Illit inuuninni kina pingaarnerpaatippiuk?

“Illit kisivit . . . qutsinnerussaartutit nunarsuarmi tamarmi.” — TUSSIAAT 83:19.

1, 2. Sooq annaanneqarumalluni Jehovap aqqanik ilisimanninnerinnaq naammanngila?

IMMAQA Guuti ateqartoq paaseqqaarpat Tussiaat 83:19-mi allassimasoq ilinnut takutinneqarmat. Immaqa tupaallaatigaat versi una atuarakku: “Paasitserlugu illit kisivit — aqqit tassaasoq Jahve [imaluunniit Jehova] — Qutsinnerussaartuusutit nunarsuarmi tamarmi.” Taamanimiilli allassimaffik taannarpiaq qularnanngitsumik atortarpat allat Guutitsinnik asannittumik, Jehovamik, ilisarisimannilersinniarlugit ikioraangakkit. — Romamiut 10:12, 13.

² Pingaaruteqarpoq inuit Jehovap aqqanik ilisimannilernissaat, taassumali aqqanik ilisimannilersimaneq naammanngilaq. Maluginiaruk tussiaasiortup Jehova pillugu ilumoortoq suli alla annaanneqarnissatsinnut pisariaqarluinnartoq erseqqissaraa. Ima allappoq: “Illit kisivit . . . Qutsinnerussaartuusutit nunarsuarmi tamarmi.” Aap, Jehova qilammi nunarsuarmilu pingaarnerpaavoq. Sunik tamanik pinngortitsisuugami pinngortitami tamarmik imminut naalatsigitinnissaannik piumasaqarsinnaatitaavoq. (Saqqummersitat 4:11) Taamaattumik pissutissaqarluarpugut imminut ima aperinissamut: ‘Uanga inuuninni kina pingaarnerpaatippara?’ Apeqqummut tamatumunnga akissutissatta eqqarsaatigeqqissaarnissaa pingaaruteqarluinnarpoq!

Naatsiivimmi Edenimi apeqqusiineq

3, 4. Saatanip Eva salloqittarniarlugu sua, qanorlu kinguneqarpa?

³ Naatsiivimmi Edenimi pisimasumit erseqqilluinnarpoq inuunitsinni kia pingaarnerpaaneranik apeqqusiinerup ilungersunassusia. Tassani Jehovap inuit orpiup aalajangersimasup parnaanik nereqqunngilai. Inngililli pikitsitsisup, kingusinnerusukkut Saatanitut Diaavulutut ilisimaneqalersup, arnaq siulleq, Eva, usserpaa nammineq kissaatigisaanik Jehovap peqqussutaaninngarnit pingaarnerutitseqqullugu. (1 Mosesi 2:17; 2 Korinthimiut 11:3) Evap ussernartoq tamanna nakkaannarfigigamiuk ersersippaa Jehovap kisimi oqartussaaneranik ataqqinninnginnini. Evap Jehova inuunermini pingaanerpaatinngilaa. Saatanilli Eva qanoq ililluni salloqittarsinnaavaa?

⁴ Saatanip Eva oqaloqatigigamiuk peqquserloriaatsit assigiinngitsut arlallit atorpai. (Atuakkit 1 Mosesi 3:1-5). Siullermik, Saatanip Jehovap nammineq atia atunngilaa. Taamaallaat ‘Guutimik’ taavaa. Mosesimilli allakkanik siullernik allattup kapitalimi tamatumani versimi siullermi allassimaqqaarfiit hebræerisuut naapertorlugit Jehovap aqqa atorpaa. Aappassaanik, Saatanip Guuti ‘naalakkiisutut’ eqqartornagu Guuti ‘oqarneraannarpaa’. (1 Mosesi 2:16) Taamaalilluni Saatanip naalakkiut tamanna peqqusersusaarluni soqutaanngitsutut isigilersinniarunarpaa. Pingajussaanik, Eva kisiat oqaloqatigigaluarlugu qasseersiut, “-kkisi”, atorpaa. Taamaalilluni pingaarniartuunera iluatsitaarniarsimasinnaallugulu pingaaruteqartutut — imminut sinnerluni uinilu sinnerlugu oqaaseqarnissamut piginnaatitaasutut — misigilersinniarsimasinnaavaa. Qanoq kinguneqarpa? Eva uini sinnerlugu oqaaseqarsinnaasorinnguartsiarpoq, pularteriaarsummummi ima oqarpoq: “Naatsiiviup orpiisa paarnaannik nerisinnaatitaavugut.”

5. (a) Saatanip Eva sumik eqqarsaatiginninnerulersippaa? (b) Evap paarnamik nerinermigut suna ersersippaa?

⁵ Saatanip aamma Guutip oqaasii allanngortillugit oqaatigai. Aperigami Guuti ilumut oqarnersoq Adamip Evallu ‘naatsiiviup orpii neriffigissanngikkaat’ oqamisaarporlusooq Guuti piumasaqarpallaartoq. Taava Saatanip Eva imminut eqqarsaatigilersippaa ‘Guutisullu ilernermigut’  pissutsinik atukkaminik pitsanngorsaasinnaasorilersillugu. Saatanip Eva Guutimut imminik sunik tamanik tunisisumut attaveqarnerminingarnit orpimmik taassumalu paarnaanik eqqarsaatiginninnerulersippaa. (Atuaruk 1 Mosesi 3:6). Evap paarnamik nerinermigut ersersippaa Jehova inuunermini pinngaarnerpaatut isiginagu.

Jobip nalaani apeqqusiineq

6. Saatani Jobip assuarnaassusianik qanoq apeqqusiiva, Jobilu sumut periarfissaqalerpa?

⁶ Ukiut hundredelikkuutaat tamatuma kingorna Jobi aalajaatsoq periarfissaqalerpoq inuunermini kimik pingaarnerpaatitsinerminik ersersitsinissamut. Jehovap Jobip assuarnaassusia Saatanimut eqqaammagu Saatani ima unammillerluni akivoq: “Jobimi pissutissaqarluarunarpoq Guutimik mianerinninnerminut.” (Atuakkit Jobi 1:7-10). Saatanip Jobip Guutimut naalannera miserratiginngilaa, pissutiginiagaali apeqquserpai. Saatani oqamisaarpoq Jobi namminissarsiornini pissutigalugu asanninneq pissutiginagu Jehovamut kiffartortoq. Jobi unnerluutiginnissutip tamatuma eqquunngitsuuneranik kisimi uppernarsaasinnaavoq, tamatumunngalu periarfissaqalerpoq.

7, 8. Jobip naalliunnartut suut misigai, aamma aalajaannermigut pinertusaarnermigullu suna ersersippaa?

⁷ Jehovap akueraa Saatanip ajunaarnernik malittuinnarnik Jobimut nalliutititsinnissaa. (Jobi 1:12-19) Taama pisoqarmat Jobi qanoq iliorpa? Paasivarput Jobi ‘ajortuliunngitsoq Guutilu assuarliuteqarfiginngikkaa’. (Jobi 1:22) Saatanili nipangiinnanngilaq. Unnerluutigeqqippaa ima oqarluni: “Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu.” * (Jobi 2:4) Saatanip Jobi timikkut naalliuuteqaleruni Jehovamik inuunermini pingaarnerpaatitsiunnaassanerarpaa.

⁸ Jobi nappaammit maajunnartumit takussunarsisinneqarpoq, taavalu nuliata Guutimik perloqqusiinnaqqullugulu toquinnaqquaa. Kingusinnerusukkut tuppallersaaniaraluartunit pingasunit ingasattunik unioqqutitsisimanerarlugu unnerluutigineqarpoq. (Jobi 2:11-13; 8:2-6; 22:2, 3) Naalliuuterpassuaqaraluarluni Jobi assuarnaattuarpoq. (Atuakkit Jobi 2:9, 10). Aalajaannermigut pinertusaarnermigullu ersersippaa Jehova inuunermini pingaanerpaatillugu. Jobip aamma ersersippaa allaat inuk naammalluinnanngitsoq Diaavulup unnerluutiginnissutaanut eqqunngitsunut akissutaasinnaasoq. — Naleqqiuguk Ussatit 27:11.

Jiisusip akissutaa naammalluinnartoq

9. (a) Saatanip Jiisusi timikkut pisariaqartitaanik qanoq eqqarsaatiginninnerulersinniaraluarpaa? (b) Usserniarneqarami Jiisusi qanoq piva?

⁹ Jiisusi kuisinnerata kingunitsianngua Saatanip Jiisusi inuunermini Jehovamik pingaarnerpaatitsisuuneraninngarnit kissaatigisanik namminissarsiortunik eqqarsaatiginninnerulersinniaraluarpaa. Diaavulup Jiisusi pingasoriarluni  usserniaraluarpaa. Siullermik Diaavulup Jiisusip timikkut pisariaqartitsinera atornerloriaraluarpaa ujaqqanik timiusanngortitseqqullugu. (Matthæusi 4:2, 3) Jiisusi ullut 40-t iisaqannginnami perlilersorujussuuvoq. Taamaattumik Diaavulup Jiisusi neriniassammat taassuma tupinnartuliorsinnaanera atornerloqquaa. Jiisusi qanoq piva? Evatut pinnani Jiisusip Jehovap oqaasia pingaarnerutippaa, ussernartorlu ingerlaannaq itigartippaa. — Atuaruk Matthæusi 4:4.

10. Sooq Saatanip Jiisusi naalaffiup inngianit nakkaqquaa?

¹⁰ Saatanip aamma Jiisusi namminissarsiortinniaraluarpaa naalaffiup inngianit nakkaqqullugu. (Matthæusi 4:5, 6) Saatanip suna anguniagarigaluarpaa? Saatani oqarpoq Jiisusi ajoqusernani nakkarsinnaaguni ‘Guutip ernerigaani’ uppernarsaassasoq. Erseqqippoq Diaavulup kissaatigigaa Jiisusi tusaamaneqarnerminik ingasaassilluni pingaartitsilissasoq, allaat tusaamaneqarnerminik ima pingaartitsitigilissasoq tupinnartuliornikkut annaanneqarumalluni. Saatanip nalunngilaa ilaat makitanertik pissutigalugu allanillu ataqqisaajunnaarumanatik ulorianartumik iliuuseqarumasartut. Saatanip allassimaffik kukkusumik atorpaa, Jiisusili Jehovap oqaasianik eqqortumik paasinnisimanerminik ersersitsivoq. (Atuaruk Matthæusi 4:7). Jiisusip Diaavulup ussiiniarneranik itigartitsinermigut erserseqqippaa Jehova inuunermini pingaanerpaatillugu.

11. Sooq Jiisusip Diaavulup silarsuarmi naalagaaffinnik tamanik neqeroorutaa itigartippaa?

¹¹ Saatani Jiisusimik kingullermik usseeriaraluarnermini ima ingasatsigaaq silarsuarmi naalagaaffiit tamaasa neqeroorutigalugit. (Matthæusi 4:8, 9) Jiisusip neqeroorut ingerlaannaq itigartippaa. Nalunngilaa neqeroorummut akuersiguni Jehovap kisimi oqartussaaneranik — Guutip qutsinnerusaartutut naalakkersuisinnaatitaaneranik — itigartitsineq assigiinnassagaa. (Atuaruk Matthæusi 4:10). Usserniarneqarnermini tamani Jiisusip Allakkat Hebræerisuut Jehovap nammineq aqqanik ilallit issuarlugit Saatani akisarpaa.

12. Jiisusi nunarsuarmi toqungajalerluni qanoq sapernartorujussuarmik aalajangigassaqalerpa, aalajangiineralu sumik ilinniarfigisinnaavarput?

¹² Jiisusi nunarsuarmi toqungajalerluni sapernartorujussuarmik aalajangigassaqalerpoq.  Inuunerminik pilliuteqarumanini oqaatigisaqattaartarpaa. (Matthæusi 20:17-19, 28; Lukasi 12:50; Johannesi 16:28) Aammattaarli nalunngilaa eqqunngitsumik unnerluutigineqassalluni, juutit eqqartuussisuinit eqqartuunneqartussaalluni Guutimillu mitallersutut toqutaasussaalluni. Tamanna isumakuluutigingaarpaa. Ima qinuvoq: “Ataataga, ajornanngippat ermutsip uuma uanga qaangiinnarlinga.” Imali nangippoq: “Uangali piumasara pinnani illit piumasat pili.” (Matthæusi 26:39) Aap, Jiisusip toqussi tikillugu aalajaannera kimik inuunermini pingaarnerpaatitsineranut qularnanngilluinnartumik uppernarsaataavoq!

Akissuterput

13. Evamut, Jobimut, Jiisusimullu Kristusimut tunngatillugu qanoq paasisaqarpugut?

¹³ Maannamut paasisavut suuppat? Evamik oqaluttuami paasivarput kissaatinut namminissarsiortunut nakkaannartut imminullu pingaartippallaartut ersersikkaat inuunerminni Jehovamik pingaarnerpaatitsinnginnertik. Jobip aalajaattuarneranit paasivarput allaat inuit naammalluinnanngitsut ajornartorsiutitik — allaat ajornartorsiutiminnut pissutaasut paasilluinnanngikkaluarlugit — aalajaallutik naammagalugit atorunikkit Jehovamik inuunerminni pingaanerpaatitsinertik ersersissinnaagaat. (Jaaku 5:11) Kiisalu Jiisusip maligassiaanit paasivarput nikanarsarneqarnissamut piareersimassasugut inuttullu tusaamaneqarnitsinnik pingaartitsivallaassanngitsugut. (Hebræerit 12:2) Paasisavulli qanoq atorsinnaavavut?

14, 15. Jiisusip ussernartunut periarnera Evap periarneranit qanoq allaanerua, qanorlu Jiisusi ilaarsinnaavarput? (Assiliaq qupp. 20-miittoq oqaaseqarfigiuk).

¹⁴ Ussernartorsiortinneqaraangavit Jehova puiunngisaannaruk. Evap ussernartoq siunerminiittoq kisiat eqqarsaatigaa. Evap paarnaq takuaa isumaqalerlunilu ‘neriffigiuminartuullunilu isigiuminartuusoq’. (1 Mosesi 3:6) Jiisusip ussernartunut pingasunut periarneranit allaanerulluinnassusia! Ussernartorsiortinneqaraangami ussernartunut nakkaannassagaluaruni kingunissai eqqarsaatigisarpai. Guutip oqaasia tatigaa Jehovallu aqqa atortarlugu.

¹⁵ Uagut suna eqqarsaatigisarparput Jehovap iluarinngisaanik iliornissamut ussernartorsiortinneqaraangatta? Ussernartorsiorfipput eqqarsaatiginerujartortillugu kissaatipilupput sakkortunerulissaaq. (Jaaku 1:14, 15) Kissaatipiluk kissaatigiunnaarniarlugu iliuuseqapallattariaqarpugut, allaat iliuuseqarnissaq timitta pisataasa ilaannik peersinertullusooq issagaluarpat. (Matthæusi 5:29, 30) Jiisusitut iliuuserisinnaasatta kingunissai — Jehovamut attaveqarnitsinnut qanoq sunniuteqarsinnaanerat — eqqarsaatigisariaqarpavut. Jehovap oqaasiani, Biibilimi, qanoq allaqqasoqarnersoq eqqaamasariaqarparput. Aatsaat taamaaliornitsigut ersersissinnaavarput Jehova inuunitsinni pingaarnerpaatillutigu.

16-18. (a) Suut nikalluutigisinnaallugillu isumakuluutigisinnaavavut? (b) Nikallujuittuarnissamut suna iluaqutigisinnaavarput?

¹⁶ Alianartunik nalaataqaraangavit Jehova kamaatinngisaannaruk. (Ussatit 19:3) Silarsuup ajortup matuma naggatissaa qanilliartortillugu Jehovap kiffai ajunaarnernit eqqugaasartut amerliartorput. Tupinnartuliornikkut illersorneqarnissarput naatsorsuutiginngilarput. Jobitut asasatsinnik annaasaqaraangatta arlaatigulluunniit anniaateqaraangatta aliasuutigingaartarparput.

¹⁷ Jobip paasinngilaa taama ajortigisumik nalaataqarnini sooq Jehovap akuerineraa. Uaguttaaq ajortunik pisoqartarnera immaqa ilaannikkut paasisinnaasanngilarput. Qatanngutit aalajaatsut nunap sajunnerani, soorlu Haitimi pisimasumi, pinngortitamiluunniit ajunaarnersuarni allani toqutaasimasut pillugit immaqa tusagaqarsimavugut. Imaluunniit qatanngummik pinerlineqarsimasumik ajunaarnermilluunniit eqqugaalluni toqutaasimasumik nalunngisaqarpugut. Imaluunniit nammineq ajornartorsiuteqangaarpugut naapertuilluanngitsumilluunniit pineqartutut misigaluta. Immaqa isumatsalluta ima eqqarsarpugut: ‘Jehova, sooq? Sooq eqqugaavunga? Ajortumik iliuuseqarama?’ (Habakkuki 1:2, 3) Nikallujuittuarnissamut suna iluaqutigisinnaavarput?

¹⁸ Alianartunik nalaataqaraangatta eqqarsalissanngilagut tamakku Jehovamit iluarisaajunnaarnitsinnut pissutaasut. Tamanna Jiisusip  erseqqissarpaa nalimini pisimasut marluk alianartut eqqartoramigit. (Atuakkit Lukasi 13:1-5). Ajunaarnerit amerlanerit ‘nalaatsornikkut pisarput’. (Oqaluussisartup oqaasii 9:11, 1990) Isumakuluutitsinnut suna pissutaagaluarpalluunniit nikallujuittuarsinnaavugut ‘Guuti tuppallersaajuartoq’ tatigiuarutsigu. Aalajaattuarnissatsinnut pisariaqartitatsinnik nakussatsissavaatigut. — 2 Korinthimiut 1:3-6.

19, 20. Pisimasut nikanarsaataasut naammagalugit atornissaannut Jiisusip suna iluaqutigaa, taassumatullu iliornissatsinnut suna iluaqutigisinnaavarput?

¹⁹ Iliuutsitit makitanermit nikanarsarneqarnissamillu siooranermit aqutsinngisaannakkit. Jiisusi maniguukkami ‘imminut imaarsinnaavoq inussiatullu isikkoqalerluni’. (Filippimiut 2:5-8, NV) Jiisusip pisimasorpassuit nikanarsaataasut naammagalugit atorsinnaavai Jehova tatigigamiuk. (1 Petrusi 2:23, 24) Taamaalilluni Jiisusip ersersippaa Jehovap piumasaatut iliornissani inuunermini pingaarnerpaatillugu, taamaattumillu ‘akitsingaartitaavoq’. (Filippimiut 2:9) Jiisusip ajoqersukkani kajumissaarpai maligassiaminik malinneqqullugit. — Matthæusi 23:11, 12; Lukasi 9:26.

²⁰ Ilaannikkut uppernikkut misilinneqarnivut peqqusiileqinarsinnaasarput. Apustililli Paulusip qularutiginninnginneratut qularutiginninngilluinnartariaqarpugut. Ima allappoq: “Taamaattumittaaq tamanna naalliuutissaraara; kisianni kanngusunngilanga nalunnginnakku upperfigisara kinaasoq, qularinnginnakkulu taassuma sapinngikkaa erlinnartuut uannut paarititaq nakkutigissallugu ullussaq taanna nalliutserlugu.” — 2 Timotheusi 1:12.

21. Silarsuarmi namminissarsiorfiusumi illit sunissat aalajangiusimaviuk?

²¹ Biibilimi siulittuutigineqarpoq inuit nalitsinni inuusut ‘namminissarsiortuussasut’. (2 Timotheusi 3:2) Taamaattumik tupigissanngilarput inunnit imminut salliutittunit avatangiiseqaratta. Namminissarsiornermit tamatumannga sunnertinngisaannarta! Usserniarneqaraluarutta, alianartunik nalaataqaraluarutta, nikanarsarneqaraluaruttaluunniit Jehovamik inuunitsinni pingaarnerpaatitsinitsinnik ersersitsinissaq tamatta immikkut aalajangiusimasariaqarparput!

[Quppernerup ataani ilanngussaq]

Qanoq ilinniutigisinnaavarput . . .

• Evap Saatanimit salloqittagaanera?

• Jobip ajunaarnernit eqqugaagami qanoq periarnera?

• Jiisusip pingaarnerpaatitsinera?

[Atuaqqissaarnermi apeqqutit]

[Qupp. 19-mi assiliartaq]

Evap Jehovamut attaveqarnini eqqarsaatiginngilaa

[Qupp. 20-mi assiliartaq]

Jiisusip Saatanip ussiiniarneri itigartippai Jehovallu piumasaatut iliornissani pingaarnerutillugu

[Qupp. 22-mi assiliartat]

Haitimi nunap sajunnerata kingorna tupermiit tupermut oqaluussineq

Ajornartorsiungaarfiusuni ‘Guuti tuppallersaajuartoq’ tunaarisinnaavarput