassiuutitigut inuunerluttoq timiminut ajortuliortarmat’. (1 Korinthimiut 6:18) Inuk Guutimit iluarineqarumalluni ileqqumigut ‘tamatigut illernartuusariaqarpoq’. — 1 Petrusi 1:14-16.

13. Sooq Jehova unnersiutigisariaqarput?

¹³ Pilliutit Jehovap nuannaarutigisartagai allat oqalussinnaassutsitsinnut tunngassuteqarput. Jehovamik asannittut taanna ajunngitsumik eqqartortuaannarpaat — sumiluunniit, aamma  angerlarsimaffimminni. (Atuakkit Tussiaat 34:2-4). Tussiaatit 148-150 atuakkit, maluginiarullu tussiaatini pingasuni taakkunani Jehovamik unnersiutiginninnissarput qanoq kajumissaarutigineqartigisoq. Aap, “erinalimmik unnersiutiginninneq nuanneqaaq peqqusersuitsunut”. (Tussiaat 33:1) Maligassattalu, Jiisusip Kristusip, erseqqissarpaa nutaarsiassamik nuannersumik oqaluussissutiginninnikkut Guutimik unnersiutiginninneq qanoq pingaaruteqartigisoq. — Lukasi 4:18, 43, 44.

14, 15. Hoseap Israelikkut sunik pilliuteqaqqullugit kajumissaarpai, Jehovalu qanoq misigiva?

¹⁴ Aallussilluarluta oqaluussisarnerput Jehovamik asanninnitsinnut taassumanngalu iluarisaajumanitsinnut ersiutaavoq. Assersuutigalugu eqqarsaatigeriaruk pruffiitip Hoseap Israelikkunnut guutipilussiortunut Guutimillu iluarisaajunnaarsimasunut kajumissaarutaa. (Hosea 13:1-3) Hoseap taakku oqarfigai Jehovamut ima qinussasut: “Ajortulianik tamanik isumakkiisartutit tunissutiginiakkavut ilassikkit; qarlutta inerititaannik tunissagatsigit.” — Hosea 14:2, 3.

¹⁵ Oqariartaatsimi “qarlutta inerititaannik”-mi pineqarpoq ilumoorluni oqaatsillu eqqarsaatigilluakkat atorlugit Guutimik ilumoortumik unnersiutiginninneq. Taamatut pilliuteqartartut Jehovap qanoq misigissuseqarfigai? Jehova ima oqarpoq: ‘Nuannaarlunga asassavakka uummatinnit pisumik.’ (Hosea 14:5) Jehovamut taamatut pilliuteqartartut taassumannga isumakkeerfigineqarlutillu iluarineqartarput taassumunngalu ikinngutaalertarlutik.

16, 17. Upperneq kajumississutigalugu nutaarsiassamik nuannersumik oqaluussissutiginnittoqaraangat Jehova qanoq misigisarpa?

¹⁶ Kikkut tamarmik takkuanni Guutimik unnersiutiginninneq pallorfiginninnermi ilumoortumi pingaaruteqartuaannarsimavoq. Tussiaasiortumut Guutimik ilumoortumik naalannarsisitsineq ima pingaaruteqarsimatigaaq taanna ima qinulluni: “[Jehova], ilassikkit kajumissutsinnik qaninnit pilliutiginiakkakka.” (Tussiaat 119:108) Ullumikkummi? Ullutsinni inupparpassuit pillugit Esaja ima siulittuivoq: “[Jehovap] unnersiutigineqarnissaa oqaatigissavaat.” Jehovallu ima akissavai: “Pilliiviutinni [taakkua tunissutaat] ilassillugit tigussavakka.” (Esaja 60:6, 7) Oqaatsit taakku eqquutitillugit inuit millionilikkuutaat ‘Guuti pilliivigiuarpaat qujaniutinik, tassa qarlut aqqanik nassuerutiginnittut inerititaannik.’ — Hebræerit 13:15.

¹⁷ Illimmi? Guutimut akuerisaasunik pilliuteqartarpit? Taamaanngippat pisariaqartunik allannguinissat kikkullu tamarmik takkuanni Jehovamik unnersiutiginnittalernissat aalajangiusimaviuk? Uppernerit kajumississutigalugu nutaarsiassaq nuannersoq oqaluussissutigisalerukku pilliutit ‘tamanna [Jehovap] pitsaanerutissavaa nersutinit pilliutigineqartunit’. (Atuakkit Tussiaat 69:31, 32). Qularutiginngilluinnarsinnaavat qujaniutitut pilliutivit ‘tikka naamajuminartoq’ Jehovamut anngukkumaartoq taassumanngalu iluarineqalerumaartutit. (Ezekieli 20:41) Tamanna nuannaarutigingaassavat.

‘Jehovap iluartoq pilluaqqusarpaa’

18, 19. (a) Ullumikkut Guutimut kiffartorneq inuppassuarnit qanoq isigineqartarpa? (b) Guutimit iluarineqarunnaarneq qanoq kinguneqartarpa?

¹⁸ Ullumikkut inuppassuit Malakip nalaanisut ima isummertarput: “Iluaqutaanngilaq Guuti kiffartuukkaluaraanni. Sussarsissutigisimavarput peqqussutai naammassigaluaratsigit.” (Malaki 3:14) Taakkua pigisaleritungaaramik Guutip siunertai takorluukkatut inornartutut inatsisaalu atorsinnaajunnaarsimasutut isigisarpaat. Nutaarsiassamik nuannersumik oqaluussissutiginninneq  piffissaajaataanerarlugulu kamannarnerarpaat.

¹⁹ Naatsiivimmi Edenimili taamatut isumaliortaaseqartoqarpoq. Saatanip Eva qularunnaarsippaa inuuneq Jehovap taassumunnga tunniussimasaa naleqavinngitsoq iluarinninneranillu suusupaginnilersillugu. Ullumikkuttaaq Saatani inunnik suli isumaqalersitsiniaavoq Guutip piumasaatut iliornikkut angusaqartoqarsinnaanngilluinnarneranik. Evalli uiatalu paasivaat Guutimit iluarineqarunnaarnermikkut inuunertik annaallugu. Taakkua maligassiuinerlunnerannik malinnittut aamma qanittukkut taamatut misigisaqassapput. — 1 Mosesi 3:1-7, 17-19.

20, 21. (a) Uillarneq Sareptamiu sua, iliuusialu qanoq kinguneqarpa? (b) Uillarneq Sareptamiu qanoq ilaartariaqarparput, aamma sooq?

²⁰ Adamip Evallu alianartumik toqunerannit allaanerulluinnartumik Eliap uillarnermik Sareptamiumik eqqaaneqareersutut oqaloqateqarnerata kingorna qanoq pisoqarsimanersoq misissoriartigu. Arnaq Eliap oqaasii kajumissinartut tusareeramigit iffiorluni aallartippoq pruffiitilu iffiukkaminik siulliullugu tunillugu. Taava Jehovap Elia aqqutigalugu neriorsuutini eqquutitippaa. Ima oqaluttuarineqarpoq: “[Uillarneq] nammineq taassumalu ilaqutai Elialu sivisuumik inuussutissaqarput. Qajuusat qummuattamiittut nungunngillat kannilu uuliaasivik imaarunnani, soorlu [Jehova] Elia aqqutigalugu taama oqarsimasoq.” — 1 Kunngit 17:15, 16.

²¹ Uillarnerup Sareptamiup iliuuserisaa ullumikkut inuit inuusut milliardillit ilaasa ikittuinnaat iliuuseriumasarpaat. Taanna Guutimik annatsitsisumik tatiginnilluinnarpoq, Guutillu taanna imminiiginnanngilaa. Oqaluttuaq Biibilimeersoq taanna oqaluttuallu allat Biibilimeersut Jehovamik tatiginnittariaqarnitsinnut uppernarsaataapput. (Atuakkit Josva 21:43-45; 23:14). Ullumikkut Jehovap Nalunaajaasuisa misigisartagaat Jehovap iluarisaminik pakatsisitsinngisaannarneranut takussutissaapput suli allat. — Tussiaat 34:7, 8, 18-20. *

22. Sooq Guutimit iluarisaajumalluta iliuuseqapallattariaqarpugut?

²² Ulloq Guutip eqqartuussiffissaa ‘inuiannut nunarsuarmi tamarmi najugaqartunut tamanut’ nalliuttussaq nalliutingajalerpoq. (Lukasi 21:34, 35) Tamatumannga qimaasoqarsinnaanngilaq. Pisuussutit pigisallu ilorrisimaarnartut suulluunniit naleqanngivipput Guutip eqqartuussisunngortitaanit ima oqarfigineqartussaanerput eqqarsaatigalugu: “Qaagitsi, ataatama pilluaqqusai, naalagaaffik silarsuup tunngavilerneqarneraniit ilissinnut pisassarititaasoq kingornussarisiuk.” (Matthæusi 25:34) Aap, Jehovap ‘pilluaqqussavaa naapertuilluartoq; sernissussavaa iluarinninnerminik, eqqortinnaveeqqussuarmillusooq.’ (Tussiaat 5:12, NV [5:13]) Guutimit iluarisaajumalluta iliuuseqartariaqarpugut, ilaa?

[Quppernerup ataani ilanngussaq]

Eqqaamavigit?

• Sooq Jehova uummatikkut iluunngarluta kiffartorfigisariaqarparput?

• Pilliutit suut Jehovap ullumikkut akuerisarpai?

• Oqariartaatsimi “qarlutta inerititaannik”-mi suna pineqarpa, aamma sooq taamatut Jehovamut pilliuteqartariaqarpugut?

• Sooq Guutimit iluarisaaniarluta iliuuseqartariaqarpugut?

[Atuaqqissaarnermi apeqqutit]

[Qupp. 18-mi assiliartaq]

Anaanaasup piitsup suut isummerfigisariaqalerpai?

[Qupp. 20-mi assiliartaq]

Jehovamut qujaniarluta pilliuteqartarnerput qanoq iluaqutigisarparput?

[Qupp. 22-mi assiliartaq]

Jehovamik tatiginnilluinnarnerput pakatsissutiginngisaannassavarput