Siulittuut pingaaruteqangaartoq

‘Naalagaaffimmik iivangkiiliu [nutaarsiassaq nuannersoq, NV] taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ — MATTHÆUSI 24:14.

ILISIMATUUT isumaqatigiipput versi taanna pingaaruteqangaartoq. Pingaaruteqarpoq tamatumani peqqussutigineqartoq silarsuarmi tamarmi suliarineqartussaammat. Aamma pingaaruteqarpoq tamatumani uparuarneqarami kristumiut suna ulapputigisariaqaraat — tassa oqaluussineq, tamannalu aallunneqartussaavoq pisussaq pingaarutilik annertoorlu Jiisusip ‘naggatissamik’ taasaa sioqqullugu naggatissamullu tamatumunnga ilimasaarutaasussaalluni.

Versi taanna siulittuutaasoq ullumikkut eqquuppoq. Illit akuliunneqarputit nutaarsiassarmi nuannersoq qaaqqusissutaallunilu mianersoqqussutaavoq. Aalajangigassaqarputit: Guutip naalagaaffia akuerisinnaavat assortorluguluunniit. Aalajangiinerit inuuninnut sunniuteqassaaq.

Versit ataqatigiinneri misissoriartigik. Jiisusip nappakkami anniartitaaffimmi toqutaanissaa ullut arlallit sioqqullugit ajoqersukkat taanna siunissaq pillugu paasiniaaffigaat. Guutip naalagaaffiata pilersinneqarnissaa, Jiisusip eqqartortagaa, pillugu paaserusutaqarput. Aamma ‘silarsuup naggatissaa’ pillugu paaserusutaqarput. — Matthæusi 24:3.

Jiisusip akissutimini siulittuivoq sorsunnersuaqartarumaartoq, kaannersuaqartarumaartoq nappaassuaqartarumaartorlu toqoraataasunik nunalu sajorujussuartarumaartoq. Aamma oqarpoq inatsisaatsuliorneq ingasatsikkiartorumaartoq, upperisarsiornikkut eqqunngitsumik ilinniartitsisut amerlasuunik tammartitsiumaartut kristumiullu ilumoortut uumissorneqarlutillu malersorneqarumaartut. Tamakku tamarmik nutaarsiassaapput nuanniitsut. — Matthæusi 24:4-13; Lukasi 21:11.

Aammali nutaarsiassaqarpoq nuannersumik. Jiisusip tamakku eqqartoreerlugit oqaatsit qulaani issuarneqartut oqaatigai, oqaatsillu taakku ukiut hundredellit ingerlaneranni tiguartissutaallutillu neriuuteqalersitsisarput. Inuppassuit Jiisusip oqaasiisa pingaaruteqarnerat pillugu isumaqatigiikkaluarlutik qanoq isumaqarnerat pillugu isumaqatigiinngillat. Nutaarsiassaq nuannersoq sunarpiaagami? Naalagaaffik suua? Siulittuut taanna qaqugu eqquutissava, kikkunnillu eqquutitinneqassava? ‘Naggatissarlu’ suugami? Misissoriartigik.

 [Qupp. 2, 3-mi assiliartaq]

Iivangkiiliunik sisamanik Codex Washingtonianus assileqqissaarlugu saqqummersitaq. Matthæusi 24:14 erseqqinnerutinneqarpoq

[Suminngaanneernera]

Atuakkamit Facsimile of the Washington Manuscript of the Four Gospels in the Freer Collection 1912-imit