Ilaqutariit kristumiuususi — “piareersimassaasi”
Ilaqutariit kristumiuususi — “piareersimassaasi”
“Piareersimassaasi, Inuup Ernera piffissakkut ilimaginngisassigut tikiutissammat.” — LUKASI 12:40.
1, 2. Sooq Jiisusip ‘piareersimaqqusissutaa’ eqqumaffigisariaqarparput?
‘INUUP ERNERA naalannassutsimini tikiuppat’ inuillu ‘avissaartiterpagit’ tamanna ilinnut ilaquttannullu qanoq kinguneqassava? (Matthæusi 25:31, 32) Piffissakkut ilimaginngisatsigut tamanna pisussaammat Jiisusip ‘piareersimaqqusissutaanik’ eqqumaffiginninnissarput pingaaruteqangaarpoq. — Lukasi 12:40.
2 Allaaserisap matuma siuliani sammineqarpoq uiusut, nuliaasut inuusuttullu akisussaaffimminnik pimoorussinermikkut ilaquttatik anersaakkut eqqumanissamut qanoq ikiorsinnaagaat. Maanna sammeriartigu ilaquttavut anersaakkut ingerlalluarnissaannut qanoq allatut ikiorsinnaagivut.
Isit ‘tappissuutiguk’
3, 4. (a) Ilaqutariit kristumiut sunaveersaartariaqarpat? (b) Isitsinnik ‘tappissuutitsineq’ qanoq paasisariaqarpa?
3 Ilaqutariit Kristusip tikiunnissaanut piareersimajumallutik pallorfiginninnermit ilumoortumit allamut saassuteqarnaveersaartariaqarput. Pigisalerituneq napiaaniutaammat ilaqutariit ikinngitsut napitiffigisimasaat, silatusaassaagut Jiisusip isitsinnik ‘tappissuutitsinissaq’ pillugu oqaasii eqqumaffigigutsigit. (Atuakkit Matthæusi 6:22, 23). * Soorlu qulleq aqqutitsinni orlujumanata qaammaqqutigisinnaagipput, taamatuttaaq ‘uummatitta isaanik’ isigisavut qaammaqqutigisinnaavavut anersaakkut orlunaveersaarutigalugit. — Efesosimiut 1:18.
4 ‘Uummatitta isaanik’ tappissuutitsinissarput qanoq paasisariaqarami? ‘Isi tappissoq’ ataasiinnarmik nakkussivorlusooq. Pigisat ilaquttattalu timikkut pisariaqartitaannik matussusiinissaq inuunitsinni pingaarnerpaatinnagit Jehovamik pallorfiginninneq pingaarnerpaatipparput. (Matthæusi 6:33) Tassa pigisavut naammagaavut Guutimullu kiffartorneq inuunitsinni salliutillugu. — Hebræerit 13:5.
5. Inuusuttuaqqap Guutimik pallorfiginninnermik pingaarnerpaatitsinini qanoq ililluni ersersippaa?
5 Meeqqat isiminnik tappissuutitsinissaminnut ilinniartinneqarpata, tamanna kinguneqarluarsinnaavoq. Inuusuttuaraq Etiopiamiu assersuutigeriartigu. Taanna atuarfimmi ima pikkoritsigaaq meeqqat atuarfianni atuarunnaarami aningaasanik ikiorsiissutissanik neqeroorfigineqarluni ilinniagaqarniassagami. Jehovamilli pallorfiginninnermik pingaarnerpaatitsigami neqeroorummut qujaannarpoq. Tamatuma kinguninngua suliffissamik neqeroorfigineqarpoq, akuersiguni 22.000 kronit missaanniittunik qaammammusiaqartussaalluni — nunami tamatumani inuit amerlanersaasa qaammammusiarisartagaannut naleqqiullugit amerlanipilussuarnik. Isiminilli ‘tappissuutitsigami’ pioneritut kiffartornissamik pingaarnerpaatitsivoq. Angajoqqaani sussanerluni apereqqaartariaqanngilai. Angajoqqaavisa tusaramikku neqeroorummut qujaannarsimasoq tamanna nuannaarutigaat, panitsillu paasitippaat qanoq tulluusimaarutigitigalugu!
6, 7. Navianartut suut mianersorfigisariaqarpavut?
6 Jiisusip oqaasii Matthæusi 6:22, 23-mi allassimasut piumatussuseq pillugu mianersoqqussutitaqarput. Jiisusip ‘isi tappissoq’ eqqaavaa tamatumunngalu akerliusutut eqqaallugu ‘isi ajortoq’. Oqaaseq grækerisooq matumani ‘ajortoq’-mik nutserneqartoq aamma ‘piumatooq’-mik ‘sinngatooq’-millu nutserneqarsinnaavoq. Jehovap taamatut pissuseqarneq qanoq isumaqarfigaa? Biibilimi ima allassimavoq: “Kinguaassiuutitigut inuunerlunneq mingunnartullu suulluunniit piumatuussuserlu taaneqassanngillalluunniit akornassinni.” — Efesosimiut 5:3.
7 Allat piumatunerat malugiuminarnerusinnaavoq; namminerli piumatugaanni tamanna nammineq takujuminaattarpoq. Taamaattumik Jiisusip siunnersuutaa una malittariaqarparput: “Sissueritsi mianersorlusilu piumatussusermut sumulluunniit.” (Lukasi 12:15) Sissuertariaqarpugut sunik uummammioqarnerluta paasiniarlugu imminut misissortarluta. Ilaqutariit kristumiut eqqarsaatigeqqissaartariaqarpaat aliikkutassanut, sunngiffimmi soqutigisanut pigisanullu qanoq piffissartortigalutillu aningaasartortiginerlutik.
8. Arlaannik pisiarerusutaqaraangatta qanoq silatusaartarsinnaavugut?
8 Arlaannik pisiarerusutaqaruit akissaqarnerlutit eqqarsaatigisariaqarpat. Tamatumali saniatigut aamma imminut ima aperisariaqarputit: ‘Pisiama atortarnissaa aserfallatsaaliortarnissaalu piffissaqarfigaara? Eqqortumik atornissaa qanoq sivisutigisumik ilinniagassaava?’ Ilissi inuusuttut, nioqqutissat pillugit silarsuarmi ussassaarutit upperiinnaqinasigit, aamma isumaqaleqinasi atisanik akisuunik akisuunilluunniit allanik peqartariaqarlusi. Pigisassi naammaginissaat ilikkarsiuk. Tamatta eqqarsaatigisariaqarparput perusutatsinnik pisinerput ilaqutariittut Inuup Ernerata tikiunnissaanut piareersimanissatsinnut iluaqutaassanersoq. Jehovap neriorsuutaa una upperiuk: “Iperassanngilakkit imminiiginnassanallu.” — Hebræerit 13:5.
Anersaakkut ittunik anguniagaqaritsi
9. Ilaqutariit anersaakkut ittunik anguniagaqarnertik qanoq iluaqutigisinnaavaat?
9 Ilaqutariit uppernikkut nakussatsinneqarumallutik anersaakkullu ingerlalluarnerujumallutik iliuuserisinnaasaat allat tassaapput anersaakkut ittunik imminut anguniagassinneq anguniarlugillu iliuuseqarneq. Ilaqutariit taamaaliornertik Jehovamut kiffartornerminni qanoq ingerlalluartiginerminnik naliliinissamut sammisassaminnillu toqqaanermut tunngatillugu eqqortumik pingaarnersiuinissamut iluaqutigissavaat. — Atuaruk Filippimiut 1:10.
10, 11. Ilissi ilaqutariittut anersaakkut ittunik sunik anguniagaqarpisi, siunissamilu sunik anguniagaqarusuppisi?
10 Ilaqutariit inornanngitsunik imminnut anguniagassinnertik aamma iluaqutigingaarsinnaavaat. Assersuutigalugu anguniagarineqarsinnaavoq ullormut allassimaffiup ullut tamaasa oqaloqatigiissutigisarnissaa. Ilaqutariinniittut akissutaat aallaavigalugit ilaqutariinni ittuusup nalilersinnaavaa taakku tamarmik immikkut anersaakkut ittunik qanoq pingaartitsitiginersut. Aamma ilaqutariit ullut tamaasa Biibilimik atuaqatigiittuartarniarlutik iliuuseqarunik meerartaasut atuffarissarnissaminnut Guutillu oqaasianik paasinnilluarnerunissaminnut periarfissaqarluassapput. (Tussiaat 1:1, 2) Aamma qinnutitta pitsaanerulersinnissaat anguniagarisariaqarparput, ilaa? Anersaap inerititaanik ineriartortitsinerunissaq anguniagassaqqissuuvortaaq. (Galatiamiut 5:22, 23) Ilaqutariit aamma anguniagarisinnaavaat inunnik oqaluussinermi naapitaminnik misiginneqatiginninnissamut periarfissarsiortarnissaq. Taamaalillutik meeqqat misigittartuunissaq ilikkarsinnaavaat, tamatumalu kinguneranik immaqa pionerinngorusulersinnaapput ajoqersuiartortitanngorusulersinnaallutilluunniit.
11 Illit ilaquttatillu sunik allanik anguniagaqarsinnaavisi? Oqaluusseqataasarnerunissarsi anguniagarisinnaavisiuk? Oqarasuaatikkut, aqqusinermi niuertarfinniluunniit oqaluussinermi annilaangasarnerup ajugaaffiginissaa sulissutigisinnaavisiuk? Oqaluussisartunik pisariaqartitsiffiunerusuni kiffartulersinnaavisi? Arlarsi oqaatsinik allanik ilinnialersinnaava nutaarsiassap nuannersup nunami allamiunut oqaluussissutiginissaa siunertaralugu?
12. Ilaqutariinni ittuusut ilaquttatik anersaakkut ineriartornissaannut ikiorniarlugit susinnaappat?
12 Illit ilaqutariinni ittuugavit ilissi ilaqutariittut sutigut siumukarsinnaanersusi aalajangersimasunillu sunik immissinnut anguniagassissinnaanersusi eqqarsaatigisariaqarpat. Ilaqutariittut anguniakkasi piviusorsiortuusariaqarput pissutsinullu atukkassinnut piginnaanissinnullu naleqquttuusariaqarlutik. (Ussatit 13:12) Soorunami anguniakkassi anguniarnissaat piffissaqarfigisariaqarparsi. Assersuutigalugu fjernsynertarnersi killilersinnaavarsi anersaakkut ineriartornartunik sammisaqartarnissassinnut piffissaqarnerulerniassagassi. (Efesosimiut 5:15, 16) Ilaqutariittut anguniakkasi angujumallugit ilungersoritsi. (Galatiamiut 6:9) Ilaqutariit anguniakkatik anersaakkut ittut anguniarlugit iliuuseqarpata, siumukarnerat ‘tamanit takuneqarsinnaassaaq’. — 1 Timotheusi 4:15.
Unnummi aalajangersimasumi ilaqutariittut anersaakkut ittunik sammisaqaqatigiittuartaritsi
13. Ilagiit sapaatip-akunneranut ataatsimiittarnerinut tunngatillugu sumik allannguuteqartoqarpa, apeqqutillu suut eqqarsaatigisariaqarpavut?
13 Ilaqutariit Inuup Ernerata tikiunnissaanut ‘piareersimanissamut’ iluaqutigingaarsinnaasaasa ilaat tassaavoq 1. januaari 2009 aallarnerfigalugu ilagiit sapaatip-akunneranut ataatsimiittarnerinut tunngatillugu allannguuteqartoqarnera. Ilagiit atuakkamik atuaqqissaaqatigiinnerat unnummut ataatsimiiffiusumut ilivitsumut immikkoortinneqarunnaarluni maanna ilagiit Biibilimik atuaqqissaaqatigiinnerannik taallugu unnummut Teokratiimik Ilinniarfiusumut oqaluussinermullu tunngasumik ataatsimiiffiusumut ilanngunneqarpoq. Taamatut allannguisoqarpoq ilaqutariit kristumiut ikiorumallugit Biibilimik atuaqqissaaqatigiinnissamut unnummik aalajangersimasumik immikkoortitsinermikkut Jehovamut attaveqarnerminnik nakussatsitsinissaannut. Allannguuteqartoqarneranit ukiut pingasungajaat qaangiutereermata imminut ima aperisinnaavugut: ‘Piffissaqarnerulernera nammineq atuaqqissaarnermut ilaqutariittulluunniit atuaqqissaaqatigiinnermut atorluartarpara? Aaqqissuussamut tamatumunnga suna siunertaanersoq paasilluarpara?’
14. (a) Unnuup aalajangersimasup atuaqqissaarnissamut atortarnissaanut siunertaasoq pingaarneq suua? (b) Sooq atuaqqissaarnissamut unnummik aalajangersimasumik immikkoortitsinissaq pingaaruteqarpa?
14 Unnuup aalajangersimasup nammineq atuaqqissaarnermut ilaqutariittulluunniit atuaqqissaaqatigiinnermut atortarnissaanut siunertaasoq pingaarneq tassaavoq Guutimut attaveqarluarnerulernissaq. (Jaaku 4:8) Biibilimik atuaqqissaartarnissaq piffissaqarfigiuartarutsigu taamaalillutalu Pinngortitsisorput ilisarisimanerulerutsigu taassumunnga attaveqarluarnerulissaagut. Jehovamut attaveqarluarnerujartortilluta taassuma ‘uummatikkut tarnikkullu isumakkullu iluunngarluta nukivullu tamakkerlugit’ asanissaanut kajumissuseqarnerujartuinnassaagut. (Markusi 12:30) Aap, soorunami Guuti naalakkumallugulu ilaarumavarput. (Efesosimiut 5:1) Unnummi aalajangersimasumi ilaqutariittut anersaakkut ittunik sammisaqaqatigiittuartarnitsigut ilaqutariinniittut tamarmik ‘naalliunnartoqangaarnissaanut’ siulittuutigineqartumut ‘piareersimanissaannut’ pingaaruteqarluinnartumik iliuuseqartarpugut. (Matthæusi 24:21) Taamaaliortarnissarput inuuinnarnissamut aalajangiisuuvoq.
15. Unnuk ilaqutariittut anersaakkut ittunik sammisaqarfik ilaqutariinnut qanoq sunniuteqarsinnaava?
15 Unnuk ilaqutariittut anersaakkut ittunik sammisaqarfik aamma allamut iluaqutaavoq, tassa ilaqutariinniittut tamarmik attaveqatigiilluarnerulernissaannut. Sapaatit-akunneri tamaasa anersaakkut ittunik oqaloqatigiissuteqartarneq nuannisaqatigiissinnaanerannut sunniuteqangaarsinnaavoq. Aappariit attaveqatigiilluarnerulertarput Biibili pillugu misissueqatigiinnerup nuannersortaa misigigaangamikku. (Atuaruk Oqaluussisartup oqaasii 4:12). Angajoqqaat meeqqallu Guutimik pallorfiginneqatigiittut asanninneq, “ataasiussutsip qilerutaa naammalluinnartoq” (NV), ataasiussuseqalissutigisinnaavaat. — Kolossemiut 3:14.
16. Qatanngutit arnat pingasut unnummik Biibilimik atuaqqissaarfissamik immikkoortitsinerminnik qanoq iluaqutiginnissimanerat oqaluttuariuk.
16 Unnummik Biibilimik atuaqqissaarfissamik immikkoortitsinermik iluaqutiginnittut ilagaat qatanngutit arnat utoqqaat uillarnerusut pingasut. Arnat taakku illoqarfeqatigiipput ilaqutariinngikkaluarlutillu ukiorpassuarni ikinngutigiissimallutik. Ilagiittarnerorusupput, aammali ilagiittarnitik anersaakkut ittunik sammisaqarfiutikkusuppaat. Taamaammat isumaqatigiipput unnummik Biibilimik atuaqqissaaqatigiiffissaminnik immikkoortitsiniarlutik. Atuagaq „Et grundigt vidnesbyrd om Guds rige “ * atuaqatigiissutigisalerpaat. Taakkua ilaat ima oqaluttuarpoq: “Atuaqqissaaqatigiinnerput soqutiginartangaarmat amerlanertigut nalunaaquttap-akunneranit ataatsimit sivisunerusarpoq. Pissutsit ukiuni hundredelinni siullerni uppeqatitta atugarisimasaat takorloorniarsarisarpavut eqqartortarlugulu uagut taakkunatut atugaqaraluarutta qanoq iliussagaluarnerluta. Oqaluussigaangatta atuarnitsinni sammisavut atorniarsarisarpavut. Oqaluussinerput ajoqersuganngortitsiortornerpullu maanna aatsaat taama nuannertigalunilu sunniuteqarluartigaaq!” Ikinngutigiit pingasut taakku atuaqqissaaqatigiittarnermikkut anersaakkut nakussatsinneqaannaratik aamma attaveqatigiilluarnerulerput. Ima oqarput: “Atuaqqissaaqatigiittarnerput qujamasuutigeqaarput.”
17. Unnuk ilaqutariittut anersaakkut ittunik sammisaqarfik sunniuteqarluaqqullugu suut pisariaqarpat?
17 Ilissimi? Unnuk nammineq ilaqutariittulluunniit atuaqqissaarfissatut immikkoortinneqarsimasoq atorluartarpisiuk? Ilaannikkuinnaq atuaqqissaartaraanni, atuaqqissaarneq siunertarineqartoq naapertorlugu sunniuteqarnavianngilaq. Ilaqutariinniittut tamarmik piffissaq isumaqatigiissutigineqarsimasoq eqqorlugu piareersimasariaqarput, aamma pingaaruteqannginnerusut akornutaatinneqassanngillat. Aamma ilaqutariinni ittuusoq atuaqqissaaqatigiissutissanik ilaqutariinniittut tamarmik atoriaannaasinnaasaannik toqqaasariaqarpoq. Unnuit atuaqqissaaqatigiiffiusut taakku nuannersuutinniarlugit susinnaavit? Sunniuteqarluartumik ilinniartitsisarit, aamma atuaqqissaaqatigiinnissi qasukkarsimaarnartuullunilu ataqqinnippaluttuunissaa isumagiuk. — Jaaku 3:18. *
‘Eqqumallusilu’ ‘piareersimagitsi’
18, 19. Inuup Ernerata tikiutingajalerneranik ilisimaarinninnerit ilinnut ilaquttannullu qanoq sunniuteqartariaqarpa?
18 Silarsuarmi pissutsit ajorsiartuinnarmata erseqqippoq Saatanip silarsuaata ajortup ullussai kingulliit 1914-imiilli atuutilersimasut. Tamanna Harmagedonip nalliutingajalerneranut aarlerisaarutaavorlusooq. Inuup Ernera qanittukkut tikiutissaaq Jehovallu guutiitsunut eqqartuussutaanik naammassinnissalluni. (Tussiaat 37:10; Ussatit 2:21, 22) Tamatuminnga ilisimaarinninnerit ilinnut ilaquttannullu arlaatigut sunniuteqartariaqannginnerpa?
19 Jiisusip isitsinnik ‘tappissuutitseqqusinera’ malillugu iliorpit? Inuppassuit silarsuarmi matumaniittut pisuussutinik, tusaamasaanissamik pissaaneqarnissamilluunniit noqqaassutiginnittut pinerattut pinnasi ilissi ilaqutariittut anersaakkut ittunik anguniagaqarpisi? Unnuk ilaqutariittut atuaqqissaaqatigiinnissamut namminerluunniit atuaqqissaarnissamut immikkoortinneqarsimasoq atorluartarpisiuk? Aaqqissuussaq tamanna Jehovamut attaveqarluarnerulissutigalugulu ilaqutariittut attaveqatigiilluarnerulissutigaasiuk? Uiugaluaruit, nuliaagaluaruit, ernerugaluaruit paniugaluaruilluunniit ilaquttatit ‘eqqumanissaannut’ ikiorumallugit Jehovamit akisussaaffilerneqarsimanerit malillugu iliorpit, soorlu allaaserisap matuma siuliani tamanna sammigipput? (1 Thessalonikamiut 5:6) Taamaappat Inuup Ernerata tikiunnissaanut ilaqutariittut ‘piareersimassaasi’.
[Quppernerup ataani ilanngussat]
^ imm. 3 Oqariartaatsit “isit qaammarippat” aamma ‘isit qaamanerliorpat’ Ny Verden-Oversættelsen af De Hellige Skrifter naapertorlugu ima nutserneqarsimapput: “Isit tappissuuppat” aamma ‘isit ajortuuppat’.
^ imm. 16 Jehovap Nalunaajaasuinit saqqummersinneqartoq.
^ imm. 17 Suut atuaqqissaarneqarsinnaanerat pillugu unnullu ilaqutariittut anersaakkut ittunik sammisaqarfik pillugu siunnersuutit uaniipput: Vagttårnet-mi 15. oktobari 2009-moortumi qupp. 29-31; Guutip naalagaaffianut kiffartorneq-mi januaari 2011-moortumi qupp. 3-6.
Suna ilikkarpiuk?
• Nassuiaruk ilaqutariit kristumiut qanoq ‘piareersimasinnaasut’ . . .
‘tappissumik’ iseqarnermikkut.
anersaakkut ittunik anguniagaqarnermikkut.
unnummi aalajangersimasumi ilaqutariittut anersaakkut ittunik sammisaqaqatigiittuartarnermikkut.
[Atuaqqissaarnermi apeqqutit]
[Qupp. 15-mi assiliartaq]
Isi ‘tappissoq’ silarsuup matuma ussiiniutaanik akiuinissamut iluaqutigissavarput
