Piareersimagit!
Piareersimagit!
“Piareersimassaasi Inuup Ernera tikiutissammat nalunaaquttap-akunnerani ilimasuffiginngisassinni.” — MATTHÆUSI 24:44.
1, 2. (a) Pisussat Biibilimi siulittuutigineqartut suut tiigerip saassussineranut assersuunneqarsinnaappat? (b) Saassussisoqarpat ajunaarumanata susariaqarpugut?
ALIIKKUSERSUISARTUP tusaamasap tiigeriutini sungiusakkat ukiorpassuarni isiginnaartitseqatigisarpai. Taanna ima oqarpoq: “Uumasumit tatigineqarneq soorlu tassa silarsuarmi kusanarnerpaamik tunissutisisimalluni.” Tatigineqarunnaarporli oktobarip pingajuanni 2003-mi. Pissutissaqarsorinanngitsumik uumasuutimi ilaannit, tiigerimit qaqortumit 172 kilotut oqimaatsigisumit, saassunneqarpoq. Sungiusaasup taamatut saassunneqarnissani naatsorsuutiginngilluinnarpaa. Piareersimaffiginngilluinnarpaa.
2 Maluginiarnarpoq Biibilimi siulittuutigineqarmat ‘nersut qaasuttoq’ (NV) saassussiumaartoq, taamaattumillu piareersimasariaqarpugut. (Atuakkit Saqqummersitat 11:7; 17:15-18). Nersut qaasuttoq taanna sumut assersuutaava, kikkunnillu saassussissava? Nersut qaasuttoq annoraassatut aappallarissutut aappalutsigisoq Naalagaaffinnut Peqatigiinnut assersuutaavoq, “nassuillu qulit” politikkikkut pissaanilinnut tamanut assersuutaapput. Tupaallannartumik pisoqarumaarpoq, tassa Diaavulup silarsuaa imminut akerlilersulissaaq. Babylonersuaq, upperisarsiornerup eqqunngitsup silarsuarmi tamarmi naalagaaffissua, arnatut atortittartutut ittoq nassunnit qulinit saassunneqassaaq suujunnaarsitaassallunilu. Tamanna qaqugu pissava? Naluarput ulloq suna aamma qassinut tamanna pissanersoq. (Matthæusi 24:36) Nalunngilarpulli piffissami ilimasuffiginngisatsinni piumaartoq saassussisoqarnissaanullu piffissaq sivisujunnaartoq. (Matthæusi 24:44; 1 Korinthimiut 7:29) Taamaattumik pingaaruteqartupilussuuvoq anersaakkut piareersimanissarput, Kristusi saassussisoqarpat taannalu nammineq eqqartuussummik naammassinnikkiartorluni takkukkuni uagutsinnik aniguisitsiniassammat. (Lukasi 21:28) Taamatut piareersimajuarumalluta Guutimut kiffaasut aalajaatsut piareersimajuarnermikkut Guutip neriorsuutiminik eqquutititsineranik takunnittuusut ilinniarfigisinnaavavut. Itsaq inuusimasut taakkua maligassiaat malikkumavavut?
Noatut piareersimagit
3. Pissutsit qanoq ittut pissutigalugit aalajaalluni Guutimut kiffartornissaq Noamut unamminiarnartuua?
3 Noa inuutillugu nunarsuarmi pissutsit ajorluinnaraluartut taanna Guutip neriorsuutaata eqquunnerata misiginissaanut piareersimavoq. Takorlooriakkit unamminiarnartut Noap nalaatai inngilit pikitsitsiumatuut inuttut timeqalerlutik arnanik pinnersunik inooqateqalermata! Taakku pissusissamisuunngitsumik atoqatigiikkamik nalinginnaanngitsunik, ‘pissarsuarnik’, pissaaneqarnerungaarnerminnik qunusiarinninnissamut atornerluisunik, kinguaaqalerput. (1 Mosesi 6:4) Eqqarsaatigeriaruk inorujussuit taakkua sumiikkaluaraangamilluunniit ajoqusiisarlutik nakuusertarnerat. Tamatuma kingunerisaanik ajussuseqangaalerpoq, inuillu eqqarsartaasii pissusiilu ajorsilluinnarput. Taava kisimi oqartussaalluni Naalagaasoq Jehova piffissamik inuit ajortut suujunnaarsinneqarfissaannik aalajangiivoq. — Atuakkit 1 Mosesi 6:3, 5, 11, 12. *
4, 5. Ullutsinni pissutsit Noap ulluini pissutsinut atuuttunut sutigut assinguppat?
4 Jiisusi siulittuivoq ullutsinni pissutsit Noap ulluini pissutsinut atuuttunut assingujumaartut. (Matthæusi 24:37) Assersuutigalugu uaguttaaq anersaat ajortut pissutsinut sunniuteqartarnerannik takunnittuuvugut. (Saqqummersitat 12:7-9, 12) Anersaat taakku taakkuupput inngilipiluit Noap nalaani inuttut timeqalersut. Ullumikkut inuttut timeqalersinnaajunnaarsitaanikuugaluarlutik inuusuttut utoqqaallu pissaaneqarfigilerumallugit sapinngisartik tamaat iliortarput. Inngilit ajortut taakkua inunnit nunarsuarmi ajortunngortissinnaasimasaminnit iliuuserineqartartut ajorluinnarlutillu nikanarsaataasut inuit nalusaannik nuannaarutigisarpaat. — Efesosimiut 6:11, 12.
5 Guutip oqaasiani Diaavulu ‘toqutsisutut’ allaatigineqarpoq, aamma allassimavoq “toqup pissaaneranik peqartoq”. (Johannesi 8:44; Hebræerit 2:14) Imaanngilaq toqutikkusutani kikkulluunniit toqutissinnaagai. Anersaalli ajortup taassuma inuit naalliuutigilerumaagaannik toqussutigisinnaasaannillu iliortissinnaavai. Aamma inuit isumaat sunnertarpai uumissuilersillugit toqutserusulersillugillu. Assersuutigalugu USA-mi inunngortut 142-ugaangata ataaseq toqutaasarpoq. Isumaqarpit Jehovap ullumikkut nakuuserneq nalinginnaallunilu siunertaqanngitsoq Noap nalaaninngarnit maluginiannginnerugaa? Akuliunnaveersaassava?
6, 7. Noap ilaqutaasalu qanoq ersersippaat upperlutillu Guutimik mianerinnittuullutik?
6 Kingusinnerusukkut Guutip Noa oqarfigaa aalajangersimalluni nunarsuarmut ulersuartitsiniarluni uumassuseqartut tamaasa nungutikkumallugit. (1 Mosesi 6:13, 17) Illerfissuartut ilusilimmik umiarsualiornissaanut ilitsersuuppaa. Noa ilaqutaalu umiarsualiulerput. Naalannissamut Guutillu eqqartuussutini naammassimmagu piareersimanissamut suna iluaqutigaat?
7 Guutimik mianerinninneq upperluarnerlu kajumississutigalugit Noa ilaqutaalu Guutip peqqusineratut iliorput. (1 Mosesi 6:22; Hebræerit 11:7) Noa, ilaqutariinnut ittuusoq, Guutimut attaveqarluartuarpoq taamanikkullu silarsuarmi iliuuserineqartartunik ajortunik iliuuseqarnaveersaartarluni. (1 Mosesi 6:9) Nalunngilaa nammineq ilaquttanilu mianersortariaqarlutik avatangiisiminniittutut nakuusertunngorumanatillu oqaluukkuminaalliumanatik. Ulluinnarni sammisartakkaminnit tiguartinnginnissaat pingaaruteqarpoq. Guutip taakku suliassaqartippai, ilaqutariinniittullu tamarmik tamatuminnga pingaarnerpaatitsinissaat pingaaruteqarluinnarpoq. — Atuakkit 1 Mosesi 6:14, 18.
Noa ilaqutaalu piareersimapput
8. Sumit erserpa Noap ilaqutai Guutimut tunniusimasuusut?
8 Oqaluttuami Biibilimiittumi ilaqutariinni ittuusoq, Noa, sammineqarneruvoq, aammali taassuma nulia, erneri ukuaalu Jehovamik pallorfiginnittuupput. Pruffiitip Ezekielip oqaasiinit erserpoq Noa taassuma nalaani inuusimasuuppat Noap ernerisa ataatamik naapertuilluartuunera tunngavigalugu aniguisitaanissartik naatsorsuutigisinnaasimassanngikkaluaraat. Naalanniarlutik naalannginniarlutilluunniit aalajangernissaminnut naammattumik utoqqaassuseqarput. Taamaattumik Guutimik asanninnerminnik taassumalu aqqutigeqqusaanik nuannarinninnerminnik namminneq ersersitsisimassapput. (Ezekieli 14:19, 20) Noap ilaqutai taassuma siunnersuutaanik malinnipput taassumatullu upperisaqarlutik, aamma allat sunniiniarnerat Guutip imminnut suliassiissutigisaanik suliarinninnissaminnut akornutaatinngilaat.
9. Ullumikkut kikkut ersersittarpaat Noatut uppissuseqarlutik?
9 Ilaqutariinni ittuusut silarsuaq tamakkerlugu qatanngutigiissuarnut ilaasut Noa ilaarniarlugu sapinngisartik tamaat iliuuseqartut takullugit qiimmaallannangaarami! Nalunngilaat ilaquttamik nerisassaqartinnissaat, atisassaqartinnissaat, inissaqartinnissaat ilinniagaqartinnissaallu naammanngitsoq. Aamma anersaakkut pisariaqartitaannik matussusiisariaqarput. Taamaaliornermikkut ersersittarpaat Jehovap akuliunnissaanut piareersimallutik.
10, 11. (a) Noakkut umiarsuarmiitillutik qularnanngitsumik qanoq misigisimasimassappat? (b) Imminut qanoq aperisariaqarpugut?
10 Noa, taassuma nulia, erneri ukuaalu immaqa ukiut 50-it missiliorlugit ingerlaneranni umiarsualiorput. Umiarsualiortillutik hundredeleriarlutik tassunga ikisarlutillu tassannga niusarsimassapput. Ussissarpaat, peqqumaatissanik ikioraaffigalugu uumasullu ikiorartillugit. Ulloq pingaarutilik kiisami nalliuteqaaq. Ukiumi 2370-imi Kr.in.si. qaammatip aappaata ulluisa 17-ianni umiarsuarmut ikipput. Jehovap matu matuaa, siallilerporlu. Takorloorsinnaaviuk? Najukkami tamatumani qarsutsinerinnaanngilaq. Erngit qilaanngusaasap qulaaniittut qaarput, sialussuarlu kuisuinnaalluni umiarsuarmut torarpoq. (1 Mosesi 7:11, 16) Inuit umiarsuup silataaniittut toqorarput, umiarsuup iluaniittut annaanneqartut. Noakkummita qanoq misigisimasimassappat? Guutimut qujamasungaarsimassapput, ilaa? Qularnanngitsumilli aamma ima eqqarsarsimassapput: ‘Qujanassusia Guutimik ilumoortumik saqeqateqarlutalu piareersimagatta!’ (1 Mosesi 6:9) Takorloorsinnaaviuk illit Harmagedonimit aniguisimallutit taakkunatulli qamannga pisumik qujamasungaarlutit?
11 Ajugaqanngitsoq Saatanip pissutsinik aaqqissuussineranik matuminnga suujunnaarsitsiniarluni neriorsuutiminik eqquutititsiniarnermini akornuserneqarsinnaanngilaq. Imminut ima aperigit: ‘Guutip neriorsuutaasa tamavimmik, allaat annikitsualuttortaat ilanngullugit, piffissarlu taassuma aalajangigaa eqqorlugu eqquutitinneqarumaarnerat qularutiginngilluinnarpara?’ Tamanna qularutiginngilluinnarukku, taava piareersimagit ‘Guutip ullussaanik’ qanilliartupallattumik eqqarsaatiginnittuartarnikkut. — 2 Petrusi 3:12.
Mosesi eqqumavoq
12. Mosesip suut anersaakkut ittunik takorluuerpiarsinnaajunnaassutigisinnaagaluarpai?
12 Maligassiuisoq alla sammeriartigu. Silamiut isiginnittaasiannit isigalugu Mosesi Egyptenimiut silarsuaanni iluaqutigingaarsinnaasaminik inissisimaffeqarpasippoq. Faraop panianit qitornavissiartaarineqarami qularnanngitsumik ataqqineqangaarpoq, nerisassanik mamarunarsagaannarnik nerisarluni, atisanik pitsaanersiugaannarnik atisaqartarluni akimanerpaanilu najugaqarluni. Aamma ilinniagartuujuvoq. (Atuakkit Apustilit Suliaat 7:20-22). Immaqa aamma kingornussassarpassuaqarpoq.
13. Sooq Mosesip Guutip neriorsuutai pingaarnerpaatittuarsinnaasimavai?
13 Mosesip mikisuulluni angajoqqaaminit ilinniartinneqarnini Egyptenimiut guutipilussiornerata qanoq sianiilliornerutigineranik takunnissinnaannguutigisimassagunarpaa. (2 Mosesi 32:8) Egyptenimiut ilinniartitaanermik aaqqissuussinerat kunngikkormiullu pigissaarnersuat Mosesip pallorfiginninnermik ilumoortumik qimatsissutiginngilai. Siuaasaminut Guutip neriorsuutai eqqarsaatigersuataartarsimassavai Guutillu piumasaatut iliornissamut piareersimanissani sakkortuumik kissaatigisimassallugu. Mosesimmi Israelikkut ima oqarfigai: “Jahvep. . . , Aaperaap Guutiata Iisaallu Guutiata Jaakullu Guutiata ilissinnut aallartippaanga.” — Atuakkit 2 Mosesi 3:15-17.
14. Mosesip uppissusia sapiissusialu qanoq misilinneqarpat?
14 Mosesip Egyptenimiut guutigineragaannik uumassuseqanngitsunik guutipiluliat piviusutut isiginagit Jehova, Guuti ilumoortoq, piviusutut isigaa. ‘Takussaanngitsumik isigisaqarlunilusooq’ inuuvoq. Mosesip Guutip innuttaasa aniguisitaajumaarnerat upperaa, naluaali tamanna qaqugu pissanersoq. (Hebræerit 11:24, 25, 27) Hebræerit kiffaanngissuseqalernissaannik kissaateqangaarnera inussiamik Israelikkuusumik ajortumik pineqartumik illersuineranit erserpoq. (2 Mosesi 2:11, 12) Jehovalli piffissarititaa suli nalliutinngilaq, taamaattumik Mosesi nunami allami qimaasutut inuusariaqarpoq. Qularnanngitsumik Egyptenimi kunngikkormiuni ilorrisimaarnartumik inooreerluni inoqajuitsumi inuulernini sungiukkuminaatsissimassavaa. Mosesili piareersimavoq Jehovap peqqussutigisaanik tamanik eqqumaffiginninnermigut. Taamaattumik Guutip Mosesi ukiuni 40-ni Midjanimeereersoq nunaqqataanik aniguisitsinermut atorsinnaasimavaa. Guutip peqqusineratigut naalalluni Egyptenimut uterpoq. Maanna piffissanngorpoq Mosesip Guutip imminut suliassiissutigisaanik, taassuma periaasia naapertorlugu suliarineqartussamik, suliarinninnissaanut. (2 Mosesi 3:2, 7, 8, 10) Mosesi, ‘inunnit tamanit anneruniajuinnerpaasoq’, Egyptenimut uterami Faraomut sassarnissaminut uppissuseqartariaqarlunilu sapiissuseqartariaqarpoq. (4 Mosesi 12:3) Ataasiaannarluni sassarnani perluit tulleriiaat takkuttaqattaarneranni sassaqqittaqattaarpoq, nalullugu qasseriarluni sassartussaanerluni.
15. Mosesi artornartorsioraluarluni Ataataminik qilammiusumik ataqqinninnissamut sooq periarfissarsiortarpa?
15 Ukiuni 40-ni tulliuttuni, 1513-imiit 1473-imut Kr.in.si., Mosesi arlaleriarluni pakatsisarpoq. Taamaakkaluartorli Jehovamik ataqqinninnissamut uummatikkullu iluunngarluni nunaqqatimi immisut iliornissaannik kajumissaarinissamut periarfissarsiortarpoq. (5 Mosesi 31:1-8) Taamaaliortarpoq Jehovap aqqa kisimilu oqartussaanera nammineq aterminit pingaarnerutikkamigit. (2 Mosesi 32:10-13; 4 Mosesi 14:11-16) Uaguttaaq pakatsisaraluarluta artornartorsiortaraluarlutalu Guutip naalakkersuineranik tapersersuiuartariaqarpugut, qularutiginagu Guuti pissutsinik iliuuseqarfiginnissinnaasoq allanit tamanit pitsaanerusumik aamma silatunerulluni naapertuilluarnerullunilu. (Esaja 55:8-11; Tussiaat 146:3) Aamma illit taama isumaqarpit?
Eqqumagitsi!
16, 17. Sooq Markusi 13:35-37-mi allassimasut uagutsinnut pingaaruteqangaarpat?
16 “Mianersoritsi! Eqqumagitsi! Naluarsimi taamaaliffissaa qaqugu nalliukkumaartoq.” (Markusi 13:33) Jiisusi taamatut mianersoqqusivoq pissutsit aaqqissuussaanerata ajortup matuma naggataatungaanut nalunaaqummik eqqartuigami. Maluginiakkit Jiisusip siulittuummi pingaarutilimmi matumani oqaasii kingulliit uku Markusimit allanneqartut: “Eqqumagitsi nalugassiuk illup naalagaa qaqugu tikiukkumaarnersoq — unnukkulluunniit unnuaqeqqarneraniluunniit kukkukuulluunniit angutivissap qarlorfiani ullaanngulerneraniluunniit — tassanngaannarmi tikiulluni sinittusi naammattooqinavaasi. Ilissinnut oqaaserisara una tamanut oqaaseraara: Eqqumagitsi!” — Markusi 13:35-37.
17 Jiisusip kajumissaarutaa eqqarsariaallannarpoq. Pigaartuuffiit assigiinngitsut sisamat eqqartorpai. Pigaartuuffiup kingulliup nalaani eqqumaniarnissaq unamminiarnassaaq, ullaassakkummi pingasut missaanniit seqernup nuinissaata tungaanuusarpoq. Sorsoriaatsinik paasisimasaqarluartut piffissaq tamanna akeqqamik tupaallatsitsiffissatut pitsaanerpaatut isigisarpaat, akeqqanik pakasaanissamut periarfissaalluarnerpaammat. Anersaakkut ittunut tunngatillugu aamma taamaappoq, maannakkummi silarsuaq itisuumik sinipporlusooq, uagullu immaqa eqqumaniarluta akiuussuataarpugut. Naggatissaq aniguisitaanissarlu siulittuutigineqartut misigissagutsigit ‘mianersortariaqarlutalu eqqumasariaqarnerput’ immannguaannarluunniit qularutigaarput?
18. Jehovamut nalunaajaasutut suna immikkut pisinnaatitaaffigaarput?
18 Uumasunik nujuillisaasartup allaaserisap aallaqqaataatungaani eqqaaneqartup tiigerimit saassunneqarnini anigorpaa. Biibilimili erseqqissumik siulittuutigineqarpoq upperisarsiornerup eqqunngitsup silarsuullu ajortup matuma sinnerata piuneerussinissami aniguinaviannginnerat. (Saqqummersitat 18:4-8) Qanortoq Guutip kiffaasa tamarmik, inuusuttut utoqqaallu, paasilissuk Noakkut pisimanerattut Jehovap ullussaanut piareersimaniarlutik sapinngisartik tamaat iliuuseqarnissartik qanoq pingaaruteqartigisoq. Silarsuarmi Guutimik kanngunarsaaffiusumi, upperisarsiornermik eqqunngitsumik ilinniartitsisut guuteqarneranillu qularinnittut guuteqannginneraasullu Guutimik asissuiffianni, inuuvugut. Taakkunannga sunnertinnaveersaartariaqarpugut. Maligassat allaaserisami matumani sammeriikkavut malitsigit Jehovamillu, ‘guutit tamarmik Guutigisaannik’, aap, ‘Guutimik angingaartumik, pissaasumik mianernangaartumillu’, illersuillutalu ataqqinninnissamut periarfissat eqqumaffigalugit. — 5 Mosesi 10:17, 1990.
[Quppernerup ataani ilanngussaq]
^ imm. 3 Oqaatsit “ukiut inuuffigisassaat 120-innaassapput” Mosesimik allakkani siullerni 6:3-mi allassimasut uani sammineqarput: Vagttårnet, 15. decembari 2010-moortoq, qupp. 30.
Eqqaamavigit?
• Sooq Noap ilaquttami anersaakkut pisariaqartitaat pingaartittariaqarpai?
• Noap nalaani pissutsit nalitsinni pissutsinut sutigut assingulluinnarpat?
• Sooq Mosesip pakatsisaraluarluni Jehovap neriorsuutai eqqaamajuarpai?
• Siulittuutit Biibilimiittut sorliit illit anersaakkut eqqumajuarnissamut kajumississutigaagit?
[Atuaqqissaarnermi apeqqutit]
[Qupp. 22-mi assiliartaq]
Noakkut Jehovap suliareqqusaanik suliarinninnissaq pingaarnerpaatittuarpaat
[Qupp. 23-mi assiliartaq]
Guutip neriorsuutai tutsuiginartut Mosesip eqqumajuarnissamut iluaqutigai
